ပြည်တွင်းကုန်သွယ်မှုသတင်း

                 မန္တလေးတိုင်းဒေသကြီး မိတ္ထီလာခရိုင် စားသုံးသူရေးရာဦးစီးဌာနမှ ဦးဖြိုးဓနလင်း၊    ဒု-ဦးစီးမှူးသည် ဝမ်းတွင်းမြို့၊ ရိုးစုကျေးရွာအုပ်စုရှိ သစ်တောဦးစီးဌာနပိုင် တောင်ကြီးကုန်း သစ်တောကြိုးဝိုင်းအတွင်း (CF) စနစ် ဖြင့် မြေငှားရမ်း၍ ပေါ်လိုနီးယားစိုက်ပျိုးသော တောင်သူဦးထွန်းလူနှင့် တွေ့ဆုံမေးမြန်းခဲ့ပါသည်။

            ပေါ်လိုနီးယား တစ်ဧကလျှင် (၁၉၄)ပင် ၁၅ပေခြား ဝင်ဆန့်စိုက်ပျိုးရ၍ ၂၀၂၁ခုနှစ်တွင် ပျိုးထောင်ပြီး ယခုအခါ တစ်ဧက စတင်စိုက်ပျိုးထားကြောင်း သိရှိရပါသည်။ ပေါ်လိုနီးယားမျိုးစေ့အား ထိုင်းနိုင်ငံမှရရှိ၍ အစေ့(၃၀၀)ပါ (၁) ထုပ်လျှင် တစ်သောင်းကျပ်ဖြင့် ဝယ်ယူ စိုက်ပျိုးခဲ့ကြောင်း သိရှိရပါသည်။ မိုးရေတိုက်စားမူဒဏ်ကို ကာကွယ်နိုင်ရန် ရာသီဥတုနှင့် မြေဆီလွှာပြန်လည်ထိန်းသိမ်းရန် ရည်ရွယ်ပြီးစိုက်ပျိုးခဲ့ကြောင်းသိရှိရပါသည်။ တစ်ဧကစိုက်ပျိုးစရိတ် တစ်သိန်းငါးသောင်းကျော်ကုန်ကြပြီး နှစ်အနည်းငယ်အတွင်း အကျိုးဖြစ်ထွန်းမည့် ပေါ်လိုနီးယားပင် ဖြစ်ကြောင်းသိရှိရပါသည်။

            ပေါ်လိုနီးယားပင်သည် လျှင်မြန်စွာကြီးထွားလွယ်သော သစ်မာမျိုးဖြစ်ပြီး၃ နှစ်မှ စတင်၍ခုတ်လှဲရောင်းချနိုင်သည့် သစ်မာမျိုးဖြစ်သည်။ ပေါ်လိုနီးယားသည် အရှေ့တောင် အာဖရိကမျိုးနွယ်ဝင်ဖြစ်သော်လည်း ကမ္ဘာတစ်ဝှမ်းလုံးတွင် ဆောက်လုပ်ရေးလုပ်ငန်းများ ရေလွှာလျောစီဘုတ်များမှအစ ဇီဝလောင်စာထုတ်လုပ်မူ့အထိ အသုံးပြုကြကြောင်းသိရှိရပါသည်။ ပေါ်လိုနီးယားသစ်မာအမျိုးအစားဖြစ်ခြင်းကြောင့်လည်းကောင်း ကမ္ဘာတစ်ဝှမ်းလုံးတွင် ကျေနပ်ဖွယ်ကောင်းသည့် စျေးကွက်လိုအပ်ချက်ကိုရရှိထားကြောင်း သိရှိရပါသည်။

            ပေါ်လိုနီးယားအပင်သည် မြောက်အမေရိကသစ်တောပြုန်းတီးမူ့  ပြဿနာဖြစ်ပေါ်လာချိန် နောက်ပိုင်းတွင် လျှင်မြန်စွာ ပြန်လည်ကြီးထွားနိုင်သည့် အပင်အမျိုးအစားဖြစ်ကြောင်း လေ့လာမူများပြုလုပ်သိရှိခဲ့ရသည်။ အမြစ်နက်ရှိုင်းစွာဆင်းနိုင်ပြီး အမြစ်ကုတ်အားကောင်း၍ တောင်စောင်းများတွင်လည်း ကြံ့ခိုင်စွာပေါက်ရောက်နိုင်ပါသည်။

            ပေါ်လိုနီးယားသည် အပေါဆုံးကျွန်းသစ် အမျိုးအစားအဖြစ်သိကြပြီး အလူမီနီယမ်ကျွန်းဟုပင်တင်စား ခေါ်ဝေါ်ကြသည်။ လက်ရှိအချိန်တွင် ဥရောပတွင် စိုက်ပျိုးနေသည့် အပေါဆုံးစီးပွားရေးသစ်များထက် ၃ ပုံလျှင် ၂ပုံအထိ ပိုမိုပေါသည်။ ဝက်သစ်ချပင်များထက် ၃ဆခန့် ပေါ့ပါးပြီး  ထင်းရှုးပင်ထက် ထက်ဝက်ခန့်ပေါ့ပါးကြောင်း သိရပါသည်။

            ပေါ်လိုနီးယား၏ မာကြောမူ့မှာ အလေးချိန်အချိုးတူညီသည့် အခြားသော သစ်များထက် မာကြောမူ့အရှိဆုံးဖြစ်ပါသည်။ Aubum တက္ကသိုလ်မှ တိုင်းတာခဲ့ရာ ပေါ်လိုနီးယားသည် တစ်ကုဗပေဖိအားတွင် ခံနိုင်ရည် ၁၈၁ ပေါင်ရှိကြောင်းသိရပါသည်။ စိုက်ပျိုးရာတွင်လည်း ကျင်းနက်ရှိုင်းစွာတူးရန်မလိုအပ်ပဲ စိုက်ပျိုးနိုင်သည်။ ပေါ်လို နီးယားသည် မီးမကူးနိုင်သည့် အပင်အမျိုးအစားဖြစ်သည်။ အခြားသော ဝိသေသလက္ခဏာများမှာ အသားကျစ် ခြင်း၊ အလွန်ကောင်းသည့် တည်ငြိမ်မူ့ရှိခြင်း၊ အင်းဆက်ပိုးမွှားဒဏ်ခံနိုင်ခြင်း၊ မှိုတက်ပုပ်ဆွေးခြင်းကို ခံနိုင်ခြင်း တို့ဖြစ်သည်။

            ပေါ်လိုနီးယားပင်အား တရုတ်နှင့်ဂျပန်နိုင်ငံများတွင် လွန်ခဲ့သည့် နှစ်ပေါင်း ၂၅၀၀ ကျော်ကတည်းက အသုံးပြုခဲ့ကြပါသည်။ ယခုအချိန်တွင် သြစတြေးလျ၊ အမေရိကန်နှင့် ဥရောပနိုင်ငံများသည် ပေါ်လိုနီးယားပင်၏ ထူးခြားကောင်းမွန်သော ဝိသေသလက္ခဏာများကြောင့် အဓိကသုံးစွဲလာကြသည်။

            ပေါ်လိုနီးယားဖြင့် ပြုလုပ်သော အဓိကထုတ်ကုန်များမှာ ပိုးမွှားဒဏ်ခံနိုင်ခြင်းကြောင့် အိမ်ဆောက်လုပ်ခြင်း၊ အခြားသောအဆောက်အဦးများဆောက်လုပ်နိုင်ခြင်း၊ ပရိဘောဂပစ္စည်းများ၊ ရေလွှာလျောစီးဘုတ်များ၊ အသံနှင့်ပတ်သတ်၍ ပြုလုပ်ရသော တူရိယာပစ္စည်းများ၊ စက္ကူပြုလုပ်ရန် ပျော့ဖတ်များ၊အက်စစ်နှင့်ဝိုင်များ သိုလှောင်ထားရန်စည်များ၊ ပျားအိမ်များ၊ ကြိတ်သားများအတွက် အပေါ်ယံအလွှာများ၊ လေယာဉ်ပျံများနှင့် သင်္ဘောငယ်များ အစရှိသည့်တို့တွင် ထည့်သွင်းအသုံးပြုရန် လိုအပ်သည့် ပေါ့ပါးမူ့ရှိသည့်အတွက် အစိတ်အပိုင်းငယ်များပြုလုပ်ခြင်း၊ ကြမ်းခင်းပြားများ အဓိက အသုံးပြုကြပါသည်။ ပေါ်လိုနီးယားအသားဖြင့် ပြုလုပ်ထားသည့် ရေလွှာလျောစီးဘုတ်များသည် လွန်ခဲ့သည့် နှစ်အနည်းငယ်အတွင်း နာမည်ရလာခဲ့သည်။ ပေါ်လိုနီးယားအပင်တစ်ပင် ဖြစ်ထွန်းအောင်မြင်သွားလျှင် အပင်များစွာပွားယူနိုင်ကြောင်း လေ့လာသိရှိရပါသည်။

            ပေါလိုနီးယား(ကျွန်းသစ်)သည် ယခုအချန်တွင် ရောင်းဝယ်နေသည့်ဈေးကွက် မရှိသေးသော်လည်း စိုက်ပျိုးသူတောင်သူများအနေဖြင့် ပေါလိုနီးယားကျွန်းသစ်များပေါ်ချိန်တွင် ပရိဘောဂပြုလုပ်ရာ၌ လည်းကောင်း၊ အိမ်ဆောက်ရာ၌လည်းကောင်း အသုံးပြုရန်နှင့် ပူပြင်းလွန်းသည့် ဝမ်းတွင်းဒေသအား ရာသီဥတုမျှတရန်အတွက်လည်းကောင်း၊ သဘာဝပတ်ဝန်းကျင်ထိန်းသိမ်းမှုဖြစ်ရန်အတွက် မျှော်မှန်း၍စိုက်ပျိုးကြကြောင်း စိုက်ပျိုးတောင်သူ ဦးထွန်းလူမှ စိုက်ပျိုးဖြစ်သည့် ရည်ရွယ်ချက်များအား ရှင်းလင်းပြောကြားပါသည်။ထို့ကြောင့် ပေါ်လိုနီးယား(ကျွန်းသစ်)အပင်အား တစ်ပိုင်တစ်နိုင်သာမက စီးပွားဖြစ်စိုက်ပျိုးသင့်ကြောင်း ယခုလက်ရှိ စိုက်ပျိုးနေသော တောင်သူဦးထွန်းလူပြောကြားချက်အရ သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်းသည် ၁၈.၁.၂၀၂၂ ရက်နေ့တွင် ရေနံချောင်းမြို့၊ စက်မှုဇုန်ရှိ (New One)စက်ရုံ၌ ကျင်းပပြုလုပ်သော တိုင်းတောင်သူ ဖွံ့ဖြိုးရေးအဖွဲ့၏ ပဲစဉ်းငုံသီးနှံစုပေါင်းရောင်းချပွဲသို့ သွားရောက်၍ ဒု-ဥက္ကဌ ဦးမြင့်ရွှေနှင့် တွေ့ဆုံမေးမြန်းခဲ့မှု ပြုလုပ်ခဲ့ကြောင်းသိရှိရပါသည်။

          မကွေးခရိုင်၊ ရေနံချောင်းမြို့နယ်နှင့် ချောက်မြို့နယ်တို့မှ တိုင်းတောင်သူ ဖွံ့ဖြိုးရေးအဖွဲ့ဝင် ပဲစဉ်းငုံစိုက်တောင်သူများမှ စုပေါင်းရောင်းချခဲ့ခြင်းဖြစ်ကြောင်း၊ တိုင်းတောင်သူဖွံ့ဖြိုးရေးအဖွဲ့၏ မျှော်မှန်းချက်အနေဖြင့် အရည်အသွေးကောင်းမွန်ပြီး ဒေသရာသီဥတုနှင့်ကိုက်ညီသည့် ဆီထွက် သီးနှံနှင့်ပဲမျိုးစုံသီးနှံများကို မျိုးကောင်းမျိုးသန့်မျိုးစေ့ထုတ်လုပ်ခြင်းဖြင့် ဈေးကွက်အာမခံချက် ရှိသော မျိုးကောင်းမျိုးသန့်များအား အဖွဲ့ဝင်တောင်သူများသို့ ပြန်လည်ဖြန့်ဝေပေးနိုင်ရန်နှင့် အဖွဲ့ဝင်များ အားလုံးစားနပ်ရိက္ခာဖူလုံပြီး ရေရှည်လူနေမှုဘဝမြင့်မားတိုးတက်လာစေရန် မျှော်မှန်းကြောင်း၊ ထွက်ကုန်နှင့်ဝန်ဆောင်မှုများအနေဖြင့် အပူပိုင်းဇုံဒေသရှိ ဆီထွက်သီးနံနှင့် ပဲမျိုးစုံသီးနှံများ စနစ်တကျဖြင့် ကျယ်ပြန့်စွာ စိုက်ပျိုးထုတ်လုပ်လာနိုင်ရန်အတွက် တောင်သူများအား စိုက်ပျိုးရေး ဦးစီးဌာနနှင့်ပူးပေါင်း၍ GAP သီးနှံများစိုက်ပျိုးလာရေး တောင်သူများအား နည်းပညာများဖြန့်ဝေ ပေးခဲ့ပါကြောင်း၊ စိုက်ပျိုးသူတောင်သူများအတွက် အရည်အသွေးပြည့်မှီသော စိုက်ပျိုးရေး သွင်းအားစု များအား အချိန်မှီရရှိစေရေးအတွက် သွင်းအားစုရောင်းချသည့်ကုမ္ပဏီများနှင့် ချိတ်ဆက်၍ အရည်အသွေးအာမခံပြီး အကြွေးစနစ်ဖြင့်ဝယ်ယူနိုင်ရေး ချိတ်ဆက်ဆောင်ရွက်ပေးခဲ့ကြောင်း၊ တောင်သူများအတွက် အတိုးနှုန်းသက်သာသောချေးငွေများ လက်လှမ်းမှီလာစေရန် ဘဏ်များနှင့် ချိတ်ဆက်ဆောင်ရွက်ခြင်းများပြုလုပ်ပေးခဲ့ပါကြောင်း၊ သီးနှံစျေးကွက်များ ကောင်းမွန်ခိုင်မာလာ စေရန်အတွက် စုပေါင်းရောင်းချသည့်စနစ်ဖြင့် ပွင့်လင်းမြင်သာစွာဆောင်ရွက်ခဲ့ကြောင်း တောင်သူ ဖွံ့ဖြိုးရေးအဖွဲ့ ဒု-ဥက္ကဌ ဦးမြင့်ရွှေ၏ ပြောကြားချက်အရ သိရှိရပါသည်။

          ရေနံချောင်းမြို့နယ်တွင် တိုင်းတောင်သူဖွံ့ဖြိုးရေးအဖွဲ့မှ ဦးဆောင်၍ ပဲစဉ်းငုံသီးနှံစုပေါင်း ရောင်းချပွဲကို (၁၅.၁၂.၂၀၂၁)ရက်နေ့မှစ၍ Export ကုမ္ပဏီများနှင့်တိုက်ရိုက် Video Conferencing ဖြင့် ချိတ်ဆက်ရောင်းချခဲ့ရာ ပဲစဉ်းငုံပိဿာ(၂၀)(၁)တင်းလျှင်(၃၅၀၀၀)ကျပ်မှ နေ့စဉ်ပေါက်ဈေးဖြင့် ရောင်းချခဲ့ရာ (၁၉.၁.၂၀၂၂)ရက်နေ့တွင် အမြင့်ဆုံး (၄၂၀၀ဝိ/-)ကျပ်ထိ ရောင်းချခဲ့ရကြောင်း သီးနှံများကို ချိန်တွယ်မှုစနစ်မှန်ကန်စွာဖြင့် ပွဲခ၊ လုပ်သားခပေးချေရခြင်းမရှိဘဲ အိတ်ခွံအတွက် (၁၂.၅)ကျပ်သားကိုသာ ပေးခဲ့ရသည့်အတွက် တောင်သူများအနေဖြင့် တစ်ဦးချင်းပွဲရုံများတွင် ရောင်းချသည်ထက် အကျိုးအမြတ်ပိုမိုရရှိကြောင်းသိရှိရပါသည်။

မကွေးခရိုင် ရေနံချောင်းမြို့နယ်နှင့် ချောက်မြို့နယ်တို့တွင် ပဲစဉ်းငုံစိုက်ဧကမှာ (၃၅၀၀၀)ဧက ဝန်းကျင်စိုက်ပျိုးခဲ့ပြီး ယခင်နှစ်(၁)ဧက စိုက်ပျိုးထုတ်လုပ်ကုန်ကျစရိတ်မှာ (၁၅၀၀၀၀ ကျပ်မှ ၂၀၀၀၀၀ ကျပ်)ကြားကုန်ကျ၍ (၁)တင်းရောင်းစျေးမှာ (၂၀၀၀၀ကျပ်မှ ၂၅၀၀၀ကျပ်) ကြားသာရှိခဲ့သော်လည်း ယခုနှစ်တွင် သွင်းအားစုဈေးနှုန်းမြင့်တက်ခဲ့သည့်အတွက် (၁)ဧက စိုက်ပျိုးထုတ်လုပ်မှု (၂၁၀၀၀၀ ကျပ်မှ ၂၅၀၀၀၀ကျပ်) ဝန်းကျင်ရှိခဲ့ပြီး (၁)ဧကအထွက်နှုန်းအနေဖြင့် (၁၀တင်းမှ၁၃တင်း) ကြား ရရှိခဲ့ပြီး ပေါ်ကာစတွင် (၃၄၀၀၀ကျပ်)ဝန်းကျင်ကျပ်ရရှိခဲ့၍ (၁)ဧက အကျိုးအမြတ်အနေဖြင့် (၁၃၀၀၀၀)ကျပ်ဝန်းကျင်ရရှိခဲ့ပါကြောင်း၊ ပဲစဉ်းငုံသီးနှံမှာ အိန္ဒိယ၏ ပဲဝယ်ယူမှုအခြေအနေပေါ် မူတည်၍ ဈေးနှုန်းအတက်အကျရှိသော်လည်း တိုင်းတောင်သူဖွံ့ဖြိုးရေးအသင်းဝင်တောင်သူများအနေဖြင့် နည်းပညာနှင့်အရည်အသွေးမှီသွင်းအားစုများအား ဈေးနှုန်းမှန်ကန်စွာဝယ်ယူရရှိခဲ့သည့်အပြင် စိုက်ပျိုးချိန်လိုအပ်သည့် ငွေကြေးအရင်းအနှီးများလည်း အတိုးနှုန်းသက်သာစွာရရှိခဲ့သည့် အတွက် တွက်ခြေကိုက်မှုရှိကြောင်း အလားတူမကွေးမြို့နယ်တွင်လည်း တိုင်းတောင်သူ ဖွံ့ဖြိုးရေးအဖွဲ့၏ သီးနှံစုပေါင်းရောင်းချပွဲကို မကွေးမြို့နယ်၊ ကံလှကျေးရွာရှိ Good Brother ကုမ္ပဏီ၏ ထွန်စက်စခန်းတွင် ပြုလုပ်ကြောင်းသိရှိရပါသည်။

 DOCA(မကွေး)

         ကိုဗစ်-၁၉ ရောဂါထိန်းချုပ်မှုနှင့်ဆက်စပ်၍ လွယ်ဂျယ်နယ်စပ်ဂိတ်ကို ၂၀၂၁ ခုနှစ် ဇူလိုင်လ လယ်မှစတင်ပြီး တရုတ်နိုင်ငံဘက်မှ စတင်ပိတ်ထားခဲ့ရာမှ ၂၀၂၂ ခုနှစ် ဇန်နဝါရီလ(၁၇)ရက်နေ့တွင် ပြန်လည်ဖွင့်လှစ်၍ ကုန်သွယ်မှုစမ်းသပ်ဆောင်ရွက်နေပြီဖြစ်ကြောင်း၊ နှစ်နိုင်ငံကုန်သွယ်မှုလုပ်ငန်းများ စတင်ဆောင်ရွက်ရေးအတွက် မြန်မာနိုင်ငံဘက်မှတာဝန်ရှိသူများနှင့် တရုတ်နိုင်ငံတာဝန်ရှိသူများသည် onlineစနစ်ဖြင့် (၃)ကြိမ် ဆွေးနွေးခဲ့ပြီး ကိုဗစ်-၁၉ စည်းကမ်းချက်များနှင့်အညီ ပြင်ဆင်ဆောင်ရွက်ခဲ့ရာ တရုတ်နိုင်ငံဘက်မှ ကြည့်ရှုစစ်ဆေးပြီးနောက် ဖွင့်လှစ်ခဲ့ခြင်းဖြစ်ပါသည်။ မြန်မာနိုင်ငံဘက်မှပို့ကုန် အဖြစ် ကြံ၊ တစ်သျှူးငှက်ပျောတို့ကို တင်ပို့မည်ဖြစ်ပြီး တရုတ်နိုင်ငံဘက်မှ ဓာတ်မြေဩဇာ၊ အထည်အလိပ်နှင့် အိမ်သုံးကုန်ပစ္စည်းအမျိုးမျိုးတို့ကို သွင်းကုန်အဖြစ် ဆောင်ရွက်မည်ဖြစ်ကြောင်း သိရှိရပါသည်။

          အစေ့ထုတ်ပြောင်းကို အဓိကအားဖြင့် ပြည်တွင်းမွေးမြူရေးအစားအစာအဖြစ် အများဆုံး အသုံးပြုကြပါသည်။ အရက်ချက်လုပ်ငန်းများ၊ ထောပတ်ဖြင့်ပေါက်ပေါက်ပွင့်ပြုလုပ်၍ တန်ဖိုးမြှင့် ထုတ်ကုန်သရေစာအဖြစ်လည်း စားသုံးကြပါသည်။ အစေ့ထုတ်ပြောင်း(မိုး)ကို မေ ၊ ဇွန်လများတွင် စိုက်ပျိုးကြပြီး အောက်တိုဘာ၊ နိုဝင်ဘာ၊ ဒီဇင်ဘာလများတွင် ရိတ်သိမ်းလေ့ရှိပါသည်။ အစေ့ထုတ် ပြောင်း(ဆောင်း)ကို အောက်တိုဘာ၊ နိုဝင်ဘာလများတွင် စိုက်ပျိုးကြပြီး ဖေဖော်ဝါရီ ၊ မတ် ၊ ဧပြီလ များတွင် ရိတ်သိမ်းလေ့ရှိပါသည်။ ၂၀၂၁-၂၀၂၂ခုနှစ်တွင် မြင်းခြံခရိုင်အနေဖြင့် အစေ့ထုတ်ပြောင်း (မိုး)သီးနှံကို မြင်းခြံမြို့နယ်တွင်(၁၇၈၅)ဧက၊ တောင်သာမြို့နယ်တွင်(၂၇)ဧက၊ နွားထိုးကြီးမြို့နယ် တွင်(၅၀၅)ဧက၊ ငါန်းဇွန်မြို့နယ်တွင်(၂၇၀၃)ဧက စိုက်ပျိုးလျက်ရှိကာ မြင်းခြံခရိုင်ချုပ်အနေဖြင့် အစေ့ထုတ်ပြောင်း(မိုး)စုစုပေါင်းစိုက်ဧက(၅၀၂၀) စိုက်ပျိုးကြောင်းသိရှိရပါသည်။ အစေ့ထုတ် ပြောင်း(ဆောင်း)အနေဖြင့် မြင်းခြံမြို့နယ်တွင်(၉၀၂၅)ဧက၊ တောင်သာမြို့နယ်တွင်(၄၄၁)ဧက၊ နွားထိုးကြီးမြို့နယ်တွင်(၅၅၆)ဧက၊ ငါန်းဇွန်မြို့နယ်တွင်(၄၉၂၇)ဧက စိုက်ပျိုးလျက်ရှိကာ မြင်းခြံ ခရိုင်ချုပ်အနေဖြင့် အစေ့ထုတ်ပြောင်း(ဆောင်း)(၁၄၉၄၉)ဧက စိုက်ပျိုးထားရှိပါသည်။ ကုန်စည် စီးဆင်းမှုအနေဖြင့် မြင်းခြံမြို့သို့  မြို့နယ်အတွင်း ကျေးရွာအစုံမှ အစေ့ထုတ်ပြောင်းများ ဝင်ရောက် ပြီး မြင်းခြံမြို့မှ မြဝတီ/ရန်ကုန်မြို့များသို့ တင်ပို့ရောင်းချကြောင်းနှင့် မြင်းခြံခရိုင်အတွင်းမှ ထွက်ရှိ သည့် အစေ့ထုတ်ပြောင်းများ၏ (၆၅/၇၀)ရာခိုင်နှုန်းခန့်သည် ငါန်းဇွန်မြို့နယ်၊ မြို့သာစက်မှုဥယျာဉ် မြို့တော်ရှိ တိရစ္ဆာန်အစားအစာထုတ်လုပ်သည့်စက်ရုံများဖြစ်သည့် Japfa Comfeed Myanmar Pte.Ltd နှင့် De Hues Myanmar Ltd  ကုမ္ပဏီများသို့ တိရစ္ဆာန်အစားအစာထုတ်လုပ်သည့် ကုန်ကြမ်းအဖြစ် အသုံးပြုရန် တင်ပို့ရောင်းချလျက်ရှိကြောင်း ကုန်သည်များထံမှ လေ့လာသိရှိရ ပါသည်။

        လက်ရှိကာလတွင် အစိုဓာတ်ပါဝင်မှု(၁၄/၁၅)ရာခိုင်နှုန်းရှိသည့် အစေ့ထုတ်ပြောင်း တစ်ပိဿာလျှင်(၆၅၀/၆၇၀)ကျပ်နှုန်းဖြင့် ရောင်းဝယ်လျက်ရှိပါသည်။ ယခင်အပတ်တွင်ဖြစ်ပေါ် ခဲ့သောဈေးနှုန်းမှာ(၆၃၀/၆၄၀)ကျပ် အရောင်းအဝယ်ဖြစ်ခဲ့ပြီး သိသိသာသာ ပြောင်းလဲမှုမရှိသော် လည်း ယခင်နှစ်ကာလတူဈေးနှုန်းမှာ (၅၃၀/၅၄၀)ကျပ်ဖြစ်သဖြင့် လက်ရှိဈေးနှုန်းဖြင့် နှိုင်းယှဉ်ပါက ယခင်နှစ်ဈေးနှုန်းထက် အစေ့ထုတ်ပြောင်းဈေးနှုန်း မြင့်တက်ခဲ့ကြောင်း တွေ့ရှိရပါသည်။ လက်ရှိအချိန်တွင် အစေ့ထုတ်ပြောင်း(မိုး) စိုက်ဧကများအားလုံး ရိတ်သိမ်းပြီးထွက်ပေါ်ခဲ့သော်လည်း စိုက်ဧကနည်းသဖြင့် အစေ့ထုတ်ပြောင်း(ဆောင်း)ကဲ့သို့ ဈေးကွက်အတွင်း အလုံးအရင်းဖြင့် ဝင်ရောက်လာခြင်းမျိုးမရှိဘဲ ခပ်ပါးပါးသာ ရောင်းဝယ်လျက်ရှိပါသည်။ အစေ့ထုတ်ပြောင်း(ဆောင်း) အနေဖြင့် စိုက်ဧကအနည်းငယ်သာ ဖူးချိုးရိတ်သိမ်းလျက်ရှိနေပြီး စိုက်ဧကအားလုံးရိတ်သိမ်းကာ လှိုင်လှိုင်ထွက်ပေါ်လာမည့် ဖေဖော်ဝါရီ ၊ မတ်လများမှသာ ရောင်းဝယ်တင်ပို့မှုများ ဝေဝေဆာဆာ ဖြင့် လုပ်ငန်းများပိုမိုတွင်ကျယ်ဖြစ်လာမည်ဖြစ်ကြောင်း လေ့လာသိရှိရပါသည်။ အစေ့ထုတ်ပြောင်း (ဆောင်း)သီးနှံစိုက်ပျိုးရာတွင် တစ်ဧကကုန်ကျစရိတ်အနေဖြင့် ကျပ်(၄၀၀၀၀၀)ဝန်းကျင်ကုန်ကျပြီး တစ်ဧကအထွက်နှုန်းမှာတင်း(၇၀)ခန့်၊ပိဿာအားဖြင့်(၁၂၆၀)ပိဿာခန့်ထွက်ရှိကာ လက်ရှိဈေးကွက် အတွင်းရှိဈေးနှုန်း တစ်ပိဿာလျှင်(၆၅၀)ကျပ်ဖြင့် တွက်ချက်ပါက တစ်ဧကဝင်ငွေ(၈၁၉၀၀၀)ကျပ် ဖြစ်ပါသည်။  တစ်ဧကအကျိုးအမြတ်မှာ(၄၀၀၀၀၀)ကျပ်ခန့်ဖြစ်သဖြင့် တစ်ဧကလျှင်(၁၀၀%)အကျိုး အမြတ်ရှိသည့်အတွက် တောင်သူများအနေဖြင့် ယခင်ထက် ပိုမိုတိုးချဲ့စိုက်ပျိုးသင့်ပါကြောင်း အစေ့ထုတ်ပြောင်းစိုက်ပျိုးထုတ်လုပ်သည့် တောင်သူတစ်ဦးထံမှ လေ့လာသိရှိရပါသည်။

DOCA(မန္တလေး)

ရှမ်းပြည်နယ်(တောင်ပိုင်း)တွင် သစ်သီးဝလံ၊ ဟင်းသီးဟင်းရွက်များကို စိုက်ပျိုးကြသည့်အပြင် မွေးမြူရေးလုပ်ငန်းများကိုပါ တွင်တွင်ကျယ်ကျယ်လုပ်ကိုင်လျက်ရှိပြီး ရှမ်းပြည်နယ်(တောင်ပိုင်း) ညောင်ရွှေမြို့နယ်ရှိ ရှမ်းရိုးမ မွေးမြူရေးဇုံ အပြင် တောင်ကြီးမြို့နယ်အနီးပတ်ဝန်းကျင်ရှိ (၆)မိုင်၊ အေးသာယာ(ထုံးဖို)၊ ရွှေညောင်၊ ဇလဲ စသည့်ကျေးရွာများတွင်လဲ ဥစားကြက် မွေးမြူရေးလုပ်ငန်း များကို တစ်ပိုင်တစ်နိုင် လုပ်ကိုင်နေကြခြင်းများ ရှိပါသည်။ ဥစားကြက် မွေးမြူခြင်းတွင် ဥစားကြက်မ အကောင်ရေ (၅၀၀၀)ဆန့် အလျား(၁၅၀' ၊ အနံ ၃၃' ၊ အမြင့် ၁၈')ခန့်ရှိ သွပ်မိုး၊ ထရံကာ ကြက်ခြံဆောက်၍ မွေးမြူလုပ်ကိုင်လျက်ရှိပါတယ်။ ကြက်စာကို ပြောင်း၊ ပဲဖတ်၊ ခရုမှုန့်၊ ငါးပေါင်းများအား ရောစပ်ကာ ကြက်စာအဖြစ်ကျွေးသည်ဟု သိရှိရပါတယ်။ ဥစားကြက်မ အကောင် (၅၀၀၀)မှ ဥ ဥနှုန်းမှာ နေ့စဉ်အလုံးရေ (၅၀၀၀) ရှိကြောင်း သိရှိရပါသည်။
ဥစားကြက် မွေးမြူရေးလုပ်ငန်း တွင်ကျယ်လာသလို ကြက်ဥအရောင်းအဝယ်ဈေးကွက်များလဲ ကောင်းလာကြောင်း၊ ကြက်ဥမှာ လူတစ်ဦးအတွက် အာဟာရပြည့်မီရန် လွန်စွာအထောက်အကူပြုတဲ့ အတွက် ကိုဗစ်-၁၉ ရောဂါဖြစ်ပွားမှုကာလတွင် ရောင်းအားအလွန်မြင့်တက်ကာ ယခင်နှစ်ကထက် ဈေးကောင်းများရရှိခဲ့ကြောင်း၊ ယခင်နှစ်က ကြက်ဥတစ်လုံးလျှင် အမြင့်ဆုံးဈေး (၁၁ဝိ/- မှ ၁၂ဝိ/-)ထိ ရရှိခဲ့သော်လည်း ဒီနှစ်မှာတော့ ကြက်ဥဈေးမှာ အနိမ့်ဆုံးဈေး ဥငယ်တစ်လုံးလျှင် (၁၃၅၀/-) မှ အမြင့်ဆုံးဈေး ဥကြီးတစ်လုံးလျှင် (၁၅ဝိ/-)ထိ ဈေးရရှိခဲ့ကြောင်း၊ ရှမ်းပြည်နယ်(တောင်ပိုင်း)မှ ထွက်ရှိသော ကြက်ဥ များကို ရန်ကုန်၊ ဧရာဝတီ၊ စစ်ကိုင်း၊ မန္တလေး၊ မကွေး၊ နေပြည်တော်(ပဲခူး)၊ ရှမ်းပြည်နယ်(အရှေ့ပိုင်း)၊ ကယား စသည့်ဒေသများသို့ ဖြန့်ဖြူးရောင်းချလျက်ရှိကြောင်း သိရှိရပါသည်။
DOCA(ရှမ်း)