သတင်းနှင့် လှုပ်ရှားမှုများ

         ရခိုင်ပြည်နယ် စားသုံးသူရေးရာဦးစီးဌာန စစ်တွေမြို့နယ်တာဝန်ခံ နှင့် ဝန်ထမ်းများသည် (၁၂.၈.၂၀၂၂) နေ့ နံနက် (၁၀:၀၀) နာရီ အချိန်တွင် စစ်တွေမြို့ မြို့မဈေးကြီးသို့သွားရောက်၍ စားသုံးဆီ ဖြန့်ဖြူးရောင်းချသည့် ဈေးဆိုင်များရှိ စားသုံးဆီအမျိုးမျိုးတွင် ကုန်အညွှန်းအမှတ်အသား ဖော်ပြထားရှိ မှုများနှင့် စပ်လျဉ်း၍ ဈေးကွက်စိစစ်ဆောင်ရွက်ခဲ့ပါသည်။

        ဈေးကွက်အတွင်း ဖြန့်ဖြူးရောင်းချနေသော စားသုံးဆီအမျိုးမျိုးတို့၏ ကုန်အညွှန်းအမှတ်အသားများကို မြန်မာနိုင်ငံ စားသုံးသူကာကွယ်ရေးကော်မရှင်၏ ၂၀၁၉ ပါ ကုန်စည်အမျိုးအစားအလိုက် မြန်မာဘာသာဖြင့်ဖော်ပြရန် ညွှန်ကြားချက်နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ၏  ၁/၂၀၂၁ ပါ ညွှန်ကြားချက်အရ စားသုံးဆီများတွင် ပင်ရင်းပါဝင်ပစ္စည်းများကို အခြေခံသောကုန်စည်၏အမျိုးအမည်ကို တိကျစွာမြန်မာဘာသာဖြင့်ဖော်ပြထားရှိမှုရှိ/မရှိ၊ ကုန်ပစ္စည်း၏အသားတင်ပမာဏ၊ အလေးချိန်တို့အား မြန်မာ့အလေးချိန်ယူနစ်ဖြစ်သော ပိဿာ/ကျပ်သား ဖြင့်ဖော်ပြ ရန်ညွှန်ကြားချက်တို့အား လိုက်နာဆောင်ရွက်မှု ရှိ/မရှိ နှင့် ပိဿာ/ကျပ်သားတို့ဖြင့် ဖော်ပြရာတွင်လည်း ပိဿာခန့်/ ကျပ်သားခန့်ဟူသည့် မတိကျသောဖော်ပြချက်များဖြင့် ထည့်သွင်းထားမှု ရှိ/မရှိ ဈေးကွက်စိစစ် ဆောင်ရွက်ခဲ့ပြီး ဈေးဆိုင်လုပ်ငန်းရှင်များအား ၂၀၁၉ စားသုံးသူကာကွယ်ရေးဥပ‌ဒေပါ ပြဌာန်းချက်များနှင့်ညွန်ကြားချက်များအား သိရှိလိုက်နာဆောင်ရွက်မှုရှိစေရေး အသိပညာပေး ပြောကြား ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)

          စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်ချက်ဖြင့် ခရိုင်ဦးစီးမှူးရုံးမှ စစ်ဆေးရေးအရာရှိနှင့် ဝန်ထမ်းများ၊ အထွေထွေအုပ်ချုပ် ရေးဦးစီးဌာန၊ မြန်မာနိုင်ငံရဲတပ်ဖွဲ့နှင့် မီးသတ်ဦးစီးဌာနတို့ ပူးပေါင်း၍ စျေးကွက်တွင်းရောင်းချနေသော ဓါတ်ဆီ၊ဒီဇယ်များ စျေးနှုန်းမြင့်တင်ရောင်းချမှု ရှိ/မရှိ၊ အချိန်အတွယ် လီတာ၊ဂါလံများ ပြည့်မီမှုရှိ/မရှိ ကို မိတ္ထီလာမြို့နယ်အတွင်းရှိ စက်သုံးဆီရောင်းချနေသော  ဆီဆိုင် (၇) ဆိုင်အား ၂၀၂၂ ခုနှစ်၊ သြဂုတ်လ ၁၅ ရက်နေ့တွင် စျေးကွက်စောင့်ကြည့် ကွင်းဆင်းစစ်ဆေးခဲ့ပါသည်။

          ထိုသို့ ကွင်းဆင်းစစ်ဆေးရာတွင် စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိရမည်ဖြစ်ကြောင်း၊  အရည်အသွးပြည့်မီမှန်ကန်သည့် သတ်မှတ်ချက်နှင့် ကိုက်ညီသော စက်ဆီ၊ချောဆီများကိုသာ တင်သွင်း၊ဖြန့်ဖြူးရောင်းချရစေလိုကြောင်း ၊ သတ်မှတ်ချက်နှင့်မကိုက်ညီသော ပစ္စည်းများဖြစ်ပါက ဥပဒေနှင့်အညီဆောင်ရွက်သွားရမည်ဖြစ်ကြောင်း၊ စက်သုံးဆီများကို ပြည်သူများလက်ဝယ်သို့ ရည်ညွှန်းစျေးများအတိုင်း အမှန်တကယ်ရောင်းချပေးစေလိုကြောင်း၊  အသိပညာပေးဆောင်ရွက်ခဲ့ပြီး ဆီဆိုင်များမှ စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကော်မတီမှ သတ်မှတ်ထားသော နှုန်းထားများအတိုင်းသာ ရောင်းချမှုရှိပြီး၊ အချိန်အတွယ် လီတာ၊ဂါလံများလဲ့ (၂၀) လီတာစံဝင်ခွက်ဖြင့် တိုက်ဆိုင်စစ်ဆေးခဲ့ရာ ပြည့်မီမှုရှိကြောင်း သိရှိရပါသည်။

DOCA(မန္တလေး)

           မန္တလေးတိုင်းဒေသကြီး၊ စားသုံးသူရေးရာဦးစီးဌာန ၊ (မိတ္ထီလာ/ ရမည်းသင်း)ခရိုင်၊ ခရိုင်ဦးစီးမှူး၏ လမ်းညွှန်မှုဖြင့် ခရိုင်ဦးစီးမှူးရုံးမှ စစ်ဆေးရေးအရာရှိနှင့် ဝန်ထမ်းများသည် ၂၀၂၂ခုနှစ်၊ သြဂုတ်လ  ၁၆   ရက်နေ့ (၁၀း၀၀) အချိန်တွင် ပျော်ဘွယ်မြို့နယ်အတွင်းရှိ အလှကုန်ပစ္စည်း ရောင်းချသော အလှကုန်ဆိုင် (၈) ဆိုင်အား စျေးကွက်စောင့်ကြည့်စစ်ဆေးခဲ့ပါသည်။

          ထိုသို့ စစ်ဆေးရာတွင် ထိုင်းနိုင်ငံမှ မြန်မာနိုင်ငံ၏ တစ်ဦးတည်း ကိုယ်စားလှယ်အဖြစ် Berrer Way (Thailand), Co.,ltd မှ FDA ထောက်ခံချက်များဖြင့် Mistine အမှတ်တံဆိပ် အလှကုန်ပစ္စည်းများ သည် Hologram (ရောင်ပြန်) စတစ်ကာနှင့် မြန်မာစာ Labelling  ကပ်၍ စျေးကွက်အတွင်းသို့ တရား ဝင်ဖြန့်ဖြူးရောင်းချလျက်ရှိကြောင်း၊စျေးကွက်အတွင်း အလှကုန်ပစ္စည်းများရောင်းချသည့် လုပ်ငန်းရှင်များအား မည်သည့်လုပ်ငန်းရှင်များအဆို ကုန်ပစ္စည်းများတွင် ကုန်စည်အမျိုးအစားအလိုက် ကုန်အညွှန်းအမှတ်အသားများကို ၂၀၁၉ စားသုံးသူကာကွယ်‌ရေးဥပဒေပြဌာန်းချက်နှင့်အညီ ဖော်ပြ၍ တင်သွင်းထုတ်လုပ်ဖြန့်ဖြူး ရောင်းချရန်လိုအပ်ကြောင်း၊ အကယ်၍ လိုက်နာဆောင်ရွက်မှုမရှိပါက ဥပဒေအရ အ‌ရေးယူဆောင်ရွက် ရမည်ဖြစ်ကြောင်း၊ Mistine အလှကုန်ပစ္စည်းများအား Thiri Cosmetic Co.,Ltd မှ FDAထောက်ခံချက်  Hologram (ရောင်ပြန်) ကပ်နှိပ်ထားသော ကုန်အညွှန်းအမှတ်သားများအား မြန်မာဘာသာဖြင့် ဖော်ပြထားသော အလှကုန်ပစ္စည်းများကိုသာ ရောင်းချရန် အသိပညာပေးဆွေးနွေးခဲ့ပါသည်။

          အလှကုန်ပစ္စည်းရောင်းဆိုင်များအနေဖြင့် Mistine အလှကုန်များကို တရားဝင်ကုမ္ပဏီများမှ ဝယ်ယူ‌ရောင်းချပါကြောင်းနှင့် ရောင်းချနေသော Mistine အလှကုန်များတွင် Hologram (ရောင်ပြန်) စတစ်ကာနှင့် မြန်မာစာ Labelling များ ကပ်နှိပ်ထားသည်ကို စစ်ဆေးတွေ့ရှိရသည်။

DOCA(မန္တလေး)

          မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူးဦးဇော်မင်းသည် ၂၀၂၂ခုနှစ်၊ သြဂုတ်လ ၁၅ ရက်နေ့တွင် အမှတ်(၅/၇၁)၊ ကျီတော်ကုန်းလမ်း၊ ဆုတောင်းပြည့်ဘုရားအနီး ၊ ကျီတော်ကုန်းရပ်ကွက်၊  မိတ္ထီလာမြို့၌ “လာဘ်မင်း”အမှတ်တံဆိပ် ဆပ်ပြာထုတ်လုပ်ရောင်း ချနေသော လုပ်ငန်းရှင်မှ ၎င်း၏အမှတ်တံဆိပ်တွင် ထည့်သွင်းဖော်ပြသွားမည့် ကုန်အညွှန်းအမှတ်အသားများတွင် စားသုံးသူကာကွယ်‌ရေးဥပဒေပြဌာန်းချက်များနှင့် ကိုက်ညီမှုရှိ/မရှိနှင့် လိုအပ်ချက်များ ပြင်ဆင်ပြုပြင်နိုင်ရန် အတွက် စိစစ်ဆောင်ရွက်ပေးပါရန် တင်ပြလာမှုနှင့် ပတ်သတ်၍ တွေ့ဆုံဆွေးနွေးခဲ့ ပါသည်။

          အဆိုပါတွေ့ဆုံမှုအရ “လဘ်မင်း” အမှတ်တံဆိပ်ဆပ်ပြာလုပ်ငန်းတွင် ဆံသားပေါင်းဆီ ၊ Coffee Surb၊ သဘာဝခေါင်းလျှော်ရည်စသည့် ကုန်စည်များကို မိသားစုထုတ်လုပ်ကြောင်း၊ မိတ္ထီလာမြို့ အတွင်း ဖြန့်ဖြူးရောင်းချလျက်ရှိ ကြောင်းသိရှိရပါသည်။ ထို့နောက် ခရိုင်ဦးစီးမှူးမှ လူသုံးကုန်ပစ္စည်း အမျိုးမျိုးတွင် ကုန်စည်အမျိုးစားအလိုက် ကုန်အညွှန်း အမှတ်သားများအား ပြည့်စုံစွာဖော်ပြရန် အတွက် မြန်မာနိုင်ငံစားသုံးသူကာကွယ်ရေးကော်မရှင် ထုတ်ပြန်ထားရှိသည့် ကုန်အညွှန်းအမှတ် အသား‌ဖော်ပြခြင်းဆိုင်ရာ အမိန့်ကြေငြာစာ (၂/၂၀၁၉)အား ထုတ်ပြန်ထားရှိကြောင်းကိုလည်းကောင်း၊ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာ နှင့် အခြားဘာသာတွဲ လျှက်ရှိစေ ဖော်ပြ ရမည့်အချက်အလက်များကိုလည်းကောင်း ရှင်းလင်းဆွေးနွေး ပြောကြားခဲ့ပြီး ကူညီဆောင်ရွက်ပေးမှုများ ပြုလုပ်ခဲ့ပါသည်။

DOCA(မန္တလေး)

        ဘေးခန်းလေအိတ်များ ပြန်လည်အစားထိုးပြင်ဆင်ရန်အတွက် Ford ကုမ္ပဏီအနေဖြင့် ၂၀၂၂ ခုနှစ်ထုတ် Maverick Pickup Truck မော်တော်ယာဥ်အစီးရေ ခြောက်သောင်းခွဲနီးပါးကို ဈေးကွက်မှ ပြန်လည်သိမ်းခဲ့ကြောင်းသိရသည်။ အဆိုပါယာဉ်များရှိ ဘေးလေအိတ်များသည် ယာဉ်မတော်တဆမှု ဖြစ်ပွားပါက စီးနင်းသူများကို ကာကွယ်နိုင်ရန် အမေရိကန်ပြည်ထောင်စု ယာဉ်အန္တရာယ်ကင်းရှင်း ဆိုင်ရာအေဂျင်စီ(National Highway Traffic Safety Administration- NHTSA)၏ စံချိန်စံညွှန်းများနှင့် ကိုက်ညီမှုမရှိ​သည်ကို စမ်းသပ်တွေ့ရှိရကြောင်း သိရှိရသည်။ Ford ကုမ္ပဏီအနေဖြင့် ဒီလေအိတ် ပြဿနာကြောင့် ထိခိုက်ဒဏ်ရရှိမှုကို မကြားမိသေးကြောင်း​ဆိုထားသည်။ Ford ၏ ကနဦးစမ်းသပ် ချက်များအရ အဆိုပါလေအိတ်များသည် စံချိန်စံညွှန်များနှင့် ကိုက်ညီမှုရှိကြောင်း စမ်းသပ်ပြီးဖြစ်သော် လည်း NHTSA ၏ စမ်းသပ်စစ်ဆေးချက်အရ Federal Motor Vehicle Safety Standard 226 S4.2.1 ၏လိုအပ်ချက်များနှင့်ကိုက်ညီမှုမရှိကြောင်း စစ်ဆေးတွေ့ရှိရခြင်း ဖြစ်သည်။ NHTSA အနေဖြင့် အဆိုပါ မော်တော်ယာဉ်ထုတ်လုပ်သူကို အကြောင်းကြားခဲ့ပြီးနောက် Ford အနေနဲ့ အဆိုပါလေအိတ်များကို ပြန်လည်စမ်းသပ်ခဲ့ပြီး NHTSA ၏ စစ်ဆေးတွေ့ရှိမှုအပေါ်အတည်ပြုခဲ့သော်လည်း စစ်ဆေးမှုရလဒ် ကွဲပြားရသည့်အကြောင်းအရင်းကို စုံစမ်းနေဆဲဖြစ်ကြောင်း အဆိုပါကုမ္ပဏီကပြောကြားသည်။ Ford ကုမ္ပဏီအနေဖြင့် အဆိုပါမော်တော်ယာဉ်တင်ပို့မှုကို ရပ်ဆိုင်းထားပြီး စံမမှီသောလေအိတ်တပ်ဆင် မှုကိုလည်း ရပ်ဆိုင်းထားခဲ့သည်။ ကုမ္ပဏီအနေဖြင့် ၎င်းမော်တော်ယာဉ်ကို ဆက်လက်ထုတ်လုပ်နေဆဲ ဖြစ်ပြီး ၂၀၂၂ ခုနှစ် ဇူလိူင်လ ၉ရက်နေ့နောက်ပိုင်းထုတ်လုပ်သောမော်တော်ယာဉ်များတွင် အသစ်မွမ်းမံ ထားသောစံချိန်စံညွှန်းမှီသည့်လေအိတ်များ တပ်ဆင်ထားကြောင်းသိရသည်။ အဆိုပါ မော်တော်ယာဉ် ဝယ်ယူထားသူများအနေဖြင့် ကုမ္ပဏီသို့ဆက်သွယ်ပါရန်နှင့် စံချိန်စံညွှန်းမှီသောလေအိပ်များ အစားထိုး တပ်ဆင်ပေးသွားမည်ဖြစ်ကြောင်း၊ စာတိုက်မှတဆင့် ယာဉ်ဝယ်ယူထားသူများကို အကြောင်းထား ကြောင်း၊ မိမိယာဉ်သည် ပြန်လည်သိမ်းဆည်းရန်ယာဉ်စာရင်းတွင်ပါဝင်ခြင်း ရှိ/မရှိ NHTSA ၏ Website တွင် စစ်ဆေးကြည့်ရှုနိုင်ကြောင်း၊ မော်တော်ယာဉ်ထုတ်လုပ်သူများအနေဖြင့် ယခုကဲ့သို့ ပြန်လည်သိမ်း ဆည်းခြင်းကို ဆောင်ရွက်လေ့ရှိသည့်အတွက် မိမိ၏ယာဉ်သည် ပြန်လည်သိမ်းဆည်းရန်စာရင်းတွင် ပါ/မပါ ကို ပုံမှန်စစ်ဆေးကြည့်သင့်ကြောင်း NHTSA က အကြံပြုထားပါသည်။ 

DOCA(စစ်ကိုင်း)