ပြည်တွင်းကုန်သွယ်မှုသတင်း

မြိတ်ခရိုင်ရှိ ပြည်သူများစားသုံးရန်အတွက် ကြက်သွန်နီများကို ရန်ကုန်မြို့ရှိပွဲရုံများမှ အများဆုံးဝယ်ယူ၍ မြိတ်မြို့သို့ ကားလမ်းဖြင့်သယ်ယူလျက်ရှိပြီး မိုးတွင်းကာလများတွင် တစ်ခါတရံ လမ်းခရီးတွင် ကြန့်ကြာမှုအနည်းငယ်ရှိသော်လည်း ကြက်သွန်နီများပုံမှန်ဝင်ရောက်လျက်ရှိကြောင်းသိရှိရပါသည်။
(၁၁-၁၀-၂၀၂၄)ရက်နေ့တွင် ကြက်သွန်နီ(၁၀)ပိဿာဝင်(၁)အိတ်လျှင် လက်ကားစျေး (၂၉၀၀၀)ကျပ်၊ တစ်ပိဿာစျေး (၂၉၀၀)ကျပ်ခန့်ရှိပြီး လက်လီဆိုင်များတွင် တစ်ပိဿာလျှင် (၃၁၀၀) ကျပ်မှ (၃၂၀၀)ကျပ်များဖြင့် ရောင်းချနေကြောင်းသိရှိရပါသည်။
DOCA(တနင်္သာရီ)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် စီးပွားရေးလုပ်ငန်းရှင်များနှင့်တွေ့ဆုံ၍ အခြေခံစားကုန်ဈေးနှုန်းများ၊ ဓာတ်မြေဩဇာနှင့် ပိုးသတ်ဆေးဈေးနှုန်းများအား အပတ်စဉ်တင်ပြလျက်ရှိပါသည်။
အောက်တိုဘာလ၊ ဒုတိယအပတ်တွင် ရွှေဘိုမြို့၌ရောင်းချလျက်ရှိသော ဓာတ်မြေဩဇာနှင့် ပိုးသတ်ဆေးဈေးနှုန်းများမှာ ဇာမဏီတံဆိပ် (၁၃:၅:၇) ကွန်ပေါင်းဓာတ်မြေဩဇာ 50kg တစ်အိတ်လျှင် (၉၇၀၀ဝိ/-)ကျပ်၊ အာမို၊ ပုလဲတံဆိပ် ကွန်ပေါင်းဓာတ်မြေဩဇာတစ်အိတ်လျှင် (၁၁၀၀၀ဝိ/-)ကျပ်နှင့် ဒီမွန် 1.8 တံဆိပ် ထိသေ/ စားသေ (အဆိပ်ငွေ့) 500cc တစ်ဘူးလျှင် (၂၀၀၀ဝိ/-)ကျပ်၊ ငှက်ကြီးတောင်တံဆိပ် ထိသေ/ စားသေ(အဆိပ်ငွေ့) 100cc တစ်ဘူးလျှင် (၃၇၅၀ဝ/-)ကျပ်၊ ဇိုင်ကလုံးတံဆိပ် ပင်လုံးပြန့်ပိုးသတ်ဆေး 500cc တစ်ဘူးလျှင် (၄၄၀၀ဝိ/-)ကျပ်ဖြင့်ရောင်းချလျက်ရှိပြီး အာမို၊ ကျွဲနက်တံဆိပ် (၁၅:၁၅:၁၅)ကွန်ပေါင်းဓာတ်မြေဩဇာ၊ ပန်းဖူးတံဆိပ် ဓာတ်မြေဩဇာ၊ MC တံဆိပ်(၁၅:၁၅:၁၅) ကွန်ပေါင်းဓာတ်မြေဩဇာနှင့် ရှောင်လင်တံဆိပ် ထိသေ/ စားသေ(အဆိပ်ငွေ့)ပိုးသတ်ဆေးများမှာ ဈေးကွက်အတွင်း ပစ္စည်းပြတ်လျက်ရှိကြောင်း၊ အချို့သောဓာတ်မြေဩဇာနှင့် ပိုးသတ်ဆေးများ ပစ္စည်းပြတ်နေသော်လည်း မိုးစပါးများစိုက်ပျိုးထားချိန်ဖြစ်၍ ပုံမှန်ထက် ပိုမိုအရောင်းအဝယ်ဖြစ်လျက်ရှိကြောင်း ဓာတ်မြေဩဇာနှင့် ပိုးသတ်ဆေးအရောင်းဆိုင်များမှ တာဝန်ရှိသူများနှင့်ဆက်သွယ်မေးမြန်းမှုအရ သတင်းရရှိပါသည်။
DOCA(စစ်ကိုင်း)

ရွှေဘိုခရိုင်၊ ရွှေဘိုမြို့ အောင်ဇေယျဈေးအတွင်း၌ သစ်သီးမျိုးစုံရောင်းချသောဆိုင်ပေါင်း (၈)ဆိုင်ခန့်ရှိပြီး နေ့စဉ် ပိတ်ရက်မရှိဘဲ နံနက် (၀၆:၀၀) နာရီမှ နေ့လယ် (၁၄:၀၀)နာရီအချိန်ထိရောင်းချလျက်ရှိပြီး ရာသီအလိုက် ကဗ္ဗလာသီး၊ နဂါးမောက်သီး၊ သင်္ဘောသီး၊ ထောပတ်သီး၊ ပျားလိမ္မော်၊ ပန်းသီး စသည့်သီးနှံများကို မန္တလေးမြို့ရှိ ပွဲရုံများမှတစ်ဆင့်ယူ၍ ရောင်းချကြောင်းသိရပါသည်။
ရွှေဘိုမြို့ အောင်ဇေယျဈေးအတွင်း ရောင်းချလျက်ရှိသော ထောပတ်သီးများမှာ တောင်ကြီးမြို့မှလာသော ထောပတ်သီး၊ မိုးကုတ်မြို့မှလာသော ထောပတ်သီးများဖြစ်ပြီး မန္တလေးမြို့ပွဲရုံများမှတစ်ဆင့် မှာယူရကြောင်း၊ ထောပတ်သီး တစ်အိတ်လျှင် အကြီး/ အသေးပေါ် မူတည်၍ အလုံး (၈၀)မှ (၁၀၀)ထိပါပြီးတစ်အိတ်လျှင် (၆၅၀၀၀)ကျပ်ဖြင့်ဝယ်ယူရကြောင်း၊ ထောပတ်သီးများကို အလုံးအကြီး/ အသေးခွဲ၍ လက်လီတစ်လုံးလျှင် အကြီး ၁၀၀၀ကျပ်၊ အလတ် ၇၀၀ကျပ်၊ အသေး ၄၀၀ကျပ်ဖြင့်ရောင်းချရကြောင်း၊ ထောပတ်သီးများကို အအေးဆိုင်များ၊ တစ်ဆင့်လှည့်လည်ရောင်းချသော ဈေးသည်များ၊ စားသုံးသူများက ဝယ်ယူကြ၍ အရောင်းအဝယ်‌ဖြစ်လျက်ရှိကြောင်း သစ်သီး လက္ကားရောင်းချသည့် ဈေးသည်တစ်ဦးထံမှသိရှိရပါသည်။
DOCA(စစ်ကိုင်း)

ဝါလကင်းလွတ် သီတင်းကျွတ်တော့မည်ဖြစ်ရာ သီတင်းကျွတ်ပွဲတော်တွင် ဗမာလူမျိုး၊ ဗုဒ္ဓဘာသာဝင်အများစုသည် ဘုရား၊ သိမ်၊ ကျောင်းများတွင် ဘုရားပန်း၊ ဆီမီးနှင့် ဖယောင်းတိုင်များကပ်လှူပူဇော်၍ ကုသိုလ်ကောင်းမှုများပြုလုပ်ကြပါသည်။
သို့ဖြစ်ပါ၍ သီတင်းကျွတ်ကာလတွင် ဘုရားပူဇော်ရန် ဆီမီးခွက်နှင့် ဖယောင်းတိုင်များမှာ ထားဝယ်စျေးကွက်တွင် ယခင်နှစ်ထက် ပိုမိုအရောင်းအဝယ်သွက်လျက်ရှိပြီး ဒေသတွင်းမိသားစု တစ်နိုင်တစ်ပိုင်ပြုလုပ်လျက်ရှိသောကြောင့် စျေးနှုန်းပိုမိုသက်သာလျက်ရှိပြီး မြေဆီမီးခွက်တစ်ခွက်လျှင် (၁၀၀/၁၅၀)ကျပ်ခန့်၊ ဒေသထွက်ဖယောင်းတိုင်လုပ်ငန်းငယ်များသည် ကုန်ကြမ်းဖြစ်သော ဖယောင်းနှင့် မီးစာချည်ကြိုးများအား ရန်ကုန်မှမှာယူပြီး ဒေသတွင်းစျေးကွက်သို့ ဖယောင်းတိုင်အသေး ဘုရားမီးထွန်းဆိုဒ် (၃၂) တိုင်ပါတစ်ထုပ်လျှင် (၁၂၀၀)ကျပ်၊ ဖယောင်းတိုင်အသေးဆိုဒ် (၃၂)တိုင်ပါ တစ်ထုပ်လျှင် (၁၇၀၀)ကျပ်၊ ဖယောင်းတိုင်အလတ်ဆိုဒ် (၃၂)တိုင်ပါ တစ်ထုပ်လျှင် (၂၂၀၀)ကျပ်နှင့် ဖယောင်းတိုင်ဆိုဒ်အကြီး(၆)တိုင်ပါ တစ်ထုပ်လျှင်(၂၃၀၀)ကျပ်ဖြင့် အသီးသီးရောင်းချလျက်ရှိပြီး ဝင်ငွေများရရှိလျက်ရှိကြောင်းသိရှိရပါသည်။
DOCA(တနင်္သာရီ)

ပူအိုက်သောရာသီဥတုတွင် ရေဓာတ်သည်အလွန်အရေးပါသည်။ ထို့ကြောင့် ရေဓာတ်ပြည့်ဝစွာ ပါဝင်သော ဖရဲသီးစားသုံးခြင်းသည်လည်း ကျန်းမာရေးအတွက် တစ်ထောင့်တစ်နေရာမှ အကျိုး ပြုနေလျက်ရှိသည်။ ထို့ကြောင့် ဖရဲစိုက်ပျိုးမှုသည်လည်း အတန်အသင့်အရေးပါသော စိုက်ပျိုးရေး လုပ်ငန်းတစ်ခုဖြစ်သည်။ ဖရဲသီးကို မြန်မာနိုင်ငံအထက်ပိုင်းတွင် အများဆုံးစိုက်ပျိုးပြီး မြန်မာနိုင်ငံ အနှံ့အပြားတွင် စိုက်ပျိုးကြသည်။ ပူအိုက်စိုစွတ်သော ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ တာလေမြို့ မိုင်းလင်းအရှေ့ ကျေးရွာအုပ်စု၊ တာလေ-ကျိုင်းလပ်သွား လမ်းဘေးဝဲယာရှိ ဝိန်းလန်း-လန့်တောင်းကျေးရွာတို့တွင် စိုက်ပျိုးကြပြီး မြန်မာနိုင်ငံအလယ်ပိုင်း ပဲခူးတိုင်းဒေသကြီးတွင်လည်း စိုက်ပျိုးကြပါသည်။
ဖရဲသီးတွင် ခန္ဓာကိုယ်အတွက်အရေးပါနေသော အာဟာရဓာတ်၊ ဗီတာမင်၊ သတ္တုဓာတ်နှင့် အော်ဂဲနစ်ဒြပ်ပေါင်းများ ပါဝင်လျက်ရှိပြီး ဗီတာမင်C ၊ ကယ်လ်ဆီယမ်၊ အမျှင်ဓာတ်၊ ပရိုတင်းဓာတ် စသည့်ဓာတ်များ ပါဝင်နေသည့်အတွက် ကျန်းမာရေးအတွက် စားသုံးသင့်သော အသီးတစ်မျိုးဖြစ်ပါသည်။
ထို့အပြင် ဖရဲသီးကိုမိသားစုတစ်ပိုင်တစ်နိုင်မှ စီးပွားဖြစ်စိုက်ပျိုးလာကြပြီး ပြည်ပသို့တင်ပို့နိုင်သည်အထိ တစ်ဖြေးဖြေး တိုးချဲ့စိုက်ပျိုးသင့်ပါသည်။ ဇန်နဝါရီလသည် ဖရဲသီးပေါ်သည့် အချိန်ကာလ ဖြစ်၍ ဖရဲသီးဈေးကွက် ပြန်လည်စတင်မည်ဖြစ်ပါသည်။ ယခုအခါဖရဲသီး အကြီးတစ်လုံးလျှင် (၄၀၀၀)(၅၀၀၀) ကျပ်ခန့်ဖြစ်ပြီး၊ အသေးတစ်လုံးလျှင်(၂၀၀၀)ကျပ်ခန့် ဖြစ်ပေါ်လျက်ရှိပါသည်။
DOCA(ပဲခူး)