သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ ပုဇွန်တောင်မြို့နယ်ခွဲတာဝန်ခံ ဒေါ်မိုးမိုးကြည် (ဌာနခွဲစာရေး) နှင့် ဝန်ထမ်း (၂) ဦး သည် (၁၁-၃-၂၀၂၅) ရက်နေ့ ၊ နံနက်(၀၉:၀၀) နာရီအချိန်တွင် ပုဇွန်တောင် ဈေး စည်ပင်မှဈေးတာဝန်ခံ ဦးစိုးနိုင် တို့နှင့် ပူးပေါင်းကာ ဈေးကွက်အတွင်းရောင်းချနေသော တိုင်းရင်း ဆေးအမျိုးမျိုးအား ကွင်းဆင်းစစ်ဆေးခဲ့ပါသည်။

    ထိုသို့စစ်ဆေးခဲ့ရာတွင် တိုင်းရင်းဆေးအမျိုးမျိုးရောင်းချသော ဈေးအတွင်းရှိ ဦးသန်းစိုး ဆေးဆိုင်၊ မင်းမင်းဆေးဆိုင်များရှိ တိုင်းရင်းဆေးဝါးများအား စားသုံးသူဥပဒေပါ အခန်း(၈) တွင် ဖော်ပြထားသော ကုန်စည်တွင်ပါဝင်ရမည့် အချက်များဖြစ်သော ကုန်ပစ္စည်းအမျိုးအမည် ၊ အရွယ်အစား၊ အရေအတွက်၊ အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှု အညွှန်း၊ ဘေးထွက်ဆိုးကျိုးနှင့် ကြိုတင်သတိပေးချက်များဖော်ပြထားသည်ကို စစ်ဆေး တွေ့ရှိရပြီး ဌာန အနေဖြင့်လည်း ကုန်အညွှန်းအမှတ်အသားမပြည့်စုံသော တိုင်းရင်းဆေးဝါးများ ရောင်းချခြင်းမပြု ကြရန် ပြောကြားခဲ့ကြောင်းသိရှိရပါသည်။

DOCA(ရန်ကုန်)

၂၀၂၅ ခုနှစ်၊ မတ် ၁၄ ရက်နေ့၊ နေ့လည်(၁၃း၀၀)နာရီ အချိန်တွင် စားသုံးသူရေးရာ ဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ တာဝန်ရှိဝန်ထမ်းများသည် အထွေထွေအုပ်ချုပ်ရေးဦးစီး ဌာန၊ အထူးစုံစမ်းစစ်ဆေး‌ရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင် သာယာရေးအဖွဲ့ဖြင့်ပူးပေါင်း၍  ပြည်တွင်းစားဆန်စျေးနှုန်းများ သင့်တင့်မျှတစွာဖြင့် တည်ငြိမ် မှန်ကန်စေရေးနှင့် ပြည်တွင်းထုတ်စားသုံးဆီများတွင် ရောနှောဆီများ ၊ FDA ထောက်ခံချက်များ ပါရှိမှုရှိ/မရှိ မြောက်ဒဂုံမြို့နယ်အတွင်းရှိ ဆန်အရောင်းဆိုင်ကြီးများနှင့် စားသုံးဆီ ရောင်းချသည့် ကုန်စုံဆိုင်များအား စစ်ဆေးခြင်း ဆောင်ရွက်ခဲ့ပါသည်။

      ထိုသို့ ပူးပေါင်းအဖွဲ့ဖြင့်စစ်ဆေးရာတွင် ပြည်တွင်းစားဆန်စျေးနှုန်းများ သင့်တင့်မျှတစွာဖြင့် တည်ငြိမ်မှန်ကန်စေရေးအတွက် ဆန်စျေးနှုန်းများ စျေးနှုန်းမြှင့်တင်ရောင်းချမှုများ ရှိ/မရှိ၊ အလေးချိန်မှန်ကန်စွာဖြင့် ချိန်တွယ်ရောင်းချမှုများ ရှိ/မရှိနှင့် ဝိသမလောဘဖြင့် သိုလှောင်မှုများ ရှိ/မရှိ စစ်ဆေးခြင်း၊ စားသုံးဆီများအား စစ်ဆေးရာတွင် ရောနှောဆီများအား သတ်မှတ်ချက် များနှင့်အညီ ရောင်းချနေမှုများ ရှိ/မရှိ၊ ပြည်တွင်းစားသုံးဆီများတွင် FDA ထောက်ခံချက်များ ပါရှိမှု ရှိ/မရှိ စစ်ဆေးခြင်းများ ဆောင်ရွက်ခဲ့ကြောင်းသိရှိရပါသည်။

DOCA(ရန်ကုန်)

စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် (၁၄.၃.၂၀၂၅) ရက်နေ့၊ နံနက် (၁၀:၃၀) အချိန်တွင် မြို့နယ်အထွေထွေအုပ်ချုပ်ရေးဦးစီးဌာန ၊ မြို့နယ်စည်ပင် သာယာရေးအဖွဲ့၊ မြို့နယ်ကျန်းမာရေး ၊ မြန်မာနိုင်ငံရဲတပ်ဖွဲ့တို့နှင့် ပူးပေါင်း၍ သာကေတ မြို့နယ် ၊ မာန်ပြေ ရပ်ကွက်အတွင်းရှိ ဆေးပစ္စည်းများ ရောင်းချလျက်ရှိသော ဆေးဆိုင်များတွင် ဆေးပစ္စည်းပြတ်လပ် မှုနှင့် ဈေးနှုန်းများမြင့်တင်ရောင်းချခြင်း ရှိ/မရှိ ဈေးကွက်စောင့်ကြည့် စစ်ဆေးခဲ့ပါသည်။

          အဆိုပါ ဈေးကွက်စောင့်ကြည့်စစ်ဆေးရာတွင် အများပြည်သူများသုံးစွဲရာတွင် အချို့သော ဆေးပစ္စည်းများမှာ အခြားသောကုမ္ပဏီများမှ အာနိသင်တူညီသောဆေးဝါးများ အစားထိုးတင်သွင်းသည့်အတွက် ဆေးဝါးပြတ်လပ်မှုမရှိကြောင်းနှင့် ဆေးပစ္စည်းများအား ဈေးနှုန်း မြင့်တင်ရောင်းချခြင်းများ မတွေ့ရှိပါကြောင်း ဈေးကွက်စောင့်ကြည့်စစ်ဆေးခဲ့ပါသည်။

DOCA(ရန်ကုန်)

ခရမ်းမြို့နယ် ၊ မတ်လ  (၁၃) ရက်

မြန်မာ့သနပ်ခါးယဉ်ကျေးမှုဓလေ့ကို ယူနက်စကို၏ လူသားမျိုးနွယ်ဆိုင်ရာ ဒြပ်မဲ့ ယဉ်ကျေးမှုအမွေအနှစ် အမည်စာရင်းတင်သွင်းမှု အောင်မြင်နိုင်ရေးအတွက် မြန်မာ့သနပ်ခါး ယဉ်ကျေးမှုဓလေ့များ နှင့်ပတ်သတ်၍ အသိပညာပေးအစီအစဉ်ကို မတ်လ(၁၁)ရက်နေ့၊ နေ့လည် (၁၂:၃၀)နာရီအချိန်တွင် ရန်ကုန်ဒေသကြီး၊ သန်လျင်ခရိုင်၊ ခရမ်းမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးမှူးရုံး ခန်းမတွင် ကျင်းပပြုလုပ်ခဲ့ကြောင်း သိရသည်။

အဆိုပါ အသိပညာပေးဟောပြောခဲ့ရာတွင် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနမှ ဦးစီးမှူးက မြန်မာ့သနပ်ခါး ယဉ်ကျေးမှုဓလေ့ကို ယူနက်စကို၏ လူသားမျိုးနွယ် ဆိုင်ရာဒြပ်မဲ့ ယဉ်ကျေးမှုအမွေအနှစ် စာရင်းဝင်ဖြစ်စေရေး အကောင်အထည်ဖော် ဆောင်ရွက် လျက်ရှိကြောင်း အသိပညာပေးဟောပြောဆွေးနွေးခဲ့ပြီး စားသုံးသူရေးရာဦးစီးဌာနမှ မြို့နယ် တာဝန်ခံက သနပ်ခါးသည် မြန်မာတို့၏ နေ့စဉ်ဘဝအတွက်  အရေးပါကြောင်းနှင့် မြန်မာ့သနပ်ခါးသည် ကမ္ဘာတွင်ထူးခြား သည့်ဓလေ့တစ်ခုဖြစ်ကြောင်း၊ မြန်မာ့သနပ်ခါးဓလေ့၏ သမိုင်းကြောင်းအစဉ်အလာယဉ်ကျေးမှုများ၊ သနပ်ခါး၏အသုံးဝင်ပုံနှင့် အသုံးပြုပုံအကြောင်း၊ မြန်မာ့သနပ်ခါး၏ အကျိုးကျေးဇူးများစသည့် သနပ်ခါးနှင့်ပတ်သတ်သည့် အကြောင်းအရာများ နှင့်  မြန်မာ့သနပ်ခါးအား ပြည်တွင်းဖြစ်အလှကုန် ပစ္စည်းများအဖြစ် ထုတ်လုပ်ဖြန့်ဖြူးရာတွင် ထုတ်လုပ်သူ စီးပွားရေးလုပ်ငန်းရှင်များအနေဖြင့် ထုတ်ကုန်လုံခြုံစိတ်ချရမှုရှိစေရေးနှင့် သုံးစွဲသူပြည်သူများ ဘေးအန္တရာယ်ကင်းရှင်းစေရေးတို့အတွက် သက်ဆိုင်ရာဌာနများမှ သတ်မှတ်ထားသော ကုန်အညွှန်းအမှတ်အသားများ ပြည့်စုံအောင် ‌ဖော်ပြပါရှိသော သနပ်ခါး အလှကုန်ပစ္စည်းများကို ထုတ်လုပ်ဖြန့်ဖြူးရောင်းချကြရန်နှင့် သုံးစွဲသူပြည်သူများ အနေဖြင့် လည်း ကုန်အညွှန်းအမှတ်အသားပြည့်စုံစွာဖော်ပြပါရှိသော သနပ်ခါးအလှကုန်ပစ္စည်းများကို သာဝယ်ယူသုံးစွဲကြရန်နှင့် စားသုံးသူကာကွယ်ရေး အသိပညာပေးဆွေးနွေး ပြောကြားခဲ့ကြောင်း သိရသည်။

DOCA(ရန်ကုန်)

ခရမ်းမြို့နယ် ၊ မတ်လ  (၁၃) ရက်

ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်ရှိ  စားအုန်းဆီ လက်လီ၊ လက်ကား အရောင်းဆိုင်သို့ မတ်လ(၄)ရက်နေ့၊ နေ့လည်(၁၀:၃၀)နာရီအချိန်တွင် စားသုံးသူရေးရာဦးစီး ဌာန၊ ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်အရ ခရမ်းမြို့နယ်အတွင်း စားအုန်းဆ ကိုယ်စား လှယ်များအနေဖြင့် စားသုံးသူပြည်သူများထံသို့ လက်လီ၊ လက်ကား ဖြန့်ဖြူးရောင်းချ နေမှု အခြေအနေအား ရှောင်တခင်ကွင်းဆင်း စိစစ်ကြပ်မတ်ကွင်းဆင်းစစ်ဆေးခဲ့ကြောင်း သိရသည်။

ထိုသို့ဈေးကွက်စောင့်ကြည့် ကွင်းဆင်းစစ်ဆေးခဲ့ရာတွင် ခရမ်းမြို့နယ် စားသုံးသူ ရေးရာဦးစီးဌာနမှ မြို့နယ်တာဝန်ခံ ဒေါ်ကျော့ကေခိုင်နှင့် ဝန်ထမ်းများသည် ခရမ်းမြို့နယ်ရှိ စားအုန်းဆီကိုယ်စားလှယ် ဦးရဲဝင်း၏ စားအုန်းဆီ ဖြန့်ဖြူးရောင်းချလျက်ရှိသော ဈေးဆိုင်သို့ သွားရောက် တွေ့ဆုံခဲ့ပြီး မိမိအနေဖြင့် စားအုန်းဆီ ခွဲတမ်းရရှိနေသည့် ကုမ္ပဏီအမည်၊ စားအုန်းဆီ တစ်ရက်ခွဲတမ်းရရှိသည့် ပေပါ၊ ပိဿာ၊ တစ်ရက်လျှင် ဖြန့်ဖြူးရောင်းချနေသည် စားအုန်းဆီပေပါ၊ ပိဿာနှင့် စားသုံးသူပြည်သူများထံသို့ လူတစ်ဦးလျှင် တစ်ရက်(သို့မဟုတ်) တစ်ပတ်ရောင်းချပေးနေသည့် ဆီ ကျပ်သားနှုန်းများ လက်လီ၊ လက်ကား ဈေးနှုန်းတို့အား စာရင်းကောက်ယူခဲ့ပြီး စားအုန်းဆီ ကိုယ်စားလှယ်များအနေဖြင့် တစ်ရက်ထုတ်ယူရရှိသည့် ပေပါ၊ ပိဿာနှင့် တစ်ရက်ပြန်လည် ဖြန့်ဖြူး ရောင်းချနေသည့် ပေပါ၊ ပိဿာစာရင်း ကိုက်ညီမှု ရှိ/မရှိ အခြေအနေအား စားအုန်းဆီဈေးနှုန်း တည်ငြိမ်မှုမရှိစေရန်နှင့် ဈေးကစားရန် ရည်ရွယ်ချက်ဖြင့် သိုလှောင်ထားခြင်းများ၊ သက်ဆိုင်ရာမှ သတ်မှတ်အခြေခံလက်ကား ရည်ညွှန်းဈေးအပေါ် နှစ်ရာခိုင်နှုန်းအမြတ်ထက်ပိုသော ဈေးနှုန်းဖြင့် ပြန်လည်ဖြန့်ဖြူး ရောင်းချခြင်းများ မပြုလုပ်ကြရန် စားသုံးသူကာကွယ်ရေးအသိပညာပေး ပြောကြားခဲ့ပြီး ရှောင်တခင် ကွင်းဆင်း စိစစ်ကြပ်မတ် ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)