ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်ကို သဘာဝပထဝီအနေအထားအရ ကုန်းပိုင်း၊ ကုန်းတစ်ပိုင်းကျွန်းတစ်ပိုင်း၊ ကျွန်းပိုင်းဟူ၍ အပိုင်း (၃)ပိုင်းဖြင့် ပိုင်းခြားထားကြောင်း၊ ရေစကြို /ပခုက္ကူ ကားလမ်းမ၏အနောက်ဘက်ခြမ်းကို ကုန်းပိုင်း၊ ချင်းတွင်းမြစ်နှင့် ဧရာဝတီမြစ်၏ အနောက်ဘက်ခြမ်းနှင့် ရေစကြို/ ပခုက္ကူကားလမ်းမ၏ အရှေ့ဘက်ခြမ်းတို့ကို ကုန်းတစ်ပိုင်း ကျွန်းတပိုင်း၊ ချင်းတွင်းမြစ်၏အရှေ့ဘက် ဧရာဝတီမြစ်နှင့် ချင်းတွင်းမြစ်တို့ပေါင်းစုံရာနေရာကို ကျွန်းပိုင်းဟုခေါ်ဆိုကြပါသည်။ ကုန်းပိုင်းတွင် မိုးသီးနှံများဖြစ်သည့် မြေပဲ၊ နှမ်း၊ ပဲတီစိမ်း၊ ပဲစင်းငုံ၊ ငရုတ်နှင့်ဝါသီးနှံများစိုက်ပျိုးကြပါသည်။ မိုးသီးနှံများထဲတွင် တောင်သူများတွက်ခြေကိုက်သည့် ဝါသီးနှံများကို စိုက်ပျိုးလျက်ရှိကြောင်းသိရှိရပါသည်။ ဝါသီးနှံများကို အဓိကထား၍စိုက်ပျိုးသည့် မြေဖြူ၊ ဂွေးချို၊ စည်သာကျေးရွာများတွင် ဧက(၁၀၀)ခန့်စိုက်ပျိုးထားရှိကြောင်း မြေဖြူကျေးရွာနေ တောင်သူတစ်ဦး၏ ပြောပြချက်အရသိရှိရပါသည်။

   ဝါသီးနှံများကို ပဲစင်းငုံသီးနှံခင်းတွင် ကြားညှပ်စိုက်ပျိုးခြင်းနှင့် သီးသန့်စိုက်ပျိုးခြင်းဟူ၍ စိုက်ပျိုးကြပါသည်။ မျိုးများအနေဖြင့် ဒေသမျိုး ငွေချည်-၉၊ ရွှေတောင်-၁၀ မျိုးများကိုစိုက်ပျိုးကြပြီး ဩဂုတ်လတွင် စတင်စိုက်ပျိုးကြကြောင်း၊ ယခုနှစ်တွင် (၁)ဧကလျှင် မျိုးစေ့(၅)ပိဿာခန့်ကုန်ကျပြီး ထွန်ယက်ခ၊ မျိုးစေ့၊ စိုက်စရိတ်၊ သွင်းအားစု၊ ခူးဆွတ်ရိတ်သိမ်းခြင်းတို့အတွက် စုစုပေါင်းကုန်ကျစရိတ်မှာ (၃)သိန်းခန့်ကုန်ကျကြောင်း၊  အထွက်နှုန်းအနေဖြင့် (၁)ဧကလျှင်   ပိဿာ(၂၀၀မှ ၃၀၀)ထွက်ရှိနိုင်ကြောင်း၊ (၁)ပိဿာလျှင် ကျပ် (၂၈၀၀)ခန့်ရရှိပါက ကျပ်(၄)သိန်းခန့် အကျိုးအမြတ်ရရှိနိုင်ကြောင်း၊ ဝါသီးနှံမှာ မိုးသီးနှံဖြစ်သည့်အတွက် ၎င်းကို မိုးတွင်းကာလတွင် စိုက်ပျိုးကြောင်း၊ မိုးကြိုက်သောသီးနှံဖြစ်ပြီး မိုးကောင်းသောနှစ်များတွင် ပိုမိုထွက်ရှိပါကြောင်း၊ သွင်းအားစုဖြစ်သည့် မြေဩဇာနှင့်ပိုးသတ်ဆေးများကို စနစ်တကျသုံးစွဲမည်ဆိုလျှင် ပိုမိုထွက်ရှိနိုင်ကြောင်း၊ အခြားသီးနှံများကဲ့သို့ အလုပ်မရှုပ်ဘဲ သက်သာသောကြောင့် တောင်သူများအနေဖြင့် ပိုမိုစိုက်ပျိုးသင့်ကြောင်း၊ ယခင်နှစ်တွင် ဝါသီးနှံ(၁)ဧကစိုက်ပျိုးလျှင် ပျှမ်းမျှကုန်ကျစရိတ်မှာ ကျပ်(၁၈၀၀၀၀/-) ခန့်ကုန်ကျခဲ့ပြီး (၁) ဧကလျှင် ပိဿာ(၃၀၀) ထွက်ရှိကြောင်း၊ (၁)ပိဿာဈေးနှုန်းမှာ ကျပ်(၁၂၀၀/-) ဖြစ်သည့်အတွက် ကျပ်(၃၆၀၀၀၀/-) ရရှိသောကြောင့် ပျှမ်းမျှအကျိုးအမြတ်မှာ ကျပ်(၁၈၀၀၀၀/-)ခန့်ရရှိပါကြောင်း၊ ယခုနှစ်တွင် ကုန်ကျစရိတ်များပြားပြီး ဈေးနှုန်းမှာလည်းမြင့်မားကြောင်း၊ ရာသီဥတုအခြေအနေမှာ ကောင်းမွန်သဖြင့် ယခုနှစ်တွင် ဝါသီးနှံများကို နိုဝင်ဘာလမှစတင်၍ ဇန်နဝါရီလထိခူးဆွတ်ရမည်ဖြစ်သဖြင့်  ခန့်မှန်းအထွက်နှုန်း ပိဿာ (၃၀၀)ခန့်ရရှိနိုင်ပြီး တောင်သူများမျှော်လင့်နေသည့် အကျိုးအမြတ်ရရှိမည်ဖြစ်ကြောင်း  တောင်သူတစ်ဦး၏ ပြောပြချက်အရသိရှိရပါသည်။

DOCA(မကွေး)

  စစ်ကိုင်းတိုင်းဒေသကြီး ၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကအားထားလုပ်ကိုင်သော ဒေသတစ်ခုဖြစ်သည်။ သီးနှံစိုက်ပျိုးရာတွင် အထွက်နှုန်းများ ပိုမိုကောင်းမွန်စေရေးအတွက် စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးများကို စိုက်ပျိုးသူတောင်သူများ ဝယ်ယူအသုံးပြုလျက်ရှိကြောင်း သိရှိရပါသည်။

   ကန့်ဘလူခရိုင်အတွင်းရှိ စိုက်ပျိုးသူတောင်သူများ ဝယ်ယူအသုံးပြုလျက်ရှိသော စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးများ၏ နိုဝင်ဘာလ တတိယပတ်အတွင်း ဖြစ်ပေါ်ခဲ့သော ဈေးနှုန်းများမှာ ပန်းဖူး(50)kg တစ်အိတ်လျှင် (၈၅၀၀၀)ကျပ်၊ မျှားကမ္ဘာ(50)kg တစ်အိတ်လျှင် (၇၇၀၀၀)ကျပ်၊ ကွန်ပေါင်း(10:10:5) (50)kg တစ်အိတ်လျှင်(၇၆၅၀၀)ကျပ်၊ ကွန်ပေါင်း (15:15:15) (50)kg တစ်အိတ်လျှင်(၁၆၀၀၀၀)ကျပ်၊ ပိုတက် (50)kg တစ်အိတ်လျှင် (၁၄၀၀၀၀)ကျပ်နှင့် ရွှေတောနစ် (၅၀၀)စီစီ တစ်ဘူးလျှင် (၁၁၀၀၀)ကျပ်၊ မိုရယ်လ်မုန်း (၅၀၀)စီစီ တစ်ဘူးလျှင် (၂၅၅၀၀) ကျပ်၊ ဟတ်ကာ(၅၀၀)စီစီ တစ်ဘူးလျှင် (၂၄၅၀၀)ကျပ် ၊ AP ဇာပြာ (၅၀၀)စီစီ တစ်ဘူးလျှင် (၁၇၅၀၀)ကျပ်ဖြင့် ရောင်းချလျက်ရှိကြောင်း စိုက်ပျိုးရေးသုံးဆေးနှင့် ဆေးပစ္စည်းရောင်းချသည့်လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ ဆောင်ရွက်လျက်ရှိရာ စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကျွန်းလှမြို့နယ်၊ ရှမ်းစုကျေးရွာတွင် တစ်ပိုင်တစ်နိုင်အနေဖြင့် လည်းကောင်း ၊ မိသားစုစားဝတ်နေရေး အပိုဝင်ငွေရရှိရန်အတွက် လည်းကောင်း တိုင်ထောင်သခွားပင်ကို စိုက်ပျိုးလျက်ရှိပါသည်။

    တိုင်ထောင်သခွားပင်ကို တော်သလင်းလတွင် စိုက်ပျိုးကာ တိုင်ထောင်သခွားပင်ကို တစ်ကျင်းလျှင် (၁)ပင်ခန့် စိုက်ပျိုးပြီး တစ်ဧကလျှင် အပင်ရေ (၃၀၀)ခန့် စိုက်ပျိုးရပါကြောင်း၊ တိုင်ထောင်သခွားပင်ကို မြေအောက်ရေတင်စနစ်ဖြင့် စိုက်ပျိုးကာ တိုင်ထောင်သခွားပင်၏ စတင်စိုက်ပျိုးရန် မျိုးစေ့ဖိုး၊ မြေပြုပြင်ခ၊ တိုင်ထောင်ခ၊ ဓါတ်မြေဩဇာနှင့် ရေသွင်းခြင်း စသည်တို့၏ စုစုပေါင်းကုန်ကျစရိတ် မှာ ကျပ်(၂၅၀၀၀)ခန့် ကုန်ကျကြောင်း၊တိုင်ထောင်သခွားသီးကို တန်ဆောင်မုန်းလတွင် စတင်ခူးဆွတ်ရပြီး တစ်လုံးလျှင်(၃၀၀)ကျပ်နှုန်း ရောင်းချလျက်ရှိပါကြောင်း၊ တိုင်ထောင် သခွားပင်ကို စတင်ခူးဆွတ်သည့်နေ့မှ တရက်ခြား အလုံး(၃၀၀)ခန့် ခူးဆွတ်ရပြီး ၊ တစ်ခါစိုက်ပျိုးလျှင်(၂)လကြာအောင် ခူးဆွတ် ရောင်းချရပါသည်။

      ထို့ကြောင့် တိုင်ထောင်သခွားပင်ကို ဆောင်းရာသီတွင်အများဆုံး စိုက်ပျိုးနိုင်ပြီး တစ်ရက်ခြား ခူးဆွတ် ရောင်းချရသော သီးနှံပင်ဖြစ်ကြောင်းနှင့် တိုင်ထောင်သခွားပင်ကို ရိုးရိုးဗမာသခွားသီး မပေါ်ခင်ထိ စိုက်ပျိုးကြကာ ၊ဖောက်သည်များထံ ရောင်းချခြင်း၊ မိမိကိုယ်တိုင် ဈေးသို့သွားရောက်ရောင်းချခြင်းဖြင့်  အရောင်းအဝယ်ဖြစ်လျက်ရှိပြီး မိသားစုဝင်ငွေရရှိကာ အဆင်ပြေလျက်ရှိကြောင်း ကျွန်းလှမြို့နယ် ၊ ရှမ်းစု ကျေးရွာအတွင်းရှိ  တိုင်ထောင်သခွားစိုက်တောင်သူ ဦးကျော်မျိုးဟန်ထံမှ သိရှိရပါသည်။

DOCA(စစ်ကိုင်း)

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့၊ မြို့မစည်ပင်သာယာဈေး၊ အမှတ်(၂)ဈေးနှင့် အနောက်ပန်းခြံဈေးတို့တွင် မန္တလေးတိုင်းဒေသကြီး၊ ကျောက်ပန်းတောင်းနှင့် ပုပ္ပါးနယ်ဘက်တို့မှလာသော ခရမ်းချဉ်သီးများနှင့် ရှမ်းပြည်နယ်၊ အင်းလေးဒေသမှလာသော ထိုင်ဝမ်ခရမ်းချဉ်သီးများကို ဆောင်းရာသီအချိန်သို့ ရောက်ရှိလာသည့်အခါ ပခုက္ကူမြို့နယ်နှင့် ပတ်ဝန်းကျင်ရှိကျွန်းများ၊ ကျေးရွာများမှ လာရောက်ရောင်းဝယ်ဖောက်ကားလျက်ရှိပါသည်။

    ၂၀၂၃ခုနှစ်၊ နိုဝင်ဘာလ(ပထမပတ်)တွင်ဖြစ်ပေါ်နေသော ခရမ်းချဉ်သီးဈေးနှုန်းများမှာ လက်ကားဈေးတစ်ပိဿာလျှင် ကျပ်(၁၄၀၀)၊ လက်လီဈေးတစ်ပိဿာလျှင် ကျပ်(၁၆၀၀)ရှိခဲ့ပြီး နိုဝင်ဘာလ (ဒုတိယပတ်)တွင် လက်ကားဈေးတစ်ပိဿာလျှင် ကျပ်(၁၈၀၀)၊ လက်လီဈေးတစ်ပိဿာလျှင် ကျပ်(၂၀၀၀)ဖြစ်၍ တစ်ပိဿာလျှင် ကျပ်(၄၀၀) ဈေးနှုန်းမြင့်တက်ကာ အရောင်းအဝယ်ဖြစ်လျက်ရှိကြောင်းသိရှိရပြီး ခရမ်းချဉ်သီး(ကျွန်းသီး) လက်ကားဈေးမှာ တစ်ပိဿာလျှင် ကျပ်(၂၅၀၀)၊ လက်လီဈေးမှာ တစ်ပိဿာလျှင် ကျပ်(၂၈၀၀) ဈေးနှုန်းရှိကြောင်း  မြို့မဈေးသည်များထံမှသိရှိရပါသည်။

DOCA(မကွေး)

   မကွေးတိုင်းဒေသကြီး၊ သရက်ခရိုင်၊ သရက်မြို့၊ မြို့မစည်ပင်သာယာဈေးအတွင်း၌ အသီးအရွက်နှင့်အသားငါးများကို အောင်လံမြို့မှတစ်ဆင့် ဝယ်ယူရောင်းချကြောင်း၊ ဆန်နှင့်ဆီတို့မှာ ရန်ကုန်၊ ပြည်၊ ဥသျှစ်ပင်မြို့တို့မှဝင်ရောက်လျက်ရှိပြီး နေ့စဉ် ပုံမှန်အရောင်းအဝယ်ဖြစ်လျက်ရှိကြောင်းသိရသည်။

   သရက်မြို့၊ မြို့မစည်ပင်သာယာဈေးအတွင်း၌ ၂၀၂၃ခုနှစ်၊ နိုဝင်ဘာလ(ဒုတိယပတ်)အတွင်း ဖြစ်ပေါ်လျက်ရှိသောအခြေခံစားကုန်ဈေးနှုန်းများမှာ ဆန်(၁)ပြည်လျှင် ပေါ်ဆန်းမွှေး(ပုသိမ်) ကျပ်(၄၄၀၀မှ ၄၈၀၀)၊ ဧရာပဒေသာ(ပုသိမ်) ကျပ်(၄၁၀၀မှ ၄၂၀၀)၊ မနောသုခ ကျပ်(၃၂၀၀မှ ၃၃၀၀)၊ မှော်ဘီ ကျပ်(၃၅၀၀မှ ၃၆၀၀)၊ ဆီ(၁)ပိဿာလျှင် ပဲဆီ ကျပ်(၁၃၀၀၀မှ ၁၄၀၀၀)၊ နှမ်းဆီ ကျပ်(၁၄၅၀၀မှ ၁၅၀၀၀)၊ အာလူး(အကြီး၊ အသေး) အရွယ်အစားအလိုက် (၁)ပိဿာလျှင် ကျပ်(၂၇၀၀မှ ၃၃၀၀)၊ ကြက်သွန်ဖြူ(အကြီး၊ အသေး) (၁)ပိဿာလျှင် ကျပ်(၁၅၀၀၀မှ ၁၆၀၀၀)၊ ကြက်သွန်နီ (အသေး၊ အလတ်၊ အကြီး) (၁)ပိဿာလျှင် ကျပ်(၃၅၀၀၊ ၃၈၀၀၊ ၄၀၀၀)၊ ကုလားပဲခွဲခြမ်း (၁)ပိဿာလျှင် ကျပ် (၆၅၀၀မှ ၆၈၀၀)၊ ငရုတ်စို(အမှည့်)(၁)ပိဿာလျှင် ကျပ် (၄၅၀၀မှ ၄၈၀၀)၊ ငရုတ်ခြောက်(၁)ပိဿာလျှင် ကျပ်(၁၈၀၀၀မှ ၂၀၀၀၀)၊ သရက်မြို့နယ်အတွင်း ကျေးရွာများမှထွက်ရှိသော ခရမ်းချဉ်သီး (တိုင်ထောင်သီး) (၁)ပိဿာလျှင် ကျပ်(၂၀၀၀မှ ၂၂၀၀)၊ ကြက်သား(CP) (၁)ပိဿာလျှင် ကျပ် (၁၀၀၀၀မှ ၁၂၀၀၀)၊ ကြက်သား(ဗမာ)(၁)ပိဿာလျှင် ကျပ်(၁၆၀၀၀မှ ၁၈၀၀၀)၊ ဝက်သား(၁) ပိဿာလျှင် ကျပ် (၁၃၀၀၀)၊ အမဲသား(၁)ပိဿာလျှင် ကျပ်(၁၃၀၀၀)၊ ဆိတ်သား(၁)ပိဿာလျှင် ကျပ် (၁၆၀၀၀)၊ ငါးကြင်း(၁)ပိဿာလျှင် အကောင်အကြီး/အသေးအလိုက် ကျပ်(၁၀၀၀၀မှ ၁၅၀၀၀) အသီးသီးရှိခဲ့ပါကြောင်းနှင့် အာလူး၊ ခရမ်းချဉ်သီး၊ ကြက်သွန်နီနှင့် ကြက်သွန်ဖြူဈေးနှုန်းများမှာ နိုဝင်ဘာလ (ပထမပတ်) ထက် ဈေးနှုန်းအနည်းငယ်မြင့်တက်လျက်ရှိပြီး အခြားသောအခြေခံစားသောက်ကုန်နှင့် အသားငါးဈေးနှုန်းများမှာ ယခုအပတ်အတွင်း ဈေးနှုန်းတည်ငြိမ်လျက်ရှိပြီး နေ့စဉ် ပုံမှန်အရောင်း အဝယ်ဖြစ်လျက်ရှိပါကြောင်း မြို့မစည်ပင်သာယာဈေးအတွင်းရှိ ဈေးသည်များထံမှသိရှိရပါသည်။

DOCA(မကွေး)