သတင်းနှင့် လှုပ်ရှားမှုများ

          ၂၀၂၂ ခုနှစ်၊ ဩဂုတ်လ(၅)ရက်နေ့၊ နံနက်(၁၀:၀၀)နာရီမှ (၁၁:၃၀)နာရီအချိန်တွင် ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး များနှင့်ဝန်ထမ်းများသည် မိတ်ဖက်ဌာနများဖြစ်သော အစားအသောက်နှင့်ဆေးဝါးကွပ်ကဲရေးဦးစီးဌာန (FDA)၊ ခရိုင်ပြည်သူ့ကျန်းမာရေးဦးစီးဌာနတို့ပါဝင်သည့် ပူးပေါင်းအဖွဲ့ဖြင့် ကျိုင်းတုံမြို့၊ ရပ်ကွက်(၂)၊ ရပ်ကွက်(၃)အတွင်းရှိ အလှကုန်ပစ္စည်းအရောင်းဆိုင်များအား Mistine အမှတ်တံဆိပ် အလှကုန် ပစ္စည်းများနှင့်ပတ်သက်၍ ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးရာတွင် FDA ထောက်ခံချက်များဖြင့် Mistine အမှတ် တံဆိပ် အလှကုန်ပစ္စည်းများတွင် Hologram (ရောင်ပြန်)စတစ်ကာနှင့် မြန်မာစာ Labelling ကပ်၍ ဈေးကွက်တွင် ဖြန့်ဖြူးရောင်းချရမည်ဖြစ်ကြောင်း၊ သတ်မှတ်ချက်များနှင့်ပြည့်စုံခြင်းမရှိသည့် Mistine အလှကုန်ပစ္စည်းများကို ဈေးကွက်အတွင်း ဖြန့်ဖြူးရောင်းချခြင်းမပြုရန်နှင့် Mistine အမှတ်တံဆိပ် အလှကုန်ပစ္စည်းများကို တရားဝင်ခွင့်ပြုချက်ရှိသည့်ကုမ္ပဏီများမှ ဝယ်ယူရောင်းချကြရန် ပြောကြားခဲ့ ပါသည်။

          ထို့နောက် ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးများနှင့်ဝန်ထမ်းများက ဈေးကွက်အတွင်း အလှကုန်ပစ္စည်းများရောင်းချသည့် လုပ်ငန်း ရှင်များအား ကုန်ပစ္စည်းများတွင် ကုန်စည်အမျိုးအစားအလိုက် ကုန်အညွှန်းအမှတ်အသားများနှင့် ပတ်သက်၍ ၂၀၁၉ ခုနှစ် စားသုံးသူကာကွယ်ရေးဉပဒေပြဋ္ဌာန်းချက် အခန်း(၁၈)၊ ပုဒ်မ ၄၁၊ ပုဒ်မခွဲ(ခ)အရ ကုန်စည်၏အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသို သိမ်းဆည်းမှုအညွှန်း၊ သုံးစွဲပုံနည်းလမ်းနှင့် ပုဒ်မခွဲ(စ)အရ ကုန်စည်တွင်ပါဝင်သော ကုန်ကြမ်းပစ္စည်း အမျိုးအမည်များနှင့် ပစ္စည်းများ၏ပမာဏပါဝင်မှုအချိုးအစားများ ပါဝင်ရမည်ဖြစ်ကြောင်း၊ ကုန်အညွှန်း အမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးပြီး ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

DOCA(ရှမ်း)

       ပဲခူးတိုင်းဒေသကြီး ၊ သာယာဝတီခရိုင် ၊ ဇီးကုန်းမြို့နယ်ရှိ ကျေးရွာအုပ်စုများမှ  ကျေးလက်နေ ပြည်သူများအား စိုက်ပျိုးရေး ၊ မွေးမြူရေးနှင့် ကုန်ထုတ်လုပ်မှု လုပ်ငန်းများအား အခြေခံ၍ ဇူလိုင်လမှ  သြဂုတ်လ ပထမပတ်အထိ ကျေးရွာ ၁၀ရွာမှ တောင်သူ ၅၉၀ ဦးခန့်အား စားသုံးသူ‌ရေးရာဦးစီးဌာန ၊ စိုက်ပျိုးရေး ၊ ဆည်မြောင်း ၊ မြေစာရင်း ၊ ကျေးလက်ဦးစီးဌာနနှင့် သက်ဆိုင်ရာဌာနများ ပူးပေါင်း၍ အသိပညာပေး လုပ်ငန်းများ ဆောင်ရွက်ခဲ့ပါသည်။   

       စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် စာသုံးသူကာကွယ်‌ရေး ဥပဒေပါ စားသုံးသူများ၏ အခွင့်အရေးနှင့် တာဝန်များ ၊ စားသုံးသူများ၏ နစ်နာဆုံးရှုံးမှုများအား တိုင်ကြားနိုင်သည့် စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ (CICC) ရုံးများ ဖွင့်လှစ်ထားရှိမှု အခြေအနေများကို ဆွေးနွေးပြီး လက်ကမ်းစာစောင်များ ဖြန့်ဝေ ခဲ့ကြောင်း သိရှိရပါသည်။

DOCA(ပဲခူး)

          ပဲခူးတိုင်း‌ဒေသကြီး ၊ သာယာဝတီခရိုင် ၊ သာယာဝတီမြို့နယ်တွင် မြို့နယ်စီမံအုပ်ချုပ်ရေးအဖွဲ့ ၊ အုပ်ချုပ်ရေးမှူး ဦးဆန်းဟို ဦးဆောင်၍ ဌာနဆိုင်ရာအဖွဲ့များဖြစ်သော စိုက်ပျိုးရေး ၊ မွေးမြူရေး ၊ ကျန်းမာရေး ၊ ဆည်မြောင်း ၊ မြေစာရင်း ၊ စက်မှုလယ်ယာ ၊ ကျေးလက် ၊ စိုက်ဘဏ်ဦးစီးဌာနနှင့် စားသုံးသူ ရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းများသည် ဇူလိုင်လမှ သြဂုတ်လ ပထမပတ်အထိ ‌‌မြောက်ပန်းဆွဲရွာ ၊ ညောင်ဝိုင်းရွာ ၊ ဂုဏ်မင်းမြောင်ရွာ ၊ ကျွန်းကုန်းရွာ ၊ သာယာအေးရွာများ၌ နေထိုင်ကြသော တောင်သူများထံသို့ စိုက်ပျိုးရေး ၊ မွေးမြူရေး ၊ ကုန်ထုတ်လုပ်မှု ဖွံ့ဖြိုးတိုးတက် ရေးအတွက် ကျေးရွာများရှိ ဘုန်းတော်ကြီးကျောင်း ၊ စာသင်ကျောင်းများတွင် အသိပညာပေး လုပ်ငန်းများကို ဆောင်ရွက်ခဲ့ပါသည်။

          စိုက်ပျိုးရေး ၊ မွေးမြူရေး ကုန်ထုတ်လုပ်မှုသင်တန်းအား လစဉ် တစ်လလျှင် ကျေးရွာ (၁၀) ရွာ ကွင်းဆင်းပြီး ကျေးရွာအတွင်းရှိ တောင်သူများအား ကျန်းမာရေး ၊ စီးပွားရေး ဖွံ့ဖြိုးတိုးတက်စေရန် ရည်ရွယ်၍ အသိပညာပေး ဟောပြောပွဲများ ကျင်းပခြင်းဖြစ်ပါသည်။ ထိုဟောပြောပွဲများတွင် မြို့နယ် ပညာရေးမှူးများမှ ပညာ‌ရေးအတွက် လိုအပ်ချက်များ ကူညီထောက်ပံ့ပေးနိုင်ရေးကို အဓိကထား ဟောပြောပြီး စားသုံးသူရေးရာဦးစီးဌာန ၊ မြို့နယ်တာဝန်ခံများမှ မိမိတို့ဌာန၏ လက်ရှိလုပ်ဆောင် နေသော လုပ်ငန်းဆောင်တာများ ၊ စားသုံးသူမိဘပြည်သူများအနေဖြင့် ကုန်စည် ၊ ဝန်ဆောင်မှုများ ဝယ်ယူသုံးစွဲရာတွင် ထိခိုက်နစ်နာမှုများရှိပါက တိုင်ကြားနိုင်သည့်နည်းလမ်းများကို အသိပညာပေး ဟောပြောကြပါသည်။ ယခုအချိန်ထိ သာယာဝတီမြို့နယ်တွင် ကျေးရွာအုပ်စုပေါင်း ၄၈ အုပ်စုသို့ ကွင်းဆင်းဟောပြောပြီးဖြစ်ကြောင်း သိရှိရပါသည်။

DOCA(ပဲခူး)

           စားသုံးသူရေးရာဦးစီးဌာန၊ သာယာဝတီခရိုင် ၊ မိုးညိုမြို့နယ်တွင် ခရိုင်ဦးစီးမှူး၏ ဦးဆောင်မှုဖြင့် (၈.၈.၂၀၂၂)ရက်နေ့ နံနက်(၁၀:၀၀)နာရီ အချိန်တွင် ဈေးကွက်စောင့်ကြည့် စစ်ဆေးခြင်းများ ဆောင်ရွက် ခဲ့ပါသည်။

          ခရိုင်ဦးစီးမှူးဦးအောင်သိန်း၊ မြို့နယ်တာဝန်ခံ ဦးစိန်ဝင်းနှင့် ဝန်ထမ်းများသည် မြို့နယ်စည်ပင် သာယာဈေးအတွင်း ကုန်စုံဆိုင်များရှိ အလှကုန်ပစ္စည်းများတွင် FDA ခွင့်ပြုချက်ရှိ/မရှိ ၊ Hologram Stickerများ ပါ/မပါ ၊ မြန်မာဘာသာဖြင့် ကုန်အညွှန်းအမှတ်အသားများပြည့်စုံစွာဖော်ပြခြင်းရှိ/မရှိ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပြီး ထိုသို့ ဈေးကွက်စောင့်ကြည့် စစ်ဆေးခြင်းများ ဆောင်ရွက်ရာတွင် စီးပွားရေး လုပ်ငန်းရှင်များအနေဖြင့် ကုန်အညွှန်းအမှတ်အသား မပြည့်စုံသည့် အလှကုန်ပစ္စည်းများကို ရောင်းချခြင်းမပြုကြရန်နှင့် စားသုံးသူ ကာကွယ်ရေးဥပဒေ နှင့်အညီ လိုက်နာဆောင်ရွက်ကြရန် ၊ စားသုံးသူများ နစ်နာမှုဖြစ်စေမည့် သက်တမ်းလွန် အလှကုန်ပစ္စည်းများကို သွယ်ဝိုက်ရောင်းချခြင်းများ ရှောင်ကြဉ်ကြရန် ၊ FDA ခွင့်ပြုချက်မရှိသည့် အလှကုန်ပစ္စည်းများကို ရောင်းချခြင်းမပြုကြရန် အသိပညာပေး ဟောပြောခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ သာယာဝတီခရိုင် အုတ်ဖိုမြို့နယ်၌ (၅.၈.၂၀၂၂)ရက်နေ့ နံနက်(၁၀:၀၀)နာရီ အချိန်တွင် မြို့နယ်တာဝန်ခံ ဦးအေးဇော်ထိုက်၊ဒုကြီးကြပ်ရေးမှူး ဦးအောင်သိန်းဦးတို့သည် ပဲမျိုးစုံ ရောင်းဝယ်တင်ပို့ရောင်းချသူပိုင်ရှင် ဦးခင်မောင်ထွန်းနှင့် တွေ့ဆုံ၍ အရည်အသွေးမှီကုန်ပစ္စည်းများ ရောင်းချရေးအတွက် တွေ့ဆုံဆွေးနွေးခဲ့ပါသည်။

         ထိုသို့ တွေ့ဆုံဆွေးနွေးရာတွင် စားသုံးသူကာကွယ်ရေး ဥပဒေအခန်း(၁၀)ပါ စီးပွားရေး လုပ်ငန်းရှင်များ၏ တာဝန်များ ၊ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေးများအရ ဖြည့်ဆည်းပေးရမည့်အချက်များနှင့် ကုန်စည်အမျိုး အစားအလိုက် အရည်အသွေး၊ အချိန်အတွယ်ပမာဏနှင့် ဈေးနှုန်းများ မှန်ကန်စွာ ရောင်းချမှုရှိစေရေး ရှင်းလင်းဆွေးနွေးပြောကြားခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)