ပြည်တွင်းကုန်သွယ်မှုသတင်း

       မွန်ပြည်နယ်၊ ကျိုက်မရောမြို့နယ်အတွင်း ယခုနှစ် ဆောင်းရာသီ၌ နေကြာဧက (၁၈၂၇) စိုက်ပျိုးရန် လျာထားပြီးဖြစ်ရာ အဆိုပါနေကြာစိုက်ပျိုးမည့် တောင်သူများအား ယူးရီးယား ဓာတ်မြေသြဇာများ စျေးနှုန်းချိုသာစွာဖြန့်ဖြူးပေးသွားမည်ဖြစ်ကြောင်း စိုက်ပျိုးရေးဦးစီးဌာနမှသိရသည်။

       ကျိုက်မရောမြို့နယ်အတွင်း ဒေသခံတောင်သူများ  နေကြာစိုက်ပျိုးထုတ်လုပ်မှုတိုးတက်ရေးအတွက်  မျိုးကောင်းမျိုးသန့်များသုံးစွဲရေးနှင့် သဘာဝမြေသြဇာနှင့် ယူးရီးယား ဓာတ်မြေသြဇာအချိုးကျသုံးစွဲနိုင်ရေးအတွက် အိတ် (၃၅၁) အိတ်ကို ကျေးရွာပေါင်း (၄၄) ရွာမှ နေကြာစိုက်ပျိုးမည့်တောင်သူများထံ စျေးနှုန်းသက်သာစွာ နိုဝင်ဘာလ (၁၇) ရက်နေ့မှစတင်ကာ ဖြန့်ဝေပေးလျက်ရှိကြောင်းသိရပါသည်။

DOCA(မွန်)

                မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးကြီးနှင့် ပန်ခြံဈေးတို့တွင် ပန်းဂေါ်ဖီပွင့်များ ဈေးအမြင့်ဖြင့် အရောင်းအဝယ်ဖြစ်လျက်ရှိပါသည်။ ဟင်းသီးဟင်းရွက်အုပ်စုဝင်ဖြစ်သော ပန်းဂေါ်ဖီ ပွင့်သည် စားသုံးသူများမှ ရာသီစာအဖြစ်စားသုံးမှုများလျက်ရှိပြီး ပခုက္ကူဈေးကွက်သို့ မြို့နယ်အတွင်းရှိ မြစ်ခြေ၊ ကမ္မမြို့နှင့် ရှမ်းပြည်နယ်ထွက် ဂေါ်ဖီပွင့်များ အောက်တိုဘာလဆန်းမှစ၍ ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။

                ဈေးကွက်အနေဖြင့် ပန်းဂေါ်ဖီပွင့် အကြီးအသေးအရွယ်အစားနှင့် ပန်းပွင့်အရည်အသွေးလိုက်၍ ဈေးအနိမ့်အမြင့် ကွာခြားလျက်ရှိပါသည်။ မြစ်ခြေ၊ ကမ္မဒေသထွက် ပန်းဂေါ်ဖီ တစ်ပွင့်လျှင် ကျပ် (၇၀၀ - ၃၀၀၀)၊ ရှမ်းပြည်ဒေသထွက် ပန်းဂေါ်ဖီတစ်ပွင့်လျှင် ကျပ်(၁၀၀၀ - ၃၅၀၀)ဈေးအသီးသီးဖြင့် အရောင်းအဝယ်ဖြစ်လျက်ရှိပြီး သီးနှံဈေးကွက်မြင့်တက်ရခြင်းမှာ ပန်းဂေါ်ဖီပွင့်များစိုက်ပျိုးချိန်တွင် ရာသီဥတုဖောက်ပြန်၍ အပင်ပျက်စီးမှုများခြင်းကြောင့် ဈေးကွက်သို့ ပန်းဂေါ်ဖီပွင့်များ ဝင်ရောက်မှုနည်းခြင်းနှင့် သယ်ယူစရိတ်မြင့်မားခြင်းတို့ကြောင့် ဈေးတက်ခြင်းဖြစ်ကြောင်း ဈေးကွက်မှသိရှိရသည်။

DOCA(မကွေး)

              မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူနယ်သည် စိုက်ပျိုးရေးကိုအဓိကအားထား၍ ဒေသစီးပွားဖြစ်လုပ်ကိုင်ကြပြီး ရာသီအလိုက်သီးနှံမျိုးစုံစိုက်ပျိုးရာမှ ကုန်စိမ်းသီးနှံတစ်မျိုးဖြစ်သည့် ရာသီစာကန်စွန်းဥစိုက်ပျိုးခြင်းကို နှစ်စဉ်မပြတ် ဒေသစီးပွားဖြစ် စိုက်ပျိုးကြပါသည်။ ဆိပ်ဖြူမြို့နယ်အတွင်း ကိုးတောင့်အုပ်စုအတွင်း ရေလယ်ကျွန်း၊ သံဇလုံ၊ တောင်ငယ်လုံး၊ ပဒေသာကျွန်း၊ ကျီးပင်၊ ကျီးရွာများတွင် ကန်စွန်းဥစိုက်ခင်းများကို ကိုင်းကျွန်းမြေများတွင် အများဆုံးစိုက်ပျိုးလျက်ရှိကြောင်း၊ ယခင်နှစ်တွင် စိုက်ဧက(၅၀၀)ခန့် စိုက်ပျိုးပြီး ယခုနှစ်တွင် စိုက်ခင်းများအတွင်း စိုက်ပျိုးထားရှိသော ကန်စွန်းပျိုးခင်းများတွင် မိုးရွာသွန်းမှုများပြီး ရေဝင်ပျက်စီးခြင်းကြောင့် စိုက်ပျိုးမှုလျော့နည်းသွားပြီး စိုက်ဧက(၃၀၀)ခန့် သာစိုက်ပျိုးထားရှိကြောင်း သိရှိရသည်။

          ကန်စွန်းဥမျိုးအနေဖြင့် ရွှေဝါနှင့် ငချိတ်မျိုးကို အဓိကစိုက်ပျိုးပြီး တစ်ဧကလျှင် ကန်စွန်းညွှန့် (၃)သောင်းခန့်စိုက်ပျိုးရကြောင်း၊ မြေအောက်ရေအပြင်လိုအပ်ပါက ရေသွင်းစိုက်ပျိုးကြောင်း၊ ဥစားကန်စွန်းညွှန့်များကို စက်တင်ဘာလကုန် အောက်တိုဘာလဆန်းတွင် စတင်စိုက်ပျိုးပြီး ဇန်နဝါရီ၊ ဖေဖော်ဝါရီလတွင်တူးဖော်ကြောင်း၊ တောင်သူတစ်ဦးချင်း မြေသားအနေအထားနှင့် ရာသီဥတုပေါ် မူတည်၍ စိုက်ပျိုးချိန်မတူညီခြင်းကြောင့် တူးဖော်ချိန်မှာလည်းမတူညီကြောင်း၊ ကန်စွန်းဥတူးဖော်ချိန်နောက်ကျလျှင် သီးနှံအချိုအရသာလျော့နည်းခြင်းအပြင် ကန်စွန်းဥတွင်ပိုးဝင်၍ ပျက်စီးမှုများခြင်းကြောင့် (၃)လအကြာတွင် တူးဖော်ကြောင်းသိရှိရသည်။

          ကန်စွန်းဥတစ်ဧကစိုက်ပျိုးလျှင် အထွက်နှုန်းအနေဖြင့် ပိဿာ(၃၀၀၀ - ၃၅၀၀)ခန့် ထွက်ရှိပြီး ယခင်နှစ် ဒေသပေါက်ဈေးအနေဖြင့် တစ်ပိဿာလျှင်လက်လီဈေး ကျပ်(၁၈၀၀ - ၂၀၀၀)၊ လက်ကားဈေး ကျပ်(၈၀၀ - ၁၅၀၀)ပေါက်ဈေးဖြင့်ရောင်းချရ၍ အကျိုးအမြတ်အနေဖြင့် ငွေကျပ် သိန်း(၂၀)ခန့် ရရှိကြောင်း၊ ကုန်ကျစရိတ်အနေဖြင့် ကန်စွန်းစိုက်ပျိုးတူးဖော်ရာတွင် အလုပ်သမားငှားရမ်းမှုနည်းပြီး မိသားစုများပူးပေါင်းဆောင်ရွက်ခြင်းကြောင့် ငွေကျပ်(၄)သိန်းခန့်သာကုန်ကျကြောင်း၊ ယခုနှစ် သီးနှံပေါ်ချိန်တွင် ကန်စွန်းအထွက်နှုန်းကောင်းပြီး ဈေးကောင်းရရှိပါက စိုက်တောင်သူများဈေးကောင်းရရှိပြီး အကျိုးအမြတ်များစွာရရှိမည်ဖြစ်ကြောင်း ရေလယ်ကျွန်းကျေးရွာရှိ ကန်စွန်းစိုက်တောင်သူတစ်ဦးထံမှ သိရှိရပါသည်။

DOCA(မကွေး)

     ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်တွင် ဆီထွက်သီးနှံအဖြစ် မြေပဲ၊ နှမ်း၊နေကြာစသော သီးနှံ(၃)မျိုးအား လျာထားစိုက်ပျိုးခဲ့ပါသည်။ ၁၉.၁၁.၂၀၂၄ ရက်နေ့ထိ မြေပဲ လျာထားဧက ၃၅၂၀ ဧကတွင် ၂၅ ဧကစိုက်ပျိုးပြီး ၃၄၅၉ ဧက စိုက်ပျိုးရန် ကျန်ရှိပါသည်။ နှမ်းလျာထားဧက ၂၀၇ ဧကသည် စိုက်ပျိုးပြီးဖြစ်သော်လည်း ဆောင်သီးနှံနေကြာ လျာထားဧက ၁၀၁၈၄ ဧကတွင်  ၃ ဧက စိုက်ပျိုးပြီး ၁၀၁၈၁ ဧကစိုက်ပျိုးရန် ကျန်ရှိကြောင်း မြို့နယ်စိုက်တိုး/မြှင့်အဖွဲ့မှ သိရှိရပါသည်။

     ၂၀၂၄ ခုနှစ် နိုဝင်ဘာလ နောက်ဆုံးပတ်နှင့် ဒီဇင်ဘာလ  ပထမပတ်တွင် အပြီးသတ် စိုက်ပျိုးသွားမည်ဖြစ်ကြောင်း၊ ဆောင်းသီးနှံ မြေပဲနှင့် နေကြာကို နှုန်းတင်မြေနုကျွန်းဒေသများရှိရာ ကျေးရွာအုပ်စုများတွင် အများဆုံးစိုက်ပျိုးဧကရှိပြီး၊ နှမ်းသီးနှံကို  ကုန်းမြင့်စားကျက်နေရာများတွင် အများဆုံးစိုက်ပျိုးထားကြောင်း သိရှိရပါသည်။ စိုက်ပျိုးရန်ကျန်ရှိသော ဧကများကို အချိန်မှီစိုက်ပျိုးနိုင်ရေးနှင့် စိုက်ပျိုးပြီးဧကများ အောင်မြင်ဖြစ်ထွန်းနိုင်ရေး ဟင်္သာတမြို့နယ် စိုက်တိုး/မြှင့် အဖွဲ့ဝင်များမှ အနီးကပ် ကြီးကြပ်ဆောင်ရွက်လျက်ရှိကြောင်း သိရှိရပါသည်။

DOCA(ဧရာဝတီ)

     ဧရာဝတီတိုင်း‌ဒေသကြီး၊ ဟင်္သာတခရိုင်၊ဇလွန်မြို့နယ်အတွင်း ဒေသလက်ဆောင်အဖြစ် ဂျင်းသုပ်၊ပဲကြီးလှော်၊ စာကလေးခွေ၊ မရွေး၊ ငှက်ပျောကြော်စသည့် မုန့်များကို ဘုရားဖူးပြည်သူများမှ အိမ်ပြန်လက်ဆောင်၊ ဒေသအစားအစာအဖြစ် ဝယ်ယူလျက်ရှိကြပါသည်။ ဒေသထုတ်ကုန်ဖြစ်သော “ရွှေတိုး” ငှက်ပျောကြော်လုပ်ငန်းအား မိသားစုတစ်နိုင်တစ်ပိုင်လုပ်ငန်းအဖြစ် ထုတ်လုပ်ရောင်းချလျက်ရှိရာ ဇလွန်မြို့နယ်ဦးစီးမှူးရုံးမှ စစ်ဆေးရေးအရာရှိ ဒေါ်စိမ်းမြသီတာမှ (၂၀.၁၁.၂၀၂၄)ရက်နေ့ နံနက် (၀၉:၃၀)နာရီအချိန်တွင် ကွင်းဆင်းလေ့လာခဲ့ပါသည်။

     ထိုသို့ကွင်းဆင်းလေ့လာခဲ့ရာ ငှက်ပျောကြော် ပြုလုပ်ရာတွင် အဓိကကုန်ကြမ်းအဖြစ်  အသုံးပြုသော ငှက်ပျောသီးကို တောင်ငူမြို့မှ တစ်ဖီးလျှင် ၁၀၀၀/- ကျပ်ဖြင့် တစ်ပတ်လျှင် (၄)ကြိမ်သာ ဝယ်ယူရရှိပါသည်။  ငှက်ပျောကြော်ကို တစ်နေ့လျှင် အဖီး ၁၇၀ ကြော်ရပြီး  ၂၀၀၀/-ကျပ်တန် အထုပ်ကြီး ၁၅၀ နှင့် ၁၀၀၀/- ကျပ်တန် အထုပ်သေး (၁၅၀)ကျပ်ခန့် ရရှိပါသည်။ တစ်နေ့ကုန်ကျစရိတ်အနေဖြင့်  ကုန်ကြမ်းပစ္စည်း၊ပါဝင်မှုပစ္စည်း၊ထင်းနှင့်လုပ်သားခ၊ ပလတ်စတစ်ထုတ်ပိုးမှုအပါအဝင် ကျပ်(၄၀၀၀၀၀/-) ဝန်းကျင်ခန့် ကုန်ကျကြောင်း၊ အကျိုးအမြတ်အနေဖြင့် ငှက်ပျောသီး ၁၇၀ ကုန်လျှင် (၅၀၀၀၀/-ကျပ်) ရရှိပါသည်။   နွေဦးကာလများတွင် ဘုရားဖူးလာသူများမှ အိမ်ပြန်လက်ဆောင်၊ ဒေသလက်ဆောင်အဖြစ် ဝယ်ယူခြင်းကြောင့် ရောင်းအားပိုမိုကောင်းမွန်ကြောင်း သိရှိရပါသည်။  မိသားစုလုပ်ငန်းဖြစ်သည့်အတွက် သင့်တင့်မျှတသော အကျိုးအမြတ် ရရှိပါသည်။ စားသုံးသူများကြိုက်နှစ်သက်သော ဒေသအစားအစာတစ်မျိုးဖြစ်ပြီး မြို့နယ်အတွင်း၊ ခရိုင်အတွင်းနှင့် အခြားတိုင်းဒေသကြီးများသို့ ဒေသလက်ဆောင်အဖြစ်  ဝယ်ယူ စားသုံးမှုမြင့်တက်လျက်ရှိကြောင်း သိရှိပါသည်။

DOCA(ဧရာဝတီ)