သတင်းနှင့် လှုပ်ရှားမှုများ

         ဧရာ၀တီတိုင်းဒေသကြီးအတွင်း ဆန်ကြိတ်ခွဲရာမှ ထွက်ရှိလာသော ပိုလျှံသည့် ဘေးထွက်ပစ္စည်းစပါးခွံများကို အသုံးပြုပြီး ကုန်ကျစရိတ်သက်သာစွာဖြင့် ထင်း၊ မီးသွေး အစားထိုးစပါးခွံလောင်စာတောင့်ပြုလုပ်ရောင်းချနေသော ဆန်စက်ပိုင် လုပ်ငန်းရှင် (၁၄) ဦး အသစ်တည်ဆောက်မည့်လုပ်ငန်းရှင် (၁၈) ဦး၊ စိတ်၀င်စားသည့်လုပ်ငန်းရှင် (၇) ဦးနှင့် ဧရာ၀တီတိုင်းဒေသကြီး အစိုးရအဖွဲ့ ၀န်ကြီးချုပ် ဦးတင်မောင်၀င်း၊ အစိုးရအဖွဲ့၀င် ၀န်ကြီးများ၊ စားသုံးသူရေးရာဦးစီးဌာန ဒုတိုင်းဦးစီးမှူး ဦးထွန်းထွန်းနှင့် အရာထမ်း/အမှုထမ်းများ၊ ဖိတ်ကြားထားသော တိုင်းအဆင့်ဌာနဆိုင်ရာများနှင့် နို၀င်ဘာလ (၂၈) ရက် နံနက်ပိုင်း အစိုးရအဖွဲ့ရုံး အစည်းအဝေး ခန်းမတွင် တွေ့ဆုံခဲ့ပါသည်။

       ဧရာ၀တီတိုင်းဒေသကြီးအစိုးရအဖွဲ့ ၀န်ကြီးချုပ် ဦးတင်မောင်၀င်းက ဧရာဝတီတိုင်းအတွင်း မိုး/နွေစပါးစိုက်ဧက (၅၁) သိန်းကျော်စိုက်ပျိုးပြီး စပါးတင်း သိန်းပေါင်း (၄၀၀၀) ကျော်ထွက်ရှိကြောင်း ဆန်ကြိတ်ခွဲရာမှ ထွက်ရှိလာသော စပါးခွံတန် (၁၈) သိန်းကျော်မှ လက်ရှိ Gasifier တပ်ဆင်ပြီး (၃၆၃)လုံးနှင့် ဆက်လက်ဆောင်ရွက်နေသည့် Gasifier (၁၀၀)လုံး စုစုပေါင်း (၄၆၃)လုံးအတွက် အသုံးပြုတဲ့ စပါးခွံတန်ချိန် (၄)သိန်း၊ လောင်စာတောင့်စက် (၂၃) လုံးအတွက် အသုံးပြုသောစပါးခွံတန်ချိန်(၁) သိန်း စုစုပေါင်း (၅) သိန်းအသုံပြုပြီး၊ စပါးခွံတန်ချိန် (၁၃)သိန်း ပိုလျှံနေသေး၍ ပိုလျှံသောစပါးခွံများကို လောင်စာတောင့်ပြုလုပ်၍ စျေးကွက်အတွင်း ရောင်းချနိုင်ပါက တိုင်းအတွင်းရှိ လုပ်ငန်းရှင်များအတွက် ဘေးထွက်ပစ္စည်းမှ အပို၀င်ငွေရရှိပြီး စီးပွားရေးအခွင့်အလမ်းကောင်းများ ရရှိနိုင်သလို ဒေသခံပြည်သူများ အတွက်လည်း ထင်း၊ မီးသွေး၊ အစားထိုးလောင်စာတောင့်များကို စျေးနှုန်းသက်သာစွာဖြင့် ၀ယ်ယူအသုံးပြုနိုင်မှာဖြစ်ကြောင်း ဧရာဝတီတိုင်းဒေသကြီးအတွင်း မြို့ပြလူဦးရေ (၁၅)ရာခိုင်နှုန်း ကျေးလက်လူဦးရေ (၈၅) ရာခိုင်နှုန်းရှိပြီး စွမ်းအင်အသုံးပြုမှုမှာ မြို့ပြတွင် လျှပ်စစ်၊ မီးသွေး၊ ဂတ်(စ်) အများဆုံးအသုံးပြု၍ ကျေးလက်မှာ သစ်တောထွက် ထင်း၊ မီးသွေး အများဆုံး သုံးစွဲလျက်ရှိကြောင်း ရေရှည်မှာ သစ်တောပြုန်းတီးမှုကာကွယ်ရေးနှင့် သဘာ၀ပတ်၀န်းကျင် ထိန်းသိမ်းနိုင်ရေးအတွက် ကုန်ကျစရိတ်သက်သာသော ထင်း၊ မီးသွေး အသုံးပြုမှုနေရာတွင် စပါးခွံလောင်စာတောင့်များ ပိုမိုထုတ်လုပ်ရန် လိုအပ်ကြောင်း ပြောကြားပါသည်။

      တိုင်းဒေသကြီးအစိုးရအဖွဲ့ သယံဇာတ၀န်ကြီး ဦးအုန်းမြင့်က ဂြိုလ်တုတွက်ချက်မှုအရ ဧရာ၀တီတိုင်းဒေသကြီးအတွင်း သစ်တောပြုန်းတီးမှုမှာ ၂၀၁၅ ခုနှစ်တွင် (၁၂) ရာခိုင်နှုန်းသာ ရှိပြီး ၂၀၂၂ ခုနှစ်တွင် (၈) ရာခိုင်နှုန်းသို့ ကျဆင်းနေသည်ကို တွေ့ရှိရကြောင်း၊ သဘာ၀သစ်တော ပြုန်းတီးမှုမှ ကာကွယ်ရန်နှင့် ပတ်၀န်းကျင်ရာသီဥတုကောင်းမွန်စေရန် သစ်တောများပြန်လည် စိုက်ပျိုးလျက်ရှိသော်လည်း သဘာ၀သယံဇာတအရင်းအမြစ်များ သုံးစွဲမှုလျော့ပါးရေးအတွက် စပါးခွံလောင်စာတောင့် ထုတ်လုပ်သုံးစွဲမှုကျယ်ပြန့်လာစေရန်နှင့် ထုတ်လုပ်မှုမြှင့်တင်နိုင် အောင် ဆောင်ရွက်ရမှာဖြစ်ကြောင်း ပြောကြားပါသည်။

        စားသုံးသူရေးရာဦးစီးဌာန ဒုတိယတိုင်းဒေသကြီးဦးစီးမှူး ဦးထွန်းထွန်းက တိုင်းဒေသကြီး အတွင်း စပါးခွံထွက်ရှိမှု၊ သုံးစွဲမှု၊ ပိုလျှံမှု၊ စပါးခွံလောင်စာတောင့်စက်ရုံများနှင့် ထပ်မံတည် ဆောက်ရန် အဆိုပြုထားသည့်အခြေအနေများ၊ ကုန်ကြမ်းအဓိကထွက်ရှိသော ဆန်စက်အသီးသီးမှာ လောင်စာတောင့်စက်များ တည်ဆောက်ထုတ်လုပ်နိုင်လျှင်  ကုန်ကျစရိတ်လျော့ကျ၍ အကျိုးအမြတ်ပိုမိုရရှိမှာဖြစ်ကြောင်း ရှင်းလင်းတင်ပြပြီး တက်ရောက်လာသော လုပ်ငန်းရှင်များကလည်း ထပ်မံတိုးချဲ့မည့်အစီအစဉ်များ စျေးကွက်အခြေအနေနှင့် အားသာချက်၊ အားနည်းချက်များအား အသေးစိတ် ရှင်းလင်းတင်ပြပါသည်။

    ဧရာ၀တီတိုင်းဒေသကြီး အစိုးရအဖွဲ့ ၀န်ကြီးချုပ် ဦးတင်မောင်၀င်းက စပါးခွံလောင်စာ တောင့်ထုတ်လုပ်မည့် ဆန်စက်ပိုင်ရှင်များအနေဖြင့် (၁၀၀)ရင်းလျှင် (၄၀) ရာနှုန်းခန့် အကျိုး အမြတ်ရရှိနေသော စပါးခွံလောင်စာတောင့်စက်ရုံများ မဖြစ်မနေတိုးချဲ့ဆောင်ရွက်သွားရန်နှင့် လုပ်ငန်းပိုင်ဆိုင်ရာလိုအပ်ချက်များကို မိမိတို့အနေဖြင့် ပြည်ထောင်စုအဆင့်သို့ တင်ပြပြီး လုပ်ငန်းများ အောင်မြင်စွာအကောင်အထည်ဖော်ဆောင်ရွက်ပေးသွားမှာ ဖြစ်ကြောင်း ပြောကြားခဲ့ပါသည်။

DOCA(ဧရာဝတီ)

        စစ်ကိုင်းခရိုင် အထွေထွေအုပ်ချုပ်ရေးဦးစီးဌာန၌ စားသုံးသူရေးရာဦးစီးဌာန၊ စစ်ကိုင်းခရိုင် ဦးစီးမှူးရုံးမှ ခရိုင်ဦးစီးမှူးဉီးဆောင်၍ နိုဝင်ဘာလ(၂၄)နေ့တွင် စားသုံးသူကာကွယ်ရေးဥပဒေ အကြောင်းသိကောင်းစရာများ အသိပညာပေးဟောပြောပွဲကျင်းပ ပြုလုပ်ခဲ့ရာ ဌာနဆိုင်ရာဝန်ထမ်း (၃၅)ဦး တက်ရောက်ခဲ့ပါသည်။

       ဟောပြောပွဲတွင် စစ်ကိုင်းခရိုင် အထွေထွေအုပ်ချုပ်ရေးဦးစီးဌာန၊ အုပ်ချုပ်ရေးမှူး ဦးခင်မောင်ဆင့်က အဖွင့်အမှာစကားပြောကြားရာ ယခုလို စစ်ကိုင်းခရိုင် စားသုံးသူရေးရာဦးစီးဌာနမှ စားသုံးသူကာကွယ်ရေးဥပဒေအကြောင်း သိကောင်းစရာများ လာရောက်ဟောပြောခြင်း သည် ဌာနဆိုင်ရာဝန်ထမ်းများအားလုံး သိသင့်သိထိုက်သည့် အကြောင်းအရာများဖြစ်၍ ဝန်ထမ်း များအနေဖြင့် ဂရုတစ်စိုက်မှတ်သားကြရန်နှင့် တစ်ဆင့်ပြန်လည်ဖြန့်ဝေကြရန် ပြောကြားခဲ့ပြီး၊ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ဒု-ခရိုင်ဦးစီးမှူး ဒေါ်ခင်မြတ်မူက ဌာန ဖြစ်ပေါ်လာပုံအကြောင်း ရှင်းလင်းပြောကြားပြီး၊ စစ်ကိုင်းခရိုင်ဦးစီးမှူး ဒေါ်သန်းသန်းတင်က  စားသုံးသူရေးရာဦးစီးဌာန၏ မျှော်မှန်းချက်မှာ “ ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူ ကာ ကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန် ” ဖြစ်ပြီး၊ ရည်မှန်းချက် (၃)ရပ်ဖြင့် စားသုံးသူကာကွယ်ရေးလုပ်ငန်းများ ဆောင်ရွက်နေပါကြောင်း၊ စားသုံးသူရေးရာဦးစီးဌာန၏ ဆောင်ပုဒ် မှာ “စားသုံးသူအခွင့်အရေးဦးစား‌ပေး” ဖြစ်ပါကြောင်း၊ စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ(၁၅)ရက်နေ့က ပြည်ထောင်စု လွှတ်တော် ဥပဒေအမှတ်(၉) ဖြင့်ပြဌာန်းခဲ့ရာ အခန်း(၂၅)ခန်းနှင့် ပုဒ်မ(၈၄)ခုဖြင့် ပြဌာန်းထားကြောင်း၊ စားသုံးသူကာကွယ်ရေးနည်းဥပဒေကို ၂၀၂၂ခုနှစ် ဇန်နဝါရီလ(၁၈)ရက်နေ့က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန အမိန့် ကြော်ငြာစာအမှတ် (၉/၂၀၂၂) ဖြင့် ပြဌာန်းခဲ့ရာ အခန်း (၁၆) ခန်းနှင့် ပုဒ်မ (၁၂၆) ခုပါရှိ ပါကြောင်း၊ စားသုံးသူကာကွယ်ရေးဥပဒေ အခန်း(၁) ပုဒ်မ(၂)၌ အမည်နှင့်အဓိပ္ပာယ်ဖော်ပြချက်ကို သတ်မှတ် ပြဌာန်းထားရာ စားသုံးသူ၏အဓိပ္ပာယ်၊ စားသုံးသူကာကွယ်ရေး၏အဓိပ္ပာယ်၊ ကုန်စည်၏ အဓိပ္ပာယ်နှင့် ဝန်ဆောင်မှု၏အဓိပ္ပာယ်တို့ကို ရှင်းလင်းဆွေးနွေးခြင်း၊ စားသုံးသူကာကွယ်ရေး ဥပဒေအခန်း(၉)တွင် စားသုံးသူ၏ အခွင့်အရေးနှင့်တာဝန်များပြဌာန်းထားပြီး စားသုံးသူများ၏ အခွင့်အရေး(၈)ချက်နှင့် စားသုံး၏တာဝန်(၄)ချက်အကြောင်း ရှင်းလင်းဆွေးနွေးခြင်း၊ အခန်း(၁၀) စီးပွားရေးလုပ်ငန်းရှင်၏ တာဝန်များ၊ အခန်း(၁၁) ကုန်စည်နှင့်စပ်လျဉ်း၍ အာမခံချက်ပေးခြင်း၊ အခန်း(၁၃) ဝန်ဆောင်မှုနှင့်စပ်လျဉ်း၍ အာမခံချက်ပေးခြင်း၊ အခန်း(၁၂)နှင့်အခန်း(၁၄) စားသုံးသူ က တောင်းဆိုနိုင်သည့်အခွင့်အရေးများ၊ စားသုံးသူကာကွယ်ရေးအခန်း (၁၈)ပါ ကုန်ညွှန်းအမှတ် အသားဖော်ပြခြင်းနှင့် စပ်လျဉ်းသည့် အကြောင်းရှင်းလင်းဆွေးနွေးပြီး၊ ပုဒ်မ (၄၃) အရ စီးပွားရေး လုပ်ငန်းရှင်းများသည် ပုဒ်မ (၄၁) ပုဒ်မခွဲ (ခ)နှင့် (ဆ)တို့ပါ ကုန်ညွှန်းအမှတ်အသား ဖော်ပြရာ၌ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက် ဖြစ်စေ ရေးသားဖော်ပြရမည် ဖြစ်ကြောင်း၊ စားသုံး သူကာကွယ်ရေးဥပဒေ အခန်း(၂၀) စီမံခန့်ခွဲရေး နည်းလမ်းအရ အရေးယူခြင်း၊ အခန်း(၂၁) အယူခံဝင်ခြင်း၊ အခန်း(၂၂) အသင်းအဖွဲ့များနှင့် ဆောင် ရွက်ချက်များ၊ အခန်း(၂၃)တားမြစ်ချက်များ၊ အခန်း(၂၄) ပြစ်မှုပြစ်ဒဏ်များ စသည့်အကြောင်း အရာတို့ကို Power Point ဆလိုက်များဖြင့် ရှင်းလင်းဆွေးနွေးဟောပြောပြီး စားသုံးသူများ နစ်နာဆုံးရှုံးမှုများ ဖြစ်ပေါ်ပါက စစ်ကိုင်းမြို့၊ ပါရမီရပ်ကွက်ရှိ စစ်ကိုင်းခရိုင်ဦးစီးမှူးရုံးသို့ လူကိုယ်တိုင်ဖြစ်စေ၊ တယ်လီဖုန်း (၀၇၁-၂၁၁၇၉၊ ၀၉-၄၅၂၀၈၀၅၀၀) ဖြင့်ဖြစ်စေ တိုင်ကြား နိုင်ပါကြောင်း၊ စားသုံးသူရေးရာဦးစီးဌာန၏ Call Center 1535 ၊ Website-www.doca.gov.mm နှင့် Facebook pageများတွင် တိုင်ကြားနိုင်ပါကြောင်း ပြောကြားခဲ့ပါသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ စိုက်ပျိုးရေး ဦးစီးဌာန၌ (၂၅.၁၁.၂၀၂၂) ရက်နေ့ နံနက်(၁၀:၀၀ )နာရီအချိန်တွင် ကျင်းပခဲ့သော မြေသြဇာ၊ မျိုးစေ့၊ ပိုးသတ်ဆေးဥပဒေနှင့် လုပ်ထုံးလုပ်နည်းဆိုင်ရာ နည်းပညာပေးသင်တန်းတွင် စားသုံးသူရေးရာဦးစီးဌာနမှ ဒုတိယညွှန်ကြားရေးမှူး ဦးဆောင်၍ စားသုံးသူကာကွယ်ရေး အသိပညာပေး ဟောပြောပွဲဆောင်ရွက်ရာ သင်တန်းသား/ သူ (၄၀)ဦးနှင့် ဌာနဆိုင်ရာမှ ဝန်ထမ်း (၁၀ )ဦး စုစုပေါင်း (၅၀) တက်ရောက်ခဲ့ကြောင်း သတင်းရရှိပါသည်။

          စားသုံးသူရေးရာဦးစီးဌာန ဒုတိယညွှန်ကြားရေးမှူး ဦးဝေဖြိုးထက်က သင်တန်းသူ သင်တန်းသားများအား စားသုံးသူနစ်နာမှုရှိပါက တိုင်ကြားနိုင်သည့်နည်းလမ်းများနှင့် တိုင်ကြားမှု များကို ဖြေရှင်းဆောင်ရွက်ခဲ့သည့်အကြောင်း ကျယ်ကျယ်ပြန့်ပြန့် ဆွေးနွေးဟောပြောခြင်း၊ စားသုံးသူ ဌာနခွဲတာဝန်ခံ ဦးစီးအရာရှိ ဒေါ်ခိုင်မို့မို့က စားသုံးသူကာကွယ်ရေးဥပဒေပါ စားသုံးသူ အခွင့်အရေးနှင့် တာဝန်များ၊ ကုန်အညွှန်းအမှတ်အသားများအကြောင်း ဆွေးနွေးပြောကြားပြီး တက်ရောက်လာကြသော သင်တန်းသား/သူများက စားသုံးသူနစ်နာမှုများပတ်သက်၍ မေးမြန်းခြင်းအား ဒုတိယညွှန်ကြား‌ရေးမှူး ဦးဝေဖြိုးထက်က စားသုံးသူကာကွယ်ရေးဥပဒေနှင့်အညီ ဦးစီးဌာနမှဖြေရှင်းပေးခြင်း၊ ကောမတီ၊ ကော်မရှင်မှ ဖြေရှင်းဆောင်ရွက်ပေးခြင်းနှင့် ပြစ်မှု၊  ပြစ်ဒဏ်များကို အကျယ်တဝင့် ရှင်းလင်းဖြေကြားပေးခဲ့ပြီး စားသုံးသူအသိပညာပေးလက်ကမ်း စာစောင်များ ဖြန့်ဝေပေးခဲ့အကြောင်း သိရှိရပါသည်။

DOCA(စစ်ကိုင်း)

          ရှမ်းပြည်နယ် (တောင်ပိုင်း) ပြောင်းလုပ်ငန်းအသင်း၏ စုပေါင်းပြောင်းရောင်းချခြင်းစနစ် မိတ်ဆက်ဆွေးနွေးခြင်း၊ အကြံပြုချက်များရယူခြင်းအခမ်းအနားကို ၂၀၂၂ ခုနှစ်၊ နိုဝင်ဘာလ (၂၆) ရက်နေ့၊ နံနက် (၁၀:၀၀) နာရီအချိန်၌ ရှမ်းပြည်နယ် (တောင်ပိုင်း) ကုန်သည်များနှင့် စက်မှုလက်မှုလုပ်ငန်းရှင်များအသင်း (SSSCCI) အစည်းအဝေးခန်းမတွင် ကျင်းပပြုလုပ်ခဲ့ပါသည်။

       အခမ်းအနားသို့ ရှမ်းပြည်နယ် (တောင်ပိုင်း) ကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဋ္ဌ ဦးအောင်ဆန်းဝင်း၊ ရှမ်းပြည်နယ် (တောင်ပိုင်း) ပြောင်းလုပ်ငန်းအသင်းဥက္ကဋ္ဌ ဒေါက်တာကြည်လွင်နှင့် အလုပ်အမှုဆောင်များ စုစုပေါင်း (၅၀) ဦး တက်ရောက်ခဲ့ကြပြီး၊ စားသုံးသူရေးရာဦးစီးဌာန၊ မြန်မာကုန်သည်မှုမြှင့်တင်ရေးအဖွဲ့၊ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှူးဦးစီးဌာနတို့မှ လေ့လာသူများအဖြစ် တက်ရောက်ခဲ့ကြပါသည်။

     အခမ်းအနားတွင် ရှမ် (တောင်) ကုန်သည်အသင်းဥက္ကဋ္ဌ ဦးအောင်ဆန်းဝင်း၊ ပြောင်းအသင်းဥက္ကဋ္ဌ ဒေါက်တာကြည်လွင်တို့မှ အဖွင့်အမှာစကားပြောကြားပြီး၊ ပြောင်းအသင်းအထွေထွေအတွင်းရေးမှူး ဦးစိုင်းဖြိုးလွင်ဦးမှ စုပေါင်းပြောင်းရောင်းချခြင်းစနစ်၏ အသေးစိတ်အစီအစဉ်များနှင့်ပတ်သက်၍ အရောင်းဈေးနှုန်းများသတ်မှတ်ရေး၊ သယ်ယူပို့ဆောင်ရေး၊ ငွေပေးချေရေး၊ ဈေးကွက်ရှာဖွေရေး၊ ပဋိပက္ခဖြေရှင်းရေးကိစ္စရပ်များကိုလည်းကောင်း၊ ရောင်းသူ/ဝယ်သူများမှ လိုက်နာရမည့်စည်းကမ်းချက်များကိုလည်းကောင်း၊ ရှင်းလင်းဆွေးနွေးခဲ့ပါသည်။ ဆွေးနွေးချက်များအပေါ်  တက်ရောက်လာသော ရှမ်းပြည်နယ် (တောင်ပိုင်း) ပြောင်းလုပ်ငန်းအသင်း အလုပ်အမှုဆောင်များမှ အကြံပြုပြန်လည်ဆွေးနွေးခဲ့ကြပါသည်။

          စုပေါင်းပြောင်းရောင်းချခြင်းစနစ်၏ ရည်ရွယ်ချက်မှာ ဈေးကွက်ဈေးနှုန်း တည်ငြိမ်ခိုင်မာအားကောင်းလာစေရန်နှင့် စနစ်ကျပြီး ရေရှည်တည်တံ့သော အကျိုးအမြတ်ရှိသည့် ရောင်းဝယ်ရေးစနစ်တစ်ခုဖြစ်ပေါ် လာရေးဖြစ်ကြောင်း သိရှိရပါသည်။

DOCA(ရှမ်း)

       စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဝန်ထမ်းများသည် ၂၀၂၂ ခုနှစ်၊ နိုဝင်ဘာလ(၂၉)ရက်နေ့၊ နေ့လယ်(၁၃:၀၀)နာရီအချိန်တွင် လွိုင်ကော်ခရိုင်ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၌ စီးပွားရေးလုပ်ငန်းရှင်များ လိုက်နာရမည့်တာဝန်များ၊ တားမြစ်ချက်များ၊ ပြစ်မှု ပြစ်ဒဏ်များနှင့် စပ်လျဉ်း၍ စားသုံးသူကာကွယ်ရေး အသိပညာပေး Talk Show ဆွေးနွေးဆောင်ရွက်ခဲ့ပါသည်။

   အဆိုပါဆွေးနွေးပွဲတွင် စားသုံးသူရေးရာဦးစီးဌာန၊ ဒေါ်နော်ကြူကြူ(ဒု-ဦးစီးမှူး)က စားသုံးသူကာကွယ်ရေး အသိပညာပေး Talk Show ပြုလုပ်ရသည့် ရည်ရွယ်ချက်ကို ရှင်းလင်းပြောကြား ခဲ့ပြီး စားသုံးရေးရာဦးစီးဌာန၏ ရည်မှန်းချက်၊ မျှော်မှန်းချက်များကိုလည်းကောင်း၊ စားသုံးသူကာကွယ်ရေးနှင့် စပ်လျဉ်း၍ ဌာနမှဆောင်ရွက်နေသည့် လုပ်ငန်းများကိုလည်းကောင်း၊ စီးပွားရေးလုပ်ငန်းရှင်များ လိုက်နာရမည့်တာဝန်များကိုလည်းကောင်း၊ စားသုံးသူကာကွယ်ရေးဥပဒေ အခန်း(၂၃) ပါတားမြစ်ချက်များနှင့် အခန်း(၂၄)ပါ ပြစ်မှုနှင့်ပြစ်ဒဏ်များကိုလည်းကောင်း ရှင်းလင်းအသိပေး ဆောင်ရွက်ခဲ့ကြောင်း သတင်းရရှိပါသည်။

DOCA(ကယား)