ပြည်တွင်းကုန်သွယ်မှုသတင်း

           စစ်ကိုင်းတိုင်းဒေသကြီး၊ ကန့်ဘလူမြို့၊  မြို့မဈေးရှိ ကုန်စိမ်းဈေးကွက်သို့  ကန့်ဘလူမြို့ပေါ်ရပ်ကွက်များနှင့် မြို့နယ်အတွင်းရှိကျေးရွာများမှ ဒေသထွက် သင်္ဘောသီးစိမ်းများနှင့် နှင်းသီး(ခေါ်)လောင်ကန်သီများကို လာရောက်ရောင်းချကြကြောင်း သိရပါသည်။ နှင်းသီး(ခေါ်)လောင်ကန်သီးများကို ကန့်ဘလူမြို့နယ်နှင့် ကျွန်းလှမြို့နယ်တို့မှ ဝင်ရောက်လျက်ရှိ‌ကြောင်း သိရသည်။

            ၂၀၂၅ခုနှစ်၊ ဇူလိုင်လ ဒုတိယပတ်တွင် ရောင်းချခဲ့သော သင်္ဘောသီးစိမ်းဈေးနှုန်းများ မှာလက်ကားဈေးနှုန်း တစ်ပိဿာလျှင် (၃၀၀၀)ကျပ်၊ လက်လီဈေးနှုန်း တစ်ပိဿာလျှင် (၃၅၀၀) ကျပ်ဖြင့်ရောင်းချခဲ့ပြီး ၂၀၂၅ခုနှစ်၊ ဇူလိုင်လ တတိယပတ်အတွင်း ရောင်းချလျက်သော သင်္ဘောသီး စိမ်းဈေးနှုန်းများမှာ လက်ကားဈေးနှုန်းတစ်ပိဿာလျှင် (၃၅၀၀)ကျပ်၊ လက်လီဈေးနှုန်း တစ်ပိဿာ လျှင်(၄၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခင်အပတ်နှင့်နှိုင်းယှဉ်ပါက ဈေးနှုန်း အနည်းငယ်မြင့်တက်လာကြောင်း သင်္ဘောသီးများကို အိမ်ရှင်မများဟင်းချက်ရာ၌လည်းကောင်း၊ အသုပ်ဆိုင်များနှင့် အထောင်းစုံရောင်းသည့်ဆိုင်များမှ ဝယ်ယူကြ၍ အဝယ်သွက်လျက်ရှိပါကြောင်း၊ နှင်းသီး(ခေါ်)လောင်ကန်သီးသည် အရည်ရွှမ်း၍ ချိုပြီးအရသာရှိသော အသီးဖြစ်သောကြောင့် သရေစာအဖြစ် စားသုံးကြကြောင်း၊ ၂၀၂၅ ခုနှစ်၊ ဇူလိုင်လ တတိယပတ်အတွင်း နှင်းသီး (ခေါ်)လောင်ကန်သီး (၂၅)ကျပ်သားလျှင် (၅၀၀၀)ကျပ်၊ နှင်းသီး(ခေါ်)‌လောင်ကန်သီး(၅၀)ကျပ် သားလျှင်(၁၀၀၀၀)ကျပ်၊ နှင်းသီး(ခေါ်) လောင်ကန်သီး(၁)ပိဿာလျှင် (၂၀၀၀၀)ကျပ်ဖြင့်ရောင်းချကြောင်း၊ လူကြီးလူငယ်မရွေး ကြိုက်နှစ်သက်သောကြောင့် ရောင်းအားကောင်းကြောင်း ကန့်ဘလူမြို့တွင် ရောင်းချလျက်ရှိသော သစ်သီးဆိုင်များမှ သတင်းရရှိပါသည်။

DOCA(စစ်ကိုင်း)

  ရာသီစာဖြစ်သည့်  ကရင်ပြည်နယ်ဒေသထွက် ပေါ်ဦးပေါ်ဖျားပီလောပီနံဥကို ဘားအံမြို့ အနီး တစ်ဝိုက်ရှိကျေးရွာများမှ ဘားအံမြို့ပေါ်ဈေးများသို့လာရောက်ရောင်းချကြပါသည်။ဒေသခံ တောင်သူ များသည် ‌ပီလောပီနံဥကို အပိုဝင်ငွေရရှိရန်အတွက် မိမိတို့၏ အိမ်ခြံဝန်းအတွင်း တစ်နိုင်တစ်ပိုင် စိုက်ပျိုးကြသည့်အပြင် စီးပွားဖြစ်လည်းစိုက်ပျိုးကြသည်။ ပီလောပီနံသည် လူသားတို့နှင့်သဘာဝပတ်ဝန်းကျင်ကို ထိကိုက်မှုနည်းပြီး နိုင်ငံခြား ဝင်ငွေရရှိနိုင်သောကြောင့် စိုက်ပျိုးသင့်သောသီးနှံတစ်ခုဖြစ်သည်။

   ပီလောပီနံဥကို ပြုတ်၍စားစား၊ ပြန်ပေါင်းလုပ်၍စားစား  အရသာရှိလှပါသည်။ ပီလောပီနံမှ အမျှင်ဓာတ်နဲ့ကာဗိုဟိုက်ဒရိတ်ကြွယ်ဝစွာပါဝင်နေသလို အကျိုးပြုကိုလက်စထရောနဲ့ပရိုတင်းတို့လည်း ပါဝင်ပါသည်။ ၂၀၂၅ ခုနှစ်၊ ဇူလိုင်လတတိယပတ်တွင် ‌ပီလောပီနံဥဈေးနှုန်းမှာ တစ်ပိဿာလျှင် (၆၀၀၀)ကျပ်နှုန်းတို့ဖြင့် ကရင်ပြည်နယ်၊ ဘားအံမြို့ရေပေါ်ဈေးတွင် အဝယ်လိုက်ကာရောင်းချ လျက်ရှိကြောင်း သိရသည်။

DOCA(ကရင် )

    ကယားပြည်နယ်ရှိ ဒေသခံပြည်သူများသည် စားဝတ်နေရေးအတွက် စိုက်ပျိုးရေးလုပ်ငန်းကို အများဆုံးလုပ် ကိုင်စားသောက်ကြပါသည်။ စိုက်ပျိုးရေးလုပ်ငန်းများအနက်  ပြောင်းဖူးစိုက်ပျိုးရေး လုပ်ငန်းကို တွင်ကျယ်စွာ လုပ်ကိုင်ကြပါသည်။ ပြောင်းဖူးအမျိုးအစားများမှာ သကြားပြောင်း၊ ကုလားပြောင်း၊ ဖူးစားပြောင်းခေါ် ရှမ်းပြောင်းဟူ၍ အမျိုးမျိုးရှိပြီး ယခုလတွင် ဒေသထွက်ဖူးစား ပြောင်း ခေါ် ရှမ်းပြောင်းသည် အများဆုံးထွက်ရှိပြီး ဈေးကွက်အတွင်း အများအပြားတွေ့ရှိပါသည်။ ဖူးစားပြောင်းကိုရှမ်းပြောင်းဟူ၍လည်း အချို့ကခေါ်ဝေါ်ကြပါသည်။ အချို့အရပ်ဒေသ၌ ကောက်ညှင်း ငချိတ်ပြောင်း ဟူ၍လည်း ခေါ်ကြပါသေးသည်။ ကောက်ညှင်းကဲ့သို့ ကပ်စေး၍ အရသာမှာအလွန် နူးညံ့သောကြောင့် ဖြစ်ပါသည်။ ဖူးစားပြောင်းများကို ပြုတ်၍သော်လည်းကောင်း၊ ကြော်၍သော် လည်းကောင်း အမျိုးမျိုးပြုလုပ်၍ စားသောက်ကြပါသည်။ ဖူးစားပြောင်းများကို ကယားပြည်နယ်၊ လောပိတမြို့၊ မိုက်ကမ်းကျေးရွာ၊ ရှမ်းရွာများတွင် အများဆုံးစိုက်ပျိုးကြပါသည်။ ပြောင်းဖူးအစိမ်း တစ်လုံးလျှင်(၅၀၀-၆၀၀)ကျပ်အတွင်း အရောင်းအဝယ်ဖြစ်လျက်ရှိပြီး ပြုတ်ပြီးသား ပြောင်းဖူး တစ် လုံးလျှင်(၆၀၀-၇၀၀)အတွင်း အရောင်းအဝယ်ဖြစ်လျက်ရှိပါကြောင်း ဈေးသည်များထံမှ သိရှိရပါ သည်။

DOCA(ကယား)

       ကယားပြည်နယ်၊ လွိုင်ကော်မြို့တွင် ဇူလိုင်လတတိယပတ်အတွင်း ဖြစ်ပေါ်နေသော အသား၊ ငါးနှင့်ဥ ဈေးနှုန်းများမှာ ကြက်သား(CP)(အသားတိုး)တစ်ပိဿာလျှင်(၁၈၀၀၀/-)ကျပ်၊ ကြက်သား(CP) (ဥနှုန်းကျ)တစ်ပိဿာလျှင် (၂၄၀၀၀/-)ကျပ်၊ ကြက်(ဗမာ) တစ်ပိဿာလျှင် (၃၂၀၀၀/-)ကျပ်၊ ဝက်သား တစ်ပိဿာလျှင် (၃၅၀၀၀/-)ကျပ်၊ အမဲသား တစ်ပိဿာလျှင် (၃၅၀၀၀/-)ကျပ်၊ ငါးမြစ်ချင်း တစ်ပိဿာလျှင် (၂၄၀၀၀/-)ကျပ်၊ ငါးကြင်း တစ်ပိဿာလျှင် (၂၄၀၀၀/-)ကျပ်၊ ငါးခူ တစ်ပိဿာလျှင်(၂၀၀၀၀/-)ကျပ်၊ အာပြဲခြောက် တစ်ပိဿာလျှင် (၃၄၀၀၀/-)ကျပ်၊ ငါးတံခွန် တစ်ပိဿာလျှင်(၁၈၀၀၀/-)ကျပ်၊ ငါးပိ(စိမ်းစား) တစ်ပိဿာ လျှင်(၁၀၀၀၀/-)ကျပ်၊ ကြက်ဥတစ်လုံးလျှင် (၄၃၀/-)ကျပ်၊ ဘဲဥတစ်လုံးလျှင် (၇၀၀/-)ကျပ် ဖြင့် အရောင်းဝယ်ဖြစ်နေကြောင်း သိရှိရပါသည်။

       ယခင်လဈေးနှုန်းများနှင့် နှိုင်းယှဉ်ကြည့်လျှင် ကြက်သား(CP)(အသားတိုး) တစ်ပိဿာ လျှင် (၂၀၀၀/-)ကျပ် ၊ ၊ ကြက်သား (CP) (ဥနှုန်းကျ) တစ်ပိဿာလျှင် (၁၀၀၀/-)ကျပ် ၊ ငါးခူ တစ်ပိဿာလျှင်(၃၀၀၀/-)ကျပ်စီဖြင့် ဈေးနှုန်းကျသွားပြီး ငါးပိ (စိမ်းစား) တစ်ပိဿာလျှင် (၂၀၀၀/-)ကျပ်၊ ကြက်ဥ တစ်လုံးလျှင်(၃၀)ကျပ်  ဈေးနှုန်းတက်သွားကြောင်းနှင့် ကျန်အသား၊ ငါးနှင့်ဥ ဈေးနှုန်းများ တည်ငြိမ်လျက်ရှိကြောင်း သီရိမင်္ဂလာဈေးအတွင်းရှိ ဈေးသည်များထံမှ သိရှိရပါသည်။

DOCA(ကယား)

      ၂၀၂၅ ခုနှစ်၊ ဇူလိုင်လ(၁၈)ရက်နေ့တွင် ဖြစ်ပေါ်နေသော စားသုံးဆီဈေးနှုန်းနှင့်စာဖိုဆောင် သီးနှံဈေးနှုန်းများမှာ မြေပဲဆီ (၁)ပိဿာလျှင် (၂၀၀၀၀)ကျပ်၊ နေကြာဆီ (၁)ပိဿာလျှင် (၂၀၀၀၀) ကျပ် နှင့် စားအုန်းဆီ (၁)ပိဿာလျှင်(၆၇၀၀) ကျပ် တို့ဖြစ်ပြီး စားဖိုဆောင်သီးနှံများ၏ ဈေးနှုန်းများမှာ ကြက် သွန်နီ (၁)ပိဿာလျှင်(၁၈၀၀)ကျပ်၊ ကြက်သွန်ဖြူ (၁)ပိဿာလျှင်(၇၅၀၀)ကျပ်၊ မြေပဲဆန် (၁)ပိဿာ လျှင်(၁၀၀၀၀)ကျပ်၊ ဂျင်း (၁)ပိဿာ လျှင်(၄၀၀၀) ကျပ်၊ အိုင်အိုဒင်းဆား (၁)ထုပ်လျှင် (၁၀၀၀) ကျပ်၊ အာလူး (၁)ပိဿာ လျှင်(၅၀၀၀)ကျပ်၊ ကုလားပဲခြမ်း (၁)ပိဿာလျှင်(၇၀၀၀)ကျပ်၊ ပဲနီလေး (၁)ပိဿာလျှင်(၁၃၀၀၀)ကျပ်၊ ငရုတ်သီး (အရှည်) (၁)ပိဿာလျှင် (၁၆၀၀၀)ကျပ်၊ ငရုတ်သီး အပု (၁) ပိဿာလျှင်(၄၀၀၀၀) ကျပ်၊ ပန်းဂေါ်ဖီ (၁)ပွင့်လျှင် (၂၅၀၀)ကျပ်၊ ခရမ်းချဉ်သီး (၁)ပိဿာလျှင် (၃၀၀၀) ကျပ်၊ ပဲတောင်းရှည် (၁)စည်းလျှင် (၈၀၀)ကျပ်၊ ဂေါ်ဖီ ထုပ် (၁)ထုပ်လျှင် (၁၅၀၀)ကျပ်၊ ကန်စွန်းရွက် (၁)စည်းလျှင် (၃၀၀)ကျပ်ခန့် တို့ရှိပါကြောင်း စားဖိုဆောင် သီးနှံ ရောင်းချသူများထံမှ သိရှိရ ပါသည်။

            ယခင်အပတ် ဈေးနှုန်းများနှင့်နှိုင်းယှဉ်ကြည့်လျှင် ဂေါ်ဖီ ထုပ် (၁)ထုပ်လျှင် (၃၀၀)ကျပ်၊ ပဲနီလေး (၁)ပိဿာလျှင်(၁၀၀၀)ကျပ် စီဖြင့် ဈေးနှုန်းမြင့်တက်သွားကြောင်းနှင့် ပန်းဂေါ်ဖီ (၁)ပွင့်လျှင် (၂၅၀၀)ကျပ်၊ ခရမ်းချဉ်သီး (၁)ပိဿာလျှင် (၃၀၀၀) ကျပ်နှင့် ငရုတ်သီး အပု (၁) ပိဿာလျှင်(၅၀၀၀) ကျပ် စီဖြင့် ဈေးနှုန်းကျဆင်းသွားပြီး ကျန်စားဖိုဆောင်သီးနှံဈေးနှုန်းများ တည်ငြိမ်လျက်ရှိပါကြောင်း သိရှိရပါသည်။

DOCA(ကယား)