သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် ၂၀၂၃ ခုနှစ်၊ ဇန်နဝါရီလ(၂၇)ရက်နေ့ ၊ နေ့လယ်(၁၄း၀၀)နာရီအချိန်တွင် မိတ္ထီလာမြို့ ကုန်သည်ကြီး များအသင်း ကုန်စည်ဒိုင်၌ ကုန်စည်ဒိုင်ဖွံ့ဖြိုးတိုးတက်ရေးအတွက် အလုပ်အမှုဆောင်ကုန်သည်နှင့် တွေ့ဆုံဆွေးနွေးခဲ့ရာ ကုန်စည်ဒိုင်အသင်းဥက္ကဋ္ဌနှင့် အလုပ်အမှု‌ဆောင်အဖွဲ့ဝင်စုစုပေါင်း (၂၀)ဦးတက်ရောက်ခဲ့ပါသည်။

    အဆိုပါ တွေ့ဆုံဆွေးနွေးပွဲတွင် စားသုံးသူရေးရာဦးစီးဌာန၊ မိတ္ထီလာခရိုင် ဦးစီးမှူးက ကုန်စည်ဒိုင်ဖွံ့ဖြိုးတိုးတက်ရေးအတွက် ဌာနနှင့်ညှိနှိုင်းပေါင်းစပ်၍ ဆောင်ရွက်ရမည်ဖြစ်ကြောင်း၊ ကုန်စည်ဒိုင်ဖွံ့ဖြိုးတိုးတက်အောင်ဆောင်ရွက်ရာတွင် ပစ္စည်းမှန်၊ ဈေးနှုန်းမှန်၊ အရည်အသွေးမှန်၊ အရောင်းအဝယ်မှန် စသည့် မှန်(၄)မှန်ဖြင့် ဆောင်ရွက်ရမည်ဖြစ်ကြောင်း၊ အရည်အသွေး စံချိန်စံညွှန်းသတ်မှတ်ရေးအဖွဲ့၊ ဈေးနှုန်းသတ်မှတ်ရေးအဖွဲ့၊ ကုန်သွယ်ရေးအငြင်းပွားမှုဖြေရှင်းရေးအဖွဲ့ စသည့်အဖွဲ့များဖွဲ့ပြီး  ဆောင်ရွက်သွားရန်လိုကြောင်း၊ အခြားကုန်စည်ဒိုင်များနှင့် သတင်းအချက်အလက်များကို  Network ချိတ်ဆက်ဆောင်ရွက်ရမည်ဖြစ်ကြောင်း၊ ကုန်သည်လုပ်ငန်းရှင်များက ကုန်စည်ဒိုင်အပေါ် စိတ်ဝင်စားမှုရှိပြီး ယုံကြည်လာအောင် စည်းရုံးဆောင်ရွက်ရမည်ဖြစ်ကြောင်း၊ အဖွဲ့ဝင်များနှင့် တွေ့ဆုံဆွေးနွေးပြီး ပြောင်းလဲမှုများပြုလုပ်ရန်လိုကြောင်း၊ လက်ရှိဆောင်ရွက်နေသော လုပ်ငန်းများအပေါ် အခက်အခဲများကိုလည်း ညှိနှိုင်းပေးရန်နှင့် လိုအပ်ချက်များရှိပါက မိမိတို့အနေဖြင့် တိုင်းဒေသကြီး ဦးစီးမှူးရုံးသို့ တင်ပြဆောင်ရွက်ပေးမည်ဖြစ်ကြောင်း ဆွေးနွေးပြောကြားခဲ့ပြီး ကုန်စည်ဒိုင် အလုပ်အမှု‌ဆောင် အဖွဲ့ဝင်ကုန်သည်လုပ်ငန်းရှင်များကလည်း အရောင်းအဝယ်ပြုလုပ်ရာတွင် ကြုံတွေ့ရသည့်အခက်အခဲများကို ဆွေးနွေးတင်ပြခဲ့ပါသည်။

DOCA(မန္တလေး)

        မန္တလေးတိုင်းဒေသကြီး၊ ညောင်ဦးခရိုင်၊ ညောင်ဦးမြို့နယ်ရှိ ယွန်းပညာကောလိပ်(ပုဂံ)တွင် (၂၇-၁-၂၀၂၃)ရက်နေ့ နေ့လယ် ၁၄:၀၀ နာရီအချိန်၌ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ခရိုင်စားသုံးသူရေးရာဦးစီးဌာနတို့ပူးပေါင်း၍ ကျောင်းသား/ကျောင်းသူများ ဘက်စုံဖွံဖြိုးတိုးတက်စေရန်နှင့် နိုင်ငံ့သားကောင်းရတနာများဖြစ်လာစေရန်ရည်ရွယ်လျက် အသိပညာပေးဟောပြောပွဲအား ကျင်းပပြုလုပ်ခဲ့ပါသည်။

      အဆိုပါ အသိပညာပေးဟောပြောဆွေးနွေးပွဲတွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူးက မီဒီယာနှင့်သတင်းအချက်အလက်ဆိုင်ရာသိနားလည်မှုခေါင်းစဉ်ဖြင့် အသိပညာပေးဟောပြောဆွေးနွေးခဲ့ပြီး၊ စားသုံးသူရေးရာဦးစီးဌာန၊ ညောင်ဦးခရိုင် ဦးစီးမှူးက စားသုံးသူ၏အခွင့်အရေးနှင့်အကျိုးစီးပွားကို ဥပဒေနှင့်အညီကာကွယ်ပေးခြင်း၊ စားသုံးသူ ၏အခွင့်အရေးနှင့်တာဝန်များအကြောင်း၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားနှင့်ပတ်သက်သည့် အကြောင်းအရာများအား အကျယ်တဝင့်ဟောပြောဆွေးနွေးရာ ကျောင်းသား/ကျောင်းသူများသည် သိရှိလိုသည်များအား မေးမြန်းခဲ့ပြီး စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးက ပြန်လည်ရှင်းလင်းဆွေးနွေးဖြေကြားခဲ့ပါသည်။

          ဟောပြောဆွေးနွေးပွဲသို့ ယွန်းပညာရေးကောလိပ်မှ ဆရာ/ဆရာမ(၁၅)ဦး၊ ကျောင်းသား/ကျောင်းသူ(၆၀)ဦးနှင့် ဌာနဆိုင်ရာတာဝန်ရှိသူ(၄)ဦး၊ စုစုပေါင်း(၇၉)ဦးတက်ရောက်ခဲ့ပါသည်။

DOCA(မန္တလေး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ ဒု-ခရိုင်ဦးစီးမှူး  ဦးမြင့်ကြည်(မြို့နယ်တာဝန်ခံ)နှင့် ဝန်ထမ်းများသည်(၂၈-၁-၂၀၂၃)ရက်နေ့ နံနက် (၁၀:၀၀) အချိန်တွင် အမှတ်(၄)ရပ်ကွက်ရှိ မိသားစုတစ်နိုင်တစ်ပိုင်လုပ်ငန်းဖြစ်သော “အောင်မြင်သူ” ပဲကိတ်၊ လမုန့်၊ ဆီကြော်မုန့်၊ ပေါင်မုန့်နှင့် ကိတ်မုန့်ထုတ်လုပ်သည့်လုပ်ငန်းရှင်သို့ သွားရောက်၍ စားသုံးသူကာကွယ်ရေးဥပဒေပါ ပြဋ္ဌာန်းချက်များအား လိုက်နာဆောင်ရွက်ခြင်းဖြင့် စားသုံးသူများဘေးအန္တရာယ်ကင်းရှင်းစေပြီး မိမိတို့လုပ်ငန်းများတွင်လည်း ထုတ်ကုန်လုံခြုံစိတ်ချရမှုရှိစေပြီး အကျိုးစီးပွားအောင်မြင်ဖြစ်ထွန်းစေရန်ရည်ရွယ်၍ အသိပညာပေးဆွေးနွေးခဲ့ပါသည်။

    ဒု-ခရိုင်ဦးစီးမှူး  ဦးမြင့်ကြည်(မြို့နယ်တာဝန်ခံ)က ဆွေးနွေးရာတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်များအကြောင်း၊ စီးပွားရေးလုပ်ငန်းရှင်၏တာဝန် များ၊ စီမံခန့်ခွဲရေးနည်းလမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်း၊ မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ညွှန်ကြားချက်ပါ ကုန်စည်အုပ်စုအလိုက် မြန်မာဘာသာဖြင့် ထည့်သွင်းဖော်ပြရမည့်အချက်များနှင့် ကုန်အညွှန်းအမှတ်အသားပြည့်စုံမှုမရှိသောထုတ်ကုန်များအား စားသုံးသူကာကွယ်ရေးဥပဒေအရ ဈေးကွက် အတွင်းမှ လျော့နည်းပပျောက်သွားစေရန် စောင့်ကြည့်စစ်ဆေးအရေးယူသွားမည်ဖြစ်သောကြောင့် တိကျစွာလိုက်နာဆောင်ရွက်ရန်လိုအပ်ကြောင်း ဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ညွှန်းကြားချက်(၂/၂၀၁၉)လက်ကမ်းစာစောင်များဖြန့်ဝေပေးခဲ့ ပါသည်။

     “အောင်မြင်သူ”မုန့်လုပ်ငန်းကို လုပ်ကိုင်နေသည်မှာ (၁၅)နှစ်ရှိပြီဖြစ်ကြောင်း၊ အလုပ်သမား (၇)ဦးရှိကာ မိသားစုတစ်နိုင်တစ်ပိုင်လုပ်ငန်းဖြစ်ပြီး မုန့်(၆)မျိုး (၇)မျိုးခန့်ပြုလုပ်ပါကြောင်း၊ အဓိကအနေဖြင့် ပဲကိတ်နှင့် လမုန့်များကိုဦးစားပေးပြုလုပ်၍ ရောင်းချပါကြောင်း၊ မုန့်များကို မင်းဘူးမြို့ရှိ ဈေးဆိုင်များသို့ အဓိကထားပို့ရပြီး၊ စကုမြို့၊ လယ်ကိုင်း၊ ပွင့်ဖြူမြို့နယ်နှင့် လေးပင်ရွာစသည့် အနီးအနားရှိမြို့များသို့လည်းပို့ရပါကြောင်း၊ ယခုကာလသည် ဈေးနှုန်းများအဆမတန်မြင့်တက်နေမှုကြောင့် အကျိုးအမြတ်များစွာမရရှိဘဲ မိသားစုစားဝတ်နေရေးအဆင်ပြေရုံသာ ကျန်ရှိပါကြောင်း လုပ်ငန်းရှင် ဦးသိန်းဇော်၏ပြောကြားချက်အရသိရှိရပါသည်။

DOCA(မကွေး)

         မွန်ပြည်နယ်၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်းရှင်းရေး၊ စားသုံးသူအခွင့်အရေးနှင့် အကျိုးစီးပွားကာကွယ်ရန် ရည်ရွယ်၍ စားသုံးသူကာကွယ်ရေး အသိပညာပေးဟောပြောဆွေးနွေးပွဲများကို ပြည်နယ်အတွင်းရှိ ခရိုင်များနှင့် မြို့နယ်များတွင် နည်းလမ်းမျိုးစုံဖြင့် နေရာအနှံ့ဆောင်ရွက်လျက်ရှိပါသည်။

         ၂၇.၁.၂၀၂၃ ရက်နေ့၊ နံနက် (၁၀:၃၀) နာရီအချိန်တွင် မော်လမြိုင်ခရိုင်စားသုံးသူရေးရာဦးစီး ဌာနနှင့် မော်လမြိုင်ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ ပူးပေါင်း၍ မော်လမြိုင်ခရိုင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနရှိ လူထုအခြေပြုဗဟိုဌာန (Community Centre) ခန်းမ၌ စားသုံးသူကာကွယ်ရေးအသိပညာပေးဟောပြော ဆွေးနွေးပွဲ Talk Show ပြုလုပ်ခဲ့ပါသည်။

          အဆိုပါဆွေးနွေးပွဲတွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူး ဒေါ်မြင့်မြတ်သီတာက Talk Show ပြုလုပ်ရခြင်းရည်ရွယ်ချက်အား ဆွေးနွေးခြင်း၊ မော်လမြိုင်ခရိုင် စားသုံးသူရေးရာဦးစီးဌာန၊ ခရိုင်ဦးစီးမှူးဒေါ်ဝါဝါမြိုင်က ဦးစီးဌာန၏ ဆောင်ပုဒ် (Motto)၊ မျှော်မှန်းချက် (Vision)၊ ရည်မှန်းချက် (Mission)များ၊ စစ်ဆေးရေးအရာရှိ၏လုပ်ငန်းတာဝန်များ၊ ကုန်အညွှန်းအမှတ်အသားဆိုင်ရာပြဌာန်းချက်များ၊ ပြစ်မှု၊ ပြစ်ဒဏ်များ၊ စားသုံးသူများနစ်နာဆုံးရှုံးမှု များဖြစ်ပေါ်လျှင် တိုင်ကြားနိုင်သည့်နည်းလမ်းများနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ကုန်အညွှန်းအမှတ်အသားဆိုင်ရာညွှန်ကြားချက် (၂/၂၀၁၉) တို့အားဆွေးနွေးခဲ့ကြောင်းသိရှိရပါသည်။

DOCA(မွန်)

          ၂၀၂၃ခုနှစ်၊ ဇန်နဝါရီလ ၂၇ ရက်နေ့၊ နေ့လည် (၁၄း၀၀)နာရီအချိန်တွင် တပ်ကုန်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရုံးခန်း၌ စားသုံးသူကာကွယ်ရေး အသိပညာပေး Talk Show ကို စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဒုတိယတိုင်းဦးစီးမှူး၊ ဦးခင်မောင်ဆွေ ဦးဆောင်၍ ဝန်ထမ်းများနှင့်သွားရောက် ပြုလုပ်ခဲ့ပါသည်။

        အဆိုပါ Talk Show တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ၊ဒေါ်တင့်တင့်ခိုင်က “စားသုံးသူကာကွယ်ရေးဥပဒေအကြောင်းနှင့် ကုန်အညွှန်းအမှတ်အသားများအကြောင်း သိကောင်းစရာများ” ကို ရှင်းလင်းပြောကြားပေးစေလိုကြောင်း မေးမြန်းခဲ့ရာ ဒုတိယတိုင်းဦးစီးမှူး၊ ဦးခင်မောင်ဆွေမှ “ စားသုံးသူကာကွယ်ရေးဥပဒေပါ အကြောင်းအရာများနှင့်ကုန်အညွှန်းအမှတ်အသားများကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ဖော်ပြရာ၌ စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်အမှတ်(၁/၂၀၁၉)နှင့်ပတ်သက်၍ ရှင်းလင်းပြောကြားခဲ့ပြီး Talk Show ပြုလုပ်ခြင်းကို နေ့လည် (၁၄း၁၅)နာရီ အချိန်တွင် ပြီးမြောက်ကြောင်း  သတင်းရရှိပါသည်။

DOCA(ပြည်ထောင်စုနယ်မြေ)