သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဦးစီးမှူး ဦးစိုးအောင်၊ ဒု-တိုင်းဦးစီးမှူး ဦးထွန်းထွန်းနှင့် လက်ထောက်ညွှန်ကြားရေးမှူး ဒေါ်ဖြူဖြူလတ်တို့သည် ဇူလိုင်လ (၁၁) ရက်နေ့၊ နံနက် (၁၀:ဝဝ) နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရုံးအမှတ် (၃)၊ နေပြည်တော်တွင် E-Virtualစနစ်ဖြင့်ပြုလုပ်သော မြန်မာ့ကော်ဖီကမ္ဘာ့ဈေးကွက်သို့ထိုးဖောက်နိုင်ရေး ကော်ဖီကိုအဓိကပို့ကုန်တစ်ခုအဖြစ် တင်ပို့နိုင်သည့်အထိဆောင်ရွက်နိုင်ရေးနှင့် နိုင်ငံအတွင်း ကော်ဖီတိုးချဲ့ စိုက်ပျိုးရာတွင် ကော်ဖီတန်ဖိုးကွင်းဆက်လုပ်ငန်းများဖွံ့ဖြိုးမှုရရှိစေရေး အရှိန်အဟုန်မြှင့်ဆောင်ရွက်နိုင်ရေးအတွက် မြန်မာ့ကော်ဖီပို့ကုန်ဖွံ့ဖြိုးတိုးတက်ရေးလုပ်ငန်းအဖွဲ့ (Task Force) ညှိနှိုင်းအစည်းအဝေးသို့တက်ရောက်ခဲ့ပါသည်။

    ဧရာဝတီတိုင်းဒေသကြီးအတွင်း ကော်ဖီစိုက်ပျိုးမည့်အခြေအနေနှင့်ပတ်သက်၍ စိုက်ပျိုးရန်လျာထားဧက  (၁) ဧကအတွက် စိုက်ပျိုးပင်ပျိုးထောင်မှုနှင့်ပတ်သက်၍ ဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

   မွန်ပြည်နယ်၊ စားသုံးသူရေးရာဦးစီးဌာနသည့် မိတ်ဖက်ဌာနများနှင့် ပူးပေါင်းကာ စားသုံးသူဘေးအန္တရာယ်ကင်းရှင်းရေးအတွက် မော်လမြိုင်မြို့နယ်၊ အမှတ် (၂) ဈေးအတွင်း ရောင်းချလျက်ရှိသည့် စားသုံးဆီအမျိုးမျိုးတို့အား ဈေးကွက်စောင့်ကြည့်စစ်ဆေးခြင်းကို ၁၀.၇.၂၀၂၃ ရက်နေ့က ဆောင်ရွက်ခဲ့ပါသည်။

   ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူရေးရာဦးစီးဌာနမှ မော်လမြိုင် မြို့နယ်တာဝန်ခံ ဦးအောင်ကိုကိုနှင့် ဝန်ထမ်းများ၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်အထွေထွေ အုပ်ချုပ်ရေးဦးစီးဌာန၊ ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် တာဝန်ရှိသူများ ပူးပေါင်းကာ မော်လမြိုင်မြို့၊ အမှတ် (၂) ဈေးအတွင်း ရောင်းချနေသည့် ဆိုင်များ၌ စားသုံးဆီအမျိုးမျိုးတို့ကို ဘေးအန္တရာယ် ရှိ/မရှိ၊ ကုန်အညွှန်းအမှတ်အသားတွင် ဖော်ပြရမည့်အချက်များ ပါဝင်မှု ရှိ/မရှိ စသည်တို့ကို စားသုံးသူကာကွယ်ရေးဥပဒေနှင့်အညီ လိုက်လံစစ်ဆေးခဲ့ကြသည်။

DOCA(မွန်)

    မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှဝန်ထမ်းများသည် ၁၁.၇.၂၀၂၃ ရက်နေ့တွင် မော်လမြိုင်မြို့နယ်၊ အ.ထ.က (ခွဲ) စမ်းကြီးကျောင်းတွင် စားသုံးသူကာကွယ်ရေး အသိပညာပေးဟောပြောပွဲကို ကျင်းပပြုလုပ်ခဲ့ပြီး စမ်းကြီးကျောင်းရှိ ကျောင်းမုန့်ဈေးတန်းကို ဈေးကွက်စောင့်ကြည့် စစ်ဆေးခဲ့ပါသည်။

  ထို့အပြင် ကျောင်းမုန့်ဈေးတန်းအတွင်း ရောင်းချနေသော မြန်မာမုန့်များတွင် သန့်ရှင်းလတ်ဆက်မှုရှိစေရေးနှင့် လေဖောင်းမုန့်များ၊ ဖျော်ရည်ဘူးများစသည့် အသင့်စားမုန့်များ၌ ကုန်အညွှန်းအမှတ်အသားများ ပြည့်စုံမှုရှိ/မရှိစစ်ဆေးခြင်း၊ သက်တမ်းလွန်စားသောက်ကုန်များနှင့် စားသောက်ရန်မသင့်သော စားသောက်ကုန်များဖြစ်/မဖြစ်တို့ကို စစ်ဆေးခဲ့ပြီး ကုန်အညွှန်အမှတ်အသား ဖော်ပြပါရှိသော စားသောက်ကုန်များသာ ရောင်းချရန်နှင့် ဘေးအန္တရာယ်ကင်းသောစားသောက် ကုန်များသာရောင်းချရန် ဆွေးနွေးခဲ့ကြောင်း သိရှိရပါသည်။

 အဆိုပါ ဟောပြောပွဲတွင် စားသုံးသူရေးရာဦးစီးဌာနမှ  ဒေါ်ယွန်းမီမီဖူးဝေ အငယ်တန်းစာရေးက စားသုံးသူအခွင့်အရေးနှင့်တာဝန်များအကြောင်းရှင်းလင်းဆွေးနွေးခြင်း၊ ဒေါ်ဝါဝါမြိုင် ဦးစီးအရာရှိက ကုန်အညွှန်းအမှတ်အသားဆိုင်ရာများ၊ စားသုံးသူများနစ်နာဆုံးရှုံးမှုဖြစ်လာလျှင် တိုင်ကြားနိုင်သည့် နေရာများအပြင် Consumer Call Center သို့ဖုန်းခေါ်ဆို၍လည်း တိုင်ကြားနိုင်ကြောင်း၊ www.doca.gov.mm တွင်လည်း ဝင်ရောက်တိုင်ကြားနိုင်ကြောင်း ဟောပြောဆွေးနွေးခဲ့ပြီး ကျောင်းသား၊ ကျောင်းသူများ၏ မေးမြန်းမှုများကို ပြန်လည်ဖြေကြားပေးကာ လက်ကမ်းစာစောင်ဖြန့်ဝေခြင်းများ ဆောင်ရွက်ခဲ့ရာ ဆရာ/ဆရာမ၊ ကျောင်းသား/ကျောင်းသူ စုစုပေါင်း (၁၀၆) ဦး တက်ရောက်ခဲ့ပါသည်။

DOCA(မွန်)

   ဧရာဝတီတိုင်းဒေသကြီးသည် ရေခံမြေခံကောင်းမွန်ပြီး လယ်ယာစိုက်ပျိုးရေးကိုအခြေခံလျက် ဆန်၊ စပါးအများဆုံးစိုက်ပျိုးထုတ်လုပ်လျက်ရှိသော တိုင်းဒေသကြီးတစ်ခုဖြစ်ပြီး နှစ်စဉ် မိုးစပါးစိုက်ဧက (၃၇) သိန်းကျော်စိုက်ပျိုးလျက်ရှိပါကြောင်း၊ စပါးကြိတ်ခွဲရာမှ ထွက်ရှိလာသောဆန်များကို ဒေသတွင်းစားသုံးမှုဖူလုံရုံသာမက တခြားတိုင်းဒေသကြီးများနှင့် ပြည်ပသို့လည်း တင်ပို့ရောင်းချလျက်ရှိပါကြောင်းသိရှိရပါသည်။      

     (၂၀၂၃-၂၀၂၄) ဘဏ္ဍာနှစ်၊ မိုးစပါးရာသီအချိန်တွင် ဧရာဝတီတိုင်းဒေသကြီးအတွင်း စိုက်ဧက (၃၇၅၇၄၈၉) ဧကစိုက်ပျိုးရန်လျာထားခဲ့ရာ ပုသိမ်ခရိုင်၊ ကျုံပျော်ခရိုင်၊ ဟင်္သာတခရိုင်၊ မြန်အောင်ခရိုင်၊ မြောင်းမြခရိုင်၊ လပွတ္တာခရိုင်၊ မအူပင်ခရိုင်နှင့် ဖျာပုံခရိုင်တို့တွင် ဇွန်လကုန်အထိ မိုးစပါးစိုက်ဧက (၁၂၅၈၃၄၇) ဧက၊ ရာနှုန်းအားဖြင့် (၃၃.၄၉%) စိုက်ပျိုးပြီးစီး၍ ကျန်သည့်စိုက်ဧကများကို ဆက်လက်စိုက်ပျိုးရန် ပြင်ဆင်လျက်ရှိကြောင်း၊ ဧရာဝတီတိုင်းဒေသကြီး၊ စိုက်ပျိုးရေးဦးစီးဌာနကဦးဆောင်၍ ရာသီဥတုရေမြေ‌ဒေသနှင့်ကိုက်ညီသော အထွက်ကောင်းမျိုးများ၊ အရည်အသွေးကောင်းမျိုးများကိုတိုးချဲ့စိုက်ပျိုးရန်နှင့် ဆန်စပါးစိုက်ပျိုးထုတ်လုပ်မှုတိုးတက်ရေးအတွက် (၁) ဧကအထွက်နှုန်းတိုးတက်ရေး မျိုးကောင်းမျိုးသန့်များသုံးစွဲရန်တို့အတွက် မြို့နယ်စိုက်ပျိုးရေးဦးစီးဌာနနှင့် သက်ဆိုင်ရာဌာနဆိုင်ရာများပူးပေါင်း၍ အကောင်အထည်ဖော်ဆောင်ရွက်လျက်ရှိကြောင်း သိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ဇလွန်မြို့၊ မြို့နယ်တာဝန်ခံသည် မိတ်ဖက်ဌာနဆိုင်ရာများနှင့်ပူးပေါင်း၍  ဆန်တန်းရပ်ကွက်ရှိ ကုန်မျိုးစုံဆိုင်များကို (၁၀-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ဈေးကွက်စောင့်ကြည့်စစ်ဆေးခဲ့ပါသည်။

    ထိုသို့ကွင်းဆင်းစစ်ဆေးခဲ့ရာတွင် စားသုံးသူမိဘပြည်သူများဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသောကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်းအမှတ်အသားများပြည့်စုံမှန်ကန်စွာဖော်ပြခြင်းရှိ/မရှိတို့ကိုစစ်ဆေးခဲ့ပြီးနောက် မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ကြေညာထားသော ညွှန်ကြားချက်အမှတ် (၂/၂၀၁၉) နှင့်အညီ မြန်မာဘာသာဖြင့်ပြည်စုံစွာဖော်ပြထားသော ကုန်စည်များကိုသာရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးအတွက် သတ်မှတ်အရည်အသွေးပြည့်မီသောကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကိုသိရှိလိုက်နာကြရန် အသိပညာပေးဆွေးနွေးခဲ့ကာ ကုန်မျိုးစုံဆိုင် (၅) ဆိုင်ကို ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)