ပြည်တွင်းကုန်သွယ်မှုသတင်း

       မအူပင်ခရိုင်၊ မအူပင်မြို့နယ်မှ ဆီကုန်သည်များနှင့် ဆီလုပ်ငန်းရှင်များအသင်း၊ စားသုံးဆီကိုယ်စားလှယ်များက အလှည့်ကျ မအူပင်ခရိုင်၊ မြို့နယ်ဝန်ထမ်းမိသားစုများအား သတ်မှတ်ရည်ညွှန်းဈေးနှုန်းဖြင့် သက်သာစွာစားသုံးနိုင်ရေး မအူပင်ခရိုင်၊ အထွေထွေအုပ်ချုပ်ရေးဦးစီးဌာန၊ ခရိုင်ရုံးဝန်းတွင် (၁၂-၁၁-၂၀၂၄) ရက်နေ့၊ နေ့လယ် (၁၃း၃၀)နာရီအချိန်၌ စနစ်တကျရောင်းချပေးနေကြောင်းသိရသည်။

         မအူပင်ဆီကုန်သည်နှင့် ဆီလုပ်ငန်းရှင်များအသင်းမှ ဆီကိုယ်စားလှယ်များသည်  သက်ဆိုင်ရာဌာနတို့၏အမိန့်၊ ညွှန်ကြားချက်၊ လမ်းညွန်ချက်၊ သတ်မှတ်ချက်များအတိုင်း စားသုံးသူပြည်သူများ သက်သာစွာ စားသုံးဆီဝယ်ယူနိုင်ရေးကို စီစဉ်ဆောင်ရွက်လျက်ရှိပြီး တစ်လလျှင် အပတ်စဉ်အလိုက် ရပ်ကွက်နှင့် ကျေးရွာများအထိ အခြေခံလူတန်းစားများနှင့် ဝန်ထမ်းမိသားစုများ စားဝတ်နေရေးအဆင်ပြေစေရေးအတွက် မအူပင်ဆီကုန်သည်နှင့် ဆီလုပ်ငန်းရှင်များအသင်းအနေဖြင့် စားသုံးဆီရောင်းဝယ်ရေးမော်တော်ယာဉ်ဖြင့် သတ်မှတ်အရေအတွက်ကုန်ဆုံးသည်အထိ  ရောင်းချပေးလျက်ရှိပြီး၊ မအူပင်ခရိုင်အထွေထွေအုပ်ချုပ်ရေးဦးစီးဌာန၊ ခရိုင်ရုံးဝန်းတွင် ဝန်ထမ်းမိသားစုများကို  သတ်မှတ်လူဦးရေအလိုက် စားအုန်းဆီအချိန် ပိဿာ၃၃၀ကို သတ်မှတ်ရည်ညွှန်းဈေး ၇၁၅၀ကျပ်ဖြင့် စနစ်တကျရောင်းချပေးလျက်ရှိကြောင်း သတင်းရရှိပါသည်။

DOCA(ဧရာဝတီ)

                ဧရာဝတီတိုင်းဒေသကြီး၊ မြန်အောင်ခရိုင်၊ ကြံခင်းမြို့နယ်တွင် ၂၀၂၄-၂၀၂၅ ခုနှစ်၊ မိုးစပါးစိုက်ဧက (၄၂၄၁၂) ဧကစိုက်ပျိုးပြီး၊ သီးထပ်ဖြစ် မတ်ပဲ၊ ပဲတီစိမ်းနှင့် နွေစပါးတို့ကို စိုက်ပျိုးကြပါသည်။ (၁၁.၁၁.၂၀၂၄) ရက်နေ့အထိ (၁၄၀၅၇)ဧက ရိတ်သိမ်းပြီးကြောင်းသိရှိရပါသည်။ အထွက်နှုန်းအနေဖြင့် ၁ဧကပျမ်းမျှ ၉၀.၂၉ တင်းထွက်ရှိပြီး စပါးဈေးနှုန်းမှာလည်း ကွင်းပေါက်ဈေး ပေါင်(၅၅) တင်း(၁၀၀)လျှင်(၁၆၀၀၀၀၀ကျပ်မှ၁၈၀၀၀၀၀ကျပ်)ဈေးဖြင့်စပါးအမျိုးအစားပေါ်မူတည်၍ အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ဧရာဝတီ)

    တနင်္သာရီတိုင်းဒေသကြီး၊ မြိတ်ခရိုင်မှ ထွက်ရှိလာသော ဒေသထွက်ကွမ်းသီးများကို နေ့စဉ်အခြားတိုင်းနှင့်ပြည်နယ်များသို့ တင်ပို့ရောင်းချလျက်ရှိရာ ၎င်းတို့ကို မြိတ်ခရိုင်စီမံအုပ်ချုပ်ရေးအဖွဲ့၊  စားသုံးသူရေးရာဦးစီးဌာန၊ အကောက်ခွန်ဦးစီးဌာန၊ စိုက်ပျိုးရေးဦးစီးဌာန၊ မြို့နယ်စည်ပင်သာယာရေးအဖွဲ့၊ ခရိုင်ရဲတပ်ဖွဲ့နှင့် သက်ဆိုင်ရာဌာနတို့ပါဝင်သောအဖွဲ့များဖြင့် စစ်ဆေးကြပ်မတ်ပြီး တင်ပို့ရောင်းချလျက်ရှိကြပါသည်။

    တနင်္သာရီတိုင်းဒေသကြီး၊ မြိတ်မြို့၏ ၂၀၂၄ခုနှစ်၊ နိုဝင်ဘာလ(၁၁)ရက်နေ့ရှိ ကွမ်းသီးစျေးနှုန်းသည် ကွမ်းသီးခြောက်တစ်ပိဿာလျှင် (၁၀၀၀၀)ကျပ်ခန့်နှင့် ခွဲခြမ်းတစ်ပိဿာလျှင် (၆၀၀၀)ကျပ်ခန့်ဖြစ်ပေါ်နေကြောင်း ကွမ်းသီးလုပ်ငန်းရှင်တစ်ဦးထံမှ သိရှိရပါသည်။

DOCA(တနင်္သာရီ)

       ရှမ်းပြည်နယ်၊ တောင်ကြီးမြို့တွင် ဒေသထွက်ရှမ်းအစားအစာများဖြစ်သည့် ကောက်ညှင်းဆန်နှင့်ပြုလုပ်ထားသည့် ခေါပုတ်နှင့် ကောက်ညှင်းကျည်ထောက် (ခ) ပေါင်းတင်းဝါး (ခ) ခဲတံချောင်းများကို စားသုံးသူများ ကြိုက်နှစ်သက်စွာဝယ်ယူစားသုံး/ သုံးစွဲလျက်ရှိကြောင်း၊ ယခင်က ဆောင်းတွင်းကာလမှာသာ ရောင်းချမှုရှိပြီး ယခုအချိန်တွင် စားသုံးမှု/ သုံးစွဲမှုများလာသည့်အတွက် ရာသီမရွေး ရောင်းချလျက်ရှိကြောင်းသိရှိရပါသည်။ တောင်ကြီးမြိုသို့ လာရောက်လည်ပတ်ကြသည့် ခရီးသွားပြည်သူများမှာလည်း အိမ်ပြန်လက်ဆောင်အဖြစ် ဝယ်ယူကြကြောင်းသိရှိရပါသည်။

          ရာသီဥတုအေးမြသည့် ဆောင်းတွင်းကာလ၌ ခေါပုတ်၊ ကောက်ညှင်းကျည်တောက်များကို မီးဖိုပေါ်တွင် ကင်၍တစ်မျိုး၊ ကြော်၍တစ်မျိုး၊ ထန်းလျက်၊ ငါးခြောက်ဖုတ်၊ အကြော်စုံများဖြင့် စားသုံးကြကြောင်းသိရှိရပါသည်။

          ငှက်ပျောဖတ်နှင့်ထုပ်ပြီးသား ခေါပုတ်တစ်ထုပ်လျှင် (၃၀၀ဝိ)ကျပ်မှ (၅၀၀ဝိ)ကျပ်ဈေးအထိရှိကြောင်း၊ ကောက်ညှင်းကျည်တောက်များမှာ ကောက်ညှင်းရိုးရိုးဖြင့်ပြုလုပ်ထားပါက တစ်ပေချောင်းတစ်ချောင်းလျှင် (၁၅၀ဝိ)ကျပ်မှ (၂၅၀ဝိ)ကျပ်ဖြင့်လည်းကောင်း၊ ကောက်ညှင်းရိုးရိုးမဟုတ်ဘဲ မြေပဲနှင့်အုန်းသီးရောပါလျှင်(၂၀၀ဝိ)ကျပ်မှ (၆၀၀ဝိ)ကျပ်အထိလည်းကောင်း၊ အချိန်ဖြင့်ရောင်းချပါက နှစ်ဆယ့်ငါးကျပ်သားကို (၃၅၀ဝိ)ကျပ်ဖြစ်ကြောင်း၊ အရွယ်အစားအလိုက် အကြီး၊ အသေးပေါ်မူတည်၍ ရောင်းချလျက်ရှိကြောင်းသိရှိရပါသည်။

          မင်္ဂလာဦးရပ်ကွက်မှာရှိသည့် အုန်းနို့ကောက်ညှင်းကျည်တောက်ဆိုင်လေးမှာမူ ရိုးရိုးကောက်ညှင်းကျည်တောက်၊ ပဲနှင့်အုန်းသီးရောထည့်ထားသည့် ကောက်ညှင်းကျည်တောက်၊ အုန်းနို့ ကောက်ညှင်းကျည်တောက်များရရှိပြီး ဆောင်းတွင်းတစ်ရာသီသာ ရောင်းချကြောင်းသိရပါသည်။

         ကောက်ညှင်းဖြင့်ပြုလုပ်ထားသော ရာသီအစားအစာတစ်ခုဖြစ်သည့်  ကောက်ညှင်းကျည်တောက် (ခ) ပေါင်းတင်းဝါး (ခ) ခဲတံချောင်းမုန့်ကို တစ်မြို့နှင့်တစ်မြို့၊ ဒေသတစ်ခုနှင့်တစ်ခု အခေါ်အဝေါ်တူညီမှုမရှိဘဲ ကွဲပြားကြောင်းသိရှိရပါသည်။ ရာသီအစားအစာဖြစ်သောကြောင့် စားသုံးသူများပိုမိုများပြားလာသည့်အပြင် အခြားဒေသများသို့လည်းတင်ပို့ရောင်းချကြသည့်အတွက် ဈေးကွက်အတွင်း အရောင်းအဝယ်တွင်လျက် ရောင်းအားကောင်းနေကြောင်းသိရှိရပါသည်။

DOCA(ရှမ်း)

      ရှမ်းပြည်နယ်(တောင်ပိုင်း)အောင်ပန်းဒေသတွင် ယခုအပတ်ပြောင်းသီးနှံမှာ အမြင့်ဈေး (၁၂၃၀)ကျပ်ဖြင့် ဈေးအေးလျက်ရှိနေပြီး ပြောင်းအသစ်များဝင်ရောက်မှုရှိသဖြင့် စီးဆင်းမှုမှာ ကောင်းနေပါသည်။ ကြက်သွန်ဖြူသီးနှံမှာ တစ်ပိဿာလျှင် ထူး ၁-၁၁၅၀၀ကျပ်၊ ထူး ၂-၁၂၅၀၀ကျပ်၊ ထူး ၃-၁၃၅၀၀ကျပ်၊ ထူး ၄-၁၄၅၀၀ကျပ်၊ ထူး ၅-၁၅၅၀၀ကျပ်၊ ထူးလွန်-၁၆၅၀၀ကျပ်နှင့် ဥတစ်လုံး မှာ ၂၅၀၀၀ကျပ်ဈေးပေါက်နေကြပြီး တောင်သူလက်ကျန်နည်းပါးမှုနှင့် သယ်ယူပို့ဆောင်ရေးအခက်အခဲများကြောင့် ဈေးကွက်အဝင်နည်းသဖြင့် သီးနှံဈေးနှုန်းမြင့်တက်လာပြီး စီးဆင်းမှုမှာ ပုံမှန်သာရှိနေပါသည်။

         အာလူးသီးနှံမှာ တစ်ပိဿာလျှင် မျက်နီ S2-၈၀၀၀ကျပ်၊ S1-၇၀၀၀ကျပ်၊ OK-၆၈၀၀ကျပ်၊ ဆွဲသီး-၅၂၀၀ကျပ်နှင့် ဂေါ်လီဆိုဒ်မှာ ၃၀၀၀ကျပ်ဈေးရှိနေကြပြီး မိုးအာလူးများ လှိုင်လှိုင်ပေါရမည့်ကာလဖြစ်သော်လည်း ရေနစ်ပျက်စီးမှုများကြောင့် အထွက်နှုန်းလျော့ကျကာ အဝင်နည်းသဖြင့် ဈေးနှုန်းမြင့်တက်လာပြီး စီးဆင်းမှုနည်းနေပါသည်။

        ချင်းသီးနှံ ချင်းဥမမြေနီအကြီးစမှာ တစ်ပိဿာလျှင် (၃၅၀၀)ကျပ်နှင့် အလတ်စမှာ (၃၀၀၀)ကျပ်ဖြင့် ဈေးငြိမ်လျက်ရှိပြီး ပြည်တွင်းသုံးသာစီးဆင်းလျက်ရှိသဖြင့် ပုံမှန်သာဖြစ်နေပါသည်။

     ကုန်စိမ်းသီးနှံများတွင် ဂေါ်ဖီ ၂၇၀၀-၃၀၀၀ ကျပ်၊ ပန်းမုံလာ ၂၈၀၀-၃၂၀၀ ကျပ်၊ ရွှေပဲ ၁၂၀၀၀-၁၅၀၀၀ ကျပ်၊ ခရမ်းချဉ်ဂွတ်ရှယ်သီး ၆၀၀၀ကျပ်၊ ဘိုစားပဲ ၂၅၀၀-၃၀၀၀ ကျပ်၊ မုန်လာဥနီ ၃၀၀၀-၃၅၀၀ ကျပ်၊ ဖရုံသီး ၁၈၀၀ကျပ်၊ ငြုပ်ပွ ၁၀၀၀၀-၁၁၀၀၀ ကျပ်၊ ခရမ်းသီး ၃၀၀၀-၃၅၀၀ ကျပ်၊ မုန်ညှင်း ၄၂၀၀ကျပ်ဖြင့် အသီးသီးဈေးပေါက်နေကြ၍ ပန်းမုံလာသီးနှံမှာ ဈေးကွက်အဝင်နည်းပါးပြီး ဘိုစားနှင့် မုန်ညှင်းသီးနှံတို့မှာ ပုံမှန်အဝင်ရှိလာပြီး ဈေးနှုန်းကျဆင်းသွားပါသည်။ ကျန်ကုန်စိမ်းသီးနှံများမှာလည်း ဈေးကွက်လိုအပ်ချက်အရ အရောင်းအဝယ်ဖြစ်နေပြီး ဈေးနှုန်း၊ ဈေးကွက်အရ စီးဆင်းမှုမှာ လျော့နည်းနေ၍ ပွင့်လင်းရာသီရောက်မှသာ စီးဆင်းမှုအနည်းငယ်တိုးမြင့်လာနိုင်ကြောင်း လေ့လာသိရှိရပါသည်။

DOCA(ရှမ်း)