သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ စစ်ဆေးရေးအရာရှိ ဒု-ခရိုင်ဦးစီးမှူး ဒေါ်မွန်မွန်စိုး ဦးဆောင်သောဝန်ထမ်းများသည် စားသုံးပြည်သူများလုံခြုံစိတ်ချရမှုရှိစေရေးအတွက် ရည်ရွယ်၍ (၉.၈.၂၀၂၂)ရက်နေ့၊ နံနက်(၉:၃၀)အချိန်တွင် ပခုက္ကူမြို့ အမှတ်(၂)၊စည်ပင်သာယာဈေးရှိ ကုန်မျိုးစုံ ဆိုင်များတွင်ရောင်းချလျက်ရှိသော ကုန်စည်များမှာ ထုတ်ကုန်လုံခြုံစိတ်ချရမှုရှိစေရန်အတွက် သက်တမ်းလွန်ကုန်ပစ္စည်းများ ရောင်းချနေမှုရှိ/မရှိ၊ကုန်အညွှန်းအမှတ်အသားနှင့် စပ်လျဉ်း၍ မြန်မာဘာ သာဖြင့် ဖော်ပြထားခြင်းရှိ/မရှိနှင့် ကုန်အညွှန်းအမှတ်အသားများပြည့်စုံစွာ ဖော်ပြထားမှုရှိ/မရှိကို ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူရေးရာဦးစီးဌာနမှ ကုန်မျိုးစုံရောင်းချ နေသောဆိုင်ရှင်များအား စားသုံးသူကာကွယ်ရေးဥပဒေ ၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားပြည့်စုံစွာ ဖော်ပြထားသည့်ကုန်စည်များကိုသာ ရောင်းချရန်၊ မြန်မာနိုင်ငံစားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက် အမှတ်(၂/၂၀၁၉)နှင့်အညီ ပြည့်စုံစွာဖော်ပြလာစေရေးနှင့် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက်(သို့မဟုတ်) အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကိုလည်း ထည့်သွင်းဖော်ပြရမည်ဖြစ်ပြီး ၊စားသုံးသူကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ပြစ်မှုပြစ်ဒဏ်များအကြောင်းတို့ကို အသိပေးပြောကြားခဲ့ပြီး စားသုံးသူ အသိပညာပေး လက်ကမ်းစာစောင်များ ဖြန့်ဝေခဲ့ကြပါသည်။

DOCA(မကွေး)

       တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ ထားဝယ်ခရိုင်တာဝန်ခံသည် ထားဝယ်ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနခန်းမတွင် စားသုံးသူကာကွယ်ရေး သိကောင်းစရာများ အသိပညာပေးဆွေးနွေးပွဲကို ၂၀၂၂ ခုနှစ်၊ ဩဂုတ်လ (၁၂) ရက်နေ့၊ နေ့လယ်ပိုင်းတွင်ဆောင်ရွက်ခဲ့သည်။

          အဆိုပါအသိပညာပေး (Talk Show) တွင်ခရိုင်ပြန်ကြားရေးနှင့် ပြည်သူ့ ဆက်ဆံရေးဦးစီးဌာန၊ ဦးဝင်းနိုင်မှ မိတ်ဆက်စကားပြောကြားခြင်း၊ စားသုံးသူရေးရာဦးစီးဌာနမှ ဌာန၏မျှော်မှန်းချက်၊ ရည်မှန်းချက်များ၊ စားသုံးသူ၏အဓိပ္ပာယ်ကိုရှင်းလင်းပြောကြားခြင်း၊ စားသုံးသူများ၏အခွင့်အရေး များကိုလည်းကောင်း ကုန်ညွှန်းအမှတ်သားများကိုပါ ရှင်းလင်းပြောကြားပြီး တိုင်ကြားမှုလက်ခံဆောင်ရွက်ရေးစင်တာသို့ လူကိုယ်တိုင်ဖြင့်ဖြစ်စေ၊ တယ်လီဖုန်းဖြင့်ဖြစ်စေ၊ စာဖြင့်ဖြစ်စေ Website ဖြင့်ဖြစ်စေ ၊DOCA Myanmar application ဖြင့်ဖြစ်စေတိုင်ကြားနိုင်ကြောင်း ဆွေးနွေးပြောကြားခဲ့ပါသည်။

DOCA(တနင်္သာရီ)

                ကချင်ပြည်နယ်၊ စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးကျော်မိုးလွင်(ဌာနခွဲစာရေး) သည် (၁၆.၈.၂၀၂၂)ရက်နေ့တွင် မိုးညှင်းခရိုင်ဦးစီးမှူးရုံး၌ ဆန်ခေါက်ဆွဲထုတ်လုပ်ဖြန့်ဖြူးရောင်းချသော လုပ်ငန်းရှင်များနှင့်တွေ့ဆုံဆွေးနွေးခဲ့ပါသည်။

          ထိုသို့တွေ့ဆုံဆွေးနွေးရာတွင်စားသုံးသူကာကွယ်ရေးဥပဒေတွင်ပါရှိသော စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည် ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာ လုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ စီးပွားရေးလုပ်ငန်းရှင်၏တာဝန်များဖြစ်သော ကုန်စည် သို့မဟုတ် ဝန်ဆောင်မှု၏အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း၊ စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာဆက်ဆံခြင်း၊ စီးပွားရေးလုပ်ငန်း လုပ်ကိုင်ရာတွင် စီးပွားရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာဆောင်ရွက်ခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူက ဝယ်ယူအသုံးမပြုမီ သိရှိစေရန် အတိအလင်းဖော်ပြပေးခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ကတိပြုထားသော အာမခံချက်နှင့်ကိုက်ညီမှုမရှိပါက ကတိပြုထားသည့်အတိုင်းတာဝန်ယူဆောင်ရွက်ပေးရမည်ဖြစ်ကြောင်းတို့ကို ရှင်းလင်းဆွေးနွေးခဲ့ပြီး စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA (ကချင်)

           Johnson & Johnson ကုမ္ပဏီအနေဖြင့်  ဓာတုဒြပ်ပေါင်းကိုအခြေခံသော ကလေးကိုယ်လိမ်း ပေါင်ဒါထုတ်လုပ်မှုကို ရပ်ဆိုင်းပြီး ပြောင်းဖူးမှုန့်ကိုအခြေခံသော ကလေးပေါင်ဒါမှုန့်ပြောင်းလဲ ထုတ်လုပ်မည်ဖြစ်ကြောင်း ကုမ္ပဏီကထုတ်ပြန်ထားပါသည်။ J&J သည် ကျန်းမာရေးစောင့်ရှောက်မှုဆိုင်ရာ ထုတ်ကုန်များကို ထုတ်လုပ်နေသော ကုမ္ပဏီကြီးတစ်ခုဖြစ်ပါသည်။ အမေရိကန်နိုင်ငံနှင့် ကနေဒါနိုင်ငံတို့မှာ လွန်ခဲ့သော ၂နှစ်ခန့်ကတည်းက အဆိုပါပေါင်ဒါရောင်းချမှုကို ရပ်ဆိုင်းထားခဲ့ပြီးလာမည့် ၂၀၂၃ ခုနှစ်မှာ အဆိုပါပေါင်ဒါထုတ်လုပ်ရောင်းချမှုကို ကမ္ဘာတဝှမ်းလုံးမှာရပ်ဆိုင်းရန် ဆုံးဖြတ်ခဲ့ကြောင်း သိရှိရသည်။

          ၂၀၂၀ ခုနှစ်အတွင်းမှာ J&J ကုမ္ပဏီက ၎င်းတို့၏ထုတ်ကုန်ဘေးကင်းစိတ်ချရမှုနဲ့ ပတ်သက်ပြီး  တရားရုံးမှာရင်ဆိုင်ရသော အမှုတချို့ရှိလာခဲ့ပြီး လျှော်ကြေးပေးရမှုများလည်း ရှိသည်ဟု သိရပါသည်။ ထိုမှတဆင့် ကုမ္ပဏီဘက်မှအဆိုအရ "သတင်းမှားများ" ပြန့်နေခဲ့ပြီးနောက် ဝယ်လိုအားကျဆင်းလာခဲ့ရာ အမေရိကန်နဲ့ ကနေဒါနိုင်ငံတို့တွင်အဆိုပါကလေးပေါင်ဒါကို အရောင်းရပ်ဆိုင်း​ရန်ကြေညာခဲ့ကြောင်း သိရှိရပါသည်။   ၂၀၂၀ ခုနှစ်တွင် အမေရိကန်နိုင်ငံ အစားအသောက်နှင့်ဆေးဝါးအာဏာပိုင်မှ တာဝန်ရှိသူများက အဆိုပါထုတ်ကုန်တွင် ကျောက်ဂွမ်းစပမာဏတစ်ခုပါဝင်နေသည်ကို တွေ့ရှိရတဲ့အတွက် J&J ကုမ္ပဏီအနေဖြင့် ၎င်းကိုယ်လိမ်းပေါင်းဒါ ဘူးပေါင်း ၃၃၀၀၀ခန့်ကို စျေးကွက်မှဆန္ဒအလျောက် ပြန်လည်သိမ်းဆည်းခဲ့ကြောင်း The Guardian သတင်းတွင် ဖော်ပြထားပါသည်။

       အဆိုပါ ထုတ်ကုန်တွင် ရွံ့စေးမှရသော ဒြပ်ပေါင်းတမျိုးကို အသုံးပြုထားသောကြောင့် ကျောက်ဂွမ်းနှင့်နီးစပ်မှုရှိသည့်အတွက် ကင်ဆာဖြစ်စေနိုင်ကြောင်း စွပ်စွဲမှုများ၊ တရားစွဲဆိုမှုများလည်းရှိခဲ့ပြီး ကုမ္ပဏီဘက်မှ အဆိုပါထုတ်ကုန်တွင် ကျောက်ဂွမ်းမပါဝင်ကြောင်း ကမ္ဘာတဝှမ်းရှိဆေးပညာရှင် အချို့၏ စစ်ဆေးအတည်ပြုချက်များရှိသည်ဟု ငြင်းဆိုထားကြောင်းသိရပါသည်။ အဆိုပါ ကလေးပေါင်ဒါသည် ကလေးအနှီးလောင်၍ အရေပြားပွန်းပြီး အနီကွက်များထွက်ခြင်းကို သက်သာစေလိုသည့် နေရာတွင်အများအားဖြင့် သုံးစွဲကြခြင်းဖြစ်ပါသည်။  J&J ကလေးကိုယ်လိမ်း ပေါင်ဒါသည်  မိသားစုပေါင်းများစွာနှင့် ရင်းနှီးသောထုတ်ကုန်ဖြစ်ပြီး J&J ကုမ္ပဏီအနေဖြင့် ၁၈၉၄ ခုနှစ်ကပင် ထုတ်ကုန်များ ထုတ်လုပ်၊ရောင်းချခဲ့ကြောင်း သိရှိရပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊  ရွှေဘိုခရိုင်အနေဖြင့် စားသုံးသူပြည်သူများ ဘေးအန္တရာယ်ကင်းရှင်းရေးအတွက် ဈေးကွက်စောင့်ကြည့် စစ်ဆေးခြင်းများ ဆောင်ရွက်လျက်ရှိရာ ဩဂုတ်လ(၁၂)ရက်နေ့ နေ့လယ် (၁၃:၀၀)နာရီအချိန်တွင် စားသုံးသူရေးရာဦးစီးဌာန မှဒု-ခရိုင်ဦးစီးမှူး၊ ထုန်ကုန်လုံခြုံစိတ်ချရမှုဌာနခွဲတာဝန်ခံ၊ ရွှေဘိုမြို့နယ်တာဝန်ခံနှင့်  ရွှေဘိုခရိုင် ပြည်သူ့ကျန်းမာရေးဦးစီးဌာနမှ ဝန်ထမ်း(၂)ဦးတို့ပူးပေါင်း၍ ရွှေဘိုမြို့ အမှတ်(၅)ရပ်ကွက်ရှိ  အလှကုန်ဆိုင်(၂)ဆိုင် နှင့်အမှတ်(၂)ရပ်ကွက်ရှိ ဆေးနှင့်ဆေးပစ္စည်း အရောင်းဆိုင်(၁)ဆိုင်တို့အား ဈေးကွက်စောင့်ကြည့် စစ်ဆေးခဲ့ပါသည်။

      အဆိုပါဈေးကွက်စောင့်ကြည့်စစ်ဆေးသည့် ဆေးနှင့်ဆေးပစ္စည်းအရောင်းဆိုင်များသည် အသစ်ဖွင့်လှစ်ရောင်းချသည့်ဆိုင်များဖြစ်သဖြင့် ရွှေဘိုခရိုင်ပြည်သူ့ကျန်းမာရေးဦးစီးဌာနမှ လိုင်စင်အသစ် လျှောက်ထားရာတွင် လိုအပ်သည့်အချက်များ၊ လိုက်နာဆောင်ရွက်ရမည့်အချက်များနှင့် တားမြစ် ဆေးဝါးများ၊ သက်တမ်းလွန်ဆေးဝါးများ ရောင်းချခြင်းမပြုရန် အသိပညာပေးဆွေးနွေးခြင်းနှင့် ဇူလိုင်လ အတွင်းထုတ်ပြန်ထားသည့် စံမညီဆေးဝါးများ(၁၀)မျိုးရောင်းချခြင်းရှိ/မရှိ ပူးပေါင်းစစ်ဆေးခြင်းများ ဆောင်ရွက်ခဲ့ပြီး ရွှေဘိုခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူးနှင့် ဝန်ထမ်းများက စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာ အမှတ်၊ ၂၁/၂၀၂၀ဖြင့် Covid-19 ကာကွယ်၊ ထိန်းချုပ်၊ ကုသရေးဆိုင်ရာ ကျန်းမာရေးအထောက်အကူပြုပစ္စည်းများ၊ ဆေးဝါးများ၊ စားသုံးကုန် ပစ္စည်းများအား ဈေးကွက်အတွင်း ဈေးနှုန်း မြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း သို့မဟုတ် ဈေးကစားရန်ရည်ရွယ်ချက်ဖြင့် သိုလှောင်ခြင်းကို တားမြစ်သည့် အမိန့်ကြော်ငြာစာအား ထုတ်ပြန်ထားပြီး၊ ကြော်ငြာစာအမှတ်၊ ၂၁/၂၀၂၀ဖြင့် အရေးကြီးကုန်စည်နှင့် ဝန်ဆောင်မှုဥပဒေပုဒ်မ ၁၁ ပုဒ်မခွဲ(ခ)အရ အထက်ပါတားမြစ်ထားသည့် ကုန်စည်များကို တင်သွင်းမှု၊ တင်ပို့မှု၊ ရောင်းဝယ်မှု၊ လက်ဝယ်ထားမှု၊ သိုလှောင်မှု၊ သယ်ဆောင်မှု၊ ဖြန့်ဖြူးမှု၊ အသုံးပြုမှု၊ စားသုံးမှုတို့နှင့်စပ်လျဉ်း၍ အမိန့်ကြော်ငြာစာ၊ အမိန့်၊ ညွှန်ကြားချက်နှင့် လုပ်ထုံးလုပ်နည်းများ ထုတ်ပြန်ခွင့်ကို စားသုံးသူရေးရာဦးစီးဌာနအား အခွင့်အာဏာ အပ်နှင်းထားကြောင်း၊ ကျန်းမာရေးအထောက်အကူပြု အသုံးအဆောင်ပစ္စည်းအမျိုးမျိုးနှင့် ပတ်သက်၍ စားသုံးသူကာကွယ်ရေးဥပဒေ၊ အခန်း(၁၈)ပါ ကုန်အညွန်း အမှတ်အသားဖော်ပြခြင်းနှင့် မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာထည့်သွင်း ဖော်ပြ၍ ထုတ်လုပ်ဖြန့်ဖြူးရောင်းချကြရန်၊ စားသုံးသူကာကွယ်ရေး ဥပဒေပါအကြောင်းအရာများအား အကျေယ်တဝင့်ရှင်းလင်းဆွေးနွေးခဲ့ပြီး၊ လက်ကမ်းစာစောင်များဖြန့်ဝေ၍ ဆေးဈေးနှုန်းနှင့် လက်ကျန်အခြေအနေ မေးမြန်းဆွေးနွေးခြင်းများ ဆောင်ရွက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)