သတင်းနှင့် လှုပ်ရှားမှုများ

          ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ သာယာဝတီခရိုင် ၊ မိုးညိုမြို့၌ ခရိုင်ဦးစီးမှူး၏ လမ်းညွှန်မှုဖြင့် ၂၁.၁၁.၂၀၂၂ ရက်နေ့ ၊ နံနက် (၉ : ၀၀ ) နာရီအချိန်တွင် စည်ပင်သာယာမြို့မဈေးအတွင်းရှိ ကုန်စုံဆိုင်များတွင် ကုန်ညွှန်းအမှတ်အသားများ ပြည့်စုံစွာ ဖော်ပြထားခြင်းရှိ /မရှိ မိုးညိုမြို့နယ် တာဝန်ခံနှင့် ဝန်ထမ်းများမှ ဈေးကွက်စောင့်ကြည့် စစ်ဆေးခဲ့ပါသည်။

          စားသုံးသူများ တိကျမှန်ကန်သော သတင်းအချက်အလက်များ သိရှိစေရန် ၊ စားသုံးသူများ ဘေးအန္တရာယ် ကင်းရှင်းစေရေး ၊ စိတ်ကျေနပ်မှု ရရှိစေရေးအတွက် အာမခံချက်ပေးနိုင်သည့် အရည်အသွေးမြင့်မားသော ကုန်စည် ၊ ဝန်ဆောင်မှုများ ဖော်ဆောင်ဖြည့်ဆည်းပေးနိုင်စေရေးနှင့် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေး ဥပဒေအား လိုက်နာဆောင်ရွက်ရန် အသိပညာပေးခြင်း ၊ ကုန်စည်အမျိုးအစားအလိုက် သတ်မှတ်ချက်များနှင့်အညီ ကုန်ညွှန်းအမှတ်အသားများ ပြည့်စုံစွာဖော်ပြထားခြင်း ရှိ /မရှိ ဈေးကွက်စောင့်ကြည့်စစ်ဆေးပြီး လက်ကမ်းစာစောင်များ ဖြန့်ဝေခဲ့ပါကြောင်း သိရှိရပါသည်။

DOCA(ပဲခူး)

        မကွေးတိုင်းဒေသကြီး၊စားသုံးသူရေးရာဦးစီးဌာန ချောက်ခရိုင်၊ ‌ချောက်မြို့နယ်တာဝန်ခံသည် (၁၅.၁၁.၂၀၂၂) ရက်နေ့တွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ပညာရေး ဦးစီးဌာနတို့နှင့်ပူးပေါင်းပြီး အမျိုးသားအောင်ပွဲနေ့ အထိမ်းအမှတ် အသိပညာပေးဟောပြောပွဲကို နံနက် (၀၉း၃၀)နာရီတွင် အမှတ်(၁) အခြေခံပညာအထက်တန်းကျောင်း မြရိပ်ညိုခန်းမ၌လည်းကောင်း၊ (၁၃း၀၀)နာရီတွင် အမှတ်(၂) အခြေခံပညာအထက်တန်းကျောင်း စွယ်တော်ခန်းမ၌ လည်းကောင်း ကျင်းပခဲ့ပါသည်။

       မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးအရာရှိ ဒေါ်သိမ့်ဝါက  အမျိုးသား အောင်ပွဲနေ့ဖြစ်ပေါ်လာပုံသမိုင်းအကြောင်းကိုလည်းကောင်း၊ ဒုတိယဦးစီးမှူး ဒေါ်ခင်ချိုချိုဝင်းက စာဖက်ရှိန်မြင့်မားရေးကိုလည်းကောင်း၊ စားသုံးသူရေးရာဦးစီးဌာန၊ ချောက်မြို့နယ် တာဝန်ခံ ဒေါ်မြတ်မြတ်မိုးက စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များနှင့် ကုန်စည်လုံခြုံမှုအစ ကုန်အညွှန်းအမှတ်အသားက ခေါင်းစဉ်ဖြင့် စားသုံးသူကာကွယ်ရေး ဥပဒေ ၂၀၁၉ အခန်း(၁၈)ပါ ကုန်အညွှန်းအမှတ်အသားများတွင် ပြည့်စုံမှန်ကန်စွာပါဝင်ရမည့်အချက်များ၊ အသေးစိတ် ရှင်းလင်း ဆွေးနွေးခဲ့ပြီး ကျောင်းမုန့်စျေးတန်းရှိ စားသောက်ကုန်များတွင်လည်း စားသုံးရန်မသင့်တားမြစ်ထားသော ကုန်စည်များ၊ သက်တမ်းလွန်၊ မှိုတက်နှင့်ကုန်အညွှန်းအမှတ်အသား မပြည့်စုံသော ကုန်စည်များ ရောင်းချမှု ရှိ/မရှိ  စျေးကွက်စောင့်ကြည့်စစ်ဆေးခဲ့ပါသည်။

DOCA(မကွေး)

        ပဲခူးတိုင်းဒေသကြီး၊ စားသုံးသူရေးရာဦးစီးဌာန ၊ သာယာဝတီခရိုင်ဦးစီးမှူးနှင့် ဝန်ထမ်းများသည် (၁၆.၁၁.၂၀၂၂ )ရက်နေ့ ၊ နံနက် (၁၀  :  ၀၀) နာရီအချိန်တွင် မင်းလှမြို့နယ် အထက (ခွဲ) ကိုင်းပြင်ကြီး ကျောင်း၌ ဆရာ ၊ ဆရာမ (၈)ဦး ၊ ကျောင်းသား/ကျောင်းသူ (၂၅၀)ဦး ၊ စုစုပေါင်း (၂၅၈)ဦးတို့အား စားသုံးသူကာကွယ်ရေး အသိပညာပေး ဟောပြောခဲ့ပါ သည်။

      ပထမဦးစွာ ခရိုင်ဦးစီးမှူးက စားသုံးသူအခွင့်အရေးများ အပြည့်အဝရရှိစေရန်နှင့် တိကျမှန်ကန်သော သတင်းအချက်အလက်များ သိရှိစေရန် ၊ စားသုံးသူများ ဘေးအန္တရာယ်ကင်းရှင်းရေး ၊ စိတ်ကျေနပ်မှုရှိစေရေးတို့အတွက် ဈေးကွက်စောင့်ကြည့် စစ်ဆေးခြင်းနှင့် ဦးစီးဌာန၏ မျှော်မှန်းချက်နှင့် ရည်မှန်းချက်များအကြောင်း အသိပညာပေးဟော ပြောခဲ့ကြောင်း သိရှိရပါသည်။

       ဆက်လက်၍ စားသုံး/ထုတ်လုံတာဝန်ခံမှ စားသုံးသူကာကွယ်ရေး ဥပဒေ အခန်း(၉)ပါ စားသုံးသူ၏ အခွင့်အရေး (၈)ချက်နှင့် တာဝန် (၄)ချက်အား ရှင်းလင်းခြင်း ၊ ကျောင်းသား / ကျောင်းသူများအနေဖြင့် ကုန်စည်နှင့် ဝန်ဆောင်မှုကို ဝယ်ယူအသုံးပြုခြင်းကြောင့် နစ်နာဆုံးရှုံး မှုများ ဖြစ်ပေါ်လာပါက လွယ်ကူလျင်မြန်စွာ တိုင်ကြားနိုင်သည့် စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ ( Consumer Information and Complaint Center – CICC) ကို ခရိုင်ဦးစီးမှူးရုံးတွင် ဖွင့်လှစ်ထားရှိကြောင်း အသိပညာပေးဆွေးနွေးခြင်း ၊ မြို့နယ် တာဝန်ခံက အစားအသောက်များ ဘေးအန္တရာယ် ကင်းရှင်းစွာ ရွေးချယ်ဝယ်ယူ စားသောက်တတ်သော အလေ့အကျင့်ကောင်းများရရှိစေရန် စားသုံးသူကာကွယ်ရေး ဥပဒေ အခန်း (၁၈) ပါ ကုန်အညွှန်းအမှတ်အသား ဖော်ပြခြင်းဆိုင်ရာ အကြောင်းအရာများ ၊ ဓာတုဆိုးဆေးနှင့် တာရှည်ခံ ဆေးများ အန္တရာယ်များကို အကျယ်တဝင့်ဆွေးနွေးပြီး သန့်ရှင်းလတ်ဆတ်သော အ‌စား အသောက်များ ရွေးချယ်ဝယ်ယူစားသုံးတတ်စေရန် အသိပညာပေးဆွေးနွေးပြီး လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ပဲခူး)

           စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ စားသုံးသူကာကွယ်ရေးဥပဒေပါ စားသုံးသူအခွင့်အရေးများ ၊ စီးပွားရေးလုပ်ငန်းရှင်၏တာဝန်နှင့် တားမြစ်ချက်များ ၊ စီးပွားရေးကျင့်ဝတ်နှင့်အညီ လုပ်ကိုင်ဆောင်ရွက်ပြီး တာဝန်ယူမှု၊ တာဝန်ခံမှုရှိသော စီးပွားရေးလုပ်ငန်းရှင်များဖြစ်လာစေရန် ရည်ရွယ်၍ နိုဝင်ဘာလ(၁၆)ရက်နေ့၊ နံနက်(၁၀:၃၀)အချိန်နှင့် နိုဝင်ဘာလ(၁၈)ရက်နေ့၊ နံနက် (၉:၃၀)အချိန်တွင် ဦးစီးအရာရှိ ဒေါ်မွန်မွန်စိုးနှင့် ဒု-ခရိုင်ဦးစီးမှူး ဦးဇော်ထွန်းဦး ဦးဆောင်သောဝန်ထမ်း များအဖွဲ့သည် ကုန်အညွှန်းအမှတ်အသား ဖော်ပြချက်များ ပြည့်စုံစွာပါဝင်မှုရှိစေရန် ပခုက္ကူမြို့  အမှတ်(၃/၄/၅)၊ အမှတ်(၁၃/၁၄) ရပ်ကွက်နှင့် ရွှေချောင်းကွက်သစ်ရပ်ရှိ ပဲကြော်အမျိုးမျိုး၊ ကိတ်နှင့်မုန့်မျိုးစုံများ ထုတ်လုပ်ဖြန့်ဖြူး ရောင်းချသော လုပ်ငန်းရှင်များဆီသို့ ကုန်အညွှန်းအမှတ်အသားများ ပြည့်စုံစွာပါဝင်စေရေးအတွက် သွားရောက်၍ တိုက်တွန်းနှိုးဆော် အသိပညာပေး ဆွေးနွေးခဲ့ပါသည်။

          ဦးစီးအရာရှိ ဒေါ်မွန်မွန်စိုးက ဆွေးနွေးရာတွင် စီးပွားရေးလုပ်ငန်းရှင်များအနေဖြင့် စားသုံးသူ ကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသား ပြည့်စုံစွာဖော်ပြခြင်းဖြင့် ဈေးကွက် အတွင်းရှိ  မိမိတို့ထုတ်ကုန်များမှာ စားသုံးသူများအား ဘေးအန္တရာယ်ကင်းရှင်းစေခြင်း၊ အာမခံချက်ပေးခြင်း၊ သတင်းအချက်အလက်များ ပြည့်စုံမှန်ကန်စွာ ထည့်သွင်းခြင်းတို့ကြောင့် စားသုံးသူများအနေဖြင့် စီးပွားရေးလုပ်ငန်းရှင်များအပေါ်  ယုံကြည်မှုများရရှိလာပြီး အကျိုးစီးပွားများပိုမိုရရှိ လာနိုင်မည်ဖြစ်ကြောင်း ရှင်းလင်းဆွေးနွေးပြီး ဒု-ခရိုင်ဦးစီးမှူး ဦးဇော်ထွန်းဦးက စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်(၂/၂၀၁၉)ပါ ကုန်စည် အုပ်စု(က)ရှိ အစားအသောက်တွင်  မြန်မာ ဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့်ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့် ပြစ် ဒဏ်များအကြောင်း သိရှိလိုက်နာစေရန်ဆွေးနွေးခဲ့ပြီး စီးပွားရေးလုပ်ငန်းရှင်များသည် ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ ပြည့်စုံမှန်ကန်မှုရှိ/မရှိကို မိမိတို့ဌာနသို့တင်ပြစိစစ် လျှောက်ထားနိုင်ပါကြောင်း၊ ကုန်အမှတ်တံဆိပ်စိစစ်ခွင့်ပြုချက်များအား ပြုလုပ်ဆောင်ရွက်ထားစေလိုကြောင်း၊ ကုန်အညွှန်းအမှတ်အသားများ ပြည့်စုံမှုမရှိသည့် ကုန်စည်များတွေ့ရှိလာပါက ဥပဒေအရ အရေးယူ ဆောင်ရွက်သွားမည်ဖြစ်သဖြင့် လုပ်ငန်းရှင်များ လိုက်နာဆောင်ရွက်စေလိုကြောင်း တိုက်တွန်းနှိုးဆော် အသိပညာပေးဆွေးနွေးခဲ့ပါသည်။

DOCA(မကွေး)

          စီးပွားရေးနှင့်ကူးသန်းရောင်း၀ယ်ရေး၀န်ကြီးဌာန၊ ပြည်ထောင်စုဒုတိယ၀န်ကြီး ဦးညွန့်အောင်နှင့် စားသုံးသူ ရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချို တို့သည် နို၀င်ဘာလ ၁၉ ရက်နေ့ နံနက်ပိုင်း ပုသိမ်စက်မှုမြို့တော် အစည်းအဝေးခန်းမတွင် ဧရာ၀တီတိုင်းဒေသကြီးအတွင်းရှိ ဆန်စက်ပိုင်ရှင်၊ ဆန်ကုန်သည် ဆန်တင်ပို့သည့် ကုမ္ပဏီ၊ Exporter များနှင့်တွေ့ဆုံ၍ လက်ရှိပြည်ပဆန်တင်ပို့မှုစျေးကွက်အခြေအနေ လုပ်ငန်းရှင်များ၏ အခက်အခဲများကို နိုင်ငံတော်မှ ဖြေရှင်းပေးရမည့်အပိုင်းများ၊ ပုသိမ်ဆိပ်ကမ်းမှ  ပြည်ပတင်ပို့ရန်လျာထားဆောင်ရွက်မှု ပြည်ပပို့ကုန် ကိစ္စရပ်များ၊ ရန်ကုန်မှပြည်ပတင်ပို့မှုနှင့် ဧရာ၀တီမှတိုက်ရိုက်တင်ပို့ရာတွင် အားသာချက်များနှင့် စီးပွားရေး လုပ်ငန်းရှင်များမှ တင်ပြချက်များအပေါ် ဖြေရှင်းပေးမည့်ကိစ္စရပ်များအား ဖြည့်စွက်ဆွေးနွေးခဲ့ပြီး ပုသိမ်စက်မှု မြို့တော်ဆိပ်ကမ်းမှ စတုတ္ထအကြိမ် ပြည်ပသို့တင်ပို့မည့် MV MCl-18 သင်္ဘောဖြင့် ပြည်ပဆန်တင်ပို့မှုအား သွားရောက်ကြည့်ရှုခဲ့ပါသည်။

       ပုသိမ်စက်မှုမြို့တော်ဆိပ်ကမ်းမှ ဘင်္ဂလားဒေ့ရှ်နိုင်ငံသို့ MV MCL-17 သင်္ဘောဖြင့် (၂၉-၁၀-၂၀၂၂)ရက်နေ့မှ  (၁-၁၁-၂၀၂၂) ရက်နေ့အထိ တန်ချိန် (၂၆၅၀) ပထမအကြိမ် ပြည်ပသို့တင်ပို့ခဲ့ပြီး MV MCL-21 သင်္ဘောဖြင့်  (၂-၁၁-၂၀၂၂)ရက်နေ့မှ (၆-၁၁-၂၀၂၂)ရက်နေ့အထိ တန်ချိန် (၂၆၁၅)တင်ပို့ခဲ့ပါသည်။ MV MCL-12 သင်္ဘောဖြင့် (၉-၁၁-၂၀၂၂)ရက်နေ့မှ (၁၂-၁၁-၂၀၂၂)ရက်နေ့အထိ တန်ချိန် (၂၆၅၀) တတိယအကြိမ် သင်္ဘောဖြင့်တင်ပို့ခဲ့ပြီး၊ စတုတ္ထအကြိမ် MV MCL-18 သင်္ဘောဖြင့် (၁၇-၁၁-၂၀၂၂)ရက်နေ့မှစတင်၍ သင်္ဘောဖြင့်ဆန်တင်ခဲ့ရာ ယခု (၁၉-၁၁-၂၀၂၂)ရက်နေ့ နေ့လည်အထိ အိတ်ရေ (၂၁၅၁၇) တန်ချိန် (၁၀၇၅.၈၅)တန် သင်္ဘောတင်ပြီးကြောင်း သိရသည်။

DOCA(ဧရာဝတီ)