ပြည်တွင်းကုန်သွယ်မှုသတင်း

    တောင်ငူမြို့သို့ စစ်ကိုင်းတိုင်းဒေသကြီး၊ မုံရွာဒေသမှထွက်သော ဖရဲသီးများ‌ကိုလာရောက်ရောင်းချကြပါသည်။ ၁၂ဘီးကားတစ်စီးလျှင် ဖရဲသီးအလုံး ၂၀၀၀လုံးဆန့်ပြီး ၁၄ ဘီးကားတစ်စီးလျှင် အလုံးရေ ၃၅၀၀လုံးဆန့်ပါသည်။

     တောင်ငူမြို့၊ ညောင်ပင်ဈေးရှိ မုံရွာဖရဲသီးဆိုင်များတွင် ၂၀၂၃ခုနှစ်၊ စက်တင်ဘာလ (ပထမပတ်) တွင် အကြီးတစ်လုံးလျှင် ၁၅၀၀ကျပ်မှ ၂၀၀၀ကျပ်အထိ၊ အလတ်တစ်လုံးလျှင် ၁၀၀၀ကျပ်မှ ၁၅၀၀ကျပ်အထိ၊ အသေးတစ်လုံးလျှင် ၇၀၀ကျပ်မှ ၁၀၀၀ကျပ်အထိရောင်းချကြပါသည်။

  ယခုအပတ်တွင် ဖရဲသီးအကြီးတစ်လုံးလျှင် ၇၀၀ကျပ်မှ ၁၀၀၀ကျပ်အထိ၊ သုံးလုံးယူလျှင် ၂၀၀၀ကျပ်၊ အလတ်တစ်လုံးလျှင် ၅၀၀ကျပ်မှ ၇၀၀ကျပ်အထိ၊ အသေးသုံးလုံးလျှင် ၁၀၀၀ကျပ်ဖြစ်၍ ဈေးနှုန်းကျဆင်းလာပါသည်။

     မုံရွာဖရဲသီးမှာ ဒေသထွက်ဖရဲသီးထက် အရသာကောင်းမွန်သဖြင့် လူကြိုက်များပြီး ရောင်းအားကောင်းနေကြောင်းသိရပါသည်။

DOCA(ပဲခူး)

    တောင်ငူမြို့၊ ငါးခြောက်ဆိုင်များတွင် ရောင်းချနေသော အာဗြဲခြောက်သည်လည်း လူကြိုက်များသောငါးခြောက်တစ်မျိုးဖြစ်ပါသည်။ အရသာမှာ ချိုပြီး ဆားလည်းပေါ့သဖြင့် စားကောင်းသည့် ငါးခြောက်တစ်မျိုးဖြစ်ပါသည်။

  ၂၀၂၃ခုနှစ် ဩဂုတ်လတွင် အာဗြဲခြောက်တစ်ပိဿာလျှင် ၂၈၀၀၀ကျပ်၊ ၁၀ကျပ်သားလျှင် ၃၀၀၀ကျပ်ဖြင့် ရောင်းချခဲ့ရာမှ ယခုလတွင် တစ်ပိဿာလျှင် ၃၂၀၀၀ကျပ်၊ ၁၀ကျပ်သားလျှင် ၃၅၀၀ကျပ်ဖြစ်၍ ဈေးနှုန်းအနည်းငယ်မြင့်တက်လာပါသည်။

      အသင့်စား အာဗြဲခြောက်ထုပ်များကိုလည်းရောင်းရပါသည်။ အသင့်စား အာဗြဲခြောက် ပြုလုပ်ရာတွင် အာဗြဲခြောက်ကို အမြီးညှပ်၍ ခေါင်းဖြတ်သန့်စင်ပြီး အနည်းငယ်ထုထောင်း၍ မီးကင်စက်ဖြင့် ကင်ရပါသည်။ ထို့နောက် နောက်တစ်ကြိမ်ထပ်မံထုထောင်းပြီး ဆီဆမ်း၍ အသင့်စားနိုင်သည့်အာဗြဲခြောက်ဖုတ်များကို ပလတ်စတစ်အိတ်များဖြင့်ထည့်ကာ တစ်ထုပ်လျှင် ၈၀၀ကျပ်ဖြင့် ဈေးကွက်အတွင်းရောင်းချကြောင်းသိရပါသည်။

DOCA(ပဲခူး)

   မြန်မာ့ဟင်းလျာများထဲတွင် အသားဟင်းပွဲများကို ထူးကဲသောအရသာဖြင့် အထောက်အပံ့ပေးကာ  မြန်မာလူမျိုးတို့၏ အာခံတွင်းနှင့် အရသာကိုက်ညီလှသော သစ်တိုသီးသည် အရသာထူးကဲစွာရရှိစေရုံသာမက ကျန်းမာရေးကိုလည်း နည်းလမ်းမျိုးစုံဖြင့် အထောက်အကူပေးလျက်ရှိနေပေသည်။ ကြီးမားမြင့်မား၍ သန်စွမ်းကာ အရိပ်အာဝါသကောင်းမွန်သော သစ်တိုပင်ကြီးများကို စိုစွတ်ထိုင်းမှိုင်းသောအရပ်ဒေသများတွင်တွေ့ရပြီး အမြင့်ပေ(၃၀၀)အထက် ပေါက်ရောက်နိုင်သည်ကိုတွေ့ရှိရသည်။ သစ်တိုပင်သည် ၁၂ရာသီ စိမ်းလန်းသောအပင်ကြီးမျိုးဖြစ်ကာ ပေ၈၀မှ ပေ၉၀အထိအမြင့်ရှိပြီး လုံးပတ် ၇ပေမှ ၈ပေအထိရှိနိုင်ပါသည်။ အရွက်သည် ရွက်မွှာကြီးသုံးခုပါသော ရွက်ပေါင်းဖြစ်ကာ အနားများညီ၍ ဘေးရွက်နှစ်ရွက်သည် ညှာတံတိုပြီး ထိပ်ရွက်မွှာသည် ညှာတံရှည်သည်။ အရွက်၏ပုံသဏ္ဌာန်မှာ ဆင်တူရိုးမှားနှိုင်းယှဉ်ပြရလျှင် ဘဲဥနှင့်ဆင်တူလေသည်။

    အစေ့ကိုစိုက်ပျိုးမည်ဆိုပါက အပင်သက်တမ်း ၅နှစ်မှ ၇နှစ်ဖြစ်လျှင် အသီးဖြစ်ထွန်းမည်ဖြစ်သည်။ ခြွင်းချက်အနေဖြင့် တချို့မျိုးများသည် အသီးဖြစ်ထွန်းရန် ၃နှစ်မှ ၄နှစ်ခန့်သာလိုအပ်ပေသည်။ သစ်တိုသီး၏ အပြင်အခွံသည် သစ်တော်သီးနှင့်ဆင်တူ၍ သစ်တိုသီးတည်ဆောက်ပုံမှာ မင်းကွတ်သီးနှင့်ဆင်တူသည်။ စားသုံးမည်ဆိုပါက အစေ့နှင့် အခွံကြားမှ အသားကိုစားသုံးနိုင်ပြီး အခြားအစိတ်အပိုင်းများကိုလည်း ဆေးဖော်စပ်ရာတွင်သုံးကာ အသုံးမဝင်သည့် အစိတ်အပိုင်းမရှိသည့်တိုင် အလွန်တရာအသုံးဝင်လေသည်။

    သစ်တိုသီးပင်သည် ကျေးရွာများတွင် အလေ့ကျပေါက်ခြင်းရှိသကဲ့သို့ တစ်နိုင်တစ်ပိုင်စိုက်ပျိုးခြင်းများလည်းရှိပါသည်။ စီးပွားဖြစ်မဟုတ်သည့်တိုင်အောင် သီးနှံအများအပြားဖြစ်ထွန်းမှုကြောင့် အခြားမြို့များသို့ သွားရောက်ရောင်းချခြင်းများရှိပါသည်။ သစ်တိုသီးတစ်လုံးလျှင် ၅၀ကျပ်ဖြင့်ဝယ်ယူပြီး ပြန်လည်ရောင်းချသူများအနေဖြင့် (၁၀၀-၁၅၀) ကျပ်အထိရောင်းချခြင်းရှိသကဲ့သို့ အချဉ်ဖောက်၍လည်း ပိဿာချိန်လိုက်ရောင်းချရသဖြင့် ကျေးရွာသူ/ သားများအပိုဝင်ငွေရလျက်ရှိကြောင်း သိရှိရပါသည်။

DOCA(ပဲခူး)

    ၁၉.၉.၂၀၂၃ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

    ၁၉.၉.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။