ပြည်တွင်းကုန်သွယ်မှုသတင်း

သန်လျင်မြို့၊ ဇန်နဝါရီလ ( ၁၉ ) ရက်

          စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးအနေဖြင့် မိမိနိုင်ငံအတွင်း စားသုံးသူများအခွင့်အရေး(၈)ရပ်ကို ရရှိရေးအတွက် ဆောင်ရွက်ပေးနေသကဲ့သို့ တစ်ဖက်တွင်လည်း ပြည်တွင်းကုန်သွယ်မြှင့်တင်မှုဆိုင်ရာလုပ်ငန်းများအား ဒေသခံတောင်သူများ အကျိုးစီးပွားအတွက် သက်ဆိုင်ရာအသင်းအဖွဲ့၊ ဌာနများနှင့် ပေါင်းစပ်ညှိနှိုင်းဆောင်ရွက်ပေးလျက်ရှိပါသည်။ ရန်ကုန် တောင်ပိုင်းခရိုင် ကော့မှူးမြို့နယ်အတွင်းရှိ ကျေးရွာတချို့တွင် မိုးစပါးများရိတ်သိမ်းပြီးနောက် ဇန်နဝါရီလမှ စတင်၍ မှိုအနည်းငယ်စိုက်ပျိုးခဲ့ပြီး ထွက်ရှိနေပြီဖြစ်ကြောင်း၊ ကောက်ရိုးမှို၊ ဗေဒါမှို၊ ငွေနှင်းမှိုအမျိုးအစားများစိုက်ပျိုးလျက်ရှိကြောင်း မှိုစိုက်တောင်သူများထံမှ သိရှိရပါသည်။

          ကော့မှူးမြို့နယ်အတွင်း စတင်စိုက်ပျိုး ထွက်ရှိနေသည့် ကျေးရွာများမှာ နတ်စင်ကုန်း၊ ရွာတန်းရှည်၊ မဝန်း၊ မကျည်းကန်၊ ကြာကန်၊ ဘို့ဒင်၊ ကျူတောချောင်ကျေးရွာများဖြစ်ပြီး၊ မှိုမျိုးစေ့ ထုတ်လုပ်ဖြန့်ဖြူးသည့် လုပ်ငန်းရှင် (၇)ဦးသည် မှိုစိုက်တောင်သူများထံမှ မှိုအမျိုးအစား၊ အရွယ် အစားပေါ် မူတည်၍ ကောက်ရိုးမှိုတစ်ပိဿာလျှင် လက်ရှိဒိုင်ကောက်ဈေး (၅၀၀၀/ ၅၅၀၀) ကျပ်၊ ဗေဒါမှိုတစ်ပိဿာ (၄၅၀၀/၅၀၀၀)ကျပ်၊ ငွေနှင်းမှို တစ်ပိဿာ (၃၀၀၀/၃၅၀၀)ကျပ် ဈေးနှုန်းဖြင့် ဝယ်ယူကာရန်ကုန်မြို့ရှိသီရိမင်္ဂလာဈေး၊ ဒညင်းကုန်းဈေးများသို့တဆင့် ပြန်လည် ဖြန့်ဖြူးရောင်းချ လျက်ရှိပြီး အရောင်းအဝယ်ဖြစ်ထွန်းလျက်ရှိကြောင်း မှိုမျိုးစေ့ထုတ်လုပ်ဖြန့်ဖြူးသည့် လုပ်ငန်းရှင်များထံမှ သိရှိရသည်။

စားသုံးသူရေးရာဦးစီးဌာန(ရန်ကုန်တိုင်းဒေသကြီး)

        မြန်မာနိုင်ငံသည် စိုက်ပျိုးရေးနိုင်ငံတစ်နိုင်ငံဖြစ်သည့်အားလျော်စွာ လယ်ယာထွက်ကုန်အနေဖြင့် အမယ်ပေါင်းများစွာ စိုက်ပျိုးဖြစ်ထွန်းထုတ်လုပ်နိုင်သည့် အခြေခံကောင်းများစွာ ရှိနေသော နိုင်ငံဖြစ်ပါသည်။ ယင်းကဲ့သို့  အမယ်ပေါင်းများစွာသော လယ်ယာထွက်ကုန်များအနက် ပီလောပီနံသည် စိုက်ပျိုးဖြစ်ထွန်းနိုင်သည့် ရေမြေအခြေခံကောင်းများ ရှိသည့်အခြေအနေတွင်ဖြစ်ပြီး စနစ်တကျ စိုက်ပျိုးထုတ်လုပ်ပါက ပြည်ပပို့ကုန်အဖြစ် အလားအလာရှိနေသည့် ထုတ်ကုန်တစ်ခုဖြစ်သည်ကို နိုင်ငံတကာစာတမ်းများအရ သိရှိရပါသည်။

          ထို့အပြင် နိုင်ငံတကာအပူပိုင်းဒေသသီးနှံများ ဗဟိုဌာန(International Center For Tropical Agriculture) (CIAT)မှလည်း အရှေ့တောင်အာရှရှိ ဒေသခံတောင်သူများ စီးပွားရေးဖွံ့ဖြိုးတိုးတက်မှုနည်းပါးသည့် နိုင်ငံများတွင်တောင်သူများ စီးပွားရေးလျှင်မြန်စွာ ဖွံ့ဖြိုးတိုးတက်စေရန် ပီလောပီနံသီးနှံအား နည်းပညာများ အကူအညီပေးစိုက်ပျိုးပေးလျက်ရှိရာ ဗီယက်နမ်၊ ထိုင်း၊ လာအို၊ ကမ္ဘောဒီးယား၊ အင်ဒိုနီးရှားနိုင်ငံများသည် ပီလောပီနံစိုက်ပျိုးခြင်းဖြင့် ဝင်ငွေပိုမို ရရှိလာကာ ဒေသခံတောင်သူများ စီးပွားရေးဖွံ့ဖြိုးတိုးတက်လျက်ရှိပါသည်။

          မြန်မာနိုင်ငံတွင် ဧရာဝတီတိုင်းဒေသကြီး၊ ကျုံပျော်၊ ဟင်္သာတ၊ လေးမျက်နှာ၊ ရေကြည် မြို့နယ်များတွင် ရှေးယခင်ကပင် ဒေသခံတောင်သူများမှ ပီလောပီနံဒေသမျိုးအား ဧက (၃၀၀၀၀)ခန့် နှစ်စဉ် စိုက်ပျိုးပြီး ကုမ္ပဏီ၊ ကုန်သည်များမှတစ်ဆင့် ပီလောပီနံအချောမှုန့် (ကော်မှုန့်)များ ပြုလုပ်၍ ပြည်တွင်းပြည်ပသို့တင်ပို့ရောင်းချနေသော ဒေသထွက်ကုန် သီးနှံ တစ်ခုဖြစ်ပါသည်။ ဒေသပီလောပီနံ တစ်ဧကအထွက်နှုန်းမှာ ပိဿာချိန်(၃၀၀၀)မှ(၃၅၀၀) ထွက်ရှိပြီး တောင်သူများတွက်ခြေကိုက်မှုနည်းပါးသဖြင့် ၂၀၁၄ ခုနှစ်တွင် စားသုံးသူရေးရာ ဦးစီးဌာနမှဦးဆောင်၍ ပီလောပီနံစိုက်ပျိုးထုတ်လုပ်မှု တိုးတက်စေရန် ဧရာဝတီတိုင်းဒေသကြီး ပီလောပီနံ စိုက်ပျိုးထုတ်လုပ်တင်ပို့ရောင်းချသူများအသင်းကို ဖွဲ့စည်းဆောင်ရွက်ပေးခဲ့ပြီး အလုပ်ရုံဆွေးနွေးပွဲများ ကျင်းပခြင်း၊ ၂၀၁၅ ခုနှစ်တွင် သြစတြေလျနိုင်ငံ၊ Queensland University မှ Prof. Dr. Robert Anderson Cranb ဦးဆောင်သော နိုင်ငံခြားသားပညာရှင်များအား ဖိတ်ခေါ်၍ ကျုံပျော်၊ ဟင်္သာတ၊ လေးမျက်နှာ၊ ရေကြည်ရှိ စိုက်ကွင်းများအထိ ဒေသခံတောင်သူများနှင့်တွေ့ဆုံအသိပညာပေးခြင်း၊ မြန်မာနိုင်ငံ၊ ရန်ကုန်မြို့ Inya Lake ဟိုတယ်တွင် ကျင်းပသည့် 4^th Starch World Conference သို့တက်ရောက်စေခြင်း၊ ထိုင်းနိုင်ငံ/ တရုတ်နိုင်ငံများသို့ လေ့လာရေးခရီးစဉ်များ စေလွှတ်ခြင်းများကို ဆောင်ရွက်ခဲ့ပါသည်။ ထိုင်းနိုင်ငံ Thai Wahstarch  PCL ကုမ္ပဏီနှင့် ပီလောပီနံလုပ်ငန်းများ ဖွံ့ဖြိုးတိုးတက်ရေး ပူးပေါင်းဆောင်ရွက်မှုအစီအစဉ်အရ ပီလောပီနံအထွက်ကောင်းမျိုး (Hauy Bong-60)မျိုးကိုင်းများအား ဆက်သွယ်ချိတ်ဆက်ရယူပြီး ဒေသတွင်း စိုက်ပျိုးထုတ်လုပ်သူတောင်သူများသို့ မျိုးပွားမျိုးဖြန့်ခြင်းများကို ဆောင်ရွက်ပေးခဲ့ရာ တစ်ဧက ပိဿာချိန်(၇၅၀၀)မှ (၁၀၀၀၀)အထိ အထွက်နှုန်း တိုးတက်ထွက်ရှိလာခဲ့ပါသည်။

          ပီလောပီနံအချောမှုန့်ထွက်ရှိမှုအနေဖြင့် ပီလောပီနံ ဥပိဿာ (၁၀၀)လျှင် စျေးကွက်ဝင် ပီလောပီနံအချောမှုန့်(ကော်မှုန့်) ပိဿာ(၃၀)ခန့်ရရှိပြီး ယခင်က နှစ်စဉ်အချောမှုန့် ပိဿာသိန်း (၃၀၀)ခန့်၊ တန်ချိန်အားဖြင့် (၅၀၀၀၀)ခန့်ရရှိပြီး ပြည်တွင်းပြည်ပ‌ရောင်းဝယ်လျက်ရှိရာ ယခုအခါအထွက်နှုန်းတိုးတက်လာသဖြင့် တန်ချိန်(၁၅၀၀၀၀)ခန့်ထွက်ရှိလာပြီး စျေးကွက်ပိုမိုရရှိရန် လိုအပ်ဖြစ်ပေါ်လျက်ရှိပါသည်။ စျေးနှုန်းအနေဖြင့် ယခုလက်ရှိပီလောပီနံဥစျေးမှာ တစ်ပိဿာ (၁၃၀)ကျပ်ခန့်နှင့် ပီလောပီနံအချောမှုန့်(ကော်မှုန့်)စျေးမျာ တစ်ပိဿာ(၇၀၀)ကျပ် ခန့် ဖြစ်သဖြင့် တစ်ဧက (၁၀)သိန်းကျော်ခန့် ဝင်ငွေရရှိလျက်ရှိပါသည်။ ပိုမိုထွက်ရှိလာသော ပီလောပီနံအချောမှုန့်များအား ပြည်တွင်းပြည်ပရောင်းဝယ်မှုများအပြင် ပီလောပီနံကွင်းချပ်ပြုလုပ်၍ မြဝတီမှတစ်ဆင့် ထိုင်းနိုင်ငံသို့လည်းကောင်း၊ မန္တလေးမှတစ်ဆင့် တရုတ်နိုင်ငံသို့ လည်းကောင်း စျေးကွက်ထိုးဖောက်စတင်တင်ပို့ရောင်းချလျှက်ရှိပါသည်။

          သဘာဝတရားအရ မြန်မာနိုင်ငံသည် ကမ္ဘာ့ပီလောပီနံစျေးကွက်တွင် ဝယ်လိုအားကြီးမားသော တရုတ်ပြည်၊ အရှေ့တောင်အာရှနိုင်ငံများနှင့် ပထဝီဝင်အနေအထားအရ ဆက်စပ်တည်ရှိနေပြီး တရုတ်ပြည်အနေဖြင့် တစ်နှစ်လျှင် ပီလောပီနံ အချောမှုန့် တန်ချိန် (၁၁.၅)သန်း (Source:FAOSTAT, Food Balance Sheet, April 2006)ခန့် နိုင်ငံခြားမှ ဝယ်ယူတင်သွင်းနေသည့် နိုင်ငံတစ်နိုင်ငံလည်းဖြစ်ပါသည်။ သို့သော် အဆိုပါနိုင်ငံအနေဖြင့် ပီလောပီနံ ထုတ်လုပ်မှုပမာဏ ကြီးမားသော်လည်း ပြည်တွင်းစက်မှုလက်မှုလုပ်ငန်းများ၏ ဝယ်လိုအား တိုးတက်လာမှုနှင့်အတူ စိုက်ဧကများလည်း တစ်နှစ်ထက်တစ်နှစ် လျော့နည်းလာသဖြင့် ပီလောပီနံ စိုက်ပျိုးထုတ်လုပ်သည့် မြန်မာနိုင်ငံသည် အလားအလာကောင်းများကို ဖော်ဆောင်ဖြစ်ပေါ်လျက်ရှိပါသည်။ နောင်လာမည့်အနာဂတ်တွင် အခြားသော စက်မှုကုန်ကြမ်းဖြစ်သည့် ပြောင်းစျေးနှုန်းမှာလည်း ကြီးမြင့်လာသည့်အတွက် အစားထိုးသီးနှံဖြစ်သော ပီလောပီနံမှာ အလားအလာရှိပြီး စျေးကွက်ဝယ်လိုအားကောင်းသည့် ဧရာဝတီတိုင်းဒေသကြီး၏ ဒေသထုတ်ကုန်တစ်ခုအဖြစ် မလွဲမသွေဖြစ်လာနိုင်တော့မည်ဖြစ်ပါကြောင်း တင်ပြလိုက်ပါသည်။

စားသုံးသူရေးရာဦးစီးဌာန

ဧရာဝတီတိုင်းဒေသကြီး

           ရွှေဘိုခရိုင်အတွင်းရှိ မြို့နယ်များတွင် ဇန်နဝါရီလ တတိယပတ်တွင် စပါး/ဆန် ဈေးများ အေးနေပါသည်။ ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ဇန်နဝါရီလ ဒုတိယပတ်တွင် ရန်ကုန်သို့ အိတ်ရေ ၃၃၀၀၀၊ မန္တလေးသို့ အိတ်ရေ ၃၀၀၀၀၊ နေပြည်တော်သို့ အိတ်ရေ ၈၀၀၀၊ ရှမ်း(တောင်)သို့ အိတ်ရေ ၆၀၀၀၊ ရှမ်း(မြောက်)သို့ အိတ်ရေ ၇၀၀၀၊ပခုက္ကူသို့ အိတ်ရေ ၅၀၀၊ စုစုပေါင်းအိတ်ရေ ၈၄၅၀၀၊ တန်အားဖြင့် ၄၂၂၅တန် စီးထွက်ခဲ့ပါသည်။ယခုအပတ်တွင် ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၂၉၀၀၀၊ မန္တလေးသို့ အိတ်ရေ ၄၁၀၀၀၊ နေပြည်တော်သို့ အိတ်ရေ ၇၀၀၀၊ ရှမ်း(တောင်)သို့ အိတ်ရေ ၅၅၀၀၊ ရှမ်း(မြောက်)သို့ အိတ်ရေ ၅၅၀၀၊ပခုက္ကူသို့ အိတ်ရေ ၅၀၀၊ စုစုပေါင်းအိတ်ရေ ၈၈၅၀၀၊ တန်အားဖြင့် ၄၄၂၅ စီးထွက်ခဲ့သည့်အတွက် ယခင်အပတ်နှင့် နှိုင်းယှဉ်ှင် ယခုအပတ်အတွင်း အိတ်ရေ ၄၀၀၀၊ တန်အားဖြင့် ၂၀၀ ပို၍ စီးထွက်ခဲ့ပါသည်။

          ရွှေဘိုမြို့၏ ဇန်နဝါရီလ တတိယပတ်တွင် ဖြစ်ပေါ်နေသော စပါး/ဆန်  ဈေးနှုန်းများမှာ ရွှေဘိုပေါ်ဆန်းစပါး (အဟောင်း) တင်း၁၀၀လျှင် ကျပ်၁၆၀၀၀၀၀၊ ရွှေဘိုပေါ်ဆန်း ဆန်(အဟောင်း) ၂၄ပြည်ပါတစ်အိတ်လျှင် ကျပ်၅၃၀၀၀၊ ဧရာမင်းစပါး (အဟောင်း) တင်း၁၀၀လျှင် ကျပ်၁၃၀၀၀၀၀၊ ဧရာမင်းဆန်(အဟောင်း) ၂၄ပြည်ပါတစ်အိတ်လျှင် ကျပ် ၅၂၀၀၀၊ရွှေဘိုပေါ်ဆန်းစပါး (အသစ်) တင်း၁၀၀လျှင် ကျပ်၁၁၀၀၀၀၀၊ ရွှေဘိုပေါ်ဆန်း ဆန်(အသစ်) ၂၄ပြည်ပါတစ်အိတ်လျှင် ကျပ်၄၃၀၀၀၊ ဧရာမင်းစပါး (အသစ်) တင်း၁၀၀လျှင် ကျပ်၉၀၀၀၀၀၊ ဧရာမင်းဆန်(အသစ်) ၂၄ပြည်ပါတစ်အိတ်လျှင် ကျပ် ၃၉၀၀၀ဖြင့် အရောင်းအဝယ်ဖြစ်နေကြောင်း သိရှိရပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

       ပဲစင်းငုံသီးနှံသည် အခြားသောသီးနှံများနှင့်မတူဘဲ (၈)လ၊ (၉)လကြာ စိုက်ပျိုးထားရှိရသော သီးနှံတစ်ခုဖြစ်ပါသည်။ ပဲစင်းငုံကို မြန်မာနိုင်ငံအလယ်ပိုင်းဒေသများတွင် အများဆုံး စိုက်ပျိုးကြသည်ဟု သိရှိရပါသည်။ စိုက်ပျိုးမှုအနေဖြင့် မေလနှင့်ဇွန်လတို့တွင် အများအားဖြင့် စိုက်ပျိုးကြပြီး ဇန်နဝါရီလ နှင့်ဖေဖော်ဝါရီလတို့တွင် ပုံမှန်ရိတ်သိမ်းလေ့ရှိပါသည်။ တစ်ချို့ဒေသများတွင် ဒေသရာသီဥတုနှင့် စိုက်ပျိုးမြေပေါ်မူတည်၍ စောစိုက်ကြသဖြင့် ဒီဇင်ဘာလ နောက်ဆုံးပတ်တွင် စတင်ထွက်ပေါ်လေ့ရှိသည်ဟု သိရပါသည်။

         စိုက်ပျိုးသူ တောင်သူများအနေဖြင့်လည်း ပဲစင်းငုံကို ဟင်းလျာအနေဖြင့် ခွဲခြမ်းခွဲ၍ ပဲထမင်းသော်လည်းကောင်း၊ ဟင်းချိုသော်လည်းကောင်း၊ ပဲကြာဇံအဖြစ်ထုတ်လုပ်၍ သော်လည်းကောင်း၊ ပဲကြော်အဖြစ် လည်းကောင်း အမျိုးမျိုးပြုလုပ်၍ စားသုံးလေ့ရှိပါကြောင်း၊ မရိတ်သိမ်းမီ ပဲအစိုကိုခူးဆွတ်၍ မုန့်ပဲသရေစာအဖြစ် ပြုတ်၍သော်လည်းကောင်း စားသုံးလေ့ရှိကြသည်ဟုသိရပါသည်။ ပဲစင်းငုံမှာ ချိုဆိမ့်သောအရသာရှိပြီး ဘေးဥပဒ်အန္တရာယ်မဖြစ်စေသည့်အပြင် ကျန်းမာသန်စွမ်းခြင်းကို အထောက်အကူပြုကြောင်း သိရှိရသည့်အတွက် စားသုံးသင့်သောပဲတစ်မျိုးလည်း ဖြစ်ပါသည်။ ပဲစင်းငုံကို Value Added တန်ဖိုးမြှင့်ထုတ်ကုန် တစ်ခုအနေဖြင့် စီမံဖော်ဆောင်ပြီး လုပ်ဆောင် နိုင်မည့်ဆိုပါက နိုင်ငံအတွက် ဝင်ငွေများစွာ အထောက်အကူပြုနိုင်သည်ဟု လုပ်ငန်းရှင် တစ်ဦး၏ ပြောကြားမှုအရသိရပါသည်။ ကမ္ဘာပေါ်တွင် အိန္ဒိယနိုင်ငံသည် ပဲတင်သွင်းမှုနှင့်ဝယ်ယူမှုကို အများဆုံးပြု လုပ်သောနိုင်ငံဖြစ်သည့်အားလျှော်စွာ ယခုလဲ မြန်မာနိုင်ငံမှ ပဲတင်သွင်းမှုကို ၂၀၂၂ ခုနှစ်၊ မတ်လ အထိ ထပ်မံသက်တမ်းတိုးမြှင့်ထားသည်ဟု မန္တလေးကုန်သည်များနှင့် စက်မှုလက်မှု လုပ်ငန်းရှင် များအသင်းမှ သိရပါသည်။ ပဲစင်းငုံသီးနှံသည် Export သီးနှံဖြစ်ပြီး ယခုနှစ်တွင် ပဲဈေးကောင်းလျက် ရှိသည့်အတွက် တောင်သူများ အဆင်ပြေလျက်ရှိကြောင်း သိရှိရပါသည်။

         မန္တလေးတိုင်းဒေသကြီး၊ မြင်းခြံခရိုင်အနေဖြင့် ၂၀၂၀ -၂၀၂၁ ခုနှစ်တွင် ပဲစင်းငုံစိုက်ပျိုးမှုမှာ ဧကပေါင်း(၁၂၅၃၄၂)ဧကရှိခဲ့ပြီး ရိတ်ဧကမှာ(၁၂၅၃၄၂)ဧကနှင့် တစ်ဧကလျှင် အထွက်နှုန်းအနေဖြင့်     ပျမ်းမျှ (၈.၇၈)တင်းထွက်ရှိသဖြင့် အထွက်တင်းပေါင်း (၁၁၀၀၅၀၂)တင်း ထွက်ရှိခဲ့ကြောင်း သက်ဆိုင်ရာဌာန၏ စာရင်းများအရ သိရှိရပါသည်။ မြင်းခြံခရိုင်အနေဖြင့် ၂၀၂၁-၂၀၂၂ ခုနှစ်တွင် ပဲစင်းငုံစိုက်ဧကပေါင်း(၁၃၀၃၁၂)ဧကစိုက်ပျိုးခဲ့ပြီး၊ တစ်ဧကလျှင်အထွက်နှုန်း (၇.၆၄)တင်းထွက် ရှိပြီး ယနေ့အထိ ရိတ်ဧက(၄၄၀၃၂)ဧက ရိတ်သိမ်းပြီးဖြစ်၍ အထွက်တင်းပေါင်း (၃၃၆၄၀၄)တင်း ထွက်ရှိပြီးဖြစ်ပါသည်။ မြင်းခြံခရိုင်အတွင်း၌ မြို့နယ်အလိုက် စိုက်ပျိုးမှုအနေဖြင့် နွားထိုးကြီး မြို့နယ်တွင် ပဲစင်းငုံစိုက်ပျိုးထားသော စိုက်ဧက(၇၆၀၈၅)ဧက အများဆုံးစိုက်ပျိုးမှုရှိပါကြောင်း၊ ငါန်းဇွန်မြို့နယ်တွင် စိုက်ဧက(၃၀၂၀၇)ဧက၊ တောင်သာမြို့နယ်တွင် စိုက်ဧက(၁၈၁၅၅)နှင့် မြင်းခြံ မြို့နယ်တွင် (၅၈၆၅)ဧက စိုက်ပျိုးထားရှိပြီးဖြစ်သည့်အတွက် ရိတ်သိမ်းပြီး ပဲစင်းငုံသီနှံများကို ပြည်တွင်းဈေးကွက်သို့ တင်ပို့ရောင်းချလျက်ရှိကြောင်း သိရှိရပါသည်။

         လက်ရှိပဲစင်းငုံဈေးအနေဖြင့် တစ်ပိဿာ ၁၈၅၀/- ၊ ၁၉၀၀/- ၊ ၂၀၀၀/- ၊ ၂၀၅၀ ကျပ်ရှိ ပါသည်။ ပဲအရည်အသွေးပေါ်မူတည်၍ ဈေးနှုန်းအနည်းငယ်ကွာခြားလျက်ရှိကြောင်း သိရှိရပါသည်။ ယခင်နှစ်ကာလတူတွင် ပဲစင်းငုံဈေးသည် (၁၂၀၀-၁၃၀၀)ကျပ် ရှိသည့်အတွက် လက်ရှိဈေးနှင့် နှိုင်းယှဉ်လျှင် တောင်သူများအထိုက်အလျောက် အဆင်ပြေသည်ဟု သိရှိရပါသည်။ ထွက်ရှိသော ပဲစင်းငုံသီးနှံများ၏ အရောင်းအဝယ်ဖြစ်မှုအနေဖြင့်   မြို့ပေါ်ကုန်သည်လုပ်ငန်းရှင်များမှ ဝယ်ယူစု ဆောင်းပြီး မန္တလေးမြို့သို့ တင်ပို့လျက်ရှိကြောင်း သိရှိရပါသည်။ ပေါ်ဦးပေါ်စဖြစ်သည့်အတွက် ပဲစင်းငုံသီးနှံများ အဝင်နည်းသေးသော်လည်း ယခုနှစ်ပဲစင်းငုံစိုက်တောင်သူများ အကျိုးအမြတ် ရရှိကြောင်း သိရပါသည်။

စားသုံးသူရေးရာဦးစီးဌာန(မန္တလေးတိုင်းဒေသကြီး)

             ပဲခူးတိုင်းဒေသကြီးတွင် စိုက်ပျိုးရေးလုပ်ငန်းသုံး ဓာတ်မြေသြဇာ ကုမ္ပဏီများနှင့် အရောင်းဆိုင်များတွင် ဓာတ်မြေသြဇာအမျိုးမျိုး ရောင်းချလျက်ရှိရာ ပဲခူးတိုင်းဒေသကြီး အတွင်းရှိ တောင်သူများအနေဖြင့် ပုလဲဓာတ်မြေသြဇာများဖြစ်သည့် မြင်းပျံ၊ သြဘာ၊ ရွှေနဂါး၊ အာမို ၊ ကောမတ်ဓာတ်မြေသြဇာများအား အများဆုံးအသုံးပြုလျက်ရှိပါသည်။

          ပဲခူးတိုင်းဒေသကြီး၊ သာယာဝတီခရိုင် ၊ လက်ပံတန်းမြို့နယ်တွင် ဓာတ်မြေသြဇာနှင့် ဘိလပ်မြေစျေးများ မြင့်တက်လျက်ရှိပြီး စျေးကွက်အတွင်း အရောင်းအဝယ်အေးလျက် ရှိကြောင်း သိရှိရပါသည်။ ဓာတ်မြေသြဇာစျေးနှုန်းများမှာ ၂၀၂၂ခုနှစ်၊ ဇန်နဝါရီ တတိယအပတ်တွင် ယူရီးယား (မြင်းပျံ) တစ်အိတ်လျှင် ၉၀၀၀၀ကျပ်  ၊ ယူရီးယား (မိုးနဂါး) တစ်အိတ်လျှင် ၈၅၀၀၀ကျပ် ၊ တီစူပါ (သံကွင်း)တစ်အိတ် လျှင် ၆၆၀၀၀ကျပ် ၊ ကွန်ပေါင်း( အာမို) တစ်အိတ်လျှင် ၈၅၀၀၀ကျပ်တို့ဖြင့် စျေးကွက်အတွင်း ရောင်းဝယ်လျက်ရှိကြောင်း  သိရှိရပါသည်။

           ဘိလပ်မြေစျေးနှုန်းများမှာ ကြံ့နှစ်ကောင် (အနီ) တစ်အိတ်လျှင် ၉၀၀၀ကျပ် ၊ အယ်ဖာတစ်အိတ်လျှင် ၉၅၀၀ကျပ် ၊ အပါချီတစ်အိတ်လျှင် ၈၅၀၀ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး