ပြည်တွင်းကုန်သွယ်မှုသတင်း

    ၇.၇.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

 စားတော်ပဲကို ဒေသအသီးသီးတွင် လူမျိုးမရွေး၊ ဘာသာမရွေးစားသုံးလျက်ရှိပါသည်။ မြန်မာလူမျိုးတို့သည် စားတော်ပဲကို အခြေခံအစားအစာတစ်ခုအဖြစ်လည်းကောင်း၊ နံနက်ခင်းအဆာပြေစာအဖြစ်လည်းကောင်း ထမင်းပူပူ၊ ထမင်းကြော်၊ အီကြာကွေး၊ ပလာတာ၊ နံပြား စသည်တို့ဖြင့် စားသုံးကြပါသည်။

    စားတော်ပဲပြုတ်ရာတွင် စားတော်ပဲကိုဝယ်ပြီး ပဲထဲမှ ခဲနှင့် အမှုန်များကိုရွေး၍ ရေသုံးထပ်ဆေးပြီးလျှင် ရေဖြင့်စိမ်ကာ ညနေအချိန်တွင် စကာဖြင့် ပဲများကိုဆယ်၍ အညှောင့်လေးများထွက်လာစေရန် သုံးရက်ခန့်ရေစစ်ထားရပြီးမှသာ ပြုတ်ရပါသည်။ စားတော်ပဲတစ်ပိဿာကို ဒန်အိုးဖြင့် စားတော်ပဲမြုပ်ရုံရေထည့်ပြီး သုံးခါတည်၍ ပြုတ်ရပါသည်။ နံနက် ဈေးပြန်ထွက်သည့်အခါ တစ်ခါပြန်၍ နွှေးပေးရပါသည်။

   စားတော်ပဲတွင် ဆားနှင့်ဆိုဒါတို့ကိုထည့်ပြုတ်ရပါသည်။ အချိုဓာတ်လိုလျှင် ထန်းလျက်ထည့်၍ပြုတ်ရပါသည်။ စားတော်ပဲတစ်ပိဿာလျှင် ၇၂၀၀ကျပ်ရှိပြီး မီးသွေးဖြင့်ပြုတ်လျှင် မီးသွေးတစ်ပိဿာအိတ်(၁)အိတ်ကုန်ပါသည်။ မီးသွေးတစ်ပိဿာအိတ် (၁)အိတ်မှာ ၆၀၀ကျပ်ဖြစ်ပါသည်။ စားတော်ပဲ ၁၀ကျပ်သားလျှင် ၈၀၀ကျပ်ဖြင့်ရောင်းချပါသည်။

 စားတော်ပဲသည် လူအများစုအတွက် နံနက်ခင်းအစားအစာဖြစ်ပြီး အရင်းအနှီးလည်း အများအပြားမလိုအပ်သောကြောင့် အိမ်တွင်းစီးပွားရေးလုပ်ငန်းတစ်ခုအဖြစ် လုပ်ဆောင်ခြင်းဖြစ်ကြောင်းနှင့် ယခုနှစ်တွင်မူ ယခင်နှစ်ထက် အရောင်းပါးကြောင်း စားတော်ပဲရောင်းသူတစ်ဦး၏ ပြောပြချက်အရ သိရှိရပါသည်။

DOCA(ပဲခူး)

   တောင်ငူခရိုင်၊ ဖြူးမြို့တွင် ရွှေဘိုပေါ်ဆန်းတစ်အိတ်လျှင် ၁၁၀၀၀၀ကျပ်ဖြင့် ဈေးနှုန်းတည်ငြိမ်နေပြီး ဧည့်မထ(မိုး)မှာ ယခင်အပတ်တွင် တစ်အိတ်လျှင် ၇၂၀၀၀ကျပ်ရှိခဲ့ရာမှ ယခုအပတ်တွင် တစ်အိတ်လျှင် ၇၄၀၀၀ကျပ်ဖြင့် ဈေးနှုန်းအနည်းငယ်မြင့်တက်လာခဲ့ပါသည်။

   မြေပဲဆီမှာ ယခင်အပတ်တွင် တစ်ပိဿာလျှင် ၁၅၀၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၁၇၀၀ကျပ်၊ စားအုန်းဆီမှာ ယခင်အပတ်တွင်  တစ်ပိဿာလျှင် ၆၃၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၈၀၀၀ကျပ်ဖြင့် ဈေးနှုန်းမြင့်တက်လာခဲ့ပါသည်။

    ကြက်သွန်နီမှာ ယခင်အပတ်တွင် တစ်ပိဿာလျှင် အသေး ၂၀၀၀ကျပ်၊ အလတ် ၂၂၀၀ကျပ်၊ အကြီး ၂၅၀၀ကျပ်ရှိခဲ့ရာမှ ယခုအပတ်တွင် အသေးနှင့် အလတ်အရောတစ်ပိဿာလျှင် ၂၂၀၀ကျပ်၊ အကြီး ၂၃၀၀ကျပ်တို့ဖြင့်  ဈေးနှုန်းအနည်းငယ်ကျဆင်းလာခဲ့ပါသည်။

    ကြက်သွန်ဖြူမှာ ယခင်အပတ်တွင် တစ်ပိဿာလျှင် အသေး ၅၅၀၀ကျပ်၊ အလတ် ၆၅၀၀ ကျပ်၊ အကြီး ၇၀၅၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် အသေး ၇၀၀၀ကျပ်၊ အလတ် ၈၀၀၀ကျပ်နှင့် အကြီး ၉၀၀၀ကျပ်တို့ဖြင့် ဈေးနှုန်းဆက်လက်မြင့်တက်လာခဲ့ပါသည်။

  ငရုတ်ခြောက်အရှည်မှာ တစ်ပိဿာလျှင် ၁၆၀၀၀ကျပ်မှ ၁၇၀၀ကျပ်အထိဖြင့် ဈေးနှုန်းတည်ငြိမ်နေပြီး အာလူးမှာ ယခင်အပတ်တွင် တစ်ပိဿာလျှင် အသေး ၂၀၀၀ကျပ်၊ အလတ် ၂၂၀၀ကျပ်နှင့် အကြီး ၂၅၀၀ကျပ်တို့အထိရှိခဲ့ရာမှ ယခုအပတ်တွင် တစ်ပိဿာလျှင် အသေး ၂၈၀၀ကျပ်၊ အလတ် ၃၀၀ ကျပ်နှင့် အကြီး ၃၂၀၀ကျပ်အထိတို့ဖြင့် ဈေးနှုန်းမြင့်တက်လာခဲ့ပါသည်။

  ကုလားပဲခြမ်းမှာ ယခင်အပတ်တွင် တစ်ပိဿာလျှင် ၆၀၀၀ကျပ်မှ ယခုအပတ်တွင် တစ်ပိဿာလျှင် ၆၂၀၀ကျပ်ဖြင့် ဈေးနှုန်းအနည်းငယ်မြင့်တက်လာခဲ့ပြီး ကုလားပဲလုံးမှာ တစ်ပိဿာလျှင် ၅၂၀၀ကျပ်ဖြင့် ဈေးနှုန်းတည်ငြိမ်နေပါသည်။

 မြေပဲဆံ(အဖြူ)မှာ ယခင်အပတ်တွင် တစ်ပိဿာလျှင် ၈၅၀၀ကျပ်မှ ယခုအပတ်တွင် တစ်ပိဿာလျှင် ၈၀၀၀ကျပ်ဖြင့် ဈေးနှုန်းအနည်းငယ်ကျဆင်းလာခဲ့ပြီး မြေပဲဆံ(အနီ)မှာ တစ်ပိဿာလျှင် ၈၈၀၀ကျပ်ဖြင့် ဈေးနှုန်းတည်ငြိမ်နေကြောင်း သိရပါသည်။

DOCA(ပဲခူး)

   တောင်ငူမြို့တွင် အခြေခံစားသောက်ကုန်များဖြစ်သော မြေပဲဆီတစ်ပိဿာလျှင် ၁၅၀၀၀ကျပ်ဖြင့် ဈေးနှုန်းတည်ငြိမ်နေပြီး စားအုန်းဆီမှာ  ယခင်အပတ်တွင် တစ်ပိဿာလျှင် ၆၈၀၀ကျပ်မှ ယခုအပတ်တွင် တစ်ပိဿာလျှင် ၇၅၀၀ကျပ်ဖြင့် ဈေးနှုန်းအနည်းငယ်မြင့်တက်လာခဲ့ပါသည်။

   ကြက်သွန်နီမှာ ယခင်အပတ်တွင် တစ်ပိဿာလျှင် အသေး ၂၄၀၀ကျပ်၊ အလတ် ၂၅၀၀ကျပ်၊ အကြီး ၂၇၀၀ကျပ်နှင့် တရုတ်ကြက်သွန်နီ ၂၇၀၀ကျပ်တို့ရှိခဲ့ရာမှ ယခုအပတ်တွင် အသေးနှင့် အလတ်အရောတစ်ပိဿာလျှင် ၂၂၀၀ကျပ်၊ အကြီး ၂၅၀၀ကျပ်နှင့် တရုတ်ကြက်သွန်နီ ၂၅၀၀ကျပ်ဖြစ်ကာ ဈေးနှုန်းအနည်းငယ်ကျဆင်းလာခဲ့ပါသည်။

    ကြက်သွန်ဖြူမှာ ယခင်အပတ်တွင် တစ်ပိဿာလျှင် အသေး ၆၀၀၀ကျပ်၊ အလတ် ၆၅၀၀ကျပ်၊ အကြီး ၇၀၀၀ကျပ်နှင့် တရုတ်ကြက်သွန်ဖြူ ၇၀၀၀ကျပ်တို့ရှိခဲ့ရာမှ ယခုအပတ်တွင် တစ်ပိဿာလျှင် အသေး ၇၀၀၀ကျပ်၊ အလတ် ၇၅၀၀ကျပ်၊ အကြီး ၈၀၀၀ကျပ်နှင့် တရုတ်ကြက်သွန်ဖြူ ၈၀၀၀ကျပ်တို့ဖြင့် ဈေးနှုန်းဆက်လက်မြင့်တက်လာခဲ့ပါသည်။

     အာလူးမှာ တစ်ပိဿာလျှင် အသေး ၂၉၀၀ကျပ်၊ အလတ် ၃၂၀၀ကျပ်၊ အကြီး ၃၄၀၀ကျပ်၊ တရုတ်အာလူးတစ်ပိဿာလျှင် ၃၄၀၀ကျပ်၊ ငရုပ်သီးခြောက်အပုမှာ တစ်ပိဿာလျှင် ၁၈၀၀၀ကျပ်မှ ၂၀၀၀၀ကျပ်အထိ၊ ငရုပ်သီးခြောက်အရှည်မှာ တစ်ပိဿာလျှင် ၁၃၀၀၀ကျပ်မှ ၁၅၀၀၀ကျပ်အထိနှင့် ငရုပ်သီးခြောက်အပွမှာ တစ်ပိဿာလျှင် ၂၃၀၀၀ကျပ်မှ ၂၅၀၀၀ကျပ်အထိတို့ဖြင့် ဈေးနှုန်းတည်ငြိမ်နေကြပါသည်။

DOCA(ပဲခူး)

 ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့၊ ကံသာကျေးရွာရှိ ခြွေလှေ့စက်လုပ်ငန်းရှင် ဦးကျော်မင်းထွန်း၏ (မင်းခန့်ကျော်ခြွေလှေ့စက်) လုပ်ငန်းသည် (၂၀၁၇) ခုနှစ်မှစတင်၍ လုပ်ကိုင်ခဲ့သောလုပ်ငန်းဖြစ်ပြီး လိုအပ်သောတောင်သူဦးကြီးများစိတ်တိုင်းကျ ပဲစပါးခြွေလှေ့စက်လုပ်ငန်းအသစ်ပြုလုပ်ပေးခြင်းနှင့် အ‌ဟောင်းပြင်ဆင်ခြင်းလုပ်ငန်းများကိုဆောင်ရွက်လျက်ရှိကြောင်း သိရှိရပါသည်။

 အဆိုပါ မင်းခန့်ကျော်ခြွေလှေ့စက်လုပ်ငန်းသည် စပါး၊ ကုလားပဲ၊ မတ်ပဲ၊ ပဲတီစိမ်း၊ ပဲစင်းငုံ (ပဲအမျိုးမျိုး)၊ ပြောင်းသီးနှံများကို ခြွေလှေ့ရရှိပါကြောင်း၊ ခြွေလှေ့စက်၏သံထည်မှာ အရည်အသွေးကောင်းမွန်သော သံထည်အထူသားကိုအသုံးပြုထားသဖြင့် တောင့်တင်းခိုင်မာပြီး ဆေးသားနှစ်ထပ်အုပ်ပေးထားပြီး ဆိုဒ်စုံရှိကာ ဆိုဒ်ကြီးအနေဖြင့် (၆) ပေခွဲရှိပြီး တစ်နာရီလျှင် တင်း (၃၀) မှ တင်း (၆၀) ထိခြွေနိုင်ကြောင်း၊ စက်ဈေးနှုန်းမှာ ကျပ် (၈၂) သိန်းခန့်ရှိပြီး အလတ်ဆိုဒ်နှင့် အသေးဆိုဒ်တို့ရှိပါကြောင်း၊ လုပ်သားအင်အား (၂၀) ဦးဖြင့် လုပ်ငန်းလည်ပတ်လျှင် တစ်ဦးလျှင် (တစ်ရက်) လုပ်သားခမှာ ကျပ် (၅၀၀၀) မှ ကျပ် (၁၅၀၀၀) အထိပေးချေရကြောင်း၊ (၁) လလျှင် စက်ပျမ်းမျှအားဖြင့် (၁) စက်မှ (၂) စက်အထိရောင်းရပြီး ရာသီချိန်တွင် ပို၍‌ရောင်းရကြောင်း၊ စက် (၁) စက်အနေဖြင့် အမြတ်ရရှိငွေ ကျပ် (၅) သိန်းမှ ကျပ် (၆) သိန်းခန့်ရှိပြီး ခြွေလှေ့စက်ထုတ်လုပ်သည့်လုပ်ငန်းအပြင် ထွန်စက်၊ ထွန်ထယ်၊ စပါးသယ်ပုံးလုပ်ငန်းနှင့် အခြားမှ လာရောက်ပြုပြင်သည့် လုပ်ငန်းကိုလည်းလုပ်ကိုင်ကြောင်း၊ ဈေးကွက်အနေဖြင့် နတ်တလင်းမြို့နယ်တွင်သာမက ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ မွန်ပြည်နယ်နှင့် ဧရာဝတီတိုင်းဘက်တို့မှ လာရောက်ဝယ်ယူလျက်ရှိကြောင်း သိရှိရပါသည်။

 မင်းခန့်ကျော်ခြွေလှေ့စက်လုပ်ငန်းရှင်သည် တောင်သူများ၏လိုအပ်ချက်အလိုက် ဖြန့်ဖြူးရောင်းချလျက်ရှိသော ယုံကြည်စိတ်ချရသည့်လုပ်ငန်းအဖြစ် ရပ်တည်နေပါ၍ ယခုလက်ရှိ ပြောင်းသီးသန့်ခြွေစက်နှင့် မြေပဲလုံးဆံသီးသန့်ခြွေစက်ကို ထပ်မံတိုးချဲ့ပြီး ဒေသထွက်ထုတ်ကုန်ပစ္စည်းများဖွံ့ဖြိုးတိုးတက်စေရန်အတွက် ခေတ်မီနည်းစနစ်များကိုလည်း လေ့လာဆောင်ရွက်ပြီး ဆက်လက်တိုးချဲ့ဆောင်ရွက်သွားမည်ဖြစ်ကြောင်းသိရှိရပါသည်။

DOCA(ပဲခူး)