သတင်းနှင့် လှုပ်ရှားမှုများ

နေပြည်တော်၊ (၈.၁.၂၀၂၁)

    အိမ်သုံးလျှပ်စစ်နှင့်အီလက်ထရောနစ်ပစ္စည်းများအား ထုတ်လုပ်ခြင်း၊ တင်ပို့ခြင်း၊ တင်သွင်းခြင်း၊ ဖြန့်ဖြူး ရောင်းချခြင်းတို့နှင့်ပတ်သက်၍ စားသုံးသူများဘေးအန္တရာယ်လုံခြုံစိတ်ချစွာ သုံးစွဲနိုင်ရေးအတွက် စည်းမျဉ်း ရေးဆွဲပြဋ္ဌာန်း အကောင်အထည်ဖော်ဆောင်ရွက်နိုင်ရေးအတွက် ညှိနှိုင်းအစည်းအဝေးကို ယနေ့ နံနက် ၁၀:၀၀ နာရီတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၃) အစည်းဝေး ခန်းမ၌ ကျင်းပပြုလုပ်ခဲ့ပါတယ်။ အဆိုပါ အစည်းအဝေးသို့ စီးပွားရေးနှင့် ကူးသန်းရောင်းဝယ်ရေး ဝန်ကြီး ဌာန ဒုတိယဝန်ကြီး ဦးအောင်ထူး၊ လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးခင်မောင်ဝင်း၊ စက်မှုကြီးကြပ်ရေးနှင့်စစ်ဆေးရေးဦးစီးဌာန ညွှန်ကြားရေးမှူးချုပ်၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ အမြဲတမ်းအတွင်းဝန်၊ လျှပ်စစ်ဓာတ်အားဖြန့်ဖြူးရေးလုပ်ငန်း ဦးဆောင်ညွှန်ကြားရေးမှူးနှင့် ဌာနဆိုင်ရာ တာဝန်ရှိသူများ တက်ရောက်ခဲ့ပါသည်။

              အစည်းအဝေးတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးက အဖွင့် အမှာစကားပြောကြားရာတွင် ယနေ့မြန်မာနိုင်ငံတွင် လျှပ်စစ်ဓာတ်အားပိုမိုထုတ်လုပ်ဖြန့်ဖြူးပေးနိုင်သည် နှင့်အညီ လျှပ်စစ်နှင့်အီလက်ထရောနစ်ပစ္စည်းများ အသုံးပြုမှု တိုးတက်များပြားလာပါကြောင်း၊ အချို့ လျှပ်စစ်ပစ္စည်းများသည် ပြည်တွင်းတွင် ထုတ်လုပ်နိုင်မှုမရှိသဖြင့် ပြည်ပမှမှာယူတင်သွင်းလျက်ရှိရာ အရည် အသွေးပိုင်းဆိုင်ရာ သတ်မှတ်ချက်နှင့်ကိုက်ညီရန် အရေးကြီးပါကြောင်း၊ မြန်မာနိုင်ငံအနေဖြင့် ၂၀၀၂ ခုနှစ် နှင့် ၂၀၀၅ ခုနှစ်တွင် လျှပ်စစ်နှင့်အီလက်ထရော နစ်ပစ္စည်းများနှင့်ပတ်သက်သည့် အာဆီယံဒေသတွင်း အပြန်အလှန်လက်ခံ အသိအမှတ်ပြုသည့်အစီအစဉ် (ASEAN EEE MRA: ASEAN Sectoral Mutual Recognition for Electrical and Electronic Equipment)နှင့် အာဆီယံဒေသတွင်း လျှပ်စစ်နှင့် အီလက်ထရောနစ်ပစ္စည်းများအတွက် စည်းမျဉ်းများအား တပြေးညီသတ်မှတ်ရေး အစီအစဉ် (AHEEERR: ASEAN Harmonized Electrical and Electronic Equipment Regulatory Regime)အစီအစဉ်တို့ကို ပါဝင်လက်မှတ်ရေးထိုးထားသော်လည်း ယနေ့အချိန်အထိ လိုက်ပါအကောင် အထည်ဖော်ဆောင်ရွက်နိုင်ခြင်း မရှိသေးသည့်အတွက် ကုန်သွယ်မှုလွယ်ကူချောမွေ့စေရေးနှင့် စားသုံးသူ ကာကွယ်ရေးတို့အား အပြည့်အဝ ဆောင်ရွက်ပေးနိုင်ခြင်း မရှိသေးသည်ကိုတွေ့ရှိရပါကြောင်း၊ သို့ဖြစ်၍ လက်ရှိရေးဆွဲပြုစုထားသည့် အိမ်သုံး လျှပ်စစ်နှင့်အီလက်ထရောနစ်ပစ္စည်းများအတွက် စားသုံးသူများ ဘေးအန္တရာယ်လုံခြုံ စိတ်ချရမှုရှိစေရေး စည်းမျဉ်းများ (EEE Safety Regulations) အပေါ်တွင် ပိုမို ပြည့်စုံမှုရှိစေရန်နှင့် အမြန်ဆုံးအကောင်အထည်ဖော်ပြဋ္ဌာန်းနိုင်ရေး ဝိုင်းဝန်းအကြံပြုဆွေးနွေးပေးကြရန် လိုအပ်ကြောင်း လမ်းညွှန်ပြောကြားပါတယ်။

          ဆက်လက်၍ လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီးက လျှပ်စစ်နှင့် စွမ်းအင်ဝန်ကြီးဌာန အနေဖြင့် လျှပ်စစ်ဓာတ်အား ထုတ်လုပ်ခြင်း၊ သယ်ယူပို့ဆောင်ခြင်းနှင့် ဖြန့်ဖြူးခြင်းလုပ်ငန်းများကို အဓိကဆောင်ရွက်ပါကြောင်း၊ နှစ်စဉ် လျှပ်စစ်ဓာတ်အား ပိုမိုသုံးစွဲနိုင်ရန် ဆောင်ရွက်ရာတွင် ၂၀၃၀ ပြည့်နှစ်တွင် ၁၀၀ ရာခိုင်နှုန်း ပြည်သူများ လျှပ်စစ်သုံးစွဲနိုင်ရေး ကြိုးပမ်းဆောင်ရွက်လျက် ရှိပါကြောင်း၊ စစ်ဆေးရေးပိုင်းအနေဖြင့် ဗို့အားမြင့် လျှပ်စစ်ဓာတ်အားများအတွက် အဓိကတာဝန်ယူဆောင်ရွက်ပါ ကြောင်း၊ ယခုအခါတွင် လူတစ်ဦးလျှင် ၃၈၉ ယူနစ်အထိ သုံးစွဲလာနိုင်ပါကြောင်း၊ လျှပ်စစ်ဓာတ်အား ပိုမို သုံးစွဲလာနိုင်သည်နှင့်အမျှ လျှပ်စစ်ပစ္စည်းများကိုလည်း သုံးစွဲမှုများလာပါကြောင်း၊ လျှပ်စစ် ပစ္စည်းသုံးစွဲမှု များလာသည်နှင့်အမျှ ထိခိုက်မှုအန္တရာယ်များလည်း ပိုမိုများပြားလာပါကြောင်း၊ ပစ္စည်း၏ အရည်အသွေးပေါ် မူတည်၍ ထိခိုက်ပျက်စီးဆုံးရှုံးမှု များပြားရခြင်းသာ ဖြစ်ပါကြောင်း၊ သို့ပါ၍ စားသုံးသူပြည်သူများ ဘေးအန္တရာယ်ကင်းရှင်းရေး ဆောင်ရွက်ရန် အရေးကြီးလာပါကြောင်း၊ စားသုံးသူ ဘေးအန္တရာယ်ကင်းရှင်းရေးအတွက် သက်ဆိုင်ရာကဏ္ဍအလိုက် ပေါင်းစပ်ဆောင်ရွက်ရမည်ဖြစ်ပါ ကြောင်း၊ ယခုအခါ လျှပ်စစ်ဓာတ်အားသုံးစွဲမှုနှင့်ပတ်သက်၍ ကမ္ဘာ့နိုင်ငံများတွင် “One Sun, One World, One Grid” ဆောင်ပုဒ်နှင့်အညီ ကျင့်သုံးဆောင်ရွက်လျက်ရှိပါကြောင်း၊ ယင်းဆောင်ပုဒ်အရ လျှပ်စစ် ဓာတ်အားသုံးစွဲမှုနှင့်ပတ်သက်၍ ကြုံတွေ့ရသည့် အသက်အိုးအိမ်စည်းစိမ်ပျက်ဆီးဆုံးရှုံးမှုများကို ပြည်တွင်းသာမက ပြည်ပရှိစားသုံးသူပြည်သူများအတွက် အကာအကွယ်ပေးနိုင်မည့် စည်းမျဉ်းများဖြင့် ပေါင်းစည်းဆောင်ရွက်ရမည်ဖြစ်ပါကြောင်း လမ်းညွှန်ပြောကြားပါသည်။

          ထို့နောက် စားသုံးသူရေးရာဦးစီးဌာနမှ ရေးဆွဲပြုစုထားသည့်  EEE Safety Regulations   အသေးစိတ်ရှင်းလင်းတင်ပြမှုအပေါ် မြန်မာနိုင်ငံနှင့် သင့်လျော်မည့်  EEE Safety Regulations   တစ်ရပ် အမြန်ဆုံးအကောင်အထည်ဖော်ဆောင်ရွက်နိုင်ရေးအတွက် အဓိက တာဝန်ခံအဖွဲ့အစည်းများဖြစ်သည့် လျှပ်စစ်နှင့်စွမ်းအင်ဝန်ကြီးဌာန၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနနှင့် ပညာရေးဝန်ကြီးဌာနတို့မှ ဒုတိယဝန်ကြီးများ ဦးဆောင်၍ ပူးတွဲလုပ်ငန်းကော်မတီ (၁) ရပ် ဖွဲ့စည်းပြီး အမြန်ဆုံးအကောင်အထည်ဖော် ဆောင်ရွက်သွားမည်ဖြစ် ကြောင်း သတင်းရရှိပါသည်။

ITQM,DOCA

     ၂၁.၁၂.၂၀၂၀ ရက်နေ့တွင် စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံသည်  မွန်ပြည်နယ်၊ မော်လမြိုင်ခရိုင်၊ ကျိုက်မရောမြို့နယ် ချောင်းနှစ်ခွကျေးရွာနှင့် တောင်းကလေးကျေးရွာ အတွင်းရှိ စားသောက်ဆိုင်နှင့် လက်ဘက်ရည်ဆိုင်များအား ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသော COVID-19 ကာကွယ်၊ တားဆီးရေးဆိုင်ရာစံသတ်မှတ်ချက်များနှင့်ကိုက်ညီပြီး (A) အဆင့်၊(B)အဆင့်သတ်မှတ်ခြင်းခံရသော စားသောက်ဆိုင်နှင့် လက်ဖက်ရည်ဆိုင်များ ပြန်လည်ဖွင့်လှစ် ခွင့်ပြုနိုင်ရေးအတွက် အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊ ပြည်သူ့ ကျန်းမာရေးဦးစီးဌာနနှင့် စည်ပင်သာယာရေးအဖွဲ့များ ပူးပေါင်း၍ ကွင်းဆင်းစစ်ဆေးခြင်း ဆောင်ရွက်ခဲ့ကြကြောင်း သိရှိရပါသည်။

မွန်ပြည်နယ်၊ စားသုံးသူရေးရာဦးစီးဌာန

          စီးပွားရေးနှင့်ကူးသန်းရောင်းဝယ်ရေးဝန်ကြီဌာန၊ စစ်ကိုင်းခရိုင်၊ မြောင်မြို့နယ် စားသုံးသူရေးရာဦးစီးဌာန မြို့နယ်တာဝန်ခံ ဦးအောင်လင်းသည် (၁၈.၁၂.၂၀၂၀) ရက်နေ့တွင် မိတ်ဖတ်ဌာနများဖြစ်သော မြန်မာနိုင်ငံ ရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ မြို့နယ် ကျန်းမာရေးဦးစီးဌာန၊ ကျေးရွာစားသုံးသူရေးရာအဖွဲ့တို့ဖြင့် ရွှေပေါက်ပင်ကျေးရွာရှိ ကုန်စုံဆိုင်များအား ကွင်းအသိပညာပေး စစ်ဆေးခဲ့သည်။

          ထိုသို့ကွင်းဆင်းစစ်ဆေးရာတွင် စားသုံးသူကာကွယ်ရေးဉပဒေ အခန်း (၁၈) ပါ ကုန်အညွှန်း အမှတ်အသားဖေါ်ပြခြင်းနှင့်ပါတ်သက်၍ ကုန်စည်များအပေါ်တွင် မဖြစ်မနေပါဝင်ရမည့် အချက်များဖြစ်သည့် ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ သုံးစွဲပုံအညွှန်း၊ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓါတ်မတည့်ကြောင်း ဖော်ပြချက်၊ ကြိုတင်သတိပေးချက်များကို ကုန်စည်ပေါ်တွင်  မြန်မာဘာသာနှင့်ဖြစ်စေ၊ အခြားဘာသာနှင့်ဖြစ်စေ (သို့မဟုတ်) တွဲလျက်ဖြစ်စေ မဖြစ်မနေ ဖေါ်ပြပါရှိရမည်ဖြစ်ကြောင်း အသိပညာပေးရှင်းလင်းခဲ့ပြီး၊ မြန်မာနိုင်ငံ စားသုံးသူကော်ပရှင်၏ (၃.၁၂.၂၀၁၉) ရက်စွဲပါ ညွှန်ကြားချက်အမှတ် ၂/၂၀၁၉  အရ ကုန်စည်အမျိုးအစားအလိုက် အသေးစိတ် ညွှန်ကြားချက်နှင့် ကိုက်ညီမှု ရှိမရှိ အား ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး(DOCA)

          စစ်ကိုင်းတိုင်းဒေသကြီး၊ ကသာခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး ဦးသန်းပို နှင့် အဖွဲ့သည် မိတ်ဖက်ဌာနများဖြစ်သည့် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင် သာယာရေး၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနများနှင့်အတူ ပြည်သူများ ဘေးအန္တရာယ် ကင်းရှင်းသော ကုန်စည်များ အသုံးပြုနိုင်ရန်အတွက် ၂၀၂၀ ပြည့်နှစ် ဒီဇင်ဘာလ (၁၆)ရက်နေ့တွင် ပင်လည်ဘူးမြို့နယ်၊ ပင်းကြိုင်းကျေးရွာတွင် လည်းကောင်း၊ ဒီဇင်ဘာလ(၁၇)ရက်နေ့တွင် ကောလင်းမြို့ပေါ်ရှိ ကုန်စုံဆိုင်များ မုန့်ဆိုင်များတွင် လည်းကောင်း၊ ဒီဇင်ဘာလ(၁၈)ရက်နေ့တွင် ထီးချိုင့်မြို့၊ မောင်းကုန်းစံပြကျေးရွာရှိ ကုန်စုံဆိုင်များတွင် လည်းကောင်း ကွင်းဆင်းစစ်ဆေးခဲ့ပါသည်။

ထိုသို့ စစ်ဆေးရာတွင် သက်ဆိုင်ရာဌာနမှ အသိပေး ကြေငြာထားသည့် သုံးစွဲရန် မသင့်သော တားမြစ်ကုန်ပစ္စည်းများ၊ သက်တမ်းလွန်ပစ္စည်းများနှင့် ဆေးဝါးများ ရောင်းချမှု ရှိ/မရှိစစ်ဆေးခြင်း၊ ကိုဗစ်-၁၉ကာလအတွင်း စားသောက်ကုန်များ၊ ကိုဗစ်-၁၉ ကာကွယ်ထိန်းချုပ်၊ ကုသရေးဆိုင်ရာ အထောက်အကူပြုပစ္စည်းများ၊ ဆေးဝါးများ ဈေးနှုန်းမြှင့်တင် ရောင်းချခြင်း ရှိ/မရှိတို့ကို စစ်ဆေးခဲ့ပြီး ရောင်းချသူ ဆိုင်ရှင်များအား ပြည်သူများအား ဘေးအန္တရာယ်ဖြစ်စေသော စားသောက်ကုန်များအား မရောင်းချကြရန်၊ ကုန်စည်များတွင် ကုန်အညွှန်းအမှတ်အသား (မြန်မာစာဖြင့်) ပြည့်စုံစွာဖော်ပြ၍ ထည့်သွင်းရောင်းချရန်နှင့် လိုက်နာခြင်းမရှိပါက စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း အသိပေး ပြောကြားခဲ့ပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသား လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

ကသာခရိုင်
စားသုံးသူရေးရာဦးစီးဌာန

          ခရိုင်အဆင့် Covid-19 ကာကွယ်ထိန်းချုပ်ရေးနှင့်အရေးပေါ်တုံ့ပြန်ရေးလုပ်ငန်းဆပ်ကော်မတီ အလိုက် တာဝန်များခွဲဝေပေးအပ်ခဲ့ရာ ဗန်းမော်ခရိုင် စားသုံးသူရေးရာဦးစီးဌာနမှ ခရိုင်ဦးစီးမှူး ဦးအောင်ကျော်ဦး(လက်ထောက်ညွှန်ကြားရေးမှူး)အနေဖြင့်ကော်မတီများတွင် ပူးပေါင်းပါဝင်ဆောင်ရွက်လျက်ရှိပါသည်။

          ထိုသို့ဆောင်ရွက်လျက်ရှိရာ Covid-19 ကာလအတွင်း ဗန်းမော်ခရိုင်၌ အစိုးရဌာန(၇)ခုဖြင့်ဖွဲ့ စည်းထားသော စက်ရုံ၊အလုပ်ရုံများစစ်ဆေးရေးကော်မတီရှိ ပူးပေါင်းစစ်ဆေးရေးအဖွဲ့သည် (၁၄.၁၂.၂၀၂၀) မှ(၁၇.၁၂.၂၀၂၀)ရက်နေ့ထိ ဗန်းမော်မြို့နယ်အတွင်းရှိ နေမင်းဆီစက်၊ ဦးကောင်းဆီစက်၊ D-1 အဆင့်မြင့် ကားပြုပြင်ရေး(ကားလေးဝပ်ရှော့)၊ Vision Fund Myanmar Company Ltd များသို့ ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသော Covid-19 ဆိုင်ရာလိုက်နာရမည့် (A, B, C) စည်းကမ်း သတ်မှတ်ချက်များကို ယခင်ပုံမှန်စစ်ဆေးစဉ် ဆောင်ရွက်ရန်လိုအပ်သည်များ မှာကြားထားမှုအပေါ်လိုက်နာဆောင်ရွက်မှု ရှိ/မရှိကို သတ်မှတ်စည်းကမ်းချက်များနှင့်အညီစစ်ဆေးခြင်း၊ အဆင့်သတ်မှတ်ချက်များနှင့်ညီသော စက်ရုံ၊အလုပ်ရုံများကို (A) အဆင့်သို့တိုးမြှင့်ပေးခြင်း၊ အဆင့်သတ်မှတ်ချက်များနှင့်မညီသော စက်ရုံ၊အလုပ်ရုံများကို (B,C)သို့လျှော့ချခြင်းတို့ကို ရှောင်တခင်စစ်ဆေးခြင်းများ ဆောင်ရွက်ခဲ့ပြီး မိမိဌာနမှလည်း ဌာနလုပ်ငန်းတာဝန်များဖြစ်သော စားသုံးသူကာကွယ်ရေးဥပဒေ၂၀၁၉ အခန်း(၁၈)ပါ ကုန်အညွှန်းအမှတ်အသားဖော်ခြင်းနှင့်စပ်လျဉ်း၍ ကုန်စည်များထုတ်လုပ်ရောင်းချပါက ထုတ်ပြန်ထားသောဥပဒေနှင့်အညီ ကုန်အညွှန်းအမှတ်အသားများ ပြည့်စုံစွာ ထည့်သွင်းဖော်ပြပေးရမည် ဖြစ်ကြောင်းတို့ကို ရှင်းလင်းဆွေးနွေးပြောကြားတို့ကို ဆောင်ရွက်ခဲ့ပါသည်။

စားသုံးသူရေးရာဦးစီးဌာန

ကချင်ပြည်နယ်