သတင်းနှင့် လှုပ်ရှားမှုများ

မုဒုံမြို့၌ လက်ရက်ကန်း ခြောက်လသင်တန်း ဒုတိယအကြိမ်စတင်ဖွင့်လှစ်

မွန်ပြည်နယ် မုဒုံမြို့နယ်တွင် အသေးစား စက်မှုလက်မှုလုပ်ငန်းဦးစီးဌာန ရက်ကန်းနှင့်အသက်မွေးပညာသင်တန်းကျောင်း၌ လက်ရက်ကန်း ခြောက်လသင်တန်းကို ဇူလိုင် ၁ ရက်နေ့မှ စတင်ကာ ဖွင့်လှစ်သင်ကြားပေးလျက်ရှိကြောင်း သိရှိရသည်။

အသေးစားစက်မှုလက်မှုလုပ်ငန်းများ ထွန်းကားလာစေခြင်းဖြင့် နိုင်ငံစီးပွားရေးနှင့် (MSME) လုပ်ငန်းများ ဖွံ့ဖြိုးတိုးတက်မှုကို အထောက်အကူဖြစ်စေရန် ၊ သဘာဝဆိုးဆေးကို အခြေခံ၍ အဝတ်အထည် အသုံးအဆောင်ပစ္စည်းများ တန်ဖိုးမြှင့်ထုတ်လုပ်နိုင်စေရန်၊ ရက်ကန်းပညာရပ်များ တိမ်ကောပပျောက်မှုမရှိစေရန်၊ ရက်ကန်းလုပ်ငန်းများ ကျွမ်းကျင်စွာ တတ်မြောက်ခြင်းဖြင့် ကျေးလက်နေပြည်သူများ အလုပ်အကိုင် အခွင့်အလမ်းရရှိစေပြီး တစ်ပိုင်တစ်နိုင် စီးပွားရေးလုပ်ငန်းများ တိုးပွားလာစေရန်နှင့် ယင်းလုပ်ငန်းများ လိုအပ်သော နည်းပညာ အထောက်အပံ့များ ဆောင်ရွက်ပေးနိုင်ရန်အတွက် လက်ရက်ကန်းသင်တန်းအား ဖွင့်လှစ်သင်ကြားပေးခြင်းဖြစ်ကြောင်း ကျောင်းအုပ်ဆရာမကြီး ဒေါ်မြတ်ဇာခြည်ကျော်က ပြောသည်။

အဆိုပါ လက်ရက်ကန်းခြောက်လသင်တန်းတွင် နည်းပြဆရာမ (၃) ဦးတို့မှ အထည်ခွဲ စိတ်လေ့လာခြင်း၊ အဖြူချွတ်ဆေးဆိုး၊ အထည်ဒီဇိုင်း၊ လက်ချည်မျှင်ဆွဲ၊ ရိုးရာဂျပ်ခုတ် ဘာသာရပ်များနှင့် စက်ချုပ်၊ ဖဲနှပ်ကောက် စသည့်ပညာရပ်တို့ကို သင်ကြားပေးသွားမည် ဖြစ်ရာ သင်တန်းသား (၁၀) ဦး တက်ရောက်လျက်ရှိကြောင်း သိရသည်။

DOCA(မွန်)

မုဒုံမြို့နယ် ကော့ခလွယ် အခြေခံပညာမူလွန်ကျောင်း၌ စားသုံးသူကာကွယ်ရေး အသိပညာပေးဟောပြောပွဲကျင်းပ

သတင်းနှင့် လှုပ်ရှားမှုများ

၅.၇.၂၀၂၄ ရက်နေ့ စားသုံးသူရေးရာဦးစီးဌာန၊ မော်လမြိုင်ခရိုင်၊ မုဒုံမြိုနယ် တာဝန်ခံသည် မုဒုံမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ ပူးပေါင်း၍ မုဒုံမြို့နယ် ကော့ခလွယ်၊ အခြေခံပညာမူ/လွန်ကျောင်း၌ စားသုံးသူကာကွယ်ရေးဆိုင်ရာ အသိပညာပေး ဟောပြောဆွေးနွေးပွဲ ကျင်းပခဲ့ပါသည်။

အဆိုပါ ဟောပြောဆွေးနွးပွဲတွင် မုဒုံမြို့နယ် အခြေခံပညာ မူ/လွန်ကျောင်း ကျောင်းအုပ်ဆရာမကြီးမှ အဖွင့်အမှာစကားပြောကြားခဲ့ပြီး မုဒုံမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာန မြို့နယ်ဦးစီးအရာရှိမှ စာဖတ်ခြင်း၏ အကျိုးကျေးဇူးများ၊ လူကုန်ကူးမှု အန္တရာယ်တားဆီးကာကွယ်ရေးဆိုင်ရာ အကြောင်းအရာများ၊ မူးယစ်ဆေးဝါး အန္တရာယ်တားဆီးကာကွယ်ရေး အကြောင်းအရာများ ဟောပြောဆွေးနွေးခဲ့ပြီး စားသုံးသူရေးရာဦးစီးဌာန၊ မုဒုံမြို့နယ်တာဝန်ခံမှလည်း ဦးစီးဌာန၏ ရည်မှန်းချက်၊ မျှော်မှန်းချက်များ၊ စားသုံးသူအကာအကွယ်ပေးရေး ဥပဒေပါ ပြဌာန်းချက်များဖြစ်သည့် စားသုံးသူအခွင့်အရေးနှင့် တာဝန်များ၊ ကုန်ညွှန်းအမှတ်အသားနှင့်ပတ်သက်သည့် ဥပဒေပါ ပြဌာန်းချက်များ၊ ကုန်စည်နှင့်ဝန်ဆောင်မှုများအား ရွေးချယ်ဝယ်ယူသုံးစွဲရာတွင် သတိပြုရမည့်အချက်များ၊ စားသုံးသူနစ်နာဆုံးရှုံးမှုများ ဖြစ်ပေါ်ပါက တိုင်ကြားနိုင်သည့် နည်းလမ်းများအား ဟောပြောဆွေးနွေးပြီး နံရံကပ်စာစောင်များ ပြသခြင်း အသိပညာပေး ဆောင်ရွက်ခဲ့ပြီး ဟောပြောပွဲသို့ ဆရာ/ဆရာမ (၅)ဦးနှင့် ကျောင်းသား/ကျောင်းသူ (၁၂၅)ဦး တက်ရောက်ခဲ့ပါကြောင်း သိရှိရသည်။

DOCA(မွန်)

မွန်ပြည်နယ်ဝန်ကြီးချုပ် မျိုးစေ့ချကိရိယာများ ထောက်ပံ့ပေးအပ်ခြင်းနှင့် ကွင်းသရုပ်ပြပွဲတက်ရောက်

သတင်းနှင့် လှုပ်ရှားမှုများ

မွန်ပြည်နယ် မုဒုံမြို့နယ်တွင် ပြည်နယ်အစိုးရအဖွဲ့၏ အစီအစဥ်ဖြင့် မျိုးစေ့ချကိရိယာ Drum Seeder များ ထောက်ပံ့ပေးအပ်ခြင်း၊ မိုးစပါးများ စိုက်စနစ်မှန်ကန်ရေးအတွက် Drum Seeder ၊ လက်ဆွဲကောက်စိုက်စက်နှင့် ကောက်စိုက်စက်များဖြင့် စိုက်ပျိုးခြင်း ကွင်းသရုပ်ပြပွဲကို ၅.၇.၂၀၂၄ ရက်နေ့က ဝက်တဲကျေးရွာ၌ ကျင်းပရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်အစိုးရအဖွဲ့ဝင်ဝန်ကြီးများ၊ တာဝန်ရှိသူ များတက်ရောက်ခဲ့ကြောင်း သိရှိရသည်။

ဦးစွာ ပြည်နယ်ဝန်ကြီးချုပ်မှ ကြဲခင်းစနစ် စိုက်ပျိုးခြင်းထက် စက်ကိရိယာများ ပိုမို အသုံးပြုစိုက်ပျိုးနိုင်ရန်၊ တောင်သူများ မျိုးစေ့ကုန်ကျမှုသက်သာပြီး အလေအလွင့် မရှိစေရန်နှင့် အချိန်လုပ်အားခ လျော့ချနိုင်ရန် ပြည်နယ်အစိုးရအနေဖြင့် ပြည်နယ်တစ်ခုလုံးအတွက် တိုက်ရိုက်မျိုးစေ့ချကိရိယာ Seeder (၅၈၀) လက်ကို ထောက်ပံ့ ပေးအပ်ခဲ့ရာ မုဒုံမြို့နယ်အနေဖြင့် (၆၀)လက်ကို တောင်သူများထံ ထောက်ပံ့ပေးအပ်မည်ဖြစ်ကြောင်း၊ ပြည်နယ်အတွင်း စိုက်ပျိုးရေးကဏ္ဍ ဖွံ့ဖြိုးတိုးတက်စေရေး သီးနှံအထွက်နှုန်း အရည်အသွေးကောင်းမွန်သည့် ထုတ်ကုန်များ ထုတ်လုပ်နိုင်စေခြင်းဖြင့် တောင်သူများ ဝင်ငွေတိုးစေရန်အတွက် တာဝန်ရှိသူများမှ အဘက်ဘက်က ဖြည့်ဆည်းဆောင်ရွက်ပေးလျက်ရှိသလို တောင်သူများမှလည်း အင်တိုက်အားတိုက် ကြိုးစားဆောင်ရွက်ပေးစေလိုကြောင်း အမှာစကား ပြောကြားခဲ့သည်။

ထို့နောက် စိုက်ပျိုးရေးဦးစီးဌာန မုဒုံမြို့နယ်ဦးစီးမှူး ဦးငြိမ်းချမ်းကျော်မှ လုပ်ငန်းဆောင်ရွက်မှု အခြေအနေများအား ရှင်းလင်းတင်ပြရာ ပြည်နယ်ဝန်ကြီးချုပ်က လိုအပ်သည်များကို လမ်းညွှန်မှာကြားသည်။ ဆက်လက်၍ ပြည်နယ်အစိုးရအဖွဲ့မှ မျိုးစေ့ချကိရိယာများကို အကျိုးဆောင်တောင်သူများထံပေးအပ်ခဲ့ပြီး လက်စွဲကောက်စိုက်စက်နှင့် ကောက်စိုက်စက်ဖြင့် လက်တွေ့စိုက်ပျိုးခြင်းများကို ကြည့်ရှုအားပေးကာ တောင်သူများအား ရင်းရင်းနှီးနှီးလိုက်လံနှုတ်ဆက်ခဲ့ကြောင်း သိရသည်။

DOCA(မွန်)

ပြည်နယ်ဦးစီးမှူးသည် ဆန်ကုန်သည်များနှင့် တွေ့ဆုံဆွေးနွေး

သတင်းနှင့် လှုပ်ရှားမှုများ

၅.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ဆန်ကုန်သည်များနှင့် တွေ့ဆုံ၍ ဆန်များအား ရည်ညွှန်းဈေးနှုန်းဖြင့် ရောင်းချနိုင်ရေး ဆွေးနွေးခဲ့ကြောင်း သိရှိရပါသည်။

ထိုသို့ဆွေးနွေးရာတွင် ပြည်နယ်ဦးစီးမှူးက ဆန်ကုန်သည်များအား စားသုံးသူပြည်သူများ သင့်တင့်မျှတသည့် ဈေးနှုန်းဖြင့် ဝယ်ယူစားသုံးနိုင်ရေးအတွက် မြန်မာနိုင်ငံဆန်စပါး အသင်းချုပ် MRF မှသတ်မှတ်ထုတ်ပြန်ထားသည့် ဈေးနှုန်းများအတိုင်း လိုက်နာရောင်းချကြရန်နှင့် ကွာဟမှုမရှိသည့် သင့်တင့်မျှတသော ဈေးနှုန်းများဖြင့် အများပြည်သူများသို့ ရောင်းချစေရေး ဆွေးနွေးခဲ့ကြောင်း သိရှိရပါသည်။

DOCA(မွန်)

မော်လမြိုင်မြို့ပေါ်ရှိ ဆန်ဆိုင်များတွင် ရည်ညွှန်းဈေးနှုန်းဖြင့် ရောင်းချခြင်း ရှိ/မရှိ ကွင်းဆင်းစစ်ဆေးခြင်း

သတင်းနှင့် လှုပ်ရှားမှုများ

၈.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ဆန်ဈေးနှုန်းမြှင့်တင်ရောင်းချခြင်းစိစစ်ရေးအဖွဲ့နှင့်အတူ မော်လမြိုင်မြို့ပေါ်ရှိ ဆန်ဆိုင်များတွင် ရည်ညွှန်းဈေးနှုန်းဖြင့် ရောင်းချခြင်း ရှိ/မရှိ ကွင်းဆင်းစစ်ဆေးခဲ့ကြောင်း သိရှိရသည်။

ထိုသို့ ကွင်းဆင်းစစ်ဆေးဆောင်ရွက်ရာတွင် မော်လမြိုင်မြို့ပေါ်ရှိ ဆန်လက်လီ၊ လက်ကားရောင်းချလျက်ရှိသော ဆန်ဆိုင်များတွင် ရည်ညွှန်းဈေးနှုန်းဖြင့် ရောင်းချခြင်း ရှိ/မရှိ စစ်ဆေးခဲ့ရာ မြန်မာနိုင်ငံဆန်စပါးအသင်းချုပ် MRF မှသတ်မှတ်ထုတ်ပြန်ထားသည့် ဈေးနှုန်းများအတိုင်း ရောင်းချလျက်ရှိကြောင်း၊ ဆိုင်ရှင်များအား ပြည်သူများသို့ ဆန်များ ရောင်းချရာတွင် ဈေးနှုန်းအဆမတန်မြှင့်တင်ရောင်းချခြင်း မပြုရန်၊ သင့်တင့်မျှတသော ဈေးနှုန်းဖြင့်သာ ရောင်းချရန် ပြောကြားခဲ့ကြောင်း သိရှိရပါသည်။

DOCA(မွန်)

တောင်ကြီးမြို့နယ်အတွင်း စက်သုံးဆီအရောင်းဆိုင်များ တရားမဝင်ရောင်းချမှုမရှိစေရေး ကွင်းဆင်းစစ်ဆေးခြင်း

သတင်းနှင့် လှုပ်ရှားမှုများ

ရှမ်းပြည်နယ်(တောင်ပိုင်း)၊ တောင်ကြီးခရိုင်၊ ‌တောင်ကြီးမြို့နယ်အတွင်းရှိ စက်သုံးဆီအရောင်းဆိုင်များတွင် တရားမဝင်ရောင်းချမှုမရှိစေရေး၊ စက်သုံးဆီအမျိုးအစားမှန်ကန်မှု၊ သတ်မှတ်စျေးနှုန်း၊ လီတာ (သို့) ဂါလံပြည့်ရောင်းချမှုရှိ/မရှိအခြေအနေများအား ၄-၇-၂၀၂၄ ရက်နေ့တွင် ရေနံထွက်ပစ္စည်းကြီးကြပ်စစ်ဆေးရေးဦးစီးဌာနဦးဆောင်၍ မြို့နယ်စည်ပင်သာယာရေးဌာန၊ စားသုံးသူရေးရာဦးစီးဌာန၊ အထွေထွေအုပ်ချုပ်ရေးဦးစီးဌာန၊ မီးသတ်ဦးစီးဌာနနှင့် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနတို့ပူးပေါင်းအဖွဲ့တာဝန်ရှိသူများက စက်သုံးဆီအရောင်းဆိုင် (၁၄) ဆိုင်များသို့သွားရောက်ကာ ကွင်းဆင်းစစ်ဆေးခြင်းများဆောင်ရွက်ခဲ့ကြောင်းသိရသည်။

ထိုသို့ စက်သုံးဆီအရောင်းဆိုင်များအားစစ်ဆေးရာတွင် 92 (Octane)၊ 95 (Octane)၊ ဒီဇယ် Premiun၊ ဒီဇယ်(ရိုးရိုး)ရောင်းချသည့် ဆီပန့်များတွင် စက်သုံးဆီအမျိုးအစား၊ သတ်မှတ်စျေးနှုန်းမှန်/မမှန်နှင့် ချင်တွယ်ရောင်းချသည့်လီတာ (သို့) ဂါလံပြည့်/မပြည့်၊ စက်သုံးဆီများရောင်းချမှုရပ်တန့်မှုမရှိစေရေး၊ မှောင်ခိုဈေးကွက်မဖြစ်ပေါ်စေရေး၊ သတ်မှတ်ရည်ညွှန်းဈေးနှုန်းများအတိုင်း ရောင်းချစေရေး၊ ဈေးနှုန်းများမြှင့်တင်ရောင်းချပါက အပြစ်ပေးအရေးယူမှုများဆောင်ရွက်နိုင်ရေး၊ စက်သုံးဆီပြတ်လပ်မှုမရှိစေရေး၊ မီးဘေးအန္တရာယ်ကြိုတင်ကာကွယ်ရေးအတွက် လိုက်နာဆောင်ရွက်ရမည့်အချက်များ ဆွေးနွေးမှာကြားခဲ့ကြောင်း သတင်းရရှိပါသည်။

DOCA(ရှမ်း)

သံဖြူဇရပ်မြို့နယ်တာဝန်ခံမှ ဆန်စက်လုပ်ငန်းရှင်များနှင့် တွေ့ဆုံ

သတင်းနှင့် လှုပ်ရှားမှုများ

(၃.၇.၂၀၂၄) ရက်နေ့တွင် စားသုံးသူရေးရာဦးစီးဌာန၊ သံဖြူဇရပ်မြို့နယ်တာဝန်ခံနှင့် ပြည်နယ်ဦးစီးမှူးရုံးမှ ဝန်ထမ်းများသည် သံဖြူဇရပ်မြို့နယ်၊ ပငကျေးရွာရှိ အေးဆန်စက်လုပ်ငန်းရှင်နှင့် တွေ့ဆုံဆွေးနွေးခဲ့သည်။

ထိုသို့တွေ့ဆုံရာတွင် သံဖြူဇရပ်မြို့နယ်တာဝန်ခံက လုပ်ငန်းရှင်အား ဆန်ကြိတ်ခွဲနိုင်မှု၊ ကုန်ကြမ်းဝယ်ယူစုဆောင်းမှု၊ ဖြန့်ဖြူးမှု၊ လုပ်သားအခြေအနေများအား ဆွေးနွေး မေးမြန်းရာ လုပ်ငန်းရှင်က ကုန်ကြမ်းများကို မွန်ပြည်နယ်ဒေသတွင်းမှ ဝယ်ယူရရှိကြောင်း၊ ဒေသဆန်များကို အများဆုံးကြိတ်ခွဲကြောင်း၊ တစ်နေ့လျှင် စက်လည်ပတ်ချိန် (၆) ခန့်သာ လည်ပတ်ကြောင်း၊ ဆန်များကို သံဖြူဇရပ်မြို့ပေါ်၌ ဖြန့်ဖြူးရောင်းချကြောင်း ပြန်လည်ဆွေးနွေးခဲ့ပါသည်။ ဆက်လက်၍ သံဖြူဇရပ်မြို့နယ် တာဝန်ခံက ဆန်စက်ပိုင်ရှင်အား ဆန်စပါးသိုလှောင်ရုံပိုင်ရှင်များအနေဖြင့် ဆန်တန်ချိန် (၅၀) နှင့် အထက်ဖြစ်ပါက Myanmar Rice Online (MyRo) တွင်မဖြစ်မနေ မှတ်ပုံတင်ရမည်ဖြစ်ကြောင်း၊ MyRo တွင် မှတ်ပုံတင်ပြီးလျှင် ကုန်ရ/ကုန်ထုတ်/ ကုန်လက်ကျန် လချုပ် Update တိကျစွာ ဖော်ပြရမည်ဖြစ်ကြောင်း ဆွေးနွေးခဲ့ကြောင်း သိရှိရပါသည်။

DOCA(မွန်)

စားသုံးသူများ အကျိုးစီးပွားကာကွယ်ရေး အိမ်တွင်းမှုသင်တန်းကျောင်းသို့ အသိပညာပေး

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ပခုက္ကူခရိုင်ဦးစီးမှူးရုံး၏ အနီးကပ်ကြီးကြပ်မှုဖြင့် ဒုတိယဦးစီးမှူး ဒေါ်နွယ်နွယ်အေးနှင့်ဝန်ထမ်းများသည် (၅-၇-၂၀၂၄)ရက်နေ့၊ နံနက်(၀၉:၀၀)နာရီအချိန်တွင် နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း၌ စားသုံးသူကာကွယ်ရေးအသိပညာပေးဟောပြောပွဲကျင်းပပြုလုပ်ခဲ့ပါသည်။

အဆိုပါအသိပညာပေးဟောပြောပွဲတွင် စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးက ဌာန၏သမိုင်းကြောင်းနှင့် လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေပါအကြောင်းအရာများ၊ သင်တန်းသူများအနေဖြင့် လူကောင်းများဖြစ်ရန် အသိပညာများလိုအပ်ပြီး၊ လူတော်များဖြစ်ရန်အတွက် မိမိတို့လုပ်ကိုင်နေသော အိမ်တွင်းလက်မှုပညာများကို သင်ကြားမှုတွင်သာမဟုတ်ဘဲ ကျွမ်းကျင်စွာလုပ်ဆောင်နိုင်ရန်အတွက် လေ့လာရသကဲ့သို့ နောင်တစ်ချိန်တွင် မိမိတို့ရည်မှန်းချက်များအရ စီးပွားရေးလုပ်ငန်းရှင်များ(ဒီဇိုင်နာများ)ဖြစ်နိုင်သည့်အတွက် စီးပွားရေးလုပ်ငန်းရှင်၏တာဝန်များတွင် ခွဲခြားဆက်ဆံမှုမရှိဘဲ ဖြောင့်မတ်မှန်ကန်စွာနေထိုင်စေလိုကြောင်း၊ ကတိပြုထားသည့်အတိုင်း တာဝန်ယူမှု/ တာဝန်ခံမှုရှိသော လုပ်ငန်းရှင်များဖြစ်လာစေလိုကြောင်း၊ စီးပွားရေးကျင့်ဝတ်၊ စည်းကမ်းနှင့်အညီ နေထိုင်သွားမည်ဆိုပါက အကျိုးစီးပွားများပိုမိုဖြစ်ထွန်းလာနိုင်သောကြောင့် လိုက်နာစေလိုကြောင်း၊ Online Shopping သုံးစွဲခြင်းနှင့်ပတ်သက်၍ အကျိုးရှိပုံများဖြစ်ပေါ်လာနိုင်သည့်ဆိုးကျိုးများအား အကျယ်တဝင့်ရှင်းလင်းဆွေးနွေးခဲ့ပါသည်။

ဆက်လက်၍ ဒုတိယဦးစီးမှူး ဒေါ်တင်တင်မော်က ပြည်သူတိုင်းတွင် စားသုံးသူအခွင့်အရေးများရှိ၍ သိရှိရန်လိုအပ်ကြောင်း၊ ကုန်စည်နှင့်ဝန်ဆောင်မှုများကို ရွေးချယ်ဝယ်ယူအသုံးပြုရာတွင် လိုအပ်သောသတင်းအချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာ (သို့မဟုတ်) အထောက်အထားရယူထားရှိခြင်းမှာ အရေးကြီးကြောင်း၊ အမှန်တကယ်နစ်နာဆုံးရှုံးမှုများဖြစ်ပေါ်ပါက မိမိတို့ဌာနသို့ တိုင်ကြားစေခြင်းဖြင့် ကုစားခွင့်များရရှိမည်ဖြစ်ကြောင်း၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)များဖွင့်လှစ်ထားရှိကြောင်း အသေးစိတ်ရှင်းလင်းဆွေးနွေးခဲ့ပါသည်။

၎င်းနောက်ဒုတိယဦးစီးမှူး ဒေါ်သူဇာကျော်က ကုန်စည်များကိုဝယ်ယူသုံးစွဲရာ၌ သတိပြုရမည့် ကုန်အညွှန်းအမှတ်အသားများနှင့်စပ်လျဉ်းသည့် သိရှိရမည့်သတင်းအချက်အလက်များ၊ စားသုံးသူ ထိခိုက်နစ်နာမှုနှင့်စပ်လျဉ်း၍ တိုင်ကြားခြင်းနှင့် ကုစားပေးခဲ့မှုများအကြောင်း၊ တိုင်ကြားနိုင်သည့်နေရာများနှင့် နည်းလမ်းများအကြောင်း၊ စားသုံးသူရေးရာကိစ္စများစုံစမ်းမေးမြန်းရန်အတွက် Consumer Call Center (၁၅၃၅)အားဖွင့်လှစ်ထားကြောင်း အကျယ်တဝင့်ဆွေးနွေးခဲ့ပြီး စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)

မော်လမြိုင်မြို့နယ်တာဝန်ခံနှင့် ဝန်ထမ်းများ ဆန်/စပါးသိုလှောင်ရုံများသို့ ကွင်းဆင်းစစ်ဆေး

သတင်းနှင့် လှုပ်ရှားမှုများ

(၈.၇.၂၀၂၄) ရက်နေ့တွင် စားသုံးသူရေးရာဦးစီးဌာန၊ မော်လမြိုင်မြို့နယ် တာဝန်ခံနှင့် ဝန်ထမ်းများသည် မော်လမြိုင်မြို့ပေါ်ရှိ ဆန်သိုလှောင်ရုံများအား Myanmar Rice Online (MyRo) တွင် မှတ်ပုံတင်နိုင်ရေးအတွက် ကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရှိရသည်။

ထိုသို့ ကွင်းဆင်းစစ်ဆေးရာတွင် ဆန်သိုလှောင်ရုံ (၁၆) ရုံအား စစ်ဆေးခဲ့ပြီး သိုလှောင်ရုံအတိုင်းအတာ၊ အမိုး၊ အကာ၊ အခင်း၊ သိုလှောင်ရုံဝင်ဆန့်နိုင်မှုအခြေအနေများ၊ လက်ရှိသိုလှောင်ထားမှု အခြေအနေများအား စစ်ဆေးခဲ့သည်။ ထို့နောက် မော်လမြိုင်မြို့နယ် တာဝန်ခံက ဆန်သိုလှောင်ရုံပိုင်ရှင်များအား MyRo တွင် မှတ်ပုံတင်ပြီးလျှင် ကုန်ရ/ကုန်ထုတ်/ ကုန်လက်ကျန် လချုပ် Update တိကျစွာ ဖော်ပြရမည်ဖြစ်ကြောင်း ဆွေးနွေးခဲ့ကြောင်း သိရှိရပါသည်။

DOCA(မွန်)

ဂန့်ဂေါမြို့အတွင်းရှိ ဆေးဝါးနှင့်ကုန်မျိုးစုံရောင်းဝယ်ရေးဆိုင်များအား ဈေးကွက်စောင့်ကြည့်စစ်ဆေး

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံးမှ ဒုတိယဦးစီးမှူး ဒေါ်ဇာဇာချိုဦးနှင့်ဝန်ထမ်းသည် (၅-၇-၂၀၂၄) ရက်နေ့၊ နံနက်(၀၉:၀၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ဂန့်ဂေါမြို့တွင်းရှိဆေးဝါးနှင့် ကုန်မျိုးစုံရောင်းဝယ်ရေးဆိုင်များ၌ ဈေးကွက်အတွင်း ကုန်ပစ္စည်းပြတ်လပ်မှုမရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှပပျောက်စေရေးအတွက် ဈေးကွက်စောင့်ကြည့်စစ်ဆေးခဲ့ပါသည်။

ထိုသို့ဈေးကွက်စောင့်ကြည့်စစ်ဆေးခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်း ရောင်းချနေသောကုန်စည်များတွင် ကုန်စည်အမျိုးအစားအလိုက် ကုန်အညွှန်းအမှတ်အသားများပြည့်စုံမှန်ကန်စွာဖော်ပြထားရှိခြင်းရှိ/မရှိတို့ကိုစစ်ဆေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ထုတ်ပြန်ကြော်ငြာထားသော ညွှန်ကြားချက်အမှတ်(၂/၂၀၁၉)နှင့်အညီ မြန်မာဘာသာဖြင့် ပြည့်စုံစွာဖော်ပြထားရှိသော ကုန်စည်များကိုသာရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ကြရန်၊ ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသော ကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်နှင့် စီးပွားရေးလုပ်ငန်းရှင်၏တာဝန်များ၊ ပြစ်မှု၊ ပြစ်ဒဏ်များ၊ တားမြစ်ချက်များအကြောင်းကို အသိပညာပေးဆောင်ရွက်ခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)

Languages

Main menu

သတင်းနှင့် လှုပ်ရှားမှုများ

မုဒုံမြို့၌ လက်ရက်ကန်း ခြောက်လသင်တန်း ဒုတိယအကြိမ်စတင်ဖွင့်လှစ်

မုဒုံမြို့နယ် ကော့ခလွယ် အခြေခံပညာမူလွန်ကျောင်း၌ စားသုံးသူကာကွယ်ရေး အသိပညာပေးဟောပြောပွဲကျင်းပ

မွန်ပြည်နယ်ဝန်ကြီးချုပ် မျိုးစေ့ချကိရိယာများ ထောက်ပံ့ပေးအပ်ခြင်းနှင့် ကွင်းသရုပ်ပြပွဲတက်ရောက်

ပြည်နယ်ဦးစီးမှူးသည် ဆန်ကုန်သည်များနှင့် တွေ့ဆုံဆွေးနွေး

တောင်ကြီးမြို့နယ်အတွင်း စက်သုံးဆီအရောင်းဆိုင်များ တရားမဝင်ရောင်းချမှုမရှိစေရေး ကွင်းဆင်းစစ်ဆေးခြင်း

သံဖြူဇရပ်မြို့နယ်တာဝန်ခံမှ ဆန်စက်လုပ်ငန်းရှင်များနှင့် တွေ့ဆုံ

စားသုံးသူများ အကျိုးစီးပွားကာကွယ်ရေး အိမ်တွင်းမှုသင်တန်းကျောင်းသို့ အသိပညာပေး

မော်လမြိုင်မြို့နယ်တာဝန်ခံနှင့် ဝန်ထမ်းများ ဆန်/စပါးသိုလှောင်ရုံများသို့ ကွင်းဆင်းစစ်ဆေး

ဂန့်ဂေါမြို့အတွင်းရှိ ဆေးဝါးနှင့်ကုန်မျိုးစုံရောင်းဝယ်ရေးဆိုင်များအား ဈေးကွက်စောင့်ကြည့်စစ်ဆေး

Pages

You are here

သတင်းနှင့် လှုပ်ရှားမှုများ

Pages