၁၈.၉.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရခိုင်ပြည်နယ်၊ မင်းပြားမြို့နယ်၌ (၁၁-၉-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် ဂန့်ဂေါမြိုင် အခြေခံပညာမူလတန်းကျောင်း၌ စားသုံးသူကာကွယ်ရေးအသိပညာပေးဟောပြောပွဲပြုလုပ်ခဲ့ရာ ကျောင်းသား/သူ(၁၀၀) ဦးနှင့် ဆရာ/မ (၅) ဦး၊ စုစုပေါင်း(၁၀၅)ဦးခန့်တက်ရောက်ခဲ့ကြပါသည်။
အဆိုပါ ဟောပြောပွဲတွင် မင်းပြားမြို့၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးမောင်သန်းဝင်း (ဒု-ဦးစီးမှူး) က ကျောင်းသား/သူများ စားသုံးသူအခွင့်အရေးများကိုသိရှိစေရန်အတွက် ဦးစွာပထမ အကျယ်တဝင့်ရှင်းလင်းပြောကြားခဲ့ပြီး သက်တမ်းကုန်ဆုံးနေသော အစားအသောက်များကိုဝယ်ယူမစားသုံးကြရန်နှင့် ကုန်အညွှန်းအမှတ်အသားပြည့်စုံစွာဖော်ပြမှုမရှိသော ကုန်စည်များကိုဝယ်ယူမသုံးစွဲကြစေရန်အလို့ငှာ အသိပညာပေးဟောပြောဆွေးနွေးခဲ့ကြောင်း သတင်းရရှိပါသည်။
DOCA(ရခိုင်)
ရွှေဘိုခရိုင်အတွင်းရှိ မြို့နယ်များ၌ စက်တင်ဘာလ ဒုတိယပတ်တွင် စပါး/ဆန် ဈေးနှုန်းများ အနည်းငယ် ကျဆင်းနေပါသည်။ ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ စက်တင်ဘာလ ပထမပတ်တွင် ရန်ကုန်သို့ အိတ်ရေ ၁၇၅၀၀၊ မန္တလေးသို့ အိတ်ရေ၂၈၄၀၀၊ နေပြည်တော် သို့ အိတ်ရေ ၆၀၀၀၊ ရှမ်း(တောင်)သို့ အိတ်ရေ ၄၅၀၀၊ ရှမ်း(မြောက်)သို့ အိတ်ရေ ၄၅၀၀၊ ပခုက္ကူသို့ အိတ်ရေ ၆၀၀၊ စုစုပေါင်း အိတ်ရေ ၆၁၅၀၀၊ တန်အားဖြင့် ၃၀၇၅တန် စီးထွက်ခဲ့ပါသည်။ ယခုအပတ်တွင် ရွှေဘိုခရိုင်မှ အခြားတိုင်းဒေသ ကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၁၅၀၀၀၊မန္တလေးသို့ အိတ်ရေ ၁၈၁၀၀၊ နေပြည်တော်သို့ အိတ်ရေ၆၅၀၀ ၊ရှမ်း(တောင်)သို့ အိတ်ရေ၅၀၀၀ ၊ ရှမ်း(မြောက်)သို့ အိတ်ရေ ၅၀၀၀၊ပခုက္ကူသို့ အိတ်ရေ ၁၀၀၀ ၊ စုစုပေါင်းအိတ်ရေ ၅၀၆၀၀၊ တန်အားဖြင့် ၂၅၃၀တန် စီးထွက်ခဲ့သည့်အတွက် ယခင်အပတ်နှင့် နှိုင်းယှဉ်လျင် ယခုအပတ်အတွင်း အိတ်ရေ ၁၀၉၀၀၊ တန်အားဖြင့် ၅၄၅တန် လျော့၍ စီးထွက်ခဲ့ပါသည်။
ရွှေဘိုမြို့၏ စက်တင်ဘာလ ဒုတိယပတ်တွင် ဖြစ်ပေါ်နေသော စပါး/ဆန် ဈေးနှုန်း များမှာ ရွှေဘိုပေါ်ဆန်းစပါး တင်း၁၀၀လျှင် ကျပ် ၃၇၀၀၀၀၀၊ ရွှေဘိုပေါ်ဆန်း ဆန် ၂၄ပြည်ပါ တစ်အိတ်လျှင် ကျပ်၁၂၅၀၀၀ ၊ ဧရာမင်းဆန် ၂၄ပြည်ပါ တစ်အိတ်လျှင် ကျပ်၁၃၀၀၀၀နှင့် ၂၀၂၂-၂၀၂၃ခုနှစ် ရွှေဝါထွန်း(နွေစပါး) တင်း၁၀၀လျှင် ကျပ် ၁၉၀၀၀၀၀၊ ရွှေဝါထွန်းဆန် ၂၄ပြည်ပါ တစ်အိတ်လျှင် ကျပ် ၈၀၀၀၀ဖြင့် အရောင်းအဝယ်ဖြစ်နေကြောင်း သိရှိရပါသည်။
DOCA(စစ်ကိုင်း)
၂၀၂၃ခုနှစ်၊ စက်တင်ဘာလ၊ ဒုတိယအပတ်အတွင်း ရှမ်းပြည်နယ်(အရှေ့ပိုင်း)၊ ကျိုင်းတုံ-မိုင်းလား နယ်စပ်လမ်းကြောင်းမှ သွင်းကုန်များအနေဖြင့် အားကစားဘောင်းဘီ၊ ရေမြှုပ်ဖိနပ်၊ မိုးကာအင်္ကျီနှင့် စွပ်ကျယ်အင်္ကျီတို့ဖြစ်၍ သွင်းကုန်တန်ဖိုးမှာ အမေရိကန်ဒေါ်လာ (၀.၀၁၃)သန်းဖြစ်ပြီး ကုန်ပစ္စည်းတင်ပို့မှုမရှိကြောင်းသိရှိရပါသည်။ ကုန်သွယ်မှုပမာဏမှာ အမေရိကန်ဒေါ်လာ(၀.၀၁၃) သန်းရရှိခဲ့ပါသည်။ ယခင်အပတ်နှင့်နှိုင်းယှဉ်ပါက ပို့ကုန်တန်ဖိုးမှာ အမေရိကန်ဒေါ်လာ (၀.၀၂၄)သန်း၊ သွင်းကုန်တန်ဖိုးမှာ အမေရိကန်ဒေါ်လာ(၀.၀၁၃)သန်းလျော့နည်းသွားကြောင်းသိရှိရပါသည်။
တာချီလိတ်နယ်စပ်လမ်းကြောင်းမှ ပို့ကုန်တင်ပို့မှုမှာ ကြက်သွန်ဖြူ၊ စာရွက်အပိုင်းအစ၊ ကြက်သွန်နီ၊ ရော်ဘာ၊ ဆေးရွက်ကြီး၊ ပလတ်စတစ်တို့ဖြစ်ပြီး ပို့ကုန်တန်ဖိုးမှာ အမေရိကန်ဒေါ်လာ (၀.၅၁၃)သန်းတင်ပို့နိုင်ခဲ့ကြောင်းသိရှိရပါသည်။ သွင်းကုန်များအနေဖြင့် ဒီဇယ်၊ ဓာတ်ဆီ၊ ဘိလပ်မြေ၊ ပိုက်နှင့် အိမ်ဆောက်ပစ္စည်းတို့ဖြစ်ပြီး သွင်းကုန်တန်ဖိုးမှာ အမေရိကန်ဒေါ်လာ(၁.၆၂၂)သန်းဖြစ်ကြောင်းသိရှိရပါသည်။ ကုန်သွယ်မှုပမာဏမှာ အမေရိကန်ဒေါ်လာ(၀.၆၆၃)သန်းဆောင်ရွက်နိုင်ခဲ့ပါသည်။ ယခင်အပတ်နှင့်နှိုင်းယှဉ်ပါက ပို့ကုန်တန်ဖိုးမှာ အမေရိကန်ဒေါ်လာ (၀.၀၀၆)သန်းပိုမိုတင်ပို့ခဲ့ပြီး သွင်းကုန်တန်ဖိုးမှာ အမေရိကန်ဒေါ်လာ(၀.၆၅၇)သန်းဖြစ်ပြီး တင်သွင်းမှုတိုးလာသောကြောင့် ကုန်သွယ်မှုပမာဏတန်ဖိုးမှာလည်း အမေရိကန်ဒေါ်လာ(၀.၆၆၃)သန်းတိုးလာကြောင်းသိရှိရပါသည်။
DOCA(ရှမ်း)
အောင်လံကုန်စည်ဒိုင်တွင် နှမ်းဈေးကွက်အနေဖြင့် နှမ်းသီးနှံအသစ်များထွက်ရှိလျက်ရှိပြီး နှမ်းနက်(စမုံ)မှာ (၄၅)ပိဿာဝင် (၁)အိတ်လျှင် ယခင်အပတ်(၆-၉-၂၀၂၃)ရက်နေ့တွင် ကျပ်(၂၇၅၀၀၀-၃၄၅၀၀၀)ဖြစ်ခဲ့ပြီး ယခုအပတ်(၁၂-၉-၂၀၂၃)ရက်နေ့တွင် ကျပ်(၂၆၀၀၀၀-၃၃၀၀၀၀)ဖြစ်၍ ကျပ်(၁၅၀၀၀) ဈေးလျော့ခဲ့ကြောင်း၊ နှမ်းနီတစ်အိတ်လျှင် ယခင်အပတ်တွင် ကျပ်(၃၀၅၀၀၀)ဖြစ်ခဲ့ပြီး ယခုအပတ်တွင် ကျပ်(၂၈၅၀၀၀) ဖြစ်၍ ကျပ်(၂၀၀၀၀) အသီးသီးဈေးလျော့ခဲ့ပြီး အရောင်းအဝယ်ပမာဏအနေဖြင့် (၄၅)ပိဿာဝင် အိတ်များဖြင့် နှမ်းနက်(စမုံ)(၄၈၀၀)အိတ်၊ နှမ်းနီ(၁၃၅၀)အိတ်တို့အရောင်းအဝယ်ရှိခဲ့ပါကြောင်း အောင်လံကုန်စည်ဒိုင်မှသိရှိခဲ့ရပါသည်။
ပဲမျိုးစုံဈေးကွက်အနေဖြင့် ပဲတီစိမ်းမှာ(၂၀)ပိဿာဝင် (၁)တင်းလျှင် ယခင်အပတ်တွင် ကျပ် (၄၂၀၀၀-၅၂၀၀၀)ဖြစ်ခဲ့ပြီး ယခုအပတ်တွင် ကျပ်(၄၈၀၀၀-၅၈၀၀၀)ဖြစ်၍ ကျပ်(၆၀၀၀)ဈေးမြင့်တက်ခဲ့ပါသည်။ မတ်ပဲ(၁)တင်းလျှင် ယခင်အပတ်တွင် ကျပ်(၇၈၀၀၀)ဖြစ်ခဲ့ပြီး ယခုအပတ်တွင် ကျပ်(၇၇၀၀၀) ဖြစ်၍ ကျပ်(၁၀၀၀)ဈေးလျော့ခဲ့ကြောင်း၊ ကုလားပဲ(H-L)ယခင်အပတ်တွင် ကျပ်(၉၄၀၀၀) ဖြစ်ခဲ့ပြီး ယခုအပတ်တွင် ကျပ်(၉၃၀၀၀)ဖြစ်၍ ကျပ်(၁၀၀၀)ဈေးလျော့ခဲ့ကြောင်း၊ ကုလားပဲ(မြကြေး) ယခင်အပတ်တွင် ကျပ်(၉၃၀၀၀)ဖြစ်ခဲ့ပြီး ယခုအပတ်တွင် ကျပ်(၉၂၀၀၀)ဖြစ်၍ ကျပ်(၁၀၀၀) စသည်ဖြင့် အသီးသီးဈေးလျော့ခဲ့ပါသည်။ ပဲကြီးမှာ ယခင်အပတ်တွင် ကျပ်(၉၆၀၀၀-၁၀၀၀၀၀)ဖြစ်ခဲ့ပြီး ယခုအပတ်တွင်လည်း ကျပ်(၉၆၀၀၀-၁၀၀၀၀၀)ဖြစ်၍ ဈေးနှုန်းပြောင်းလဲမှုမရှိဘဲ အရောင်းအဝယ်ပမာဏအနေဖြင့် (၃၀)ပိဿာဝင် အိတ်များဖြင့် ပဲတီစိမ်း(၁၉၀၀)အိတ်၊ မတ်ပဲ(၁၈၀)အိတ်၊ ကုလားပဲ (H-L)(၁၃၀၀)အိတ်၊ ကုလားပဲ(မြကြေး)(၉၅၀)အိတ်၊ ပဲကြီး(၄၅၀)အိတ်တို့အရောင်းအဝယ်ဖြစ်ခဲ့ပါသည်။
မြေပဲလုံးဆံဖြူ (၁)ပိဿာလျှင် ယခင်အပတ်တွင် ကျပ်(၆၄၀၀)ဖြစ်ခဲ့ပြီး ယခုအပတ်တွင် ကျပ်(၆၂၀၀)ဖြစ်၍ ကျပ်(၂၀၀)ဈေးလျော့ခဲ့ပါသည်။ မြေပဲတောင့်အစိုမှာ (၁)တင်းလျှင် ယခင်အပတ်တွင် ကျပ်(၁၆၀၀၀-၁၈၀၀၀)ဖြစ်ခဲ့ပြီး ယခုအပတ်တွင် ကျပ်(၁၈၀၀၀-၂၀၀၀၀)ဖြစ်၍ ကျပ်(၂၀၀၀) ဈေးမြင့်ခဲ့ပြီး အရောင်းအဝယ်ပမာဏအနေဖြင့် မြေပဲလုံးဆံဖြူ(၁၄၀၀)အိတ်၊ မြေပဲတောင့်အစို တင်း(၅၀၀၀)ခန့်အရောင်းအဝယ်ရှိခဲ့ပါသည်။ နှမ်း၊ ပဲတီစိမ်း၊ မြေပဲတို့မှာ သီးနှံအသစ်ထွက်ရှိသည့်ရာသီဖြစ်၍ ရောင်းဝယ်မှုအနည်းငယ်မြင့်တက်လာပြီး ရန်ကုန်မြို့နှင့် မန္တလေးမြို့များသို့ အပတ်စဉ်ပုံမှန်တင်ပို့ရောင်းချလျက်ရှိပါကြောင်း အောင်လံကုန်စည်ဒိုင်မှသိရှိရပါသည်။
DOCA(မကွေး)
စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်ဦးစီးမှူးရုံးမှ ဝန်ထမ်းများသည် (၁၁-၉-၂၀၂၃)ရက်နေ့၊ နံနက်(၀၈:၃၀)နာရီအချိန်တွင် သရက်မြို့၊ မြို့မစည်ပင်သာယာဈေးအတွင်း ပလတ်စတစ်လျှော့ချအသုံးပြုစေရေးနှင့် အင်ဖက်အစားထိုးအသုံးပြုစေရေးတို့အတွက် အသား၊ ငါး ရောင်းချနေသော ဈေးတန်းတစ်လျှောက်နှင့် အသီးအရွက်ကုန်စိမ်းရောင်းချသူများအား မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ သဘာဝပတ်ဝန်းကျင်ထိန်းသိမ်းရေးဦးစီးဌာနတို့နှင့်ပူးပေါင်း၍ အသိပညာပေးဆွေးနွေးခဲ့ကြပါသည်။
ထို့နောက် သရက်မြို့၊ မြို့မစည်ပင်ဈေးအတွင်း (၁၁-၉-၂၀၂၃)ရက်နေ့တွင် ဖြစ်ပေါ်လျက်ရှိသော အခြေခံစားကုန်ဈေးနှုန်းများမှာ ပေါ်ဆန်းမွှေး(ပုသိမ်) ဆန်(၁)ပြည်လျှင် ကျပ်(၅၀၀၀-၆၀၀၀)၊ ဧရာပဒေသာ(ပုသိမ်)ဆန်(၁)ပြည်လျှင် ကျပ်(၄၆၀၀-၅၀၀၀)၊ မနောသုခဆန်(၁)ပြည်လျှင် ကျပ်(၃၅၀၀)၊ မှော်ဘီဆန်(၁)ပြည်လျှင် ကျပ်(၃၆၀၀-၃၇၀၀)၊ ပဲဆီ(၁)ပိဿာလျှင် ကျပ်(၁၄၀၀၀)၊ နှမ်းဆီ(၁)ပိဿာလျှင် ကျပ်(၁၄၀၀၀-၁၆၀၀၀)၊ အာလူး(၁)ပိဿာလျှင် ကျပ် (၂၇၀၀-၂၈၀၀)၊ ကြက်သွန်ဖြူ (၁)ပိဿာလျှင် ကျပ်(၈၈၀၀-၉၀၀၀)၊ ကြက်သွန်နီ (၁)ပိဿာလျှင် ကျပ်(၂၅၀၀-၃၃၀၀)၊ ကုလားပဲခွဲခြမ်း (၁)ပိဿာလျှင် ကျပ်(၆၀၀၀-၆၃၀၀)၊ ငရုတ်စို (၁)ပိဿာလျှင် ကျပ်(၅၅၀၀-၆၀၀၀)၊ ခရမ်းချဉ်သီး(၁)ပိဿာလျှင် ကျပ်(၂၈၀၀-၃၀၀၀)၊ ကြက်သား(CP) (၁)ပိဿာလျှင် ကျပ်(၁၆၀၀၀)၊ ကြက်သား(ဗမာ)(၁)ပိဿာလျှင် ကျပ်(၂၂၀၀၀)၊ ဝက်သား (၁)ပိဿာလျှင် ကျပ်(၁၃၀၀၀)၊ အမဲသား(၁)ပိဿာလျှင် ကျပ်(၁၃၀၀၀)၊ ဆိတ်သား (၁)ပိဿာလျှင် ကျပ်(၁၆၀၀၀)၊ ငါးမြစ်ချင်း (၁)ပိဿာလျှင် ကျပ်(၁၆၀၀၀)၊ ငါးကြင်း(၁)ပိဿာလျှင် ကျပ်(၁၆၀၀၀)အသီးသီးရှိခဲ့ပြီး စက်တင်ဘာလ၊ ပထမအပတ်နှင့် ဒုတိယအပတ်ဈေးနှုန်းတို့ကိုနှိုင်းယှဉ်လျှင် စားကုန်ဈေးနှုန်းများမှာ သိသိသာသာပြောင်းလဲခြင်းမရှိဘဲ တည်ငြိမ်လျက်ရှိသော်လည်း အာလူး(၁)ပိဿာလျှင် ယခင်အပတ်အောက် ယခုအပတ်တွင် ကျပ်(၂၀၀-၃၀၀)ဈေးလျော့ကျခဲ့ပါသည်။
အသီးအရွက်နှင့် အသား၊ ငါးတို့ကို အောင်လံမြို့မှတစ်ဆင့် ဝယ်ယူရောင်းချခြင်းဖြစ်ပြီး ဆန်နှင့်ဆီတို့မှာ ရန်ကုန်၊ ပြည်၊ ဥသျှစ်ပင်မြို့တို့မှ ဝင်ရောက်လျက်ရှိရာ နေ့စဉ် ပုံမှန်အရောင်းအဝယ်ဖြစ်လျက်ရှိပါကြောင်း မြို့မစည်ပင်သာယာဈေးအတွင်းရှိ ဈေးသည်များထံမှသိရှိရပါသည်။
DOCA(မကွေး)
မကွေးတိုင်းဒေသကြီး၊ မင်းဘူးခရိုင်၊ စေတုတ္တရာမြို့နယ်၊ မြို့မဈေး၌ ရာသီစာ မန်ကျည်းသီးစိမ်းများ လှိုင်လှိုင်ပေါ်နေပြီး ဈေးကွက်အတွင်းသို့ ဝင်ရောက်လျက်ရှိပါသည်။ ရာသီစာသီးနှံဖြစ်ပြီး သဘာဝမန်ကျည်းပင်ကြီးမှ ရရှိသောအသီးဖြစ်၍ စားသုံးသူပြည်သူများအနေဖြင့် ဘေးအန္တရာယ်ကင်းရှင်းစွာစားသုံးနိုင်ပါသည်။
မန်ကျည်းသီးစိမ်းစတင်ပေါ်စအချိန်၂၀၂၃ခုနှစ်၊ ဩဂုတ်လတွင် မန်ကျည်းသီးဈေးနှုန်းမှာ (၁၀)ကျပ်သားကို ကျပ်(၁၀၀၀)ဈေးနှုန်းဖြင့် ရောင်းချလျက်ရှိပြီး စက်တင်ဘာလ(ဒုတိယပတ်)တွင် (၁၀)ကျပ်သားလျှင် ကျပ်(၅၀၀)ဖြစ်၍ ဈေးနှုန်းကျဆင်းလာပါသည်။ မန်ကျည်းသီးမှည့်မှာ အစေ့မပါ (၁)ပိဿာလျှင် ကျပ်(၂၅၀၀) မှ ကျပ်(၃၀၀၀)ဈေးနှုန်းဖြင့် အတက်အကျမရှိဘဲ ဈေးငြိမ်လျက်ရှိပါသည်။ မန်ကျည်းသီးစိမ်းများကို ကြော်စား၍သော်လည်းကောင်း၊ ထောင်းစား၍သော်လည်းကောင်း၊ မန်ကျည်းသီးစိမ်းငပိချက်၍လည်းကောင်း မိမိတို့ကြိုက်နှစ်သက်သည့်အတိုင်း စားသုံးနိုင်ပါသည်။ မန်ကျည်းပင်သည် အရွက်မှအစ အစေ့အဆုံး စားသုံးနိုင်သောအပင်တစ်မျိုးဖြစ်ပါသည်။ အရွက်နုများကို သုပ်စား/ ချဉ်ရည်ချက်၍စားသုံးနိုင်ပြီး အသီးမှာလည်း အစိမ်းရော အမှည့်ပါ အသုံးဝင်လှပါသည်။ အစေ့ကိုလည်းလှော်၍း သားရေစာအဖြစ်စားကြပါသည်။ မန်ကျည်းသီးအစိမ်းပေါ်ချိန်၌ အစိမ်းစားကြပြီး မှည့်လာသည့်အခါ အစေ့ထုတ်ပြီး နှစ်ရှည်ခံနိုင်စေရန်အလို့ငှာ သိမ်းထားကြပါသည်။
မြန်မာနိုင်ငံအတွင်း မန်ကျည်းသီးကို ဆေးဝါးအဖြစ်အသုံးပြုကြပါသည်။ မြန်မာ့ဆေးကျမ်းများအရ မန်ကျည်းပင်သည် ပူ၏၊ ချဉ်၏၊ သည်းခြေကိုဖြစ်စေတက်၏၊ သလိပ်ကိုပွားစေ၏၊ လေကိုနိုင်၏၊ မန်ကျည်းအရွက်သည် ရောင်တင်းခြင်း၊ သွေးဖောက်ပြန်ခြင်း၊ နားရောဂါတို့ကိုနိုင်၏၊ မန်ကျည်းမှည့်သည် ပူ၏၊ ဝမ်းမီးကိုတောက်စေ၏၊ မန်ကျည်းမှည့်ကို ဝမ်းချုပ်တတ်သူများအနေဖြင့် မန်းကျည်းဖျော်ရည်ပြုလုပ်၍သောက်သုံးပေးပါက ဝမ်းသွားခြင်းကိုပုံမှန်ဖြစ်စေပါသည်။ မန်ကျည်းခေါက်ကို သာမန်မျက်စေ့နာနှင့် အပူဒဏ်ခံနိုင်ရန်တို့အတွက် သနပ်ခါးကဲ့သို့ သွေးလိမ်း၍လည်းအသုံးပြုနိုင်ပါသည်။ မန်ကျည်းပင်စည်နှင့် အကိုင်းအခက်များကို အမွှေးတိုင်ပြုလုပ်ရာတွင်လည်း ရိုးတံအဖြစ်အသုံးပြုကြကြောင်း၊ မန်ကျည်းပင်သည် တစ်ပင်လုံးဆေးဖက်ဝင်သောအပင်ဖြစ်ကြောင်း လေ့လာသိရှိရပါသည်။
DOCA(မကွေး)
မကွေးတိုင်းဒေသကြီးအစိုးရအဖွဲ့အနေနဖြင့် မကွေးတိုင်းဒေသကြီး၊ မြို့နယ်အသီးသီးရှိ စျေးဆိုင်များ၌ စားအုန်းဆီများ သတ်မှတ်စျေးနှုန်းထက် ပိုမိုရောင်းချမှုမရှိစေရေး ခရိုင်/မြို့နယ်စိစစ်ဖော်ထုတ်ကြပ်မတ်ရေးအဖွဲ့အား တာဝန်ပေးအပ်လာခြင်းကြောင့် (၉-၉-၂၀၂၃)ရက်နေ့၊ နံနက် (၀၈:၃၀) နာရီအချိန်တွင် မကွေးခရိုင်အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူး ဦးမောင်ထူးခေါင်းဆောင်၍ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးမြင့်ဝင်းနှင့် မကွေးခရိုင်ဦးစီးမှူး၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူး၊ မြို့နယ်ရဲတပ်ဖွဲ့မှူး၊ မြို့နယ်စည်ပင်သာယာရေးအဖွဲ့တို့ပါဝင်သော ပူးပေါင်းအဖွဲ့များဖြင့် မကွေးမြို့ရှိ စားသုံးဆီလက်လီ/ လက်ကားဖြန့်ဖြူးရောင်းချသော ရန်ပယ်ရပ်ရှိ ဦးသန်းဇော် (သန်းတစ်ရာ) စားသုံးဆီဆိုင်၊ ရန်ဝေးရပ်ရှိ ဒေါ်စန်းနွဲ့ (စပါယ်ဦး)စားသုံးဆီဆိုင်၊ ရန်ကင်းရပ်ရှိ ဒေါ်အေးအေးသင်း (ပါရမီ) စားသုံးဆီအရောင်းဆိုင်များ၌ လက်လီရောင်းချသည့်စျေးနှုန်း၊ လက်ကားဖြန့်ဖြူးသည့်စျေးနှုန်းများနှင့်ပတ်သက်၍ သတ်မှတ်စျေးနှုန်းထက် ပိုမိုရောင်းချမှုရှိ/မရှိ ကွင်းဆင်းစစ်ဆေးခဲ့ကြောင်းသိရှိရပါသည်။
မကွေးတိုင်းဆီကုန်သည်နှင့်ဆီလုပ်ငန်းရှင်များအသင်းအနေဖြင့် ရရှိသောဆီခွဲတမ်းများအရ မကွေးမြို့နယ်အတွင်း စားအုန်းဆီတစ်ပိဿာလျှင် ကျပ်(၄၅၀၀)နှုန်းဖြင့် ရောင်းချနေသည့် မကွေးမြို့၊ ဆုံရပ်ကွက်၊ ဓမ္မာရုံ၌ အိမ်ထောင်စု (၅၅၀)စုအတွက် စားအုန်းဆီ(၅၅၀)ပိဿာ၊ မင်းကံကြီးရပ်ကွက်၊ ရပ်ကွက်၊ အုပ်ချုပ်ရေးမှူးရုံးရှေ့ အိမ်ထောင်စု (၁၁၀၀)စုအတွက် စားအုန်းဆီ (၁၁၀၀)ပိဿာနှင့် အောင်မင်္ဂလာရပ်ကွက်၊ ရပ်ကွက်အုပ်ချုပ်ရေးမှူးရုံးရှေ့၌ အိမ်ထောင်စု(၅၅၀)စုအတွက် စားအုန်းဆီ (၅၅၀)ပိဿာ၊ စုစုပေါင်း အိမ်ထောင်စု (၂၂၀၀)စုအတွက် စားအုန်းဆီ (၂၂၀၀)ပိဿာရောင်းချပေးနေရာ၌ အလေးချိန်ပြည့်ဝမှန်ကန်မှုရှိစေရေး၊ ရောင်းချရာတွင်စနစ်တကျရှိစေရေးတို့အတွက် ကွင်းဆင်းကြီးကြပ်ဆောင်ရွက်ခဲ့ကြောင်းသိရှိရပါသည်။
DOCA(မကွေး)
(၁၃-၉-၂၀၂၃) ရက်နေ့တွင် စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် မြို့နယ်စီမံအုပ်ချုပ်ရေးအတွင်းရေးမှူး၊ သက်ဆိုင်ရာဌာနများပါဝင်သော ပူးပေါင်းအဖွဲ့ဖြင့် မုဒုံမြို့နယ်၊ ကျောက်တစ်လုံးကျေးရွာအုပ်စု၊ မြိုင်ကုန်းရပ်၊ မော်လမြိုင်-သံဖြူဇရပ်ကားလမ်းဘေး၌ မွန်ပြည်နယ်ဆီကုန်သည်နှင့်ဆီလုပ်ငန်းရှင်အသင်း၏စီအစဉ်အရ ဈေးကားဖြင့် ဈေးနှုန်းသက်သာသောစားအုန်းဆီများ လှည့်လည်ရောင်းချရာတွင် အမှန်တကယ်သက်သာမှုရှိ/ မရှိ ကွင်းဆင်းစစ်ဆေးခဲ့ပါသည်။
မွန်ပြည်နယ်ဆီကုန်သည်နှင့်ဆီလုပ်ငန်းရှင်အသင်းသည် ဈေးကားဖြင့် လှည့်လည်ရောင်းချရာတွင် ပြည်သူတစ်ဦးလျှင် စားအုန်းဆီတစ်ပိဿာနှုန်းဖြင့် လူဦးရေ (၅၅၀) ထံသို့ စုစုပေါင်းပိဿာ (၅၅၀) ကို တစ်ပိဿာလျှင် (၅၂၀၀) ကျပ်ဖြင့် ရောင်းချပေးခဲ့ကြောင်းသိရှိရပါသည်။
DOCA(မွန်)
(၁၂-၉-၂၀၂၃) ရက်နေ့တွင် စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ မြန်မာနိုင်ငံဆီကုန်သည်နှင့် ဆီလုပ်ငန်းရှင်အသင်းက မွန်ပြည်နယ်အတွင်း ခွဲဝေရရှိသောစားအုန်းဆီများအနက် မုဒုံမြို့နယ်အတွက် ခွဲဝေရရှိသော စားအုန်းဆီများကို ပြည်သူများအား သက်သာသောဈေးနှုန်းဖြင့် ရောင်းချရာတွင် ဈေးနှုန်းမြှင့်တင်ရောင်းချခြင်းမရှိစေရေး ပူးပေါင်းကြပ်မတ်ဆောင်ရွက်ခဲ့ပါသည်။
မုဒုံမြို့နယ်အတွက် ခွဲဝေရရှိသောစားအုန်းဆီပိဿာ (၁၁၀၀) အနက် (၁၂-၉-၂၀၂၃) ရက်နေ့တွင် လူတစ်ဦးလျှင် တစ်ပိဿာနှုန်းဖြင့် လူဦးရေ (၅၅၀) အား စားအုန်းဆီပိဿာ (၅၅၀) ရောင်းချပေးခဲ့ပြီး တစ်ပိဿာလျှင် (၄၉၀၀) ကျပ်ဖြင့် ရောင်းချပေးခဲ့ကြောင်းသိရှိရပါသည်။
ထို့ပြင် (၁၃-၉-၂၀၂၃) ရက်နေ့တွင် စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံသည် သက်ဆိုင်ရာဌာနများပါဝင်သော ပူးပေါင်းအဖွဲ့ဖြင့် ကျိုက်မရောမြို့နယ်၊ ပိန္နဲကုန်းဈေး၌ ပြည်သူများအား သက်သာသောဈေးနှုန်းဖြင့် စားအုန်းဆီများရောင်းချခဲ့ကြောင်းသိရှိရပါသည်။
DOCA(မွန်)
