ပြည်တွင်းကုန်သွယ်မှုသတင်း

    မန္တလေးတိုင်းဒေသကြီး၊ ကျောက်ဆည်ခရိုင်အတွင်း၌ သီးနှံမျိုးစုံစိုက်ပျိုးလျက်ရှိရာ (ဆောင်း)ဖူးစားပြောင်းကိုလည်း တောင်သူများအနေဖြင့် စီးပွားဖြစ်စိုက်ပျိုးကြပါသည်။ စိုက်ပျိုးမှုအနေဖြင့် (၂၀၂၃-၂၀၂၄)  ဘဏ္ဍာနှစ်တွင် (၂၉၆)ဧကစိုက်ပျိုးထားရှိကြောင်း သက်ဆိုင်ရာ ခရိုင်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရသိရှိရပါသည်။ ဖူးစားပြောင်းစိုက်ပျိုးမှုတွင် (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၆၀၀၀၀)ကျပ်ခန့်ကုန်ကျကြောင်း၊ ခရိုင်အတွင်း အများဆုံးစိုက်ပျိုးသောမြို့နယ်များမှာ စဉ့်ကိုင်မြို့နယ်ဖြစ်ပြီး ကျန်မြို့နယ်များမှာ မိသားစုစားသုံးရန်အတွက် ကြက်သွန်ခင်းများတွင် သီးထပ်၊ သီးညှပ်အဖြစ် စိုက်ပျိုးကြပါသည်။ အများဆုံးစိုက်ပျိုးသောမျိုးမှာ သကြားပြောင်းဖြစ်ပြီး ထောပတ်ပြောင်းမှာ စိုက်ပျိုးမှုနည်းပါးသည်။ ယခုနှစ်တွင် မိုးရွာသွန်းမှုအားကောင်းသောကြောင့် အပင်များနှင့်အဖူးများသန်မာထွားကြိုင်းလျက်ရှိပြီး မကြာမီကာလအတွင်း ထွက်ပေါ်တော့မည်ဖြစ်ကြောင်း၊ ယခုလက်ရှိ ပြောင်းဖူးအစိမ်း(၁)ဖူးလျှင် (၂၀၀-၂၅၀)ကျပ်ဖြစ်ပြီး ပြောင်းဖူးပြုတ် (၁)ဖူးလျှင် ဖူးကြီး (၅၀၀)ကျပ်၊ ဖူးလတ် (၃)ဖူးလျှင် (၁၀၀၀)ကျပ်ဈေးနှုန်းတို့ဖြင့် ရောင်းဝယ်လျက်ရှိပါသည်။ ပြောင်းဖူးစိမ်းကို ဂျစ်ဖြင့်ခြစ်၍ ပြောင်းဖူးကြော်အဖြစ် စားသုံးကြပြီး ပြုတ်ပြီးသောပြောင်းဖူးများကို ဓားဖြင့်ပါးပါးလှီး၍ ကြက်သွန်နီ၊ ခရမ်းချဉ်သီး၊ နံနံပင်တို့ဖြင့် ပြောင်းဖူးသုပ်အဖြစ်လည်းသုပ်၍စားသုံးကြပါသည်။ ပြောင်းဖူးစားသုံးခြင်းသည် ကျန်းမာရေးနှင့်ညီညွတ်ပြီး မိသားစုအတွက်လည်း စီးပွားဖြစ်ဝင်ငွေတိုးသောကြောင့် ပြောင်းဖူးသီးနှံများကို တိုးချဲ့စိုက်ပျိုးသင့်ပါကြောင်း ရေးသားတင်ပြလိုက်ရပါသည်။

DOCA(မန္တလေး)

    ၂၉.၁၁.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီးရုံး၏ ရည်ညွှန်းပါစာလမ်းညွှန်ချက်အရ ဆန်စပါးဆိုင်ရာ အပတ်စဉ်လေ့လာသုံးသပ်ချက်(အကျဉ်းချုပ်) ၄၃/၂၀၂၃ အား သိရှိလမ်းညွှန်မှုပြုနိုင်ပါရန် တင်ပြအပ်ပါသည်။

    မန္တလေးတိုင်းဒေသကြီး၊ ကျောက်ဆည်ခရိုင်၌ ကုလားပဲ(ဆောင်း)များစတင်စိုက်ပျိုးလျက်ရှိရာ (၂၀၂၃-၂၀၂၄) ဘဏ္ဍာနှစ်တွင် ကုလားပဲ(ဆောင်း) လျာထားစိုက်ဧက(၆၈၂၇၇)ဧကရှိပြီး ယခုအချိန်၌ ကျောက်ဆည်မြို့နယ်တွင် (၈၂၀)ဧက၊ စဉ့်ကိုင်မြို့နယ်တွင် (၉၀၅)ဧက၊ စုစုပေါင်း (၁၇၂၅)ဧကစိုက်ပျိုးပြီးဖြစ်ကြောင်း၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရသိရှိရပါသည်။ ကျောက်ဆည်ခရိုင်အတွင်းရှိ ယာမြေများ၌ အောက်တိုဘာလ တတိယပတ်တွင် ကုလားပဲကို မိုးရေအစိုဓာတ်ဖြင့်စိုက်ပျိုးကြပြီး တချို့မှာ မိုးရေအစိုဓာတ်အပြင် ရေစက်များဖြင့် ရေတင်၍စိုက်ပျိုးကြကြောင်း၊ ရေဖြင့် ထပ်မံတင်၍စိုက်ပျိုးသောယာမြေများသည် မိုးရေဖြင့်စိုက်ပျိုးသည့် ယာမြေများထက် ပို၍ကောင်းမွန်ပြီး အထွက်နှုန်းပိုမိုကောင်းမွန်ကြောင်း တောင်သူများထံမှသိရှိရပါသည်။ တောင်သူများသည် ကုလားပဲမျိုးကို မိမိ၏အိမ်တွင် သေချာစွာသိမ်းဆည်းထားပြီး မျိုးအဖြစ်အသုံးပြုကြပြီး တချို့‌တောင်သူများမှာ ဝယ်ယူ၍စိုက်ပျိုးကြကြောင်း၊ ယခုနှစ်စိုက်ပျိုးချိန်တွင် ကုလားပဲမျိုးဈေးနှုန်းအနေဖြင့်  ကုလားပဲ(ရိုးရိုး) တစ်တင်းလျှင် (၇၈၀၀၀)ကျပ်၊ ကုလားပဲ(V2)တစ်တင်းလျှင် (၈၆၀၀၀) ကျပ်ဈေးနှုန်းတို့ဖြင့် ရောင်းဝယ်လျက်ရှိကြောင်း၊ ကုန်ကျစရိတ်အနေဖြင့် တစ်ဧကလျှင် (၂၅၀၀၀၀)ကျပ်ခန့်ကုန်ကျကြောင်း၊ ကုလားပဲသည် ကုန်ကျစရိတ်သက်သာပြီး အချိန်ကုန်သက်သာမှုကြောင့် ဝင်ငွေတိုးပြီး နွေရာသီသုံးငွေအဖြစ်ရရှိသည့်အတွက် တောင်သူအများစုမှာ အများဆုံးစိုက်ပျိုးကြကြောင်း၊ ယာမြေများတွင် ကုလားပဲ(၁)ဧကလျှင် (၁)တင်းနှုန်းပတ်ကြဲရပြီး လယ်မြေများတွင် (၁)ဧကလျှင် (၁)တင်းခွဲနှုန်းပိုမို၍စိုက်ပျိုးရကြောင်း၊ အကြောင်းရင်းမှာ ယာမြေများသည် လယ်မြေမျာထက် မြေသန်ခြင်းကြောင့်ဖြစ်ပါသည်။ ယခုအခါ ကုလားပဲအပင်ပေါက်များအောင်မြင်စွာဖြစ်ထွန်းနေပြီး ကုလားပဲရွက်များခူး၍ ဈေးထဲတွင် ရောင်းချလျက်ရှိကြောင်း၊ ကုလားပဲရွက် (၁)ပိသာလျှင် ဖောက်သည်ဈေးမှာ (၉၀၀၀)ကျပ်ရှိပြီး လက်လီဈေးအနေဖြင့် ကုလားပဲရွက် (၁၀)ကျပ်သားလျှင် (၁၀၀၀)ကျပ်ဖြင့်ရောင်းချလျက်ရှိပါသည်။ ကုလားပဲရွက်ကို ဟင်းချိုရည်အဖြစ်လည်းကောင်း၊ အသုပ်သုပ်၍လည်းကောင်း၊ ကြော်ချက်၍လည်းကောင်း စားသုံးကြပါသည်။ ကုလားပဲကိုကြိတ်ခွဲလျှင် ကုလားပဲဆံကိုရရှိပြီး ကုလားပဲဆံကို အလှူပွဲများတွင် ပဲနှပ်အဖြစ် မပါမဖြစ်ချက်ပြုတ်ကျွေးမွေးကြကြောင်း၊ ကုလားပဲဆံဖြင့် မုန့်အမျိုးမျိုးပြုလုပ်၍ လည်းရောင်းချလျက်ရှိကြောင်း၊ ဈေးနှုန်းအနေဖြင့် ယခုအချိန်တွင် ကုလားပဲများထွက်ရှိခြင်းမရှိသေးသော်လည်း ယခင်နှစ်တွင်ထွက်ရှိခဲ့သော ကုလားပဲဈေးနှုန်းများမှာ ကုလားပဲ(ရိုးရိုး)တစ်တင်းလျှင် (၆၅၀၀၀)ကျပ်၊ ကုလားပဲ(V2)တစ်တင်းလျှင် (၇၀၀၀၀) ကျပ်ဈေးနှုန်းတို့ဖြင့် ရောင်းချလျက်ရှိကြောင်းသိရှိရပါသည်။

DOCA(မန္တလေး)

    မြန်မာနိုင်ငံ စက်သုံးဆီတင်သွင်း၊ သိုလှောင်၊ ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက်မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိပါသည်။

    မင်းဘူးမြို့နယ်တွင် စက်သုံးဆီဆိုင်(၁၆)ဆိုင်ရှိရာ ဆိုင်များအားလုံး ပုံမှန်ဆိုင်ဖွင့်ရောင်းချ လျက်ရှိပြီး ၂၀၂၃ခုနှစ် နိုဝင်ဘာလ(ဒုတိယပတ်)နှင့် (တတိယပတ်) စက်သုံးဆီဈေးနှုန်းများမှာ ဓာတ်ဆီ(92) (၁)လီတာလျှင် ယခင်အပတ်တွင် ကျပ်(၂၁၈၅)ဖြစ်ပြီး ယခုအပတ်တွင် ကျပ်(၂၁၅၅) ဖြစ်၍ ကျပ်(၃၀)ဈေးလျော့ခဲ့ကြောင်း၊  ဓာတ်ဆီ(95) (၁) လီတာလျှင် ယခင်အပတ်တွင် ကျပ် (၂၃၀၅)ဖြစ်ပြီး ယခုအပတ်တွင် ကျပ်(၂၂၈၅)ဖြစ်၍ ကျပ်(၂၀)ဈေးလျော့ခဲ့ကြောင်း၊ ဒီဇယ်(ရိုးရိုး) (၁) လီတာလျှင် ယခင်အပတ်တွင် ကျပ်(၂၁၉၅)ဖြစ်ပြီး ယခုအပတ်တွင် ကျပ်(၂၁၇၀)ဖြစ်၍ ကျပ်(၂၅) ဈေးလျော့ခဲ့ကြောင်း၊ ဒီဇယ်(ပရီမီယမ်)(၁)လီတာလျှင် ယခင်အပတ်တွင် ကျပ်(၂၃၀၅)ဖြစ်ပြီး ယခုအပတ်တွင် ကျပ်(၂၂၆၀)ဖြစ်၍ ကျပ်(၄၅)ဖြင့် ဈေးနှုန်းအသီးသီးလျော့ကျလာကြောင်း စက်သုံးဆီအရောင်းဆိုင်များမှ သိရှိရပါသည်။

DOCA(မကွေး)