သတင်းနှင့် လှုပ်ရှားမှုများ

         ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံရုံးမှ မြို့မ(၁)အခြေခံပညာမူလတန်းလွန်ကျောင်းတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ တိုင်းရင်းဆေးပညာဦးစီးဌာနမှ ပူးပေါင်း၍ အသိပညာပေး ဟောပြောပွဲကို ဩဂုတ်လ ၁၅ ရက်နေ့နံနက်ပိုင်းက ကျင်းပပြုလုပ်ခဲ့ပါသည်။

        ဟောပြောပွဲတွင် ဖြူးမြို့နယ်တာဝန်ခံရုံးမှ အကြီးတန်းစာရေး ဒေါ်သဲဆုရည်မွန်က စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူ၏ အခွင့်အရေးများ၊ စားသုံးသူနစ်နာဆုံးရှုံးမှုဖြစ်ပေါ်လာပါက စားသုံးသူရေးရာဦးစီးဌာန၊ ခရိုင်ရုံးများတွင်ဖွင့်လှစ်ထားသည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) များတွင် တိုင်ကြားနိုင်ခြင်းများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဖတ်ရှုသင့်ခြင်းများကို ဟောပြောခဲ့ပါသည်။

    ဆက်လက်၍ ဖြူးမြို့၊ တိုင်းရင်းဆေးရုံမှ လက်ထောက်တိုင်းရင်းဆေးမှူး၊ ဒေါ်ဇင်မင်းထွန်းက ဝမ်းရောဂါအကြောင်း သိကောင်းစရာများကိုလည်းကောင်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီးမှူး ဒေါ်အိမာဟိန်းက “အသိပညာတိုးပွားဖို့ စာဖတ်ကြပါစို့”ခေါင်းစဉ်ဖြင့် လည်းကောင်း ဟောပြောခဲ့ကြောင်းနှင့် ဟောပြောပွဲသို့ ကျောင်းသားကျောင်းသူ ၃၄၉ ဦး တက်ရောက်ကြောင်း သိရှိရပါသည်။

DOCA(ပဲခူး)

               တောင်ငူခရိုင်၊ ဖြူးမြို့နယ်၊ လင်းယောခင်ကျေးရွာတွင် ဘိုးစဉ်ဘောင်ဆက် ဆန်ကော၊ ဆန်ခါလုပ်ငန်းဖြင့် အသက်မွေးသူများ များပြားလှပါသည်။ ၎င်းကျေးရွာမှ ပြုလုပ်သော ဆန်ကော၊ ဆန်ခါများမှာ လက်ရာသေသပ် ကောင်းမွန်သောကြောင့် ဒေသတွင်းတွင် နာမည်ရလျှက်ရှိပါသည်။

              ဆန်ကော၊ ဆန်ခါပြုလုပ်ရန် လိုအပ်သော ကုန်ကြမ်းပစ္စည်းများမှာ တင်းဝါးနှင့်ကြိမ်များ ဖြစ်ပါသည်။ ဆန်ကော၊ ဆန်ခါပြုလုပ်ပုံအနေဖြင့် တင်းဝါးကိုနှီးဖြာ၍ မီးမြိုက်ပြီး ဆန်ကော၊ ဆန်ခါ အဖြစ် ယက်လုပ်ရပါသည်။ ဆန်ခါကို ဝါးကြောဖြင့် ယက်လုပ်ရပါသည်။ ထို့နောက် တင်းဝါးကိုဘဲ စိတ်ဖြာ၍ အပြင်တစ်ထပ်၊ အတွင်းတစ်ထပ်ခွေ၍ အနားသတ်ပြီးလျှင် ပြီးပြည့်စုံသည့် ဆန်ကော၊ ဆန်ခါကို ရရှိပါသည်။

              တင်းဝါးလေးလုံးနှင့် ကြိမ်တစ်စည်းလျှင် ဆန်ကော၊ ဆန်ခါ ၁၀ ချပ်ခန့် ရရှိကြောင်း သိရပါသည်။  ဆန်ကော၊ ဆန်ခါများအား ဖြူး၊ တောင်ငူ၊ ရေတာရှည်၊ ကျောက်တံခါး၊ ညောင်လေးပင်စသည့် ဒေသတွင်းရှိ မြို့နယ်များသို့ တင်ပို့ရောင်းချရကြောင်း လင်းယောခင်ရွာမှ ဆန်ကော၊ ဆန်ခါ လုပ်ငန်း လုပ်ကိုင်သူ မမိုးစန္ဒာ၏ ပြောပြချက်အရ သိရှိရပါသည်။

DOCA(ပဲခူး)

           တနင်္သာရီတိုင်းဒေသကြီး ၊ စားသုံးသူရေးရာဦးစီးဌာန၊ တိုင်း‌ဒေသကြီးဦးစီးမှူးသည် ၂၀၂၂ခုနှစ်၊ ဩဂုတ်လ ၁၆ ရက်နေ့ နံနက် (၁၀:၀၀)တွင် ရေဖြူမြို့ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဖွင့်လှစ်သော ဇာထိုး၊ ပန်းထိုး သင်တန်း၌ စားသုံးသူကာကွယ်ရေး သိကောင်းစရာများအကြောင်း သင်တန်းတစ်ချိန်(၄၅)မိနစ်ခန့် အသိပညာပေးဟောပြော ဆွေးနွေးခဲ့ကြောင်း သိရှိရပါသည်။                  

             အဆိုပါသင်တန်းတွင် စားသုံးသူရေးရာဦးစီးဌာန ၊တိုင်းဒေသကြီးဦးစီးမှူးမှ သင်တန်းတက်ရောက်သော သင်တန်းသူ(၁၁)ဦးအား စားသုံးသူ၏အခွင့်အရေး( ၈ )ချက်နှင့် စားသုံးသူ၏တာဝန်များ ၊ ကုန်စည် (သို့မဟုတ်) ဝန်ဆောင်မှုနှင့် ပတ်သက်သည့် စီးပွားရေးလုပ်ငန်းရှင်များ  လိုက်နာရမည့် တာဝန်များအကြောင်း၊ ကုန်အညွှန်းအမှတ်အသားများအကြောင်း ရှင်းလင်းပြောကြားခြင်းနှင့် အသိပညာပေး လက်ကမ်း‌စာစောင်များလည်း ဖြန့်ဝေခဲ့ကြောင်း သိရှိရပါသည်။

DOCA(တနင်္သာရီ)

     ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ဒေါ်ဆန္ဒမွန်(ဒု-ဦးစီးမှူး) နှင့်ဝန်ထမ်းများသည် ၁၆.၈.၂၀၂၂ရက်နေ့ နံနက်(၁၀:၀၀) အချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်အားကစားနှင့်ကာယဦးစီးဌာနတို့ဖြင့်ပူးပေါင်း၍ ဗန်းမော်မြို့ရှိ အမှတ်(၃)အခြေခံပညာ အထက်တန်းကျောင်းမြဝတီခန်းမ၌ စားသုံးသူကာကွယ်ရေးအသိပညာပေး ဟောပြောပွဲဆောင်ရွက်ခဲ့ပါသည်။

          ထိုသို့ ဟောပြောရာတွင် ဒေါ်ဆန္ဒမွန်(ဒု-ဦးစီးမှူး)က စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန်မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူအတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်းပြုလုပ်သူများ သို့မဟုတ် ပေးကမ်း ထောက်ပံ့ ခြင်းခံရသူများကိုဆိုလိုကြောင်း၊ စားသုံးသူ၏အခွင့်အရေးဖြစ်သည့် စားသုံးသူများအတွက် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ ကုန်စည်သို့မဟုတ်ဝန်ဆောင်မှုကိုဘေးအန္တရာယ်ကင်းရှင်းစွာအသုံးပြုခွင့်ရှိခြင်း၊ ဈေးကွက်အတွင်းရှိ ကုန်စည် သို့မဟုတ်ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ ကုန်စည်သို့မဟုတ်ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့်နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်းသည့် အသိပညာ ဗဟုသုတများ၊ အခွင့်အရေးများနှင့် လိုအပ်သောအချက်အလက်များကို သိရှိလေ့လာနိုင်ခွင့်ရှိခြင်း၊ ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်း နှင့်ပတ်ဝန်းကျင်တွင် နေထိုင်နိုင်ခွင့်ရရှိစေခြင်းတို့ကို အသိပညာပေးဟောပြောခဲ့ပါသည်။ ဟောပြောပွဲသို့ ဆရာ/ဆရာမ(၁၀)ဦး၊ ကျောင်းသား/ကျောင်းသူ(၅၀၀)ဦး၊ စုစုပေါင်း(၅၁၀)ဦးတို့ တက်ရောက်ခဲ့ပြီး စားသုံးသူကာကွယ်ရေးဆိုင်ရာအသိပညာပေး လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

           မကွေးတိုင်းဒေသကြီးအတွင်း ကုန်သွယ်မှုလမ်းကြောင်းများမှ တရားမဝင်ကန့်သတ်၊ တားမြစ်ကုန်စည်များနှင့် အကောက်ခွန်မဲ့ပစ္စည်းများ ဝင်ရောက်မှုမရှိစေရေး တားဆီးကာကွယ်ရန်အတွက် မကွေးတိုင်းဒေသကြီးအဆင့် တရားမဝင် ကုန်စည်စီးဆင်းမှု တားဆီးထိန်းချုပ်ရေး ကော်မတီ၏ ကွပ်ကဲမှုအောက်တွင် ဌာနဆိုင်ရာ ပူးပေါင်းရှာဖွေတားဆီး စစ်ဆေးရေးအဖွဲ့အား မကွေးမြို့ ကုန်တင်/ကုန်ချ ကားကြီးဝန်းအတွင်း ဖွဲ့စည်းတာဝန်ပေးအပ်ထားပြီး (၄.၁၀.၂၀၂၁)ရက်နေ့မှစ၍ မကွေးတိုင်းဒေသကြီး၊ စားသုံးသူရေးရာဦးစီးဌာနမှ ဌာနဆိုင်ရာပူးပေါင်းရှာဖွေတားဆီး စစ်ဆေးရေး အဖွဲ့တွင် အဖွဲ့ဝင်အဖြစ်ပါဝင်၍ ကုန်တင်/ကုန်ချပြုလုပ်သော မော်တော်ယာဉ်များအား စစ်ဆေးခြင်းလုပ်ငန်းများအား ဆောင်ရွက်လျက် ရှိပါသည်။

           (၁၃.၈.၂၀၂၂)ရက်နေ့နံနက်(၀၈:၀၀)ခန့်တွင် မကွေးမြို့အတွင်းသို့ ကုန်စည်များပေးပို့သည့်  မော်တော်ယာဉ်များအား အမှတ်(၂) ဂိတ်စခန်း၌ တာဝန်ကျ ဝန်ထမ်းများမှ စစ်ဆေးခြင်းလုပ်ငန်းများ ဆောင်ရွက်ရာတွင် ရန်ကုန်မြို့မှ မကွေးမြို့သို့ ကုန်မျိုးစုံ သယ်ဆောင်လာသော Nissan (၆)ဘီး မော်တော်ယာဉ်ပေါ်တွင် ထိုင်းနိုင်ငံထုတ် Cooking Oil (18 Liter) (၂၀၀)ပုံး အားစစ်ဆေးရာ အဆိုပါပစ္စည်းနှင့် ပတ်သတ်၍ အထောက်အထားများ တောင်းခံရာတွင် အထောက်အထားတစ်စုံတစ်ရာ ပြသနိုင်ခြင်းမရှိသဖြင့် ဌာနဆိုင်ရာပူးပေါင်းစစ်ဆေးရေးအဖွဲ့တွင်ပါဝင်သော မြို့နယ်စည်ပင်သာယာရေးအဖွဲ့၊ အကောက်ခွန်ဦးစီးဌာန၊ မူးယစ်ရဲတပ်ဖွဲ့၊ မြန်မာနိုင်ငံ ရဲတပ်ဖွဲ့ဝင်များနှင့်အတူ ထပ်မံစစ်ဆေး၍ အကောက်ခွန်မဲ့ တင်သွင်းလာသော ထိုင်းနိုင်ငံထုတ် Cooking Oil (18 Liter) (၂၀၀)ပုံး ခန့်မှန်းတန်ဖိုးငွေကျပ် (၁၂၀၀၀၀၀ဝိ/-) (သိန်းတစ်ရာနှစ်ဆယ်)ကျပ်နှင့် အဆိုပါအကောက်ခွန်မဲ့ပစ္စည်းများ သယ်ဆောင်လာသော Nissan (၆)ဘီး မော်တော်ယာဉ် ခန့်မှန်း တန်ဖိုးငွေကျပ် (၁၈၀၀၀၀၀ဝိ/-) (သိန်းတစ်ရာ ရှစ်ဆယ်)ကျပ် စုစုပေါင်း ခန့်မှန်းတန်ဖိုးငွေကျပ် (၃၀၀၀၀၀၀ဝိ/-) (သိန်းသုံးရာ)ကျပ်တန်ဖိုးရှိ တရားမဝင် ကုန်ပစ္စည်းများအား ဖမ်းဆီးရမိသဖြင့် လုပ်ထုံး လုပ်နည်းများ နှင့်အညီ အကောက်ခွန်အမှုတွဲ ဖွင့်လှစ်သိမ်းဆည်း၍ အကောက်ခွန်ဦးစီးဌာနသို့ လွဲပြောင်းအပ်နှံပြီးဖြစ်ပါကြောင်း သတင်းရရှိပါသည်။

DOCA(မကွေး)