ပြည်တွင်းကုန်သွယ်မှုသတင်း

         ကုန်ဈေးနှုန်းမြင့်တက်မှုကြောင့် စားသုံးသူပြည်သူများ ဝန်ထုပ်ဝန်ပိုးမဖြစ်စေရေးနှင့် ဖြစ်သင့်ဖြစ်ထိုက်သ့ ဈေးနှုန်းအတိုင်း ဝယ်ယူရရှိနိုင်ရေးအတွက် ရောင်းသူမှဝယ်သူသို့ တိုက်ရိုက်ရောင်းချခြင်းဖြင့် ကရင်ပြည်နယ်အတွင်း ကုန်ဈေးနှုန်း တည်ငြိမ်ရေးနှင့်ကျဆင်းနိုင်စေရန် ကရင်ပြည်နယ်ကုန်ဈေးနှုန်း တည်ငြိမ်ရေးနှင့်ကျဆင်းရေး ကော်မတီက ဘားအံမြို့ ကန်သာယာတွင် စနေနေ့အခွန်လွတ်ဈေးအား အပတ်စဉ် ဖွင့်လှစ်ရောင်းချပေးလျက် ရှိကြောင်း သိရသည်။

          ကန်သာယာ စနေနေ့အခွန်လွတ်ဈေးတွင် ကိုယ်တိုင်စိုက်ပျိုးထုတ်လုပ်သူများနှင့် သား/ငါး အရောင်းဒိုင်များမှ တိုက်ရိုက်ရောင်းချပေးခြင်းဖြစ်ပြီး အရောင်းအဝယ်ဖြစ်လျက်ရှိသော ဈေးနှုန်းများမှာ ဝက်သား ၁ ပိဿာ ၁၃၀၀၀ ကျပ်၊ အမဲသား ၁ ပိဿာ၁၄၀၀၀ကျပ်၊ ဆိတ်သား ၁ ပိဿာ ၁၇၀၀၀ ကျပ်၊ ကြက်သား(အိမ်ကြက်)၁၅၀၀၀ ကျပ်၊ မွေးမြူရေးငါးကြင်း ၁ ပိဿာ ၇၀၀၀ ကျပ်၊ တီလားဗီးယား ၁ ပိဿာ ၆၀၀၀ကျပ်၊ ငါးမဲလုံး ၁ ပိဿာ ၆၀၀၀ ကျပ်၊ ယိုးဒယား ငါးခုံးမ ၁ ပိဿာ ၆၀၀၀ကျပ်၊ ငါးခူ ၁ ပိဿာ ၆၃၀၀ ကျပ်၊ ငါးမုတ် ၁ ပိဿာ ၅၀၀၀ ကျပ်၊ ငါတန် ၁ ပိဿာ ၄၆၀၀ ကျပ်၊ ပလာတူး ၁ပိဿာ ၆၀၀၀ကျပ်၊ ဘဲဥ ၁ လုံး ၃၅၀ကျပ်၊ ကြက်ဥ ၁ လုံး ၂၅၀ ကျပ်၊ ကန်စွန်းရွက်၁ စီး ၃၀၀ကျပ်၊ ချဉ်ပေါင်ရွက် ၁ စီး ၃၀၀ ကျပ်၊ ဂေါ်ဖီထုပ် ၁ ထုပ် ၇၀၀ ကျပ်၊ ပန်းဂေါ်ဖီ ၁ ပွင့် ၈၀၀ ကျပ် ၊ သခွားသီး ၁ ပိဿာ ၂၀၀၀ ကျပ်၊ ခရမ်းချဉ် ၁ ပိဿာ ၂၀၀၀ ကျပ်၊ ကြက်သွန်နီ ၁ ပိဿာ ၃၀၀၀ ကျပ် စသည်ဖြင့် ဈေးနှုန်း သက်သာစွာဖြင့် ရောင်းချပေးလျက် ရှိကြောင်းသိရသည်။

          အခွန်လွတ်ဈေးများတွင် ရောင်းချနေသော ဈေးနှုန်းများမှာဈေးနှုန်းချိုသာပြီး စားသုံးသူပြည်သူများအနေဖြင့်လည်းဈေးနှုန်းသက်သာစွာဖြင့် တိုက်ရိုက်ဝယ်ယူနိုင်သောကြောင့် ရောင်းသူဝယ်သူများဖြင့် စည်ကားလျက်ရှိကြောင်း သတင်းရရှိပါသည်။

DOCA(ကရင်)

   မြန်မာနိုင်ငံတစ်ဝန်း တိုင်းဒေသကြီးနှင့် ပြည်နယ်များအလိုက် ရာသီဥတု၊ ရေမြေသဘာဝနှင့်ကိုက်ညီကောင်းမွန်ပြီး ဈေးကွက်အတွင်း ရောင်းချနိုင်သောသစ်သီးဝလံများကို ဒေသအလိုက် စိုက်ပျိုးကြခြင်းဖြင့် ဝင်ငွေရရှိနိုင်ပါသည်။ သစ်သီးဝလံများကို လူအများအပြားစားသုံးကြခြင်းမှာလည်း ဓလေ့တစ်ခုပင်ဖြစ်နေပါသည်။ အဓိကစားသုံးသည့် သစ်သီးဝလံများထဲတွင်  စောင်းလျားသီးလည်းတစ်ခုအပါဝင်ဖြစ်သည်။ စောင်းလျားသီးပင်သည် နေရာဒေသမရွေး၊ မြေအမျိုးအစားမရွေး စိုက်ပျိုးဖြစ်ထွန်းပါသည်။ အထူးသဖြင့် မြေဩဇာကောင်းမွန်သောနုန်းမြေများတွင် အပင်ပိုမိုကြီးထွားပါသည်။ စောင်းလျားပင်သည် စိုက်ပျိူးပြီး (၃)နှစ်သားမှ (၄)နှစ်သားအရွယ်တွင် ပန်းများပွင့်ပြီး အသီးစတင်သီးလာပါသည်။ စောင်းလျားပင်သည် တစ်နှစ်ပတ်လုံးတွင် (၂)ကြိမ်ခန့်ပန်းပွင့်ကာ နွေမိုးဆောင်း (၃)ရာသီလုံး မပြတ်ခူးဆွတ်ရပါသည်။ အသီးသီးရာတွင် အသီးအနုမှ အသီးရင့်သည်အထိ ရက်(၆၀)ခန့်ကြာပါသည်။ စောင်းလျားသီးသည် မမှည့်သေးခင်တွင် အစိမ်းရောင်ရှိပြီး ချဉ်ဖန်ဖန်အရသာရှိပါသည်။ အသီးများမှည့်လာလျှင် အဝါရောင်သန်းပြီး အရည်ရွှမ်းလာပါသည်။ အရသာမှာ ချဉ်သောအရသာနှင့် ချိုသောအရသာဟူ၍ (၂)မျိုးရှိပါသည်။ ဝယ်လိုအားအနေဖြင့် စောင်လျားသီးပင်များအား ဈေးကွက်အတွင်းသာမက ကျေးရွာများတွင်လည်း တစ်ပင်လုံးပြတ် အသီးအကြီး၊ အသေး၊ သောင်းပြောင်းအရောရာ လာရောက်ဝယ်ယူကြပါသည်။

    စောင်းလျားပင်များကို ရွှေတောင်မြို့နယ်ဒေသတဝိုက်ရှိ ကျေးလက်ဒေသများတွင်လည်းကောင်း၊ ပြည်မြို့နယ်နှင့် အနီးတဝိုက်ရှိသော ကျေးလက်ဒေသများတွင်လည်း အိမ်ခြံမြေများအတွင်း တစ်နိုင်တစ်ပိုင်စိုက်ပျိုးကြကြောင်းသိရပါသည်။ စောင်းလျားသီးအမှည့်သည် ကျန်းမာရေးဓာတ်စာအဖြစ် ဆေးဖက်ဝင်အသီးဖြစ်သောကြောင့် ယခုအခါ ရာသီစာအဖြစ် ငါးပြေမငါးများဖြင့် တွဲဖက်၍ချက်ပြုတ်စားသောက်ခြင်းအပြင် ဖျော်ရည်အဖြစ်လည်း သောက်သုံးကြပါသည်။ စောင်းလျားသီးများအား ဈေးကွက်အတွင်း ရောင်းချရာတွင် ယခင်နှစ်များမှာ တစ်ပိဿာလျှင် (၃၀၀-၅၀၀) ကျပ်ခန့်ရှိသော်လည်း၊ ၂၀၂၃နှစ်တွင် စောင်းလျားသီးတစ်ပိဿာလျှင် (၁၀၀၀-၁၅၀၀)ကျပ်နှုန်းဖြင့် ပြည်မြို့နှင့် ရွှေတောင်မြို့ရှိ ဈေးကွက်အတွင်း အရောင်းအဝယ်ဖြစ်နေကြောင်းသိရပါသည်။

DOCA(ပဲခူး)

   ပြည်ကုန်စည်ဒိုင်တွင် ပဲမျိုးစုံရောင်းဝယ်လျက်ရှိရာ ဩဂုတ်လ (ဒုတိယပတ်)တွင် ဖြစ်ပေါ်နေသောပဲဈေးနှုန်းများကို ယခင်နှစ်နှင့် ယခုနှစ်ဈေးနှုန်းတို့ကို နှိုင်းယှဉ်ကြည့်ခြင်းဖြင့် သိရှိရပါသည်။

မတ်ပဲ

    ပြည်ကုန်စည်ဒိုင်တွင် ၂၀၂၃ခုနှစ်၊ ဩဂုတ်လ (ဒုတိယပတ်) တွင် မတ်ပဲတစ်တင်းလျှင် (၇၉၅၀၀) ကျပ်ဖြင့် ရန်ကုန်အဝယ်ရှိခဲ့ပါသည်။ ယခင်နှစ် (ဒုတိယပတ်) တွင် မတ်ပဲတစ်တင်းလျှင် (၆၁၀၀၀)ကျပ်ဖြင့် အရောင်းအဝယ်ဖြစ်ပြီး  (၁၈၅၀၀)ကျပ်ခန့်ဈေးပိုလာခဲ့ပါသည်။

ပဲတီစိမ်း

    ယခင်နှစ်၊ ဩဂုတ်လ (ဒုတိယပတ်) တွင် ပဲတီစိမ်းတစ်တင်းလျှင် (၄၈၀၀၀)ကျပ်ဖြင့် မန္တလေးအဝယ်ရှိခဲ့ပါသည်။ ယခုနှစ်တွင် ပဲတီစိမ်းတစ်တင်းလျှင် (၅၅၀၀၀)ကျပ်ဖြင့် မန္တလေးသို့ တစ်နေ့လျှင် အိတ်(၃၀၀)ခန့်တင်ပို့ပါသည်။ ယခင်နှစ်၏ ပဲတီစိမ်းဈေးထက် ယခုနှစ်တွင်  ဖြစ်ပေါ်နေသောပဲဈေးမှာ (၇၀၀၀) ကျပ်ခန့်ဈေးပိုခဲ့ပါသည်။

ပဲစင်းငုံ

    ယခုနှစ်၊ ဩဂုတ်လ (တတိယပတ်) တွင် ပဲစင်းငုံတစ်တင်းကို (၉၉၀၀၀)ကျပ်ဖြင့် ရန်ကုန်အဝယ်တစ်ရက်လျှင် အိတ် (၂၀၀)ခန့်တင်ပို့ပါသည်။ ယခင်နှစ်၊ ဩဂုတ်လ (ဒုတိယပတ်) တွင် ပဲစင်းငုံတစ်တင်းကို (၆၂၀၀၀)ကျပ်ဖြင့် ရန်ကုန်အဝယ်ရှိပြီး ပဲတစ်တင်းလျှင် (၃၇၀၀၀) ကျပ်ခန့်ဈေးပိုရခဲ့ပါသည်။

ကုလားပဲ

    ယခင်နှစ်၊ ဩဂုတ်လ (ဒုတိယပတ်) တွင် ကုလားပဲ (HL) တစ်တင်းကို (၆၅၀၀၀)ကျပ်၊ မြကြေးမှုံတစ်တင်းကို (၆၅၀၀၀)ကျပ်ဖြင့် မြို့တွင်းခွဲစက်သမားများ တစ်ရက်လျှင် အိတ် (၃၀၀)ခန့်အဝယ်ရှိခဲ့ပါသည်။ ယခုနှစ်၊ ဩဂုတ်လ (ဒုတိယပတ်) တွင် ကုလားပဲ (HL) တစ်တင်းလျှင် (၉၄၀၀၀)ကျပ်၊ မြကြေးမှုံတစ်တင်းလျှင် (၉၄၀၀၀)ကျပ်ဖြင့် မြို့တွင်းအဝယ်ရှိခဲ့ပါသည်။ ယခင်နှစ်ဈေးနှင့်နှိုင်းယှဉ်ကြည့်လျှင် ယခုနှစ်၌ ပဲတစ်တင်းလျှင် (၂၉၀၀၀)ကျပ်ခန့်ဈေးပိုရခဲ့ပါသည်။

ပဲကြီး

    ယခုနှစ်၊ ဩဂုတ်လ (ဒုတိပတ်) တွင် ပဲကြီး (ကုန်းပဲ)တစ်တင်းကို (၉၈၀၀၀)ကျပ်၊ ပဲကြီး (ရွှေကျွန်း )တစ်တင်းကို (၁၀၀၀၀၀)ကျပ်ဖြင့် မြို့တွင်းပဲကြော်သမားများ တစ်ရက်လျှင် အိတ် (၃၀၀)ခန့်အဝယ်ရှိခဲ့ပါသည်။ ယခင်နှစ်၊ ဩဂုတ်လ (ဒုတိယပတ်) တွင် ပဲကြီး (ကမ်းနား) တစ်တင်းလျှင် (၇၀၀၀၀-၇၂၀၀၀)ကျပ်ဖြင့် မြို့တွင်းအဝယ်နှင့် တစ်ခါတရံ၌ ရန်ကုန်အဝယ်ရှိခဲ့ပါသည်။

စားတော်ပဲ

    ယခင်နှစ်၊ ဩဂုတ်လ (ဒုတိယပတ်) တွင် စားတော်ပဲ(ကျွန်း) တစ်တင်းကို (၁၁၀၀၀၀) ကျပ်ဖြင့် မြို့တွင်းအဝယ်တစ်ရက်လျှင် (၄/၅)အိတ်ခန့်အဝယ်ရှိခဲ့ပါသည်။ ယခုနှစ်၊ ဩဂုတ်လ ဒုတိယပတ်တွင် စားတော်ပဲ (ကျွန်း)တစ်တင်းကို (၁၃၆၀၀၀)ကျပ်ဖြင့် မြို့တွင်းအဝယ်ရှိခဲ့ပြီး ပဲတစ်တင်းလျှင် (၂၆၀၀၀)ကျပ်ခန့်ဈေးပိုရခဲ့ပါသည်။

ဘိုကိတ်ပဲ

    ယခင်နှစ်၊ ဩဂုတ်လ (ဒုတိယပတ်) တွင် ဘိုကိတ်တစ်တင်းကို (၄၃၀၀၀)ကျပ်ဖြင့် မြို့တွင်း အဝယ်တစ်နေ့လျှင် (၁၄/၁၅)အိတ်ခန့်အဝယ်ရှိခဲ့ပါသည်။ ယခုနှစ်တွင် ဘိုကိတ်တစ်တင်းလျှင် (၆၉၀၀၀)ကျပ်ဖြင့် မြို့တွင်းအဝယ် (၁၄/၁၅)အိတ်ခန့်အဝယ်ရှိပြီး တစ်ခါတရံ၌ ရန်ကုန်အဝယ် (၅၀/၁၀၀)အိတ်ခန့်ရှိခဲ့ပါသည်။

    ပြည်ကုန်စည်ဒိုင်တွင် ပဲမျိုးစုံဈေးနှုန်းများကိုကြည့်လျှင် ယခင်နှစ်၏ ပဲဈေးထက် ယခုနှစ်ပဲဈေးမှာ ပိုမိုကောင်းမွန်ကြောင်းသိရှိရပါသည်။

DOCA(ပဲခူး)

    ပြည်ဈေးကွက်ရှိ ကြက်သွန်ဖြူ(ရှမ်းစ)များမှာ ၂၀၂၃ခုနှစ်၊ ဩဂုတ်လ (ပထမပတ်) တွင် လက်လီတစ်ပိဿာလျှင် (၉၀၀၀)ကျပ်၊ လက်ကား (ပွဲရုံဈေး) တစ်ပိဿာလျှင် ၈၅၀၀ကျပ်ဈေးရှိခဲ့ပြီး ဒုတိယအပတ်တွင် လက်လီတစ်ပိဿာလျှင် (၉၈၀၀)ကျပ်၊ လက်ကား(ပွဲရုံဈေး) တစ်ပိဿာလျှင် (၉၅၀၀)ကျပ်ဖြစ်ခဲ့ပြီး ဩဂုတ်လ (စတုတ္ထပတ်) တွင် လက်လီတစ်ပိဿာလျှင် (၁၀၅၀၀)ကျပ်၊ လက်ကား(ပွဲရုံဈေး)တစ်ပိဿာလျှင် (၉၈၀၀)ကျပ်အထိ တဖြည်းဖြည်းမြင့်တက်လာသည်ကိုတွေ့ရပါသည်။ ကြက်သွန်ဖြူ (ကြူကုတ်) မှာလည်း ဩဂုတ်လ (ပထမပတ်) အတွင်း လက်လီဈေးတစ်ပိဿာလျှင် (၇၅၀၀) ကျပ်၊ လက်ကား(ပွဲရုံဈေး) တစ်ပိဿာလျှင် ၇၀၀ကျပ်ဈေးရှိခဲ့ပြီး ဒုတိယအပတ်တွင်မူ လက်လီတစ်ပိဿာလျှင် (၉၅၀၀) ကျပ်၊ လက်ကား (ပွဲရုံဈေး) တစ်ပိဿာလျှင် ၉၀၀၀ကျပ်ဖြစ်ခဲ့ပြီး၊ ၂၀၂၃ခုနှစ်၊ ဩဂုတ်လ (စတုတ္ထပတ်) အထိ လက်လီတစ်ပိဿာလျှင် (၉၅၀၀)ကျပ်၊ လက်ကား (၉၀၀၀)ကျပ်ဖြင့် ဈေးငြိမ်နေပါသည်။

   ကြက်သွန်ဖြူဈေးမြင့်တက်လာရခြင်းမှာ ယခင်ကာလများထက် အဝင်နည်းနေပြီး ပြည်ခရိုင်အတွင်း ပစ္စည်းလက်ကျန်နည်းနေသောကြောင့် ဈေးအနည်းငယ်မြင့်တက်လာရခြင်းဖြစ် ကြောင်းသိရှိရပါသည်။

    အာလူးသီးနှံအနေဖြင့် ဇူလိုင်လမှစ၍ ဩဂုတ်လ (နောက်ဆုံးပတ်) ထိ လက်လီတစ်ပိဿာလျှင် (၃၅၀၀)ကျပ်၊ လက်ကားတစ်ပိဿာလျှင် (၃၃၀၀)ကျပ်ဖြင့် ဈေးငြိမ်နေပါသည်။ ရှမ်းပြည်နယ်နှင့် မန္တလေးမှ အဝင်နည်းနေသော်လည်း ပစ္စည်းပြတ်လပ်မှုမရှိသောကြောင့် ဈေးငြိမ်နေရခြင်းဖြစ်ကြောင်းသိရပါသည်။

    ပြည်ခရိုင်အတွင်းရှိ ကြက်သွန်ဖြူသီးနှံနှင့် အာလူးသီးနှံတို့အား တချို့လုပ်ငန်းရှင်များနှင့် အိမ်တွင်းစားသုံးရန် အနည်းငယ်ဝယ်လိုသူများအနေဖြင့် ဈေးများသို့သွားရောက်ဝယ်ယူခြင်းမျိုးမရှိတော့ဘဲ အချိန်ကုန်သက်သာစေပြီး ဈေးကွာဟမှုမရှိသော Online ရောင်းချသူများထံမှ ဝယ်ယူသုံးစွဲလျက်ရှိကြောင်းသိရှိရပါသည်။

DOCA(ပဲခူး)

      ၁၃.၉.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။