ပြည်တွင်းကုန်သွယ်မှုသတင်း

     ကျောက်မဲမြို့ရှိ စည်ပင်သာယာ ဗဟိုဈေး၊ မင်္ဂလာဈေး၊ အခွန်လွတ်ဈေးများတွင်ရောင်းချလျက်ရှိသည့် အောင်ပန်းအာလူးမှာ တစ်ပိဿာလျှင် အလုံးကြီး (၄၀၀၀) ကျပ်၊ အလုံးလတ် (၃၈၀၀) ကျပ်ဖြင့်ဈေးကွက်အတွင်း ရောင်းချလျက်ရှိရာ ဒေသထွက် အာလူးများ ထွက်ပေါ်ချိန်၌လည်း ဈေးနှုန်းကျဆင်းသွားခြင်းမရှိဘဲ ယခင်နှုန်းအတိုင်း အရောင်းအဝယ်ဖြစ်လျက်ရှိကြောင်း၊ အရောင်းအဝယ်ဖြစ်သော်လည်း ဒေသထွက်အာလူးများပေါ်ချိန်ဖြစ်သောကြောင့် အရောင်းအဝယ်အေးနေကြောင်း သိရှိရပါသည်။

     ဒေသထွက်အာလူးသစ်များမှာ စတင်ထွက်ပေါ်ချိန်မှစ၍ အောင်ပန်းအာလူးများနည်းတူ ဈေးနှုန်းကျဆင်းခြင်းမရှိဘဲ တစ်ပိဿာလျှင် အလုံးကြီး (၄၀၀၀) ကျပ်၊ အလုံးလတ် (၃၈၀၀) ကျပ်၊ အလုံးသေး (၂၅၀၀) ကျပ်ဖြင့် အရောင်းအဝယ်သွက်နေကြောင်း အာလူးရောင်းချနေသူလုပ်ငန်းရှင် များထံမှသိရှိရသည်။

     ဒေသထွက်အာလူးများကို တစ်ဆင့်ဝယ်ယူရောင်းချသည့်ဈေးနှုန်းနှင့် စိုက်ပျိုးသူများကိုယ်တိုင် ရောင်းချသော ဈေးနှုန်းများမှာအတူတူဖြစ်ကြောင်းသိရှိရပြီး တစ်ဆင့်ဝယ်ယူသူများမှာစိုက်ပျိုးသူများထံမှ အရပ်ခေါ်ဖောက်သည်ဈေးဖြင့် တစ်ပိဿာလျှင် အမြတ်(၂၀၀)ကျပ်ဖြင့် ရောင်းချပေးလျက်ရှိကြောင်း သိရှိရပါသည်။

      ဒေသထွက်အာလူးသစ်များနှင့် အောင်ပန်းအာလူးများမှာ ယခင်ဇန်နဝါရီလမှ ယခုဖေဖော်ဝါရီလအထိ ဈေးနှုန်းများပြောင်းလဲမှုမရှိပဲ အရောင်းအဝယ်ကောင်းနေကြောင်း သိရှိရပါသည်။

DOCA(ရှမ်း)

     ၁၉.၂.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ခရိုင်စီမံအုပ်ချုပ်ရေးအဖွဲ့၏ အစီအစဉ်ဖြင့် (၁၅.၂.၂၀၂၄) ရက်နေ့ မွန်းလွဲ ၁၃:၀၀ နာရီက ကန့်ဘလူမြို့ပေါ်ရပ်ကွက်များရှိ သတ်မှတ်နေရာများတွင်  တာဝန်ရှိသူများ၏ကြီးကြပ်မှုဖြင့်  ကန့်ဘလူခရိုင်ဆီလုပ်ငန်းရှင်များ အသင်းမှ စားသုံးသူပြည်သူများအား စားအုန်းဆီများကို ဈေးနှုန်းသက်သာစွာဖြင့် ရောင်းချပေးခဲ့ကြောင်း သိရသည်။

    စားသုံးသူပြည်သူများအနေဖြင့် စားအုန်းဆီများကို သက်သာသောဈေးနှုန်းဖြင့် လွယ်ကူလျှင်မြန်စွာ ဝယ်ယူစားသုံးနိုင်စေရန်အတွက်ရည်ရွယ်၍ စားအုန်းဆီ(၁)ပိဿာလျှင် ၆၁၀၀ ကျပ်ဖြင့် ပြည်သူတစ်ဦးလျှင်(၁)ပိဿာနှုန်း လက်ဝယ်အရောက် ရောင်းချပေးခဲ့ပြီး လူဦးရေ (၄၆၂၀)ဦး အတွက် စားအုန်းဆီ ၄၆၂၀ ပိဿာ ရောင်းချပေးခဲ့ကြောင်း ကန့်ဘလူခရိုင်ဆီလုပ်ငန်းရှင်များအသင်းထံမှ သိရသည်။

DOCA(စစ်ကိုင်း)

       စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရာ ဖေဖော်ဝါရီလ၊ ဒုတိယပတ်အတွင်း အရောင်းအဝယ်ဖြစ်သည့် သီးနှံနှင့် ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ် မေးမြန်းခဲ့ပါသည်။ ‌ဇန်နဝါရီလ၊ ဒုတိယပတ်မှစတင်၍ ရွှေဘိုဈေးကွက်သို့ ပဲစဉ်းငုံ(နီ၊ ဖြူ)များ စတင်ဝင်ရောက်ခဲ့သော်လည်း ဖေဖော်ဝါရီလ၊ ဒုတိယပတ်တွင် ပဲစဉ်းငုံ(နီ)တစ်မျိုးတည်းသာ ဝင်ရောက်ခဲ့ကြောင်း၊ ဖေဖော်ဝါရီ(ဒုတိယပတ်)တွင်အရောင်းအဝယ်ဖြစ်သည့်ဈေးနှုန်းမှာ ပဲစဉ်းငုံ(နီ)တစ်တင်းလျှင် (၁၂၁၀၀ဝိ/-) ကျပ် ပေါက်ဈေးရှိပြီး တစ်ပတ်အတွင်းအရောင်း အဝယ်ဖြစ်မှုမှာ (၁၈၀၀၀)တင်း/(၅၈၈)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်အပတ်၌ ပဲစဉ်းငုံ(နီ)တစ်တင်းလျှင် (၁၂၇၅၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ်အောက် ပဲစဉ်းငုံ(နီ)တစ်တင်းလျှင်(၆၅၀ဝိ/-)ကျပ် ဈေးလျော့နည်းခဲ့ကြောင်းနှင့် ယခင်အပတ်အောက် ဈေးအနည်းငယ်ကျဆင်းသော်လည်း  ဝင်ရောက်သမျှ ပုံမှန်အတိုင်းအရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စားသုံးသူ ကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ ဆောင်ရွက်လျက်ရှိရာ စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့၊ အမှတ်(၂)ရပ်ကွက်တွင် ကြံချက်ဖိုတည်၍ စီးပွားဖြစ်ထွန်းအောင်မြင်နေသောတောင်သူကြီးတစ်ဦးနှင့် သွားရောက်ကွင်းဆင်း တွေ့ဆုံမေးမြန်းခဲ့ပါသည်။

    ထိုသို့ တွေ့ဆုံမေးမြန်းရာတွင် တောင်သူကြီးသည် ကြံအပြင် အခြားသီးနှံများကိုလည်း စိုက်ပျိုး ထားကြောင်း၊ ကြံစိုက်ဧက ၊ ကြံစိုက်ပျိုးချိန်၊ ကြံစိုက်ပျိုးထွက်ရှိမှု နှုန်းများနှင့် မိမိပိုင်ယာမြေဖြစ်‌သော ကန့်ဘလူမြို့နယ် ၊ ဂါးထာကျေးရွာအုပ်စု ၊ ဆည်ကြီးကျေးရွာ တောတိုက်နှင့် (၅၅၉-က) နတ်ပေးကွင်း တို့တွင် စိုက်ဧက(၇၀)ကို စိုက်ပျိုးထားရှိပြီး   ကြံကို ဆောင်းစိုက် နှင့် မိုးစိုက်ဟူ၍ (၂)မျိုး ရှိရာမှာ မိုးရာသီစိုက်ပျိုးလျှင် ကဆုန်/နယုန်လများတွင် စိုက်ပျိုးရပြီး၊ ဆောင်းရာသီ စိုက်ပျိုးလျှင်  သီတင်းကျွတ် လမှာစိုက်ပျိုးကာ ကြံစိုက်စက်ဖြင့် တစ်ဧကလျှင် ကြံတန်ချိန်(၃)တန် ခန့် စိုက်ပျိုး၍ ပြာသို/ တပို့တွဲလ များတွင်  ခုတ်သိမ်းရပါသည်။

   ကြံတစ်ခါစိုက်လျှင်(၅)နှစ်မှ (၇)နှစ် ကြာမြင့်သည့်အထိ ခုတ်ယူစားသုံးရပါသည်။ ယခုနှစ် ခုတ်ယူ ရသောကြံသည် ဒုတိယသားဖြစ်ပြီး စိုက်ကွင်းမှ ခုတ်ယူရရှိခဲ့သော ကြံများကို ကန့်ဘလူမြို့ အမှတ်(၂) ရပ် ကွက်တွင် ချက်ဖိုတည်၍ ပါဝါမီတာတပ်ပြီးကြံရည်ညစ်စက်ဖြင့် ကြံရည်ညစ်ကာ ရရှိလာသော ကြံရည်များကို အဆင့်ဆင့်ချက်ပြီးမှ အိတ်ထောင်းနှင့်သကာရည်များရရှိပါသည်။ ကြံစိုက်ပျိုးရန် ထွန်ယက်ခြင်း၊ စိုက်ပျိုးခြင်း၊ သွင်းအားစုများထည့်ခြင်း အလုပ်သမား ငှားရမ်းခြင်း၊ တောတိုက်မှ မြို့ထဲသို့ သယ်ယူသည့်ကားခနှင့် ကြံချက်၍ အိတ်ထောင်းနှင့်သကာရည် ရသည်အထိ တစ်ဧက ကုန်ကျစရိတ် မှာ (၁၅)သိန်းခန့် ရှိပါသည်။

   ထွက်ရှိသော သကာရည်ပိုင်းများနှင့်အိတ်ထောင်းများကို တစ်ပိသာလျှင်(၃၅၀၀)ကျပ်နှုန်းဖြင့် သကြားစက်များရှိရာသို့ တင်ပို့ရောင်းချကြောင်း ၊ (၁)နှစ်ကြံတစ်ဧကဝင်ငွေ(၃၅)သိန်းခန့်ရရှိပြီး အမြတ် အစွန်းမှာ(၂၀)သိန်းခန့်ကျန်ရှိသောကြောင့် ကြံစိုက်ပျိုး ချက်လုပ်ပြီး ရောင်းချလျှင် ထက်ဝက် အမြတ်ကျန် သဖြင့် တောင်သူများအနေနှင့် ကြံစိုက်ပျိုးသင့်ကြောင်းကို ကန့်ဘလူမြို့ရှိ စီးပွားဖြစ်ထွန်း အောင်မြင်နေသော တောင်သူကြီး ဦးသောင်းငွေမှ တိုက်တွန်းပြောကြားခဲ့ပါသည်။

  ကြံအပြင် အခြားသီးနံများဖြစ်သည့် စပါး၊ ပြောင်း၊ ပဲစဉ်းငုံ၊ မတ်ပဲ၊ နေကြာ၊ ကုလားပဲ၊ မြေပဲ၊ နှမ်းစသည်တို့ကိုလည်း စိုက်ပျိုးပြီး စပါး စိုက်ဧက(၄၀)ကို စပါးတင်း(၃၀၀၀)ထွက်ရှိကြောင်း၊ ပြောင်း စိုက်ဧက (၃၀၀)ကို ပြောင်းဆံတင်း(၁၀၀၀)ထွက်ကြောင်း၊ ပဲစဉ်းငုံ စိုက်ဧက(၁၀၀)ကို ပဲစဉ်းငုံတင်း(၅၀၀) ထွက်ရှိကြောင်း  မိမိကိုယ်တိုင် စိုက်ပျိုးရေး မွေးမြူရေး ဆုများရရှိထားကြောင်း သိရှိရပါသည်။

DOCA(စစ်ကိုင်း)