ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့မဈေးကြီးတွင် သီးနှံမျိုးစုံစိုက်ပျိုးထွက်ရှိသော ပခုက္ကူ၊ မုံရွာ၊ မန္တလေးမြို့နှင့် ရေစကြိုမြို့ရှိ ကျေးရွာများဖြစ်သည့် ညောင်တောနှင့် ကူတုတ်ရွာတို့မှ သီးနှံအများဆုံးဝင်ရောက်ရောင်းဝယ်ဖောက်ကားလျက်ရှိပါသည်။

  ၂၀၂၃ခုနှစ်၊ ဇွန်လ၊ စတုတ္ထအပတ်တွင် ရေစကြိုမြို့မဈေးအတွင်း အရောင်းအဝယ်ဖြစ်လျက်ရှိသော အခြေခံစားကုန်ဈေးနှုန်းများမှာ ခရမ်းချဉ်သီး (အင်းသီး) (၁) ပိဿာလျှင် ကျပ် (၂၃၀၀)မှ ကျပ် (၂၅၀၀)၊ ခရမ်းသီး (၁) ပိဿာလျှင် ကျပ် (၂၃၀၀) မှ ကျပ် (၂၅၀၀)၊ အာလူး (၁) ပိဿာလျှင် ကျပ် (၃၃၀၀) မှ ကျပ် (၃၅၀၀)၊ မျှစ် (၁) ပိဿာလျှင် ကျပ် (၂၆၀၀) မှ ကျပ် (၂၈၀၀)၊ ပဲသီးရှည် (၁) ပိဿာလျှင် ကျပ် (၂၃၀၀) မှ ကျပ် (၂၅၀၀)၊ ကင်းမွန်သီး (၁) ပိဿာလျှင် ကျပ် (၂၃၀၀) မှ ကျပ် (၂၅၀၀)၊ ငရုတ်သီးစိမ်း (၁) ပိဿာလျှင် ကျပ် (၆၅၀၀) မှ ကျပ် (၆၈၀၀)၊ ဆင်ခြေယာငရုတ်သီးခြောက် (၁) ပိဿာလျှင် ကျပ် (၁၈၅၀၀) မှ ကျပ် (၁၈၇၀၀)၊ ကြက်သွန်နီ (၁) ပိဿာလျှင် ကျပ် (၂၂၀၀) မှ ကျပ် (၂၄၀၀)၊ ကြက်သွန်ဖြူ (၁) ပိဿာလျှင် ကျပ် (၇၀၀၀) မှ ကျပ် (၇၅၀၀)၊ ချင်းတက် (၁) ပိဿာလျှင် ကျပ် (၇၀၀၀) မှ ကျပ် (၇၅၀၀)၊ ကြက်ဟင်းခါးသီး (၁) ပိဿာလျှင် ကျပ် (၁၆၀၀) မှ ကျပ် (၁၈၀၀)၊ ရုံးပတီသီး (၁) ပိဿာလျှင် ကျပ် (၂၃၀၀) မှ ကျပ် (၂၅၀၀)၊ မေမြို့ပဲသီး (အပြား) (၁) ပိဿာလျှင် ကျပ် (၃၃၀၀) မှ ကျပ် (၃၅၀၀)၊ မေမြို့ပဲသီး (အလုံး) (၁) ပိဿာလျှင် ကျပ် (၁၅၀၀) မှ ကျပ် (၁၇၀၀)၊ သခွားသီးတစ်လုံးလျှင် ကျပ် (၃၀၀)၊ ဒညင်းသီးတစ်လုံးလျှင် ကျပ် (၄၀) မှ ကျပ် (၆၀)၊ ပဲရှည်သီး (ပဲလင်းမြွေသီး) တစ်ချောင်းလျှင် ကျပ် (၆၀၀)၊ ခါကြက်ဥ (၁) ပိဿာလျှင် ကျပ် (၂၅၀၀) မှ ကျပ် (၃၀၀၀)၊ ကန်စွန်းရွက် (၁) စည်းလျှင် ကျပ် (၅၀)၊ ချဉ်ပေါင်ရွက် (၁) စည်းလျှင် ကျပ် (၅၀)၊ ဘူးရွက် (၁) စည်းလျှင် ကျပ် (၅၀)၊ သံပရာသီး (၁) လုံးလျှင် ကျပ် (၅၀)၊ သကြားပြောင်းဖူး (၁) ဖူးလျှင် ကျပ် (၃၅၀)၊ မန်ကျည်းသီးမှည့်(အစေ့လွတ်) (၁) ပိဿာလျှင် ကျပ် (၃၅၀၀) မှ ကျပ် (၄၀၀၀)၊ မြေပဲဆံ (၁) ပြည်လျှင် ကျပ် (၈၃၀၀) မှ ကျပ် (၈၅၀၀)၊ ကုလားပဲခြမ်း (အနီဆံ) (၁) ပြည်လျှင် ကျပ် (၈၀၀၀)၊ ဆား (၁) ပိဿာလျှင် ကျပ် (၅၀၀) စသည့်ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိကြောင်း ရေစကြိုမြို့မဈေးအတွင်းတွင် ရောင်းချနေကြသော ဈေးသည်များထံမှ သိရှိရပါသည်။     

DOCA(မကွေး)

   မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်၌ ၂၀၂၃ခုနှစ်၊ မေလတွင်ဖြစ်ပွားခဲ့သည့် မိုခါမုန်တိုင်းကြောင့် မိုးရွာသွန်းခဲ့သည့်အတွက် မိုးသီးနှံများစတင်စိုက်ပျိုးခဲ့ကြပါသည်။ (၂၀၂၃-၂၀၂၄) ခုနှစ် (၂၀၂၃ခုနှစ်၊ ဇွန်လ၊ စတုတ္ထအပတ်ထိ) ရေစကြိုမြို့နယ်၌ မိုးသီးနှံများဖြစ်သည့် မြေပဲ၊ ပဲတီစိမ်း(ပဲနှောက်စိမ်း)နှင့် နှမ်းသီးနှံများကို (၄၀၆၁၂)ဧကလျာထားကာ (၃၂၇၇၁)ဧကစိုက်ပျိုုးပြီးဖြစ်ကြောင်း၊ ပဲတီစိမ်း(ပဲနှောက်စိမ်း)သီးနှံကို (၂၉၄၁၂)ဧကလျာထားကာ (၂၈၈၂၅)ဧကတို့စိုက်ပျိုးပြီးဖြစ်ကြောင်း သိရှိရပါသည်။ ရေစကြိုမြို့နယ်၊ ထန်းငယ်တောကျေးရွာအုပ်စု၊ ကွမ်းသီးကန် ကျေးရွာတွင် မြေပဲ၊ ပဲတီစိမ်း(ပဲနှောက်စိမ်း)နှင့် နှမ်းသီးနှံများကိုစိုက်ပျိုးကြပြီး မိုးသီးနှံဖြစ်သည့် ပဲတီစိမ်း(ပဲနှောက်စိမ်း)ကို အဓိကအများဆုံးစိုက်ပျိုးလျက်ရှိပါသည်။  

      ပဲတီစိမ်း(ပဲနှောက်စိမ်း)သီးနှံမျိုးများကို အများအားဖြင့် မိုးလေဝသရာသီဥတုဒဏ်ခံနိုင်သောဒေသများတွင် မေလနှင့် ဇွန်လတို့၌ စိုက်ပျိုးကြရာ အတန်းလိုက်သီးသန့်စိုက်ပျိုးနည်းနှင့် တန်းကြားသီးညှပ်စိုက်ပျိုးနည်းနှစ်နည်းတို့ဖြင့် စိုက်ပျိုးကြကြောင်း၊ မိုးလေဝသရာသီဥတုကိုမျှော်ပြီး စိုက်ပျိုးရသောသီးနှံဖြစ်သောကြောင့် တစ်ဧကလျှင်  ၅တင်းမှ ၁၀တင်းခန့်ထွက်ရှိပါကြောင်း၊ မိုးလေဝသရာသီဥတုကောင်းလျှင် (၁၀)တင်းကျော် ထွက်ရှိပါကြောင်း၊ တစ်ဧကကုန်ကျစရိတ်အနေဖြင့် ယခင်နှစ်တွင် ကျပ်(၂၀၀၀၀၀)ခန့်ကုန်ကျခဲ့ပြီး ယခုနှစ်တွင် ကျပ်(၃၅၀၀၀၀)ခန့်ကုန်ကျပါကြောင်း၊ ယခင်နှစ် ပဲတီစိမ်း(ပဲနှောက်စိမ်း)ဈေးနှုန်းများမှာ တစ်တင်းလျှင် ကျပ်(၄၄၀၀၀)မှ ကျပ်(၅၀၀၀၀)တို့ဖြင့် ရောင်းချရပါကြောင်း၊ ယခုနှစ်၏ လက်ရှိဈေးနှုန်းများမှာ တစ်တင်းလျှင် ကျပ်(၄၇၀၀၀)မှ ကျပ်(၅၅၀၀၀)တို့ဖြင့် အရောင်းအဝယ်ဖြစ်လျက်ရှိကြောင်း တောင်သူများ၏ အကျိုးအမြတ်မှာမူ  မိုးလေဝသရာသီဥတုအပေါ် မူတည်နေပါကြောင်း၊ ယခုလက်ရှိ ပဲခင်းများတွင် အဖူးအပွင့်များစတင်ပွင့်ဖူးနေပြီဖြစ်ပါကြောင်း၊ ယခု ဇွန်လတွင် မုတ်သုံမိုးများရွာသွန်းမည်ဆိုလျှင် အသီးအပွင့်များအောင်မြင်စွာဖြစ်ထွန်းနိုင်ပြီး အထွက်နှုန်းကောင်းနိုင်ကြောင်းနှင့် တောင်သူများအနေဖြင့်လည်း အကျိုးအမြတ်များစွာရရှိနိုင်ပါကြောင်း စိုက်ပျိုးတောင်သူတစ်ဦး၏ ပြောပြချက်အရသိရှိရပါသည်။

DOCA(မကွေး)

   ၂၀၂၂ခုနှစ်တွင် အောင်လံမြို့နယ်၌ မိုးဦးကာလစောခဲ့၍ ပဲစိုက်တောင်သူများအနေဖြင့်  မေလ၊ ပထမအပတ်တွင် စတင်စိုက်ပျိုးနိုင်ခဲ့ကြပါသည်။ သီးနှံပေါ်ချိန်မှာ ပုံမှန်ထက် (၁)လစော၍ ထွက်ရှိပြီး ဇူလိုင်လတွင် ‌ဈေးကွက်အတွင်း စတင်ရောက်ရှိလာသောဈေးနှုန်းမှာ ပိဿာ(၂၀)ဝင် (၁)တင်းလျှင် ကျပ်(၄၅၀၀၀)မှ ကျပ်(၅၀၀၀၀)ဖြင့် အရည်အသွေးအလိုက် အရောင်းအဝယ်စတင်ခဲ့ပြီး ရန်ကုန်နှင့် မန္တလေးဈေးကွက်များကဝယ်ယူခဲ့ကြပါသည်။ ဩဂုတ်လတွင် ကျပ်(၄၄၀၀၀)မှ ကျပ်၉၅၁၀၀၀)အတွင်း မန္တလေးဝယ်လက်မှာ ပိုမိုဝယ်ယူမှုရှိပြီး ရန်ကုန်ဝယ်လက်မှာမူ ပုံမှန်သာအဝယ်ရှိခဲ့ပါသည်။ စက်တင်ဘာလ၊ အောက်တိုဘာလနှင့် ဒီဇင်ဘာလများတွင် ပိဿာ(၂၀)ဝင် (၁)တင်းလျှင် ကျပ်(၄၅၀၀၀)မှ ကျပ်(၅၀၀၀၀)အထိဈေးနှုန်းတို့ဖြင့် ဈေးဖွင့်ဝယ်ယူခဲ့ကြကြောင်းသိရှိရပါသည်။ ယခု၂၀၂၃ခုနှစ်၊ ဇွန်လတွင် ပိဿာ(၂၀)ဝင် (၁)တင်းလျှင် ကျပ်(၅၅၀၀၀)ဖြင့် အရောင်းအဝယ်ဖြစ်လျက်ရှိပါသည်။

   (၂၀၂၃-၂၀၂၄) ခုနှစ်၊ မိုးဦးရာသီတွင် အောင်လံမြို့နယ်၌ ပဲတီစိမ်းလျာထားစိုက်ဧကမှာ (၅၉၂၁၁)ဧကဖြစ်ပြီး ယခုဇွန်လ၊ တတိယအပတ်၌ ဧက(၃၀၀၀၀)ခန့်စိုက်ပျိုးပြီးစီးပြီဖြစ်ကြောင်း စိုက်ပျိုးရေးဦးစီးဌာနမှသိရှိရပါသည်။

DOCA(မကွေး)

  ကျောက်ဆည်ခရိုင်စားသုံးသူရေးရာဦးစီးဌာနသည် ပြည်တွင်းကုန်သွယ်မှုလုပ်ငန်းများဖွံဖြိုး တိုးတက်ရေးအတွက် အလားအလာရှိသော အဓိကသီးနှံများ၏ စတင်စိုက်ပျိုးမှုမှသည် စျေးကွက် တင်ပို့ရောင်းချမှုအခြေအနေများအထိ သိရှိနိုင်ရေးအတွက် ကျောက်ဆည်ခရိုင်စားသုံးသူရေးရာဦးစီး ဌာနမှ ခရိုင်ဦးစီးမှူးဦးဆောင်သောအဖွဲ့သည် ကျောက်ဆည်မြို့နယ် ၊ သံချက်ကုန်းကျေးရွာရှိ  တောင်သူ ဦးကျော်စိုးလင်း၏ ငရုတ်စိုက်ပျိုးထွက်ရှိမှု ၊ စျေးနှုန်းစျေးကွက်အခြေအနေများအား သိရှိနိုင်ရန်အတွက် ကွင်းဆင်းလေ့လာခဲ့ပါသည်။

    တောင်သူ ဦးကျော်စိုးလင်းကပြောကြားရာတွင် မိမိတို့ဒေသ၌ သီးနှံများ စိုက်ပျိုးရာတွင် ဆည်ရေကို အဓိကအားကိုးပြီး စိုက်ပျိုးရကြောင်း၊ ငရုတ်သီးနှံကို အောက်တိုဘာလတွင် ပျိုးထောင်ပြီး နိုဝင်ဘာလတွင် စတင်စိုက်ပျိုး၍ ဖေဖော်ဝါရီလကုန်ပိုင်းတွင် ငရုတ်များစတင်ထွက်ရှိနေကြောင်း၊ ဇူလိုင်လကုန်တွင် ရိတ်သိမ်းပြီးစီးမည်ဖြစ်ကြောင်း၊ ငရုတ်အားစတင်စိုက်ပျိုးရာတွင် တစ်ဘောင်နှင့်တစ်ဘောင်အကွာ အဝေး(၃')ကွာဝေးပြီး တစ်ပင်နှင့်တစ်ပင်ခြား(၂၀")ခြားပြီး စနစ်တကျ စိုက်ပျိုးရကြောင်း ၊ စိုက်ပျိုးရာတွင် မျိုးအဖြစ် တိုးတိုးအောင်ငရုတ်မျိုးကိုသာ စိုက်ပျိုးကြပါသည်။

    စိုက်ပျိုးရာတွင်(၁)ဧကလျှင် မျိုးစေ့(၁၀)ထုပ်စိုက်ပျိုးရကြောင်း ၊ ငရုတ်မျိုးစေ့ တစ်ထုပ်လျှင် ယခင်နှစ်တွင် (၁၆၀၀၀/-)ကျပ် ပေးရကြောင်း၊ ယခုနှစ်တွင် (၃၈၀၀၀/-)ကျပ်အထိရှိကြောင်း ၊ (၁)ဧက ကုန်ကျစရိတ်အနေဖြင့် မြေပြင်စရိတ် ၊ သွင်းအားစု၊ လုပ်အားခ ၊စုစုပေါင်း(၈၀)သိန်းကုန်ကျကြောင်း ၊ထွက်ရှိမှုအနေဖြင့်  ၄င်း၏စိုက်ခင်းများ၌ (၁)ဧကလျှင် ပိဿာ(၈၀၀၀-၁၀၀၀၀)ခန့်ထွက်ရှိကြောင်း ၊ တိုးတိုးအောင်ငရုတ်စျေးနှုန်းအနေဖြင့် ယခင်လ တွင် ငရုတ်အစို(အစိမ်း) တစ်ပိဿာလျှင်(၈၅၀၀/-)ကျပ် ၊ ငရုတ်အစို(အမှည့်) တစ်ပိဿာလျှင် (၆၀၀၀/-)ကျပ် စျေးနှုန်းများဖြင့် ရောင်းရပြီး ယခုအချိန်၌ ငရုတ်အစို(အစိမ်း) တစ်ပိဿာလျှင် (၄၅၀၀/-)ကျပ်၊ ငရုတ်အစို(အမှည့်) တစ်ပိဿာလျှင်(၄၇၀၀/-)ကျပ် စျေးနှုန်းသာရရှိကြောင်း ၊ စျေးကွက်အနေဖြင့် ကျောက်ဆည်နှင့် မြစ်သားမြို့ရှိ ကုန်သည်များမှ စိုက်ခင်းအထိ လာရောက်ဝယ်ယူလျက်ရှိကြောင်း၊ တိုးတိုးအောင်ငရုတ်သည် စိုက်ပျိုးစရိတ်များသော်လည်း အခြားငရုတ်များထက် အထွက်နှုန်းကောင်းပြီး စျေးနှုန်းပိုမိုရရှိသောကြောင့် စိုက်ပျိုးသင့်သောသီးနှံဖြစ်ကြောင်း ရေးသားတင်ပြအပ်ပါသည်။

DOCA(မန္တလေး)

    မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ရှမ်းရွာကုန်းကျေးရွာ၌ ဝါးဖြင့်ပြုလုပ်သော ပျိုးစည်းသည့်နှီးလုပ်ငန်းကိုလုပ်ကိုင်ကြခြင်းဖြင့် မိသားစုအပိုဝင်ငွေရရှိလျက်ရှိကြောင်း သိရှိရပါသည်။

    ပျိုးစီးနှီးပြုလုပ်ရာတွင် ကုန်ကြမ်းဝါးကို တောင်တွင်းကြီးမှထွက်ရှိသော  ကြက်သောင်းဝါးနှင့် စေတုတ္တရာမြို့နယ်၊ မြောက်ဦးဒေသမှထွက်ရှိသော ဝါးများကိုအသုံးပြုရကြောင်း၊ ဝါး(၁)လုံးလျှင် ကျပ်(၁၀၀၀)မှ ကျပ်(၁၅၀၀)အထိပေးဝယ်ရကြောင်း၊ ဝါး(၁)လုံးစိပ်လျှင် တစ်ထောင့်တစ်ထွာဝါးအဆစ်ပိုင်း(၆)ပိုင်းရရှိပါကြောင်း၊ ဝါးအဆစ်ပိုင်းတစ်ဖြတ်လျှင် ပျိုးစည်းသည့်နှီးအပင်ရေ(၅၀၀)ခန့်ထွက်ရှိကာ ဝါး(၁)လုံးလျှင် ပျိုးစည်းသည့်နှီးအပင်ရေ(၃၀၀၀)ခန့်ရရှိပါကြောင်း၊ (၁)ရက်လျှင် လူတစ်ဦးပြီးစီးသော ပျိုးစည်းသည့်နှီးအပင်ရေ(၅၀၀၀)ပင်ဖြစ်ပါကြောင်း၊ အကျိုးအမြတ်အနေဖြင့် ဝါးဝယ်ယူခနုတ်ပြီး မိသားစုလုပ်အားဖြင့် လုပ်ကိုင်ရ၍ တစ်နေ့လျှင် ဝင်ငွေကျပ်(၃၅၀၀)မှ ကျပ်(၄၀၀၀)ရရှိပါကြောင်း၊ ထုတ်လုပ်ထွက်ရှိလာသောပျိုးစည်းသည့်နှီးများကို တစ်ထောင်စီး(၁)စီးလျှင် ကျပ်(၁၅၀၀)နှုန်းဖြင့် ဒေသတွင်းသာမက  နီးစပ်ရာမြို့များဖြစ်သော ပွင့်ဖြူမြို့၊ စကုမြို့၊ ဆိပ်ဖြူမြို့များသို့ တင်ပို့ရောင်းချလျက်ရှိပါကြောင်း၊ ပျိုးစည်းသည့်နှီးများကို နွေစပါး၊ မိုးစပါးစိုက်ပျိုးချိန်နှင့် ရိတ်သိမ်းချိန်တို့တွင် တွင်တွင်ကျယ်ကျယ်ထုတ်လုပ်ရပါကြောင်း၊ ရှမ်းရွာကုန်းကျေးရွာရှိ အိမ်ထောင်စုထက်ဝက်ခန့်သည် မိရိုးဖလာပျိုးစည်းသည့်နှီးလုပ်ငန်းကိုလုပ်ကိုင်ခြင်းဖြင့် မိသားစုအပိုဝင်ငွေရရှိလျက်ရှိကြောင်း ဒေသခံပျိုးစည်းသည့်နှီးလုပ်ငန်းရှင် မဝင်းမာထံမှသိရှိရပါသည်။

DOCA(မကွေး)