ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ ပြည်ခရိုင်တွင် မတ်ပဲစျေးနှုန်းများမှာ ၂၀၂၁ခုနှစ် အောက်တိုဘာလတွင် တစ်တင်းလျှင် ၆၅၀၀၀ ကျပ်အထိ စျေးမြင့်တက်ခဲ့ပြီး နိုဝင်ဘာလ ဒုတိယပတ်မှစ၍ ပဲစျေးတဖြည်းဖြည်း  လျော့လာခဲ့ရာ ဒီဇင်ဘာလ တတိ ယပတ်တွင် မတ်ပဲစျေးမှာ တစ်တင်းလျှင် ၃၇၀၀၀ ကျပ်အထိ ကျဆင်းခဲ့ပါသည်။ မတ်ပဲစျေးများ ကျဆင်းလာရခြင်းမှာ အိန္ဒိယစျေးကွက်သို့ တင်ပို့ရမည့်ပမာဏ ပြည့်မီသွားပြီး နောက်နှစ် အတွက် ဝယ်ယူရန် အခြေအနေ စောင့်ကြည့်ကာလဖြစ်ခြင်းကြောင့် ကုန်သည်ကြီးများမှ စျေးနှုန်း ထိန်းညှိ ဝယ်ယူခြင်းဖြစ်ကြောင်း သိရှိရပါသည်။

         ဒီဇင်ဘာလတတိယပတ်အတွင်း လာမည့်နှစ်အတွက် အိန္ဒိယနိုင်ငံသို့ ပဲတင်ပို့ရန် စာချုပ်သစ်များ ပြန်လည်ချုပ်ဆိုပြီးကြောင်း သိရှိရပြီး မတ်ပဲစျေးမှာလည်း တစ်တင်း ၃၇၀၀၀ ကျပ်ခန့်ထိ ကျဆင်းခဲ့ရာမှ ၄၀၅၀၀ ကျပ်အထိ ပြန်လည်စျေးနှုန်းမြင့်တက်လာကြောင်း သိရှိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

            တောင်ငူမြို့နယ်တွင် တစ်နိုင်တစ်ပိုင်မှိုစိုက်ပျိုးလျက်ရှိရာတွင် ကောက်ရိုးမှိုနှင့် ငွေနှင်းမှို နှစ်မျိုးရှိသည့်အနက် အဓိကအားဖြင့် ငွေနှင်းမှိုကို စိုက်ပျိုးလျက်ရှိကြောင်းသိရှိရသည်။ ရာသီဉတုအပေါ်မူတည်၍ နွေရာသီတွင် တစ်လလျှင် တစ်ကြိမ် ၊ မိုးရာသီတွင် သုံးလလျှင် နှစ်ကြိမ် နှင့် ဆောင်းရာသီတွင် တစ်လလျှင် တစ်ကြိမ် စိုက်ပျိုးနိုင်ပြီး တစ်နှစ်ပတ်လုံးစိုက်ပျိုးနိုင်ကြောင်း သိရှိ ရသည်။ တစ်နိုင်တစ်ပိုင်စိုက်ပျိုးမှုဖြစ်သည့်အတွက် မိမိစိုက်ပျိုးနိုင်မည့်မြေပေါ်မူတည်၍ ဘောင်စနစ်ဖြင့်  စိုက်ပျိုးကြသည်။ ၄ပေ၁ပေခွဲအကျယ် ဘောင်တစ်ဘောင်တွင် မှိုမျိုးစေ့ ငါးထုပ်၊ မှိုအားဆေး၊ ကဒ်ထူစက္ကူ ၊ နွားချေး၊ ဗေဒါ နှင့် အထွေထွေကုန်ကျစရိတ်  စုစုပေါင်း ၁၆၀၀ဝိ/ ကျပ်နှုန်း ကုန်ကျကြောင်းသိရသည်။ ဘောင်တစ်ဘောင်လျှင် မှိုပိဿာချိန် (၅ပိဿာ မှ ၇ပိဿာ)အထိ ထွက်ရှိ၍ လက်ရှိတစ်ပိသာလျှင် ၆၀၀ဝိ/ ကျပ်နှုန်းပေါက်စျေးရရှိပြီး ဘောင်တစ်ဘောင်စိုက်ပျိုးမှု အကျိုးအမြတ် အနေဖြင့် ၂၀၀၀ဝိ/ ကျပ်ခန့်ရရှိကြောင်းသိရှိရသည်။ မှိုစိုက်ပျိုးသည့်လုပ်ငန်းမှာ အခြား စိုက်ပျိုးရေး လုပ်ငန်းများကဲ့သို့ စိုက်ပျိုးမြေဧကများစွာမလိုအပ်သည့်အပြင် စိုက်ပျိုးချိန်မှ ခူးဆွတ်ချိန်ထိ ၁၂ရက် မှ ၁၄ရက် (နှစ်ပတ်ခန့်သာ) အချိန်ပေးရသောကြောင့် အချိန်တိုအတွင်း အရင်းပြန်ရသည့် အပြင် ရင်းနှီးငွေ အနည်းငယ်ဖြင့် အမြတ်အစွန်းများသည့် လုပ်ငန်းတစ်ခုဖြစ်သည့်အတွက် တိုးချဲ့ စိုက်ပျိုးလျှက် ရှိကြောင်း သတင်းရရှိပါသည်။  

စားသုံးသူရေးရာဦးစီးဌာန(ပဲခူးတိုင်း)          

                ညောင်လေးပင်မြို့နယ်၊ ဘိုင်းဒါးဒေသတွင် နှစ်စဉ်ဖရဲဧက(၁၀၀၀)ကျော်စိုက်ပျိုးခဲ့သော် လည်း ယခုနှစ်တွင် ကိုဗစ်-၁၉ ရောဂါဖြစ်ပွားခဲ့မှုအခြေအနေများကြောင့် တရုတ်ဈေးကွက် မျှော်မှန်းရန် ခက်ခဲသည့် အခြေအနေများနှင့် စိုက်ပျိုးရေးသွင်းအားစု ဓာတ်မြေဩဇာ ဈေးနှုန်းများ မြင့်တက်လာမှုအခြေအနေများကြောင့် ယခင်နှစ်ထက် သုံးပုံတစ်ပုံသာ စိုက်ပျိုးနိုင်ခဲ့ကြောင်း ဘိုင်းဒါးဒေသ ဖရဲစိုက်တောင်သူထံမှ သိရသည်။

                ယခင်နှစ်များတွင် တရုတ်ပြည်ဈေးကွက်သို့တင်ပို့ရန် ဖရဲ 855 တစ်မျိုးထဲကို အဓိက ထားစိုက်ပျိုးကြသော်လည်း ယခုနှစ်တွင် ကိုဗစ်-၁၉ ရောဂါအခြေအနေများကြောင့် တရုတ်ဈေးကွက် မျှော်မှန်းရန်ခက်ခဲသည့်အခြေအနေများကြောင့် ပြည်တွင်းစားသုံးမှု၊ ဈေးကွက်အခြေအနေများ ကောင်းမွန်သည့် ဂျပန်ဖရဲ(ခေါ်) 211၊ ဒေသခေါ် ဒုံးကြည်ဖရဲများနှင့်  855 ဖရဲများ ပူးတွဲ စိုက်ပျိုးလာကြောင်း သိရှိရသည်။

                ယခင်တရုတ်ဈေးကွက်တင်ပို့ရန်အတွက် စိုက်ပျိုးသည့် ဖရဲ 855 စိုက်ပျိုးရာတွင်  တစ်ဧကကုန်ကျစရိတ် ကျပ် (၁၅)သိန်းမှ သိန်း(၂၀)အထိ ကုန်ကျကြောင်းသိရသည်။ ယခုနှစ်ပြည်တွင်း ဈေးကွက်အတွက် ဖရဲစိုက်ပျိုးရာတွင် တစ်ဧကကုန်ကျစရိတ် ကျပ် (၁၀)သိန်းမှ (၁၂)သိန်းအထိသာ ကုန်ကျသည့်အတွက် တစ်ဧကကုန်ကျစရိတ်မှာ (၅)သိန်းမှ (၈)သိန်းအထိ သက်သာကြောင်း၊ ယခုကဲသို့ကုန်ကျစရိတ်သက်သာရခြင်းမှာ ပြည်တွင်းဈေးကွက်တင်ပို့ရာတွင် စိုက်ပျိုးရေးသွင်းအားစု ဓာတ်မြေဩဇာ လျော့ချသုံးစွဲခြင်းကြောင့်ဖြစ်ကြောင်း ဘိုင်းဒါးဒေသ ဖရဲစိုက် တောင်သူထံမှ သိရှိခဲ့ရပါသည်။

                စိုက်ပျိုးရေးသွင်းအားစု ဓာတ်မြေဩဇာများလျော့ချသုံးစွဲသော်လည်း အသီးထွက်နှုန်းမှာ ယခင်နှစ်ကဲ့သို့တစ်ဧကလျှင်အလုံးရေ(၁၀၀၀-၁၂၀၀၀)အထိ ထွက်ရှိပြီးအထွက်နှုန်းကျဆင်းသွားခြင်း မရှိကြောင်း၊ အသီးဖွံ့ဖြိုးမှုမှာ ယခင် (၈)ပိဿာအထက်ရရှိသော်လည်း ယခု(၆-၈)ပိဿာဝန်းကျင်သာ ရရှိကြောင်းသိရသည်။

                ဘိုင်းဒါးဒေသထွက်ဖရဲမှာ ပြည်တွင်းဈေးကွက်ကောင်းမွန်ပြီး ဖရဲသီးကုန်သည်များမှ ကွင်းအတွင်းလာရောက်ဝယ်ယူကြောင်း၊ အသီးအရွယ်အစားအပေါ်မှုတည်၍ ကျပ်(၁၅၀၀-၂၀၀၀) အထိရရှိကြောင်း၊ ဘိုင်းဒါးဒေသထွက်ဖရဲများအား ရန်ကုန်၊ ရေး၊ ထားဝယ်၊ မော်လမြိုင်မြို့များအထိ တင်ပို့ရောင်းချလျက်ရှိကြောင်း သိရှိရသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး

        ဈေးကွက်အတွင်း ဘဲဥဈေးနှုန်းများ ကောင်းနေသောကြောင့် ပဲခူးတိုင်းဒေသကြီး သနပ္ပင်မြို့နယ်အတွင်း စီးပွားဖြစ် ဘဲမွေးမြူခြင်း၊ တစ်နိုင်တစ်ပိုင် ဘဲမွေးမြူခြင်း လုပ်ငန်းများ ပိုမိုများပြားလာကြောင်း သိရသည်။  မွေးမြူရေးလုပ်ငန်းသည် မွေးမြူရလွယ်ကူသည့်အပြင် သဘာဝအစားအစာများ ဖြစ်သော ရေမှော် ၊ ပိုးမွှားကောင်သေး၊ တီကောင်စသည်တို့ကိုစားသောက်လေ့ရှိသဖြင့် ကုန်ကျစရိတ် သက်သာကြောင်း သိရှိရသည်။ သနပ္ပင်မြို့နယ်အတွင်း လွှတ်ကျောင်းကွင်းများပေါများသောကြောင့် တစ်နိုင်တစ်ပိုင် အကောင်ရေ ၃၀ မှ ၅၀ မွေးမြူသူများ ရှိသလို အကောင်ရေ ၅၀၀၊ ၁၀၀၀၊ ၂၀၀၀ စသည်ဖြင့် စီးပွားဖြစ် မွေးမြူသူများလည်း ရှိကြောင်း သိရှိရသည်။ ဉစားဘဲအနေဖြင့် အကောင်ပေါက် စတင်မွေးမြူသည်မှ ၆ လကျော်လျှင် စတင်၍ဉဉကာ ဉသက်တမ်းမှာ တစ်နှစ်၊ တစ်နှစ်ခွဲခန့် ရှိကြောင်း သိရှိရသည်။ ဘဲကောင်ရေ ၁၀၀၀ မွေးမြူလျှင် ထုတ်လုပ်မှု ကုန်ကျစရိတ်အနေဖြင့် အစားအစာ ၊ဆေးဝါး၊ လုပ်သားခ အပါအဝင် တနေ့လျှင် ၅၅၀၀၀ကျပ် ခန့်ကုန်ကျကြောင်း သိရှိရသည်။ ဘဲဉချိန်ရောက်လျှင် တနေ့ ပျှမ်းမျှ ၇၀%ခန့် ဉကြောင်းသိရပြီး သက်တမ်းကုန်ဘဲများကိုလည်း အသားအဖြစ် ရောင်းချနိုင်ကြောင်း သိရှိရသည်။ ၂၀၂၁ခုနှစ် ဒီဇင်ဘာလအတွင်း ဘဲဉ တစ်လုံး၏ ယနေ့ခြံထွက်ဈေးမှာ ၁၄၀ ကျပ်ရှိပြီး တနေ့လျှင် ၉၈၀၀၀ ခန့် ဝင်ငွေရရှိသဖြင့် ဘဲကောင်ရေ ၁၀၀၀ မွေးမြူလျှင် တနေ့ ၄၃၀၀၀ ကျပ်ခန့် အကျိုးအမြတ်ရရှိသောကြောင့် ဘဲမွေးမြူသည့် စီးပွားရေးလုပ်ငန်းရှင်များအနေဖြင့် စီးပွားရေးတွက်ခြေကိုက်လျက်ရှိကြောင်း သတင်းရရှိပါသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး

           မော်လမြိုင်မြို့၌ယခုအပါတ်တွင် ဘိလပ်မြေဈေးကွက်မှာ သယ်ယူခနှုန်းထားမြင့်တက်လာမှုကြောင့် အရောင်းအဝယ်အေးလျက်ရှိပြီး ဈေးအနည်းငယ်မြင့်တက်လာကြောင်းသိရှိရသည်။ ယခင်အပါတ်တွင် ကြံ့နှစ်ကောင်(အနီ) ကျပ်၇၃၀၀၊ ဆင်(ထိုင်း) ကျပ် ၇၆၀၀၊ ကြံ့တံဆိပ်(အဝါ) ကျပ် ၆၇၀၀ ရှိခဲ့ပြီး ယခုအပတ်တွင် ကြံ့နှစ်ကောင်(အနီ) ကျပ်၇၇၅၀၊ ဆင်(ထိုင်း) ကျပ် ၈၃၀၀၊ ကြံ့တံဆိပ်(အဝါ) ကျပ် ၇၂၀၀ ဖြင့် အရောင်းအဝယ်ဖြစ်နေပြီး၊ မော်လမြိုင်မြို့၌ ဓါတ်မြေဩဇာမှာ ဈေးအနည်းငယ်မြင့်တက်ပြီး အရောင်းအေးနေကြောင်းသိရှိရသည်။

          အရောင်းအဝယ်ဖြစ်နေသောဈေးမှာ ယခင်အပါတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ မှာ ကျပ် ၇၅၅၀၀၊ ကွန်ပေါင်း ၂၀:၁၂:၁၂ မှာ ကျပ် ၇၃၈၀၀၊ ကွန်ပေါင်း(Thai Grow How) ၁၅:၁၅:၁၅ မှာ ကျပ် ၇၉၅၀၀၊ ပုလဲ(အသေး) ၄၆%  မြန်မာ (MPE)  မှာ ကျပ် ၄၆၀၀၀၊ ပုလဲ (အသေး) ၄၆%  တရုပ် (တောင်) ကျပ် ၅၈၀၀၀၊ ပုလဲ(အကြီး) ၄၆% ထိုင်း(မြင်းပျံ) ကျပ် ၇၅၀၀၀၊ တီစူပါ တရုတ် (သံကွင်း) ကျပ် ၄၆၀၀၀၊ ရှိခဲ့ပြီး ယခုတစ်ပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ မှာ ကျပ် ၇၈၀၀၀၊ကွန်ပေါင်း ၂၀:၁၂:၁၂ မှာ ကျပ် ၇၅၅၀၀၊ ကွန်ပေါင်း(Thai Grow How) ၁၅:၁၅:၁၅ မှာ ကျပ် ၈၂၀၀၀၊ ပုလဲ(အသေး) ၄၆%  မြန်မာ (MPE)  မှာ ကျပ် ၄၈၅၀၀၊ ပုလဲ (အသေး) ၄၆%  တရုပ် (တောင်) ကျပ် ၅၈၀၀၀၊ ပုလဲ(အကြီး) ၄၆% ထိုင်း(မြင်းပျံ) ကျပ် ၈၀၀၀၀၊ တီစူပါ တရုတ် (သံကွင်း) ကျပ် ၄၉၀၀၀ဖြင့် အရောင်းအဝယ်ဖြစ်နေသည်။ သယ်ယူခနှုန်းထားမြင့်တက်လာမှုကြောင့် ယခုတစ်ပတ်တွင် ဓါတ်မြေဩဇာဈေး အနည်းငယ်မြင့်တက်လာပြီး ဝယ်လိုအားနည်းနေသည့်အတွက် အရောင်းအဝယ် အေးကြောင်းသိရှိရသည်။

စားသုံးသူရေးရာဦးစီးဌာန 

မွန်ပြည်နယ်