ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် တန်ဖိုးသင့်အခြေခံစားသောက် ကုန်များကို စိုက်ပျိုး၊ မွေးမြူ ထုတ်လုပ်သူများမှ ဆန်၊ ဆီနှင့် ကြက်ဥ၊ ဒေသထွက် ဟင်းသီးဟင်း ရွက်သီးနှံများကို ၂၀၂၃ ခုနှစ်၊ စက်တင်ဘာလ တတိယပတ် ၂၃ ရက်နေ့တွင် မုံရွာမြို့၊ ပြည်ထောင်စု ဈေးရှေ့ တွင်   နံနက် (၇:၀၀) နာရီအချိန်တွင် သက်သာသောဈေးနှုန်းဖြင့် အပတ်စဉ် ရောင်းချပေး လျက်ရှိပါ သည်။

       ထိုသို့ရောင်းချခဲ့ရာတွင် တိုင်းဒေသကြီးအစိုးရအဖွဲ့၊ ဝန်ကြီးချုပ်ဦးမြတ်ကျော်၏ ကြီးကြပ်မှု ဖြင့် အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊ မွေးမြူရေးနှင့် ကုသရေးဦးစီးဌာန၊ စည်ပင် သာယာရေးအဖွဲ့၊ စိုက်ပျိုး‌ရေးဦးစီးဌာန၊ စက်မှုကြီးကြပ်ရေးနှင့် စစ်ဆေးရေးဦးစီးဌာနတို့ သည် အခြေခံစားကုန်များ ကုန်ဈေးနှုန်းကြီးမြင့်မှု မရှိစေရေးအတွက် ကိုယ်တိုင်စိုက်ပျိုး/ မွေးမြူ/ ထုတ်လုပ်သူများနှင့် ပူးပေါင်းကာ ဆန်တစ်ပြည်လျှင် ၂၈၀၀ ကျပ်၊ စားအုန်းဆီတစ်ပိဿာလျှင် ၄၉၀၀ ကျပ်၊ ဝယ်ယူသည့်ပြည်သူများ အဆင်ပြေစေရန် ကောင်တာ (၅) ခုခွဲ၍ ရောင်းချပေးခဲ့ပြီး ကြက်ဥ (၅) လုံးတစ်ထုပ်လျှင် ၁၀၀၀ ကျပ်၊ ငုံးဥ (၂၅) လုံးတစ်ထုပ်လျှင် ၁၀၀၀ ကျပ်၊ ကြာဇံများ၊ ခေါက်ဆွဲခြောက်များ၊ ကုလားပဲမှုန့်များ၊ ကိတ်စို/ကိတ်ခြောက်များနှင့် ဒေသထွက်ဟင်းသီးဟင်းရွက် သီးနှံများကိုပြင်ပပေါက်ဈေးထက် သက်သာသောဈေးနှုန်းများဖြင့် ရောင်းချပေးခဲ့ကြောင်းသိရှိရပါသည်။

DOCA(စစ်ကိုင်း)

        စစ်ကိုင်းတိုင်းဒေသကြီးအစိုးရအဖွဲ့မှ ခွဲဝေချထားသည့် စားအုန်းဆီများအား ကသာခရိုင်စီမံအုပ် ချုပ်ရေးအဖွဲ့၏ လမ်းညွှန်မှုဖြင့် ခရိုင်ကုန်ဈေးနှုန်းတည်ငြိမ်ရေးလုပ်ငန်းအဖွဲ့မှ ကြီးကြပ်၍ စားအုန်းဆီ များအား သတ်မှတ်ရည်ညွှန်းဈေးဖြင့် ရောင်းချပေးခြင်းကို  စားအုန်းဆီကုန်သည်များနှင့် ပူးပေါင်း၍ ၂၀၂၃-ခုနှစ် စက်တင်ဘာလ(၂၅)ရက်နေ့ နံနက်(၈)နာရီမှစ၍ ကသာမြို့၊ မြို့တော်ခန်းမတွင် သက်သာသောနှုန်းထားဖြင့် ရောင်းချပေးလျက်ရှိရာ ပြည်သူများအနေဖြင့် အလှည့်ကျတန်းစီဝယ်ယူခဲ့ကြကြောင်း သိရှိရသည်။

          ခရိုင်ကုန်ဈေးနှုန်းတည်ငြိမ်ရေးလုပ်ငန်းအဖွဲ့အနေဖြင့် (၂၄.၉.၂၀၂၃)ရက်နေ့တွင် ကသာခရိုင်၊ မြို့နယ် နိုင်ငံ့ဝန်ထမ်းများအား ဝန်ထမ်းတစ်ဦးလျှင် တစ်ပိဿာနှုန်း (၅၇၂၀)ကျပ်ဖြင့် (၅၅၀)ပိဿာကို ရောင်းချပေးခဲ့ကြောင်း၊ ယနေ့ (၂၅.၉.၂၀၂၃)ရက်နေ့တွင် ပြည်သူများအား လူတစ်ဦးလျှင်(၅၀)ကျပ်သား (၂၈၀၀)ကျပ်နှုန်းဖြင့် (၅၅၀)ပိဿာ ရောင်းချပေးခဲ့ကြောင်း၊ တိုင်းဒေသကြီးအစိုးရအဖွဲ့၏ စားအုန်းဆီ ခွဲတမ်းရရှိမှုအပေါ် မူတည်၍ ပြည်သူများအား ဆက်လက်ရောင်းချပေးသွားမည်ဖြစ်ကြောင်းနှင့် ခရိုင်အတွင်း မြို့နယ်များဖြစ်သည့် အင်းတော်မြို့နယ်၊ ထီးချိုင့်မြို့နယ်နှင့် ဗန်းမောက်မြို့နယ်များတွင်လည်း စားအုန်းဆီများအားသက်သာသောနှုန်းထားဖြင့် ဖြန့်ဖြူးရောင်းချပေးရန် စီစဉ်လျက်ရှိကြောင်း သိရှိရ ပါသည်။

DOCA(စစ်ကိုင်း)

    ဆိပ်ဖြူမြို့၊ ကြက်သွန်နီဈေးကွက်သို့ ၂၀၂၃ခုနှစ်၊ စက်တင်ဘာလ(၁၆)ရက်နေ့မှ (၂၁)ရက်နေ့ထိ (တတိယပတ်)အတွင်း နေ့စဉ် ကုန်ချိန်ပိဿာ(၂)သောင်းခွဲခန့်၊ (၁)ပတ်အတွင်း စုစုပေါင်းပိဿာ(၁) သိန်းခွဲခန့်၊ ကုန်စည်ဒိုင်တွင် ဝင်ရောက်အရောင်းအဝယ်ဖြစ်နေပြီး ဆိပ်ဖြူမြို့မှ ကုန်စည်စီးဆင်းမှုမှာ (၁)ပတ်အတွင်း ပိဿာ (၄)သိန်းခန့်စီးဆင်းလျက်ရှိကြောင်းသိရှိရပါသည်။

      ယခုစက်တင်ဘာလ(တတိယပတ်)အတွင်း ကြက်သွန်နီ(၁)ပိဿာဈေးနှုန်းများမှာ အမြင့်ဈေး ထိပ်စ (ရှယ်) ကျပ်(၂၆၅၀ မှ ၂၉၅၀)၊ အလတ်စ ကျပ်(၂၅၀၀ မှ ၂၆၂၅)၊ အနိမ့်ဈေး ကျပ်( ၂၄၀၀ မှ ၂၆၀၀) ဈေးနှုန်းအသီးသီးဖြင့် အရောင်းအဝယ်ဖြစ်ခဲ့ပါသည်။ ယခင်အပတ်တွင် ကြက်သွန်နီ ထိပ်စအမြင့်ဆုံးဈေးမှာ (၁)ပိဿာလျှင် ကျပ်(၃၀၀၀)ဈေးနှုန်းဖြင့် အရောင်းအဝယ်ဖြစ်ခဲ့၍ ယခုအပတ်တွင် ထိပ်စ(ရှယ်) ကျပ်(၅၀)၊ အလတ်စနှင့် အသေးစ ကျပ်(၅၀)ဈေးနှုန်းကျဆင်း၍ အရောင်းအဝယ်ဖြစ်ခဲ့ပါသည်။

  ဆိပ်ဖြူမြို့မှ ကြက်သွန်နီများကို ရန်ကုန်ဘုရင့်နောင်ပွဲရုံသို့ ကုန်ချိန်အများဆုံးစီးဆင်းလျက်ရှိပြီး ပြည်ပတင်ပို့မှုနည်းကြောင်း ကြက်သွန်နီဈေးကွက်မှသိရှိရသည်။ ယခုစက်တင်ဘာလ (တတိယပတ်) အတွင်း ကြက်သွန်နီစုစုပေါင်းပျမ်းမျှပိဿာ(၄)သိန်းခန့်၊ (၁၆၀၀၀)အိတ်၊ တန်ချိန် (၆၅၃)တန်ခန့်ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။

     ဆိပ်ဖြူကြက်သွန်နီအရောင်းအဝယ်ဖြစ်မှုမှာ စက်တင်ဘာလ(တတိယပတ်)တွင် ပြည်ပဝယ်လိုအားနည်း၍  ဈေးနှုန်းကျဆင်းလျက်ရှိကြောင်း ဈေးကွက်မှသိရှိရပါသည်။

DOCA(မကွေး)  

  သတ်မှတ်ရည်ညွှန်းဈေးနှုန်းဖြင့် ရောင်းချပေးသော စားအုန်းဆီများဈေးကွက်အတွင်း ကျယ်ကျယ်ပြန့်ပြန့်ရောင်းချပေးမှုကြောင့် ပုစွန် ၂ကောင်အပါအဝင် ပုံးဆီများအရောင်းအဝယ်အေး၍ ဈေးနှုန်းကျဆင်းလျက်ရှိကြောင်း ဘားအံမြို့၊ ရေပေါ်ဈေးရှိ ဆီအရောင်းဆိုင်များမှသိရသည်။

  ၂၀၂၃ခုနှစ်၊ ဩဂုတ်လနှင့် စက်တင်ဘာလများတွင် ပုစွန် ၂ကောင်အပါအဝင် ဘူးသွတ်ဆီများ၊ ပုံးဆီများမှာ ဈေးနှုန်းမြင့်တက်ခဲ့သော်လည်း ကရင်ပြည်နယ်၌ စားအုန်းဆီဖြန့်ဖြူးမှုအား ကရင်ပြည်နယ်အစိုးရအဖွဲ့၏လမ်းညွှန်မှုဖြင့် ကရင်ပြည်နယ်ဆီလုပ်ငန်းရှင်များအသင်းက ရည်ညွှန်းဈေးအပေါ် သတ်မှတ်ချက်ဈေးနှုန်းဖြင့် ဖြန့်ဖြူးရောင်းချပေးလျက်ရှိကြောင်းနှင့် ဘားအံမြို့ပေါ်နှင့် မြို့နယ်များတွင် အရောင်းကိုယ်စားလှယ်ဆိုင် ၁၉ဆိုင်ဖွင့်လှစ်ရောင်းချပေးလျက်ရှိသောကြောင့် ယခုကဲ့သို့ ပုစွန် ၂ကောင်အပါအဝင် ဘူးသွတ်ဆီများနှင့်ပုံးဆီများဈေးနှုန်းကျဆင်းခြင်းရကြောင်းသိရသည်။ ပုစွန် ၂‌ကောင်အပါအဝင် ဘူးသွတ်ဆီများ၊ ပုံးဆီများဈေးနှုန်းကျဆင်းရ၍ အရောင်းအဝယ်အေးရခြင်းနှင့်ပတ်သက်၍ ဘားအံမြို့၊ ရေပေါ်ဈေးရှိ ကုန်စုံဆိုင်ပိုင်ရှင် မလဲ့က “သတ်မှတ်ဈေးနဲ့ ပေပါဆီတွေရောင်းပေးနေတော့ ပုစွန် ၂ကောင်ဆီတွေ၊ ပုံးဝါဆီတွေ ဈေးကျတယ်ဆရာရေ၊ အရောင်းအဝယ်ကတော့ ၃ဆလောက်ကျသွားတယ်၊ ခုတော့ အကျဈေးနဲ့ပဲရောင်းနေရတယ်” ဟုပြောပြလာပါသည်။

  စက်တင်ဘာလအတွင်း ရည်ညွှန်းဈေးအပေါ် သတ်မှတ်ချက်အရ  ရောင်းချပေးခဲ့သောစားအုန်းဆီ ၁ပိဿာဈေးနှုန်းမှာ ရည်ညွှန်းဈေးအလိုက် ၄၅၀၀/ကျပ်မှ ၅၁၀၀/ကျပ်ဖြစ်ကြောင်းနှင့် ဘားအံမြို့၊ ရေပေါ်ဈေးတွင် အရောင်းအဝယ်ဖြစ်လျက်ရှိသော ပုစွန် ၂ကောင်အပါအဝင် ဘူးသွတ်ဆီများမှာ ဩဂုတ်လအတွင်း ပုစွန် ၂ကောင်ဆီ ၁လီတာလျှင် လက်လီရောင်းဈေး ၅၈၀၀/ကျပ်ထိရှိခဲ့ရာမှ စက်တင်ဘာလ စတုတ္ထအပတ်တွင် ၁လီတာလျှင် ၄၃၀၀/ကျပ်ဈေးနှုန်းထိလည်းကောင်း၊ ပုံးဝါဆီ ၁၀ပိဿာလျှင် ၈၈၀၀၀/ကျပ်မှ ၇၀၀၀၀ကျပ်ထိလည်းကောင်း ဈေးနှုန်းကျဆင်း၍ အရောင်းအဝယ်အေးလျက်ရှိပြီး ဈေးနှုန်းအကျဘက်သို့ ဦးတည်လျက်ရှိကြောင်းသိရပါသည်။

DOCA(ကရင်)

    ယခုအချိန်သည် ပန်းဂေါ်ဖီပေါ်သော ရာသီမဟုတ်သော်လည်း ပန်းဂေါ်ဖီကို စိုက်ပျိုးရေးသမားများက ရေလောင်းစိုက်ပျိုးကြ၍ ပဲခူးတိုင်း(အနောက်)၊ ပြည်ခရိုင်ရှိဈေးများတွင် ပန်းဂေါ်ဖီများရောင်းချလျက်ရှိပါသည်။ စိုက်ပျိုးသူများအနေဖြင့် ပန်းဂေါ်ဖီများပုံမှန်ပေါ်ချိန်မှာ ဆောင်းရာသီဖြစ်သော်လည်း  ပြည်မြို့နယ်အနီးတဝိုက်ရှိကျေးရွာများဖြစ်သော မှော်ဇာနှင့် တောင်လုံးညို၊ ပုတီးကုန်းမြို့ရှိ ကျေးရွာများတွင် တစ်နိုင်တစ်ပိုင်စိုက်ပျိုးကြောင်းသိရပါသည်။ စိုက်ပျိုးထွက်ရှိသောပန်းဂေါ်ဖီများကို ပြည်မြို့ရှိဈေးကွက်များသို့တင်ပို့ရောင်းချကြောင်းသိရပါသည်။ ရာသီချိန်မဟုတ်သော်လည်း ဈေးကောင်းပေး၍ စားသုံးသူများက ဝယ်ယူစားသုံးကြသဖြင့် ဈေးမြင့်လျက်ရှိပါသည်။ ဈေးကွက်တွင်ရောင်းချသော ပန်းဂေါ်ဖီဈေးနှုန်းများမှာ အပွင့်အသေးတစ်ပွင့်လျှင်  (၇၀၀-၈၀၀) ကျပ်၊ အပွင့်ကြီးတစ်ပွင့်လျှင် (၁၈၀၀-၂၀၀၀) ကျပ်ထိဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်းသိရပါသည်။

DOCA(ပဲခူး)