ပြည်တွင်းကုန်သွယ်မှုသတင်း

   ဇွန်ပန်းသည် မွှေးကြိုင်သော သင်းရနံ့နှင့်အဖြူအဆင်းရှိပြီး အမျိုးသမီးတိုင်း ကြိုက်နှစ်သက်သောပန်း ဖြစ်ပါသည်။ ဇွန်ပန်းသည် အမည်နှင့်လိုက်ဖက်စွာ ဇွန်လမှာ စတင်ပွင့်တတ်ပြီး ဩဂုတ်လအထိ ပွင့်သောပန်းဖြစ်သည်။ ဇွန်ပန်းပင်သည် ချုံပင် သို့မဟုတ်နွယ်ပင်တစ်မျိုးဖြစ်ပြီး ဇွန်ကြီး ၊ဇွန်လေးဟူ၍ နှစ်မျိုးရှိပါသည်။

  ဇွန်ပန်းပင်သည် ပူအိုက်သောရာသီဥတုကို ကြိုက်နှစ်သက်ပါသည်။ ထို့ကြောင့် ဇွန်ပန်းပင်ကို မြန်မာပြည်အပူပိုင်းဒေသများ၌ အများဆုံးစိုက်ပျိုးလေ့ရှိပါသည်။ ဇွန်ပန်းပင်များကို အခြားပန်းပင်များကဲ့သို့ ခြံဖွဲ့၍စိုက်ပျိုးခြင်းမရှိသော်လည်း မိမိတို့နေအိမ်များတွင် တစ်နိုင်တစ်ပိုင်စိုက်ပျိုး ကြပါ သည်။ ဇွန်ပန်းကုံးများကို ဘုရားပန်းကပ်လှူရန်၊ ပန်းပန်ရန်နှင့် ကားများ ၊ဈေးဆိုင်များတွင် ချိတ်ဆွဲရန်တို့အတွက် ဝယ်ယူကြကြောင်း သိရှိရပါသည်။ ညနေခင်းအချိန်တွင် ရရှိလာသောဇွန်ပန်းများကို ကြိုးဖြင့်သီကုံး၍ ဖက်ကလေးများဖြင့်ထုပ်ကာ ပြင်ဆင်ထားပြီး နောက်နေ့နံနက်စောစောအချိန်တွင် ဈေးသို့သွား၍ ရောင်းချခြင်းဖြင့် အရင်းမစိုက်ရဘဲ မိသားစု ဝင်ငွေရရှိနိုင်သောကြောင့် စိုက်ပျိုးသင့်သော ပန်းတစ်မျိုးဖြစ်သည်။

    ယခုအခါ ဇွန်ပန်းများကိုသီကုံးပြီး ကန့်ဘလူမြို့၊ မြို့မစည်ပင်သာယာဈေးသို့ လာရောက် ပန်းရောင်းချသည့် လုပ်ငန်းရှင်၏ပြောပြချက်အရ  တစ်ရက်လျှင် ဇွန်ပန်းကုံး(၃၀ မှ ၅၀) ခန့်အထိရရှိပြီး ဇွန်ပန်း(၁)ကုံးလျှင် (၂၀၀)ကျပ်၊ (၁၀)ကုံးလျှင် (၁၉၀၀)ကျပ်ဖြင့် ရောင်းချလျက်ရှိကြောင်း သိရှိရပါသည်။         

DOCA(စစ်ကိုင်း)

    စစ်ကိုင်းတိုင်းဒေသကြီးသည် ဆန်ပိုဒေသများဖြစ်သော ကလေး၊ ကသာ၊ ကန့်ဘလူ၊ ရွှေဘိုနှင့် ရေဦးခရိုင်များမှ ‌ကသာ၊ ကန့်ဘလူနှင့် မုံရွာခရိုင်တို့တွင် စပါး/ဆန်ဈေး အနည်းငယ်တက်နေပြီး၊ ကျန်ခရိုင်များတွင် ဈေးအေးနေပါကြောင်း သိရပါသည်။

    စစ်ကိုင်းတိုင်းဒေသကြီးအတွင်း ၂၀၂၃ခုနှစ်၊ဇွန်လ(နောက်ဆုံး)ပတ်တွင် ဖြစ်ပေါ်နေသော စပါး/ဆန် ဈေးနှုန်း များမှာ ရွှေဘိုခရိုင်၊ ရွှေဘိုမြို့နယ်မှ ရွှေဘိုပေါ်ဆန်း(စပါး)  တင်း ၁၀၀လျှင် ကျပ် ၂၉၀၀၀၀၀၊ ပေါ်ဆန်း (ဆန်) ၂၄ပြည်ပါ တစ်အိတ်လျှင် ၉၆၀၀၀ကျပ်၊ ဧရာမင်း(စပါး)တင်း ၁၀၀လျှင် ကျပ်၂၄၀၀၀၀၀၊  ဧရာမင်း (ဆန်)   ၂၄ ပြည်ပါ တစ်အိတ်လျှင် ၉၆၀၀၀ ကျပ်၊ နွေစပါး(747)စပါးတင်း(၁၀၀)လျှင် ကျပ် ၁၄၅၀၀၀၀ ၊  နွေစပါး(747)(ဆန်) ၂၄ပြည်ပါ တစ်အိတ်လျှင် ကျပ် ၅၈၀၀၀ ဖြင့် အရောင်းအဝယ် ဖြစ်နေကြောင်း သိရပါသည်။

    ရေဦးခရိုင်၊ ရေဦးမြို့နယ်မှ ပေါ်ဆန်း (စပါး)တင်း ၁၀၀လျှင် ကျပ် ၂၉၀၀၀၀၀၊ ပေါ်ဆန်း (ဆန်) တစ်အိတ် လျှင်ကျပ် ၉၅၀၀၀၊  ဧရာမင်း(စပါး) တင်း ၁၀၀ လျှင် ၂၄၀၀၀၀၀၊ ဧရာမင်း (ဆန်)၂၄ ပြည် ပါ တစ်အိတ်  ၉၃၀၀၀ ကျပ်များဖြင့် အရောင်းအဝယ်ဖြစ်နေကြောင်း သိရပါသည်။

    ကလေးခရိုင်၊ ကလေးမြို့နယ်မှ ဧည့်မထ(စပါး) တင်း၁၀၀ လျှင် ၁၉၀၀၀၀၀၊ ဧည့်မထ (ဆန်) ‌၂၄ပြည်ပါ တစ်အိတ်မှာ ကျပ် ၇၂၀၀၀၊ ငစိန်(စပါး)တင်း၁၀၀လျှင် ၁၈၀၀၀၀၀၊ ငစိန် (ဆန်)၂၄ပြည်ပါ တစ်အိတ်မှာ ၇၀၀၀၀၊ ဧရာမင်း(စပါး) တင်း ၁၀၀ လျှင် ကျပ် ၂၀၀၀၀၀၀၊ ဧရာမင်း(ဆန်)၂၄ပြည်ပါ တစ်အိတ်မှာ ကျပ် ၈၀၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

    ကသာခရိုင်၊ အင်းတော်မြို့နယ်မှ မှော်ဘီ(၂)(စပါး) တင်း ၁၀၀ လျှင် ကျပ်၁၉၀၀၀၀၀၊ မှော်ဘီ(၂) ဆန် ၂၄ပြည် တစ်အိတ် လျှင် ကျပ် ၈၀၀၀၀၊ ဆင်းဧကရီ(၃)(စပါး)  တင်း၁၀၀ လျှင် ကျပ် ၁၆၀၀၀၀၀၊ ဆင်းဧကရီ-၃ ဆန် ၂၄ပြည်တစ်အိတ်မှာကျပ် ၇၀၀၀၀၊ ဧရာမင်း (စပါး)တင်း ၁၀၀လျှင် ကျပ် ၂၀၀၀၀၀၀၊ ဧရာမင်း(ဆန်) ၂၄ပြည် ဆန်တစ်အိတ်လျှင် ကျပ် ၉၀၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

    မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၂၄၀၀၀၀၀၊  ဧရာမင်း (ဆန်) ၂၄ပြည် တစ်အိတ်မှာ ကျပ် ၉၆၀၀၀၊ ပေါ်ဆန်း (စပါး) တင်း ၁၀၀ လျှင် ကျပ် ၂၈၀၀၀၀၀၊  ပေါ်ဆန်း (ဆန်)၂၄ပြည် တစ်အိတ်မှာ ကျပ် ၉၅၀၀၀၊ မနောသုခ(စပါး) တင်း ၁၀၀လျှင် ကျပ် ၁၈၀၀၀၀၀၊ မနောသုခ (ဆန်)၂၄ ပြည် တစ်အိတ်လျှင် ကျပ် ၇၅၀၀၀ ဖြင့် အရောင်းအဝယ် ဖြစ်နေကြောင်း သိရပါသည်။

    ကန့်ဘလူခရိုင်၊ ကန့်ဘလူမြို့တွင်  ဧရာမင်း(စပါး)တင်း ၁၀၀ လျှင် ကျပ် ၂၄၀၀၀၀၀၊  ဧရာမင်း (ဆန်)၂၄ပြည် တစ်အိတ်မှာ ကျပ် ၉၅၀၀၀၊ ပေါ်ဆန်း(စပါး) တင်း ၁၀၀လျှင် ကျပ် ၂၈၀၀၀၀၀၊ ပေါ်ဆန်း (ဆန်)၂၄ပြည် တစ်အိတ်လျှင် ကျပ် ၉၆၅၀၀ ဖြင့် အရောင်းအဝယ် ဖြစ်နေကြောင်း သိရပါသည်။

   စစ်ကိုင်းတိုင်းဒေသကြီးမှ ဇွန်လ (စတုတ္တ)ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၁၂၂၅၀၊ မန္တလေးသို့ အိတ်ရေ ၂၆၀၇၀၊ မကွေး သို့ အိတ်ရေ ၃၀၊ နေပြည်တော်သို့ အိတ်ရေ ၇၀၀၀၊ ရှမ်း (တောင်)သို့ အိတ်ရေ ၅၀၀၀၊ ရှမ်း(မြောက်)သို့ အိတ်ရေ ၅၀၀၀၊ ကချင်သို့ အိတ်ရေ ၁၅၀၀၊ စုစုပေါင်းအိတ်ရေ (၅၆၈၅၀)အိတ်၊ တန်အားဖြင့် (၂၈၄၂.၅) စီးထွက်ခဲ့ပြီး၊ ယခု ဇွန်လ (နောက်ဆုံး)ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၁၇၇၀၀၊ မန္တလေး သို့ အိတ်ရေ ၂၂၈၇၀၊ မကွေးသို့ အိတ်ရေ ၃၀၊ နေပြည်တော်သို့ အိတ်ရေ ၈၀၀၀၊ ရှမ်း (တောင်)သို့ အိတ်ရေ ၅၀၀၀၊ ရှမ်း(မြောက်)သို့အိတ်ရေ ၅၀၀၀၊ ကချင်သို့ အိတ်ရေ ၅၀၀၊ စုစုပေါင်း အိတ်ရေ (၅၉၁၀၀)အိတ်၊ တန်အားဖြင့် (၂၉၅၅) စီးထွက်ခဲ့သည့်အတွက် ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၂၂၅၀) တန်အားဖြင့် (၁၁၂.၅) ပိုမိုစီးထွက်ခဲ့ပါကြောင်း သိရှိရပါသည်။    

DOCA(စစ်ကိုင်း)                                                                                                                                 

     အင်ဥဆိုသည့်အတိုင်း အင်ပင်ရှိသောနေရာမှာပင် ပေါက်ရောက်လေ့ရှိတတ်ကြပြီး မြေကြီးထဲမှတူးယူရသော မှိုဥတစ်မျိုးဖြစ်ပေသည်။ အင်ဥသည် မှိုဖြစ်မလာပေ။ အင်ဥအဖြစ်၌သာ ရင့်၍ပုပ်သွားတတ်ကြပါသည်။ အရွယ်အစား (၃) မျိုးရှိရာ အင်ဥ၏သက်တမ်းသည် ဆယ်ရက်ခန့်တွင် ပျောက်သွားတတ်ပြီး နောက်မိုးထပ်မံရွာမှသာလျှင် တစ်ဖန်ပြန်ပေါ်လာတတ်ပေသည်။ တောတောင်များထဲတွင် အလေ့ကျသဘာဝပေါက်သောအပင်တစ်မျိုးဖြစ်ပြီး ပေါက်ရောက်သောဒေသတစ်ခုနှင့်တစ်ခုကွားခြား‌မှုကြောင့် အင်ဥ၏အရသာသည်လည်း ကွာခြားတတ်ကြသည်။ အင်ဥသည် ရေနှင့်ထိတွေ့မိလျှင် လျင်မြန်စွာပုပ်လွယ်တတ်ပြီး သဲ သို့မဟုတ် သမံတလင်းပေါ်ဖျန့်ထားမည်ဆိုပါက (၃) ရက်အထိအထားခံပါသည်။ အင်ဥကိုပြုတ်ထားပြီး ရေခဲသေတ္တာထဲထည့်ထားပါက (၂) ပတ်ခန့်အထားခံပါသည်။ အင်ဥ (ခေါ်) မှိုဥ၏ ထူးခြားချက်အနေဖြင့်  အလေးချိန်မှာ တစ်ခါချိန်တွယ်ပါက တစ်ခါလျော့နေတတ်ပြီး အိမ်တွင်တစ်ညသိပ်ပြီး နောက်ရက်တွင် ပြန်ချိန်ကြည့်မည်ဆိုပါက လျော့နေတတ်ပြန်ပါသည်။ အင်ဥကိုစားသုံးမည်ဆိုပါက သုံးလေးထပ်ခန့်ရေနဲ့ဆေးပြီးမှသာ စားသုံးသင့်ပါသည်။ ဆားထည့်ပြီးဆေးလျှင် အင်ဥတွင်ရှိသော အညစ်အကြေးနှင့် မြေကြီးများပိုမိုပြောင်လွယ်၍ လိုအပ်သလိုလှီးဖြတ်ကာ စားသုံးနိုင်ပါသည်။ အင်ဥသည် ဒညင်းသီး၊ ပီလောပီနံ၊ မျောက်ငိုသီး၊ ကြောင်လျှာသီး၊ ကြက်ဟင်းခါး၊ ကဏန်း၊ ဖားသား၊ ဒူးရင်းသီး၊ မျှစ်ချဉ်၊ ပုစွန်ချဉ်၊ ငါးဖယ်ချဉ်၊ ငါးလေးချဉ်၊ ဆူးပုပ်၊ ပဲငါးပိတို့နှင့်တွဲဖက်၍စားသုံးမိပါက မူးဝေအော့အန်တတ်ပါသည်။ တချို့ Online ဈေးကွက်ပေါ်တွင် အင်ဥကို အသင့်စားသောက်ကုန်အဖြစ်ရောင်းချလျက်ရှိကြပြီး အသင့်စားအင်ဥကြော်တစ်ပွဲလျှင် ၅၀၀၀ကျပ်မှ ၆၀၀၀ကျပ်အထိရှိပြီး အချို၊ အစပ်အရသာ နှစ်မျိုးဖြင့် ရောင်းချလျက်ရှိကြပေသည်။ ယနေ့ဒေသပေါက်ဈေးအနေဖြင့် နို့ဆီဘူးတစ်ဘူးလျှင် ၂၅၀၀ကျပ်မှ ၃၀၀၀ကျပ်အထိဈေးနှုန်းတို့ဖြင့် ရောင်းချလျက်ရှိကြပေသည်။ အင်ဥကို ရန်ကုန်၊ မန္တလေး၊ နေပြည်တော် စသည့်မြို့ကြီးများသို့ အဓိကတင်ပို့ရောင်းချလျက်ရှိကြောင်းသိရှိရပါသည်။

DOCA(ရှမ်း)

   ကြက်သွန်ဖြူတွင် တရုတ်မျိုးနှင့် ရှမ်းတောင်မျိုးဟူ၍နှစ်မျိုးရှိပါသည်။ ဈေးကွက်အခေါ် ကြူကုတ်ကြက်သွန်ဖြူမှာ အရွယ်အစားကြီးမားကာ အမွှာကြီးပြီး ရှမ်းမြောက်ဒေသတွင် စိုက်ပျိုးမှုများပါသည်။ အခွံအရောင်မှာ မရမ်းစေ့ရောင်အစင်းကြားများပေါ်နေပါသည်။ ဒေါင်းဥတစ်လုံးမှာ မရမ်းစေ့ရောင်ဖြစ်ပါသည်။ ရှမ်းတောင်ကြက်သွန်ဖြူမှာ ရှမ်းတောင်တစ်ဝိုက်တွင်အစိုက်များပါသည်။ စိုက်ပျိုးသည့်ဒေသများမှာ ပင်လောင်း၊ တောင်တရား၊ တီဂျစ်၊ ဟိုပုံးနှင့် ဆိုက်ခေါင် စသည့်ဒေသများဖြစ်ပါသည်။ အရောင်မှာ အဖြူရောင်ဖြစ်ပြီး ဒေါင်းဥတစ်လုံးမှာလည်း အဖြူရောင်ဖြစ်ပါသည်။ ဈေးကွက်သဘောအရ ကြက်သွန်ဖြူအရွယ်အစားအလိုက် အဆင့်ခွဲခြားထားရာတွင် ထူး (၁) မှ ထူး (၅), ထူးလွန်အထိ (၆) မျိုးခန့်ရှိလေသည်။ ဒေါင်းဥတစ်လုံးနှင့်ဆိုလျှင် (၇)မျိုးခန့်ရှိသည်။

 ကြက်သွန်ဖြူမှာ အလွန်ဆေးဖက်ဝင်သော စားဖိုဆောင်သီးနှံတစ်မျိုးဖြစ်ပါသည်။ သွေးတွင်းအဆီဓာတ်ကိုကျဆင်းစေနိုင်ပါသည်။ ကြက်သွန်ဖြူအလေးချိန် ၁၀၀ဂရမ်တွင် ကယ်လိုရီ ၁၁၇ဂရမ်၊ ပရိုတင်းဓာတ် ၃.၅ဂရမ်၊ အဆီဓာတ် ၀.၅ဂရမ်၊ ကစီဓာတ် ၂၇.၅ဂရမ်၊ ထုံးဓာတ် ၁၈မီလီဂရမ်၊ သံဓာတ် ၁.၅ဂရမ်၊ ဗီတာမင်အေအနည်းငယ်၊ ဗီတာမင်ဘီ (၁)၊ ၀.၂၄မီလီဂရမ်၊ ဗီတာမင် (၂) ၀.၀၅မီလီဂရမ်၊ နိုင်သာစင် ၀.၄မီလီဂရမ်၊ ဗီတာမင်စီ ၁၀မီလီဂရမ်ပါဝင်ပါသည်။ ကြက်သွန်ဖြူကို ရောဂါကာကွယ်မှုနှင့် အကျိုးပြုကယ်လိုရီများထက် ဟင်းချက်ရာတွင် အနံ့ ကောင်းသည်ဆိုသည့်အသိတစ်ခုဖြင့် သုံးစွဲကြခြင်းဖြစ်ပါသည်။

   ကြက်သွန်ဖြူကို ဩဂုတ်လမှ စက်တင်ဘာလအတွင်းစိုက်ပျိုးရန် မြေပြုပြင်ခြင်းပြုလုပ်ကြ၍ အောက်တိုဘာလနှင့် နိုင်ဝင်ဘာလတွင်စိုက်ပျိုးကြပြီး ဒီဇင်ဘာလနှင့် ဇန်နဝါရီလများတွင် အပင်များကိုပြုစုစောင့်ရှောက်ကာ ဖေဖော်ဝါရီလနှင့် မတ်လများတွင် တူးဖော်ရောင်းချကြသည်။ ကြက်သွန်ဖြူ၏သဘာဝအရ မြေဩဇာကောင်းမွန်သည့်မြေနုမြေပွများတွင် စိုက်ပျိုးထွက်ရှိသည့် အပွစ (တောင်ကြီးစ) ဟူ၍ခေါ်တွင်ပြီး မြေနီ၊ မြေကျစ်တွင် စိုက်ပျိုးထွက်ရှိသည့် အကျစ်စ (အောင်ပန်းစ) ဟူ၍နှစ်မျိုးခွဲခြားရောင်းဝယ်လျက်ရှိပါသည်။ တောင်ကြီးစ၏အရည်အသွေးမှာ သိုလှောင်မှုနှင့်မကိုက်ညီဘဲ ချက်ချင်းရောင်းဝယ်မှုပြုလုပ်ကြရသည်။ ဈေးအတက်အကျအရ တွက်ချေမကိုက်ဘဲသိုလှောင်မိပါက အလေးချိန်လျော့ကျခြင်း၊ အလေအလွင့်များခြင်းတို့ကြောင့် ဈေးကွက်၌ လူကြိုက်နည်းပါသည်။ အကျစ်စ (အောင်ပန်းစ) မှာ သိုလှောင်မှုနှင့် ကိုက်ညီပြီး တာရှည်သိုလှောင်နိုင်၍ အလေအလွင့်နည်းခြင်း၊ ဈေးအတက်အကျကိုစောင့်နိုင်ခြင်းတို့ကြောင့် လူကြိုက်များပါသည်။

  ကြက်သွန်ဖြူဈေးမှာ ယခုနှစ်ပေါ်ချိန် မတ်လကျော်မှစတင်၍ အနိမ့်ဈေး ၁၈၀၀ကျပ်မှ အမြင့်ဈေး ၃၅၀၀ကျပ်ခန့်၊ ဧပြီလတွင် အနိမ့်ဈေး ၂၅၀၀ကျပ်မှ အမြင့်ဈေး ၄၂၀၀ကျပ်ခန့်၊ မေလတွင် ၃၂၀၀ကျပ်မှ ၆၀၀၀ကျပ်ခန့်နှင့် ဇွန်လတွင် ယခုပေါက်ဈေး ၆၈၀၀ကျပ်မှ ၉၀၀၀ကျပ်အထိဈေးတက်လာပါသည်။ ဈေးကွက်သဘောအရ ပစ္စည်းကျန်ရှားပါး၍ အဝင်နည်းလျှင် ဈေးကွက်လိုအပ်မှုရှိ၍ ဈေးနှုန်းမြင့်တက်လေ့ရှိပါသည်။ ယခုနှစ်တွင် စိုက်ဧကလျော့ကျလာခြင်း၊ သွင်းအားစုဈေးကြောင့် အထွက်နှုန်းလျော့ကျခြင်းတို့ကြောင့်လည်းကောင်း၊ မြန်မာပြည်၏ ကြက်သွန်စိုက်ဧကများမှာ ဒေသအခြေအနေရိုက်ခတ်မှုကြောင့် စိုက်ဧကလျှော့ချ၍ အထွက်နှုန်းကျဆင်းလာကာ ဈေးကွက်လိုအပ်ချက်ကို မဖြည့်ဆည်းနိုင်ခြင်းတို့ကြောင့် ဈေးနှုန်းအတက်ဘက်ကိုဦးတည်နေပါသည်။

   နောက်နှစ်လခန့် ဩဂုတ်လနှင့် စက်တင်ဘာလတို့တွင် စိုက်ပျိုးချိန်ရောက်တော့မည်ဖြစ်သဖြင့် မျိုးချန်ထားသူများမှာ တစ်ဧကလျှင် ပိဿာ၂၅၀ခန့်မျိုးစိုက်ထည့်ရမည်ဖြစ်၍ ယခုကြက်သွန်ဖြူပေါက်ဈေးနှင့်ဆိုလျှင် တောင်သူတချို့မှာ ရင်းနှီးစိုက်ပျိုးနိုင်ရန် မလွယ်ကူနိုင်ကြောင်း သုံးသပ်ရပေသည်။ စားသုံးသူများသည် နောင်နှစ်ပေါ်ချိန်မကျမီ အတက်ဈေးနှင့်ရင်ဆိုင်ရမည့်အပြင် နောင်နှစ်ပေါ်ချိန်၌ စိုက်ဧကပါလျော့ကျသွားနိုင်ပြီး ရှမ်းတောင်ကြက်သွန်ဖြူ၏ အနာဂတ်ကာလတွင် စားသုံးသူများအတွက် စိန်ခေါ်မှုတစ်ရပ်ဖြစ်နိုင်ကြောင်း ရေးသားတင်ပြလိုက်ရပါသည်။

DOCA(ရှမ်း)

    မုံရွာမြို့၊ ချင်းတွင်းရတနာစျေး၌  ရောင်းချနေသော ပုဇွန်ခြောက်၊ ငါးခြောက်များမှာ ရန်ကုန်၊ မန္တလေး၊ ရခိုင်ပြည်နယ်ဘက်မှ ဝင်ရောက်လျက်ရှိကြောင်းသိရပါသည်။ ပုဇွန်၊ ငါးခြောက်စျေးနှုန်းများမှာ ဝင်ရောက်သည့် ဒေသအ‌ပေါ် မူတည်၍လည်းကောင်း၊ အရည်အသွေးကိုလိုက်၍လည်းကောင်း ကွာခြားလျက်ရှိကြောင်း သိရှိရပါသည်။

 ၂၀၂၃ခုနှစ်၊ဇွန်လ(နောက်ဆုံးအပတ်)တွင် ရောင်းချနေသော ဈေးနှုန်းများမှာ ပုဇွန်ခြောက် (၁)ပိဿာလျှင် ကျပ်(၆၅၀၀၀)မှ ကျပ်(၈၅၀၀၀)၊ ငါးရံ့ခြောက် (၁)ပိဿာလျှင် ကျပ်(၅၅၀၀၀မှ ၈၀၀၀၀)၊ ငါးပုတ်လုံးခြောက်(၁)ပိဿာလျှင် ကျပ်(၁၆၀၀၀မှ ၁၈၅၀၀)၊  ငါးပုတ်သင်(၁)ပိဿာလျှင် ကျပ်(၁၅၀၀၀မှ ၁၆၀၀၀) ၊ အာပြဲခြောက်(၁)ပိဿာလျှင် ကျပ်(၂၀၀၀၀မှ ၂၂၀၀၀)၊ ငါးကျည်းခြောက်(၁)ပိဿာလျှင် ကျပ်(၃၅၀၀၀မှ ၄၅၀၀၀)၊ ငါးနီတူးခြောက် (၁)ပိဿာလျှင် ကျပ်(၁၂၀၀၀ မှ ၁၄၀၀၀)၊ ငါးဖန့်ဝိုင်း(ငါးပိကောင်) (၁)ပိဿာလျှင် ကျပ်(၁၅၀၀၀မှ ၁၇၅၀၀) ရှိကြောင်း ချင်းတွင်းရတနာဈေးတွင်ရောင်းချနေသော ငါးခြောက်ကုန်သည်များထံမှ သိရပါသည်။

DOCA(စစ်ကိုင်း)