ပြည်တွင်းကုန်သွယ်မှုသတင်း

         မကွေးတိုင်းဒေသကြီး၊ သရက်ခရိုင်၊ အောင်လံမြို့သည် ရန်ကုန်-မန္တလေးကားလမ်းမကြီးပေါ်တွင် တည်ရှိပြီး တောင်တွင်းကြီးမြို့၊ ဆင်ပေါင်ဝဲမြို့၊ ကိုးပင်စသည့် ပတ်ဝန်းကျင်ကျေးရွာများ၊ ပဲခူးတိုင်း အနောက်ခြမ်း ဝက်ထီးကန်၊ ပေါက်ခေါင်းတို့မှထွက်ရှိသည့် လယ်ယာထွက်ကုန်သီးနှံများ လာရောက်ရောင်းဝယ်ဖောက်ကားရာ အချက်အချာကြသည့်မြို့ဖြစ်ပါသည်။အောင်လံမြို့သည် စပါး၊ ပဲမျိုးစုံ ဆီထွက်သီးနှံ၊ ဝါစသည့် သီးနှံမျိုးစုံစိုက်ပျိုးထွက်ရှိရာ အောင်လံကုန်စည်ဒိုင်မှလည်း အထူးသက်ဝင်လျှက်ရှိပြီး ဒေသခံတောင်သူပွဲစားကုန်သည်များဖြင့် နေ့စဉ်ရောင်းဝယ်ဖောက်ကားစည်ပင်လျှက်ရှိကြောင်း လေ့လာသိရှိရပါသည်။

          ယခုဇန်နဝါရီ တတိယပတ်အတွင်း အောင်လံကုန်စည်ဒိုင်တွင် အရောင်းအဝယ်အများဆုံးဖြစ်သည့် သီးနှံမှာ ပဲစဉ်းငုံသီးနှံဖြစ်ပြီး နေ့စဉ်ပိဿာ(၃၀)ဝင်အိတ် (၃၀၀)မှ(၅၀၀)ကြား အရောင်းအဝယ်ဖြစ်လျှက်ရှိကြောင်း သိရှိရပါသည်။ပဲစဉ်းငုံကိုနှမ်း၊ မြေပဲ၊ ဝါသီးနှံများကြားတွင် မိုးလယ်ဇွန်၊ ဇူလိုင်လများကပင် သီးညှပ်စိုက်ပျိုးခဲ့ကြောင်၊ စိုက်ဧက ၃၄၇၃ ဧကခန့်စိုက်ပျိုးကြောင်း စိုက်ပျိုးရေးဦးစီးဌာနမှ သိရှိရပါသည်။ ယခင်နှစ်ကထက် စိုက်ဧက(၁၁၀၀)ခန့် ပိုမိုစိုက်ပျိုးခဲ့သော်လည်း ယခင်နှစ်အထွက်နှုန်း ၁၆ တင်း ရရှိခဲ့ပြီး ယခုနှစ်၁၃တင်းခန့်သာ ထွက်ရှိကြောင်း သိရှိရပါသည်။ ပဲအရည်အသွေးမှာလည်း ဒီဇင်ဘာလအတွင်းရွာသွန်းခဲ့သည့်မိုးကြောင့် မနှစ်ကအရည်အသွေးကိုမမှီခဲ့ကြောင်း၊ သို့ရာတွင် ပဲစဉ်းငုံဈေးမှာ ယခင်နှစ်ကဈေးထက် ပိုခဲ့သည့်အတွက် ဈေးပိုမိုရရှိကြောင်း ဆင်ပေါင်ဝဲမြို့နယ်၊ ချောင်းကောက် ကျေးရွာနေ တောင်သူဦးမြင့်ငွေ၏ ပြောကြားချက်အရ လေ့လာသိရှိရပါသည်။

      ပဲစဉ်းငုံပေါ်စတွင် ပိဿာ (၂၀ )တစ်တင်း ၃၃၀၀၀-၃၅၀၀၀ဈေးရှိခဲ့သော်လည်း ၂၀၂၂ ဇန်နဝါရီ ဒုတိယပတ်တွင် ၄၅၃၀၀အထိ ဈေးမြင့်ခဲ့ကြောင်း၊ ယနေ့ ၂၅.၁.၂၀၂၂ နေ့ဈေးမှာ ၄၃၀၀၀ ရှိကြောင်း စုံစမ်းသိရှိရပါသည်။အောင်လံကုန်စည်ဒိုင်တွင် ယခင်နှစ်များတွင် ရန်ကုန်ကုမ္ပဏီများက ဦးဆောင်၍ ပဲစဉ်းငုံဈေးဖွင့်ခဲ့သော်လည်း ယခုနှစ်တွင် နယ်အဝယ်လှောင်လက်သမားများမှ ဦးဆောင်နေကြောင်း ကုမ္ပဏီများမှသတ်မှတ်ဈေးထက်ကျော်လွန်သွားပါက ဈေးပေးမဝယ်တော့ဘဲ လှောင်လက်သမားများမှ ပိဿာ ၂၀ တစ်တင်းလျှင် ၅၀၀မှ၁၀၀၀ထိဈေးပိုပေး၍ ဝယ်ယူနေသည့်အတွက် ပဲစဉ်းငုံဈေးမှာ ယခုနှစ်တွင် ရောင်းသူဈေးကွက်ဖြစ်နေ၍ စိုက်ပျိုးသူတောင်သူများ ပြုံးပျော်ရသည့် နှစ်လည်းဖြစ်ကြောင်း ကုန်သည် ဦးဉာဏ်လွင်၏ပြောကြားချက်အရသိရှိရပါသည်။

        ၂၀၁၇-၂၀၁၈တွင် အိန္ဒိယသည်မြန်မာပြည်မှထွက်ရှိသည့် ပဲတီစိမ်းနှင့်ပဲစဉ်းငုံသီးနှံများကို တန်ချိန်လျော့၍ ကိုတာသတ်မှတ်ဝယ်ယူခဲ့ရာ ပြည်တွင်းထွက်ပဲစဉ်းငုံသီးနှံမှာလည်း ပြည်ပတင်ပို့နိုင်မှု ပမာဏလျော့နည်းခဲ့၍ ပဲစဉ်းငုံအစားအခြားတွက်ချေကိုက်သည့် သီးနှံများပြောင်းလဲစိုက်ပျိုးရေး ပဲစားပွဲတော်များကျင်းပ၍ ပြည်တွင်းပဲစားသုံးမှုပမာဏတိုးပွားရေးတို့ကို မိမိတို့ဌာနမှ အသိပညာပေး ခဲ့ရသော်လည်း နောက်နှစ်များတွင် အိန္ဒိယမှပဲတင်သွင်းမှုပမာဏများလာခဲ့၍ ပဲစဉ်းငုံသီးနှံစိုက်ဧကမှာလည်း လျော့ကျသွားခြင်းမရှိဘဲ ယခုနှစ်တွင်ပိုမိုစိုက်ပျိုးလာသည်ကိုသိရှိရပါသည်။ ယခုနှစ်တွင် အိန္ဒိယနိုင်ငံတွင် ရာသီဥတုဆိုးရွားမှုကြောင့်လည်းကောင်း၊ စီးပွားကူးသန်းမှ တာဝန်ရှိလူကြီးများ၏ ညှိနှိုင်းကြိုးစားမှုအရ နှစ်နိုင်ငံချစ်ကြည်ရင်းနှီးမှုအဖြစ် မြန်မာနိုင်ငံမှ ပဲစဉ်းငုံနှင့် ပဲတီစိမ်းကို တန်ချိန်တိုး၍ ဝယ်ယူသွားမည်ဖြစ်ရာ ပဲစဉ်းငုံဈေးမှာ ပေါ်စ ၃၅၀၀၀မှ တဖြည်းဖြည်းဈေးမြင့်ဝယ်ယူခဲ့ရာ ယခုအချိန် ၄၅၀၀၀အထိဖြစ်နေရာ တောင်သူများပြုံးပျော်နေရပြီဖြစ်ပါသည်။ ယခုနှစ်တွင်ပွဲစားလှောင်လက်များမှ ပဲစဉ်းငုံတစ်တင်း ၅၀၀၀၀ခန့်အထိမျှော်မှန်း၍ ဝယ်ယူသိုလှောင်မှုများလည်းရှိလာသည်ကို သိရှိရပါသည်။ ရန်ကုန် Export ကုမ္ပဏီများမှလည်း နှစ်ဟောင်းပဲစဉ်းငုံများကိုပင် ဈေးကောင်းပေးကာ ဝယ်ယူမှုများရှိနေ သည့်အတွက် နယ်လှောင်လက်များခန့်မှန်းသည့်ဈေးမရောက်နိုင်ဟု မပြောနိုင်ကြောင်း၊ သို့ဖြစ်ရာ အောင်လံဒေသထွက်ပဲစဉ်းငုံများမှ ပေါ်စမှယခုချိန်ထိ အမာဈေးတန်းဖြင့်သာ ဈေးကွက်တွင်နေရာယူလျက်ရှိပါကြောင်း၊ ဒီနှစ်အတွက်တောင်သူအဖို့ မာငုံနီဟုတင်စားရမည်ဖြစ်ပါကြောင်း ရေးသားတင်ပြလိုက်ရပါသည်။

စားသုံးသူရေးရာဦးစီးဌာန

မကွေးတိုင်း‌ဒေသကြီး

          ပြောင်းဖူးကို မြန်မာနိုင်ငံအလယ်ပိုင်းဒေသ၊ စစ်ကိုင်းတိုင်းဒေသကြီး၊ မုံရွာမြို့နယ်ရှိ ကျေးရွာများတွင် စီးပွားဖြစ်စိုက်ပျိုးလျှက်ရှိသည်ကို တွေ့ရှိရပြီး မြေတစ်ဧကကို ပြောင်းဖူးစေ့ မျိုးစေ့ ၁ ထုပ်စိုက်ပျိုးရပြီး ပြောင်းမျိုးစေ့အများအပြားရှိသော်လည်း ၆၂၁၊ ၆၂၅၊ ၃၃၉ မျိုးကိုသာ အများဆုံးစိုက်ပျိုးလျက်ရှိပါကြောင်း၊ မျိုးစေ့ ၁ထုပ်လျှင် ကျပ် ၄၆၀၀၀ မှ ၅၈၀၀၀ ထိပေး ဝယ်ရပါကြောင်း၊ ယခုအခါ ထွန်စက်ကြီးများဖြင့် တစ်နာရီလျှင်  ကျပ် ၃၀၀၀၀ နှုန်းဖြင့် ထွန်ယက်နေပါကြောင်း၊ စိုက်ပျိုးပြီး အပင်ပေါက် ၁ လကျော်လျှင် ပိုးသတ်ဆေး၊ အပင်ဖြစ်ဆေး၊ ဆေးဖျန်းပေးရကြောင်း၊ တစ်ဧကလျှင် မြေဆီ ၂ အိတ်နှုန်းနှင့် မြေဆီ ၁ အိတ်လျှင်  ကျပ်၇၀,၀၀၀ မှ  ၈၀,၀၀၀ ပေးရ၍  မြေတစ်ဧက စိုက်ပျိုးလျှင် အပြီးအစီး ၅ သိန်းဝန်းကျင်ခန့်ကုန်ကျကြောင်း၊ ပြောင်းဖူးကို ရာသီမရွေး ရေတင်စိုက်ပျိုးနိုင်ပြီး စစိုက်ပျိုးချိန်မှသည် ရိတ်သိမ်းချိန်ထိ ရေ ၅ ကြိမ်တင်ပေးရပါကြောင်း၊ နွေရာသီစိုက်လျှင် ရက် ၁၀၀ ကြာပြီး ရေ ၅ ကြိမ် တင်ပေးရကြောင်း၊ ဆောင်းရာသီ စိုက်ပျိုးလျှင် ရက်ပေါင်း ၁၁၀ မှ ၁၂၀ ထိကြာပြီး ရေ ၃ ကြိမ်သာတင်ပေးရကြောင်း၊ စတင်စိုက်ပျိုးချိန်မှာ စက်တင်ဘာလနှင့် အောက်တိုဘာလများတွင်  စိုက်ပျိုးကြပြီး ဇန်နဝါရီလနှင့် ဖေဖော်ဝါရီလများတွင်  ရိတ်သိမ်းရကြောင်း၊ ဆောင်းရာသီစိုက်ပျိုးလျှင် အမြတ်ပိုမိုရရှိကြောင်း၊ ပြောင်းဖူးစေ့ ၁တင်းကို ကျပ် ၁၂၀၀၀ ကျော်မှ ၁၅၀၀၀ ကျော်ရောင်းချရကြောင်း၊   ပြောင်းဖူးစေ့ ၁ တင်းလျှင် ၁၈ ပိသာရှိပြီး  ဆောင်းရာသီစိုက် တစ်ဧကအထွက်နှုန်းမှာ တင်း ၁၀၀ ထွက်ရှိ၍ နွေရာသီတွင် တင်း ၇၀ မှ ၈၀ ဝန်းကျင်ခန့်သာ ထွက်ရှိကြောင်း၊ ပြောင်းဖူးစေ့များကို ဒေသခံပွဲရုံများသို့ ရောင်းချခြင်း၊ မုံရွာပွဲရုံများသို့ ကိုယ်တိုင်ကိုယ်ကျရောင်းချခြင်းများရှိကြောင်း၊  တောင်သူအချို့မှာ ယခင်နှစ်က ပြောင်းဖူးကို ၃/၄ ဧကစိုက်ပျိုးကြသော်လည်း  ယခုနှစ်တွင် ဓာတ်ဆီဈေး များတက်လာခြင်း၊ မြေဆီဈေးတက်လာခြင်းကြောင့် စိုက်ဧကနည်းလာပြီး  တပိုင်တနိုင် ၁/၂ ဧက ဝန်းကျင် ခန့်စိုက်ပျိုးလျက်ရှိ‌ကြောင်း၊ ယခင်နှစ်နှင့်နှိုင်းယှဉ်ပါက ပြောင်းဖူးဈေးသည် စိုက်ပျိုးသူများနည်းပါးလာသည့်အတွက် ယခုနှစ်တွင် ဈေးမြင့်တက်လာပြီး  တောင်သူများ စိုက်ဧကနည်းသော်လည်း အမြတ်ပိုမိုရကြောင်း၊ ပြောင်းဖူးစေ့ကို မုံရွာမြို့နယ်ရှိ ကျေးရွာများတွင် ကြက်စာနှင့် ငုံးစာများအဖြစ် အသုံးပြုကြကြောင်း၊  ဈေးပေါ်မူတည်သော်လည်း အရှုံးမရှိဘဲ အောင်မြင်ဖြစ်ထွန်းပါက အမြတ်အစွန်း ပို၍ ရရှိခဲ့ကြောင်း၊ တစ်ဧကစိုက်ပျိုးလျှင် ယခုနှစ်ဈေးနှုန်းဖြင့် ကျပ် ၂၀ သိန်း ခန့် အမြတ်ရရှိကြောင်း ပြောင်းဖူးစိုက်ပျိုးသူ ဘုမ္ပနိုးကျေးရွာ တောင်သူ ဦးမြသိန်းထံမှ သိရှိခဲ့ရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီးသည် ဆန်ပိုဒေသများဖြစ်သော ရွှေဘိုခရိုင်၊ ကလေးခရိုင်၊ ကသာခရိုင် များတွင် ဒီဇင်ဘာလ နောက်ဆုံးပတ်တွင် စပါး/ဆန်ဈေးအေးနေခဲ့ပါသည်။ စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ယခင်အပတ်က ရန်ကုန်သို့အိတ်ရေ ၃၃၀၀၀၊ မန္တလေးသို့ အိတ်ရေ ၄၀၆၀၀ ၊ မကွေးသို့ အိတ်ရေ ၅၀၀၊ နေပြည်တော် သို့ အိတ်ရေ ၈၀၀၀၊ ရှမ်း(တောင်)သို့ အိတ်ရေ ၆၀၀၀၊ ရှမ်း(မြောက်)သို့ အိတ်ရေ ၇၀၀၀၊  စုစုပေါင်းအိတ်ရေ (၉၅၁၀၀)အိတ်၊ တန်အားဖြင့် (၄၇၅၅) စီးထွက်ခဲ့ပြီး၊ ယခုအပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၂၉၀၀၀၊ မန္တလေးသို့ အိတ်ရေ ၅၁၆၀၀၊ မကွေး သို့ အိတ်ရေ ၅၀၀၊ နေပြည်တော်သို့ အိတ်ရေ ၇၀၀၀၊ ရှမ်း(တောင်)သို့ အိတ်ရေ ၅၅၀၀၊ ရှမ်း(မြောက်)သို့ အိတ်ရေ ၅၅၀၀၊ စုစုပေါင်းအိတ်ရေ (၉၉၁၀၀) အိတ်၊ တန်အားဖြင့်(၄၉၅၅)စီးထွက်ခဲ့သည့်အတွက်  ယခင်အပတ်နှင့် နှိုင်းယှဉ်လျှင် ယခုအပတ်တွင် အိတ်ရေ (၄၀၀၀)၊ တန်အားဖြင့် (၂၀၀) ပိုမိုစီးထွက်ခဲ့ပါသည်။

        မုံရွာမြို့၏ ဇန်နဝါရီလ (နောက်ဆုံး)ပတ်တွင် ဖြစ်ပေါ်နေသော အခြေခံစားကုန်ဈေးနှုန်းများမှာ ရွှေဘိုပေါ်ဆန်း(စပါး) (ဟောင်း)တင်း၁၀၀လျှင် ကျပ်(၁၆၀၀၀၀၀)၊ ပေါ်ဆန်း(ဆန်)(ဟောင်း)၂၄ပြည်ပါ တစ်အိတ်လျှင် ကျပ်  ၅၅၀၀၀၊ ရွှေဘိုပေါ်ဆန်း(စပါး) (သစ်)တင်း၁၀၀လျှင် ကျပ်(၁၁၀၀၀၀၀)၊ ပေါ်ဆန်း (ဆန်)(သစ်)၂၄ပြည်ပါ တစ်အိတ်လျှင် ကျပ်  ၄၄၀၀၀၊ ဧရာမင်း(စပါး)(ဟောင်း)တင်း ၁၀၀လျှင် ၁၂၈၀၀၀၀၊ ဧရာမင်း(ဆန်)(ဟောင်း)၂၄ ပြည်ပါ တစ်အိတ် ကျပ် ၅၃၀၀၀၊ ဧရာမင်း(စပါး)(သစ်)တင်း ၁၀၀လျှင် ၉၀၀၀၀၀၊ ဧရာမင်း(ဆန်)(သစ်)၂၄ ပြည်ပါ တစ်အိတ် ကျပ် ၃၉၀၀၀၊ ရေဦး ပေါ်ဆန်း (စပါး)(ဟောင်း) တင်း ၁၀၀လျှင် ကျပ် ၁၄၀၀၀၀၀၊ ပေါ်ဆန်း(ဆန်)(ဟောင်း) တစ်အိတ်လျှင်ကျပ် ၅၂၀၀၀၊ ရေဦး ပေါ်ဆန်း (စပါး)(သစ်) တင်း ၁၀၀လျှင် ကျပ် ၁၀၅၀၀၀၀၊ ပေါ်ဆန်း(ဆန်)(သစ်) တစ်အိတ်လျှင်ကျပ် ၄၂၀၀၀၊ ရေဦး ဧရာမင်း (စပါး)(ဟောင်း) တင်း၁၀၀ လျှင် ၁၂၀၀၀၀၀၊ ဧရာမင်း(ဆန်)(ဟောင်း)၂၄ ပြည်ပါ တစ်အိတ် ကျပ် ၄၅၀၀၀၊ ရေဦး ဧရာမင်း (စပါး)(သစ်) တင်း၁၀၀ လျှင် ၉၅၀၀၀၀၊ ဧရာမင်း (ဆန်)(သစ်)၂၄ ပြည်ပါ တစ်အိတ် ကျပ် ၃၆၀၀၀၊ ကလေးမြို့မှ ဧည့်မထ(စပါး)(ဟောင်း) တင်း၁၀၀ လျှင် ၈၉၀၀၀၀၊ ဧည့်မထ(ဆန်)‌(ဟောင်း) ၂၄ပြည်ပါ တစ်အိတ်မှာ ကျပ် ၃၀၀၀၀၊ ဧည့်မထ(စပါး)(သစ်) တင်း၁၀၀ လျှင် ၆၅၀၀၀၀၊ ဧည့်မထ(ဆန်)‌(သစ်) ၂၄ပြည်ပါ တစ်အိတ်မှာ ကျပ် ၂၃၀၀၀၊ ငစိန်(စပါး) (ဟောင်း)တင်း  ၁၀၀ လျှင်  ၇၈၀၀၀၀ ၊ ငစိန်(ဆန်)(‌ဟောင်း)၂၄ပြည်ပါတစ်အိတ်မှာ ၂၈၀၀၀၊ ငစိန်(စပါး) (သစ်)တင်း  ၁၀၀ လျှင်  ၆၅၀၀၀၀ ၊ ငစိန်(ဆန်)(‌သစ်)၂၄ပြည်ပါတစ်အိတ်မှာ ၂၃၀၀၀၊ ဧရာမင်း (စပါး)(ဟောင်း)တင်း ၁၀၀ လျှင် ကျပ် ၁၀၀၀၀၀၀၊ ဧရာမင်း(ဆန်)(ဟောင်း)၂၄ပြည်ပါ တစ်အိတ်မှာ ကျပ်၃၉၀၀၀၊ ဧရာမင်း (စပါး)(သစ်)တင်း ၁၀၀ လျှင် ကျပ် ၇၂၀၀၀၀၊ ဧရာမင်း(ဆန်)(သစ်)၂၄ပြည်ပါ တစ်အိတ်မှာကျပ် ၂၉၀၀၀၊ ကောလင်းမြို့နယ်မှ မှော်ဘီ(၂)(စပါး)(သစ်) တင်း ၁၀၀ လျှင် ကျပ်၆၅၀၀၀၀၊ မှော်ဘီ(၂)ဆန်(သစ်) ၂၄ပြည် တစ်အိတ် လျှင် ကျပ် ၂၄၀၀၀၊ ဆင်းဧကရီ(၃)(စပါး)(သစ်) တင်း၁၀၀ လျှင် ကျပ် ၅၅၀၀၀၀၊ ဆင်းဧကရီ-၃ဆန်(သစ်) ၂၄ပြည် တစ်အိတ်မှာ ကျပ် ၂၂၀၀၀၊ ဧရာမင်း (စပါး)(သစ်) တင်း ၁၀၀ လျှင် ကျပ် ၇၅၀၀၀၀၊ ဧရာမင်းဆန်(သစ်) ၂၄ ပြည်ဆန်တစ်အိတ်လျှင် ကျပ် ၂၉၀၀၀ ရှိပြီး မုံရွာမြို့တွင် ဧရာမင်း(စပါး)(ဟောင်း) တင်း ၁၀၀ လျှင် ကျပ် ၁၁၀၀၀၀၀၊  ဧရာမင်းဆန်(ဟောင်း)၂၄ပြည် တစ်အိတ်မှာ ကျပ် ၄၆၀၀၀၊ ဧရာမင်း(စပါး)(သစ်)တင်း ၁၀၀ လျှင် ကျပ် ၉၂၀၀၀၀၊  ဧရာမင်း(ဆန်) (သစ်)၂၄ပြည် တစ်အိတ်မှာ ကျပ် ၃၆၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

        စစ်ကိုင်းတိုင်းဒေသကြီး၊ ဧရာဝတီမြစ်ဝှမ်းတစ်လျှောက်တွင် တည်ရှိသော ကသာခရိုင်အတွင်းရှိ မြို့နယ်များဖြစ်သည့် ကသာမြို့နယ်နှင့် ထီးချိုင့်မြို့နယ်များတွင် မြေထောက်ပဲသီးနှံ စိုက်ပျိုးဖြစ်ထွန်းလျက်ရှိပြီး ခရိုင်စိုက်ပျိုးရေးဦးစီးဌာန၏ စာရင်းများအရ ၂၀၂၂-ခုနှစ် ကသာခရိုင်တွင်း မြေထောက်ပဲ စိုက်ဧကမှာ (၃၉၃၅၂)ဧကခန့်ရှိကြောင်း သိရှိရသည်။

     မြေထောက်ပဲစိုက်တောင်သူများ၏ ပြောကြားချက်အရ မြေထောက်ပဲစိုက်ရာတွင် တစ်ဧက မျိုးတစ်တင်းခွဲခန့် စိုက်ပျိုးရပြီး အထွက်တင်းအနေဖြင့် ပျှမ်းမျှ (၂၆)တင်းမှ (၃၀)တင်းခန့် ထွက်ကြောင်း၊ တစ်ဧကစိုက်ပျိုးကုန်ကျစရိတ်မှာ ကျပ်(၄)သိန်းရှိပြီး သီးနှံပေါ်ချိန် အစိုတစ်တင်းလျှင်(၂၅၀၀၀)ကျပ် ရှိကြောင်း၊ အခြောက်ခံရောင်းပါက တစ်တင်းလျှင်(၄၅၀၀၀)ကျပ်မှ (၅၀၀၀၀)ကျပ်အထိ ရောင်းချရကြောင်း၊ အစိုအနေဖြင့် ရောင်းပါက လတ်တလော ငွေကြေးအဆင်ပြေသော်လည်း အကျိုးအမြတ်နည်းပြီး အခြောက်ခံရောင်းပါက တစ်ဧက ကျပ်(၈၅၀၀၀၀)ခန့် အကျိုးအမြတ်ကျန်ကြောင်းနှင့် ယခုအခါ တရုတ်နှစ်သစ်ကူးပွဲတော်အမှီ မြေထောက်ပဲများကို မန္တလေးမြို့မှတစ်ဆင့် တရုတ်နယ်စပ်သို့ တင်ပို့မှုများ ရှိနေသောကြောင့် ကသာခရိုင်ထွက် မြေထောက်ပဲ အစို/အခြောက်များကိုလည်း မန္တလေးပွဲရုံများသို့ တင်ပို့ရောင်းချမှုများ ရှိနေကြောင်း တောင်သူများထံမှ သိရသည်။

        မြေထောက်ပဲသီးနှံသည် ဈေးကွက်ရှာစရာမလိုဘဲ ဝယ်လက်အသင့်ရှိသော သီးနှံဖြစ်သည့်အပြင် လူကြိုက်များသော ပဲသီးနှံတစ်မျိုးဖြစ်သည်။ သို့သော် မြေထောက်ပဲသည် နေရာဒေသမရွေး စိုက်ပျိုးနိုင်သော သီးနှံမဟုတ်ဘဲ စိုက်ပျိုးမြေရွေးသော သီးနှံဖြစ်သည်။ ထို့ကြောင့် ဈေးကွက်အသင့် ရှိပြီး လူကြိုက်များသော မြေထောက်ပဲသီးနှံအား ရေမြေနှင့်ကိုက်ညီသည့် ကသာခရိုင်ကဲ့သို့သော ဒေသတွင် မြေထောက်ပဲဇုံသတ်မှတ်ပြီး တွန်းအားပေးတိုးချဲ့စိုက်ပျိုးသင့်ပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

           ပြည်ထောင်စုနယ်မြေတွင် ဥတ္တရခရိုင်နှင့် ဒက္ခိဏခရိုင်ဟူ၍ ခရိုင်(၂)ခုရှိပါသည်။ ဥတ္တရခရိုင်တွင် တပ်ကုန်းမြို့နယ်၊ ဇေယျာသီရိမြို့နယ်၊ ပုဗ္ဗသီရိမြို့နယ်နှင့် ဥတ္တရသီရိမြို့နယ်တို့ပါဝင်ပြီး ဒက္ခိဏခရိုင်တွင် ပျဉ်းမနားမြို့နယ်၊ လယ်ဝေးမြို့နယ်၊ ဇမ္ဗူသီရိမြို့နယ်နှင့် ဒက္ခိဏသီရိမြို့နယ်တို့ ပါဝင်ပါသည်။

          ၂၀၂၁-၂၀၂၂ခုနှစ် နွေစပါးစိုက်ရာသီတွင် ဥတ္တရခရိုင်(၄)မြို့ နယ်တွင် (၈၂၉၀)ဧက၊ ဒက္ခိဏ ခရိုင်(၄)မြို့နယ်တွင် (၁၈၀၉၀)ဧက စိုက်ပျိုးရန်လျာထားသတ်မှတ်ထားပြီး ပြည်ထောင်စုနယ်မြေအတွင်း နွေစပါးစိုက်ဧက စုစုပေါင်း (၂၆၃၈၀)ဧက စိုက်ပျိုးရန်လျားထားသတ်မှတ်ထားပြီး ဆည်ရေပေးဝေနိုင်မှုနှင့် ရေရရှိမှုအပေါ်မူတည်၍ နွေစပါး စိုက်ပျိုးနိုင်မည်ဖြစ်ပြီး ဆည်မြောင်းဦးစီးဌာနအနေဖြင့် ၂၀၂၂ခုနှစ်၊ ဇန်နဝါရီလ(၁၅)ရက်နေ့မှ စတင်၍ ငလိုက်ဆည်ရေသောက်ဧရိယာ ရေပေးဝေနိုင်မှုရှိပြီး ဇန်နဝါရီလကုန်နှင့် ဖေဖော်ဝါရီ လဆန်းပိုင်းတွင် စိုက်ပျိုးရန်အတွက် တောင်သူများအနေဖြင့် မြေယာပြင်ဆင်ခြင်း၊ ထွန်ယက်ခြင်းလုပ်ငန်းများ စတင်ဆောင်ရွက်လျက်ရှိကြောင်း သိရှိရပါသည်။

          နွေစပါးစိုက်တောင်သူများသည် အထွက်နှုန်းကောင်းပြီး တောင်သူတွက်ခြေကိုက်မည့် စပါးမျိုးဖြစ်သည့် သက်တမ်းရက် (၁၀၅/၁၁၀)သာရှိ၍ သွင်းအားစု သင့်တင့်မျှတရုံသာသုံးပြီး ရေ/မိုး အဆင်ပြေလျှင် တစ်ဧက စပါးတင်း(၁၂၀)မှ (၁၅၀)အထိ ထွက်ရှိသည့် ထိုင်းနှံကောက်စပါးမျိုးကို ယခုအခါ ပိုမိုစိုက်ပျိုးထုတ်လုပ်လျက်ရှိသည်ကို တွေ့ရှိရပါသည်။ ယခင်နှစ် နွေစပါးစိုက်ပျိုး ရာသီတွင် မနောသုခ၊ ပုလဲသွယ်၊ ရွှေတိုး၊ ရွှေသွယ်ရင်း၊ ထိုင်းကောက်၊ နယူးဧရာ စပါးမျိုးများ စိုက်ပျိုးထုတ်လုပ်ခဲ့သော်လည်း သက်တမ်းရက်(၁၂၀)နှင့်အထက် ကျော်လွန်ခြင်း၊ သွင်းအားစု ပိုမို အသုံးပြုရခြင်း၊ ရာသီဥတုနှင့် အပူဒဏ်၊ ရေငတ်ဒဏ် ခံနိုင်မှုအားနည်းခြင်းကြောင့် ပိုးမွှားရောဂါ ကျရောက်တတ်သဖြင့် ပုံမှန်အထွက်နှုန်းတစ်ဧက (၇၀)မှ (၉၀)တင်းအထိ ထွက်ရှိသော်လည်း  ၎င်းအောက် အထွက်နှုန်း လျော့နည်းနိုင်သဖြင့် ယခုအခါတွင် တောင်သူတွက်ခြေကိုက်သည့် စူပါနှံကောက်စပါးမျိုးများ အများဆုံး စိုက်ပျိုးထုတ်လုပ်လျက်ရှိသည်ကို တွေ့ရှိရပါသည်။

          ဒက္ခိဏခရိုင်၊ ပျဉ်းမနားမြို့နယ်၊ မယ်ဇလီကုန်းကျေးရွာ နွေစပါးစိုက်ပျိုးထုတ်လုပ်သည့် တောင်သူဦးစောမောင်(၄)ဧက၊ ပြူတွင်းကျေးရွာ ဦးဘိုနီ (၃)ဧကနှင့် သရက်ကုန်းကျေးရွာ တောင်သူဦးကုလား (၈)ဧက စိုက်ပျိုးထားရှိသည့် နွေစပါးစိုက် တောင်သူများနှင့် တွေ့ဆုံမေးမြန်းခဲ့ရာတွင် ယခုနှစ်နွေစပါးရာသီမှာ စူပါနှံကောက် (သို့)ထိုင်းနှံကောက် စပါးမျိုးကို စိုက်ပျိုးထားကြောင်း၊ စပါးမျိုးများအား ရေဆင်းစိုက်ပျိုးရေးဌာနမှ ဝယ်ယူရရှိပြီး မျိုးတစ်တင်းလျှင် (၁၀၀၀၀)ကျပ်နှင့် တစ်ဧက(၂)တင်းနှုန်း ကြဲသားပက်စိုက်ပျိုးထားခြင်း၊ ကြဲပက်ပြီး(၅)ရက်မှ (၁၅) ရက်အတွင်း ပေါင်းသတ်ဆေးဖြန်းခြင်း၊ (၄၅)ရက်သားအရွယ်မှစတင် မြေသြဇာပက်ဖြန်းခြင်း၊ ပိုးမွှားကာကွယ်ဆေးပက်ဖြန်းခြင်းလုပ်ငန်းများ ဆက်လက်ဆောင်ရွက်သွားမည်ဖြစ်ကြောင်း၊ ထိုင်းနှံကောက်(သို့)စူပါနှံကောက်ဆန်ကို ပြည်တွင်းစားသုံးမှုတွင်သာမက တရုတ်ဈေးကွက် အဝယ်လိုက်ခြင်းတို့ကြောင့် ရွေးချယ်စိုက်ပျိုးရကြောင်း၊ အခြားစပါးမျိုးများဖြစ်သည့် မနောသုခ၊ ပုလဲ သွယ်၊ ရွှေတိုး၊ ရွှေသွယ်ရင်းများ စိုက်ပျိုးရာတွင် အထွက်နှုန်းတင်း(၈၀/၉၀)ဝန်ကျင်တွင်သာရှိပြီး သွင်းအားစု ပိုမိုသုံးစွဲရခြင်းတို့ကြောင့် အထွက်ကောင်းသည့် ထိုင်းနှံကောက်(သို့)စူပါနှံကောက်စပါးမျိုးများ ရွေးချယ်စိုက်ပျိုးထားကြောင်း ၎င်းတို့မှ ပြောကြားခဲ့ပါသည်။

          တောင်သူလယ်သမားများအနေဖြင့် နွေစပါးစိုက်ပျိုးထုတ်လုပ်နိုင်မှုကြောင့် ကျေးလက်တောရွာနေသူများ အလုပ်အကိုင်၊ အခွင့်အလမ်းများ ပိုမိုများပြားလာစေခြင်း၊ ပြည်တွင်းစားသုံးမှုပိုလျှံ သည့်အပြင် ပြည်ပတင်ပို့မှု မြှင့်တင်နိုင်ခြင်းကြောင့် ပြည်ပဝင်ငွေတိုးပွားလာပြီး နိုင်ငံ့စီးပွားဖွံ့ဖြိုး တိုးတက်လာနိုင်မည်ဖြစ်၍ နွေစပါးစိုက်ပျိုးထုတ်လုပ်မှု ပိုမိုအားကောင်းလာစေရန်အတွက် အထွက်ကောင်းသည့် မျိုးကောင်းမျိုးသန့်များ ရှာဖွေဖော်ထုတ်၍ စိုက်ပျိုးသင့်ပါကြောင်းကို “ တောင်သူ အကြိုက် စူပါ နှံကောက်စိုက်” ဟု ခေါင်းစဉ်စာသားဖြင့် အကြံပြုတင်ပြအပ်ပါသည်။

စားသုံးသူရေးရာဦးစီးဌာန

ပြည်ထောင်စုနယ်မြေ