ပြည်တွင်းကုန်သွယ်မှုသတင်း

      ကွမ်းရွက်ပင်သည် မြန်မာနိုင်ငံတွင် တကောင်းခေတ်၊ ပုဂံခေတ်များကပင်ရှိခဲ့သော အပင်တစ်မျိုး ဖြစ်သည်။ ကွမ်းရွက်ပင်သည် နွယ်ပင်အမျိုးအစား တစ်မျိုးဖြစ်ပြီး သစ်တောကြီးများတွင် သဘာဝ အလျောက်ပေါက်ရောက်ရှင်သန်ကြသည်။ ရှေးမြန်မာ လူမျိုးများ အထွတ်အမြတ်ထား အသုံးပြုသော အပင်နှစ်မျိုးတွင် ကွမ်းရွက်ပင်သည် တစ်ပင်အပါအဝင်ဖြစ်သည်။ “မြန်မာအစ တကောင်းက”ဟုဆို သကဲ့သို့ ကွမ်းရွက်အစသည်လည်း တကောင်းက ဟုဆိုနိုင်သည်။ မြန်မာလူမျိုးများမှာ ကွမ်းစားခြင်း ဓလေ့ရှိခြင်းကြောင့် ကွမ်းရွက်ပင်များစိုက်ပျိုးခြင်းသည်လည်း ရှေးယခင်များကပင် ရှိခဲ့ကြသည်။ ရှေးယခင်အခါများက ကွမ်းစိုက်ပျိုးခြင်းအား မိုးခြံ၊ နွေခြံ ဟူ၍ တစ်နှစ်လျှင် နှစ်ကြိမ်စိုက်ပျိုးခဲ့ကြ သည်။ ကွမ်းရွက်ပင်နှင့် ကွမ်းစားခြင်း ဓလေ့များသည် အိန္ဒိယနိုင်ငံမှ မြန်မာနိုင်ငံသို့ ဆင်းသက်လာဟန် တူသည်။ ကွမ်းပင်၏ မူလဒေသသည် မလေးရှားနိုင်ငံ အရှေ့ပိုင်းနှင့် အလယ်ပိုင်းဒေသများဖြစ်ကြောင်း ပညာရှင်များအဆိုအရ သိရှိရသည်။ ထိုဒေသမှ စတင်၍ အိန္ဒိယ၊ အင်ဒိုနီးရှားနှင့် တစ်ခြားသော အာရှနိုင်ငံများအထိ ပြန့်နှံခဲ့သည်။

          ကွမ်းရွက်ပင်သည် ပင်ပျော့အမျိုးအစားဖြစ်သည့်အားလျော်စွာ သစ်ပင်ကြီးများအားအမှီပြု၍ ပေါက်ရောက်ကြသည်။ ပူအိုက်စွတ်စိုသော ရာသီဉတုတွင်ကောင်းစွာရှင်သန်ကြသည်။ ပရဆေးများ၏ သဘောအရ သဘာဝမှရသော အပင်များဖြင့်ဖော်စပ်ကြသည့် အားလျော်စွာ ကွမ်းရွက်ပင်သည်လည်း တစ်ပင်အပါအဝင်ဖြစ်သည်။ ယခုမျက်မောက်ကာလတွင် ကွမ်းရွက်ဖြင့် သက်သာစေသောရောဂါများ အများအပြား ရှာဖွေတွေ့ရှိထားပြီး ဖြစ်သည်။ ကွမ်းရွက်တွင် ကျန်းမာရေးအတွက် အထောက်အကူပြုပေးနိုင်သော ဓာတ်များစွာလည်း ပါဝင်သည်။  ဗီတာမင် B ၊ ဗီတာမင် C ဓာတ်များအပြင် အမျှင်ဓာတ်၊ သတ္တုဓာတ်များလည်းပါဝင်ကြောင်း ဓာတ်ခွဲခန်းအဖြေများအရသိရသည်။ ကွမ်းရွက်တွင် ပါဝင်သော ဒြပ်ပေါင်းသည် လူ၏ခန္ဓာကိုယ်အတွင်းရှိ သကြားဓာတ်အားကျဆင်းစေပြီး ဆီးချိုသမားများအတွက် အထောက်အကူဖြစ်သည်။ ကွမ်းရွက်ပမာဏ ၁၀ရွက်လောက်အား ရေနွေးဆူဆူတွင်ထည့်ပြုတ်ပြီး ပျားရည်အနည်းငယ်ထည့်သောက်ခြင်းဖြင့် ကင်ဆာရောဂါ ကာကွယ်နိုင်သည်။ ကွမ်းရွက်ပြုတ်ရည်အား အအေးခံပြီး မျက်နှာသစ်ခြင်းဖြင့်လည်း မျက်နှာပေါ်ရှိ ဘက်တီရီးယားများကိုတိုက်ဖျက်ပေးပြီး ဝက်ခြံများကိုလည်း သက်သာစေကြောင်း ဆရာဝန်များ၏ အဆိုများအရသိရသည်။ ကွမ်းရွက်အား ရေဖြင့် သေချာစွာဆေးကြောပြီး ဝါးစားခြင်းဖြင့် ခံတွင်းကျန်းမာစေပြီး၊ အသက်ရှူလမ်းကြောင်းဆိုင်ရာ ရောဂါများမှလည်း ကာကွယ်နိုင်သည်။ ပွန်းပဲ့ရှနာဒဏ်ရာများကြုံတွေ့လျှင်လည်း ကွမ်းရွက်ကို ရေဖြင့်သန့်စင် အောင်ဆေးကြော၍ အနာပေါ်တွင် အုပ်ထားပေးပြီး ပတ်တီးစည်းထားပေးခြင်းဖြင့် အနာကျက်စေ သည်။

          ကွမ်းရွက်သည် ဓာတ်တိုးဆန့်ကျင်အာနိသင်ကြွယ်ဝသောအရွက်ဖြစ်သဖြင့် လူ့ခန္ဓာကိုယ်အတွင်းရှိ ဓာတ်တိုးပစ္စည်းများအား ဖယ်ရှားပေးပြီး၊ ဝမ်းမှန်စေသည်။ သွေးတွင်းကိုလက်စရောကိုပါ ကျစေနိုင်၍ နှလုံးရောဂါဖြစ်နိုင်ခြေအားလည်း လျော့နည်းစေသည်။ ကွမ်းရွက်အား ဝါးစားခြင်းဖြင့် ခံတွင်းအတွင်းရှိ ဘက်တီးရီးယားပေါက်ဖွားပေးမှုကို ဟန့်တားပေးခြင်းကြောင့် ခံတွင်းအနံ့ဆိုးများထွက်ခြင်းမှ ကင်းဝေးစေနိုင်သည်။ ခေါင်းကိုက်သူများအနေဖြင့်လည်း ကွမ်းရွက်အား နှာဖူး၊ နားထင်နှင့်နှာနုရိုးများတွင် ကပ်ခြင်းဖြင့်လည်း သက်သာစေသည်။ မြန်မာ့တိုင်းရင်းဆေးများတွင် ကွမ်းရွက်ကို ချောင်းဆိုးပျောက်ဆေးများတွင် အများဆုံးအသုံးပြုသည်။ ဥပမာအားဖြင့် ကွမ်းရွက်ပုံလျှက်ဆား။ ဆရာသင်၏ ရှုတော်မူဆေးကျမ်းတွင် ကွမ်းရွက်သည် ပူစပ်သော အရသာရှိသည်၊ သလိပ်ကို ကျေစေ၊ လေကို နှိမ်နင်း၏ ဟုဆိုထားသည်။

          ကွမ်းရွက်ပင် စိုက်ပျိုးမှုတွင် ပြည်နယ်/တိုင်း ဒေသအများစုတွင် စိုက်ပျိုးကြသည်။ ကွမ်းရွက်ပင် အားအပူချိန်နိမ့်သော ဒေသများမှလွဲ၍ ကျန်နေရာများတွင် စိုက်ပျိုးနိုင်သည်။ ကွမ်းပင်သည် ပင်ပျော့ဖြစ်သည့်အလျောက် ကွမ်းစင်ဆောက်၍ စိုက်ပျိုးကြရသည်။ ကွမ်းပင်သည် စိုစွတ်ခြင်းအား နှစ်သက်သော်လည်း ရေဝတ်ခြင်းအားမနှစ်သက်ခြေ။ ထို့ကြောင့် ကွမ်းစိုက်တောင်သူများသည် မြောင်းတူးစိုက်ပျိုးနည်းဖြင့် စိုက်ပျိုးကြသည်။ ကွင်းစင်းအား အများအားဖြင့် ဝါးများ၊ ဝါးခြမ်းများ ဖြင့်တည်ဆောက်ကြသည်။ ဝါးတိုင်များအား(၆)ပေ၊ (၇)ပေ အမြင့်တိုင်များ ပြုလုပ်ပြီး စကာအမိုး၊ အကာအရံများဖြင့် တည်ဆောက်ကြသည်။ ကွမ်းပင်စိုက်ပျိုးရာတွင် ကွမ်းတစ်မျိုးကိုသာ စိုက်ပျိုးသူ တောင်သူနှင့် တစ်ခြားသီးနှံကို အဓိကထားစိုက်ပျိုးပြီး ကွမ်းအားအပိုဝင်ငွေရရှိရေး စိုက်ပျိုးသူဟူ၍ ကွဲပြားကြသည်။ ရှေးယခင်ကမူ ကွမ်းပင်များအား ရေလောင်းစိုက်ပျိုးကြသော်လည်း ယခုအခါတွင် ရေအစက်ချနည်းများအသုံးပြု၍ စိုက်ပျိုးလာကြသည်။ အစက်ချရေသွင်းနည်းစနစ်ကို နွေရာသီနှင့် ဆောင်းရာသီတို့တွင် အကျိုးရှိစွာအသုံးချနိုင်သည်။ တောင်သူများပြောပြချက်အရ ရေအစက်ချစိုက်ပျိုးနည်းအသုံးပြုခြင်းဖြင့် ရေများအလေအလွင့်နည်းခြင်း၊ လုပ်အားသက်သာစေခြင်း၊ စိုက်ပင်များားအစိုဓာတ်အမြဲရှိစေခြင်း၊ ကွမ်းခြံအတွင်းလူအဝင်အထွက်နည်းစေခြင်း၊ အကျိုးအမြတ်ပိုမိုရရှိခြင်း စသည့်အကျိုးကျေးဇူးများ ရှိပေသည်။

          ကွမ်းရွက်သည်ဒေသကိုလိုက်၍ အနု၊ အလတ်၊ အကြမ်းများရှိသည်။ "တံတားဦးကကွမ်းနုဝါ" ဆိုသကဲ့သို့ တံတားဦးမြို့တွင် စိုက်ပျိုးသောကွမ်းနုဝါသည်နာမည်ကြီးသည်။ ကွမ်းများအား စိုက်ပျိုးရာဒေသကိုလိုက်၍ အမည်များလည်းကွဲပြားကြသည်။ ဥပမာဆိုလျှင် ရန်ကုန်မှာစိုက်၍ ရန်ကုန်ကွမ်း၊ မုံရွာမှာစိုက်၍ မုံရွာကွမ်း၊ ရေဦးကွမ်း၊ မတ္တရာကွမ်း၊ ရွှေဘိုကွမ်း၊ ခင်သာကွမ်း၊ ကျောက်ဆည်ကွမ်း၊ မန္တလေးကွမ်း၊ အင်းကွမ်း စသည့်ဖြင့် စိုက်ပျိုးရာဒေသများ မတူကြ၍ အမည်များလည်းကွဲပြားကြသည်။ ရှမ်းပြည်နယ်တွင် မတ္တရာကွမ်းမှာ တစ်ပိဿာလျှင် (၁၂၀၀၀)ကျပ်ပေါက်ဈေးရှိပြီး၊ မန္တလေးကွမ်းမှာ တစ်ပိဿာလျှင် (၁၀၀၀၀)ကျပ် ပေါက်ဈေးရှိသည်။ ပူပြင်းခြောက်သွေ့သော နွေရာသီအချိန်တွင် ကွမ်း ဈေးကောင်းရရှိတတ်ပြီး ဝယ်လိုအားကောင်း၍ ယခုထက်ပို ဈေးကောင်းရရှိလာမည်ဖြစ်သည်။ ကွမ်းရွက်ပင်အား စိုက်ပျိုးကြသည်မှာ တိုင်းရင်းဆေးဝါးများဖော်စပ်ရန်အတွက် စိုက်ပျိုးကြခြင်းမျိုး မဟုတ်ဘဲ ကွမ်းယာစားသုံးသူများအားအဓိကထားစိုက်ပျိုးကြခြင်းဖြစ်သည်။ ကွမ်းရွက်၏ ဆေးဖက်ဝင် ပုံနှင့် ကွမ်းယာမှာ မတူပေ။ ကွမ်းယာတွင်ပါဝင်သော ထုံးသည် ကျန်းမာရေးအတွက် အထောက်အကူ မဖြစ်ပေ။ ကွမ်းယာစားခြင်းကြောင့် ပါးစပ်ကင်ဆာ၊ လျှာကင်ဆာများအပြင် တစ်ခြားသောရောဂါများလည်းဖြစ်စေသည်။ "ကွမ်းတစ်ယာနှင့်ရေတစ်မှုတ်" ဟူသောစကားများအရ ကွမ်းယာသည့် ရှေးဘုရင်မင်းများ လက်ထက်က မေတ္တာတရားနှင့်သစ္စာတရားကိုဖော်ကြူးသော ပန်းတစ်မျိုးဖြစ်သည်ဟု သမိုင်းစာအုပ်များအရသိရသည်။ မြန်မာ့သမိုင်းရာဇဝင်များနှင့်ပင်အတူရှိခဲ့သော ကွမ်းပင်သည် ယနေ့ခေတ် မျက်မောက်ကာလတွင်လည်း စိုက်ပျိုးသူများသော၊ ရောင်းအားကောင်းသော၊ ဈေးကောင်းရနေသော လူ့အကျိုးပြုအပင်တစ်မျိုးဖြစ်ကြောင်း ဖော်ပြလိုက်ရပါသည်။

စားသုံးသူရေးရာဦးစီးဌာန

ရှမ်းပြည်နယ်

         မြန်မာနိုင်ငံနှင့် တရုတ်နိုင်ငံနယ်စပ်ကုန်သွယ်ရေးဆောင်ရွက်နိုင်ရန်အတွက် တာဝန်ရှိသူများ Online မှဆွေးနွေးခဲ့ပြီးနောက် လွယ်ဂျယ်နယ်စပ်ဂိတ်အား ပြန်လည်ဖွင့်လှစ်ခဲ့ရာ ကုန်သွယ်မှုလုပ်ငန်းများ ဆောင်ရွက်နေပြီဖြစ်ပါသည်။ ကိုဗစ်-၁၉ရောဂါဖြစ်ပွားမှုကြောင့် တရုတ်နိုင်ငံဘက်ခြမ်းတွင် ပိတ်မိနေသော မြန်မာနိုင်ငံသားပိုင် ကုန်တင်ယာဉ်အစီးရေ(၃၆၀)ကျော်ကို ၂၅.၁.၂၀၂၂ရက်နေ့တွင် မြန်မာနိုင်ငံဘက်သို့ ပြန်လည် ထွက်ခွာခွင့်ပြုခဲ့သဖြင့် ၎င်းကုန်တင်ယာဉ်များကို တရုတ်ယာဉ်မောင်းများမှ လွယ်ဂျယ်မြို့အထိလာ ရောက်ပို့ဆောင် လွှဲပြောင်းပေးအပ်သွားမည်ဖြစ်ကြောင်း သတင်းရရှိပါသည်။

စားသုံးသူရေးရာဦးစီးဌာန                          

ကချင်ပြည်နယ်        

          စစ်ကိုင်းတိုင်းဒေသကြီး၊ ရွှေဘိုခရိုင်အတွင်းရှိ မြို့နယ်များ၌ ဇန်နဝါရီလ နောက်ဆုံးအပတ်တွင် စပါး ဈေးနှုန်းများတည်ငြိမ်နေပြီး ဆန်ဈေးနှုန်းမှာ အနည်းငယ် မြင့်တက်နေပါသည်။ ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ဇန်နဝါရီလ တတိယပတ်တွင် ရန်ကုန်သို့ အိတ်ရေ ၂၉၀၀၀ ၊ မန္တလေးသို့ အိတ်ရေ ၄၁၀၀၀၊ နေပြည်တော်သို့ အိတ်ရေ ၇၀၀၀၊ ရှမ်း(တောင်)သို့ အိတ်ရေ ၅၅၀၀၊ ရှမ်း(မြောက်)သို့ အိတ်ရေ ၅၅၀၀၊ ပခုက္ကူသို့ အိတ်ရေ ၅၀၀၊ စုစုပေါင်းအိတ်ရေ ၈၈၅၀၀၊ တန်အားဖြင့် ၄၄၂၅တန် စီးထွက်ခဲ့ ပါသည်။ယခုအပတ်တွင် ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက် မှုမှာ ရန်ကုန်သို့ အိတ်ရေ ၃၃၀၀၀၊ မန္တလေးသို့ အိတ်ရေ ၃၉၀၀၀၊ နေပြည်တော်သို့ အိတ်ရေ ၇၀၀၀၊ ရှမ်း(တောင်)သို့ အိတ်ရေ ၅၅၀၀၊ ရှမ်း(မြောက်)သို့ အိတ်ရေ ၅၅၀၀၊ပခုက္ကူသို့ အိတ်ရေ ၅၀၀၊ စုစုပေါင်းအိတ်ရေ ၉၀၅၀၀၊ တန်အားဖြင့် ၄၅၂၅တန် စီးထွက်ခဲ့သည့် အတွက် ယခင်အပတ်နှင့် နှိုင်းယှဉ်လျင် ယခုအပတ်အတွင်း အိတ်ရေ ၂၀၀၀၊ တန်အားဖြင့် တန် ၁၀၀ ပို၍ စီးထွက်ခဲ့ပါသည်။

          ရွှေဘိုမြို့၏ ဇန်နဝါရီလ နောက်ဆုံးအပတ်တွင် ဖြစ်ပေါ်နေသော စပါး/ဆန်  ဈေးနှုန်း များမှာ ရွှေဘိုပေါ်ဆန်းစပါး (အဟောင်း) တင်း၁၀၀လျင် ကျပ်၁,၆၅၀,၀၀၀၊ ရွှေဘိုပေါ်ဆန်း ဆန်(အဟောင်း) ၂၄ပြည်ပါတစ်အိတ်လျင် ကျပ်၅၅,၀၀၀၊ ဧရာမင်းစပါး (အဟောင်း) တင်း၁၀၀လျင် ကျပ်၁,၂၀၀,၀၀၀၊ ဧရာမင်းဆန်(အဟောင်း) ၂၄ပြည်ပါတစ်အိတ်လျင် ကျပ် ၅၃,၀၀၀၊ ရွှေဘိုပေါ်ဆန်းစပါး (အသစ်) တင်း၁၀၀လျင် ကျပ်၁,၁၀၀,၀၀၀၊ ရွှေဘိုပေါ်ဆန်း ဆန်(အသစ်) ၂၄ပြည်ပါတစ်အိတ်လျင် ကျပ်၄၄,၀၀၀၊ ဧရာမင်းစပါး (အသစ်) တင်း၁၀၀လျင် ကျပ်၉၀၀,၀၀၀၊ ဧရာမင်းဆန်(အသစ်) ၂၄ပြည်ပါတစ်အိတ်လျင် ကျပ် ၄၀,၀၀၀ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(စစ်ကိုင်း)

           ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်အတွင်း ရေအလွယ်တကူရရှိသော ချောင်းကမ်းနားနှင့်နီးစပ်သည့် ကျေးရွာများတွင် ပန်းဂေါ်ဖီများ စိုက်ပျိုးထုတ်လုပ်လျက် ရှိပါသည်။ အုတ်ရှစ်ကုန်းကျေးရွာအုပ်စု ၊ အနောက်ချောင်းနားကျေးရွာတွင် စိုက်ပျိုးနေသော ဂေါ်ဖီစိုက် တောင်သူတစ်ဦးအား (၂၄.၁.၂၀၂၂) ရက်နေ့ နံနက် (၁၀:၀၀) နာရီအချိန်တွင် မြို့နယ်တာဝန်ခံ ဦးအေးဇော်ထိုက်နှင့် ဒု-ကြီးကြပ်ရေးမှူး ဦးအောင်သိန်းဦးတို့မှ တွေ့ဆုံမေးမြန်းခဲ့ပါသည်။

          တွေ့ဆုံမေးမြန်းခဲ့မှုအရ တောင်သူတစ်ဦးလျှင် အနည်းဆုံး (၀.၁)ဧကမှ တစ်ဧကထိ စိုက်ပျိုးလျက်ရှိပြီး ယခုနှစ်တွင် ရေကြီးနစ်မြှပ်မှုမရှိခြင်း မိုးလေဝသအဖျက်အဆီးနည်းပါးခြင်းတို့ကြောင့် ပန်းဂေါ်ဖီစိုက် တောင်သူများ အဆင်ပြေကြပြီး  ပန်းဂေါ်ဖီ(၀.၁)ဧက စိုက်ပျိုးထုတ်လုပ်မှု ကုန်ကျစရိတ် အနေဖြင့် မိသားစု လုပ်အားခအပါအဝင် ကုန်ကျစရိတ် (၁၉၉၄၀၀/-) ကုန်ကျကြောင်း၊ (၀.၁)ဧက ဂေါ်ဖီထွက်ရှိမှုအနေဖြင့် အပွင့် (၄၀၀၀) ပွင့်ခန့်ထွက်ရှိပြီး တစ်ပွင့်လျှင် ကျပ်( ၁၀၀၀/-)မှ (၁၅၀၀/-) ထိရောင်းချရ၍  ဝင်ငွေ ကျပ် (၈၂၅၀၀၀/-) ရရှိကာ အကျိုးအမြတ်အနေဖြင့် ကျပ် (၆၂၅၆၀၀/-) ရရှိကြောင်း၊  မိသားစုလုပ်အားမရှိသော ပြင်ပလုပ်သားဌားရမ်းသုံးစွဲရသော တောင်သူများမှာ ကုန်ကျစရိတ် ကျပ် (၂၈၅၉၀၀/-)  ကုန်ကျပြီး အကျိူးအမြတ်မှာ (၅၃၉၁၀၀/-) ရရှိကြောင်း သိရှိခဲ့ရပါသည်။

စားသုံးသူရေးရာဦးစီးဌာန

ပဲခူးတိုင်း‌ဒေသကြီး

         မကွေးတိုင်းဒေသကြီး၊ သရက်ခရိုင်၊ အောင်လံမြို့သည် ရန်ကုန်-မန္တလေးကားလမ်းမကြီးပေါ်တွင် တည်ရှိပြီး တောင်တွင်းကြီးမြို့၊ ဆင်ပေါင်ဝဲမြို့၊ ကိုးပင်စသည့် ပတ်ဝန်းကျင်ကျေးရွာများ၊ ပဲခူးတိုင်း အနောက်ခြမ်း ဝက်ထီးကန်၊ ပေါက်ခေါင်းတို့မှထွက်ရှိသည့် လယ်ယာထွက်ကုန်သီးနှံများ လာရောက်ရောင်းဝယ်ဖောက်ကားရာ အချက်အချာကြသည့်မြို့ဖြစ်ပါသည်။အောင်လံမြို့သည် စပါး၊ ပဲမျိုးစုံ ဆီထွက်သီးနှံ၊ ဝါစသည့် သီးနှံမျိုးစုံစိုက်ပျိုးထွက်ရှိရာ အောင်လံကုန်စည်ဒိုင်မှလည်း အထူးသက်ဝင်လျှက်ရှိပြီး ဒေသခံတောင်သူပွဲစားကုန်သည်များဖြင့် နေ့စဉ်ရောင်းဝယ်ဖောက်ကားစည်ပင်လျှက်ရှိကြောင်း လေ့လာသိရှိရပါသည်။

          ယခုဇန်နဝါရီ တတိယပတ်အတွင်း အောင်လံကုန်စည်ဒိုင်တွင် အရောင်းအဝယ်အများဆုံးဖြစ်သည့် သီးနှံမှာ ပဲစဉ်းငုံသီးနှံဖြစ်ပြီး နေ့စဉ်ပိဿာ(၃၀)ဝင်အိတ် (၃၀၀)မှ(၅၀၀)ကြား အရောင်းအဝယ်ဖြစ်လျှက်ရှိကြောင်း သိရှိရပါသည်။ပဲစဉ်းငုံကိုနှမ်း၊ မြေပဲ၊ ဝါသီးနှံများကြားတွင် မိုးလယ်ဇွန်၊ ဇူလိုင်လများကပင် သီးညှပ်စိုက်ပျိုးခဲ့ကြောင်၊ စိုက်ဧက ၃၄၇၃ ဧကခန့်စိုက်ပျိုးကြောင်း စိုက်ပျိုးရေးဦးစီးဌာနမှ သိရှိရပါသည်။ ယခင်နှစ်ကထက် စိုက်ဧက(၁၁၀၀)ခန့် ပိုမိုစိုက်ပျိုးခဲ့သော်လည်း ယခင်နှစ်အထွက်နှုန်း ၁၆ တင်း ရရှိခဲ့ပြီး ယခုနှစ်၁၃တင်းခန့်သာ ထွက်ရှိကြောင်း သိရှိရပါသည်။ ပဲအရည်အသွေးမှာလည်း ဒီဇင်ဘာလအတွင်းရွာသွန်းခဲ့သည့်မိုးကြောင့် မနှစ်ကအရည်အသွေးကိုမမှီခဲ့ကြောင်း၊ သို့ရာတွင် ပဲစဉ်းငုံဈေးမှာ ယခင်နှစ်ကဈေးထက် ပိုခဲ့သည့်အတွက် ဈေးပိုမိုရရှိကြောင်း ဆင်ပေါင်ဝဲမြို့နယ်၊ ချောင်းကောက် ကျေးရွာနေ တောင်သူဦးမြင့်ငွေ၏ ပြောကြားချက်အရ လေ့လာသိရှိရပါသည်။

      ပဲစဉ်းငုံပေါ်စတွင် ပိဿာ (၂၀ )တစ်တင်း ၃၃၀၀၀-၃၅၀၀၀ဈေးရှိခဲ့သော်လည်း ၂၀၂၂ ဇန်နဝါရီ ဒုတိယပတ်တွင် ၄၅၃၀၀အထိ ဈေးမြင့်ခဲ့ကြောင်း၊ ယနေ့ ၂၅.၁.၂၀၂၂ နေ့ဈေးမှာ ၄၃၀၀၀ ရှိကြောင်း စုံစမ်းသိရှိရပါသည်။အောင်လံကုန်စည်ဒိုင်တွင် ယခင်နှစ်များတွင် ရန်ကုန်ကုမ္ပဏီများက ဦးဆောင်၍ ပဲစဉ်းငုံဈေးဖွင့်ခဲ့သော်လည်း ယခုနှစ်တွင် နယ်အဝယ်လှောင်လက်သမားများမှ ဦးဆောင်နေကြောင်း ကုမ္ပဏီများမှသတ်မှတ်ဈေးထက်ကျော်လွန်သွားပါက ဈေးပေးမဝယ်တော့ဘဲ လှောင်လက်သမားများမှ ပိဿာ ၂၀ တစ်တင်းလျှင် ၅၀၀မှ၁၀၀၀ထိဈေးပိုပေး၍ ဝယ်ယူနေသည့်အတွက် ပဲစဉ်းငုံဈေးမှာ ယခုနှစ်တွင် ရောင်းသူဈေးကွက်ဖြစ်နေ၍ စိုက်ပျိုးသူတောင်သူများ ပြုံးပျော်ရသည့် နှစ်လည်းဖြစ်ကြောင်း ကုန်သည် ဦးဉာဏ်လွင်၏ပြောကြားချက်အရသိရှိရပါသည်။

        ၂၀၁၇-၂၀၁၈တွင် အိန္ဒိယသည်မြန်မာပြည်မှထွက်ရှိသည့် ပဲတီစိမ်းနှင့်ပဲစဉ်းငုံသီးနှံများကို တန်ချိန်လျော့၍ ကိုတာသတ်မှတ်ဝယ်ယူခဲ့ရာ ပြည်တွင်းထွက်ပဲစဉ်းငုံသီးနှံမှာလည်း ပြည်ပတင်ပို့နိုင်မှု ပမာဏလျော့နည်းခဲ့၍ ပဲစဉ်းငုံအစားအခြားတွက်ချေကိုက်သည့် သီးနှံများပြောင်းလဲစိုက်ပျိုးရေး ပဲစားပွဲတော်များကျင်းပ၍ ပြည်တွင်းပဲစားသုံးမှုပမာဏတိုးပွားရေးတို့ကို မိမိတို့ဌာနမှ အသိပညာပေး ခဲ့ရသော်လည်း နောက်နှစ်များတွင် အိန္ဒိယမှပဲတင်သွင်းမှုပမာဏများလာခဲ့၍ ပဲစဉ်းငုံသီးနှံစိုက်ဧကမှာလည်း လျော့ကျသွားခြင်းမရှိဘဲ ယခုနှစ်တွင်ပိုမိုစိုက်ပျိုးလာသည်ကိုသိရှိရပါသည်။ ယခုနှစ်တွင် အိန္ဒိယနိုင်ငံတွင် ရာသီဥတုဆိုးရွားမှုကြောင့်လည်းကောင်း၊ စီးပွားကူးသန်းမှ တာဝန်ရှိလူကြီးများ၏ ညှိနှိုင်းကြိုးစားမှုအရ နှစ်နိုင်ငံချစ်ကြည်ရင်းနှီးမှုအဖြစ် မြန်မာနိုင်ငံမှ ပဲစဉ်းငုံနှင့် ပဲတီစိမ်းကို တန်ချိန်တိုး၍ ဝယ်ယူသွားမည်ဖြစ်ရာ ပဲစဉ်းငုံဈေးမှာ ပေါ်စ ၃၅၀၀၀မှ တဖြည်းဖြည်းဈေးမြင့်ဝယ်ယူခဲ့ရာ ယခုအချိန် ၄၅၀၀၀အထိဖြစ်နေရာ တောင်သူများပြုံးပျော်နေရပြီဖြစ်ပါသည်။ ယခုနှစ်တွင်ပွဲစားလှောင်လက်များမှ ပဲစဉ်းငုံတစ်တင်း ၅၀၀၀၀ခန့်အထိမျှော်မှန်း၍ ဝယ်ယူသိုလှောင်မှုများလည်းရှိလာသည်ကို သိရှိရပါသည်။ ရန်ကုန် Export ကုမ္ပဏီများမှလည်း နှစ်ဟောင်းပဲစဉ်းငုံများကိုပင် ဈေးကောင်းပေးကာ ဝယ်ယူမှုများရှိနေ သည့်အတွက် နယ်လှောင်လက်များခန့်မှန်းသည့်ဈေးမရောက်နိုင်ဟု မပြောနိုင်ကြောင်း၊ သို့ဖြစ်ရာ အောင်လံဒေသထွက်ပဲစဉ်းငုံများမှ ပေါ်စမှယခုချိန်ထိ အမာဈေးတန်းဖြင့်သာ ဈေးကွက်တွင်နေရာယူလျက်ရှိပါကြောင်း၊ ဒီနှစ်အတွက်တောင်သူအဖို့ မာငုံနီဟုတင်စားရမည်ဖြစ်ပါကြောင်း ရေးသားတင်ပြလိုက်ရပါသည်။

စားသုံးသူရေးရာဦးစီးဌာန

မကွေးတိုင်း‌ဒေသကြီး