စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူး ဒေါ်မွန်မွန်စိုးနှင့် ဝန်ထမ်းများအဖွဲ့သည် စားသုံးသူအခွင့် အရေးနှင့်စားသုံးသူအကျိုးစီးပွားကို ကာကွယ်ရန်အတွက် ရည်ရွယ်၍ ဩဂုတ်လ(၅)ရက်၊ နံနက် (၉:၀၀)နာရီအချိန်တွင် ပခုက္ကူမြို့၊ အမှတ်(၁)အခြေခံပညာအလယ်တန်းကျောင်း၌ စားသုံးသူကာ ကွယ်ရေးအသိပညာပေးဟောပြောပွဲ ကျင်းပပြုလုပ်ခဲ့ရာ ဆရာ/ဆရာမ(၆)ဦး၊ ကျောင်းသား/သူ (၈၈) ဦး၊ စုစုပေါင်း(၉၄)ဦး တက်ရောက်ခဲ့ပါသည်။
အဆိုပါအသိပညာပေးဟောပြောပွဲတွင် ကျောင်းအုပ်ဆရာမကြီးက ကြိုဆိုနှုတ်ခွန်းဆက် စကားပြောကြားခဲ့ပြီး ဒု-ခရိုင်ဦးစီးမှူးက အဖွင့်အမှာစကားပြောကြားရာတွင် ဌာန၏သမိုင်းကြောင်းနှင့် လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များနှင့် ဟောပြောပွဲကျင်းပ ပြုလုပ်ခြင်း၏ ရည်ရွယ်ချက်မှာ စားသုံးသူများအနေဖြင့် စားသုံးသူအခွင့်အရေးများကို သိရှိနားလည်ပြီး နစ်နာဆုံးရှုံးမှုများ ဖြစ်ပေါ်လာပါက တိုင်ကြားဆောင်ရွက်နိုင်ကြောင်း၊ ကုန်စည်များ ဝယ်ယူသုံးစွဲရာတွင်လည်း လုံခြုံစိတ်ချရမှုရှိစေရေးအတွက် ကုန်အညွှန်းအမှတ်အသား ဖော်ပြချက် များမှာလည်း အရေးပါကြောင်း Power point ဖြင့် ရှင်းလင်းဆွေးနွေးခဲ့ပါသည်။
ဒု-ဦးစီးမှူး ဒေါ်နွယ်နွယ်အေးမှ စားသုံးသူများတွင် အခွင့်အရေးနှင့် လိုက်နာရမည့် တာဝန်များ သိရှိရန်လိုအပ်ကြောင်း၊ အခွင့်အရေးများသိရှိပြီး ရယူနိုင်မှသာလျှင် ဘေးအန္တရာယ် ကင်းရှင်းစွာ သုံးစွဲခွင့်နစ်နာမှုများအတွက် တိုင်ကြားနိုင်ခွင့်၊ ပြန်လည်ကုစားနိုင်ခွင့်များရှိပြီး နောင်အနာဂတ်မှာ ပတ်ဝန်းကျင်ကောင်းတွင် နေထိုင်နိုင်မည်ဖြစ်ကြောင်း၊ လိုက်နာရ မည့်တာဝန်(၄)ချက် ကိုလည်း အကျယ်တဝင့်ရှင်းလင်းဆွေးနွေးခဲ့ပါသည်။
ဒု-ဦးစီးမှူး ဒေါ်တင်တင်မော်မှ စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန် အညွှန်းအမှတ်အသားနှင့်စပ်လျဉ်းသည့် အကြောင်းအရာများအား စားသုံးသူများအတွက် ကုန်စည်များ ဝယ်ယူသုံးစွဲရာတွင် သတိပြုရမည့်ကုန်အမှတ်တံဆိပ်၊ ကုန်ပစ္စည်းအမျိုးအမည်၊ အရေအတွက် အသားတင်ပမာဏ၊ ထားသိုသိမ်းဆည်းပုံအညွှန်း၊ သုံးစွဲသည့်နည်းလမ်းများ၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ တင်သွင်းသူ၏အမည်နှင့်လိပ်စာ၊ ထုတ်လုပ်သည့်လုပ်ငန်း အမည်နှင့် လိပ်စာ၊ ထုတ်လုပ်သည့်နေရာ၊ ပြည်ပမှ ကုန်စည်များ တင်သွင်းပြီး ပြန်လည်ထုတ်ပိုးသည့်နေရာ၊ ပါဝင်သောကုန်ကြမ်းပစ္စည်း အမျိုးအမည်၊ ပမာဏ၊ ပါဝင်မှုအချိုးအစား၊ ကျန်းမာရေးဆိုင်ရာ ဘေးထွက်ဆိုးကျိုး(သို့) ဓာတ်မတည့်ကြောင်းဖော်ပြချက်၊ ကြိုတင်သတိပေးချက်၊ သက်ဆိုင်ရာ အစိုးရဌာနများက ဖော်ပြရန်သတ်မှတ်ထားသော အချက်အလက်များအား ရှင်းလင်းဆွေးနွေး ခြင်းနှင့် ကုန်အညွှန်းအမှတ်အသားအချက်များပြည့်စုံမှသာ လုံခြုံစိတ်ချရမှုရှိသည့် ကုန်ပစ္စည်းများ ဖြစ်ကြောင်း အသေးစိတ်ရှင်းလင်းဆွေးနွေးခဲ့ပါသည်။
ဒု-ဦးစီးမှူး ဒေါ်သူဇာကျော်မှ ဆွေးနွေးရာတွင် စားသုံးသူများအား အခွင့်အရေးများသိရှိပြီး နစ်နာဆုံးရှုံးမှုများရှိလျှင် တိုင်ကြားနိုင်ကြောင်း၊ စားသုံးသူနစ်နာမှုများအား စားသုံးသူသတင်း ပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC) ဖွင့်လှစ်ထားပြီး တိုင်ကြားနိုင်ကြောင်း၊ ကုစားပေးခြင်းများ၊ တိုင်ကြားနိုင်သူများနှင့် တိုင်ကြားနိုင်သည့်နည်းလမ်းများမှာ DOCA Myanmar မိုဘိုင်း Application Facebook စာမျက်နှာနှင့် Consumer Call Center ဖွင့်လှစ်ထားပြီး (1535)မှ တစ်ဆင့်တိုင်ကြားနိုင်သည့် အခြေအနေများအား အကျယ်အဝင့်ဆွေးနွေးခဲ့ပါသည်။
ဆွေးနွေးဟောပြောပွဲတွင် ကျောင်းသား/ သူများအား ဌာန၏သမိုင်းကြောင်း၊ အခွင့်အရေး၊ ကုန်အညွှန်းအမှတ်အသားနှင့်ပတ်သက်သည့် အကြောင်းအရာများ၊ နစ်နာမှုများအတွက် တိုင်ကြားနိုင်သည့် ဥပဒေအကြောင်းအရာများအား အသေးစိတ်ရှင်းလင်းဆွေးနွေးကာ ပြန်လည်မေးမြန်းခြင်းများပြုလုပ်ခဲ့ပြီး စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များအား ဖြန့်ဝေပေးခဲ့ကြောင်းသိရှိရပါသည်။
DOCA(မကွေး)
