ပြည်တွင်းကုန်သွယ်မှုသတင်း

မကွေးတိုင်းဒေသကြီး၊ ပခုက္ကူမြို့ ပဲဈေးကွက်တွင် ပြည်တွင်းစားသုံးမှုမြင့်မားလျက်ရှိသော စားတော်ပဲများ ၂၀၂၄ခုနှစ်၊ စက်တင်ဘာလ(ဒုတိယပတ်)မှစ၍ ဈေးတက်ပြီး အရောင်းအဝယ် ဖြစ်လျက်ရှိကြောင်း၊ ယခုအချိန်တွင် သီးနှံအသစ်ပေါ်ချိန် မရောက်ရှိသေး၍ ကျွန်းစားတော်ပဲ (အဟောင်း)များကိုသာ အရောင်းအဝယ်ဖြစ်လျက်ရှိကြောင်း၊ စိုက်ပျိုးရာသီရောက်ချိန်နီး၍ စိုက်တောင်သူများမှလည်း မျိုးအဖြစ် ပြန်လည်ဝယ်ယူမှုများကြောင်း သိရသည်။ ဈေးကွက်သို့ ကျွန်းစားတော်ပဲစိုက်ပျိုးမှုများသော ဂန့်ဂေါ၊ ထီးလင်း၊ ဆော၊ ကျောက်ထု၊ လောင်းရှည် ဒေသများနှင့် ရေနံချောင်းမြို့မှ ထွက်ရှိသော စားတော်ပဲများ ပွဲရုံများသို့ ဝင်ရောက်ကြောင်း၊ ထိုမှတစ်ဆင့် ဒေသတွင်း စားသုံးသူများသို့ တစ်ဆင့်ပြန်လည်ရောင်းချကြောင်း သိရှိရသည်။
ဈေးနှုန်းအနေဖြင့် စက်တင်ဘာလ(ဒုတိယပတ်)တွင် ကျွန်းစားတော်ပဲတစ်တင်းလျှင် ကျပ် (၉၅၀၀၀)ဖြင့် အရောင်းအဝယ်ဖြစ်ခဲ့ပြီး ဈေးနှုန်းမြင့်တက်ခဲ့ရာ ယခုအောက်တိုဘာလ (ဒုတိယပတ်) တွင် စားတော်ပဲတစ်တင်းလျှင် ကျပ်(၁၄၅၀၀၀)ဈေးဖြင့် အရောင်းအဝယ်ဖြစ်ကြောင်း၊ ဈေးနှုန်း နှိုင်းယှဉ်ပါက တစ်လတွင်း စားတော်ပဲတစ်တင်းလျှင် ကျပ်(၅၀၀၀၀)ခန့် ဈေးနှုန်းမြင့်တက်ခဲ့ပြီး ဈေးကွက်အတွင်း၌ စားတော်ပဲလက်ကျန်နည်း၍ အရောင်းအဝယ်ဖြစ်မှုအနေဖြင့် တစ်ပတ် အတွင်း ပိဿာ(၃၀)ဝင်အိတ် (၁၅) မှ (၂၀)အိတ်ထိ အရောင်းအဝယ်ဖြစ်လျက်ရှိကြောင်း သိရသည်။
ပြည်တွင်းစားသုံးမှုအနေဖြင့် စားတော်သီးနှံကို နံနက်စောစာ စားတော်ပဲပြုတ် စားခြင်းအပြင် စားတော်ပဲလုံးကြော်များကို နေ့စဉ်စားသုံးခြင်းဖြစ်၍ တစ်နှစ်ပတ်လုံးစားသုံးသည့် သီးနှံတစ်မျိုး ဖြစ်သည်။ ပြည်တွင်းစိုက်ပျိုးမှုအနေဖြင့် စားတော်ပဲကို အခြားသီးနှံများကဲ့သို့ သီးထပ်စိုက်ပျိုးခြင်းမရှိ၍ တစ်နှစ်လျှင်တစ်ကြိမ်သာ စိုက်ပျိုးခြင်းဖြစ်၍ သီးနှံထွက်ရှိမှုနည်းကြောင်း၊ ပြည်တွင်းပဲသုံးစွဲမှုများလျက်ရှိပြီး သုံးစွဲမှုလိုအပ်ချက်အရ ပြည်ပနိုင်ငံများမှ ဝယ်ယူတင်သွင်းလျက်ရှိ၍ စားတော်ပဲ ဈေးကွက်မြင့်မား၍ အရောင်းအဝယ်ဖြစ်လျက်ရှိခြင်းကြောင့် စိုက်တောင်သူများအနေဖြင့် ပြည်တွင်းသုံးစွဲမှု လိုအပ်လျက်ရှိပြီး ဈေးနှုန်းဈေးကွက် ကောင်းမွန်သည့် စားတော်ပဲစိုက်ခင်းများကို စိုက်ပျိုးရရှိသည့် မြေများတွင် နှစ်စဉ် မပြတ်တိုးချဲ့စိုက်ပျိုးသင့်သည့် သီးနှံတစ်မျိုးဖြစ်ကြောင်း သိရှိရပါသည်။
DOCA(မကွေး)

မြန်မာနိုင်ငံအနှံ့အပြားတွင် မြေအမျိုးအစားမရွှေး ချင်းကိုစိုက်ပျိုးနိုင်သည်။ ဟင်းချက်ရာတွင် ဟင်းခတ်အမွှေးအကြိုင်အဖြစ်နှင့် တိုင်းရင်းဆေးဖော်စပ်ရာတွင်လည်း ထည့်သွင်းအသုံးပြုနိုင်သည်။ ချင်းစိုက်ပျိုးရန် အကောင်းဆုံးချိန်မှာ မေလဖြစ်ပြီး တစ်နှစ်ခံ ပင်ပျော့ပင်မျိုးဖြစ်သည်။ (၇-၈) လကြာလျှင် ချင်းတက်များရရှိပါသည်။ တစ်ဧကလျှင် ပိသာ (၂ ,၀၀၀) ခန့်ထွက်ရှိကြောင်းသိရသည်။
ပုသိမ်မြို့တွင်းရှိ ဈေးများတွင်ရောင်းချနေသာ ချင်းတက်ဈေးနှုန်းမှာ ယခင်နှစ်တွင် (၁) ပိဿာလျှင် ကျပ် (၃၀၀၀/၄၀၀၀) ဈေးဖြင့် အရောင်းအဝယ်ဖြစ်ခဲ့သော်လည်း ယခုနှစ်ချင်းတက်ဈေးနှုန်းမှာ (၁) ပိဿာလျှင် ကျပ် (၆၀၀၀) ခန့်ဈေး ရရှိသည့်အတွက် ချင်းစိုက်ပျိုးသောတောင်သူများ တွက်ချေကိုက်လျက်ရှိကြောင်း၊ ချင်း(၁) ပိဿာဈေးနှုန်းမှာ ယခင်နှစ်နှင့် ယခုနှစ် ကာလတူဈေးနှုန်းတို့ကိုနှိုင်းယှဉ်ပါက (၁) ပိဿာလျှင် ကျပ် (၃၀၀၀/၂၀၀၀) ခန့်ပိုမိုရရှိ၍ မိသားစုပိုမိုဝင်ငွေ ရရှိကြောင်းသိရှိရပါသည်။
DOCA(ဧရာဝတီ)

မကွေးတိုင်းဒေသကြီးအတွင်းရှိ မြင့်မြတ်တော်ဝင်မကွေးကုမ္ပဏီသည် တောင်သူများ၏ သီးနှံများ အရည်အသွေးကောင်းမွန်စွာဖြင့် စိုက်ပျိုးထုတ်လုပ်နိုင်ရေး အရည်အသွေးကောင်းမွန် သော ကုန်ကြမ်းများ စဉ်ဆက်မပြတ်ရရှိစေရေးအတွက် တောင်သူအစုအဖွဲ့များနှင့် ပူးပေါင်း၍ သီးနှံ စုပေါင်းရောင်းချပွဲများကို ကျင်းပပြုလုပ်လျက်ရှိပါသည်။ တောင်သူများအတွက် လိုအပ် သော အရည်အသွေးအာမခံချက်ရှိသည့် သွင်းအားစုဓါတ်မြေဩဇာများ လက်လှမ်းမီစွာ အသုံးပြု လာနိုင်စေရန်အတွက် သွင်းအားစုကုမ္ပဏီများနှင့်ပူးပေါင်းဆောင်ရွက်ခြင်း၊ အတိုးနှုန်းသက်သာသည့် ဘဏ် ချေးငွေများရရှိစေရန်အတွက် ဘဏ်များနှင့်လည်းချိတ်ဆက်ဆောင်ရွက်ပေးလျက်ရှိသည်။
မြင့်မြတ်တော်ဝင်-မကွေးကုမ္ပဏီကို ၂၀၁၈ခုနှစ်တွင် စတင်တည်ထောင်ခဲ့ပြီး လယ်ယာထွက် ကုန်သီးနှံရောင်းဝယ်ခြင်းလုပ်ငန်းကို အဓိကဆောင်ရွက်သည့် မကွေးအခြေစိုက်ကုမ္ပဏီတစ်ခု ဖြစ်ပြီး ၂၀၁၅ခုနှစ်မှစ၍ အထူးသဖြင့် GAP စနစ်ဖြင့် စိုက်ပျိုးထားသော အရည်အသွေးကောင်း သီးနှံများကို တောင်သူအစုအဖွဲ့များနှင့် လက်တွဲကာ ကောင်းမွန်ခိုင်မာသော ဈေးကွက်ရရှိရေးကို အောင်မြင်စွာ ဆောင်ရွက်နိုင်ခဲ့ပြီး ကုမ္ပဏီသည် လယ်ယာထွက်ကုန်သီးနှံများ ရောင်းဝယ်မှု ဆောင်ရွက်ရာတွင် ရိုးသားဖြောင့်မတ်မှု၊ ပွင့်လင်းမြင်သာမှု၊ မှန်ကန်မှု၊ သမာသမတ်ရှိမှု စသည့် စံနှုန်းများအတိုင်း တောင်သူ၊ ကျား၊ မ၊ ကြီး၊ ငယ် မခွဲခြားဘဲ တန်းတူတန်ဖိုးထားပြီး ဝန်ဆောင်မှု ပေးလျက်ရှိသည့်အပြင် ပြန်လည်ရောင်းချပြီးသော သီးနှံ၏ အရည်အသွေးများ တွင်လည်း စစ်မှန်မှု၊ ကောင်းမွန်မှု၊ တိကျမှု၊ အာမခံမှုတို့ဖြင့် ဝယ်ယူသူများအား အစဉ်အမြဲစိတ် ကျေနပ်မှုရှိအောင် ဆောင်ရွက်ပေးနေသော ကုမ္ပဏီတစ်ခုဖြစ်ကြောင်း သိရသည်။
ထို့အပြင် အားလုံးအကျိုးခံစားခွင့်ရရှိနိုင်သော စီးပွားရေးပုံစံကိုကျင့်သုံးခြင်းဖြင့် ဆီထွက် သီးနှံနှင့် ပဲမျိုးစုံကဏ္ဍများတွင် ထိပ်တန်းကုမ္ပဏီဖြစ်လာရန် အနာဂတ်မျှော်မှန်းချက် ထားရှိပြီး တောင်သူ လယ်သမားများထံ စိုက်ပျိုးရေးနည်းပညာများနှင့် စီးပွားရေးဝန်ဆောင်မှုများ ရရှိနိုင်မှု သေချာစေခြင်းဖြင့် ပြည်တွင်းနှင့်ပြည်ပပို့ကုန်ဈေးကွက်တွင် အရည်အသွေးမြင့်ဆီထွက် သီးနှံနှင့် ပဲမျိုးစုံထုတ်လုပ်မှုများ ကိုမြှင့်တင်သွားရန် ရပ်တည်ချက်နှင့် လုပ်ငန်းတာဝန်များကိုလည်း ထားရှိကြောင်း သိရသည်။
ဝန်ဆောင်မှုများအနေဖြင့်လည်း တောင်သူအစုအဖွဲ့များ အဖွဲ့အစည်းဖွံ့ဖြိုးတိုးတက်ခိုင်မာ အားကောင်းလာစေရန် ပံ့ပိုးကူညီပေးခြင်း၊ စိုက်ပျိုးရေးနည်းပညာများပံ့ပိုးပေးခြင်း၊ မိတ်ဖက်အဖွဲ့ အစည်းများ၊ တောင်သူအဖွဲ့အစည်းများနှင့်ပူးပေါင်းပြီး မှန်ကန်သောရောင်းဝယ်မှုစနစ်များဖြင့် ရာသီ
အလိုက်သီးနှံစုပေါင်းရောင်းချပွဲများကို အကောင်အထည်ဖော်ဆောင်ရွက်ခြင်း၊ တောင်သူအစုအဖွဲ့ များ၊ မိတ်ဖက်ကုမ္ပဏီများ၊ INGOs များ၊ ပုဂ္ဂလိကဘဏ်များနှင့် ချိတ်ဆက်၍ သွင်းအားစုနှင့် ချေးငွေများ လက်လှမ်းမီစေရန် ပံ့ပိုးကူညီပေးခြင်းများ ဆောင်ရွက်လျက်ရှိပါသည်။ ၎င်းအပြင် တောင်သူ များ၏ စိုက်ပျိုးထုတ်လုပ်မှုကဏ္ဍများ ဖွံ့ဖြိုးတိုးတက်လာစေရန်၊ တောင်သူအစုအဖွဲ့များအား ကောင်းလာစေရန်နှင့် အဖွဲ့အစည်းများ ဖွံ့ဖြိုးတိုးတက်စေရန်အတွက် NGOs, INGOs များနှင့် ပူးပေါင်း၍ ပံ့ပိုးကူညီဆောင်ရွက်လျက်ရှိကြောင်း သိရှိရပါသည်။
GAP၏ အခြေခံသဘောတရားများမှာ စားသုံးသူများ အမြဲတမ်းစိုးရိမ်နေကြသည့် မိမိတို့စား သုံးနေသော အစားအစာများသည် ဘေးကင်းစေရန်ထုတ်လုပ်သည့်လုပ်ငန်းစဉ်နှင့် နည်းလမ်းများသည် သဘာဝပတ်ဝန်းကျင်နှင့်လုပ်သားများ၏ ကျန်းမာသာယာဝပြောရေးကို စောင့်ရှောက်မွေးမြူသည့် စနစ်များဖြင့် ထုတ်လုပ်ရန်နှင့် ဤဒေသ ဤအခြေအနေအတွင်းမှာပဲ မွေးဖွားဖြစ်တည်လာခြင်း၊ လုပ်ရမည့်လုပ်ငန်းစဉ်များကို အကောင်းဆုံးလုပ်ဆောင်ခြင်းဖြစ်ပြီး ၎င်းတို့ကို လုပ်ဆောင်ထားပြီးဖြစ်ကြောင်း အာမခံနိုင်သည်ဟု အဓိပ္ပါယ်ဖွင့်ဆိုနိုင်ပါသည်။ GMP & GHP တို့သည် စိုက်ပျိုးထုတ်လုပ်ခြင်း၊ ကုန်ချောပြုလုပ်ခြင်း၊ သယ်ယူပို့ဆောင်ခြင်းတို့အပြင် လူတွေရဲ့ ကျန်းမာရေးကိုဂရုစိုက်ခြင်း၊ သဘာဝပတ်ဝန်းကျင်ကို ကာကွယ်ခြင်း၊ လုပ်သားများ၏ အခြေအနေနှင့် ၎င်းတို့ မိသားစုဝင်များ၏ ကျန်းမာသာယာဝပြောရေးတို့နှင့် သက်ဆိုင်သော နည်းပညာရပ်ဆိုင်ရာ ထောက်ခံချက်များဖြစ်ပါသည်။
တောင်သူများဘက်မှလည်း သီးနှံအမျိုးအစားအလိုက် သီးနှံကုန်ပစ္စည်းပိုင်းများကို အရည် အသွေးကောင်းစေရန် ရိတ်သိမ်းပြီးနောက်ပိုင်း နည်းစနစ်များကို စနစ်တကျလိုက်နာဆောင်ရွက်ရန်၊ ဓါတုဓါတ်ကြွင်းကင်းစေရန် ပိုးသတ်ဆေးများကို ဆေးဖြန်းပြီးနောက် သီးနှံရိတ်သိမ်းရမည့် ရက်များကို တိကျစွာလိုက်ရန်၊ သီးနှံအရည်အသွေးကောင်းစေရန် ကွင်းအတွင်းဆောင်ရွက်ရမည့် စိုက်ပျိုးနည်းစနစ်များကို လိုက်နာဆောင်ရွက်ရန်၊ ဖုန်သဲခဲ၊ အမှိုက်၊ အမှော်၊ အဖျင်း၊ အမှုန်၊ ပိုးကိုက်၊ အပဲ့၊ မျိုးကွဲ၊ အရောင်ကွဲ၊ အနံ့၊ အနာ၊ အအောက်များ ကင်းရှင်းစေရန် ဆောင်ရွက်၊ သတ်မှတ် အစိုဓါတ်ရာခိုင်နှုန်းအထိ ခြောက်သွေ့စေရန် အခြောက်ခံခြင်းများဆောင်ရွက်ရန်နှင့် ကွင်းမှတ်တမ်းများကို ပြည့်စုံစွာဖြည့်သွင်းခြင်းများ ဆောင်ရွက်လာရမည်ဖြစ်ပါသည်။ ထိုသို့တောင်သူများအနေ ဖြင့် အရည်အသွေးကောင်း သီးနှံများကို စုပေါင်းစိုက်ပျိုးထုတ်လုပ် ရောင်းချလာနိုင်ပါက ကောင်းမွန် ခိုင်မာသော ဈေးကွက်တစ်ခု ကိုဖော်ဆောင်နိုင်မည် ဖြစ်ပါသည်။
သီးနှံစုပေါင်းရောင်းချပွဲများမှ အလေးချိန်တွယ်(ကတ္တား) မှန်ကုန်စွာဖြင့် သီးနှံများကို ဝယ်ယူပေးခြင်း၊ ပွဲခ၊ အလုပ်သမားခ မယူခြင်း၊ အိတ်ခွံအလေးချိန်အား (၁၂.၅၀)ကျပ်သား ဖြင့် ဝယ်ယူပေးခြင်း၊ ငွေလက်ငင်းစနစ်ဖြင့် ပေးချေခြင်း၊ အရည်အသွေးပြည့်မီသော သီးနှံများ ထုတ်လုပ်လာနိုင်စေရန် ကွင်းဆင်း၍ နည်းပညာများဖြန့်ဝေပေးခြင်း၊ ပြည်ပပို့ကုန် လုပ်ငန်းရှင်များနှင့် တောင်သူများ တိုက်ရိုက်ရောင်းချနိုင်ရန် ချိတ်ဆက်ဆောင်ရွက်ပေးခြင်း၊ ဒေသပေါက်ဈေးအောက် မနိမ့်ကျသည့်ဈေးဖြင့် ဝယ်ယူပေးခြင်းစသည့်အကျိုးရလာဒ်များ ရရှိနိုင်မည်ဖြစ်ပါသည်။ သို့ဖြစ်ပါ၍ မြင့်မြတ်တော်ဝင်ကုမ္ပဏီအနေဖြင့် တောင်သူများအတွက် လိုအပ်သော သွင်းအားစုများ၊ ချေးငွေများရရှိအောင် ပံ့ပိုးကူညီဆောင်ရွက်ပေးခြင်း၊ သီးနှံစုပေါင်းရောင်းချပွဲများကို ကျင်းပပြုလုပ်ပေးခြင်း၊ တောင်သူအစုအဖွဲ့များအားကောင်းလာစေရန် ပံ့ပိုးကူညီဆောင်ရွက်ပေးခြင်းများဖြင့် တောင်သူများ၏ဘဝ မြင့်မားတိုးတက်လာအောင် ဆောင်ရွက်ပေးလျက်ရှိကြောင်း ရေးသားတင်ပြလိုက်ရပါသည်။
DOCA(မကွေး)

          ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်ရှိ ဩဇာသီးများသည် ကျွန်းကုန်းကြီးကျေးရွာ၊ ရွာသာကုန်းကျေးရွာနှင့် နှစ်ရွာကျေးရွာများတွင် အများဆုံးစိုက်ပျိုးထွက်ရှိပါသည်။

          ဩဇာသီးပင်များသည် နှစ်ရှည်သီးနှံဖြစ်သဖြင့် ၎င်းကို အိမ်တိုင်းနီးပါး၏ ခြံထွက် အိမ်ခြံစည်းရိုးများတွင်လည်းစိုက်ပျိုးကြပါသည်။ ယခုလအချိန်မှာ ဩဇာသီးပေါ်ချိန်ဖြစ်သည့်အတွက် ပြန်ရောင်းသမားများက အပင်ပြတ်ဝယ်ယူကြသကဲ့သို့ ခြံများတွင် လိုက်လံကြည့်ရှုကာ အသီးများလိုက်ကောက်၍လည်း ဝယ်ယူကြကြောင်းသိရပါသည်။ ကြို့ပင်ကောက်မြို့တွင် ခွန်နှစ်ရွာဩဇာသီးဟုနာမည်ကြီးပြီး ၎င်းရွာမှ အများဆုံးထွက်ရှိပါသည်။ ခွန်နှစ်ရွာသည် ရန်ကုန်-ပြည် ကားလမ်းဘေး အရှေ့ဘက်၊ အနောက်ဘက်တို့တွင်တည်ရှိပြီး ဩဇာသီးပေါ်ချိန်၌  အိမ်ရှေ့ကားလမ်းဘေးများတွင် တဲဆိုင်များထိုး၍ ရောင်းချကြပါသည်။ (၁၀)လုံးတစ်ခြင်း၊ (၁၅)လုံးတစ်ခြင်းဖြင့် ခြင်းအလိုက်ရောင်းချကြပါသည်။

          ယခုစက်တင်ဘာလ၊ ဒုတိယအပတ်မှစ၍ ဩဇာသီးပေါ်ချိန်တွင် အလုံးအကြီးအသေးပေါ်မူတည်၍ (၁၂၀၀/ ၁၀၀၀/ ၉၀၀/ ၇၀၀) ကျပ်နှုန်းအထိဈေးရရှိကြောင်း၊ လက်ဆောင်ပေးရန်နှင့် စားသုံးရန်အတွက် ခရီးသွားကားများကလည်း ဝယ်ယူကြကြောင်းသိရှိရပါသည်။ ယခုအချိန်တွင် ဩဇာသီးများ လှိုင်လှိုင်မပေါ်သေးသဖြင့် ဈေးကောင်းရရှိကြောင်းသိရှိရပါသည်။

DOCA(ပဲခူး)

          ဂျူးမြစ်ကို တောင်ကြီးနှင့် ပင်းတယမြို့တို့တွင် အများဆုံးစိုက်ပျိုးကြပြီး ထိုမှတစ်ဆင့် မြို့များနှင့်နယ်များရှိ ဈေးများသို့ တင်ပို့ရောင်းချကြပါသည်။ ပြည်မြို့ရှိ ဈေးကွက်များသို့လည်း တင်ပို့ရောင်းချသဖြင့် စားသုံးသူများလည်း ဝယ်ယူစားသုံးကြပါသည်။ ဂျူးမြစ်ကို အတို့အမြုပ်အနေဖြင့်လည်းကောင်း၊ ချဉ်ရည်ဟင်းချက်၍သော်လည်းကောင်း စားသုံးကြပါသည်။ ရှမ်းပြည်ဘက်တွင် မြေပဲ၊ ပဲပုတ်တို့နှင့်ရော၍ကြော်ပြီး စားသုံးကြပြီး ရောင်းချသည်များလည်းရှိပါသည်။ ထိုဂျူးမြစ်ကြော်ကို မြေပြန့်ဒေသမှ စားသုံးသူပြည်သူများက ဝယ်ယူစားသုံးကြပါသည်။ ဂျူးမြစ်ကို ထိုသို့ တန်ဖိုးမြှင့်ထုတ်ကုန်အဖြစ် ထုတ်လုပ်ရောင်းချသဖြင့် လူအများက ရှမ်းပြည်လက်ဆောင်အဖြစ် လက်ဆောင်များပေးခြင်း၊ မိမိဘာသာစားသုံးရန်အတွက် ဝယ်ယူကြပါသည်။ ဂျူးမြစ်မှထုတ်လုပ်နိုင်သော တန်ဖိုးမြှင့်ထုတ်ကုန်များမှာ အအေးခံဂျူးရွက်၊ ဂျူးမြစ်ရှာလကာရည်၊ သီးရွက်စုံဆလတ်၊ ငါးဂျူးမြစ် ခဲပတ်ကင်နှင့် အသင့်သုံးကျန်းမာရေး ဟင်းခတ်အမွှေးအကြိုင်တို့ဖြစ်ပါသည်။ ထိုသို့ ဂျူးမြစ်မှတစ်ဆင့် တန်ဖိုးမြှင့်ထုတ်ကုန်များကို ပြည်ခရိုင်အနေဖြင့် ထုတ်လုပ်ရောင်းချနိုင်မည်ဆိုလျှင် အမြစ်အတိုင်း အစိမ်းရောင်းချခြင်းထက် ပိုမိုအကျိုးအမြတ်များစွာရရှိနိုင်မည်ဟုခန့်မှန်းရပါသည်။ ဈေးကွက်အတွင်းရောင်းချသော ဂျူးမြစ်ဈေးမှာ ဂျူးမြစ်အစည်းတစ်စည်းလျှင် (၆၀၀-၇၀၀)ကျပ်ဖြင့်ရောင်းချကြောင်းသိရပါသည်။ ယခင်နှစ်ဖြစ်သော ၂၀၂၃ခုနှစ်တွင် ဂျူးမြစ်အစည်းတစ်စည်းလျှင် ၅၀၀ကျပ်ဖြင့်ရောင်းချခဲ့ပြီး ယခုနှစ်တွင် ဈေးအနည်းငယ်မြင့်တက်လာသည်ဟုသိရပါသည်။

DOCA(ပဲခူး)