သတင်းနှင့် လှုပ်ရှားမှုများ

Powered by Drupal

ဝန်းသိုမြို့ စည်ပင်သာယာဈေးအား ဈေးကွက်စောင့်ကြည့်စစ်ဆေး

      စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန ကောလင်းခရိုင် မှ တာဝန်ရှိသူများက ဦးဆောင်၍ ဝန်းသိုမြို့နယ် စည်ပင်သာယာဈေးအတွင်း ရောင်းချနေသော ဈေးဆိုင်များအား ဈေးကွက်စောင့်ကြည့်စစ်ဆေးခြင်းကို ၂၀၂၁ ခုနှစ် ဇန်နဝါရီလ (၇)ရက်နေ့ တွင် ကုန်စုံဆိုင်များ၌ တားမြစ်ကုန်စည်များရောင်းချမှု ရှိ၊ မရှိ စစ်ဆေးခြင်း၊ ကိုဗစ်-၁၉ ကာကွယ် ထိန်းချုပ် ကုသရေးဆိုင်ရာ အထောက်အကူပြု ပစ္စည်းများ၊ ဆေးဝါးများနှင့် စားသောက်ကုန်ပစ္စည်းများအား ဈေးနှုန်းမြှင့်တင်ရောင်းချခြင်း ရှိ၊မရှိ စစ်ဆေးခြင်း နှင့် ကုန်စည်များတွင် ကုန်အညွှန်းအမှတ်အသားများ ပြည့်စုံစွာဖော်ပြခြင်း ရှိ၊ မရှိ စစ်ဆေးခြင်းများကို မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် မြို့နယ်မီးသတ် ဦးစီးဌာနတို့နှင့်ပူးပေါင်း၍ စစ်ဆေးခဲ့ပြီး ရောင်းချသူဆိုင်ရှင်များအား သက်တမ်းလွန် စားသောက်များ ရောင်းချခြင်း မပြုရန်၊ ကုန်စည်များတွင် ကုန်အညွှန်းအမှတ်အသား ပြည့်စုံစွာ ဖော်ပြပြီးမှသာ ရောင်းချကြရန် ဆွေးနွေးပြောကြားခဲ့ပြီး အသိပညာပေး လက်ကမ်းစာစောင်များဖြန့်ဝေခဲ့ကြောင်း သိရှိရပါသည်။

စားသုံးသူရေးရာဦးစီးဌာန
ကသာခရိုင်

ပြည်တွင်းကုန်သွယ်ရေးဖွံ့ဖြိုးမှုမှ အမျိုးသားအကျိုးစီးပွားဘက်စုံဖွံ့ဖြိုးတိုးတက်ရေးဆီသို့ …

ပြည်တွင်းကုန်သွယ်ရေးဆိုသည်မှာ

          ပြည်တွင်းကုန်သွယ်ရေး(Domestic Trade) ဟုဆိုရာ၌ ပြည်တွင်း၌ထွက်ရှိသည့် ထွက်ကုန်များ၊ ပြည်တွင်း၌ ထုတ်လုပ်သည့် ကုန်စည်နှင့် ဝန်ဆောင်မှုများကို နိုင်ငံ၏ နယ်နိမိတ်ဧရိယာအတွင်း ဒေသ တွင်း၌ လည်းကောင်း၊ ဒေသတစ်ခုမှ အခြားဒေသတစ်ခုသို့လည်းကောင်း ရောင်းဝယ်ခြင်း၊ ဖလှယ်ခြင်း ပြုလုပ်ခြင်းပင် ဖြစ်ပါသည်။ ထိုသို့ ကုန်သွယ်ရောင်းဝယ်မှုပြုရာတွင် လက်ကားရောင်းဝယ်ခြင်း (Wholesale trade) နှင့် လက်လီရောင်းဝယ်ခြင်း (Retail trade) ဟူ၍ (၂) ပိုင်း ပါဝင်ပါသည်။ လက် ကားကုန်သွယ်ရောင်းဝယ်ခြင်းသည် ကုန်ပစ္စည်းများကို ကုန်ထုတ်လုပ်သူများ၊ ကုန်သည်များထံမှ ပမာဏများများ ဝယ်ယူ၍ လက်လီရောင်းသူများ၊ စားသုံးသူများထံသို့ ပမာဏအနည်းငယ်စီဖြင့် ပြန်လည်ရောင်းချခြင်းဖြစ်ပြီး လက်ကားကုန်သည်များ၊ လက်ကားကိုယ်စားလှယ်အဖွဲ့များက လုပ် ကိုင်ဆောင်ရွက်လေ့ရှိကြပါသည်။ လက်လီရောင်းဝယ်ခြင်းမှာ လက်လီရောင်းဝယ်သူများက ပမာဏ အနည်းငယ်စီဖြင့် စားသုံးသူများထံ တိုက်ရိုက်ရောင်းချမှုပြုလုပ်ကြခြင်း ဖြစ်ပါသည်။

          ပြည်တွင်းကုန်သွယ်ရေးသည် နိုင်ငံတစ်နိုင်ငံအတွက် များစွာအရေးပါသော ကဏ္ဍတစ်ခုဖြစ်ပြီး ပြည်တွင်းကုန်သွယ်မှုဖွံ့ဖြိုးခြင်းဖြင့် နိုင်ငံအတွင်းရှိ ထွက်ကုန်များ၊ ကုန်စည်နှင့် ဝန်ဆောင်မှုလုပ်ငန်း များ စီးဆင်းခြင်းကို လွယ်ကူချောမွေ့စေမည့်အပြင် ပြည်တွင်းထုတ်လုပ်မှုနှင့် နိုင်ငံ့စီးပွားရေးကိုပါ တိုးတက်စေမည် ဖြစ်ပါသည်။ ထိုသို့ ကုန်စည်နှင့်ဝန်ဆောင်မှုများ နိုင်ငံအတွင်း ဒေသအနှံ့အပြားသို့ ဖြန့်ကျက်စီးဆင်းစေခြင်းဖြင့် ပြည်သူများ၏ လူမှုစီးပွားဘဝ ဖွံ့ဖြိုးတိုးတက်ခြင်း၊ လူနေမှုအဆင့် အတန်း မြင့်မားခြင်းနှင့် အလုပ်အကိုင်အခွင့်အလမ်းများကိုပါ တိုးတက်စေနိုင်မည်ဖြစ်ပေသည်။ ထို့ပြင် ပြည်တွင်း၌ ကုန်ကြမ်းထွက်ကုန်များ ပေါများစွာရရှိခြင်းဖြင့်လည်း စက်မှုလုပ်ငန်းများ ဖွံ့ဖြိုးခြင်း အတွက်ပါ အထောက်အပံ့ဖြစ်စေနိုင်မည် ဖြစ်ပါသည်။ ပြည်ပကုန်သည်များအနေဖြင့်လည်း လိုအပ် သည့်ကုန်ပစ္စည်းများ ရရှိရန်နှင့် ပြည်တွင်းသို့ လာရောက်ရန် မလွယ်ကူခြင်းတို့ကြောင့် ပြည်တွင်း ကုန်သည်များနှင့်ချိတ်ဆက်ကာ ကုန်သွယ်မှုပြုလုပ်ကြလေ့ရှိပါသည်။ ထို့ကြောင့် ပြည်တွင်းကုန်သွယ် ရေးသည် ပြည်တွင်းထုတ်လုပ်မှု၊ ကုန်သွယ်ရောင်းဝယ်မှုနှင့် စက်မှုလုပ်ငန်းများ တိုးတက်ရန်အတွက် အကျိုးဖြစ်ထွန်းစေရုံသာမက ပြည်ပကုန်သွယ်ရေးအတွက်ပါ အထောက်အပံ့ဖြစ်စေသည့် ကြီးမားသော ကဏ္ဍတစ်ရပ်ပင် ဖြစ်ပါသည်။

ကုန်သွယ်မှုဆိုရာတွင် ထုတ်လုပ်မှုသည်အဓိကနှင့် ပြည်တွင်းထုတ်လုပ်မှု တိုးတက်စေရေး

          ကုန်သွယ်မှုဟုဆိုရာတွင် ထုတ်လုပ်မှု (Production) သည် အဓိကအကျဆုံးသော ကဏ္ဍတစ်ခု ဖြစ်ပါသည်။ ထုတ်လုပ်မှုမရှိပါက ကုန်သွယ်ရောင်းဝယ်မှုကို မည်သို့မျှ ပြုလုပ်နိုင်မည်မဟုတ်ပေ။ ထုတ် လုပ်မှုဟုဆိုရာတွင် Mass Production ကို အခြေခံသည့် Quantity-base-Production (အရေအတွက် အခြေခံထုတ်လုပ်ခြင်း) ဖြစ်ရန် လိုအပ်သကဲ့သို့ အရည်အသွေးကို အခြေခံသည့် Quality-base-Production (အရည်အသွေးအခြေခံထုတ်လုပ်ခြင်း) ဖြစ်ရန်လည်း လိုအပ်ပါသည်။ အထူးသဖြင့် ဈေးကွက်၏ ဝယ်လိုအား၊ ဈေးကွက်၏ လိုအပ်ချက်ပေါ်မူတည်၍ စနစ်တကျထုတ်လုပ်ကြရမည် ဖြစ်ပါ သည်။ တစ်နည်းဆိုရလျှင် ပြည်တွင်းကုန်သွယ်ရေး ဖွံ့ဖြိုးတိုးတက်အောင် ဆောင်ရွက်ရာ၌ အရေ အတွက်နှင့် အရည်အသွေးတို့ကို အခြေခံသည့် ထုတ်လုပ်ခြင်းအား အားပေးဆောင်ရွက်ကြရန် လိုအပ် လျက်ရှိပါသည်။

          ထုတ်လုပ်မှုတွင် တစ်ဦးတစ်ယောက်ချင်းဖြင့် ဆောင်ရွက်ပါက လိုအပ်သောပမာဏ၊ လိုအပ် သော အရည်အသွေးများကို ရရှိရန်ခက်ခဲမည် ဖြစ်ပါသည်။ အစုအဖွဲ့၊ အသင်းအဖွဲ့များဖြင့် ဇုန်များ တည်ထောင်၍ ထုတ်လုပ်ခြင်း၊ Contract farming စနစ်များဖြင့် အကောင်အထည်ဖော်ဆောင်ရွက် ခြင်းများသည်သာ များစွာထိရောက်နိုင်မည် ဖြစ်ပါသည်။ ထိုသို့​ ဆောင်ရွက်နိုင်ရန် စိုက်ပျိုးထုတ် လုပ်သူများ၊ သက်ဆိုင်ရာအသင်းအဖွဲ့များ၊ ကုန်သည်လုပ်ငန်းရှင်များက စနစ်တကျ ပူးပေါင်းအကောင် အထည်ဖော်ရန် လိုအပ်ပြီး သက်ဆိုင်ရာအစိုးရဌာနများ၊ ဒေသဆိုင်ရာ အစိုးရအဖွဲ့များက ပေါင်းစပ် ညှိနှိုင်းကာ အားပေးကူညီရန် လိုအပ်ပါသည်။ ထုတ်လုပ်မှုကဏ္ဍဖွံ့ဖြိုးတိုးတက်ရေးအတွက်  လိုအပ် သောအရင်းအမြစ်များ ကူညီထောက်ပံ့ခြင်းအပြင် စိုက်ပျိုးထုတ်လုပ်မှုအတွက် အရေးပါသော သတင်း အချက်အလက်များကိုလည်း ကျယ်ကျယ်ပြန့်ပြန့်သိရှိနိုင်ရေး ကူညီပံ့ပိုးပေးရန်လည်း လိုအပ်ပါသည်။ ဈေးကွက်၏ ဝယ်လိုအားနှင့် အရည်အသွေးလိုအပ်ချက် ကဲ့သို့သော အရေးကြီးသည့် သတင်းအချက် အလက်များကို စိုက်ပျိုးထုတ်လုပ်သူများ အချိန်နှင့်တပြေးညီသိရှိ၍ စနစ်တကျထုတ်လုပ်နိုင်ရေး အတွက် ဆောင်ရွက်ပေးကြရမည်ဖြစ်ပါသည်။

အထူးသဖြင့် ပြည်တွင်းကုန်သွယ်မှုသည် ထုတ်လုပ်သည်မှ တင်ပို့ရောင်းချသည်အထိ Supply Chain တစ်လျှောက်လုံးတွင် ပါဝင်ပတ်သက်လျှက်ရှိသည့်အတွက် ပြည်တွင်းကုန်သွယ်မှုဖွံ့ဖြိုးရေး လုပ်ငန်းများဆောင်ရွက်ရာတွင် ထုတ်လုပ်မှုကဏ္ဍကို အထူးအလေးထားကာ ဆောင်ရွက်သွားကြရန် လိုအပ်ပေသည်။ ထုတ်လုပ်မှုကို ပုဂ္ဂလိကကဏ္ဍမှ အဓိကဆောင်ရွက်ကြသည်ဆိုသော်လည်း နိုင်ငံတော် အနေဖြင့် ပုဂ္ဂလိကကဏ္ဍဖွံ့ဖြိုးတိုးတက်ရေးကို အလေးထားဆောင်ရွက်လျက်ရှိရာ သက်ဆိုင်ရာ အစိုးရ ဌာနများကလည်း ထုတ်လုပ်မှုတိုးတက်ရေးအတွက် ပါဝင်ပေါင်းစပ်ဆောင်ရွက်သွားရန် လိုအပ်ပါသည်။ ထို့ကြောင့် " ထုတ်လုပ်မှုနှင့် ပတ်သက်၍ ဒေသအလိုက်၊ ထွက်ကုန်များအလိုက် ထုတ်လုပ်မှုဆိုင်ရာ ကိန်းဂဏန်း အချက်အလက်များကို စနစ်တကျလေ့လာပြုစုခြင်း၊ အရည်အသွေးနှင့်အရေအတွက်တို့ကို အခြေခံ၍ ဟန်ချက်ညီစွာ ထုတ်လုပ်နိုင်ရေးအတွက် စိုက်ပျိုးထုတ်လုပ်သူများ၊ ကုန်သည်လုပ်ငန်းရှင် များနှင့် အစိုးရဌာနများ အချင်းချင်း ပူးပေါင်းညှိနှိုင်းဆောင်ရွက်ခြင်း၊ ဒေသတွင်း ကုန်သွယ်မှုအခြေ အနေများကို လေ့လာဆန်းစစ်ခြင်းနှင့် သတင်းအချက်အလက်များ ပံ့ပိုးဆောင်ရွက်ခြင်း" စသည့် ပြည်တွင်းကုန်သွယ်ရေး ဖွံ့ဖြိုးမှုအတွက် အရေးပါသည့် လုပ်ငန်းများကို အစီအမံများချမှတ်၍ ဆောင် ရွက်သွားရန် အထူးလိုအပ်ပါသည်။

ယခုဆောင်းပါးတွင်ပါရှိသည့် အချို့သော အကြောင်းအရာများသည် စာရေးသူ၏ အာဘော်မျှသာ ဖြစ်ပါသည်။)ဆက်လက်ဖော်ပြပါအုံးမည် … ။
  အောင်ဆန်းလင်း(DOCA)

ကျောက်မဲမြို့တွင် ဈေးကွက်စောင့်ကြည့်လေ့လာစစ်ဆေးခြင်း

         ကျောက်မဲခရိုင်၊ စားသုံးသူရေးရာဦးစီးဌာနမှ တာဝန်ရှိသူများသည် ၂၀၂၀ခုနှစ် ဒီဇင်ဘာလ ( စတုတ္ထအပတ် ) အတွင်း ကျောက်မဲမြို့ပေါ်ရှိ လျှပ်စစ်ပစ္စည်းအရောင်းဆိုင် ၅ ဆိုင် အား ကွင်းဆင်း စစ်ဆေးခဲ့ပါသည်။ ယင်းသို့ ကွင်းဆင်းစစ်ဆေးရာတွင် ဂတ်(စ်) မီးဖို၊ ရေပူချိုးစက်၊ အကင်စက်၊ ထမင်းပေါင်းအိုး ၊ လျှပ်စစ်မီးဖိုနှင့် အခြား အိမ်သုံးလျှပ်စစ်ပစ္စည်းများ ရောင်းချနေမှုအခြေအနေနှင့် ရောင်းချသည့် ကုန်ပစ္စည်းများ တရားဝင်တင်သွင်းဖြန့်ဖြူးရောင်းချရန် ၊ ရောင်းချသည့် ကုန်ပစ္စည်းများသည် သက်ဆိုင်ရာဌာနများ၏ ဥပဒေ ၊ ညွှန်ကြားချက်များနှင့်ကိုက်ညီသည့် ကုန်ပစ္စည်းများကို ရောင်းချရန်၊ ကုန်ပစ္စည်းများတွင် မြန်မာစာသားဖြင့် ကုန်အညွှန်းအမှတ်အသားဖော်ပြရန်တို့ကို လုပ်ငန်းရှင်များအားအသိပညာပေးဆွေးနွေးခြင်းများ ဆောင်ရွက်ခဲ့ကြောင်း သတင်းရရှိပါသည်။

ရှမ်းပြည်နယ်(DOCA)

အိမ်တွင်းစက်မှုလက်မှုလုပ်ငန်းကော်မတီအစည်းအဝေး (၁/၂၀၂၁) ကျင်းပခြင်း

    ၇-၁-၂၀၂၁ ရက်နေ့တွင် ရှမ်းပြည်နယ် အိမ်တွင်းစက်မှုလက်မှုလုပ်ငန်းကော်မတီ (၁/၂၀၂၁)ကို ပြည်နယ်အစိုးရအဖွဲ့၊ ပြည်နယ်စီမံကိန်းနှင့်ဘဏ္ဍာရေးဝန်ကြီးရုံး အစည်းအဝေးခန်းမ၌ ကျင်းပပြုလုပ်ခဲ့ရာ ပြည်နယ် ပတ်ဝန်းကျင်ထိန်းသိမ်းရေးဦးစီးဌာန၊ ပြည်နယ်စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ပြည်နယ် စားသုံးသူရေးရာဦးစီးဌာန၊ ပြည်နယ် အသေးစားစက်မှုလက်မှုလုပ်ငန်းဦးစီးဌာန၊ ပြည်နယ်ဆီလုပ်ငန်းရှင်အသင်းနှင့် ပြည်နယ်လူငယ်စွန့်ဦးတီထွင်လုပ်ငန်းရှင်များအသင်းတို့မှတက်ရောက်ခဲ့ပါသည်။

     အဆိုပါ အစည်းအဝေးတွင် အိမ်တွင်းအသေးစားစက်မှုလက်မှုလုပ်ငန်း (၅၂)ခု နှင့်ပတ်သက်သည့်အချက်အလက်များအား အတွင်းရေးမှူးမှ ရှင်းလင်းဆွေးနွေးခဲ့ပြီး ၎င်းလုပ်ငန်း (၅၂)ခု အနက်မှထူးခြားသည့် ညောင်ရွှေမြို့ရှိ ပိန်းရိုးခြောက်လုပ်ငန်းနှင့် ရပ်စောက်မြို့ရှိ သစ်စက်လုပ်ငန်းများနှင့်ပတ်သက်၍ အသေးစိတ်ရှင်းလင်းတင်ပြ ဆွေးနွေးခဲ့ရာ တက်ရောက်လာသူများမှ အပြန်အလှန်မေးခွန်းများမေးမြန်းခဲ့ကြပြီး အတွင်းရေးမှူးမှ ပြန်လည် ရှင်းလင်းဖြေကြားခဲ့ကြောင်း သတင်းရရှိပါသည်။

ရှမ်းပြည်နယ်(DOCA)

မဘိမ်းမြို့နယ်တွင် မိုးစပါးများရိတ်သိမ်းလျက်ရှိ

       ရှမ်းပြည်နယ် (မြောက်ပိုင်း) ၊ မဘိမ်းမြို့နယ်တွင် မိုးစပါးစိုက်ဧက ၂၃,၉၉၆ ဧကရှိပြီး ၂၀၂၀ ပြည့်နှစ်၊ နိုဝင်ဘာလအထိ ၁၇,၉၄၁ ဧက ရိတ်သိမ်းထားကာ အထွက်နှုန်းမှာ တစ်ဧကလျှင် ၇၆.၆၅ တင်း ထွက်ကြောင်းနှင့် ပျက်စီးမှုဧကမှာ ၅၅၅.၅၁ ဧကရှိကြောင်း သိရှိရပါသည်။

       တောင်သူများထံသို့ သွားရောက်၍ စုံစမ်းမေးမြန်းခဲ့ရာ တောင်သူ ဦးမောင်ကြည်တွင် မိုးစပါးစိုက်ဧကမှာ ၄.၅၀ဧက ရှိကြောင်း၊  ယခင်နှစ်တွင် ကျဲပက်စိုက်ပျိုးခဲ့ခြင်းကြောင့် အထွက်နည်းခဲ့ပြီး၊ ယခုနှစ်တွင် စနစ်တကျစိုက်ပျိုးထားသည့်အတွက် ယခင်နှစ်ထက် စပါးတင်း ၅၀ ပိုထွက်ရှိခဲ့ကြောင်း၊ ကုန်ကျစရိတ်မှာ ၅သိန်းကျပ်ခန့်ရှိပြီး ချွေလှေ့စက် ငှားပါက တစ်ဧကလျှင် (၆) သောင်းကျပ် ပေးချေရကြောင်း၊ ချွေလှေ့စက်မငှားဘဲ ရိတ်စက်ငှားပါက တစ်ဧကလျှင် စပါး(၅)တင်း သာပေးရသဖြင့် ကုန်ကျစရိတ် ပိုမိုသက်သာခဲ့ကြောင်းသိရှိရပါသည်။

    ဆက်လက်၍ တောင်သူ ဦးမိုးစိန်အားမေးမြန်းခဲ့ရာတွင် လယ်ဧကများစွာပိုင်ဆိုင်ထားပြီး မရိတ်သိမ်းရသေးသည့် လယ်ကွက်များရှိကြောင်း၊ ကျဲပက်စိုက်ပျိုးသည့်လယ်မြေများမှာ ဆုံးရှုံးမှုများပြီး စနစ်တကျ စိုက်ပျိုး သော လယ်မြေများမှ စပါးပိုမိုရရှိကြောင်း၊ ကိုယ်ပိုင် ထွန်စက် ၊ ချွေလှေ့စက်များရှိ၍ ကုန်ကျစရိတ် သက်သာကြောင်းသိရှိရပါသည်။

       မိုးရာသီအတွင်း ပုံမှန်အောက်မိုးရွာသွန်းမှုကြောင့် မိုးနည်း၍ ရေမလိုက်သည့်အတွက် စပါးဆုံးရှုံးမှုဖြစ်ပေါ်၍ တောင်သူများအခက်အခဲများကြုံတွေ့ရကြောင်းသတင်းရရှိပါသည်။

ရှမ်းပြည်နယ်(DOCA)

မွန်ပြည်နယ်မှ ထွက်ရှိသော ငါးများကို မိုဘိုင်းစနစ်ဖြင့် စားသုံးသူများထံသို့ တိုက်ရိုက်ရောင်းချပေးမည်

        COVID 19 ရောဂါဖြစ်ပွားနေသောကာလအတွင်း မွန်ပြည်နယ်အတွင်းမှာရှိသော ငါးဖမ်းလုပ်သားများ၏ ငါးဈေးကွက်များ ရပ်တန့်နေရခြင်းသဘောဖြစ်နေသည့်အတွက် ရောင်းချရန် အခက်အခဲများ ဖြစ်ပေါ်နေခြင်းအပေါ် မွန်ပြည်နယ် သမဝါယမဦးစီးဌာန မှတဆင့် ငါးဈေးကွက် တိုးချဲ့ဖြန့်ဖြူးနိုင်ရေးအတွက် မွန်ပြည်နယ်အတွင်းရှိ မြို့နယ် သမဝါယမအသင်းစုတို့နှင့်ချိတ်ဆက်ပြီး အမြတ်မယူဘဲ တစ်မြို့နယ်လျှင် ငါး ပိဿာချိန် ၅၀ မှ ပိဿာချိန် ၁၀၀ အထိ စားသုံးသူပြည်သူများထံ မိုဘိုင်းစနစ်ဖြင့် တိုက်ရိုက်ရောင်းချပေးမည်ဖြစ်ကြောင်း သိရှိရပါသည်။ မွန်ပြည်နယ်အတွင်း သာမက စစ်ကိုင်းတိုင်းဒေသကြီး၊ မန္တလေးတိုင်းဒေသကြီးနှင့် ရှမ်းပြည်နယ်တို့ကိုလည်း ဖြန့်ဖြူးရောင်းချရန် အဆိုပါဒေသများရှိ သမဝါယမအသင်းစုတို့နှင့်ချိတ်ဆက်ပြီး ပို့ဆောင်ရောင်းချနိုင်ရေး စီစဉ်ထားကြောင်း မွန်ပြည်နယ် သမဝါယမဦးစီးဌာန ပြည်နယ်ဦးစီးမှူး ဦးလှဟန် ထံမှ သတင်းရရှိပါသည်။

မွန်ပြည်နယ် (DOCA)

မိုးညှင်းမြို့နယ်ရှိ စားသောက်ဆိုင်များအားစစ်ဆေးခြင်း

        မိုးညှင်းခရိုင်၊ မြို့နယ်အဆင့် COVID–19 ကာကွယ်ထိန်းချုပ်ရေးနှင့် အရေးပေါ်တုံ့ပြန်ရေး လုပ်ငန်းဆပ်ကော်မတီအလိုက် တာဝန်ခွဲဝေပေးအပ်ခဲ့ရာ မိုးညှင်းမြို့စားသုံးသူရေးရာဦးစီးဌာနမှ မြို့နယ်တာဝန်ခံ ဦးစိုးလွင်(လ/ထကြီးကြပ်ရေးမှူး)သည် အဖွဲ့ဝင်အဖြစ် ပါဝင်ပူးပေါင်းဆောင်ရွက် လျက်ရှိပါသည်။

       ထိုသို့ဆောင်ရွက်ရာတွင် COVID–19 ကာလအတွင်း မိုးညှင်းမြို့နယ်၌  စားသုံးသူရေးရာဦးစီးဌာန၊ အထွေထွေအုပ်ချုပ်ရေးဦးစီးဌာန၊ အလုပ်ရုံနှင့်အလုပ်သမားဥပဒေစစ်ဆေးရေးဉီးစီးဌာန၊ စည်ပင်သာယာရေးအဖွဲ့နှင့် ကျန်းမာရေးဦးစီးဌာနစသည့် ဌာန(၅)ခုဖြင့် ဖွဲ့စည်းထားသော ပူးပေါင်းစစ်ဆေးရေးအဖွဲ့သည် (၆.၁.၂၀၂၁ ) ရက်နေ့တွင် မိုးညှင်းမြို့ပေါ်ရှိ စားသောက်ဆိုင် (၁၅)ဆိုင်အား ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသော COVID–19 ဆိုင်ရာလိုက်နာရမည့် (A ၊ B ၊ C ) အဆင့်လိုက် စည်းကမ်းသတ်မှတ်ချက်များကို လိုက်နာမှု ရှိ/မရှိ စစ်ဆေးခဲ့ပါသည်။ စစ်ဆေးခဲ့ရာတွင် စားသောက်ဆိုင်(၁၀)ဆိုင် အား (A) အဆင့်သို့ တိုးမြှင့်ပေးခြင်း နှင့် (၁)ဆိုင်အား (B) အဆင့်  ၊(၄)ဆိုင်အား (c) အဆင့်သို့ အဆင့်လျော့ချခြင်းများ ဆောင်ရွက်ခဲ့ပြီး မိမိဌာနမှလည်း ဌာန၏လုပ်ငန်းတာဝန်များ ဖြစ်သော စားသုံးသူကာကွယ်ရေးဥပဒေ ၂၀၁၉ အခန်း (၁၀)ပါ စီးပွားရေးလုပ်ငန်းရှင်၏ တာဝန်များနှင့် အခန်း (၁၈) ပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်းသည့် ဥပဒေပါအချက်များကို  လိုက်နာဆောင်ရွက်ကြရန် ရှင်းလင်းဆွေးနွေးဆောင်ရွက်ခဲ့ပါသည်။

ကချင်ပြည်နယ်(DOCA)

 

မွန်ပြည်နယ်မှ ဝဥ

       စားသုံးသူရေးရာဦးစီးဌာနမှ တာဝန်ရှိသူများသည် မွန်ပြည်နယ်အတွင်း ဝဥအခြောက်ခံစက်ရုံ(၆)ရုံသို့ သွားရောက်လေ့လာခဲ့ရာ မွန်ပြည်နယ်ဒေသအတွင်းတွင် စိုက်ပျိုးသည့် သဘာဝ ဝဥ ထုတ်လုပ်မှုတိုးတက်လာခြင်းကြောင့် စက်ရုံများအနေဖြင့် ဝဉကို ယခင်နှစ်ထက် ပိုမိုဝယ်ယူရရှိခဲ့ကြောင်း၊ ၂၀၁၉ ခုနှစ်တွင် ကုန်ကြမ်းပိဿာချိန် ၈၉၀,၀၀၀ခန့် ဝယ်ယူရခဲ့ပြီး ယခုနှစ်တွင် ၁,၀၃၀,၀၀၀ ပိဿာချိန် ဝယ်ယူရရှိခဲ့ရာ ပိသာချိန်(၁၀၄,၀၀၀)ခန့်  ပိုမိုတိုးတက် ဝယ်ယူရရှိခဲ့ကြောင်း၊ သို့ရာတွင်လည်း ဈေးနှုန်းအနေဖြင့် ၂၀၁၉ခုနှစ် ရာသီအစတွင် အစိုတစ်ပိဿာလျှင် ၁၆၀၀/- ကျပ်ဖြင့် ဈေးဖွင့်ဝယ်ယူခဲ့ပြီး ရာသီကုန်ချိန်တွင် အစိုတစ်ပိဿာလျှင် ၂၂၀၀/- ကျပ်ခန့်ရှိခဲ့ပါကြောင်း ၊ ယခု ၂၀၂၀ ခုနှစ်တွင် အဖွင့်ဈေး  အစိုတစ်ပိဿာ လျှင် ၁၄၅၀/- ကျပ် မှစ၍  ရာသီပိတ်ချိန်တွင် အစိုတစ်ပိဿာ လျှင် ၂၀၅၀/- ကျပ် သာရှိခဲ့‌ပါကြောင်း သိရှိရပါသည်။

       ယခင်နှစ်ထက် အစိုတစ်ပိဿာဈေးနှုန်း ၁၀၀ကျပ်မှ ၁၅၀ကျပ်ခန့် လျော့နည်းခဲ့ပြီး ဈေးနှုန်းလျော့နည်းဝယ်ယူရခြင်းမှာ  စက်ရုံများမှ ထုတ်လုပ်သော ဝဥ ခြောက်များအား ယခင်နှစ်တွင် ချင်းရွှေဟော်နှင့် ယခုနှစ်တွင် မူဆယ်နယ်စပ် ကုန်သွယ်ရေးတို့မှတဆင့် တင်ပို့ခဲ့သော်လည်း ၃၀.၁၀.၂၀၂၀ ရက်နေ့မှစ၍ တရုတ်နိုင်ငံမှ အဆိုပါနယ်စပ်စခန်းများမှ တင်ပို့/တင်သွင်းခွင့်မပြုတော့သဖြင့် ဝဥခြောက်များအား လက်ရှိအနေအထားတွင် ထိုင်းနိုင်ငံ မှ လာအိုနိုင်ငံ( CO– Country Origin) သို့ တင်ပို့နေရသဖြင့် တစ်ပိဿာကို ၅၇၅/- ကျပ် ခန့် ပိုမိုကုန်ကျလျက်ရှိကြောင်း၊ စက်ရုံများအနေဖြင့် လုပ်ငန်းလည်ပတ်နိုင်ရန်အတွက်သာ ရောင်းချနေရခြင်းဖြစ်ပြီး အကျိုးအမြတ်နည်းသည့်အတွက် ကုန်ကြမ်းများဝယ်ယူရာတွင် ဈေးလျော့၍ ဝယ်ယူနေရသည့် အခြေအနေရှိကြောင်းနှင့် မွန်ပြည်နယ်၏ ဝဥရာသီသည် ဒီဇင်ဘာလတွင် ကုန်ဆုံးမည်ဖြစ်ပါကြောင်း ရွှေဝါမြေ ဝဥခြောက်စက်ရုံ လုပ်ငန်းရှင်နှင့် တွေ့ဆုံမေးမြန်းမှုများအရ မွန်ပြည်နယ်၏ ဝဥထုတ်လုပ်မှုအခြေအနေများအား တင်ပြလိုက် ရပါသည်။

မွန်ပြည်နယ်(DOCA)

အိမ်သုံးလျှပ်စစ်နှင့်အီလက်ထရောနစ်ပစ္စည်းများအား ထုတ်လုပ်ခြင်း၊ တင်ပို့ခြင်း၊ တင်သွင်းခြင်း၊ ဖြန့်ဖြူးရောင်းချခြင်းတို့နှင့်ပတ်သက်၍ စားသုံးသူများဘေးအန္တရာယ်လုံခြုံစိတ်ချစွာ သုံးစွဲနိုင်ရေးအတွက် စည်းမျဉ်းရေးဆွဲပြဋ္ဌာန်းအကောင်အထည်ဖော်ဆောင်ရွက်ရေး ညှိနှိုင်း

နေပြည်တော်၊ (၁၅.၁.၂၀၂၁)

       အိမ်သုံးလျှပ်စစ်နှင့်အီလက်ထရောနစ်ပစ္စည်းများအား ထုတ်လုပ်ခြင်း၊ တင်ပို့ခြင်း၊ တင်သွင်းခြင်း၊ ဖြန့်ဖြူး ရောင်းချခြင်းတို့နှင့်ပတ်သက်၍ စားသုံးသူများဘေးအန္တရာယ်လုံခြုံစိတ်ချစွာ သုံးစွဲနိုင်ရေးအတွက် စည်းမျဉ်း ရေးဆွဲပြဋ္ဌာန်း အကောင်အထည်ဖော်ဆောင်ရွက်နိုင်ရေးအတွက် ညှိနှိုင်းအစည်းအဝေးကို ယနေ့ နံနက် ၁၀:၀၀ နာရီတွင် စားသုံးသူရေးရာဦးစီးဌာန၊ ရုံးအမှတ်(၅၂) အစည်းဝေးခန်းမ၌ ကျင်းပသည်။

          အစည်းအဝေးတွင် စားသုံးသူရေးရာဦးစီးဌာန ညွှန်ကြားရေးမှူးချုပ်က အဖွင့်အမှာစကား ပြောကြားရာ၌ ၈-၁-၂၀၂၁ ရက်နေ့တွင် ကျင်းပပြုလုပ်ခဲ့သည့် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီးနှင့် လျှပ်စစ်နှင့် စွမ်းအင်ဝန်ကြီးဌာန ဒုတိယဝန်ကြီး ဦးခင်မောင်ဝင်း တို့ဦးဆောင်သော ညှိနှိုင်းအစည်းအဝေး ဆုံးဖြတ်ချက်အရ စားသုံးသူရေးရာဦးစီးဌာနနှင့် စက်မှုကြီးကြပ်ရေးနှင့်စစ်ဆေးရေးဦးစီးဌာနတို့က အသီးသီးရေးဆွဲထားကြသော အိမ်သုံးလျှပ်စစ်နှင့် အီလက်ထရောနစ်ပစ္စည်းများ ဘေးအန္တရာယ်လုံခြုံစိတ်ချရမှုဆိုင်ရာ စည်းမျဉ်း (EEE Safety Regulation) မူကြမ်း (၂) ခုအား ပေါင်းစပ်၍ သက်ဆိုင်ရာ ဥပဒေနှင့်ကိုက်ညီမည့် မူကြမ်းတစ်ရပ်ရေးဆွဲ ပြုစုရန်ဖြစ်ပါကြောင်း၊ စားသုံးသူများအတွက် အမှန်တကယ်လိုအပ်သည့် မူကြမ်းတစ်ခုအဖြစ် ဥပဒေတစ်ခုကို အခြေပြု၍ စည်းမျဉ်းစည်းကမ်း သို့မဟုတ် လုပ်ထုံးလုပ်နည်းများ ရေးဆွဲ ရမည်ဖြစ်ရာ မူရင်းဥပဒေပါပြဋ္ဌာန်းချက်များနှင့်ကိုက်ညီစေရေး ပူးပေါင်းဆောင်ရွက်ရန်ဖြစ်ပါကြောင်း၊ ပူးပေါင်းရေးဆွဲ ထားသောမူကြမ်းအား ဒုတိယဝန်ကြီးများထံ ဆက်လက်တင်ပြသွားမည်ဖြစ်ပါကြောင်း စသည်ဖြင့် ပြောကြားပါသည်။

         ထို့နောက် စားသုံးသူရေးရာဦးစီးဌာနနှင့် စက်မှုကြီးကြပ်ရေးနှင့်စစ်ဆေးရေးဦးစီးဌာနမှ တာဝန် ရှိသူများက  အီလက်ထရောနစ် ပစ္စည်းများ ဘေးအန္တရာယ်ကင်းရှင်းရေးစည်းကမ်းများဆိုင်ရာ ညွှန်ကြားချက် သို့မဟုတ် စဉ်းမျဉ်း(မူကြမ်း)အားရေးဆွဲရာတွင် အခြေခံရမည့်ဥပဒေ၊ အဓိပ္ပါယ်ဖွင့်ဆို ချက်များ၊ပါဝင်သင့်သည့် အခန်းကဏ္ဍများ၊အခြေပြုရေးဆွဲသင့်သည့်ဥပဒေနှင့်ဆီလျှော်စေမည့် အသုံး အနှုန်း များ စသည်တို့ကို အပြန်အလှန်ဆွေးနွေးညှိနှိုင်းခဲ့ကြကြောင်း သတင်းရရှိပါသည်။

ITQM

တနင်္သာရီတိုင်းဒေသကြီး၏ ပြည်ပဝင်ငွေရှာဖွေ ပေးနေသည့် ဇီဝဇိုးငှက်သိုက်

ဇီဝဇိုးငှက်သိုက်

            တနင်္သာရီတိုင်းဒေသကြီးသည် သယံဇာတပေါကြွယ်ဝသော မြန်မာနိုင်ငံတောင်ဘက်ဆုံးတွင် တည်ရှိ သည့် ကမ်းရိုးတန်းဒေသတစ်ခုဖြစ်ပါသည်။ သဘာဝသယံဇာတများတွင် ထူးခြားသည့် ထွက်ကုန်များ ထွက်ရှိ ရာ ဒေသလည်းဖြစ်ပြီး ထိုအထဲတွင် မြန်မာနိုင်ငံတောင်ဘက်စွန်းဒေသ ကျောက်တောင်များတွင် ထွက်ရှိသည့် ဇီဝဇိုးငှက်၏အန်ဖက်(သို့မဟုတ်)ငှက်သိုက်သည် ဆေးဖက်ဝင်ထူးခြားသည့် ထွက်ကုန်တစ်မျိုးဖြစ်ပြီး တနင်္သာရီ တိုင်းဒေသကြီးအတွင်း၌သာ အဓိကထွက်ရှိပါသည်။

ဇီဝဇိုးငှက်၏ နေထိုင်မှုသဘာဝ

            ဇီဝဇိုးငှက်သည်လူနှင့်ဝေးသည့် ပင်လယ်တွင်း ကျွန်းအချို့၌ ကျောက်ဆောင်လှိုင်ဂူများ အကြားတွင် အုပ်စုဖွဲ့၍ တစ်အုပ်စုလျှင် ထောင်ပေါင်းများစွာ နေထိုင်ကြပါသည်။ မြေပြင်တွင် ကျက်စားလေ့မရှိဘဲ ဝေဟင်နှင့်ပင်လယ်ရေပြင်အထက်လျင်မြန်စွာပျံသန်းစဉ် တောင်ပံပါ အင်းဆက်များကို ဖမ်းယူစားသောက် ကြပါသည်။ တစ်နှစ်လျှင်(၂) ကြိမ် ဥ ပြီး တစ်မြုံလျှင် ဥ နှစ်လုံး ပါရှိကာအထီးတစ်ကောင် အမ တစ်ကောင် ပေါက်လေ့ရှိကြောင်း လေ့လာသိရှိရပါသည်။

ဇီဝဇိုးငှက်သိုက်ထွက်ရှိရာဒေသ

          တနင်္သာရီတိုင်းဒေသကြီးအတွင်း မြိတ် ကျွန်းစု၊ ပုလောမြို့နယ်ရှိ မလိကျွန်း၊ ကျွန်းစုမြို့ နယ်ရှိ ရေအေး၊ ကျွန်းစု၊ ဘုတ်ပြင်းမြို့ရှိ ပုလုတ် ကျွန်းစု၊ ကော့သောင်းမြို့နယ်ရှိ ကဆိုင်းလှနှင့် ကော့ငန်ကျွန်းစုများမှာ အဓိကထွက်ရှိပြီး ယင်း ကျွန်းစုများအနက် မလိကျွန်းမှ ငှက်သိုက် အများ ဆုံး ရရှိကြောင်း လေ့လာသိရှိရပါသည်။

ဈေးနှုန်း၊ ဈေးကွက်အခြေအနေ

ဒေသထွက်ဇီဝဇိုးငှက်သိုက်အနုတစ်ပိဿာလျှင် ကျပ် (၂၆၀၀၀၀၀) မှ ကျပ် (၃၀၀၀၀၀၀) နှင့် အကြမ်းတစ်ပိဿာလျှင် ကျပ်(၁၂၅၀၀၀၀)မှ (၁၃၀၀၀၀၀) ထိရှိကြောင်း တနင်္သာရီတိုင်းဒေသကြီး အတွင်း ထွက်ရှိသော ဘဘာဝငှက်သိုက်များကို တရုတ်နိုင်ငံ၊ မလေးရှား နိုင်ငံနှင့် ထိုင်းနိုင်ငံတို့မှ အများ ဆုံးဝယ်ယူကြောင်းနှင့် ထိုင်းနိုင်ငံသို့တင်ပို့ရာတွင် ထိုင်း-မြန်မာနယ်စပ်ရနောင်းမှတဆင့် တင်ပို့ပြီး အချို့ကို အမျိုးအစားအရည်အသွေးခွဲခြား၍ ဒေသတွင်းနှင့် ရန်ကုန်မြို့သို့တင်ပို့ရောင်းချကြောင်း သိရှိရပါ သည်။ ရန်ကုန်သို့ ရောက်ရှိလာသောငှက်သိုက်များကို ကုန်သည်များက သန့်စင်မှုများ၊ ထုတ်ပိုးမှု များ ပြုလုပ်ကာ မလေးရှားနိုင်ငံသို့လည်းကောင်း၊ မန္တလေးမှတဆင့် တရုတ်နိုင်ငံသို့လည်းကောင်း ဆက်လက် တင်ပို့ရောင်းချ ကြောင်းသိရှိရပါသည်။ ယခုအခါ Covid-19 ရောဂါဖြစ်ပွားမှုကြောင့် ပြည်ပသို့ တင်ပို့ နိုင်ခြင်းမရှိဘဲ ဒေသတွင်းသုံးစွဲမှုသာ ရှိကြောင်းသိရှိရပါသည်။

 သုံးသပ်ချက်

          သဘာဝငှက်သိုက်သည် အရှေ့တောင်အာရှတွင် လွန်ခဲ့သည့် နှစ်ပေါင်းများစွာတည်းက တရုတ်တိုင်းရင်းဆေးအဖြစ် နာမည်ကြီးလာခဲပါသည်။ ယခုအခါ သဘာဝငှက်သိုက်များရှားပါးလာ သည့်အတွက် လူတို့ဖန်တီးသော ဇီဝဇိုးငှက်များနေထိုင်ရာ ငှက်အိမ်များတိုးချဲ့တည်ဆောက်ပြီး သန့်စင်မှုများ၊ စနစ်တကျထုပ်ပိုးမှုများပြုလုပ်၍ ရောင်းချပါက ဈေးကောင်းပိုမိုရရှိနိုင်မည်ဖြစ်ပြီး နိုင်ငံတော်အတွက် တစ်ဖက်တစ်လမ်းမှ အထောက်အကူပြုပေးခြင်းဖြင့် တနင်္သာရီတိုင်းဒေသကြီး အတွက်လည်း ကုန်သွယ်မှုကဏ္ဍဖွံ့ဖြိုးတိုးတက်လာနိုင်မည်ဖြစ်ပါသည်။     

Pages

Subscribe to RSS - သတင်းနှင့် လှုပ်ရှားမှုများ