ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ ပြည်ခရိုင်အတွင်းရှိ စားသုံးသူရေးရာဦးစီးဌာန၊ ပန်းတောင်းမြို့နယ် တာဝန်ခံ ဒေါ်သန်းသန်းအေးနှင့် အဖွဲ့သည် (၁၂.၁.၂၀၂၂)နေ့လည် (၂:၀၀)အချိန်တွင် ပန်းတောင်း မြို့၊ မင်းရပ်ရပ်ကွက်ရှိ ခရမ်းချဉ်စိုက်ပျိုးသော တောင်သူ ဦးအောင်မြင့်သန်း၏ ခရမ်းချဉ်စိုက်ကွင်းသို့ သွားရောက် ကွင်းဆင်းလေ့လာခဲ့ပါသည်။

          ထိုသို့သွားရောက်လေ့လာရာတွင် ခရမ်းချဉ်ပင်ကို သောင်ပြင်မြေနုကျွန်းများတွင် (၃)ဧက စိုက်ပျိုးထားပြီး စိုက်ပျိုးသည့်မျိုးများမှာ ထိုင်ဝမ်မျိုးနှင့် ကိုင်းခရမ်းချဉ်မျိုးတို့ဖြစ်ပါသည်။ တစ်ဧက လျှင် ခရမ်းချဉ်အပင် (၇၀၀၀)ခန့်စိုက်ပျိုးနိုင်ပြီး တစ်ပင်လျှင် အသီး (၃/၄) ပိဿာခန့်အထိ ထွက်ရှိ ကြောင်းသိရှိရပါသည်။  ခရမ်းချဉ်စိုက်ခင်းထဲတွင် ကြားညှပ်၍ မြွေစွယ်ငရုပ်သီးများ ကိုလည်း စိုက်ပျိုးထားကြောင်းသိရပါသည်။

          ခရမ်းချဉ်သီးကို စက်တင်ဘာလ စတုတ္ထပတ် မြစ်ရေကျချိန် သဲသောင်ပြင်များ ပေါ်တွင် စတင်စိုက်ပျိုးပြီး ဒီဇင်ဘာလကုန်နှင့် ဇန်နဝါရီလဆန်းပိုင်းတွင် စတင်ထွက်ပေါ်ပါသည်။ ခရမ်းချဉ်သီး  စျေးများမှာ ပေါ်ခါစတွင် အထွက်နည်းပြီး ဝယ်ယူစားသုံးမှုများသဖြင့် တစ်ပိဿာလျှင် ၂၈၀၀ကျပ်အထိ စျေးမြင့်ခဲ့ပြီး ယခုခရမ်းချဉ် အထွက်လှိုင်ချိန်ဖြစ်သဖြင့် စျေးမှာ တစ်ပိဿာလျှင် (၁၀၀၀)ကျပ်အထိကျဆင်းလာပါသည်။

          ပန်းတောင်းမြို့ရှိ ခရမ်းချဉ်သီးစျေးကွက်အနေဖြင့် ပန်းတောင်းစျေးသို့ သွားရောက် ရောင်းချ ကြပြီး စိုက်ခင်းထဲသို့လည်း ရွှေတောင်ဘက်မှ ခရမ်းချဉ်ကုန်သည်များ လာရောက်ဝယ်ယူ လျှက်ရှိကြောင်းသိရပါသည်။ ယခုနှစ်၌ ခရမ်းချဉ်သီးစျေးကောင်းရသလို နောင်လမည့်နှစ်များတွင် လည်း ခရမ်းချဉ်သီးကို စောစောစိုက်ပျိုးနိုင်မည်ဆိုလျှင် စျေးကောင်းရပြီး အကျိုးအမြတ်များ ဖြစ်ထွန်းမည်ဖြစ်ကြောင်း သိရှိရပါသည်။

စားသုံးသူရေးရာဦးစီးဌာန

ပြည်ခရိုင်

          ယင်းမာပင်ခရိုင်သည်  ပဲမျိုးစုံနှင့်ဆီထွက်သီးနှံများ အဓိက စိုက်ပျိုးထုတ်လုပ်သည့် ခရိုင်တစ်ခု ဖြစ်ပါသည်။ နှစ်စဉ်ပဲမျိုးစုံ စိုက်ဧက (၃)သိန်းကျော်နှင့် ဆီထွက်သီးနှံစိုက်ဧက (၄)သိန်းခန့် စိုက်ပျိုးထွက်ရှိကြောင်း သက်ဆိုင်ရာဌာနများ၏ စာရင်းဇယားအရ သိရှိရပါသည်။ ဆီထွက်သီးနှံများ အနက် နှမ်း၊ မြေပဲနှင့် နေကြာသီးနှံများကို အဓိက စိုက်ပျိးကြပြီး နေကြာသီးနှံမှာ ဆီထွက်သီးနှံ စုစုပေါင်း စိုက်ဧက၏( ၂၀%) ကျော်ခန့်ရှိကြောင်း လေ့လာသိရှိရပါသည်။

         ယင်းမာပင်ခရိုင်အတွင်းရှိ မြို့နယ်(၄)မြို့နယ်၌ နေကြာသီးနှံစိုက်ဧက (၉)သောင်းကျော် စိုက်ပျိုးထွက်ရှိပြီး မိုးနေကြာနှင့် ဆောင်းနေကြာဟူ၍ စိုက်ပျိုးကြောင်းသိရှိရပါသည်။ မိုးနေကြာကို မေ၊ ဇွန်လများတွင်လည်းကောင်း၊ ဆောင်းနေကြာကို စက်တင်ဘာလ၊အောက်တိုဘာလများတွင် လည်းကောင်း စိုက်ပျိုးကြကြောင်း ၊ဒေသမျိုးများနှင့် ရေဆင်း (၁)၊(၂) မျိုးများကို အဓိကစိုက်ပျိုးကြပြီး နေကြာသီးသန့်စိုက်ခင်းအဖြစ်လည်းကောင်း၊ ကုလားပဲ၊မြေပဲ စိုက်ခင်းများ၌ သီးညှပ်အဖြစ်လည်းကောင်း စိုက်ပျိုးလေ့ရှိကြောင်း ဒေသခံတောင်သူများထံမှ သိရှိရပါသည်။ ယခုနှစ်တွင် မိုးနေကြာစိုက် ဧက(၈)သောင်းကျော် စိုက်ပျိုးထားရှိပြီး ဒီဇင်ဘာလကုန်ပတ်မှစ၍ ဆောင်းနေကြာများ ရိတ်သိမ်းလျက်ရှိကြောင်း သိရှိရသည်။

       နေကြာသီးနှံသည် စိုက်ပျိုးရလွယ်ကူခြင်း၊ ဒေသ၏ ရေ၊မြေ၊ရာသီဥတုနှင့် ကိုက်ညီခြင်း၊စိုက်ပျိုးထုတ်လုပ်မှု ကုန်ကျစရိတ်သက်သာခြင်းနှင့် ဒေသတွင်း ဈေးကွက်ဝယ်လိုအားရှိခြင်းများကြောင့် တောင်သူများ နှစ်စဉ်ပုံမှန် စိုက်ပျိုးလျက်ရှိကြောင်း သိရှိရပါသည်။ ယခုနှစ်နေကြာတစ်ဧက စိုက်ပျိုး ထုတ်လုပ်မှုကုန်ကျစရိတ် ကျပ်(၂)သိန်း ဝန်းကျင်ကုန်ကျပြီး တစ်ဧက တင်း(၂၀) ဝန်းကျင်ထွက်ရှိကြောင်း၊ လက်ရှိဈေးကွက်အတွင်း နေကြာတစ်တင်း ကျပ်(၂)သောင်း  ပေါက်ဈေးရှိနေသည့်အတွက် တစ်ဧက ကျပ်(၂)သိန်းကျော်ခန့် အကျိုးအမြတ်ရှိကြောင်း ငမောင်းကျေးရွာတောင်သူ ဦးရွှေဝင်း၏ ပြောပြချက်အရ သိရှိရပါသည်။

      ယခုနှစ် စိုက်ပျိုးထွက်ရှိသည့် နေကြာသီးနှံသည် ရာသီဥတုကောင်းမွန်မျှတသည့်အတွက် အထွက်နှုန်း ကောင်းမွန်သလို ဆီထွက်နှုန်းလည်းကောင်းမွန်ကြောင်း၊ နေကြာတစ်တင်းကို ဆီကြိတ်ခွဲပါက နေကြာဆီ (၃.၅) ပိဿာနှင့် နေကြာဖတ် (၆) ပိဿာခန့် ထွက်ရှိကြောင်း၊ ဈေးကွက်အတွင်း၌ နေကြာဆီတစ်ပိဿာကို (၆၀၀၀) ကျပ်နှင့် နေကြာဖတ် တစ်ပိဿာကို (၈၉၀) ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခင်နှစ်ကာလတူနှင့် နှိုင်းယှဉ်ပါက နေကြာဆီ တစ်ပိဿာလျှင် (၅၀၀) ကျပ်မြင့်တက်ခဲ့ပြီး နေကြာဖတ်တစ်ပိဿာလျှင် (၂၀၀) ကျပ်မြင့်တက်ခဲ့ကြောင်း၊ ဒေသတွင်း ဆီစက်များနှင့် နေကြာစေ့လှော်လုပ်ငန်းရှင်များမှ ပုံမှန်ဝယ်ယူလျက်ရှိကြောင်း   ရွှေလှေကျေးရွာရှိ  ရွှေအိုးစည်ဆီစက်ပိုင်ရှင် ဦးဖိုးလုံး၏ ပြောပြချက်အရ သိရှိရပါသည်။

        ဒေသတွင်းစားသုံးဆီဈေးကွက်၌လည်း စားသုံးဆီများ ဈေးနှုန်းကွာဟမှု နည်းပါး လာခြင်းများကြောင့် ကျန်းမာရေးနှင့် ညီညွှတ်သည့် နေကြာဆီများကို ဝယ်ယူသုံးစွဲမှု ပိုမိုများပြားလာကြောင်း သိရှိရပါသည်။ဒေသတွင်း ဆီစက်လုပ်ငန်းရှင်များအနေဖြင့်လည်း  နဝလီ ကြိတ်ခွဲခြင်းဆီနေကြာများကို ဝယ်ယူကြိတ်ခွဲပြီး ထွက်ရှိလာသည့် နေကြာဆီများကို ဒေသတွင်း ဈေးကွက်နှင့် မုံ၇ွာ၊ မန္တလေးနှင့် ရန်ကုန်မြို့ကြီးများသို့ တင်ပို့ရောင်းချလျှက်ရှိကြောင်း သိရှိရပါသည်။

        နေကြာသီးနှံသည် တောင်သူများအတွက် စိုက်ပျိုးထုတ်လုပ်မှုကုန်ကျစရိတ်သက်သာပြီး ထိုက်သင့်သည့် အကျိုးအ မြတ်ရရှိကြောင်း၊ ယနေ့ခေတ်ကာလတွင် စားသုံးသူများအနေဖြင့် ကျန်းမာရေးရှုထောင့်အရ နေကြာဆီကို ရွေးချယ်ဝယ်ယူ အသုံးပြုမှု ပိုများလာကြောင်း၊ နေကြာဆီ စားသုံးမှု ပိုမိုမြင့်မားလာသည်နှင့်အမျှ နေကြာဆီဈေးကွက်မှာလည်း ပိုမိုကျယ်ပြန့်လာပြီး ဈေးကွက်ဈေးစုပိုမိုရရှိလာကြောင်း၊ စိုက်ပျိုးတောင်သူများတွက်ခြေကိုက်ပြီး အကျိုးအမြတ်ရရှိနေ့သည့် အတွက် နေကြာသီးနှံကို ယခုထက်ပိုမိုတိုးချဲ့စိုက်ပျိုးသင့်ပါကြောင်း တိုက်တွန်း‌ရေးသားဖော်ပြလိုက်ရပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

            စားသုံးသူရေးရာဦးစီးဌာန၊ မန္တလေးတိုင်း‌ဒေသကြီး၊ မိတ္ထီလာခရိုင်ဦးစီးမှူးရုံးမှ ဦးစန်းအောင်၊ဒု-ဦးစီးမှူး သည် နွားစားငုတ်ကျေးရွာ၊ အင်ကြင်းကုန်းကျေးရွာ၊ သုံးအိုင်ကျေးရွာများမှ ပဲစင်းငုံစိုက်ပျိုးထုတ်လုပ်သူ တောင် သူများနှင့် (၁၈.၁.၂၀၂၂) ရက်နေ့ နံနက် (၁၀)နာရီအချိန်ခန့်တွင် တွေ့ဆုံဆွေးနွေးခဲ့ပါသည်။

            မိတ္ထီလာခရိုင်အတွင်းရှိ မိတ္ထီလာ၊ မလှိုင်၊ သာစည်၊ ဝမ်းတွင်းမြို့နယ်များတွင် ပဲစဉ်းငုံသီးနှံကို နှစ်စဉ် ဇွန်-ဇူလိုင်လများတွင် စတင်စိုက်ပျိုးကြပြီး ဇန်နဝါရီလတွင် ခုတ်လှဲရိတ်သိမ်းကြပါသည်။ ယခုနှစ်တွင် (၁)ခရိုင်လုံး အတိုင်းအတာဖြင့် စိုက်ဧကပေါင်း (၇၆၅၂၀) ဧက စိုက်ပျိုးခဲ့ကြောင်းသိရှိရပါသည်။

            မိတ္ထီလာမြို့နယ်တွင်ပဲစဉ်းငုံကိုမိုးသီနှံအဖြစ်စိုက်ပျိုးပြီး အခြားသီးနှံများဖြစ်သော နှမ်း၊မြေပဲ၊ ငြုတ်စိုက်ခင်းများတွင် သီးညှပ်စိုက်ပျိုးမှုအနေဖြင့် အများဆုံးစိုက်ပျိုးကြပြီး ဧကပြည့်စိုက်ပျိုးမှု အနည်းငယ်သာရှိပါသည်။ မိတ္ထီလာမြို့ နယ်တွင် ပျှမ်းမျှစိုက်ဧက (၂၅၅၃၄) ဧကစိုက်ပျိုးခဲ့ပြီး ယခုအခါ (၁၇၉၈၆) ဧက ရိတ်သိမ်းထားပြီဖြစ်ကြောင်း သိရှိရပါသည်။ ပဲစင်းငုံကို အခြားသီးနှံများကြားတွင် (၈) မြောင်းမှ (၁၀)မြောင်းခြား၍ စိုက်ပျိုးကြသည့်အတွက် ကုန်ကျစရိတ်မှာ အခြားသီးနှံများနှင့် စိုက်ပျိုးခဲ့စဉ်က ကုန်ကျထားပြီးဖြစ်သည့်အတွက် အနည်းငယ်သာ ကုန်ကျကြောင်း၊ သီးညှပ်မဟုတ်ပဲ ဧကပြည့်စိုက်ပျိုးလျှင် (၁)ဧက ကုန်ကျစရိတ် (၁၅၀၀၀၀)ကျပ်ခန့်ကုန်ကျ မည်ဖြစ်ကြောင်း တောင်သူများထံမှ သိရှိရပါသည်။ (၁)ဧက အထွက်နှုန်း (၆) တင်းကျော် ထွက်ရှိပြီး ပဲစင်းငုံ (၁) တင်းလျှင် လက်ရှိပေါက်စျေး (၄၀၀၀၀-၄၁၀၀၀)ကျပ်စျေးနှုန်းဖြင့် ရောင်းချရကြောင်းသိရှိရပါသည်။ အကျိုးအမြတ် အနေဖြင့် (၁)ဧကလျှင် (၁၀၀၀၀၀)ကျပ် ဝန်းကျင်ခန့်ရရှိကြောင်း သိရှိရပါသည်။

            ထွက်ရှိလာသော ပဲစဉ်းငုံများကို မြို့ပေါ်ရှိပွဲရုံများသို့လည်းကောင်း၊ ကျေးရွာများသို့လာရောက်ဝယ်ယူ ကြသော ပွဲစားများထံတွင်လည်းကောင်း ရောင်းချရကြောင်း တောင်းသူများထံမှသိရှိရပါသည်။ ပဲစင်းငုံသီးနှံ သည် အကျိုးအမြတ်နည်းသော်လည်း တောင်သူများ ကုန်ကျစရိတ်သက်သာခြင်း၊ ဂရုစိုက်ပြုစုရန်မလိုခြင်း၊ အစေ့အဆံထုတ်ပြီး အခွံများနှင့် အရွက်များမှာ နွားစာအဖြစ် အသုံးပြုနိုင်ခြင်း၊ အပင်များကို ထင်းအဖြစ် အသုံးပြုနိုင်ခြင်းတို့ကြောင့်  တစ်ပင်လုံးအသုံးဝင်သည့် သီးနှံဖြစ်သဖြင့် တောင်သူများအနေဖြင့် စိုက်ပျိုးသင့် ပါကြောင်း ရေးသားတင်ပြအပ်ပါသည်။

DOCA(မန္တလေး)

        မန္တလေးတိုင်းဒေသကြီးတွင် မိုးကြက်သွန်နီကို မြင်းခြံခရိုင်၊နွားထိုးကြီးမြို့နယ်၌ အများဆုံးစိုက်ပျိုးပြီး ဩဂုတ်၊ စက်တင်ဘာလများတွင် စိုက်ပျိုးကာ ဒီဇင်ဘာ၊ ဇန်နဝါရီလများတွင် ထွက်ရှိပါသည်။ ကျောက်ဆည်ခရိုင် မြစ်သားမြို့နယ်တွင် ဆောင်းကြက်သွန်နီမပေါ်မီ ဒေသတွင်းစားသုံးရန် အနည်းငယ်စိုက်ပျိုးပြီး မိတ္ထီလာခရိုင်၊ မလှိုင်မြို့နယ်နှင့် ဝမ်းတွင်းမြို့နယ်တွင်လည်း စိုက်ပျိုးကြောင်း သိရပါသည်။ မြင်းခြံဈေးကွက်သို့ ကြက်သွန်နီစိုက်ပျိုးသော ကျေးရွာများမှ ယခုရက်ပိုင်း တစ်ရက်ှင် ပိဿာချိန် နှစ်သိန်းဝန်းကျင် ဝင်ရောက်လျက် ရှိပါသည်။ ယခင်အဟောင်း လက်ကျန်မရှိသလောက် နည်းလာပြီး မိုးကြက်သွန်နီအသစ်များနှင့်သာ အရောင်းအဝယ်ဖြစ်ကြောင်း သိရပါသည်။ ၂၀၂၂ ခုနှစ်၊ ဇန်နဝါရီ ဒုတိယပတ်အတွင်း မြင်းခြံမှ ရန်ကုန်၊ မော်လမြိုင်၊ နေပြည်တော်၊ စစ်တွေ၊ တောင်ကုတ်မြို့များသို့ (၁၂)ဘီးကား(၃၀)စီး၊ ကျောက်ဆည်မှ ရန်ကုန်သို့ တွဲကား(၁)စီး၊ မြစ်သားမှ ရန်ကုန်သို့ တွဲကား(၂)စီး၊ (၁၂)ဘီးကား(၁)စီး တင်ပို့ခဲ့ပါသည်။ ကုန်တင်ခနှုန်းထားများအနေနှင့် တစ်ပိဿာလျင် မြင်းခြံ-ရန်ကုန် ၇၀ ကျပ်၊ မြင်းခြံ-မော်လမြိုင် ၉၀ ကျပ်၊ မြင်းခြံ-စစ်တွေ ၁၀၅ကျပ်၊  ကျောက်ဆည်-ရန်ကုန် ၈၀ ကျပ် ရှိကြောင်းသိရပါသည်။ ကြက်သွန်နီဈေးမှာ လက္ကားဈေး တစ်ပိဿာှင် ၃၀၀ ကျပ်မှ ၆၅၀ ကျပ်၊ လက်လီဈေး ၅၀၀ ကျပ်မှ ၈၀၀ ကျပ်ဈေးရှိကြောင်း ဈေးကွက်မှသိရသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

၂၄.၁.၂၀၂၂ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်-