ပြည်တွင်းကုန်သွယ်မှုသတင်း

   ပြည်ပဲဈေးကွက်အတွင်း ယခုနှစ်ပဲသီးနှံအားလုံးမှာ ဈေးမြင့်တက်လာခဲ့သောကြောင့် မတ်ပဲ၊ ပဲစင်းငုံ၊ ကုလားပဲ စသည့် ပြည်ပဝယ်လိုအားများသော ပဲအားလုံး ဈေးကောင်းရလျက်ရှိခဲ့ကြပါသည်။ အဆိုပါပဲများမှာ ဈေးကောင်းရနေသော်လည်း ပဲတီစိမ်းသီးနှံမှာမူ ယခုနှစ်တွင် ဈေးအေးနေခဲ့ကြောင်းသိရပါသည်။ ပြည်ဈေးကွက်သို့ မိုးပဲတီစိမ်းသစ်များမှာ ဇူလိုင်လမှစ၍ နေ့စဉ် ကုန်းလမ်း၊ ရေလမ်းတို့မှ ဝင်ရောက်လာခဲ့ကြပါသည်။ တစ်ရက်လျှင် အိတ် (၂၀၀/၃၀၀)ကျော်ဝင်ရောက်ခဲ့ပြီး ဝယ်လိုအားအနေဖြင့် မန္တလေးဝယ်လက်က အဓိကထားဝယ်ယူနေသောကြောင့် ဝင်လာသမျှ အရောင်းအဝယ်ဖြစ်ခဲ့ကြပါသည်။ ပဲတီစိမ်းသီးနှံသည် ရှေးကနှစ်များ၌ နှစ်စဉ်လိုလို အခြားပဲများနှင့်ယှဉ်လျှင် ဈေးကောင်းရသည့်သီးနှံဖြစ်ခဲ့သော်လည်း ယခုနှစ်၊ ပဲတီစိမ်းသီးနှံဈေးနှုန်းအနေဖြင့်  မတ်ပဲ၊ ပဲစင်းငုံ၊ ကုလားပဲ သီးနှံများ၏ဈေးအောက်လျော့ကျခဲ့ပြီး တစ်တင်းလျှင် ကျပ် (၂၀၀၀၀)ကျော်မှ (၃)သောင်းကျော်၊ (၄)သောင်းကျပ်အထိဈေးလျော့နည်းနေခဲ့ပါသည်။ ပဲတီစိမ်းသီးနှံ၏ ကာလတူအချိန် နှစ်အလိုက်ဖြစ်ပေါ်ခဲ့သောဈေးနှုန်းများကို အောက်ပါအတိုင်းလေ့လာသိရှိရပါသည်-

စဉ်      ခုနှစ်             ဈေးနှုန်း(အနိမ့်)                  ဈေးနှုန်း(အမြင့်)

၁။      ၂၀၂၀            ၃၃၀၀၀ကျပ်                      ၃၇၀၀၀ကျပ်

၂။       ၂၀၂၁            ၃၃၀၀၀ကျပ်                      ၃၆၀၀၀ကျပ်

၃။      ၂၀၂၂            ၄၅၀၀၀ကျပ်                      ၄၆၀၀၀ကျပ်

၄။      ၂၀၂၃            ၅၄၀၀၀ကျပ်                      ၅၇၀၀၀ကျပ်

      အဆိုပါ ဇယားအရ ပဲတီစိမ်းသီးနှံကို နှစ်အလိုက်ဈေးနှုန်းနှင့်နှိုင်းယှဉ်ကြည့်သည့်အခါ ၂၀၂၀ခုနှစ်နှင့် ၂၀၂၁ခုနှစ်ဈေးနှုန်းမှာ ကွာခြားမှုသိပ်မရှိဘဲ ၂၀၂၂ခုနှစ်မှစ၍ တစ်နှစ်ထက်တစ်နှစ် ဈေးပိုရလာသည်ကိုတွေ့ရသော်လည်း တခြားပဲသီးနှံများမှာ ယခုနှစ်တွင် ယခင်နှစ်များထက် ဈေးနှုန်းများသိသိသာသာပိုမြင့်တက်လာပြီး ဈေးကောင်းရနေသည့်အတွက် ပဲလက်ဝယ်ကျန်ရှိသူတောင်သူများနှင့် လှောင်ပဲသမားတချို့ အကျိုးအမြတ်ရရှိခဲ့ကြသော်လည်း ယခုနှစ်၌ မိုးပဲသစ်ဈေးများ ဈေးအေးနေခဲ့သည့်အတွက် ပဲအထွက်နှုန်းပေါ်မူတည်ကာ အကျိုးအမြတ်မှာ ယခင်နှစ်များအောက်လျော့နည်းခဲ့ပါသည်။ ပြည်ခရိုင်အတွင်း ဆောင်းသီးနှံထက် မိုးသီးနှံကိုသာ အဓိကထားစိုက်ပျိုးပြီး ပြည်၊ ပေါက်ခေါင်း၊ ပန်းတောင်း၊ ရွှေတောင်မြို့နယ်များတွင် စုစုပေါင်းစိုက်ဧက (၄၉၁၄)ဧကခန့်စိုက်ပျိုးခဲ့ကြပါသည်။ ပျမ်းမျှအထွက်နှုန်းအနေဖြင့် တစ်ဧကလျှင် (၁၇)တင်းခန့်ထွက်ရှိသည်ဟုသိရပါသည်။ ထို့ကြောင့် အထွက်နှုန်းအနည်းအများပေါ်မူတည်၍ အကျိုးအမြတ်ရသောကြောင့် စိုက်ပျိုးသူများအနေဖြင့် ယခင်နှစ်များကဲ့သို့ အကျိုးအမြတ်မများခဲ့ကြောင်းသိရပါသည်။

     ပဲတီစိမ်းသီးနှံသည် မတ်ပဲ၊ ပဲစင်းငုံ၊ ကုလားပဲ စသည့်သီးနှံများကဲ့သို့ တစ်နှစ်တာလုံး ဈေးကွက်အတွင်းရောင်းချနေရသည့် ပဲသီးနှံမျိုးမဟုတ်ဘဲ ပဲထွက်ပေါ်ချိန်၊ အထွက်လှိုင်ချိန်များတွင်သာ အရောင်းအဝယ်သွက်နေခဲ့သောသီးနှံဖြစ်ပါသည်။ ပဲတီစိမ်းသီးနှံအား တစ်နှစ်တာလုံး သိုလှောင်ထားရှိမှုသိပ်မရှိဘဲ မျိုးလောက်သာချန်၍ ရောင်းချကြောင်းသိရပါသည်။ ပြည်ဈေးကွက်အတွင်း ဝင်ရောက်လာသောပဲတီစိမ်းသီးနှံများမှာ ပြည်ဒေသအနီးတဝိုက် ပြည်ခရိုင်မှထွက်ရှိသောပဲများအပြင် မကွေးတိုင်းဒေသကြီး၊ မင်းတုန်း၊ ကံမမြို့နယ်များမှ ပဲများလည်းဝင်ရောက်ခဲ့ကြောင်းသိရပါသည်။

DOCA(ပဲခူး)

     ပဲခူးတိုင်းဒေသကြီး ၊  သာယာဝတီခရိုင် ၊ မိုးညိုမြို့နယ်တွင် ယခုနှစ် မိုးနှမ်းစိုက်ဧက (၂၉၅၄၈)  ဧက စိုက်ပျိုးလျက်ရှိပါသည်။ မိုးကြိုနှမ်းများသည် ၇လပိုင်းမှ စတင်ထွက်ရှိပြီး ယခုအချိန်တွင် နှမ်းများလှိုင်လှိုင်ပေါ်လျက်ရှိကာ တောင်သူများအနေဖြင့် ထွက်ရှိလာသောနှမ်းများအား ဝမ်းစာဆီအတွက် အနည်းငယ်ချန်ထားပြီး ကျန်နှမ်းများကို မြို့ပေါ်ပွဲရုံများသို့ တင်ပို့ရောင်းချလျက်ရှိပါကြောင်း သိရှိရပါသည်။

         မြို့ပေါ်ပွဲရုံများကလည်း နှမ်း ၁ တင်း ၁၆ ပိဿာလျှင် နှမ်းအမျိုးအစားလိုက်သော်လည်းကောင်း ၊ အစိုဓာတ်ပေါ်မူတည်၍လည်းကောင်း ၊ ယခုအခါတွင် အနည်ဆုံး ၉၀၀၀၀ ကျပ် အများဆုံး ၁၀၂၀၀၀ ကျပ်ဖြင့် ဝယ်ယူလျက်ရှိရာ တစ်နေ့လျှင် နှမ်းတင်းပေါင်း ၂၀၀ လောက် ဝယ်ယူလျက်ရှိပါသည်။ မိုးညိုမြို့ပွဲရုံများမှ ဝယ်ယူထားသော နှမ်းများအား အောင်လံပွဲရုံများသို့လည်းကောင်း၊ ပြည်မြို့ပွဲရုံများသို့လည်းကောင်း၊ တင်ပို့ရောင်းချခြင်းရှိသလို မန္တလေးဘက်မှ လာရောက်၍ မိုးညိုမြို့နယ်ရှိ ကွင်းအရောက်ဆင်း၍ ဝယ်ယူသောပွဲစားများထံသို့လည်း ပြန်လည်ရောင်းချလျက်ရှိကြောင်း သိရှိပါသည်။

DOCA(ပဲခူး)

  ပြည်ပဲမျိုးစုံဈေးကွက်မှာ ပဲပုတ်သီးနှံသည်လည်း အရောင်းအဝယ်ဖြစ်လျက်ရှိရာ ၂၀၂၃ခုနှစ်၊ စက်တင်ဘာလ (ပထမပတ်) တွင် လက်လီသမားအနည်းငယ်ဖြင့်သာရောင်းဝယ်နေသည့်အတွက် တစ်ရက်လျှင် အိတ် (၂၀/၃၀)ကျော်ပုံမှန်ရောင်းဝယ်မှုဖြစ်ခဲ့ကြပါသည်။ ပြည်ခရိုင်အတွင်း မိုးပဲပုတ်သီးနှံသာစိုက်ပျိုးမှုရှိခဲ့ရာ မြို့နယ်အားလုံးတွင် စိုက်ပျိုးခြင်းမရှိဘဲ ပေါက်ခေါင်းမြို့နယ်နှင့် ပန်းတောင်းမြို့နယ်တို့တွင်သာစိုက်ပျိုးကြသောကြောင့် ဧက(၂၈၀)ကျော်ခန့်သာထွက်ရှိပါသည်။ ပဲပုတ်သီးနှံသည် တခြားပဲများကဲ့သို့ ဈေးနှုန်းအတက်အကျသိပ်မဖြစ်ဘဲ နှစ်စဉ်လိုလို အငြိမ်ဈေးနှုန်းဖြင့် ရောင်းဝယ်ခဲ့ကြသောကြောင့် သီးနှံအမျိုးအစားဖြစ်ပြီး ယခုနှစ်တွင် ပိဿာ(၂၀)ဝင် တစ်တင်းလျှင် (၆၀၀၀၀)ကျပ်ဖြင့် ယခင်လများ၏ဈေးနှုန်းနှင့် ကွာခြားမှုအနည်းငယ်သာဖြစ်ပြီး ရောင်းချနေကြကြောင်းသိရပါသည်။

DOCA(ပဲခူး)

    သစ်တော်သီးဟုဆိုလိုက်သည့်အခါ အညိုရောင်အခွံပေါ်တွင် အစက်အပြောက်လေးများပါရှိပြီး အလယ်ချက်တိုင်တစ်ဝိုက်တွင် အနက်ရောင်အစေ့ရှိပြီး အတွင်းသားမှာ ဖြူဖြူကြွပ်ကြွပ်လေးဖြင့် ချိုချိုချဉ်ချဉ်အရသာရှိပါသည်။ သစ်တော်သီးမှာ မိုးရာသီစာ သစ်သီးဝလံတစ်မျိုးဖြစ်ပါသည်။ မြန်မာပြည်ရာသီဥတုတွင် မိုးလည်ကာလမှစပြီး ဆောင်းဦးရာသီအထိတွေ့ရတတ်ပါသည်။

  အာရှသစ်တော်သီးနှင့် ဥရောပသစ်တော်သီးဟူ၍ (၂)မျိုးရှိပါသည်။ အာရှသစ်တော်သီးမှာ အရွယ်အစားမကြီးဘဲ လုံးဝန်းကာ အပေါ်ယံအခွံတွင် အစက်အပြောက်များပါရှိပါသည်။ ဥရောပသစ်တော်သီးမှာ မှည့်လာသည်နှင့်အမျှ တဖြည်းဖြည်းပျော့ပြောင်းလာပြီး အရည်ရွှမ်းပါသည်။ သစ်တော်သီးကို သားရေစာအချိုပွဲအနေဖြင့် စားသုံးကြပါသည်။ တခြားနိုင်ငံများတွင် အချိုပွဲအဖြစ် စားသောက်ကြသည့်အပြင် စည်သွပ်ဘူးများပြုလုပ်ခြင်း၊ ဖျော်ရည်ပြုလုပ်ခြင်း၊ သစ်သီးခြောက်များပြလုပ်ခြင်းဖြင့်လည်း ထုတ်လုပ်ရောင်းချကြပါသည်။

   သစ်တော်သီးစိုက်ပျိုးရာတွင် အစေ့မှတိုက်ရိုက်မျိုးပွားခြင်းနှင့် ကိုင်းကူး၊ ကိုင်းဆက်ပြု လုပ်ခြင်း၊ အမြစ်ဖြတ်မျိုးပွားခြင်း စသည့်နည်းလမ်းများဖြင့် စိုက်ပျိုးပါသည်။ စိုက်ပျိုးထားသော သစ်တော်သီးပင်အများစုမှာ (၁၀)နှစ်၊ (၁၅)နှစ်ခန့်သက်တမ်းရှိပါသည်။ အပင်ကို စတင်စိုက်ပျိုးသည့် အချိန်မှ (၃)နှစ်ကြာလျှင် အသီးစတင်သီးလာပြီး (၅)နှစ်နှင့် (၇)နှစ်ရောက်မှသာ အသီးများရရှိပါသည်။ မြန်မာနိုင်ငံတွင် စီးပွားဖြစ်စိုက်ပျိုးလျက်ရှိသော သစ်တော်မျိုးများမှာ အစိမ်းမျိုးများနှင့် အညိုမျိုးဟူ၍ (၂)မျိုးရှိပါသည်။ အစိမ်းမျိုးသည် သီးထွက်စော၍ ဇွန်လမှ ဩဂုတ်လအတွင်း ဆွတ်ခူးနိုင်ပါသည်။ သစ်တော်ကို မြန်မာနိုင်ငံတွင် ရှမ်းပြည်နယ်၊ တောင်ကြီး၊ ကလော၊ ကွက်ခိုင်၊ ချင်းပြည်နယ်တောင်ပိုင်း၊ မွန်ပြည်နယ်၊ ကချင်၊ မန္တလေး၊ ပြင်ဦးလွင်နှင့် မိုးကုတ်နယ်များတွင် စိုက်ပျိုးကြပါသည်။ ဈေးကွက်အတွင်း မန္တလေးနှင့်ပြင်ဦးလွင်မြို့များမှာ သစ်တော်သီးများဝင်ရောက်လာပြီး ပြည်မြို့နယ်၊ မြို့မစည်ပင်သာယာဈေးတွင် တစ်ဆင့် ပြန်လည်ရောင်းချရာတွင် သစ်တော်သီးအကြီးတစ်လုံးလျှင် (၂၅၀၀)ကျပ်၊ အလတ်တစ်လုံးလျှင် (၁၅၀၀)ကျပ်၊ အသေးတစ်လုံးလျှင် (၁၂၀၀)ကျပ်ဖြင့် အရောင်းအဝယ်ဖြစ်နေကြောင်းသိရှိရပါသည်။

DOCA(ပဲခူး)

      ပဲခူးတိုင်းဒေသကြီး ၊ သာယာဝတီခရိုင် ၊ လက်ပံတန်းမြို့ဈေးအတွင်း ရောင်းချလျက်ရှိသော ကြက်သွန်နီ လက်လီဈေးနှုန်းများမှာ ဩဂုတ်လပထမပတ်တွင် ကြက်သွန်နီ အကြီးတစ်ပိဿာလျှင် ၂၈၀၀/ ကျပ်၊ (အသေး) တစ်ပိဿာလျှင် ၂၅၀၀/ကျပ် လက်လီဈေးဖြင့် ရောင်းချလျက်ရှိကြောင်း သိရပါသည်။ လက်ကားဈေးနှုန်းအနေဖြင့် အချိန် (၁၀) မှ စတင်၍ အိတ်လုံးဈေး ကြက်သွန်နီ အကြီး တစ်ပိဿာလျှင်၂၅၀၀/ကျပ်၊  ကြက်သွန်နီအလတ် တစ်ပိဿာ လက်ကား ဈေးနှုန်းမှာ ၂၄၀၀/ ကြက်သွန်နီ အသေး လက်ကားဈေးနှုန်း တစ်ပိဿာလျှင်၂၃၀၀/ ကျပ်ဈေးနှုန်းဖြင့် အသီးသီး ရောင်းချ လျှက်ရှိပါသည်။ ယခုလ ဩဂုတ်လ နောက်ဆုံးပတ်တွင် ကြက်သွန်နီ လက်လီ ဈေးနှုန်းများမှာ ကြက်သွန်နီ အကြီး/ အလတ် တစ်ပိဿာလျှင် ၃၈၀၀/၊  အသေး တစ်ပိဿာလျှင် ၃၆၀၀/ကျပ် ၊ လက်ကား အိတ်လုံး ဈေးနှုန်းအနေဖြင့် ကြက်သွန်နီ(အကြီး) တစ်ပိဿာလျှင်၃၅၀၀ /၊အသေး တစ်ပိဿာလျှင် ၃၄၀၀/ကျပ် ပေါက်ဈေးရှိနေပါသဖြင့် ကြက်သွန်နီ ဈေးနှုန်းများ အတက်ဘက်သို့ ဦးတည်နေကြောင်း သိရှိရပါသည်။

     အာလူးဈေးကွက် ရောင်းချမှုအနေဖြင့် အာလူး တစ်ပိသာလျှင် ဩဂုတ်လ ပထမပတ်တွင်  ၃၄၀၀/ ကျပ်မှ ၃၅၀၀/ ကျပ်ဈေးရှိခဲ့သော်လည်း ယခုဩဂုတ်လ နောက်ဆုံးပတ်အတွင်းမှာတော့ အာလူးဈေးမှာ ၃၀၀၀/ မှ ၃၁၀၀ ကျပ်ပေါက်ဈေးဖြင့်အရောင်းအဝယ်ရှိနေသဖြင့် အကျဈေးဘက်သို့ ရောက်ရှိပြီး ရောင်းချလျက်ရှိကြောင်း သိရှိရပါသည်။

DOCA(ပဲခူး)