သတင်းနှင့် လှုပ်ရှားမှုများ

       စစ်ကိုင်းခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၌ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ခရိုင်ဦးစီးမှူးဒေါ်သန်းသန်းတင်သည် နိုဝင်ဘာလ(၂၁)နေ့ စားသုံးသူ ကာကွယ်ရေးဥပဒေ အကြောင်းသိကောင်းစရာများ TALK SHOW  ပြုလုပ်ခဲ့ပါသည်။

      ဆွေးနွေးပြောကြားရာတွင် စားသုံးသူရေးရာဦးစီးဌာန၏မျှော်မှန်းချက်မှာ “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” မျှော်မှန်းပြီး၊ ရည်မှန်းချက် (၃)ရပ်ရှိပြီး စားသုံးသူကာကွယ်ရေး လုပ်ငန်း များ ဆောင်ရွက်နေပါကြောင်း၊ စားသုံးသူရေးရာဆောင်ပုဒ်မှာ “စားသုံးသူအခွင့်အရေးဦးစား‌ပေး” ဖြစ်ပါကြောင်း၊ စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ(၁၅)ရက်နေ့က ပြည်ထောင်စုလွှတ်တော် ဥပဒေအမှတ်(၉) ဖြင့်ပြဌာန်းခဲ့ရာ အခန်း(၂၅)ခန်းနှင့် ပုဒ်မ(၈၄)ခုဖြင့် ပြဌာန်းထား၏ကြောင်း၊ စားသုံးသူကာကွယ်ရေးနည်းဥပဒေကို ၂၀၂၂ခုနှစ် ဇန်နဝါရီလ(၁၈)ရက်နေ့က စီးပွားရေး နှင့် ကူးသန်းရောင်းဝယ်ရေးဝန်ကြီးဌာန အမိန့်ကြော်ငြာစာအမှတ် (၉/၂၀၂၂) ဖြင့် ပြဌာန်းခဲ့ရာ အခန်း (၁၆) ခန်းနှင့်ပုဒ်မ (၁၂၆) ခုပါရှိ ပါကြောင်း၊ စားသုံးသူကာကွယ်ရေးဥပဒေ အခန်း(၁) ပုဒ်မ(၂) ၌ အမည်နှင့်အဓိပ္ပာယ်ဖော်ပြချက်ကို သတ်မှတ်ပြဌာန်းထားရာ စားသုံးသူ၏အဓိပ္ပာယ်၊ စားသုံးသူ  ကာကွယ်ရေး၏အဓိပ္ပာယ်၊ ကုန်စည်၏ အဓိပ္ပာယ်နှင့် ဝန်ဆောင်မှု၏အဓိပ္ပာယ်တို့ကို ရှင်းလင်း ဆွေးနွေးခြင်း၊ စားသုံးသူကာကွယ်ရေးဥပဒေ အခန်း(၉) တွင် စားသုံးသူ၏ အခွင့်အရေးနှင့် တာဝန်များပြဌာန်းထားပြီး စားသုံးသူများ၏အခွင့်အရေး(၈)ချက်အကြောင်း ရှင်းလင်းဆွေးနွေးခြင်း၊ စားသုံးသူကာကွယ်ရေးအခန်း (၁၈)ပါ ကုန်ညွှန်းအမှတ်အသားဖော်ပြခြင်းနှင့် စပ်လျဉ်းသည့် အကြောင်းရှင်းလင်းဆွေးနွေးပြီး၊ ပုဒ်မ (၄၃) အရ စီးပွားရေးလုပ်ငန်းရှင်းများသည် ပုဒ်မ (၄၁) ပုဒ်မခွဲ (ခ)နှင့် (ဆ)တို့ပါ ကုန်ညွှန်းအမှတ်အသား ဖော်ပြရာ၌ မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည် ဖြစ်ကြောင်း ရှင်းလင်းပြောကြားခဲ့ပါသည်။

       စီးပွားရေးလုပ်ငန်းရှင်များအနေဖြင့် ကုန်ညွှန်းအမှတ်အသားဖော်ပြရာ၌ သိသာထင်ရှားစွာ ဖော်ပြရမည့်အချက်များကို ဥပဒေပါသတ်မှတ်ချက်များအတိုင်းတိကျစွာ လိုက်နာဆောင်ရွက်ရမည် ဖြစ်သလို၊ စားသုံးသူများအနေဖြင့် စားသောက်ကုန်နှင့် လူသုံးကုန်ပစ္စည်းများကို ဝယ်ယူသည့်အခါ ကုန်စည်များပေါ်တွင် ဖော်ပြထားသည့် ကုန်အညွှန်းအမှတ်အသားကို ဖတ်ရှုလေ့လာသုံးသပ်ပြီးမှ ဝယ်ယူသည့်အလေ့အကျင့်ပြုလုပ်သင့်ပါကြောင်း၊ အနည်းဆုံး ထုတ်လုပ်သည့်ရက်စွဲ၊ ကုန်ဆုံးသည့် ရက်စွဲတို့ကို ကြည့်ရှုပြီးဝယ်ယူသင့်ပါကြောင်း စားသုံးသူများ နစ်နာဆုံးရှုံးမှုများ ဖြစ်ပေါ်ပါက စစ်ကိုင်းမြို့၊ ပါရမီရပ်ကွက်ရှိ စစ်ကိုင်းခရိုင်ဦးစီးမှူးရုံးသို့ လူကိုယ်တိုင်ဖြစ်စေ၊ တယ်လီဖုန်း (၀၇၁-၂၁၁၇၉၊ ၀၉-၄၅၂၀၈၀၅၀၀) ဖြင့်ဖြစ်စေ တိုင်ကြားနိုင်ပါကြောင်း၊ စားသုံးသူရေးရာဦးစီးဌာန၏ Call Center 1535 ၊ Website-www.doca.gov.mm နှင့် Facebook page များတွင် တိုင်းကြားနိုင် ပါကြောင်း ရှင်းလင်းပြောကြားခဲ့ပါသည်။

DOCA(စစ်ကိုင်း)

        ၂၀၂၂ ခုနှစ်၊ နိုဝင်ဘာလ (၂၂) ရက်နေ့တွင် ကလေးခရိုင်ဦးစီးမှူးရုံးနယ်မြေအတွင်းရှိ ကလေးဝမြို့၊ ကမ်းနားဆိပ်ကမ်းရှိ ဈေးဆိုင်များအား မြို့နယ်အထွေထွေအုပ်ချုပ်ရေးဦးစီးဌာနမှဦးဆောင်၍ စားသုံးသူရေးရာဦးစီးဌာန၊ ပတ်ဝန်းကျင်ထိန်းသိမ်းရေးဦးစီးဌာန၊ စည်ပင်သာယာရေး ကော်မတီ၊ မြန်မာနိုင်ငံရဲတပ်ဖွဲ့နှင့် မီးသတ်တပ်ဖွဲ့များ ပူးပေါင်း၍ ဈေးကွက်စောင့်ကြည့် စစ်ဆေးခြင်း လုပ်ငန်းဆောင်ရွက်ခဲ့ပါသည်။

            ဈေးကွက်စောင့်ကြည့်စစ်ဆေးခြင်း ဆောင်ရွက်ရာတွင် လူအများစုအသုံးပြုသော စားသောက်ကုန်များ၊ လူသုံးကုန်ပစ္စည်းများကို ဦးစားပေးဆောင်ရွက်လျက်ရှိပြီး ဈေးကွက်အတွင်း ဖြန့်ဖြူးရောင်းချနေသည့် ကုန်စည်များတွင် ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်း ရှိ/မရှိကို အဓိကရည်ရွယ်ချက်ထား စစ်ဆေးနေခြင်းဖြစ်ပါသည်။

             သွားရောက်စစ်ဆေးရာတွင် ဈေးကွက်စောင့်ကြည့်စစ်ဆေးခြင်းများကို လစဉ်ဆောင်ရွက်လျက်ရှိပြီး  နိုဝင်ဘာလအတွင်း ဒုတိယအကြိမ်အနေဖြင့် အချိုရည်များကို အဓိကထား၍ စစ်ဆေးခဲ့ကြောင်း သိရှိရပါသည်။

DOCA(စစ်ကိုင်း)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် ဝါးခယ်မမြို့နယ် တာဝန်ခံ ဦးအောင်မိုးသည် အားကစားနှင့်ကာယပညာဦးစီးဌာန၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊တိုင်းရင်းဆေးပညာဦးစီးဌာနတို့နှင့် ပူးပေါင်း၍ (၂၅.၁၁.၂၀၂၂)ရက်နေ့နံနက် (၁၁:၀၀)နာရီက ဝါးခယ်မမြို့နယ် ကျုံတိုင်းကျေးရွာ အထကကျောင်းတွင် ဆရာ/ဆရာမ၊ ကျောင်းသား၊ ကျောင်းသူများအား စားသုံးသူကာကွယ်ရေးအသိပညာပေး ဟောပြောဆောင်ရွက် ခဲ့ပါသည်။ ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ ဝါးခယ်မမြို့နယ် တာဝန်ခံမှ မိတ်ဆက်စကားပြောကြားပြီး စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ ဌာနမှ လက်ရှိဆောင်ရွက်နေသောလုပ်ငန်းတာဝန်များ ဆက်လက်ဆောင်ရွက်ရမည့် လုပ်ငန်းတာဝန်များ အား ဦးစွာရှင်းလင်းပြောကြားခဲ့ပါသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ် ပြန်ထားသော စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များမှ စားသုံးသူ၏ အခွင့် အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ပုဒ်မ ၄၁ ပုဒ်မခွဲ(ခ)နှင့်(ဂ)တို့ပါ ကုန်စည်၏ အမျိုး အမည်၊ အရွယ်အစား၊ အရေအတွက်နှင့် အသားတင်အလေးချိန်၊ သုံးစွဲပုံနည်းလမ်းနှင့် ထုတ်လုပ် သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်တို့အား အသေးစိတ်ရှင်းလင်း ဟောပြောခဲ့ပြီး၊ မိမိတို့စားသောက်နေသောအစားအသောက်များတွင် ဓါတုဆိုးဆေးများအလွန်အကျုးပါဝင်နေခြင်း၊ သက်တမ်းလွန်အစားအသောက်များအား မိမိ၏အသိဖြင့် ဆင်ခြင်ဝယ်ယူစားသောက်ကြရန် ဟောပြောဆွေးနွေးပြီး၊ ကျောင်းမုန့်ဈေးတန်းစားသုံးသူရေးရာအဖွဲ့ဖြင့် မုန့်ဆိုင်များသို့ သွားရောက်စစ်ဆေးခဲ့ပြီး ဆိုင်ပိုင်ရှင်များအား မိမိတို့ရောင်းချနေသော အစားအသောက်များတွင် သက်တမ်းလွန်မုန့်များအား ရောင်းချခြင်းမပြုကြရန် အသိပေးပြောကြားခဲ့ပါသည်။ စားသုံးသူ အသိပညာပေးဟောပြောပွဲသို့ ဆရာ/ဆရာမ(၁၆)ဦး၊ ကျောင်းသားကျောင်းသူ (၁၅၀)ဦး၊ စုစုပေါင်း (၁၆၆)ဦးတက်ရောက်ခဲ့ကြောင်း သိရှိရပါသည်။ DOCA(ဧရာဝတီ)

         ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ မအူပင်မြို့နယ် ဦးစီးမှူး ဦးအောင်ဇော်ဦးနှင့် ဝန်ထမ်းများသည် (၂၂.၁၁.၂၀၂၂၀) ရက်နေ့ နေ့လယ် (၁၃:၃၀)နာရီအချိန်တွင် မအူပင်မြို့ အမှတ်-၈ ရပ်ကွက် မြနန္ဒာ မူလွန်ကျောင်းတွင် ကျောင်းသား/ ကျောင်းသူ ဆရာ/ဆရာမ (၁၄၇) အား စားသုံးသူအကာအကွယ်ပေးရေး အသိပညာပေး ဟောပြောခဲ့ကြပါသည်။ အသိပညာပေးဟောပြောပွဲတွင် ကျောင်းသား/ကျောင်းသူများအား စားသုံးသူတို့၏ အခွင့်အရေး များအကြောင်း၊ လိုက်နာရမည့် တာဝန်များ၊ စားသုံးသူကာကွယ်ရေး၏ လုပ်ငန်းစဉ်များအကြောင်း၊ စားသုံးသူ၏ အဓိပ္ပာယ်၊ စားသုံးသူများသည် ဈေးကွက်အတွင်း ကုန်စည်များကို ဝယ်ယူအသုံးပြုရာတွင် ကုန်အညွှန်းအမှတ်အသား ပြည်စုံစွာပါဝင်သော ကုန်စည်များကို ရွေးချယ်တက်စေရန် ပါဝင်ရမည့် အချက်အလက်များကို သိရှိနားလည်ထားစေရန်၊ စားသုံးသူတို့သည် ကုန်စည်၊ ဝန်ဆောင်မှုနှင့် စပ်လျဉ်း၍ နစ်နာဆုံးရှုံမှုရှိလာပါက စားသုံးသူရေးရာဦးစီးဌာနသို့ တိုင်ကြားနိုင်သည့် နည်းလမ်းများအကြောင်းကို ရှင်းလင်းဆွေးနွေးပြီး စားသုံးသူတို့ နစ်နာဆုံးရှုံးမှုများကို မိမိတို့ဌာနသို့ တိုင်ကြားလာ၍ ညှိနှိုင်း ဖြေရှင်းဆောင်ရွက်ခဲ့သည့် ဖြစ်စဉ်များကို ဥပမာပေး၍ အကျယ်တဝင့်ရှင်းလင်းဟောပြောပြီး စားသုံးသူကာကွယ်ရေး အသိပညာပေး လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။ DOCA(ဧရာဝတီ)

         ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင် မော်လမြိုင်ကျွန်း မြို့နယ်တာဝန်ခံ ဦးမင်းဇော်လတ်သည် (၂၃.၁၁.၂၀၂၂)ရက်နေ့ ညနေ(၁၆:၀၀)နာရီအချိန်တွင် မော်လမြိုင်ကျွန်းမြို့ပေါ်ရှိ စက်သုံးဆီအရောင်းဆိုင်(၂)ဆိုင်အား ကွင်းဆင်းစစ်ဆေးခဲ့ပါသည်။ ထိုသို့ ကွင်းဆင်းစစ်ဆေးရာတွင် မြို့နယ်တာဝန်ခံမှ စက်သုံးဆီအရောင်းဆိုင်ပိုင်ရှင်များအား စက်ဆီ၊ ချောဆီနှင့်ဆက်စပ်ပစ္စည်းလုပ်ငန်းများအသင်းမှ ဈေးကွက်အတွင်း PPRD ၌ မှတ်ပုံတင် ထားခြင်းမရှိပဲ အရည်အသွေးမမှန်ကန်သော အာမခံချက်မရှိသည့် စက်ဆီ၊ ချောဆီများအား ရေသန့် ဘူးများ၊ ပြည်တွင်းထုတ်ဘူးများတွင် ထည့်သွင်း၍လည်းကောင်း၊ တရားဝင်တင်သွင်းသည့် ကုန်အမှတ်တံဆိပ်များနှင့်ဆင်တူယိုးမှားကပ်နှိပ်၍လည်းကောင်း၊ ဖြန့်ဖြူးရောင်းချလျှက်ရှိကြောင်း ထိုစက်ဆီ၊ ချောဆီများကိုအသုံးပြုခြင်းဖြင့် သုံးစွဲသူတို့၏ ယာဉ်၊ စက်ယန္တရားများပျက်စီးဆုံးရှုံးမှု ဖြစ်စေနိုင်၍ သုံးစွဲသူများထိခိုက်နစ်နာမှုရှိလာပါကလည်း တာဝန်ခံမှု၊ တာဝန်ယူမှုမရှိပါကြောင်းနှင့် ပြည်သူများအနေဖြင့် ဘေးအန္တရာယ်ကင်းရှင်း၍ အရည်အသွေးပြည့်မီပြီး အာမခံချက်ရှိသော စက်ဆီ၊ ချောဆီများရွေးချယ်သုံးစွဲနိုင်ရေးအတွက် မိမိတို့ဌာနအနေဖြင့် ပြည်သူများနစ်နာမှုမရှိစေရေး ကွင်းဆင်းဆောင်ရွက်ရခြင်းဖြစ်ပါကြောင်း ရှင်းလင်းပြောကြားစစ်ဆေးခဲ့ကြောင်း သိရှိရပါသည်။

DOCA(ဧရာဝတီ)