ပြည်တွင်းကုန်သွယ်မှုသတင်း

     တောင်ငူမြို့တွင် ယခု၂၀၂၃ခုနှစ်၊ ဒီဇင်ဘာလ ဒုတိယပတ်တွင် အခြေခံစားသောက်ကုန်များဖြစ်သော မြေပဲဆီမှာ တစ်ပိဿာလျှင် ၁၆၀၀၀ကျပ်ဖြင့် ဈေးနှုန်းတည်ငြိမ်နေပြီး စားအုန်းဆီမှာ တစ်ပိဿာလျှင် ၅၅၀၀ကျပ်ဖြင့် ရောင်းချလျက်ရှိပါသည်။

      ကြက်သွန်နီတစ်ပိဿာလျှင် အသေး ၃၅၀၀ကျပ်၊ အလတ် ၄၀၀၀ကျပ်၊ အကြီး ၄၅၀၀ကျပ်နှင့် တရုတ်ကြက်သွန်နီတစ်ပိဿာလျှင် ၄၅၀၀ကျပ်၊ ကြက်သွန်ဖြူတစ်ပိဿာလျှင် အသေး ၁၁၀၀၀ကျပ်၊ အလတ် ၁၂၅၀၀ကျပ်၊ အကြီး ၁၃၅၀၀ကျပ်၊ ၁၅၀၀၀ကျပ်၊ အာလူးတစ်ပိဿာလျှင် အသေး ၂၈၀၀ကျပ်၊ အလတ် ၃၂၀၀ကျပ်၊ အကြီး ၃၈၀၀ကျပ်၊ တရုတ်အာလူးတစ်ပိဿာလျှင် ၃၈၀၀ကျပ်ဖြင့် ဈေးနှုန်းအနည်းငယ်မြင့်တက်ခဲ့ပါသည်။

      ငရုတ်သီးခြောက် အပု/အရှည်မှာ တစ်ပိဿာလျှင် ၁၃၀၀၀ကျပ်မှ ၁၆၀၀၀ကျပ်အထိ၊ ငရုတ်သီးခြောက်အပွမှာ တစ်ပိဿာလျှင် ၂၃၀၀၀ကျပ်မှ ၂၅၀၀၀ကျပ်၊ မြေပဲဆံ(အဖြူ)မှာ တစ်ပိဿာလျှင် ၆၇၀၀ကျပ်၊ မြေပဲဆံ(အနီ)မှာ တစ်ပိဿာလျှင် ၇၀၀၀ကျပ်ဖြင့် ဈေးနှုန်းအနည်းငယ်မြင့်တက်ခဲ့ပြီး ကုလားပဲခြမ်းမှာ တစ်ပိဿာလျှင် ၆၂၀၀ကျပ်ဖြင့် ဈေးနှုန်းတည်ငြိမ်နေကြောင်းသိရပါသည်။

DOCA(ပဲခူး)

    ပြည်ခရိုင်အတွင်းရှိ မြို့နယ်များတွင် မိုးစပါးသစ်များလှိုင်လှိုင်ပေါ်နေပြီဖြစ်ရာ ပြည်မြို့နယ်၌ မိုးစပါးစိုက်ဧက(၇၄၆၄၂)ဧကစိုက်ပျိုးပြီး ရိတ်ဧကမှာ (၆၀၇၆၂)ဧက၊ ပေါက်ခေါင်းမြို့နယ်တွင် (၄၆၇၅၇)ဧကစိုက်ပျိုးပြီး ရိတ်သိမ်းဧကမှာ (၃၈၆၆၃)ဧက၊ ပန်းတောင်းမြို့နယ်တွင် (၃၆၉၃၅)ဧကစိုက်ပျိုးပြီး (၄၃၈၆၇)ဧက၊ ရွှေတောင်မြို့နယ်တွင် (၅၈၁၆၃)ဧကစိုက်ပျိုးပြီး ရိတ်သိမ်းဧကမှာ (၄၈၂၅၆) ဧကဖြစ်ပါသည်။ အထွက်နှုန်းအနေဖြင့် (၈၉)တင်းခန့်ထွက်ရှိပါသည်။

     ကရင်မစပါး(၄၆)ပေါင် တင်း(၁၀၀)လျှင် ယခင်အပတ်တွင် (၄၆)ပေါင်ပါ တင်း(၁၀၀)လျှင် (၁၆၄၀၀၀၀)ကျပ်ရှိခဲ့ပြီး ယခု၂၀၂၃ခုနှစ်၊ ဒီဇင်ဘာလ ဒုတိယပတ်တွင် (၁၇၀၀၀၀၀)ကျပ်ဖြင့် ဈေးနှုန်းမြင့်တက်ခဲ့ပါသည်။ ကရင်မဆန်တစ်အိတ်လျှင် ယခင်အပတ်တွင် (၆၀၀၀၀)ကျပ်မှ ယခုအပတ်တွင် (၆၃၀၀၀)ကျပ်ဖြင့် အရောင်းအဝယ်ရှိပါသည်။ မှော်ဘီစပါးဈေးမှာ ယခင်တွင် (၁၇၀၀၀၀၀)ကျပ်၊ ယခုဒီဇင်ဘာလ ဒုတိယပတ်တွင် (၁၈၀၀၀၀၀)ကျပ်ထိဈေးမြင့်ခဲ့ပါသည်။ မှော်ဘီဆန်တစ်အိတ်လျှင် ယခင်တွင် (၆၅၀၀၀)ကျပ် ယခုအပတ်တွင် (၆၈၀၀၀)ကျပ်ဖြင့် ဈေးနှုန်းမြင့်တက်ခဲ့ပါသည်။ ယခုရက်ပိုင်းအတွင်း စပါး၊ ဆန်ဈေးမြင့်တက်ရခြင်းမှာ သယ်ယူပို့ဆောင်ခဈေးမြင့်ခြင်းနှင့် စပါးရိတ်သိမ်းခများမှာ ယခင်တွင် တစ်ဧကလျှင် (၁၀၀၀၀၀)ကျပ်၊ ယခုတွင် တစ်ဧကလျှင် (၁၄၀၀၀၀)ကျပ်ဖြစ်၍ ဈေးနှုန်းမြင့်တက်ခဲ့ခြင်းတို့ကြောင့် စပါးဈေးဆန်ဈေးများမြင့်တက်ခဲ့ခြင်းဖြစ်ကြောင်းသိရပါသည်။

DOCA(ပဲခူး)

   ခရမ်းချဉ်သီးသည် ဒေသမရွေး လွယ်ကူစွာစိုက်ပျိုးနိုင်သေ ာသီးနှံတစ်မျိုးဖြစ်ပါသည်။ ပြည်ဒေသတွင် ခရမ်းချဉ်သီးများသည် ခန္တာကိုယ်အတွက် များစွာအကျိုးရှိသော သီးနှံတစ်မျိုးဖြစ်သောကြောင့် အရောင်းသွက်လှပါသည်။ ခရမ်းချဉ်သီးဟင်းချက်ရာတွင် အနှစ်များရအောင်ထည့်၍ ချက်ပြုတ်ကြသည့်အပြင် အခြားသီးနှံများနှင့်အတူ ရောကြော်၍လည်း စားသုံးကြပြီး အကြော်စုံများနှင့်လည်းရောကာ သုပ်၍စားကြပါသည်။

   ခရမ်းချဉ်သီးတွင် ဗီတာမင်အေ၊ ဘီ၊ စီ၊ ဒီ၊ ကေဓာတ်တို့ များစွာပါဝင်သောကြောင့် အဆီပြန်သည့်အသားအရေကို ထိန်းညှိပေးပါသည်။ ခရမ်းချဉ်သီးကိုစားသုံးပါက အသားအရည်လှပစေသည့်အပြင် နှလုံးကျန်းမာရေးကိုလည်းကောင်းမွန်စေပါသည်။ ထို့ပြင် ခရမ်းချဉ်သီးတွင် လိုင်ကိုမင်းဓာတ်ပါဝင်သောကြောင့် ဆီးကျိတ်ကင်ဆာ၊ အူမကြီးကင်ဆာနှင့် အစာအိမ်ကင်ဆာများကိုလည်းကာကွယ်ပေးနိုင်ပါသည်။

     ပြည်ဈေးကွက်တွင်မူ ခရမ်းချဉ်သီးများဈေးကောင်းရရှိကာ အရောင်းသွက်လျက်ရှိပါ သည်။ ရှမ်းသီးနှင့်ကိုင်းသီးဟူ၍ (၂)မျိုးရှိရာ ရှမ်းသီးတစ်ပိဿာလျှင် (၅၆၀၀)ကျပ်ရှိပြီး ကိုင်းသီး တစ်ပိဿာလျှင် (၂၄၀၀)ကျပ်ရှိကြောင်းသိရှိရပါသည်။

DOCA(ပဲခူး)

    ဒန့်သလွန်ပင်သည် တောင်ပေါ်/မြေပြန့်မရွေးဖြစ်ထွန်းအောင်မြင်ပြီး ရာသီဥတု မရွေးစိုက်ပျိုးနိုင်သော အပင်မျိုးဖြစ်သည့်အတွက် ကရင်ပြည်နယ်၊ ဘားအံမြို့ရှိကျေးရွာများမှ ဒေသခံတောင်သူများ သည် ဒန့်သလွန်ပင်များကို စားသုံးသီးနှံအဖြစ် အပိုဝင်ငွေရရှိရန်အတွက် အိမ်ခြံဝင်းများတွင် တစ်ပိုင် တစ်နိုင် စိုက်ပျိုးထားလျက်ရှိသည်။ ဒန့်သလွန်သီးများကို ဘားအံမြို့ရှိ ဈေးများ၌ ဒီဇင်ဘာလတွင် စတင် ရောင်းချနေကြောင်း သိရသည်။ ရာသီစာ ပေါ်ဦးပေါ်ဖျား ဒန့်သလွန်သီး ဈေးနှုန်းများမှ တစ်ထောင့်လျှင် ၂၅၀ ကျပ်၊ သုံးတောင့်စီး(၁)စည်းလျှင် ၇၀၀ ကျပ်၊ (၃)စည်းလျှင် ၂၀၀၀ ကျပ်နှုန်းဖြင့် ဈေးရောင်းရရှိပြီး အရောင်းအဝယ်ဖြစ်လျက်ရှိကြောင်း သိရသည်။

    ဒန့်သလွန်သီးတွင် ပရိုတင်း၊ ဗီတာမင် B₆၊ ဗီတာမင်C၊ သံဓာတ်၊ ဗီတာမင်B₂ ၊ ဗီတာမင်A၊ မဂ္ဂနီ ဆီယမ်တို့ပါဝင်သည့်အတွက် အရေပြားနှင့် ဆံသားကိုအားဖြည့်ပေးခြင်း၊ အသည်းကိုကျန်မာစေခြင်း၊ ကင်ဆာရောဂါကာကွယ်ပေးနိုင်ခြင်း၊ အစာအိမ်အူလမ်းကြောင်ကို ကျန်းမာစေခြင်း၊ ဘတ်တီးရီးယား များကို တိုက်ဖျက်ပေးခြင်း၊ အရိုးများသန်မာစေနိုင်ခြင်း၊ စိတ်ခံစားမှုကောင်းမွန်စေခြင်း၊ နှလုံးသွေးကြောဆိုင်ရာရောဂါများအား ကာကွယ်ပေးနိုင်ခြင်း၊ ဆီးချိုသမားများအတွက် သွေးတွင်းသကြားဓာတ်ကို လျော့ကျစေနိုင်ခြင်း၊ ပန်းနာရင်ကျပ်ရောဂါကို သက်သာစေခြင်း၊ ကျောက်ကပ်ကျန်းမာစေခြင်း၊ သွေးတိုးကျစေနိုင်ခြင်း၊ မျက်စိအမြင်အာရုံ တိုးတက်ကောင်းမွန်စေခြင်းစသည့် ခန္ဓာကိုယ်အတွက် အကျိုးများစေပြီး ဆေးဖက်ဝင်သည့်အတွက် ဒန့်သလွန်သီးကို စားသုံးပေးသင့်ကြောင်း သိရှိရပါသည်။                                                                                                   

   ဈေးများတွင် အလွယ်တကူ ဝယ်ယူရရှိနိုင်သည့် ဒန့်သလွန်သီးကို ချဉ်ရည်ဟင်းပဲချက်စားစား၊ ငါးခြောက်(သို့မဟုတ်)ငါးနဲ့ပဲချက်ချက်၊ မီးကင်းပြီးဟင်းခါးပဲချက်သောက်သောက် ခံတွင်းတွေ့ကာ ထမင်းမိန်စေပြီး  အလွန်စားကောင်းတဲ့ သီးနှံတစ်မျိုးပင်ဖြစ်ကြောင်း သိရသည်။  

DOCA(ကရင်)

   သီဟိုဠ်သီးပင်သည် နှစ်ရှည်ပင်ဖြစ်ပြီး ဝင်ငွေကောင်းသောအပင်မျိုးဖြစ်ပါသည်။ သီဟိုဠ်ပင်စိုက်ပျိုးရာတွင်အစေ့အား အပင်ငယ်လေးအဖြစ်ပျိုး၍ စိုက်ပျိုးကြပါသည်။ အပင်စတင် စိုက်ပျိုးပြီး (၃)နှစ်ကြာလျှင်အသီးများ စတင်ထွက်ပေါ်လာပြီဖြစ်ပါသည်။ အပင်မှထွက်ရှိသော အသီး၏အရောင်မှာ အနီရောင်နှင့်အဝါရောင်(၂)မျိုးရှိကြောင်းသိရပြီး အသားမှာ ခပ်ပွပွဖြစ်၍ စားလိုက်လျှင် အရည်ရွှမ်းသောအသီးမျိုးဖြစ်ပါသည်။ အသီးပုံစံမှာ ကျောက်ကပ်ပုံ၊ ဘောက်ဆင်လက်အိတ်ပုံရှိပြီး အသီးအသီး၏အပြင်ဘက်တွင် အစေ့တစ်စေ့သာပါရှိသော အခွံမာအသီး ဖြစ်ပါသည်။

     သီဟိုဠ်ပင်မှထွက်ရှိသောအသီးကို အသုံးပြုသူနည်းပြီး အစေ့ကိုသာရောင်းချကြပါသည်။ သီဟိုဠ်စေ့ကို စားသောက်ကုန်လုပ်ငန်း၊ လောင်စာဆီ၊ ဆေးဝါးထုတ်လုပ်သည့်နေရာများ၌ အဓိကထားပြီး ကုန်ကြမ်းအဖြစ်အသုံးပြုကြပါသည်။ သီဟိုဠ်ပင်စိုက်ပျိုးရာဒေသများမှာ မြန်မာနိုင်ငံအနှံ့အပြားတွင်ရှိသော တောင်ကုန်းများတွင်စိုက်ပျိုးကြပြီး ရခိုင်ပြည်နယ်၊ အမ်းမြို့တွင် စိုက်ပျိုးပြီး ပြည်မြို့နယ်၊ တပေါင်းကန်ကျေးရွာ၊ မု‌ဋောကျေးရွာများတွင် တစ်နိုင်တစ်ပိုင်စီးပွားဖြစ်စိုက်ပျိုးကြပါသည်။ သီဟိုဠ်သီးအစေ့ဈေးနှုန်းအနေဖြင့် အစိုတစ်ပိဿာလျှင် ၃၅၀၀ကျပ်မှ ၄၀၀၀ကျပ်ဈေးနှုန်းရှိကြောင်းသိရပါသည်။ သီဟိုဠ်သီးများအား ပွဲစားများက လာရောက်ဝယ်ယူကြောင်းသိရှိရပြီး ရန်ကုန်နှင့်မန္တလေးမြို့များသို့ ပြန်လည်တင်ပို့ကြောင်းသိရှိရပါသည်။

DOCA(ပဲခူး)