ပြည်တွင်းကုန်သွယ်မှုသတင်း

    ပြည်ခရိုင်အတွင်းမှထွက်ရှိသော နှမ်းသီးနှံကို မြို့တွင်း၌ စားသုံးသည့်အပြင် အညာဒေသများဖြစ်သော အောင်လံ၊ မကွေးနှင့် မန္တလေးသို့လည်းတင်ပို့ရောင်းချကြပါသည်။ ပြည်ဒေသရှိ ဈေးကွက်များ၊ ပွဲရုံများသို့လည်း ဧရာဝတီတိုင်းဖြစ်သော မြန်အောင်၊ ကြံခင်းနှင့် ကံမဘက်တို့မှ တင်သွင်းကြပြီး နှမ်းသီးနှံအထွက်လှိုင်ချိန်တွင် တစ်နေ့လျှင် အိတ် (၁၀၀၀)ကျော်တင်ပို့ကြပြီး နှမ်းများရှားသွားချိန်၌ နေ့စဉ်မဟုတ်ဘဲ ရက်ခြားတင်ပို့ပြီး တစ်ခါတင်ပို့လျှင် အိတ် (၅၀၀)လောက် သာတင်ပို့နိုင်ကြပါသည်။ နှမ်းဈေးများအနေဖြင့် ၂၀၂၃ခုနှစ်၊ ဩဂုတ်လ (တတိယပတ်) တွင် နှမ်းနီ (၃)တင်းဝင် တစ်အိတ်လျှင် (၃၂၀၀၀၀)ကျပ်၊ နှမ်းနက်(၃)တင်းဝင် တစ်အိတ်လျှင် (၃၂၀၀၀၀)ကျပ် နှင့် စမုံနက်နှမ်း (၃)တင်းဝင် တစ်အိတ်လျှင် (၃၅၀၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိပါသည်။ ယခင်ဩဂုတ်လ (ပထမပတ်) တွင် နှမ်းနီတစ်တင်းလျှင် (၃၀၀၀၀၀)ကျပ်ဈေးရှိခဲ့သဖြင့် ယခုအပတ်တွင် (၂၀၀၀၀)ကျပ်ခန့်ဈေးမြင့်တက်လာခဲ့ပါသည်။ ပြည်ခရိုင်တွင် နှမ်းနီစိုက်ဧကနည်းပြီး အခြားတိုင်းများမှဝယ်ယူ၍ တစ်ဆင့်ပြန်လည်ရောင်းချရသဖြင့် ဈေးအနည်းငယ်မြင့်တက်ခဲ့ပါသည်။ နှမ်းနက်နှင့် စမုံနက်နှမ်းဈေးမှာ ယခင်ဩဂုတ်လ (ပထမပတ်) အတိုင်း ဈေးငြိမ်နေခဲ့ပါသည်။

      ပြည်ခရိုင်အနေဖြင့် နှမ်းသီးနှံကို ဒေသတွင်းဆီဖူလှုံမှုရှိစေရန် စိုက်ပျိုးသည့်အပြင် ပိုလျှံသည့်နှမ်းကိုပါ ပြည်ပသို့တင်ပို့နိုင်ရန်အတွက် အရည်သွေးကောင်းပြီး ဆီထွက်နှုန်းကောင်းသည့် မျိုးကောင်းမျိုးသန့်တို့ကိုရွေးချယ်၍ စိုက်ပျိုးနိုင်မည်ဆိုပါက ပြည်ပဝင်ငွေများရရှိနိုင်မည်ဖြစ်ကြောင်း လေ့လာသုံးသပ်တင်ပြလိုက်ရပါသည်။

DOCA(ပဲခူး)

    ပိန္နဲသီးကို အချိုပွဲသစ်သီးအဖြစ် စားသုံးခြင်းအပြင် အသီးနုနုကို အကွင်းလေးများလှီး၍ ပြုတ်ကာ ငပိရည်နှင့်တို့စားခြင်း၊ ဟင်းရည်ချက်စားခြင်း (သို့မဟုတ်) အသားဟင်းတစ်ခုခုနှင့် ဆီပြန်ချက်စားခြင်းများလည်းပြုလုပ်ကြပါသည်။ ပိန္နဲသီးအစိမ်းပေါ်ခါစတွင် အကွင်းတစ်ကွင်းလျှင် (၃၀၀-၅၀၀)ကျပ်အထိဈေးရှိပါသည်။ ပိန္နဲသီးသည် အသားကိုသာမက အစေ့ကိုပါ ပြုတ်စား၊ ဖုတ်စား၍ရသောအသီးဖြစ်ပါသည်။

   ပိန္နဲသီးထဲတွင် အသီးအနှံမှရရှိသော ဖရက်တို့စ်နှင့် သဘာဝသကြားဓာတ်များပါရှိသောကြောင့် ပိန္နဲသီးစားပြီးသည်နှင့်တပြိုင်နက် သိသိသာသာခွန်အားတိုးပွားစေနိုင်ပါသည်။ ပိန္နဲသီးတွင် ပါဝင်သောအမျှင်ဓာတ်သည် ဝမ်းချုပ်ခြင်းကိုကင်းဝေးစေပြီး ဝမ်းမှန်စေသောကြောင့် အူမကြီးကင်ဆာဖြစ်ပွားမှုနှုန်းကိုလျော့ကျစေပါသည်။ ပိန္နဲသီးစေ့ကို ပြုတ်၍စားပါက ပရိုတင်း၊ ပိုတက်စီယမ်၊ ကယ်လ်စီယမ်နှင့် သံဓာတ်အာဟာရများအား အသီးစားခြင်းထက် ပိုမိုရရှိနိုင်ပါသည်။ ပိန္နဲသီးကို အစာအိမ်အခံရှိသူများအနေဖြင့်လည်း အများကြီးမစားသင့်ပါ။ ပိန္နဲသီးတွင် အိမ်မာနှင့် အိမ်ပျော့ဟူ၍ နှစ်မျိုးရှိရာ အိမ်မာသီး(အမှည့်မှာ) စားသုံးသူများ၍ ဈေးကောင်းပြီး အိမ်ပျော့ (အမှည့်)မှာ စားသုံးသူနည်း၍ အိမ်မာသီးကဲ့သို့ ဈေးကောင်းမရရှိပါ။ ပိန္နဲသီးစိုက်ပျိုးသူများအနေဖြင့်လည်း အိမ်မာမျိုးကိုစိုက်ပျိုးကြပါသည်။

    ပြည်ဈေးကွက်တွင် ရောင်းချလျက်ရှိသော ပိန္နဲသီးဈေးနှုန်းများအနေဖြင့် အလုံးကြီးတစ်လုံးလျှင် (၃၅၀၀)ကျပ်ဖြစ်ပြီး (၁၀)လုံးဈေးမှာ (၃၀၀၀)ကျပ်ဖြင့် ခြံထွက်အသီးများရောင်းချနေကြပြီး ယိုးဒယားပိန္နဲသီးအကြွပ်သီးတစ်လုံးလျှင် (၅၅၀၀-၈၀၀၀-၁၀၀၀၀-၁၅၀၀၀) ကျပ် စသည်ဖြင့် အကြီးအသေးပေါ်မူတည်ပြီး ရောင်းချလျက်ရှိကြောင်းသိရပါသည်။

DOCA(ပဲခူး)

     စစ်ကိုင်းတိုင်းဒေသကြီး မုံရွာမြို့ရှိ ဈေးများတွင် ယခုရက်သတ္တပတ်အတွင်း ‌ရွှေဘိုပေါ်ဆန်း (တစ်အိတ်)လျှင် ၁၂၅၀၀၀ကျပ်၊  ဧရာမင်း(ဆန်)(တစ်အိတ်)လျှင် ၁၃၈၀၀၀၀ ကျပ်၊ ဧည့်မထဆန် (တစ်အိတ်)လျှင် ၁၂၀၀၀၀ ကျပ်၊ ပဲဆီ(တစ်ပိဿာ)လျှင် ၁၄၀၀၀-၁၄၅၀၀ ကျပ်၊ နှမ်းဆီ (တစ်ပိဿာ) လျှင် ၁၃၅၀၀ ကျပ်၊ နေကြာဆီ(တစ်ပိဿာ)လျှင်၁၃၅၀၀ကျပ်၊ စားအုန်းဆီ (တစ်ပိဿာ) လျှင် ၄၆၀၀ မှ ၄၇၀၀ကျပ်၊ ဆား(တစ်ပိဿာ)လျှင် ၇၀၀ မှ ၈၀၀ ကျပ်၊ ငရုတ်ခြောက် (တစ်ပိဿာ) ၁၈၀၀၀ မှ ၁၉၀၀၀ ကျပ်၊ ကြက်သွန်နီ (တစ်ပိဿာ) ၃၄၀၀ မှ ၃၅၀၀ ကျပ်၊ ကြက်သွန်ဖြူ (ရှမ်းစ) (တစ်ပိဿာ) ၈၀၀၀ မှ ၈၅၀၀ ကျပ်၊ ကြက်သွန်ဖြူ (ကြူကုတ်) (တစ်ပိဿာ) ၉၀၀၀ မှ ၉၅၀၀ ကျပ်၊ အာလူး (တစ်ပိဿာ) ၂၈၀၀ မှ ၃၀၀၀ ကျပ်၊ မန်ကျည်းသီးမှည့် (တစ်ပိဿာ) လျှင် ၃၈၀၀ မှ ၄၀၀၀ ကျပ်၊ နနွင်းတက် (တစ်ပိဿာ) လျှင် ၅၈၀၀ မှ ၆၀၀၀ ကျပ်၊ ခရမ်းချဉ်သီး (တစ်ပိဿာ) ၂၂၀၀ကျပ်၊ ဂေါ်ဖီထုပ်(တစ်ထုပ်)၁၀၀၀ကျပ်၊ ပဲသီး(ပဲထောင့်ရှည်)(တစ်စည်း) ၇၀၀ကျပ်၊ ကြက်သား (တစ်ပိဿာ) လျှင် ၁၀၀၀၀ မှ ၁၂၀၀၀ ကျပ်၊ ဝက်သား (တစ်ပိဿာ)လျှင် ၁၈၀၀၀ မှ ၂၀၀၀၀ ကျပ်၊ အမဲသား (တစ်ပိဿာ) လျှင်၁၆၀၀၀ မှ ၁၇၀၀၀ကျပ်၊ ဆိတ်သား(တစ်ပိဿာ)လျှင် ၂၄၀၀၀ မှ ၂၆၀၀၀ကျပ်၊ ငါးမြစ်ချင်း(တစ်ပိဿာ) လျှင် ၇၅၀၀ မှ ၈၀၀၀ကျပ်၊ ကြက်ဥ (၁)လုံးလျှင် ၂၆၀ ကျပ်၊ ဘဲဥ (၁)လုံး လျှင် ၄၀၀ ကျပ်၊ ဖရဲသီး (ကျောက်စိမ်း) (၁)လုံးလျှင် ၁၅၀၀ မှ ၂၀၀၀ ကျပ်၊ ဖရဲသီး (၂၁၁) (၁)လုံး လျှင် ၄၀၀၀ ကျပ်အတွင်း အသီသီး ဈေးရှိကြောင်း သိရသည်။

     ယခင်ပတ်နှင့် နှိုင်းယှဉ်ပါက အခြေခံစားကုန်ဖြစ်သော ခရမ်းချဉ်သီးဈေးနှုန်းများ အနည်းငယ်ကျဆင်းနေပါကြောင်း၊ အာလူးဈေးနှုန်းမြင့်တက်ရခြင်းမှာ အာလူးကို စစ်ကိုင်းတိုင်းဒေသကြီးတွင် အနည်းငယ်သာစိုက်ပျိုးထုတ်လုပ်မှုရှိပြီး ရှမ်း(တောင်)မှ ဝယ်ယူရောင်းချရခြင်းကြောင့် ဈေးနှုန်းအနည်းငယ်မြင့်တက်ရသော်လည်း ဈေးကွက်အတွင်း ပစ္စည်းပြတ်လပ်မှုမရှိကြောင်း၊ စားအုန်းဆီဈေးနှုန်းများ ရည်ညွှန်းဈေးပေါ်မူတည်၍ ဈေးနှုန်းအပြောင်းအလဲရှိပါကြောင်း ချင်းတွင်းရတနာဈေးရှိ လက်လီလက်ကား ရောင်းဝယ်ဖောက်ကား ရောင်းချနေသော ကုန်သည်များထံမှ သိရှိရသည်။  

DOCA(စစ်ကိုင်း)

   ပြည်ခရိုင်၊ ပြည်မြို့နယ်အတွင်း မိုးဦးကျကာလတွင် ဒန့်ကျွဲပင်လေးများစတင်ပေါက်ကြပါသည်။ ဒန့်ကျွဲသီးလေးများကိုလှော်၍ထောင်းပြီး နိုဆီနှင့်ဖျော်သောက်လျှင် ကော်ဖီအရသာရှိပါသည်။ အလေ့ကျပေါက်သော ဒန့်ကျွဲပင်လေးများကို မိုးကျလက်ဖက်ပင်ဟုလည်းခေါ်ဆိုပါသည်။ မိုးကျလက်ဖက်ပင်လေးများကို ဒင့်ဂျိုးပင်ဟူလည်းခေါ်ဆိုကြပါသည်။

     အရွက်ကလေးများကို ပြုတ်၍ပါးပါးလှီးပြီး သုပ်စားပါက နှလုံးသွေးကြောကျဉ်းခြင်းနှင့် နှလုံးရောဂါ၊ စားမဝင်အိပ်မပျော်ရောဂါများသက်သာစေပါသည်။ ပြုတ်၍ တို့စရာအဖြစ်လည်း ားနိုင်ပါသည်။ အစေ့ကိုပြာချ၍ လိမ်းပါက ဝဲနှင်းခူနာရောဂါများပျောက်ကင်းစေပါသည်။ အရွက်ကို အခြောက်ခံ၍ လက်ဖက်ခြောက်အဖြစ်လည်းသောက်သုံးနိုင်ပါသည်။ အနာရှိ၍ ညှော်မိလျှင် ဒန့်ကျွဲမြစ်ကိုသွေးလိမ်းပါက ပျောက်ကင်းစေပါသည်။

    မိုးကျလက်ဖက်ရွက်လေးများကိုပြုတ်၍ လက်ဖက်ကဲ့သို့ နှမ်း၊ ကြက်သွန်ကြော်နှင့်သုပ်စားလျှင် လွန်စွာစားကောင်းပါသည်။ အိပ်မပျော်ခြင်း၊ သွေးလေခြောက်ခြားခြင်း၊ စိတ်မကြည်ခြင်း၊ နှလုံးခုန်ရင်တုန်မောပန်းခြင်း၊ ဆီးဝမ်းမညီညွတ်ခြင်းတို့အတွက် သုံးခွက်တစ်ခွက်တင်ကြိုပြီး သကြားထည့်၍သောက်သုံးနိုင်ပါသည်။

     အကုန်အကျလည်းသက်သာသည့်အပြင် ဆေးဖက်လည်းအလွန်ဝင်သော မိုးကျလက်ဖက်များကို စားသုံးသင့်ကြောင်း တင်ပြလိုက်ရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်အနေဖြင့် ၂၀၂၃ခုနှစ်၊ ဩဂုတ်လ (နောက်ဆုံးပတ်) တွင် မိုးမြေပဲများ အနည်းငယ်စတင်ထွက်ပေါ်လာနေပြီဖြစ်ပါသည်။ ပြည်ဈေးကွက်သို့ မိုးမြေပဲများကို ခရိုင်အတွင်း မြို့နယ်များဖြစ်သည့် ရွှေတောင်၊ ပေါက်ခေါင်းနှင့် အခြားတိုင်းများဖြစ်သော မြန်အောင်၊ ကြံခင်းဘက်မှ တစ်နေ့လျှင် မြေပဲဆံအိတ် (၃၀၀/၄၀၀)ခန့်အဝင်ရှိပြီး ဝင်သမျှ အရောင်းအဝယ်ဖြစ်နေပါသည်။ ရန်ကုန်နှင့် မန္တလေးဘက်မှ ဝယ်လက်များနှင့် ဒေသတွင်းဆီစက်လုပ်ငန်းရှင်များ ဝယ်ယူမှုရှိခြင်းတို့ကြောင့် ပြည်ဒေသရှိ ပွဲရုံနှင့်ဈေးကွက်များတွင် ပုံမှန်ရောင်းဝယ်လျက်ရှိပါသည်။ မြေပဲဆန်ဈေးနှုန်းများအနေဖြင့် ဩဂုတ်လ (နောက်ဆုံးပတ်) တွင် ဆီဆံ(အဖြူ) တစ်ပိဿာလျှင် (၇၀၀၀)ကျပ်၊ ဆီဆံ(အနီ)တစ်ပိဿာလျှင် (၈၅၀၀)ကျပ်နှင့် လုံးဆံ (အဖြူ) တစ်ပိဿာလျှင် (၇၄၀၀)ကျပ်၊ လုံးဆံ(အနီ)တစ်ပိဿာလျှင် (၉၂၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင်(၂၀၂၂) ခုနှစ်၊ ဩဂုတ်လ (နောက်ဆုံးပတ်) တွင် ဆီဆံ(အဖြူ)တစ်ပိဿာလျှင် (၅၇၀၀)ကျပ်၊ ဆီဆံ(အနီ) တစ်ပိဿာလျှင် (၅၈၀၀)ကျပ်နှင့် လုံးဆံ(အဖြူ)တစ်ပိဿာလျှင် (၆၁၀၀)ကျပ်၊ လုံးဆံ(အနီ) တစ်ပိဿာလျှင် (၆၂၀၀)ကျပ်ဖြင့် အရောင်းအဝယ်ဖြစ်ခဲ့ပါသည်။ ထို့ကြောင့် ယခုနှစ်တွင် မြေပဲဆံ ဆီဆံ(အဖြူ) တစ်ပိဿာလျှင် (၁၃၀၀)ကျပ်၊ ဆီဆံ(အနီ)တစ်ပိဿာလျှင် (၂၇၀၀)ကျပ်၊ လုံးဆံ(အဖြူ) တစ်ပိဿာလျှင် (၁၃၀၀)ကျပ်နှင့် လုံးဆံ(အနီ)တစ်ပိဿာလျှင် (၃၀၀၀)ကျပ်ခန့်ဈေးများမြင့်တက်လာခဲ့ပါသည်။ မြေပဲဆီဈေးမှာ ယခုနှစ်၊ ဩဂုတ်လ (နောက်ဆုံးပတ်) တွင် တစ်ပိဿာလျှင် (၁၄၀၀၀) ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင်နှစ်တွင် မြေပဲဆီတစ်ပိဿာလျှင် (၁၃၀၀၀) ကျပ်ဖြစ်ခဲ့ပြီး ယခုနှစ်တွင် တစ်ပိဿာလျှင် (၁၀၀၀)ကျပ်ခန့်ဈေးမြင့်တက်လာခဲ့ကြောင်းသိရှိရပါသည်။

DOCA(ပဲခူး)