ပြည်တွင်းကုန်သွယ်မှုသတင်း

     ကြောင်လျှာသီးကို အစိမ်းသီးနှင့် အညိုသီးဟူ၍ (၂)မျိုးခွဲခြားထားပါသည်။ အရသာမှာ ခါးသက်သက်နှင့် ပူရှိန်းရှိန်းအရသာရှိပါသည်။ ကြောင်လျှာသီးအစိမ်းကို ပါးပါးလှီးပြီး သုတ်စား၍သော်လည်းကောင်း၊ အချဉ်စိမ်၍ ချဉ်ဖက်အဖြစ်သော်လည်းကောင်း၊ မီးဖုတ်၍သော်လည်းကောင်း၊ ကြော်ချက်၍သော်လည်းကောင်း စားသုံးကြပါသည်။ ကြောင်လျှာသီးသည် ဘက်တီးရီးယားများကိုတိုက်ဖျက်ပေးခြင်း၊ ဓာတ်တိုးဆန့်ကျင်သော အာနိသင်ရှိခြင်း၊ ရောင်ရမ်းမှုကိုသက်သာစေခြင်း၊ အသည်းကိုကျန်းမာစေခြင်း၊ ကျောက်ကပ်ကိုကျန်းမာစေခြင်း၊ ဆီးချိုကိုသက်သာစေခြင်း၊ ကိုယ်ခံအားကောင်းစေခြင်း၊ အစာခြေစနစ်ကိုကောင်းမွန်စေခြင်း၊ ကင်ဆာရောဂါကိုကာကွယ်ပေးခြင်း စသည့်ကျန်းမာရေးကို များစွာအထောက်အကူပြုသည့် သီးနှံတစ်မျိုးဖြစ်ပါသည်။ ဆေးဖက်ဝင်သည့်သီးနှံဖြစ်သော်လည်း ရောဂါအခံရှိသူများ၊ ကျန်းမာရေးအခြေအနေတစ်ခုခုကြောင့် ပုံမှန်ဆေးသောက်သုံးနေရသူများ၊ နို့တိုက်မိခင်နှင့် ကိုယ်ဝန်ဆောင်များအနေဖြင့် ချင့်ချိန်စားသုံးပေးသင့်ပါသည်။ ဆီးချိုရှိသူများအနေဖြင့် ဆီးချိုဆေးသောက်သုံးနေရပါက အလွန်အကျွံမစားမိဖို့ရန် သတိပြု သင့်ပါသည်။

   ပြည်ဈေးကွက်အတွင်းမှာတော့ ဇွန်လဆန်းမှစ၍ ကြောင်လျှာသီးများ စတင်ဝင်ရောက်လာပြီး ပေါ်ဦးပေါ်ဖျားအချိန်တွင် တစ်တောင့်လျှင် (၇၀၀-၈၀၀)ကျပ်ဖြင့် ဈေးကောင်းရရောင်းဝယ်ကြပြီး ဩဂုတ်လအတွင်း ကြောင်လျှာသီးတစ်တောင့်လျှင် (၃၀၀-၄၀၀) ကျပ်ဖြင့် ရောင်းဝယ်နေကြကြောင်းသိရပါသည်။

DOCA(ပဲခူး)

    ပြည်ဈေးကွက်၌ မိုးရာသီဝါတွင်းကာလတွင် ထွက်ပေါ်လေ့ရှိသောဝါးယောင်းမှိုများ ဩဂုတ်လ (တတိယပတ်) မှစ၍ ဝင်ရောက်လာမှုရှိကြောင်းသိရပါသည်။ ပြည်အနီးတဝိုက်ဒေသများဖြစ်သော မှော်ဇာ၊ ကင်ပွန်းခြုံ၊ သဇင်လှ၊ ပျဉ်းပင်ကိုင်း စသည့်ဒေသများနှင့် ပြည်မြို့အနောက်ဖက်ကမ်းရှိ ညောင်ပင်သာရွာ၊ မကျည်းစုရွာ၊ ရွှေဘုံသာရွာ စသည့်ရွာများမှ ရာသီဥတုမှာ မိုးရွာလိုက်၊ နေပူလိုက်နှင့် မှိုထွက်ရန် အကောင်းဆုံးရာသီဖြစ်နေသည့်အတွက် အဆိုပါဒေသများမှမှိုများ ဈေးကွက်သို့ဝင်ရောက်မှုရှိနေကြောင်းသိရပါသည်။

     ဝါးယောင်းမှိုကို ပြည်ဒေသတွင် အဓိကအားဖြင့် မှိုချည်တည်၍ စားသုံးကြကြောင်းသိရပြီး မှိုချဉ်ထည့်ရာတွင် မှိုကို ရေစင်အောင်ဆေးပြီး ဖန်ပုလင်း၊ မြေအိုးတို့တွင် ထည့်ပြီးနောက် ဆားအနည်းငယ်နှင့် ကောက်ညှင်းဆန်အသင့်အတင့်ထည့်ပြီး လေလုံအောင်ပိတ်ထား၍ တစ်ပတ် (၁၀)ရက်ခန့်ကြာလျှင် မှိုချဉ်ဖြစ်ကာ စားသုံးနိုင်ပြီဖြစ်သည့်အတွက် မှိုချဉ်ကို ကြက်သွန်နီ၊ ကြက်သွန်ဖြူ၊ ပုစွန်ခြောက်၊ ငါးပိတို့နှင့်ဆီသတ်၍ ချက်ပြုတ်စားသောက်ကြကြောင်းသိရပါသည်။ ဝါးယောင်းမှိုကို သူ့တစ်မျိုးတည်းသော်လည်းကောင်း ကန်စွန်ရွက်နှင့်ရောကာ သတ်သတ်လွတ်ဟင်းအဖြစ်စားသုံး၍လည်းရပါသည်။ ဝါးယောင်းမှိုကို မှိုခြောက်အဖြစ် အခြောက်လှန်းပြီး ၎င်းမှိုခြောက်ကို ရေစိမ်ပြီး ငရုတ်သီးစိမ်း၊ ငရုတ်သီးခြောက်တို့ဖြင့် သေးသေးညှပ်ကာ စားသုံးကြပါသည်။

     ပြည်ဈေးကွက်အတွင်း ရာသီစာဖြစ်သောဝါးယောင်းမှိုများမှာ ပေါ်ဦးပေါ်ဖျားဖြစ်သည့်အတွက် ဈေးကောင်းရနေပြီး (၁၀)ကျပ်သားလျှင် (၈၀၀)ကျပ်မှ (၁၀၀၀)ကျပ်အထိ ဈေးကောင်းရကာ ရောင်းချကြောင်းသိရှိရပါသည်။

DOCA(ပဲခူး)

   ပြည်ခရိုင်အတွင်းရှိ ပြည်မြို့နယ်နှင့် ပေါက်ခေါင်းမြို့နယ်တို့တွင် ယခုကဲ့သို့ မိုးလယ်ကာလ၌  ဝါသီးနှံများစတင်စိုက်ပျိုးနေပြီဖြစ်ကြောင်းသိရှိရပြီး ဝါမျိုးစေ့တစ်ထုတ်လျှင် ကျပ် (၅၀၀၀၀) ကျော်ခန့်ပေး၍ စိုက်ပျိုးရေးဦးစီးဌာနမှ ဝယ်ယူစိုက်ပျိုးကြခြင်းဖြစ်ကြောင်းနှင့် မျိုးမှာ “တစ်စေ့ဝါ” မျိုးဖြစ်ကြောင်းသိရပါသည်။ ဝါစေ့များကို စတင်စိုက်ပျိုးချိန်မှစ၍ ၃လခွဲ၊ ၄လကြာလျှင် စတင်ထွက်ရှိပြီး တစ်ဧကလျှင် ကျပ်(၃၅၀၀၀၀)ခန့်ကုန်ကျပြီး ပုံမှန်မြေဆိုလျှင် ဝါပိဿာချိန် (၅၀၀) ခန့်ထွက်ရှိပြီး မြေကောင်း၍ သွင်းအားစုများများပိုသုံးနိုင်လျှင် ပိဿာချိန် (၈၀၀)ခန့်ထွက်ရှိနိုင်သည်ဟုသိရပါသည်။ ယခင်နှစ်တွင် တစ်ဧကလျှင် ဝါပိဿာချိန် (၈၀၀)နီးပါးခန့်ထွက်ရှိခဲ့ပြီး “ဝါ” (ကုန်ကြမ်း) တစ်ပိဿာလျှင် ကျပ် (၃၀၀၀) ခန့်ဈေးပေး၍ ဒေသတွင်း ဝါကြိတ်စက်ရုံများမှ ဝယ်ယူကြိတ်ခွဲခဲ့ကြောင်းသိရှိရပါသည်။

DOCA(ပဲခူး)

   အဝါရောင်ဖရဲသီးများကို ထိုင်ဝမ်မြို့မှ စတင်စိုက်ပျိုးခဲ့ပြီး ဖရဲသီးတွင် အခွံစိမ်းစိမ်း၊ အတွင်းသားနီနီနှင့် ဖရဲသီးနီနီထက်ပိုနု၍ အဝါရောင်သမ်းနေသော ဖရဲသီးအဝါရောင်ဟူ၍ (၂)မျိုးရှိပါသည်။ ဖရဲသီးအဝါတွင် ကာဗိုဟိုက်ဒရိတ်၊ ကယ်လ်လိုရီ၊ အဆီဓာတ်၊ အမျှင်ဓာတ်၊ သကြားဓာတ်၊ ပရိုတင်း၊ ပိုတက်ဆီယမ်၊ ကယ်လ်ဆီယမ်၊ ဗီတာမင်အေ၊ ဗီတာမင်စီ၊ သံဓာတ်၊ phouphorus၊ magnesium စသည်တို့ပါဝင်နေသည်။ ဖရဲသီးအဝါတွင် ရေဓာတ် ၉၂ ရာခိုင်နှုန်းလောက်အထိပါဝင်ပါသည်။ ဖရဲသီးအဝါသည် ခန္ဓာကိုယ်အတွင်း သွေးစီးဆင်းမှုကောင်းစေခြင်း။ ကိုယ်ခံအားကောင်းစေခြင်း၊ ကျောက်ကပ်ကိုကျန်းမာစေနိုင်ခြင်း၊ သွေးပေါင်ကျစေနိုင်ခြင်းနှင့် မျက်လုံးကိုကျန်းမာစေခြင်းများဖြစ်ပေါ်စေပါသည်။ ပါးစပ်ထဲမှအနာများကိုသက်သာစေပြီး အရိုးများလည်းသန်မာစေသည်။ ပြည်မြို့မှဖရဲသီးအဝါရောင်များမှာ မုံရွာဘက်မှ အများဆုံးဝင်ရောက်လျက်ရှိပြီး ပြည်မြို့၏ Online ဈေးကွက်တွင် ဖရဲသီးအဝါရောင်များကို တစ်လုံးလျှင် ၄၀၀၀ကျပ်မှစ၍ (၄၅၀၀-၅၀၀၀) ကျပ်အထိရောင်းချလျက်ရှိကြောင်းသိရှိရပါသည်။

DOCA(ပဲခူး)

  ပဲခူးတိုင်းဒေသကြီး၊ ပြည်ခရိုင်၌ နွေစပါးစိုက်ပျိုးသောမြို့နယ်များမှာ ပေါက်ခေါင်း၊ ပန်းတောင်းနှင့် ပြည်မြို့နယ်တို့တွင် အများဆုံးစိုက်ပျိုးကြပါသည်။ ရွှေတောင်မြို့နယ်တွင် နွေစပါးအနည်းငယ်သာစိုက်ပျိုးပြီး မိုးစပါးကိုအဓိကထား၍ စိုက်ပျိုးကြပါသည်။ ပြည်ခရိုင်တွင် စိုက်ပျိုးသောနွေစပါးမျိုးကွဲများမှာ ရတနာတိုးစပါး၊ GW-11 နှင့် ထိုင်းနှံကောက်မျိုးများကိုသာ အဓိကထား၍စိုက်ပျိုးကြပါသည်။ ပြည်ခရိုင်အနေဖြင့် စုစုပေါင်းနွေစပါးစိုက်ဧကမှာ (၂၁၄၉)ဧက စိုက်ပျိုးပြီး တစ်ဧကလျှင် စပါးတင်း (၉၁)တင်းခန့်ထွက်ရှိ၍ အထွက်တင်းမှာ (၁၉၅၀၀၀)ကျော်ခန့်ထွက်ရှိကြောင်းသိရပါသည်။ နွေစပါးပေါ်စတွင် (၄၆) ပေါင်တင်း(၁၀၀)လျှင် (၁၄၇၀၀၀၀)ကျပ် ရှိပြီး၊ ဇူလိုင်လတွင် ဈေးအနည်းငယ်ပြန်လည်ကျဆင်းသည့်အတွက် စပါးတင်း(၁၀၀)လျှင် (၁၂၇၀၀၀၀)ကျပ်ထိဈေးကျခဲ့ပါသည်။ ဩဂုတ်လဆန်းမှစ၍ စပါး(၄၆)ပေါင်တင်း(၁၀၀)လျှင် (၁၅၁၀၀၀၀)ကျပ်ဖြင့် ဩဂုတ်လ (တတိယပတ်) အထိ ဈေးများငြိမ်လျက်ရှိပြီး အရောင်းအဝယ်ဖြစ်လျက်ရှိပါသည်။

    ယခုကဲ့သို့ စပါးအမြင့်ဈေးဖြင့် ငြိမ်နေရခြင်းမှာ စားသုံးသူများအနေဖြင့် ဝယ်ယူစားသုံးမှုများလာခြင်း၊ သယ်ယူစရိတ်များကြီးမြင့်လာခြင်းနှင့် စပါးလက်ကျန်နည်းလာသည့်အတွက် ဈေးနှုန်းများမြင့်တက်လာခဲ့ခြင်းဖြစ်ကြောင်းသိရပါသည်။

DOCA(ပဲခူး)