သတင်းနှင့် လှုပ်ရှားမှုများ

       ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်စည်ပင်သာယာမြို့မဈေးတာဝန်ခံရုံးခန်းမအပေါ်ထပ်တွင် ဩဂုတ်လ ၁၃ရက်နေ့၊ နံနက် (၁၀း၃၀) နာရီအချိန်တွင် စည်ပင်သာယာမြို့မဈေးအတွင်း/အပြင်ရှိ စားသောက်ကုန်၊ လူသုံးကုန်ပစ္စည်းအမျိုးမျိုးဖြန့်ဖြူးရောင်းချပေးလျက်ရှိသော ဆိုင်ပိုင်ရှင်၊ စီးပွားရေးလုပ်ငန်းရှင်များအား Online စနစ်ဖြင့် ကုန်စည်နှင့် ဝန်ဆောင်မှုများဖြန့်ဖြူးရောင်းချခြင်းဆိုင်ရာ အသိပညာပေးဆွေးနွေးပွဲကျင်းပခဲ့ကြောင်းသိရသည်။

    အဆိုပါသိပညာပေးဆွေးနွေးပြောကြားရာတွင် စားသုံးသူရေးရာဦးစီးဌာန၊ ခရမ်းမြို့နယ်တာဝန်ခံ ဒေါ်ကျော့ကေခိုင်က စီးပွားရေးလုပ်ငန်းရှင်များအနေဖြင့် စားသောက်ကုန်၊ လူသုံးကုန်ပစ္စည်းများအား စားသုံးသူပြည်သူများအပေါ် တိုက်ရိုက်ဖြန့်ဖြူးမှုများရှိကြပြီး ကုန်စည်နှင့် ဝန်ဆောင်မှုများကို Online စနစ်ဖြင့်ဝန်ဆောင်မှုပေး၍ ဆောင်ရွက်ခြင်းများရှိလာပါက Online မှတ်ပုံတင်မဖြစ်မနေ ဆောင်ရွက်ထားရန်လိုအပ်ကြောင်း၊ စားသုံးသူကာကွယ်ရေးဥပဒေမှ စားသုံးသူ၏အခွင့်အရေး (၈)ချက်တွင်ပါဝင်သည့် ကုန်စည်/ ဝန်ဆောင်မှုများအားဝယ်ယူသုံးစွဲရာတွင် စားသုံးသူများစိတ်ကျေနပ်မှုရှိစေရေး၊ ဘေးအန္တရာယ်ကင်းရှင်းစေရေး၊ စိတ်ကြိုက်ရွေးချယ်ဝယ်ယူနိုင်ရေး၊ လိုအပ်သောသတင်းအချက်အလက်များ ပြည့်စုံမှန်ကန်စွာသိရှိခွင့် စသည့် စားသုံးသူအခွင့်အရေးများအဆုံးရှုံးစေရန် စီးပွားရေးလုပ်ငန်းရှင်များအနေဖြင့် ကျင့်ဝတ်၊ စည်းကမ်းများနှင့်အညီ ဆောင်ရွက်သွားကြရန်လိုအပ်ကြောင်း၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာအမှတ် ၅၀/၂၀၂၃ ဖြင့်ထုတ်ပြန်ထားသော Online Sales မှတ်ပုံတင်လျှောက်ထားလျှင် ကြိုတင်ပြင်ဆင်သင့်သည့် အထောက်အထားများအားစုဆောင်း၍ မှတ်ပုံတင်တရားဝင်လျှောက်ထားဆောင်ရွက်သွားကြရန်နှင့် ဆိုင်ပိုင်ရှင် စီးပွားရေးလုပ်ငန်းရှင်များအနေဖြင့် Online မှဝယ်ယူပြီး ပြန်လည်ဖြန့်ဖြူးရောင်းချခြင်းများရှိခဲ့ပါက မိမိတို့အနေဖြင့် မဝယ်ယူမီ Online ရောင်းချမှုနှင့်စပ်လျဉ်း၍ စိစစ်သင့်သည့်အချက်များနှင့် အမှန်တကယ်ဆုံးရှုံးနစ်နာမှုများရှိလာပါက တိုင်ကြားနိုင်သည့်နည်းလမ်းများအား ရှင်းလင်းဆွေးနွေးအသိပညာပေးပြောကြားခဲ့ကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာနမှ မအူပင်ခရိုင်၊ ခရိုင်ဦးစီးမှူးဦးဇော်မင်းနှင့် ပန်းတနော် မြို့နယ်တာဝန်ခံ ဦးအောင်ကျော်သက်တို့သည် (၁၆.၈.၂၀၂၄)ရက်နေ့၊ နံနက် (၁၀:၀၀)နာရီအချိန်က ပန်းနော်အုန်းပင်စုကျေးရွာရှိ စိုင်းအောင်လင်းထွန်း ဆန်စက်သို့ သွားရောက်၍အရည်အသွေးမြင့်ဆန်များ ထုတ်လုပ်ပြီး ဈေးကွက်ခိုင်မာမှုရှိစေရေး ကုန်ဈေးနှုန်းတည်ငြိမ်ရေး၊ ထုတ်ကုန်လုံခြုံစိတ်ချရမှုရှိစေရေး ကွင်းဆင်းလေ့လာစစ်ဆေးခဲ့ကြသည်။

     ကွင်းဆင်းစစ်ဆေးမှုတွင် စားသုံးသူရေးရာဦးစီးဌာန၊ မအူပင်ခရိုင်ဦးစီးမှူး၊ ဒုခရိုင်ဦးစီးမှူးနှင့် ပန်းတနော်မြို့နယ်တာဝန်ခံရုံးမှ ဦးအောင်ကျော်သက်(အငယ်တန်းစာရေး)တို့သည် အုန်းပင်စုကျေးရွာရှိ စိုင်းအောင်လင်းထွန်း ဆန်စက်ပိုရှင် ဦးစိုင်းမင်းဇော်နှင့်တွေ့ဆုံ၍ ဆန်စက်တွင် စပါးကြိတ်ခွဲ ဝယ်ယူမှု လုပ်ငန်းအခြေအနေများ၊ ပန်းတနော်မြို့နယ် တွင် တောင်သူစိုက်ပျိုးသော မျိုးစပါးကောင်း ထွက်ရှိစေရေးဆွေးနွေးခြင်း၊ ဆန်စက်တွင် Gasifierသုံးစနစ်နှင့်ပတ်သက်၍ လေ့လာစစ်ဆေးကြည့်ရှုခြင်း၊ စပါးအခြောက်ခံစက်သုံးစွဲမှုအခြေအနေများ၊ ဆန်အမျိုး အစားအလိုက် ဈေးကွက်ရရှိ အောင်ကြိတ်ခွဲ ထုတ်လုပ်မှုနှင့် စပ်လျဉ်း၍ ဆွေးနွေးခြင်း၊ ဆန်စက်မှထွက်ရှိသော ဆန်များထုတ်ကုန်လုံခြုံ စိတ်ချရမှုရှိအောင် ဈေးကွက်ဖြန့်ချီနေမှုနှင့် ဆန်တင်ပိုမှုအခြေအနေများ ဆန်လက်ကျန်၊ စပါးလက်ကျန် အခြေအနေကို မေးမြန်းလေ့လာခဲ့ပြီး ဆန်/စပါး သိုလှောင်ရုံအား ကြည်ရှုစစ်ဆေးရာ မှတ်ပုံတင်ထားရှိပြီး ဖြစ်ကြောင်း စစ်ဆေးတွေ့ရှိရပြီး ဆန်စက်မှ ကုန်ဈေးနှုန်း တည်ငြိမ်စေရေး ပြည်သူများအား သတ်မှတ်ရည်ညွှန်းဈေးဖြင့် ရောင်းချနေမှုကို ကြည့်ရှုစစ်ဆေးခဲ့သည်။ မြို့နယ်အတွင်း ဆန်ဈေးနှုန်းကြီးမြင့်မှုမရှိစေရေး သတ်မှတ်ချက်များနှင့်အညီဆောင်ရွက်ရန် ဆန်စက်လုပ်ငန်းလိုအပ်ချက်များရှိပါက အကြံပြုဆွေးနွေး၍ လုပ်ငန်းအဆင်ပြေချောမွေ့နိုင်စေရန် MSMEs လုပ်ငန်း ဖွံ့ဖြိုးတိုးတက်စေရန် ချိတ်ဆက်ဆောင်ရွက်ပေးနိုင်သည့် နည်းလမ်းများကို ထည့်သွင်းဆွေးနွေးခဲ့ကြောင်း သိရသည်။

DOCA(ဧရာဝတီ)

    ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ စက်သုံးဆီအရောင်းဆိုင်များအား စက်သုံးဆီရောင်းချနေမှုအခြေအနေအား ဩဂုတ်လ ၁၇ရက်၊ နံနက် (၀၈း၀၀) နာရီအချိန်တွင် ပဲခူး-ရန်ကုန် ကားလမ်းမကြီးဘေး ဝဲ၊ ယာ သုံးခွမြို့နယ်၊ ရပ်ကွက်၊ ကျေးရွာများရှိ စက်သုံးဆီအရောင်းဆိုင်များသို့ ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်းသိရသည်။

     ထိုသို့ကွင်းဆင်းစစ်ဆေးခဲ့ရာတွင် သုံးခွမြို့နယ်စီမံအုပ်ချုပ်ရေးအဖွဲ့၊ မြို့နယ်စည်ပင်သာယာရေးအဖွဲ့၊ မြို့နယ်မီးသတ်ဦးစီးဌာနနှင့် မြို့နယ်စားသုံးသူရေးရာဦးစီးဌာနတို့ပူးပေါင်းအဖွဲ့သည် ပဲခူး-ရန်ကုန် ကားလမ်းမကြီးဘေး ဝဲ၊ ယာရှိ Apex (ရတနာ) စက်သုံးဆီဆိုင်၊ ဆိပ်ကမ်းသာစက်သုံးဆီဆိုင်နှင့် Galaxy စက်သုံးဆီဆိုင်များတွင် စက်သုံးဆီအမျိုးအစားအလိုက် ဆီကားဝင်ရောက်ရှိမှုအခြေအနေ၊ စက်သုံးဆီအမျိုးအစားအလိုက် ဖြန့်ဖြူးရောင်းချနေမှုအခြေအနေ၊ ကားများ၊ ဘေးတွဲဆိုင်ကယ်များ တန်းစီဝယ်ယူနေမှုအခြေအနေ၊ စက်သုံးဆီအမျိုးအစားအလိုက် ဆီပြတ်လပ်မှုရှိ/မရှိအခြေအနေတို့နှင့် ဆီအမျိုးအစားအလိုက် လက်ကျန်ဆီစာရင်းတို့ကို ကောက်ယူကွင်းဆင်းစစ်ဆေးခဲ့ကြောင်း စက်သုံးဆီသိုလှောင်ကန်များတွင် ဆီရှိပါလျက် အမှန်တကယ်ဖြန့်ဖြူးရောင်းချခြင်းများမရှိဘဲ မသမာသည့်လုပ်ဆောင်မှုနှင့် မှောင်ခိုရောင်းချခြင်းများမပြုလုပ်ကြရန် အသိပညာပေးပြောကြားခဲ့ပြီး စက်သုံးဆီဆိုင်ကြီးများ၏ စက်သုံးဆီဖြန့်ဖြူးရောင်းချနေမှုအခြေအနေအား ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ စည်ပင်သာယာမြို့မဈေးအတွင်း/အပြင်နှင့် ရပ်ကွက်များတွင် စားသုံးဆီအမျိုးမျိုးရောင်းချနေသည့် ကုန်မျိုးစုံဆိုင်နှင့် ကုန်ခြောက်ဆိုင်များသို့ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၏ ညွှန်ကြားချက်အရ "ကြောက်စရာဆီတွေ" ခေါင်းစဉ်နှင့်ရေးသားထားသော ဝက်ဆီဆတ်ကြော်ရာမှ ထွက်လာသည့်ဝက်ဆီများ သုံးခွမြို့နယ်တွင် ထုတ်လုပ်နေခြင်းရှိ/မရှိနှင့် ဈေးကွက်အတွင်း ဖြန့်ဖြူးရောင်းချနေခြင်းများရှိ/မရှိတို့အား ဩဂုတ်လ ၁၇ရက်၊ နံနက် (၁၀း၃၀) နာရီအချိန်တွင် ဈေးကွက်အတွင်း ကွင်းဆင်းစစ်ဆေးခဲ့ကြောင်းသိရသည်။

     ထိုသို့ ဈေးကွက်အတွင်း ကွင်းဆင်းစစ်ဆေးခဲ့ရာတွင် စည်ပင်သာယာမြို့မဈေးတာဝန်ခံနှင့် စားသုံးသူရေးရာဦးစီးဌာန၊ မြို့နယ်တာဝန်ခံနှင့်ဝန်ထမ်းများပူးပေါင်း၍ စည်ပင်သာယာမြို့မဈေးအတွင်း/အပြင်နှင့် ရပ်ကွက်များတွင် စားသုံးဆီအမျိုးမျိုးရောင်းချနေသည့် ဈေးဆိုင်များသို့ စားအုန်းဆီများ၌ "ကြောက်စရာဆီတွေ" ခေါင်းစဉ်နှင့် လူမှုကွန်ရက်စာမျက်နှာပေါ်တွင် ဖော်ပြပါရှိသည့် ဝက်ဆီဖတ်ကြော်၍ ထွက်ရှိလာသောဝက်ဆီများအား ဝယ်ယူဖြန့်ဖြူးရောင်းချနေခြင်းရှိ/မရှိနှင့် သုံးခွမြို့နယ်အတွင်း ထုတ်လုပ်နေခြင်းရှိ/မရှိအား ဈေးကွက်အတွင်း မြေပြင်သတင်းရယူနိုင်ရေးအတွက် ကွင်းဆင်းစစ်ဆေးခဲ့ရာတွင် သုံးခွမြို့နယ်ရှိ စားသုံးဆီအမျိုးမျိုးဖြန့်ဖြူးရောင်းချနေသောဆိုင်များတွင် ကုန်အညွှန်းအမှတ်အသားပြည့်စုံစွာဖော်ပြပါရှိသော ဘူးဆီများနှင့် သက်မှတ်ခွဲတမ်းရရှိထားသည့် စားအုန်းဆီများကိုသာ ဝယ်ယူဖြန့်ဖြူးရောင်းချပေးလျက်ရှိကြောင်း စစ်ဆေးတွေ့ရှိခဲ့ရပြီး ဝက်ဆီဖတ်ကြော်၍ ထွက်ရှိလာသောဝက်ဆီများကို ဝယ်ယူ ဖြန့်ဖြူးရောင်းချခြင်းများမပြုလုပ်ကြရန် ဈေးဆိုင်များတွင် အသိပညာပေးပြောကြားခဲ့ပြီး မြေပြင်ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

    ဖျာပုံခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူးဦးစိုးမင်းထိုက်၊ ဦးစီးမှူးဒေါ်ကေသွယ်ဝင်းနှင့် ဝန်ထမ်းများသည်  ဒေးဒရဲမြို့၊ တော်တနီးရပ်ကွက်  အ.မ.က ကျောင်းရှိ ဆရာ/ဆရာမနှင့် ကျောင်းသား/သူများအား ၂၀၂၄ ခုနှစ်၊ ဩဂုတ်လ (၁၉) ရက်နေ့ ၊နေ့လယ် (၁၃:၀၀) နာရီအချိန်တွင် စားသုံးသူကာကွယ်ရေး  အသိပညာပေး ဟောပြောခဲ့ပါသည်။

    အဆိုပါ အသိပညာပေးဟောပြောပွဲတွင် ဖျာပုံခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူး ဦးစိုးမင်းထိုက်က တားမြစ်ဆိုးဆေးများအကြောင်း ၊ တာရှည်ခံဆိုးဆေးများ အသုံးပြုထားသော တရုတ်တံဆိပ်ပါ  မုန့်များ၊ သကြားလုံးများ၊ မှိုတက်အစားအစာများ (ဥပမာ- ပေါင်မုန့်)၊ ဒိတ်လွန်နေသော အချဉ်ထုပ်များနှင့် တွဲဖက်စားသုံးရန် မသင့်သော အစားအစာများအကြောင်းကို အသိပညာပေး ဟောပြောခဲ့ပါသည်။ ထို့အပြင် ကုန်အညွှန်းအမှတ်အသား ပြည့်စုံစွာဖော်ပြထားသော အစားအစာနှင့် ကုန်ပစ္စည်းများကိုဝယ်ယူသုံးစွဲမှသာ ကျန်းမာရေးကောင်းမွန်ပြီး ကင်ဆာရောဂါဖြစ်ခြင်းမှ ကြိုတင်ကာကွယ်နိုင်မည်ဖြစ်ကြောင်း၊ အချိုမှုန့်နှင့် စားအုန်းဆီများကို လျော့ချစားသောက်မှသာ ကျန်းမာပျော်ရွှင်ပြီး နောင်အနာဂတ်တွင် နိုင်ငံတော်အတွက် အကျိုးပြုနိုင်သော ကြယ်ပွင့်ကလေးများ ဖြစ်စေလိုကြောင်း အသိပညာပေး ဟောပြောခဲ့ပြီး ကျောင်းမုန့်ဈေးတန်းတွင် ရောင်းချနေသော မုန့်များကိုလည်း စစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)