သတင်းနှင့် လှုပ်ရှားမှုများ

          စစ်ကိုင်းတိုင်းဒေသကြီး၊ ကလေးမြို့တွင် ပင်လုံရပ်ကွက်ရှိ အလှကုန်ပစ္စည်းအရောင်းဆိုင်များအား( ၂၇.၇.၂၀၂၂ )ရက်နေ့တွင် စားသုံးသူရေးရာဦးစီးဌာနမှ ခရိုင်ဦးစီးမှူးဒေါ်သန်းသန်းဝင်း ဦးဆောင်၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

        ထိုသို့ ဈေးကွက်စောင့်ကြည့်စစ်ဆေးရာတွင် ထိုင်းနိုင်မှ မြန်မာနိုင်ငံ၏ တစ်ဦးတည်း ကိုယ်စားလှယ်အဖြစ် Better Way ( Thailand ), Co.,Ltd မှ FDA ထောက်ခံချက်များဖြင့် Mistine အမှတ်တံဆိပ် အလှကုန်ပစ္စည်းများသည် Hologram ( ရောင်ပြန် ) စတစ်ကာနှင့် မြန်မာစာ  Labelling ကပ်၍ ဈေးကွက်အတွင်းသို့ တရားဝင်ဖြန့်ဖြူးရောင်းချလျက်ရှိပါသည်။ ၎င်းအလှကုန် ပစ္စည်းများကို တုပ၍ တရားမဝင်ဖြန့်ဖြူးရောင်းချနေသည့် အလှကုန်ပစ္စည်းများ ဈေးကွက်အတွင်း ဖြန့်ဖြူးရောင်းချလျက်ရှိသည့်အပေါ် စားသုံးသူရေးရာဦးစီးဌာန၊ နေပြည်တော်က အရေးယူ ဆောင်ရွက်ပေးပါရန် တင်ပြလာရာ ဈေးကွက်စောင့်ကြည့်စစ်ဆေးရာတွင် အလှကုန်ပစ္စည်း အရောင်းဆိုင်များအနေဖြင့် Mistine အလှကုန်များကို တရားဝင်ကုမ္ပဏီများမှ ဝယ်ယူရောင်းချပါကြောင်းနှင့် ရောင်းချသည့် Mistine အလှကုန်များတွင် Hologram ( ရောင်ပြန် ) စတစ်ကာနှင့် မြန်မာစာ Labrlling များ ကပ်နှိပ်ထားသည်ကို စစ်ဆေးတွေ့ရှိခဲ့ကြောင်း သတင်းရရှိပါသည်။

DOCA(စစ်ကိုင်း)

            မကွေးတိုင်းဒေသကြီးအတွင်း ကုန်သွယ်မှုလမ်းကြောင်းများမှ တရားမဝင်ကန့်သတ်၊ တားမြစ်ကုန်စည်များနှင့် အကောက်ခွန်မဲ့ပစ္စည်းများ ဝင်ရောက်မှုမရှိစေရေး တားဆီးကာကွယ်ရန်အတွက် မကွေးတိုင်းဒေသကြီးအဆင့် တရားမဝင် ကုန်စည်စီးဆင်းမှု တားဆီးထိန်းချုပ်ရေး ကော်မတီ၏ ကွပ်ကဲမှုအောက်တွင် ဌာနဆိုင်ရာ ပူးပေါင်းရှာဖွေတားဆီး စစ်ဆေးရေးအဖွဲ့အား မကွေးမြို့ ကုန်တင်/ ကုန်ချကားကြီးဝန်းအတွင်း ဖွဲ့စည်းတာဝန်ပေးအပ်ထားပြီး (၄.၁၀.၂၀၂၁) ရက်နေ့မှစ၍ မကွေးတိုင်းဒေသကြီး၊ စားသုံးသူရေးရာဦးစီးဌာနမှ ဌာနဆိုင်ရာ ပူးပေါင်းရှာဖွေ တားဆီးစစ်ဆေးရေးအဖွဲ့တွင် အဖွဲ့ဝင်အဖြစ် ပါဝင်ဆောင်ရွက်လျက်ရှိကြောင်း သိရှိရပါသည်။

          အဆိုပါ ဌာနဆိုင်ရာပူးပေါင်းရှာဖွေတားဆီး စစ်ဆေးရေးအဖွဲ့မှ (၁.၈.၂၀၂၂)ရက်နေ့တွင် မကွေးမြို့ကုန်တင်ယာဉ် ကြီးများရပ်နားစခန်း(ရပ်နား)တွင် လိုက်လံစစ်ဆေးရာ နံနက်(၉:၃၀) အချိန်တွင် ရန်ကုန်မြို့မှ မကွေးမြို့သို့ ကုန်မျိုးစုံ သယ်ဆောင်လာသော (၁၂)ဘီး မော်တော်ယာဉ်ပေါ် တွင် (Ostech Shampoo Cantaloupe, Apple, Fruity, Strawberry) အမှတ်တံဆိပ်ပါ အိမ်မွေးတိရိစ္ဆာန်သုံး ခွေးရေချိုးဆပ်ပြာများအား စစ်ဆေးရာ အဆိုပါပစ္စည်းနှင့် ပတ်သတ်၍ အထောက်အထားများ တောင်းခံရာတွင် အထောက်အထားတစ်စုံတစ်ရာ ပြသနိုင်ခြင်းမရှိသဖြင့် အထွေထွေအုပ်ချုပ်ရေးဦးစီးဌာန၊ အကောက်ခွန်ဦးစီးဌာန၊ မူးယစ်ရဲတပ်ဖွဲ့၊ မြန်မာနိုင်ငံရဲတပ်ဖွဲ့ဝင်များ နှင့်အတူ ထပ်မံစစ်ဆေး၍ အကောက်ခွန်မဲ့ တင်သွင်းလာသော ပစ္စည်းများဖြစ်သည့် (Ostech Shampoo Cantaloupe, Apple, Fruity, Strawberry)အမှတ်တံဆိပ်ပါ အိမ်မွေးတိရိစ္ဆာန်သုံး ခွေး ရေချိုးဆပ်ပြာ တစ်ဖာလျင် (၁၂)ဗူးပါဝင်သော (၆၀)ဖာ၊ (၇၂၀)ဗူး စုစုပေါင်းခန့်မှန်းတန်ဖိုးငွေကျပ်(၃၂၄၀၀၀၀) (သုံးဆယ်နှစ်သိန်းလေးသောင်းကျပ်)အား  (၂.၈.၂၀၂၂)ရက်နေ့တွင် လုပ်ထုံးလုပ်နည်းနှင့်အညီ အကောက်ခွန် အမှုတွဲဖွင့်လှစ်သိမ်းဆည်း၍ အကောက်ခွန်ဦးစီးဌာနထံသို့ လွဲပြောင်းအပ်နှံပြီးဖြစ်ကြောင်း သတင်းရရှိပါသည်။

DOCA(မကွေး)

              စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး ဦးဇော်မင်းသည်  (၂၇-၇-၂၀၂၂) ရက်နေ့ နေ့လယ် (၁၃:၀၀) အချိန်တွင် ခရိုင်ဦးစီးမှူရုံးခန်းအတွင် မိတ္ထီလာမြို့နယ်အတွင်းရှိ စားသောက်ကုန်ဖြန့်ဖြူရောင်းချနေသော စီးပွားရေးလုပ်ငန်းရှင်များအား စားသုံးသူအသိပညာပေး ဟောပြောခဲ့ပါသည်။

           အဆိုပါတွေ့ဆုံမှုတွင် စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ(၁၅) ရက်နေ့တွင် အခန်း(၂၅)ခန်း၊ ပုဒ်မ (၈၄)ခုဖြင့် ပြဌာန်းခဲ့ကြောင်း၊ စားသုံးသူ ကာကွယ်ရေး နည်းဥပဒေကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ အမိန့်ကြောငြာစာအမှတ် (၉/၂၀၂၂)ဖြင့်၂၀၂၂ ခုနှစ် ဇန်နဝါရီလ ၁၈ ရက်နေ့တွင် ပြဌာန်းပြီးဖြစ်ကြောင်း ပြောကြားခဲ့ပြီး စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်နှင့် တာဝန်များကို ရှင်းလင်း ပြောကြားခဲ့ပြီး၊ဥပ‌ဒေတွင်ပါရှိသည့် စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊ ကုန်အညွှန်းအမှတ်အသား ဖော်ပြခြင်းအကြောင်းနှင့် ပြစ်မှုနှင့် ပြစ်ဒဏ်များအကြောင်းကို အကျယ်တဝင့်ရှင်းလင်းပြောကြားခဲ့ပြီး၊ မည်သည့် စီးပွား‌ရေးလုပ်ငန်းရှင်မဆို စားသုံးသူကာကွယ်‌ရေးဥပဒေပါ တားမြစ်ချက်များကို ဖောက်ဖျက်ပါက စားသုံးသူကာကွယ်‌ရေးဥပဒေအရ အရေးယူခံရမည်ဖြစ်ကြောင်းနှင့် စီးပွားရေးကျင့်ဝန်နှင့်အညီ လုပ်ကိုင်ဆောင်ရွက်ခြင်းဖြင့် စျေးကွက်များပိုမိုရရှိလာနိုင်ပြီး စားသုံးသူများမှလည်း လုံခြုံစိတ်ချရသော ကုန်စည်များအား ရွေးချယ်ဝယ်ယူသုံးစွဲလာနိုင်၍ နှစ်ဦးနှစ်ဖက်အကျိုး ကျေးဇူးများ ရရှိစေလာမည်ဖြစ်ကြောင်း၊ သိရှိလိုသည်များ၊ အခက်ခဲများကို ရင်းနှီးပွင့်လင်း စွာတင်ပြစေလိုကြောင်း ဆွေးနွေးခဲ့ပြီး စီးပွားရေးလုပ်ငန်းရှင်များအနေဖြင့် စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို သိရှိလိုပါက www.doca.gov.mm Websit တွင် ဝင်ရောက်လေ့လာနိုင်ကြောင်း အသိပညာပေးဟောပြောခဲ့ပါသည်။

DOCA(မန္တလေး)

              စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး၏ လမ်းညွှန်မှုဖြင့် မိတ္ထီလာမြို့နယ် တာဝန်ခံနှင့် ဝန်ထမ်းများသည်  (၂၇-၇-၂၀၂၂) ရက်နေ့ နံနက် (၀၉:၀၀) အချိန်တွင် မိတ္ထီလာမြို့နယ်အတွင်းရှိ စက်သုံးဆီရောင်းချနေသော အရောင်းဆိုင် (၁၀) ဆိုင်အား စျေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါသည်။  

           ထိုသို့စောင့်ကြည့်စစ်ဆေးရာတွင် အချိန်အတွယ် မှန်ကန်မှု ရှိ/မရှိ၊ သတ်မှတ်စျေးနှုန်းအတိုင်း ရောင်းချခြင်း ရှိ/မရှိ၊ ဆီများရောင်းချခြင်းမရှိပဲ ပိတ်ထားသော ဆိုင်များရှိ/မရှိ စစ်ဆေးခဲ့ပြီး မြို့နယ် တာဝန်ခံမှ  အရည်အသွေးပြည့်မီမှန်ကန်သည့် ပစ္စည်းများစျေးကွက်းအတွင်း တင်သွင်းဖြန့်ဖြူး ရောင်းချရန်နှင့် စက်သုံးဆီရောင်းချရာတွင် သတ်မှတ်ရည်ညွှန်းစျေးနှုန်းများအတိုင်း ရောင်းချစေရေး၊ သတ်မှတ်ချက်နှင့် မကိုက်ညီသည့် စက်သုံးဆီအရောင်းဆိုင်များ စျေးကွက်အတွင်း စစ်ဆေးတွေ့ရှိပါက ရေနံနှင့်ရေနံထွက်ပစ္စည်းဆိုင်ရာဥပဒေအရ အ‌ရေးယူခံရနိုင်ကြောင်း ဆွေးနွေးပြောကြားခဲ့ပြီး စက်သုံးဆီအရောင်းဆိုင်များမှလည်း စက်သုံးဆီရောင်းချမှု အခြေအနေများကို ပြန်လည်တင်ပြ ဆွေးနွေးခဲ့ကြောင်း သိရပါသည်။

DOCA(မန္တလေး)

          စားသုံးသူရေးရာဦးစီးဌာန၊ ကယားပြည်နယ်ဦးစီးမှုးရုံးမှ ၂၀၂၂ ခုနှစ်၊ ဇူလိုင်လ (၂၉) ရက်နေ့၊ နံနက်(၀၇:၀၀)နာရီအချိန်တွင် လွိုင်ကော်မြို့၊ သီရိမင်္ဂလာဈေးအတွင်းရှိ အသား/ငါး ရောင်းချနေသော ဆိုင်များသို့ အသား/ငါးများ သန့်ရှင်းလတ်ဆတ်မှုရှိ/မရှိနှင့် သန့်ရှင်းသော ရောင်းချခြင်းစနစ်ရှိ/မရှိ ပြည်နယ်ငါးလုပ်ငန်းဦးစီးဌာန၊ ပြည်နယ်မွေးမြူရေးနှင့် ကုသရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် ပြည်နယ်ပြည်သူ့ကျန်းမာရေးတို့ဖြင့် ပူးပေါင်း၍ ကွင်းဆင်း စစ်ဆေး‌ဆောင်ရွက်ခဲ့ပါသည်။

          ထိုသို့ကွင်းဆင်းစစ်ဆေးရာတွင် ဈေးအတွင်းရှိ အသား/ငါးများမှာ မျက်မြင်အခြေအနေ အရသန့်ရှင်းလတ်ဆတ်မှုရှိပြီး ယင်လုံဇာများ ဖုံးအုပ်ရောင်းချသည်ကို စစ်ဆေးတွေ့ရှိရပါကြောင်း၊ ဒေသငါးများသာမက အခြားဒေသမှ ငါးများပါ မှာယူတင်သွင်းရောင်းချသည်ကို တွေ့ရှိရကြောင်း၊ ရောင်းချသော ဈေးသည်များအနေဖြင့် Mask များ တပ်ဆင်ရောင်းချရန်လိုကြောင်း၊ တစ်ကိုယ် ရေသန့်ရှင်းရေးအနေဖြင့် သွေးစစ်ချက်များ၊ ကျန်းမာရေးထောက်ခံချက်များ ပြုလုပ်ထားရန်လို အပ်ကြောင်း၊ ဈေးအတွင်းသို့ လာရောက်စစ်ဆေးမှသာ ယင်လုံဇာများဖြင့် ဖုံးအုပ်ရောင်းချခြင်း မျိုးမပြုလုပ်ဘဲ လာရောက်စစ်ဆေးခြင်းမရှိသည့် ပုံမှန်ရက်များ၌လည်း ယင်ကောင်မလာစေရန် ဖုံးအုပ်ရောင်းချသင့်ပါကြောင်း၊ ငါးများမှာယူတင်သွင်းရာတွင် စနစ်တကျ သယ်ယူပို့ဆောင်ရန် လိုအပ်ကြောင်း၊ လတ်ဆတ်မှုမရှိသော အသားငါးများနှင့် ကူးစက်ရောဂါရနေသော အသားများ အား ရောင်းချခြင်းမပြုရန် အသားငါးနှင့်ကြက်ဥဘဲဥ ရောင်းချနေသော ဆိုင်(၂၈)ဆိုင်အား ဝိုင်းဝန်းအသိပညာပေး စစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)