ပြည်တွင်းကုန်သွယ်မှုသတင်း

          နတ်တလင်းခရိုင်၊ နတ်တလင်းမြို့နယ်အတွင်းရှိ ကျေးရွာများတွင် ဟင်းသီးဟင်ရွက်မျိုးစုံစိုက်ပျိုးလျက်ရှိရာ နတ်တလင်းမြို့နယ်၊ စားသုံးသူရေးရာဦးစီးဌာနမှ တာဝန်ရှိဝန်ထမ်းများသည် (၁၀-၁၀-၂၀၂၄) ရက်နေ့၊ နံနက်(၁၀:၀၀)နာရီအချိန်တွင် လေးဆယ်ကျော်ရွာသို့သွားရောက်၍ တိုင်ထောင်ပဲ .၅၀ဧကစိုက်ပျိုးထားသောတောင်သူနှင့် တွေ့စုံစမ်းမေးမြန်းရာတွင် တိုင်ထောင်ပဲကို ဝါခေါင်လဆန်းတွင် စတင်စိုက်ပျိုးပြီး ရက်(၅၀)၊ ရက်(၆၀)ကြာမှ စတင်ခူးဆွတ်ရပါသည်။ တိုင်ထောင် ပဲ .၅၀ဧကကို စတင်ပေါ်ချိန်တွင် အတောင့်ရေ (၅၀၀)မှစတင်ခူးရပြီး ဒုတိယပတ်မှစ၍ ပိုမိုထွက်ရှိလာကြောင်း တိုင်ထောင်ပဲသီး အသီးစတင်ထွက်ရှိချိန်မှ အသီးတုံးသည့်အချိန်အထိ အကြိမ် (၂၀)ခန့်ခူးဆွတ်ရပြီး စုစုပေါင်းပျှမ်းမျှ အတောင့်ရေ(၁၀၀၀၀၀)ခန့်ထွက်ရှိပါသည်။ တိုင်ထောင်ပဲ .၅၀ဧကစိုက်ပျိုးမည်ဆိုပါက ပဲမျိုးစေ့နို့ဆီဘူး (၁၅)ဘူးအသုံးပြုရပြီး ပဲမျိုးစေ့ နို့ဆီဘူးတစ်လုံးကို (၈၀၀၀)ကျပ်ဖြင့် (၁၅) လုံးကို (၁၂၀၀၀၀) ကျပ်၊ တိုင်ထောင်ဝါးတစ်လုံးကို (၄၀၀)ကျပ်နှုန်းဖြင့် .၅၀ ဧကလျှင် တိုင်ထောင်ဝါးအလုံးရေ (၁၀၀၀) အသုံးပြုရသည့်အတွက်  (၄၀၀၀၀၀)ကျပ်၊ ချည်လုံးတစ်လုံးကို (၃၂၀၀)ကျပ်နှုန်းဖြင့် ချည်လုံး အလုံး(၂၀) ကို (၆၄၀၀၀)ကျပ်၊ ဓာတ်ဆား၊ ပိုးသတ်ဆေး၊ မှိုသတ်ဆေး၊ အလုပ်သမားခ၊ ပေါင်းမြက်ရှင်းခအပါအဝင် စုစုပေါင်းကုန်ကျစရိတ် ငွေကျပ် (၈)သိန်းခန့်ကုန်ကျကြောင်း၊ ယခုအောက်တိုဘာလ ဒုတိယပတ်တွင် တိုင်ထောင်ပဲသီးတစ်တောင့်လျှင် (၁၈)ကျပ်မှ (၂၀)ကျပ်ဖြင့်ရောင်းချရသဖြင့် အကျိုးအမြတ် ကျပ်(၁၀) သိန်းကျော်ခန့်ရရှိကြောင်းနှင့် ထွက်ရှိလာသော တိုင်ထောင်ပဲသီးများကို ကုန်စိမ်းဒိုင်များမှတစ်ဆင့် ရန်ကုန်မြို့သို့ တင်ပို့ရောင်းချကြောင်း  စိုက်ပျိုးသူတောင်သူများထံမှ စုံစမ်းမေးမြန်းသိရှိရပါသည်။

DOCA(ပဲခူး)

     စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရှိရာ အောက်တိုဘာလ၊ ပထမအပတ်အတွင်း အရောင်းအဝယ်ဖြစ်သည့် သီးနှံနှင့်ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ် မေးမြန်းခဲ့ပါသည်။ အစေ့ထုတ်ပြောင်းမှာ စက်တင်ဘာလ၊ ဒုတိယအပတ်မှစတင်၍ ရွှေဘိုဈေးကွက်သို့ စတင်ဝင်ရောက်ခဲ့ပြီး အောက်တိုဘာလ၊ ဒုတိယအပတ်တွင်အရောင်းအဝယ်ဖြစ်သည့် ဈေးနှုန်းမှာ အစေ့ထုတ်ပြောင်း တစ်တင်းလျှင်(၂၃၅၀ဝိ/-)ကျပ် ပေါက်ဈေးရှိပြီး တစ်ပတ်အတွင်း အရောင်းအဝယ် ဖြစ်မှုမှာ(၉၀၀၀)တင်း/(၂၂၅)တန်ဖြစ်ကြောင်း၊ ယခင်အပတ်နှင့်ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်အပတ်၌ အစေ့ထုတ်ပြောင်းတစ်တင်းလျှင်(၂၅၀၀ဝိ/-)ကျပ် ပေါက်ဈေး ရှိခဲ့သဖြင့် ယခုအပတ်တွင် ယခင်အပတ်အောက် အစေ့ထုတ်ပြောင်းတစ်တင်းလျှင်(၁၅၀ဝိ/-)ကျပ် ဈေးလျော့နည်းခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်နှစ်ကာလတူ၌ အစေ့ထုတ်ပြောင်းတစ်တင်းလျှင် (၁၆၂၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် အစေ့ထုတ်ပြောင်းတစ်တင်းလျှင် (၇၃၀ဝိ/-)ကျပ် ဈေးပိုမိုရရှိခဲ့ကြောင်း၊ ရွှေဘိုဈေးကွက်သို့ အစေ့ထုတ်ပြောင်းများ အဝင်များသော်လည်း ဝင်ရောက်သမျှ အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

          မြန်မာလူမျိုးတို့၏ ထမင်းဝိုင်းများတွင် မပါမဖြစ်စားသုံးကြသည့်ငါးပိသည် မြစ်ဝကျွန်းပေါ် ဒေသများနှင့် ပင်လယ်ကမ်းရိုးတမ်းဒေသများတွင် ပေါများစွာထွက်ရှိလေ့ရှိရာ မြစ်ချောင်းများပေါများသည့် ပဲခူးတိုင်းဒေသကြီး၊ ကဝမြို့နယ်အတွင်းထွက်ရှိသည့် ငါးပိအမျိုးအစားများစွာထဲမှ ငါးရံ့ငါးပိသည် ဈေးကွက်အတွင်း ဈေးကောင်းရရှိလျက်ရှိပြီး ဝယ်လိုအားအင်မတန်ကောင်းသည့် ထုတ်ကုန်ပစ္စည်းတစ်ခုအနေဖြင့် ရပ်တည်လျက်ရှိသည်။ ကဝမြို့နယ်တွင် ငါးရံ့ငါးပိကို ရေကျိုငါးပိနှင့် ငါးရံ့ငါးပိကောင်ဟူ၍ (၂)မျိုးပြုလုပ်လေ့ရှိပြီး ဈေးကွက်အတွင်း ရောင်းချမှုအားကောင်းမှုနှင့် လူကြိုက်များလေ့ရှိသည်မှာ ငါးရံ့ရေကျိုငါးပိဖြစ်ရာ ၎င်းရေကျိုငါးပိအား ငါးပိကြော်အဖြစ်လည်းကောင်း၊ ငပိချက်အဖြစ်လည်းကောင်း၊ ဟင်းခပ်အဖြစ်သော်လည်းကောင်း အမျိုးမျိုးစားသုံးလေ့ရှိကြသည်။

         ငါးရံ့ငါးပိပြုလုပ်ရန် ငါးရံ့ကောင်များကို ရေချိုအရပ်များဖြစ်သည့် အင်း၊ အိုင်၊ ချောင်း၊ မြောင်းများ၊ လယ်ကွင်းများထဲမှ ရရှိလေ့ရှိပြီး နှစ်ဆယ်ကျပ်သား၊ နှစ်ဆယ့်ငါးကျပ်သားရှိသည့် အကောင်များကို ရေကျိုငါးပိပြုလုပ်လေ့ရှိကြောင်းနှင့် အရွယ်အစားကြီးမားသည့်ငါးများအား ငါးပိကောင်အဖြစ် ပြုလုပ်လေ့ရှိကြောင်း ငါးရံ့ငါးပိပြုလုပ်သူတစ်ဦးထံမှသိရသည်။

         ငါးရံ့ငါးပိပြုလုပ်သူများသည် ငါးရံ့ပေါများချိန် ဆောင်းဦးကာလခန့်တွင် တစ်ပိဿာလျှင် (၅၀၀၀) ကျပ်နှုန်းဖြင့်ဝယ်ယူ၍ ငါးပိပြုလုပ်ထားရှိခဲ့ပြီး ယခုစက်တင်ဘာလ၊ တတိယအပတ်တွင် ဈေးကွက်အတွင်း ငါးရံ့ရေကျိုငါးပိတစ်ပိဿာလျှင် (၁၅၀၀၀)ကျပ်နှုန်းနှင့် ငါးပိကောင်(၁)ပိဿာလျှင် (၁၀၀၀၀) ကျပ်နှုန်းအထိ ဈေးကွက်အတွင်း ဈေးကောင်းရရှိလျက်ရှိကြောင်းနှင့် မြန်မာလူမျိုးများ၏ ထမင်းဝိုင်းများတွင် ထမင်းကို အသားငါး၊ ဟင်းလျာနှင့်တွဲဖက်၍ စားသောက်ရသည့်တိုင်အောင် ငါးပိ၊ တို့စရာမပါရှိပါက တင်းတိမ်ကျေနပ်မှုမရှိကြသဖြင့် အခြားငါးပိများထက် အနံ့၊ အရသာလွန်စွာကောင်းမွန်ပြီး အာဟာရမျှတလှသည့် ငါးရံ့ငါးပိမှာ ဈေးကွက်အတွင်း၌ ဝယ်လိုအား၊ ရောင်းလိုအားကျဆင်းသွားမှုမရှိဘဲ ဈေးကွက်အတွင်း ခိုင်မာစွာရပ်တည်နိုင်သည့် ကုန်ပစ္စည်းတစ်ခုဖြစ်ကြောင်း ငါးပိပြုလုပ်သူများနှင့် ငါးပိကုန်သည်များထံမှသိရှိရပါသည်။

DOCA(ပဲခူး)

    မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ဆီထွက်သီးနှံမျိုးစုံ စိုက်ပျိုးလျက်ရှိရာ နေကြာသီးနှံကိုလည်း စိုက်ပျိုးကြကြောင်း သိရသည်။

    မိုးနေကြာသီးနှံကို ဇွန်လတွင်စတင်စိုက်ပျိုးပြီး စက်တင်ဘာလတွင် ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးများကို အများဆုံးစိုက်ပျိုးကြပြီး၊ မြေအနေအထားနှင့် အပင်ပြုစုခြင်းအပေါ်မူတည်၍ အထွက်နှုန်းများကွာခြားမှုရှိကြောင်း၊ ဈေးနှုန်းအနေဖြင့် အောက်တိုဘာလဒုတိယပတ်တွင် နေကြာတစ်တင်းလျှင် ငွေကျပ် ၅၀၀၀၀ ဖြင့် ရောင်းဝယ်လျက်ရှိကြောင်း သိရသည်။

    ဈေးကွက်အနေဖြင့် နေကြာသီးနှံများကို ကန့်ဘလူမြို့၊ ဇီးကုန်းမြို့ပေါ်ရှိပွဲရုံများသို့ ရောင်းချကြပြီး ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း၊ ယခုပတ်တွင် အရောင်းအဝယ်ဖြစ်လျက်ရှိသော နေကြာသီးနှံဈေးနှုန်းများသည် ယခင်နှစ်ကာလတူထက် ဈေးကောင်းရရှိသောကြောင့် စိုက်ပျိုးသူများအနေဖြင့် ထိုက်သင့်သည့် အကျိုးအမြတ်များရရှိကာ အဆင်ပြေလျက်ရှိကြောင်း တောင်သူတစ်ဦးထံမှ သိရသည်။

DOCA(စစ်ကိုင်း)

      မြန်မာနိုင်ငံတွင် နွေရာသီ၊ မိုးရာသီနှင့် ဆောင်းရာသီ ဆိုပြီး ရာသီဥတု(၃)မျိုးရှိရာ ရာသီဥတုအလိုက် ဒေသအစားအစာများ ပြုလုပ်ရောင်းချလျက်ရှိကြသည်။ ယခုအခါ စစ်ကိုင်းတိုင်းဒေသကြီး ၊ ကန့်ဘလူမြို့တွင် ရာသီအစားအစာတစ်မျိုးဖြစ်သည့်  ကောက်ညှင်းပြား(ခေါ်)ခေါစီများ စတင်ရောင်းချလျက်ရှိကြောင်း သိရသည်။

      ကောက်ညှင်းပြား(ခေါ်)ခေါစီပြုလုပ်ရာတွင် အသုံးပြုသည့် ကုန်ကြမ်း ကောက်ညှင်းဆန်ကို ဒေသတွင်းတောင်သူများထံမှ ဝယ်ယူရရှိသလို မိုးညှင်းဒေသမှလည်းမှာယူပြီး အသုံးပြုလျက်ရှိ ကြောင်း၊ ကောက်ညှင်းဆန်အနက်ရောင်နှင့် ကောက်ညှင်းဆန်အဖြူရောင်ဆိုပြီး (၂)မျိုးရှိကြောင်း၊ စားသုံးသူများအနေဖြင့် ကောက်ညှင်းဆန်အနက်ဖြင့် ပြုလုပ်သည်ကို ပိုမိုကြိုက်ကြကြောင်း၊ ကောက်ညှင်းဆန်ကို ကောက်ညှင်းပြားအပြင် ခေါပြင်နှင့် ပေါင်းသင်းတို့ပြုလုပ်၍လည်း ရောင်းချကြောင်း၊ ကန့်ဘလူမြို့၊ ဘုရာကြီးညနေဈေးတွင် ကောက်ညှင်းပြားကြီး ၅ ပြားလျှင် ၁၀၀၀ကျပ် ၊ ကောက်ညှင်းပြားသေး ၉ ပြားလျှင် ၁၀၀၀ ကျပ် ၊ ခေါပြင် ၁ တုံးလျှင် ၁၀၀ ကျပ်ရောင်းဖြင့် ရောင်းချကြောင်း၊ ဈေးကွက်နေဖြင့် မြို့ပေါ်နေပြည်သူများ၊ ခရီးသွားပြည်သူများနှင့် အသိမိတ်ဆွေများထံ လက်ဆောင်ပစ္စည်းအဖြစ် ဝယ်ယူပေးပို့ကြသောကြောင့် နေ့စဉ်ဝင်ငွေရရှိကာ မိသားစုအဆင်ပြေလျက်ရှိကြောင်း ကန့်ဘလူမြို့ အမှတ်(၁)ရပ်ကွက်ရှိ ကောက်ညှင်းပြား(ခေါ်)ခေါစီ ပြုလုပ်ရောင်းချသူထံမှ သိရှိရသည်။

DOCA(စစ်ကိုင်း)