ပြည်တွင်းကုန်သွယ်မှုသတင်း

    ယခု၂၀၂၃နှစ်တွင် ကြောင်ပန်းစေ့များ ဈေးကောင်းရပြီး တစ်နိုင်တစ်ပိုင်စိုက်ပျိုးမှုများရှိလာကြောင်းသိရှိရပါသည်။ ယခင်နှစ်တွင် ကြောင်ပန်းစေ့အခြောက်တစ်ပိဿာလျှင် (၁၅၀၀၀)ကျပ်ခန့်သာဈေးရရှိခဲ့ပြီး ယခုနှစ်တွင် အခြောက်တစ်ပိဿာလျှင် (၄၀၀၀၀)ကျပ်ခန့်ထိရှိလာကြောင်းသိရှိရပါသည်။ မန္တလေးတိုင်းဒေသကြီး၊ ငါန်းဇွန်မြို့နယ်၊ သရက္ကန်အုပ်စု၊ အောင်ချမ်းသာကျေးရွာရှိ တောင်သူတစ်ဦးမှာ အလေ့ကျကြောင်ပန်းပင်များကို လွန်ခဲ့သည့်(၈)နှစ်ဝန်းကျင်လောက်မှစ၍ ချောင်းကမ်းပါးဘေးရှိ သူမ၏ယာမြေများကို ချောင်းရေတိုက်စားမှုနည်းပါးအောင် ရေတားအဖြစ် စိုက်ပျိုးခဲ့ပြီး ယခုကဲ့သို့ ဈေးကွက်ဝင်လာမည်ကိုလည်းမသိရှိဘဲ သာမန်သာစိုက်ပျိုးခဲ့ခြင်းဖြစ်ကြောင်း၊ ချောင်းရိုးတစ်လျှောက် မိမိ၏ယာမြေပေါ်တွင် စိုက်ပျိုးထားရှိမှုမှာ ဧကဝက်ခန့်ရှိပြီး ယခင်နှစ်များတွင် အခင်းပြတ်လာရောက်ဝယ်ယူသူများရှိသော်လည်း (၅၀၀၀၀)ကျပ်မှ (၁၀၀၀၀၀)ကျပ်ခန့်သာရရှိခဲ့ပါကြောင်း၊ ယခုနှစ်မှ မိမိကိုယ်တိုင်ခူးဆွတ်၍ရောင်းချကြောင်း သိရှိရပါသည်။ ယခုနှစ်တွင် အခြောက်တစ်ပိဿာလျှင် (၃၅၀၀၀)ကျပ်ခန့်ဖြင့် ဈေးစတင်၍ရရှိခဲ့ပြီး ဇွန်လနှင့် ဇူလိုင်လများအတွင်း တစ်ပိဿာလျှင် (၄၀၀၀၀)ကျပ်ခန့်ထိရှိလာကြောင်း၊ မိမိ၏စိုက်ပင်များကို (၁၀)ရက် လျှင်တစ်ကြိမ်နှုန်းဖြင့် ခူးဆွတ်ရပြီး၊ တစ်ကြိမ်ခူးဆွတ်လျှင် အခြောက် (၂၀၊၂၅) ပိဿာခန့်ရရှိကြောင်း၊ ဇွန်လနှင့် ဇူလိုင်လများတွင် အထွက်နှုန်းပိုကြောင်းသိရှိရပါသည်။ မိမိ၏ဧကဝက်ခန့်ရှိ စိုက်ခင်းကို လူငှား (၄၊ ၅)ယောက်ဖြင့် ခူးဆွတ်ရကြောင်း၊ ခူးဆွတ်ပြီး ကြောင်ပန်းသီးများကို နေပူတွင်(၂)နေခန့်လှန်းရပြီး ပြန်လည်သန့်စင်ရကြောင်း၊ အစေ့အပြင် ခူးဆွတ်ရာတွင်ရောနှောပါဝင်ခဲ့သောအရွက်များမှာလည်း (အခြောက်)တစ်ပိဿာလျှင် ၁၀၀၀ကျပ်ဖြင့် ရောင်းချရကြောင်း၊ ရောင်းချမှုဈေးကွက်အနေဖြင့် မန္တလေးမြို့သို့ တင်ပို့ရောင်းချကြကြောင်းနှင့် ကြောင်းပန်းပင်စိုက်ပျိုးသူများ၊ အခင်းပြတ်ဝယ်ယူသူများအနေဖြင့် ကိုယ်တိုင်သွားရောက်ရောင်းချကြသည့်အပြင် ကားပေါ် တင်ပေး၍လည်း တင်ပို့ရောင်းချကြကြောင်း၊ ရွာဘက်ဒေသဈေးနှင့် မန္တလေးဈေးမှာ တစ်ပိဿာလျှင် (၂၀၀၀)ကျပ်ခန့်ကွာဟမှုရှိပြီး ကားတင်ခဈေးအနေဖြင့် တစ်တင်းခွဲဝင်တစ်အိတ်လျှင် (၁၅၀၀၊ ၂၀၀၀)ကျပ်ခန့်ရှိကြောင်းသိရှိရပါသည်။ ယခုအခါ မိမိတို့ကျေးရွာနှင့် အနီးဝန်းကျင်ရှိ ကျေးရွာများတွင် ရေနှင့်နီးသည့်နေရာများနှင့် မိမိတို့၏အိမ်ခြံဝိုင်းများ၌ တစ်နိုင်တစ်ပိုင်စိုက်ပျိုးမှုများရှိလာကြောင်း၊ အပင်ကို ကိုင်းဖြတ်၍အပင်ပျိုးပြီး ရောင်းချမှုများလည်းရှိလာသောကြောင့် မိမိစိုက်ခင်းကိုလည်း လူစောင့်ငှားရမ်းထားရကြောင်း၊ ပျိုးပင်ဈေးများအနေဖြင့် (၁)ပေအရှည်ရှိ ပျိုးပင်ကိုင်းတစ်ခုလျှင် (၁၀၀၀၊၁၅၀၀)ကျပ်ခန့်ဖြင့် ရွာဘက်တွင် အရောင်းအဝယ်ဖြစ်လျက်ရှိကြောင်းသိရှိရပါသည်။ ကြောင်ပန်စေ့ကို တရုတ်နိုင်ငံသို့  တင်ပို့ရောင်းချပြီး ဆေးဝါးနှင့်အလှကုန်ပစ္စည်းများ ထုတ်လုပ်ကြောင်းနှင့် ဒေသအသီးသီး၌လည်း ဆေးဘက်ဝင်သည့်အတွက် အမျိုးမျိုးအသုံးပြုလျက်ရှိကြောင်းသိရှိရပါသည်။ ယခုဩဂုတ်လအတွင်းတွင် ကြောင်ပန်းစေ့အခြောက်တစ်ပိဿာလျှင် (၄၂၀၀၀)ကျပ်ခန့်ထိဈေးရှိလာပြီး ဈေးကွက်ဝင်သီးနှံဖြစ်သည့်အတွက် တစ်နိုင်တစ်ပိုင်မှ စီးပွားဖြစ်စိုက်ပျိုးသင့်ပါကြောင်း ရေးသားတင်ပြလိုက်ရပါသည်။

DOCA(မန္တလေး)

   မုံရွာမြို့နယ်အတွင်း ခရမ်းချဉ်သီးကို မိုးဦးနှင့် မိုးနှောင်းကာလများတွင် ဒေသအတွင်း တစ်နိုင်တစ်ပိုင်စိုက်ပျိုးကြပါသည်။ ခရမ်းချဉ်သီးသည် အပူပိုင်းဒေသနှင့် သမနွေပိုင်းဒေသတို့တွင် ကောင်းမွန်စွာစိုက်ပျိုးဖြစ်ထွန်းသည်။

  ယခုအချိန်တွင် ဒေသတွင်းထွက်ကုန်မရှိသောကြောင့် ဒေသတွင်းခရမ်းချဉ်သီးများဝင်ရောက်မှုနည်းပါးပြီး ဈေးကွက်တွင် ရှမ်းပြည်နယ်၊ အင်းလေး၊ အောင်ပန်းတို့ဘက်မှ ခရမ်းချဉ်သီးများကို ဝယ်ယူရောင်းချလျက်ရှိကြောင်းသိရသည်။ မုံရွာမြို့နယ်အတွင်း ဖြစ်ပေါ်နေသောခရမ်းချဉ်သီးဈေးနှုန်းများမှာ ဩဂုတ်လ ပထမအပတ်တွင် ခရမ်းချဉ်သီးတစ်ပိဿာလျှင် ကျပ် ၂၄၀၀-၂၆၀၀ မှ ယခုစက်တင်ဘာ ပထမအပတ်တွင် ကျပ် ၂၈၀၀-၃၀၀၀ အထိ ဈေးနှုန်းမြှင့်တက်လျက်ရှိကြောင်းနှင့် ဈေနှုန်းမြှင့်တက်ရခြင်းမှာ ဒေသတွင်းထွက်ကုန်မရှိခြင်း၊ ဈေးကွက်အတွင်းသို့ အခြားဒေသများမှ ခရမ်းချဉ်သီးများဝယ်ယူရောင်းချရာတွင် စက်သုံးဆီဈေးနှုန်းများကြီးမြင့်မှုကြောင့် သယ်ယူစရိတ်မြှင့်မားခြင်းကြောင့်ဖြစ်ကြောင်း ခရမ်းချဉ်သီးပွဲရုံများထံမှသိရပါသည်။

DOCA(စစ်ကိုင်း)

   စစ်ကိုင်းတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် တန်ဖိုးသင့်အခြေခံစားသောက်ကုန်များကို စိုက်ပျိုး၊ မွေးမြူ ထုတ်လုပ်သူများမှ ဆန်၊ ဆီနှင့် ကြက်ဥ၊ ဒေသထွက် ဟင်းသီးဟင်းရွက်သီးနှံများကို ၂၀၂၃ ခုနှစ်၊ စက်တင်ဘာလ ၁ရက်နေတွင် မုံရွာမြို့၊ ပြည်ထောင်စုဈေးရှေ့ တွင်   နံနက် (၇:၀၀) နာရီအချိန်တွင် သက်သာသောဈေးနှုန်းဖြင့် အပတ်စဉ် ရောင်းချပေးလျက်ရှိပါ သည်။

   ထိုသို့ရောင်းချခဲ့ရာတွင် တိုင်းဒေသကြီးအစိုးရအဖွဲ့၊ ဝန်ကြီးချုပ်ဦးမြတ်ကျော်၏ ကြီးကြပ်မှုဖြင့် အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊ မွေးမြူရေးနှင့် ကုသရေးဦးစီးဌာန၊ စည်ပင်သာယာရေးအဖွဲ့၊ စိုက်ပျိုး‌ရေးဦးစီးဌာန၊ စက်မှုကြီးကြပ်ရေးနှင့် စစ်ဆေးရေးဦးစီးဌာနတို့ သည် အခြေခံစားကုန်များ ကုန်ဈေးနှုန်းကြီးမြင့်မှုမရှိစေရေးအတွက် ကိုယ်တိုင်စိုက်ပျိုး/ မွေးမြူ/ ထုတ်လုပ်သူများနှင့်ပူးပေါင်းကာ ဆန်တစ်ပြည်လျှင် ၂၈၀၀ကျပ်၊ စားအုန်းဆီတစ်ပိဿာလျှင် ၄၆၀၀ကျပ်၊ ကြက်ဥ (၁၀) လုံးတစ်ထုပ်လျှင် ၂၀၀၀ကျပ်၊ ငုံးဥ (၂၅) လုံးတစ်ထုပ်လျှင် ၁၀၀၀ကျပ်၊ ကြာဇံများ၊ ခေါက်ဆွဲခြောက်များ၊ ကုလားပဲမှုန့်များ၊ ကိတ်စို/ကိတ်ခြောက်များနှင့်  ဒေသထွက်ဟင်းသီးဟင်းရွက်သီးနှံများကို ပြင်ပပေါက်ဈေးထက် သက်သာသောဈေးနှုန်းများဖြင့် ရောင်းချပေးခဲ့ကြောင်းသိရှိရပါသည်။

DOCA(စစ်ကိုင်း)

   စားဖိုဆောင်သီးနှံတစ်ခုဖြစ်သည့် ကြက်သွန်ဖြူကို  မုံရွာမြို့နယ်အတွင်း၌လည်း တစ်နိုင်တစ်ပိုင်စိုက်ပျိုးလျက်ရှိကြပြီး ယခင်နှစ်စိုက်ပျိုးချိန်တွင် ထွက်ရှိမှုနည်းပါးနေခြင်း၊ ဒေသထွက်များ လှိုင်လှိုင်မပေါ်သေးခြင်းကြောင့် ကြက်သွန်ဖြူကို အောင်ပန်း၊ ကလောတို့မှသယ်ယူကာ ရောင်းချလျက်ရှိကြောင်း၊ လက်ရှိတွင် ဈေးကွက်အတွင်းဖြစ်ပေါ်နေသော ဈေးနှုန်းများမှာ ၂၀၂၃ခုနှစ်၊ စက်တင်ဘာလ (ပထမပတ်) တွင် ကြက်သွန်ဖြူ (ရှမ်းစ) တစ်ပိဿာလျှင် (၉၀၀၀) ကျပ်၊ ကြက်သွန်ဖြူ (ကြူကုတ်) တစ်ပိဿာလျှင် ကျပ် (၁၀၀၀၀)၊ ယခင်ဩဂုတ်လ (ပထမပတ်) တွင် ကြက်သွန်ဖြူ (ရှမ်းစ) တစ်ပိဿာလျှင် ကျပ်(၇၀၀၀)၊ ကြက်သွန်ဖြူ (ကြူကုတ်) တစ်ပိဿာလျှင် ကျပ် (၈၅၀၀) ဖြင့်ရောင်းချလျက်ရှိကြောင်း၊  ယခုစက်တင်ဘာလ (ပထမပတ်) နှင့်  ယခင်ဩဂုတ်လ (ပထမပတ်) ဈေးနှုန်းတို့ကိုနှိုင်းယှဉ်လျှင် ရှမ်းစတစ်ပိသာလျှင် ကျပ် (၂၀၀၀) ခန့်၊ (ကြူကုတ်) တစ်ပိဿာလျှင် (၁၅၀၀) ကျပ်ဈေးနှုန်းမြင့်တက်လျက်ရှိကြောင်း မုံရွာမြို့၊ မြသလ္လာဈေးတွင်ရောင်းချနေသော ကုန်သည်ပွဲစားများထံမှသိရှိရပါသည်။

DOCA(စစ်ကိုင်း)

 မုံရွာမြို့တွင် စားဖိုဆောင်သီးနှံဖြစ်သော ငရုတ်သီးကို ဒေသတွင်း လက်လီ/လက်ကားသမားများဖြင့်သာ အရောင်းအဝယ်ပုံမှန်ဖြစ်လျက်ရှိပါသည်။ ငရုတ်သီးခြောက်ကို မုံရွာမြို့ရှိ ပွဲရုံများမှတစ်ဆင့် ဈေးများ၊ ကုန်စုံဆိုင်များ၊ ကျေးရွာများသို့ လက်လီ/လက်ကားရောင်းချကြောင်းသိရှိရပါသည်။ မုံရွာမြို့တွင်စိုက်ပျိုးသော မိုးမျှော်ငရုတ်သီးခြောက်ဈေးမှာ ယခုလက်ရှိအချိန်တွင် ပွဲရုံလက်ကားဈေးတစ်ပိဿာလျှင် ကျပ်၁၉၀၀၀၊ လက်လီဈေးမှာ တစ်ပိဿာလျှင် ကျပ် ၂၀၀၀၀-၂၁၀၀၀ နှုန်းတို့ဖြင့် အရောင်းအဝယ်ဖြစ်လျက်ရှိကြောင်း၊ ငရုတ်သီးကို မုံရွာမြို့နယ်အတွင်းရှိ ညောင်ပင်တဲ၊ ကျောက်ခွက်၊ ဘုမ္မနိုး၊ ထနောင်းတော၊ မြေနဲ၊ ဆည်ကြီးတော၊ သစ်ညိုပင်ကျေးရွာများတွင် အများဆုံးစိုက်ပျိုးကြောင်း၊ ငရုတ်သီးခြောက်များ ဈေးကောင်းရရှိနေခြင်းကြောင့် စိုက်ပျိုးသူတောင်သူများလည်း အကျိုးအမြတ်ဖြစ်ထွန်းကာ အဆင်ပြေနေကြောင်းသိရပါသည်။

DOCA(စစ်ကိုင်း)