သတင်းနှင့် လှုပ်ရှားမှုများ

        စားသုံးသူရေးရာဦးစီးဌာနအနေဖြင့် မိမိတို့ဌာန၏ ပင်မလုပ်ငန်းများအတွက်အကောင်အထည် ဖော်ဆောင်ရွက်လျက်ရှိပြီး မိတ်ဖက်ဌာနများနှင့်လည်း ပူးပေါင်းပါဝင်ဆောင်ရွက်လျက်ရှိရာ (၄.၈.၂၀၂၂)ရက်နေ့ ညနေ(၁၅:၃၀)အချိန်မှ (၁၆:၃၀)အချိန်ထိ (FDA) အစားအသောက်နှင့်ဆေးဝါး ကွပ်ကဲရေးဦးစီးဌာနက ဦးဆောင်း၍ တရားမဝင်ထောက်ခံချက်မရှိသော Dumex အမှတ်တံဆိပ် ကလေးနို့မှုန့် (550g)၊ (575g)၊ နှင့် (600g)တို့ကို Online Page တွင်ကြော်ငြာပြီး ဈေးကွက်အတွင်း ရောင်းချနေသည့်အတွက် စားသုံးသူရေးရာဦးစီးဌာန၊ ခရိုင်ကျန်မာရေးဦးစီးဌာနတို့နှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါသည်။

          အစားအသောက်နှင့်ဆေးဝါးကွပ်ကဲရေးဦးစီးဌာန (FDA)၊  တရားမဝင် Online ကြေညာချက်များ စောင့်ကြည့်စစ်ဆေးရေးအဖွဲ့၏ ညွှန်ကြားချက်အရ " Smile Mon and Baby Essential Store " ကလေးပစ္စည်းအရောင်းဆိုင်သို့ ပူးပေါင်းအဖွဲ့ဖြင့် သွားရောက်စစ်ဆေးရာ FDA ထောက်ခံချက်မရှိသည့် Dumex အမှတ်တံဆိပ် ကလေးနို့မှုန့် (550g) နှင့် (600g)တို့ကို စစ်ဆေးတွေ့ရှိရသည့်အတွက် အဆိုပါ ကုန်ပစ္စည်းများကို ကြော်ငြာရောင်းချခြင်းမပြုရန် ဝန်ခံကတိလက်မှတ်ရေးထိုးစေ၍ နောက်နောင် ကုန်ပစ္စည်းများတင်သွင်းဖြန့်ဖြူးရောင်းချမည်ဆိုပါက တရားဝင်ထောက်ခံချက်ပါသော ကုန်ပစ္စည်းများ သာရောင်းချရန် အသိပညာပေးခြင်းများဆောင်ရွက်ခဲ့ပါသည်။

DOCA(ရှမ်း)

ရက်စွဲ၊ ၄.၈.၂၀၂၂

          စစ်ကိုင်းတိုင်းဒေသကြီး၊ ကလေးခရိုင်၊ ကလေးမြို့၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဘက်စုံသုံးခန်းမ၌ ( ၄.၈.၂၀၂၂ ) ရက်နေ့၊ နံနက် ( ၁၀:၀၀ ) နာရီအချိန်တွင် စားသုံးသူကာကွယ်ပေးရေး အသိပညာပေးဟောပြောပွဲ ကျင်းပပြုလုပ်ခဲ့ကြောင်း သိရသည်။

          အဆိုပါအခမ်းအနားတွင် ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ကလေးခရိုင်ဦးစီးမှူး ဦးတွာလ်ဆွင်းဗန်မှ စားသုံးသူကာကွယ်ပေးရေး အသိပညာပေးဟောပြောပွဲ ကျင်းပရခြင်း၏ ရည်ရွယ်ချက်ကို အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန၊ အကြီးတန်းစာရေး ဒေါ်သိမ့်သိမ့်ထွန်းမှ စားသုံးသူကာကွယ်ပေးရေးဥပဒေပါ ပြဌာန်းချက်တွင်ပါရှိသည့် ကုန်ညွှန်းအမှတ်အသားများနှင့် မိမိတို့၏ဌာနတွင် ဖွင့်လှစ်ထားရှိသည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ ( Consumer Information and Complaint Center ) CICCဖွင့်လှစ်ထားရှိမှု အခြေအနေကိုလည်းကောင်း၊ စားသုံးသူနစ်နာမှုရှိလာပါက ဌာနသို့ ဆက်သွယ်တိုင်ကြားနိုင်သည့် နည်းလမ်းများကိုလည်းကောင်း၊ဌာနက ဖြေရှင်းဆောင်ရွက်ပေးလျက်ရှိသည့် အခြေအနေများကိုလည်းကောင်း ရှင်းလင်းအသိပညာပေးဟောပြောခဲ့ပြီး တက်ရောက်လာသူများ၏ သိရှိလိုသည်မေးမြန်းမှုများအပေါ်ပြန်လည်ဖြေကြားဆွေးနွေးခဲ့ပါသည်။ ဟောပြောပွဲသို့ ဌာနဆိုင်ရာမှ ( ၉ ) ဦး တက်ရောက်ခဲ့ကြောင်း သတင်းရရှိပါသည်။

DOCA(စစ်ကိုင်း)

               စားသုံးသူရေးရာဦးစီးဌာနသည် စားသုံးသူအခွင့်အရေးကာကွယ်‌ပေးရေး၊ စားသုံးသူ အသိ ပညာပေးရေး၊ စားသုံးသူဆုံးရှုံးနစ်နာမှုများ ဖြေရှင်းပေးရေးစသည့် လုပ်ငန်းများအပြင် ပြည်တွင်း ကုန်သွယ်မှုဖွံ့ဖြိုးရေးအတွက် လယ်ယာထွက်ကုန်သီးနှံများ အရည်အသွေးပြည့်မီစွာဖြင့် ရောင်းဝယ်ဖောက်ကားနိုင်ရေး ဆောင်ရွက်ပေးလျက်ရှိပါသည်။

         ထိုသို့ စားသုံးသူရေးရာဦးစီးဌာန၏ လုပ်ငန်းတာဝန်များအကောင်အထည်ဖော် ဆောင် ရွက်နိုင်ရန် သတင်းအချက်အလက်နည်းပညာနှင့်အရည်အသွေးစီမံခန့်ခွဲရေးဌာနခွဲသည် လယ်ယာ ထွက်ကုန်များ၏ မြန်မာစံချိန်စံညွှန်းထုတ်ပြန်နိုင်ရေး၊ လယ်ယာထွက်ကုန်များ ပြည်ပ တင်ပို့ရာ တွင် မဖြစ်မနေလိုက်နာရမည့် အရည်အသွေးသတ်မှတ်ချက် (Technical Regulations) အမိန့် ညွှန်ကြားချက်များ ထုတ်ပြန်နိုင်ရေးတို့ကို ဆောင်ရွက်လျက်ရှိပါသည်။

           လယ်ယာထွက်ကုန်များ အရည်အသွေးစီမံခန့်ခွဲမှုဆောင်ရွက်ရန် သတင်းအချက်အလက် နည်းပညာနှင့် အရည်အသွေးစီမံခန့်ခွဲရေးဌာနခွဲအောက်ရှိ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲမှု ဌာနစု (CTQM) လှည်းကူးတွင် လယ်ယာထွက်ကုန်သီးနှံများ အရည် အသွေးဓာတ်ခွဲစမ်းသပ်နိုင်သည့် ဓာတ်ခွဲခန်းများကို ထူထောင်ထားရှိပြီး ပြည်ပပို့ကုန်လုပ်ငန်းရှင် များအတွက် လယ်ယာထွက်ကုန်သီးနှံများနှင့် လယ်ယာထွက်ကုန်အခြေခံစားသောက်ကုန်များကို ဓာတ်ခွဲစမ်းသပ်၍ ထောက်ခံချက်ပေးသော ဝန်ဆောင်မှုလုပ်ငန်းကို ဆောင်ရွက်လျက်ရှိပါသည်။

           CTQM (လှည်းကူး) ရှိ အောက်ပါ ဓာတ်ခွဲခန်း (၇) ခုမှ စမ်းသပ်စစ်ဆေးပေးနိုင်သည့် နယ်ပယ်များ (လယ်ယာထွက်ကုန်သီးနှံများ၊ စားသုံးဆီများ)မှာ အောက်ပါအတိုင်းဖြစ်ပြီး ဓာတ်ခွဲ ခန်းအလိုက် စမ်းသပ်ပေးနိုင်သည့် Parameters များနှင့် ဓာတ်ခွဲစမ်းသပ်ခနှုန်းထားများအား အောက်ပါ Pdf File တွင် အသေးစိတ် ဝင်ရောက်ကြည့်ရှုနိုင်ပါသည်-

            CTQM (လှည်းကူး) ရှိ ဓာတ်ခွဲခန်းများမှ နှစ်စဉ်လယ်ယာထွက်ကုန်သီးနှံများအား ဓာတ်ခွဲ စမ်းသပ်ပေးခြင်းဖြင့် စားသုံးသူဘေးအန္တရာယ်ရှိမှုကို ကာကွယ်ပေးသကဲ့သို့ ပြည်တွင်း ပြည်ပ ကုန်သွယ်မှုကိုလည်း တစ်ဖက်တစ်လမ်းမှ အထောက်အကူပြုလျက်ရှိပါသည်။ လယ်ယာ ထွက်ကုန်သီးနှံများနှင့် စားသုံးဆီများ စမ်းသပ်စစ်ဆေးပေးနိုင်မှု အခြေအနေမှာ အောက်ပါအတိုင်း ဖြစ်ပါသည်-

စဉ်        ဘဏ္ဍာနှစ်                                 နမူနာအရေအတွက်            စမ်းသပ်မှုပေါင်း

(က)      ၂၀၁၇-၂၀၁၈ဘဏ္ဍာနှစ်                           ၇၆၈                             ၁၅၆၈

(ခ)        ၂၀၁၈-၂၀၁၉ဘဏ္ဍာနှစ်                           ၁၀၇၁                           ၂၂၄၀

(ဂ)       ၂၀၁၉-၂၀၂၀ ဘဏ္ဍာနှစ်                          ၁၁၈၆                           ၂၄၄၉

(ဃ)      ၂၀၂၀-၂၀၂၁ ဘဏ္ဍာနှစ်                          ၇၈၂                             ၁၉၉၃

(င)        ၂၀၂၁ Mini Budget                               ၅၇၇                            ၁၃၀၀

            သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲအနေဖြင့် စားသုံး သူများ ဘေးအန္တရာယ်လုံခြုံစိတ်ချရမှုရှိပြီး အရည်အသွေးပြည့်ဝသည့် ကုန်ပစ္စည်းများကို သုံးစွဲခွင့်ရရှိစေရေး ဆောင်ရွက်ရင်း လယ်ယာထွက်ကုန်သီးနှံများ ကုန်သွယ်မှု ဖွံ့ဖြိုးတိုးတက်ရေး အတွက်လည်း တစ်ဖက်တစ်လမ်းမှ အထောက်အကူပြုလျက်ရှိပါကြောင်းနှင့် လုပ်ငန်းရှင်များ အနေဖြင့် မိမိတို့၏ ပို့ကုန်သီးနှံများကို ဓာတ်ခွဲစမ်းသပ်လိုပါက ‌အောက်ဖော်ပြပါ လိပ်စာများသို့ ဆက်သွယ်ဆောင်ရွက်နိုင်ပါကြောင်း တင်ပြလိုက်ရပါသည်-

လိပ်စာ   :  ကုန်ပစ္စည်းစမ်းသပ်စစ်ဆေးရေးနှင့်အရည်အသွေးစီမံခန့်ခွဲမှုဌာနစု(CTQM) လှည်းကူးမြို့နယ်၊ ရန်ကုန်တိုင်းဒေသကြီး

အီးမေးလ် : ctqm.dept@gmail.com

ဖုန်း         :  ၀၁-၈၆ ၂၉၀၄၃၊ ၀၁-၈၆ ၂၉၀၄၄

ဖက်စ်    :   ၀၁-၈၆ ၂၉၆၅၅

                                   သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲ

          စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ခရိုင်ဦးစီးမှူး ဦးမောင်မောင်ခိုင်သည် ၄.၈.၂၀၂၂ ရက်နေ့တွင် မိုးညှင်းခရိုင်ဦးစီးမှူးရုံး၌ ကိတ်မုန့်/ပေါင်မုန့်ထုတ်လုပ် ဖြန့်ဖြူးရောင်းချသော လုပ်ငန်းရှင်များ လိုက်နာရမည့်အချက်များကို တွေ့ဆုံဆွေးနွေးခဲ့ပါသည်။

         ထိုသို့တွေ့ဆုံဆွေးနွေးရာတွင်ခရိုင်ဦးစီးမှူး ဦးမောင်မောင်ခိုင်က စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင် ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးကမ်းခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကို ဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်းဆောင်ရွက်သူကို ဆိုလို ကြောင်း၊ စီးပွားရေးလုပ်ငန်းရှင်၏ တာဝန်များဖြစ်သော ကုန်စည်သို့မဟုတ် ဝန်ဆောင်မှု၏ အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သောအချက်အလက်များပေးခြင်း၊ စားသုံးသူကို ခွဲခြားမှု မရှိဘဲ ဖြောင့်မတ်မှန်ကန်စွာဆက်ဆံခြင်း၊ စီးပွားရေးလုပ်ငန်းလုပ်ကိုင်ရာတွင် စီးပွားရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာဆောင်ရွက်ခြင်း၊ အရည်အသွေးစမ်းသပ်ရန်လိုအပ်သော ကုန်စည်နှင့်စပ်လျဉ်း၍ ဝယ်ယူခြင်းမပြုမီ စားသုံးသူများကိုစမ်းသပ်နိုင်သည့် အခွင့်အရေးပေးခြင်း နှင့်စားသုံးသူ နစ်နာဆုံးရှုံးမှုဖြစ်ပွားစေမည့် ကုန်စည်သို့မဟုတ်ဝန်ဆောင်မှုကို တိုက်ရိုက်ရောင်းချခြင်း သို့မဟုတ် သွယ်ဝိုက်ရောင်းချခြင်းကို ရှောင်ကြဉ်ရမည်ဖြစ်ကြောင်းတို့ကို ရှင်းလင်းဆွေးနွေးခဲ့ပြီး ကုန်အညွန်းအမှတ်အသားဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ကချင်)

          မွန်ပြည်နယ် ကွမ်းသီးစိုက်ပျိုးထုတ်လုပ်တင်ပို့ရောင်းချသူများအသင်း ဖွဲ့စည်းခြင်း အခမ်းအနားကို ၄.၈.၂၀၂၂ ရက်နေ့ (၁၃:၀၀)  နာရီတွင် မွန်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး အစည်းအဝေးခန်းမ၌ ကျင်းပပြုလုပ်ခဲ့ရာ အခမ်းအနားသို့ ပြည်နယ်ဦးစီးမှူးနှင့် ဝန်ထမ်းများ၊ မော်လမြိုင်ကုန်စည်ဒိုင်အသင်း ဥက္ကဌ နှင့် NEI မှ ဝန်ထမ်းများ၊ ကွမ်းသီးလုပ်ငန်းရှင်များ စုစုပေါင်း (၁၉) ဦးတက်ရောက်ခဲ့သည်။

          အခမ်းအနားတွင် ကုန်စည်ဒိုင်အသင်း ဥက္ကဌ ဦးအောင်မျိုးဦး က အဖွင့်အမှာစကားပြောကြားခဲ့ပြီးနောက် အသင်း၏ အလုပ်အမှုဆောင်များအား ရွေးချယ်တင်မြှောက် ကြရာ နာယက (၃) ဦး၊ ဥက္ကဌ၊ ဒုဥက္ကဌ၊ ဘဏ္ဍာရေးမှူး၊ အတွင်းရေးမှူး အပါအဝင် အသင်း အလုပ်အမှုဆောင်အား (၃၅) ဦးဖြင့် ဖွဲ့စည်းခဲ့ပြီး အခမ်းအနားအား (၁၅:၀၀) နာရီတွင် ရုပ်သိမ်းခဲ့ကြောင်း သိရှိရပါသည်။

DOCA(မွန်)