သတင်းနှင့် လှုပ်ရှားမှုများ

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဓနုဖြူမြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် (၅.၁၀.၂၀၂၂)နေ့တွင် (၁၀:၃၀)နာရီအချိန်တွင် ဓနုဖြူမြို့ အမှတ်-၁၇ရပ်ကွက် (၂)လမ်းရှိ ရတနာ ကိတ်မုန့်လုပ်ငန်းသို့သွားရောက်၍ ထုတ်ကုန်လုံခြုံစိတ်ချရမှုရှိစေရေးနှင့် SMEလုပ်ငန်း ဖွံ့ဖြိုးရေးအတွက် ကွင်းဆင်းစစ်ဆေးဆောင်ရွက်ခဲ့ပါသည်။

    ကွင်းဆင်းစစ်ဆေးရာတွင် ဓနုဖြူမြို့နယ်ဦးစီးမှူးမှ ရတနာကိတ်မုန့်လုပ်ငန်း ထုတ်လုပ်မှု လုပ်ငန်းအဆင်ဆင့်အား ကြည့်ရှုခဲ့ပြီး မုန့်လုပ်ငန်းပိုင်ရှင်အား စားသုံးသူကာကွယ်ရေးဥပဒေပါ အခန်း (၁၀)လုပ်ငန်းရှင်တာဝန်များကို လေးစားလိုက်နာရန်၊ စားသုံးသူကာကွယ်ရေး အခန်း(၁၈)အရ မိမိထုတ်လုပ်သောကုန်စည်တွင် ကုန်အညွှန်းအမှတ်အသားပြည့်စုံစွာ ဖော်ပြပါ ရှိရန် အချက်အလက်များကို ထုတ်လုပ်ဖြန့်ဖြူးမည့် ကုန်စည်တွင်တိကျစွာ ထည့်သွင်းဖော်ပြ ရန်နှင့် SME လုပ်ငန်းဖွံ့ဖြိုးစေရေး အတွက် အသိပညာပေးဆွေးနွေး ရှင်းလင်းခဲ့ပါသည်။ စားသုံးသူများအတွက် ဘေးအန္တရာယ်ကင်းရှင်းစေရေးကို အလေးထားဆောင်ရွက်ရန်နှင့် သက်ဆိုင်ရာဌာနများ၏ ခွင့်ပြုချက်လုပ်ငန်းလိုင်စင်များ လုပ်ကိုင်ဆောင်ရွက်ရန် ကွင်းဆင်း စစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ဧရာဝတီ)

          ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ နတ်တလင်းခရိုင် ၊ နတ်တလင်းမြို့နယ်တာဝန်ခံသည် ၇.၁၀.၂၀၂၂    ရက်နေ့ နံနက် ၁၀: ၀၀ နာရီတွင် နတ်တလင်းမြို့၊ အခြေခံပညာမူလွန်ကျောင်း၌   စားသုံးသူကာကွယ်ရေး အသိပညာပေးဟော‌ပြောပွဲနှင့် ကျောင်းမုန့်ဈေးတန်းစစ်ဆေးလုပ်ငန်းများ ဆောင်ရွက်ခဲ့ပါ သည်။

          ဟော‌ပြောပွဲတွင် စားသုံးသူရေးရာဦးစီးဌာန ၊ မြို့နယ်တာဝန်ခံမှ ဗဟိုမူလွန်ကျောင်းရှိ ကျောင်းသား/ ကျောင်းသူ ၄၅ ဦးအား စားသုံးသူ ကာကွယ်ရေးဆိုင်ရာများဖြစ်သော ဥပဒေအကြောင်းအရာများ ကုန်စည်တွင်ပါ   ဝင်ရမည့်အချက်များ၊ ကုန်စည်များအားရွေးချယ်ဝယ်ယူသုံးစွဲတတ်စေရန် အသိပညာပေးဟောပြာဆွေနွေးပြီး   လက်ကမ်း စာစောင်များဖြန့်ဝေပေးခဲ့ပါသည်။

          ထို့နောက် ကျောင်းမုန့်ဈေးတန်းရှိ ရောင်းချနေသောဈေးသည်များ၏ တစ်ကိုယ်ရေ သန့်ရှင်းမှု ရှိ/မရှိ စစ်  ဆေးခြင်း၊ ရောင်းချနေသောမုန့်များ သန့်ရှင်း လတ်ဆတ်မှု ရှိ/မရှိ စစ်ဆေးခြင်း၊ သက်တမ်းလွန်မုန့်များရောင်းချမှု ရှိ/မရှိ စစ်ဆေးခြင်းနှင့် စားသုံးရန် မသင့်သည့်မုန့်များရောင်းချခြင်းမပြုလုပ်ရန်တို့ကို ဈေးသည်များအား အသိပညာ ပေးဟောပြောဆွေးနွေးခြင်းများ ပြုလုပ်ခဲ့ကြောင်း သိရှိရပါသည်။

DOCA(ပဲခူး)

      ပြည်ခရိုင်၊ ပန်းတောင်းမြို့နယ်တွင် ယခုအချိန်ကာလသည် ၂၀၂၂ - ၂၀၂၃ ဘဏ္ဍာနှစ်အတွက် ဆောင်းနေကြာများ စတင်စိုက်ပျိုးနေချိန်ဖြစ်ပါသည်။ ဆောင်းနေကြာများ စတင်ထွက်ပေါ်ချိန်တွင် သီးနှံများဈေးကွက် ချိတ်ဆက်ဆောင်ရွက်နိုင်ရေးအတွက် နေကြာအစုအဖွဲ့များ ဖွဲ့စည်းရန် နေကြာစိုက်ပျိုး ထုတ်လုပ်သူတောင်သူများနှင့် စားသုံးသူရေးရာဦးစီးဌာန၊ ပန်းတောင်းမြို့နယ် တာဝန်ခံ ဒေါ်သန်းသန်းအေးနှင့် ဝန်ထမ်းများသည် (၅.၁၀.၂၀၂၂) ရက်နေ့နံနက်ပိုင်းတွင် ကွင်းဆင်း ဆွေးနွေး ဆောင်ရွက်ခဲ့ပါသည်။

      ပန်းတောင်းမြို့နယ်ရှိ ဆောင်းနေကြာသီးသန့်စိုက်ပျိုးသော မကျီးထုံးအုပ်စုအတွင်းရှိ ကျေးရွာများဖြစ်သော မကျီးထုံး၊ ဆင်လူး၊ ကွေ့မ၊ ကြို့ကုန်း၊ ဆိတ်ကဲကျေးရွာတို့ရှိ တောင်သူ (၁၂) ဦးတို့နှင့် တွေ့ဆုံ၍ ပြည်တွင်းကုန်သွယ်မှုဖွံ့ဖြိုးတိုးတက်စေရေးအတွက် ဆီထွက်သီးနှံဖြစ်သော ဆောင်းနေကြာ သီးသန့်စိုက်ပျိုးထုတ်လုပ်သူများမှ နေကြာအစုအဖွဲ့များ ဖွဲ့စည်းထားရှိရန် စားသုံးသူရေးရာဦးစီးဌာန၊ မြို့နယ်တာဝန်ခံကကွင်းဆင်း၍ အစုအဖွဲ့များဖွဲ့စည်းရန် ဆွေးနွေး ဟောပြောခဲ့ရာ မကျီးထုံးကျေးရွာမှ နေကြာစိုက်ပျိုးသူတောင်သူ ဦးကြီးရွှေ ကို အစုအဖွဲ့ ခေါင်းဆောင်ဖြင့်ဆောင်ရွက်စေပြီး အဖွဲ့ဝင် (၁၁) ဦးတို့ဖြင့် ဖွဲ့စည်းခဲ့ပါသည်။

     ဆောင်းနေကြာစိုက်ပျိုးဧကအဖြစ် မကျီးထုံးကျေးရွာတွင် (၄၇) ဧက၊ ကြို့ကုန်းကျေးရွာတွင် (၂၀) ဧက၊ ဆင်လူးကျေးရွာတွင် (၁၂) ဧက၊ ကွေ့မကျေးရွာတွင် (၅) ဧက၊ ဆိတ်ကဲကျေးရွာတွင် (၂၂) ဧကဖြင့် စုစုပေါင်း (၁၀၆) ဧက စိုက်ပျိုးသွားမည်ဖြစ်ကြောင်း သိရှိရပါသည်။

DOCA(ပဲခူး)

       ပဲခူးတိုင်းဒေသကြီး ၊ တောင်ငူခရိုင် ၊  တောင်ငူမြို့နယ်တွင် နိုင်ငံတော်၏ဝမ်းစာ မဟာဗျူဟာ ကျသော စပါးသီးနှံကို မိုးစပါးနှင့် နွေစပါး နှစ်သီးစား စိုက်ပျိုးကြပါသည်။ ၂၀၂၂-၂၀၂၃ ခုနှစ် ၊ တောင်ငူ မြို့နယ်၏ မိုးစပါးစိုက်ပျိုးမှုဧကမှာ ၅၈၀၃၄ ဖြစ်ပါသည်။ စက်တင်ဘာလ ၃၀ ရက်နေ့အထိ ၂၄၅၉ ဧက ရိတ်သိမ်းပြီးဖြစ်ပါသည်။ အထွက်ကောင်းစပါးမျိုးများဖြစ်သော ဆင်းသုခ ၅၄၄၆ ဧက၊ ရက် ၉၀ ၆၈ ဧက၊ နှံကောက် ၁၅၅၃၆ ဧက၊ ဗျော့ထွန်း ၃၃၅၅၅ ဧက၊ နယူးဧရာ-၁၂ ၁၀၀ ဧက၊ GW-11 ၃ ဧက၊ အဆင့်မြင့်စပါးမျိုး ၈၃၁ ဧက၊ ဧရာမင်း ၃၃ ဧက၊ ပေါ်ဆန်းမွှေး ၇၉၈ ဧက၊ ဒေသမျိုး ၁၃ ဧက၊ ကောက်ညှင်း ၈ ဧက၊ တောင်ယာ ၈ ဧက တို့ကို စိုက်ပျိုးထားရှိပါသည်။ ပျှမ်းမျှ တစ်ဧက အထွက်နှုန်းမှာ ၈၁.၄၅ တင်းရှိပါသည်။

      အောက်တိုဘာလ တတိယပတ်ရက်များတွင် တောင်ငူမြို့နယ်ရှိ လယ်ယာမြေများ ရွှေရောင် ပေါက်ကာ အားလုံးရိတ်သိမ်းတော့မည် ဖြစ်ပါသည်။ ယခင်နှစ် စပါးတင်း ၁၀၀ ပေါက်ဈေး မှာ ဆင်းသွယ်လတ်၊ ဆင်းသုခ၊ ရက် ၉၀ စပါးများ ၇၃၀၀၀၀ ကျပ်မှ ၇၅၀၀၀၀ ကျပ်၊ ဗျော့ထွန်း၊ သုခ-၂ စပါးများ ၈၀၀၀၀၀ ကျပ်အထိ ဈေးပေါက်ကြောင်း၊ ယခုနှစ်တွင် ကွင်းဈေး ၉၅၀၀၀၀ ကျပ်၊ စက်ရုံအရောက်ဈေး ၁၀၀၀၀၀၀ ကျပ် ဈေးပေါက်ကြောင်း၊ စပါးအစိုဓါတ် ၃၀% ရှိသဖြင့် တစ်တင်း လျှင် ၁၅ ပိဿာ (၅၄ ပေါင်)ဖြင့် ဝယ်ယူကြောင်း ဆန်စက်ပိုင်ရှင်တစ်ဦး၏ ပြောပြချက်အရ သိရှိိရပါသည်။ တောင်ငူမြို့နယ်တွင် မိုးစပါး ၅၈၀၃၄ စိုက်ပျိုးထားရာ လက်ရှိတွက်ချက်ရရှိသည့်အထွက်နှုန်း အရ စပါးတင်းပေါင်း ၄၇.၂၆ သိန်း ထွက်ရှိမည်ဖြစ်ရာ စပါးစိုက် တောင်သူကြီးများလည်း မြေကြီးမှ ရွှေသီးကာ ဝင်ငွေတိုးလာမည်ဖြစ်ကြောင်း သိရှိရပါသည်။

DOCA(ပဲခူး)

     မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ မြင်းခြံခရိုင်၊ ငါန်းဇွန်မြို့နယ်တာဝန်ခံသည်  (၄-၁၀-၂၀၂၂)ရက်နေ့ နေ့လယ် (၁၃:၃၀)နာရီအချိန်တွင် ငါန်းဇွန်မြို့ အခြေခံပညာအထက်တန်းကျောင်း၌ မြို့နယ်ပြန်ကြားရေးနှင့် ပြည်သူ့ဆက်ရေးဦးစီးဌာန၊ မြို့နယ်အားကစားနှင့်ကာယပညာဦးစီးဌာန၊ မြို့နယ်စည်ပင်သာယာရေး အဖွဲ့နှင့် ပူးပေါင်း၍ အသိပညာပေးဟောပြောပွဲ ကျင်းပပြု လုပ်ခဲ့ပါသည်။

      ရှေးဦးစွာ အားကစားနှင့်ကာယပညာဦးစီးဌာန၊ မြို့နယ်ဦးစီးမှူး ဦးလှိုင်မိုးဟိန်းမှ ကျောင်း သား၊ကျောင်းသူများအား ကိုယ်လက်လှုပ်ရှားအားကစားအလေ့အကျင့်ကြောင့် ကျန်းမာရေးအတွက် အထောက်အကူဖြစ်စေသည့်အပြင် အသိဉာဏ်ပညာဖွံဖြိုးတိုးတက်ရေးအတွက်လည်း အထောက် အကူဖြစ်စေကြောင်း စသည့်ဖြင့် “အားကစားနှင့်လူငယ်ရေးရာ” ခေါင်းစဉ်ကို လည်းကောင်း ဟောပြောဆွေးနွေးကာ ကျောင်းတွင်အားကစားများဆောင်ရွက်နိုင်ရေးအတွက် အားကစားပစ္စည်း များ ထောက်ပံ့ပေးအပ်ခဲ့ပါသည်။ဆက်လက်၍ မြို့နယ်ပြန်ကြားရေးနှင့်ပြည်သူ့ ဆက်ဆံရေး ဦးစီးဌာန၊ မြို့နယ်ဦးစီးမှူး ဒေါ်နေခြည်ဦးမှ လူမှု့ဘဝမြင့်မားဖို့အတွက် အခြေခံအုတ်မြစ် ဖြစ်တဲ့ စာအုပ်စာပေကို ဖတ်ရှုလေ့လာမှသာ ပညာပြည့်ဝနှလုံးလှသူများ ဖြစ်စေနိုင်မည်ဖြစ်ကြောင်း စသည်ဖြင့် “လူငယ်နှင့်စာပေ” ခေါင်းစဉ်ကိုလည်းကောင်း၊ မြို့နယ်စည်ပင်သာယာရေးအဖွဲ့မှ ဦးစီး အရာရှိ ဒေါ်ခင်သန်းသန်းမှ ယာဉ်စည်းကမ်းလမ်းစည်းကမ်းဆိုင်ရာ အသိပညာပေးခေါင်းစဉ်ဖြင့် ယာဉ်စည်းကမ်းလမ်းစည်းကမ်းနှင့်ပတ်သက်၍ လိုက်နာရမည့်အချက်များအား ရှင်းလင်းဆွေးနွေးခဲ့ ပါသည်။ထို့နောက် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်သင်းသင်းဆွေမှ စားသုံးကာ ကွယ်ရေးဥပဒေပါ စားသုံးသူနှင့်စီးပွားလုပ်ငန်းရှင်၏ အဓိပ္ပယ်များ၊ ကုန်စည်နှင့်ဝန်ဆောင်မှုများ၏ အဓိပ္ပယ်များ၊နစ်နာဆုံးရှုံးမှု၊ ကုန်အညွှန်းအမှတ်အသားနှင့် ဘေးအန္တရာယ်ရှိသော ကုန်စည် သို့မဟုတ် ဝန်ဆောင်မှုတို့၏ အဓိပ္ပယ်များ ၊ ကုန်စည်နှင့် ဝန်ဆောင်မှုများသုံးစွဲခြင်းကြောင့် အမှန်တကယ်နစ်နာဆုံးရှုံးမှုများရှိလာပါက ဆက်သွယ်တိုင်ကြားနိုင်သည့် နည်းလမ်းများ၊နေရာများ၊ ဖုန်းနံပါတ်များကိုလည်းကောင်း ၊ကျောင်းသား/ကျောင်းသူများအနေဖြင့်လည်း အစားအသောက် များကို သေချာစွာ ဂရုစိုက်ရွေးချယ်ဝယ်ယူသုံးစွဲကြရန်နှင့် ယနေ့ဟောပြောဆွေးနွေးပွဲမှ မှတ်သားသိရှိခဲ့သည်များကို မိမိ၏မိသားစုဝင်များ၊ အနီးပတ်ဝန်းကျင်နှင့် မိတ်ဆွေးအပေါင်းအသင်းများအား ပြန်လည်ဝေငှပြောပြပေးစေလိုပါကြောင်း စသည်ဖြင့် အကျယ်တဝန့်ဟောပြောဆွေးနွေးကာ လက် ကမ်းစာစောင်များဖြန့်ဝေပေးခဲ့ပါသည်။

      အဆိုပါဟောပြောဆွေးနွေးပွဲသို့ ကျောင်းအုပ်ဆရာမကြီးနှင့်ဆရာ/ဆရာမများ၊ကျောင်းသား/ ကျောင်းသူများ၊ဌာနဆိုင်ရာ တာဝန်ရှိသူများ စုစုပေါင်း(၂၅၀)ဦး တက်ရောက်ခဲ့ကြောင်း သိရပါသည်။

DOCA(မန္တလေး)