ပြည်တွင်းကုန်သွယ်မှုသတင်း

           ရန်ကုန်တိုင်းဒေသကြီး၊ မြောက်ပိုင်းခရိုင် တိုက်ကြီးမြို့နယ်တွင် တောင်သူလယ်သမားများက နွေစပါး၊ အခြားသီးနှံစိုက်ပျိုးထုတ်လုပ်နိုင်ရန်အတွက် ယူရီးယားဓါတ်မြေဩဇာများကို လအလိုက် အထူးဈေးနှုန်းဖြင့် ရောင်းချပေးလျက်ရှိပါတယ်။ ယူရီးယားဓါတ်မြေဩဇာကားများ ဝင်ရောက်လာမှုအား အိတ်အရေအတွက်၊ တန်၊ ဝိတ်ချိန်ပြည့်ဝမှုရှိ/မရှိ သေချာစွာ စိစစ်လက်ခံ၍ တောင်သူလယ်သမားများသို့ ကျေးရွာအုပ်စုအလိုက် အချိန်မီရရှိရေးကို ဆောင်ရွက်ပေးလျက်ရှိနေပါတယ်။

    ထိုသို့ဆောင်ရွက်ရာတွင် တိုက်ကြီးမြို့နယ်အတွက် ယူရီးယားဓါတ်မြေဩဇာတစ်အိတ် ဈေးနှုန်းမှာ (၃၂၀၀၀)ကျပ်ဖြစ်ပြီး ယူရီးယားဓါတ်မြေဩဇာခွဲတမ်းရရှိမှုမှာ တန်(၁၃၉၅.၂၅၀)၊ အိတ် (၂၇၉၀၅)ဖြစ်ပြီး ယနေ့အထိ လက်ခံရရှိမှု ယူရီးယားဓါတ်မြေဩဇာမှာ (၅၅၅)တန်၊ အိတ်(၁၁၀၉၉) အားရရှိပြီးဖြစ်ပါသည်။ ဖြန့်ဝေပြီးစီးပါကြောင်းနှင့် ထပ်မံဝင်ရောက်သည့်ကားများကိုလည်း ဆက်လက်တင်ပြဆောင်ရွက်နေပါကြောင်း သိရှိရပါတယ်။

DOCA(ရန်ကုန်)

                  အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ မတ်လ (၁၈)ရက်နေ့မှ မတ်လ (၂၄)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၃၀၀ မှ ၆၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၃၀၀ မှ ၉၀၀ အတွင်း၊ ပန်းဂေါ်ဖီ(ထုပ်)ကျပ် ၂၀၀ မှ ၆၀၀ အတွင်း၊ အာလူး(ပိဿာ)ကျပ် ၁၅၀၀ မှ ၂၅၀၀ အတွင်း၊ မုန်လာဥနီ(ပိဿာ) ကျပ် ၁၀၀၀ မှ ၁၅၀၀ အတွင်း၊ ရွှေဖရုံသီး(လုံး)ကျပ် ၈၀၀ မှ ၁၅၀၀ အတွင်း၊ ဗူးသီး(လုံး) ကျပ် ၅၀၀ မှ ၁၂၀၀ အတွင်း၊ မုန်ညှင်း(ထုပ်)(ပိဿာ)ကျပ် ၁၀၀၀ မှ ၁၅၀၀ အတွင်း၊ ကြက်သွန်နီ(ဆိပ်ဖြူ)ကျပ် ၅၀၀ မှ ၁၃၀၀ အတွင်း၊ ကြက်သွန်ဖြူ(ရှမ်း)(ပိဿာ) ၁၆၀၀ မှ ၃၀၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၄၅၀၀ မှ ၆၀၀၀ အတွင်း၊ ချင်း(ပိဿာ)ကျပ် ၆၀၀ မှ ၁၈၀၀ အတွင်း၊ ဆလပ်ရွက်(စီး)ကျပ် ၉၀ မှ ၂၀၀ အတွင်း၊ ချဉ်ပေါင်ရွက်(စီး) ကျပ် ၇၀ မှ ၁၀၀ အတွင်း၊ ခရမ်းသီး(ရှည်)(ပိဿာ)ကျပ် ၇၀၀ မှ ၁၃၀၀ အတွင်း၊ သံပရာသီး(လုံး)ကျပ် ၁၀၀ မှ ၂၃၀ အတွင်း၊ ငရုတ်သီးစိမ်း(ကျောက်စိမ်း)(ပိဿာ) ၁၀၀၀ မှ ၁၅၀၀ အတွင်း၊ ဖရဲသီး(အကြီး၊ အလတ်၊ အသေး)ကျပ် ၃၃၀၀ မှ ၇၀၀၀ အတွင်းဖြစ် ကြောင်း သိရှိရပါတယ်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၆၅၃၀၀)ကျော်၊ ခရမ်းသီး(ရှည်)(လုံး) (၁၆၂၀၀)ကျော်၊ ဗူးသီးအလုံးပေါင်း (၁၅၀၀၀) ကျော်၊ ရွှေဖရုံသီးအလုံးပေါင်း (၁၄၆၀၀)ကျော်၊ ဂေါ်ဖီထုပ်ပေါင်း (၁၇၁၀၀)ကျော်၊ ပန်းဂေါ်ဖီထုပ်ပေါင်း (၁၇၈၀၀)ကျော်၊ မုန်ညှင်းထုပ်(ပိဿာ)ပေါင်း (၁၇၄၀၀)ကျော်၊ ဖရဲသီးလုံးပေါင်း (၂၅၈၀၀)ကျော် အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

       ရန်ကုန်တိုင်းဒေသကြီး၊ လှိုင်မြို့နယ်၊ သီရိမင်္ဂလာဈေးတွင် မတ်လ(၁၅)ရက်နေ့မှ (၂၁) ရက်နေထိ ဖြစ်ပေါ်ခဲ့သော သစ်သီးဝလံဈေးနှုန်းများမှာ တိုက်ကြီးမှ ပိန္နဲသီး အလုံးကြီး ကျပ် ၂၀၀၀၀ မှ ၁၇၀၀၀၊ အလုံးလတ် ကျပ် ၁၅၀၀၀ မှ ၁၂၀၀၀၊ အလုံးသေးကျပ် ၁၀၀၀၀ မှ ၈၀၀၀၊  ဖျာပုံမှ နှင်းသီး (နှင်းပန်းသီး) အလုံးကြီး (အလုံး ၁၈၀ ပါ) ကျပ် ၉၀၀၊ ကျောင်းကုန်း၊ ခရမ်း၊ ဒိုက်ဦး၊ ဝေါမှ ဖရဲသီး( 855   )အလုံးကြီးကျပ် ၅၀၀၀၊ အလုံးလတ်ကျပ် ၃၅၀၀၊ အလုံးသေးကျပ် ၁၈၀၀၊ အသုတ်၊ ဝေါ မှ ဖရဲသီး (  211)    အလုံးကြီးကျပ် ၂၅၀၀၊ အလုံးလတ် ကျပ် ၂၀၀၀၊ အလုံးသေး ကျပ် ၁၀၀၀၊ မှော်ဘီ၊ တိုက်ကြီးမှ မာလကာသီး (ကီလို) အလုံးကြီး ကျပ် ၄၀၀၊ အလုံးလတ် ကျပ် ၃၀၀၊ အလုံးသေး ကျပ် ၂၀၀၊  ပြင်ဦးလွင် မှ စတော်ဘယ်ရီ ( ၅ ပိဿာတစ်ခြင်း) ကျပ် ၁၅၀၀၀ နှင့် (၁၈ ကျပ်သားဗူး) ကျပ် ၈၀၀၊ (၁၀ ကျပ်သားဗူး) ကျပ် (၅၀၀)၊ မအူပင် (ရွှေတောင်ပေါ်) မှ သရက်သီး (မချစ်စု) အလုံးကြီး တစ်ခြင်း ကျပ် ၃၈၀၀၀၊ အလုံးလတ် တစ်ခြင်း ကျပ် ၃၄၀၀၀၊ အလုံးသေး တစ်ခြင်း ကျပ် ၃၀၀၀၀၊ ဈေးတို့ရှိကြောင်း သီရိမင်္ဂလာဈေးရှိ  မြန်မာနိုင်ငံသစ်သီးဝလံပန်းမန်ဟင်းသီးဟင်းရွက်  စိုက်ပျိုးထုတ်လုပ် တင်ပို့ရောင်းချသူများအသင်း   ( MFVP )မှ သိရှိရပါသည်။

DOCA(ရန်ကုန်)

               ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းအနေဖြင့် ရွှေဘိုပေါ်ဆန်း G.I ရရှိ‌ရေးအတွက် ဆောင်ရွက်နေသည်မှာ တောင်သူ၊ကုန်သည်များနှင့် ဆန်စက်ပိုင်များအားလုံးသိရှိပြီး ဖြစ်သည်။

        ရွှေဘိုပေါ်ဆန်း G.I ရရှိ‌ရေးအတွက် ဆောင်ရွက်ရာတွင် မျိုးကောင်းမျိုးသန့်ရရှိရေး ကဏ္ဍသည်လည်း လွန်စွာအရေးကြီးလှသည့်ကဏ္ဍတစ်ရပ် ဖြစ်သည်။ ယခုအခါ ရွှေဘိုပေါ်ဆန်းစိုက်‌တောင်သူဦးကြီးများ 2022ခုနှစ် မိုးစပါးရာသီတွင် ရွှေဘိုပေါ်ဆန်းမျိုးကောင်းမျိးသန့်ရရှိရေး ရည်ရွယ်၍ JICA Project ဖြင့် ရွှေဘိုခရိုင်၊ဝက်လက်မြို့နယ် စိုင်နိုင်ကွေ့(နောက်) စိုင်နိုင်စိုက်ပျိုးနည်းပညာပြန့်ပွားရေးစင်တာတွင်  တည်ဆောက်ထားသော JAPAN နိုင်ငံ SATAKE Company  ထုတ် Seed Center Type-A(မျိုးစေ့သန့်စင် စက်ရုံ)ကိုရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်း (SPFMTA)မှ ပူးပေါင်း ဆောင်ရွက်လျက်ရှိသည်။ Seed Center Type-A (မျိုးစေ့သန့်စင်စက်ရုံ)တွင် ရွှေဘိုပေါ်ဆန်း မျိုးစပါး + ခြောက်ခံခြင်းနှင့် သန့်စင်ခြင်းလုပ်ငန်းများကို လုပ်ဆောင်ပေးလျက်ရှိသည်။ ရွှေဘိုပေါ်ဆန်း မျိုးစပါး + ခြောက်ခံခြင်းနှင့်သန့်စင်ခြင်းကို စပါး(100)တင်း (70000)ကျပ်နှုန်း၊ အခြောက်ခံခြင်းသီးသန့်ကို စပါး (100)တင်း (40000)ကျပ်နှုန်းနှင့် သန့်စင်ခြင်းသီးသန့်ကို စပါး(100)တင်း(40000)ကျပ်နှုန်းဖြင့် သတ်မှတ်ထားပါကြောင်း ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းမှ သိရသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊ မုံရွာခရိုင်သည် ပူပြင်းခြောက်သွေ့သော အညာဒေသ ဖြစ်သည့်အတွက် မတ်လလယ်လောက်မှစ၍ အပူချိန်များ မြင့်တက်လျက်ရှိပါသည်။ အပူချိန်များ မြင့်တက်လာသည်နှင့်အမျှ ကျေးလက်နေဒေသခံများအဖို့ တောင်သူလုပ်ငန်းများ လုပ်ကိုင်ရာတွင်လည်းကောင်း၊ ခရီးတိုများသွားလာရာတွင်လည်းကောင်း အပူဒဏ်ကာကွယ်ရန်အတွက် ဦးထုပ်၊ ခမောက်များကို အသုံးပြုကြရသည်။

      မုံရွာခရိုင်၊ ချောင်းဦးမြို့နယ်၊ ငါးလုံးတင်ကျေးရွာတွင် ဒေသခံများအနေဖြင့် မိရိုးဖလာတောင်သူလုပ်ငန်းများ လုပ်ကိုင်ကြရုံသာမက ရှေးယခင်ကပင် ဂျုံရိုးခမောက်လုပ်ငန်းကို စီးပွားဖြစ်တွင်ကျယ်စွာ လုပ်ကိုင်လာကြသည်။ ဂျုံရိုးခမောက်လုပ်ကိုင်ရန် ကုန်ကြမ်းဂျုံအရိုးများကို ရိတ်သိမ်းမည့် အခင်းသို့ ရိတ်သိမ်းခမယူဘဲ အခင်းရှင်အား အနှံပေး၊ အရိုးပြန်ယူစနစ်ဖြင့် ရိတ်သိမ်းပေးရသည်။ ကုန်ကြမ်း ဂျုံအရိုးများကို လုပ်သားအင်အား (၂၀)ဦးခန့်မှ ရေစိမ်ခြင်း၊ ကြိုးကျစ်ခြင်း၊ ချုပ်လုပ်ခြင်းများ ပြုလုပ်ကြပြီး ခမောက်အမျိုးအစားပေါင်း(၁၀)မျိုးခန့် ချုပ်လုပ်ကြကြောင်း၊ သာမန်အရွယ်အစား ခမောက်တစ်လုံးကို ကျစ်ကြိုးအရှည် (၄၅) တောင် ကုန်ကြောင်း၊ ပို၍ကျယ်ပြန့်လိုပါက (၅၅-၆၀) တောင် အသုံးပြု၍ ချုပ်လုပ်ကြကြောင်း၊ ချုပ်လုပ်ပြီးသော ခမောက်များကို ဆေးခြယ်ခြင်း ၊ ကြိုးတပ်ခြင်း၊ နေလှန်းခြင်းများ အဆင့်ဆင့်ပြုလုပ်ပြီးလျှင် ဈေးကွက်သို့ပို့ရန်အသင့်အနေအထားသို့ ရောက်ရှိပြီဖြစ်ပါကြောင်း၊ ချောင်းဦးဒေသထွက် ဂျုံရိုးခမောက်များကို  ယခင်နှစ်က တစ်နှစ်ပတ်လုံး ခမောက်အလုံးရေ အမျိုးအစားပေါင်း (၁)သိန်းကျော် တင်ပို့နိုင်ပြီး၊ ယခုနှစ်တွင် အလုံးရေပေါင်း (၂)သိန်းကျော်အထိ တိုးချဲ့ထုတ်လုပ်တင်ပို့နိုင်ကြောင်း၊ အသင့်ဆောင်းခမောက်တစ်လုံးကို ဈေးနှုန်း အနေဖြင့် ယခင်နှစ်က ၁၆၀၀ကျပ်မှ ၂၅၀၀ ကျပ်အထိ ရောင်းချရသော်လည်း ယခုနှစ်တွင် ၂၂၀၀ ကျပ်မှ  ၃၀၀၀ ကျပ်အထိ အရွယ်အစားလိုက်၍ ရောင်းချရကြောင်း၊ ယခင်နှစ်များအတွင်းက ရန်ကုန်မြို့ ၊ မြစ်ကြီးနားမြို့၊ ပခုက္ကူမြို့၊ မြင်းခြံမြို့များသို့ တင်ပို့ရောင်းချရသော်လည်း ယခုနှစ်အတွင်း စစ်ကိုင်းတိုင်းအထက်ပိုင်းဖြစ်သော ဟုမ္မလင်းမြို့၊ မော်လိုက်မြို့၊ဖောင်းပြင်မြို့များအထိ တိုးချဲ့တင်ပို့နိုင်ပြီဖြစ်ကြောင်း၊ ချောင်းဦးဒေသထွက် ဂျုံရိုးခမောက်များသည် ချုပ်ရိုးချုပ်သား ခိုင်ခံ့ခြင်း၊ ကျစ်လျစ်မှုရှိခြင်း၊ မိုးရေမထိပါက ဆေးရောင်မမှိန်ဘဲ ( ၃ နှစ်မှ ၅ )နှစ်အထိ မကျိုးမပျက်ခြင်းတို့ကြောင့် လူကြိုက်များလျက်ရှိပြီး အရောင်းသွက်လျက်ရှိကြောင်း၊ ချောင်းဦးမြို့၊ ငါးလုံးတင်ကျေးရွာမှ ဂျုံရိုးခမောက် လုပ်ကိုင်ဖြန့်ဖြူးရောင်းချသည့် လုပ်ငန်းရှင်တစ်ဦးထံမှ သိရှိရပါသည်။

            သို့ဖြစ်ပါ၍ မုံရွာခရိုင်၊ ချောင်းဦးမြို့နယ် ငါးလုံးတင်ကျေးရွာမှ ဒေသခံများသည် တောင်သူလုပ်ငန်းအပြင် ဂျုံရိုးခမောက်လုပ်ငန်းမှလည်း ဝင်ငွေရရှိလျက်ရှိပါကြောင်း တင်ပြလိုက်ရပါသည်။

DOCA(စစ်ကိုင်း)