ပြည်တွင်းကုန်သွယ်မှုသတင်း

   မြန်မာ့ရိုးရာအစားအစာများထဲတွင် ဘိန်းမုန့်သည်လည်း တစ်ခုအပါအဝင်ဖြစ်ပါသည်။ ဘိန်းမုန့်ကို နံနက်ခင်းဈေးများတွင် အများဆုံးတွေ့ရပါသည်။

    ဘိန်းမုန့်ပြုလုပ်ရန်အတွက် ဆန်ကိုရေစိမ်ပြီး မုန့်ကြိတ်ဆုံဖြင့်ကြိတ်ရပါသည်။ ၎င်းကြိတ်ထားသောမုန့်နှစ်ရည်ကို သကြား၊ ဆိုဒါတို့နှင့်ရောကာ သမအောင်မွှေရပါသည်။ ထို့နောက် ဒယ်အိုးထဲတွင်ထည့်ကာ မီးဖိုပေါ်တင်၍ နှမ်းနှင့်အုန်းသီးခြစ်များဖြူးပြီးနောက် အဖုံးအုပ်ထားရပါသည်။ ဒယ်အိုးဖုံးပေါ်မှလည်း မီးဖြင့်အပူပေးရပါသည်။ အထက်မီး၊ အောက်မီးတို့နှင့်ချက်ရပါသည်။

  တောင်ငူမြို့၌ ဘိန်းမုန့်ကို ဈေးများတွင် ဆိုင်ဖွင့်၍ရောင်းချခြင်းများရှိသကဲ့သို့ လက်တွန်းလှည်းဖြင့်တင်၍လည်း လူစည်ကားရာဈေးများတွင် ရောင်းချခြင်းအပြင် ရပ်ကွက်များသို့သွားရောက်၍လည်း လှည့်လည်ရောင်းချခြင်းများရှိပါသည်။ လက်ဖက်ရည်အမြည်းပန်းကန်အရွယ် ဘိန်းမုန့်တစ်ချပ်လျှင် ၃၀၀ကျပ်ဖြင့်ရောင်းချပါသည်။

  ဘိန်းမုန့်ကို နံနက်ခင်းအချိန်တွင် အဆာပြေစာအဖြစ် စားသုံးကြသကဲ့သို့ နေ့လယ်နေ့ခင်းတွင် အပျင်းပြေစေရန် ရေနွေးကြမ်းဖြင့်လည်းစားသုံးကြပါသည်။ ဘိန်းမုန့်သည် လူကြီး/ လူငယ်မရွေးကြိုက်နှစ်သက်သည့် အစားအစာတစ်ခုဖြစ်သဖြင့် ရောင်းရကြောင်း ဘိန်းမုန့်ရောင်းသူတစ်ဦးထံမှသိရပါသည်။

DOCA(ပဲခူး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်း‌ဒေသကြီးဦးစီးမှူး ဦးမြင့်ဝင်းသည် မကွေးတိုင်းဒေသကြီးအစိုးရအဖွဲ့၏ လမ်းညွှန်မှုဖြင့် မကွေးတိုင်းအတွင်းရှိ စားသုံးသူပြည်သူများသို့အများစားသုံးသော ဆန်များအားစျေးကွက်ပေါက်စျေး အောက်သင့်တင့်မျှတသော စျေးနှုန်းဖြင့် ရောင်းချပေး‌နိုင်ရေးအတွက် (၃.၈.၂၀၂၃) ရက်နေ့ နေ့လည် (၁၄:၀၀)နာရီတွင် မကွေးတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း (မကွေးကုန်စည်ဒိုင်)၌ မကွေးမြို့နယ်ရှိဆန်/စပါးရောင်းဝယ်ဖောက်ကားသူ ကုန်သည်များနှင့်တွေ့ဆုံပြီး ပြည်သူများသို့ အခြေခံစားကုန်ဖြစ်သည့် ဆန်များအား သက်သာသော စျေးနှုန်းဖြင့် ရောင်းချပေးရေး ဆွေးနွေးခဲ့ပါသည်။

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ဆန်၊ စားသုံးဆီနှင့် အခြေခံစားသောက်ကုန်များ၊ စက်သုံးဆီ၊ ဆေးဝါးနှင့်‌ ဆေးပစ္စည်းများ ကုန်စျေးနှုန်း တည်ငြိမ်ရေးအတွက် နေ့စဉ်ရောင်းချ သည့် စျေးနှုန်းများအား ကောက်ယူပြီး ပြည်ထောင်စုကုန်စျေးနှုန်း တည်ငြိမ်ရေးကော်မတီသို့ နေ့စဉ်တင်ပြပေးလျှက်ရှိပါကြောင်း မကွေးတိုင်းအတွင်းရှိ မြို့နယ်အသီးသီး၌ မကွေးတိုင်းဒေသကြီးအစိုးရအဖွဲ့၏ ကြီးကြပ်မှုဖြင့် တစ်ပါတ်လျှင်တစ်ကြိမ် အခြေခံစားကုန်များဖြစ်သည့် (ဆန်၊ ဆီ၊ ကုလားပဲ၊ ဆား၊ ဟင်းသီးဟင်းရွက်၊ ကြက်ဥ၊ အသားများလည်း ရောင်းချပေးလျှက် ရှိနေပါကြောင်း မကွေးမြို့နယ်ဆန်ကုန်သည်များအသင်းမှလည်း ပြည်သူများအား ဆန်များကို စျေးကွက်ပေါက်စျေးအောက် သင့်တင့်မျှတသော စျေးနှုန်းဖြင့် စျေးနှုန်းသက်သာစွာ ရောင်းချပေးရန် ဆွေးနွေးညှိနှိုင်းခဲ့ပါသည်။

   အဆိုပါဆွေးနွေးပွဲသို့ မကွေးတိုင်းဒေသကြီးကုန်သည်များနှင့် စက်မှုလက်မှုလုပ်ငန်းရှင်များ အသင်းဥက္ကဌ၊ ဒုတိယဥက္ကဌနှင့် အတွင်းရေးမှူးနှင့်ညီနောင်အသင်းဖြစ်သည့် မကွေးမြို့နယ် ဆန်ကုန်သည်များအသင်း ဥက္ကဌ ဦးညွှန့်ဝင်းနှင့် အသင်းသူ/အသင်းသား (၃၀)ဦး တက်ရောက်ခဲ့ပြီး နှစ်စဉ် (၈)လ ပိုင်း(၉)လပိုင်းကာလများသည် ဆန်‌ဟောင်းရှားပါးပြီး ဆန်သစ်မပေါ်မီကာလဖြစ်၍ ဆန်စျေးနှုန်း အနည်းငယ်မြင့်တက်နေကြဖြစ်ပါကြောင်း လက်ရှိကုန်စျေးနှုန်းများ မြင့်တက်နေချိန် ပြည်သူများ သက်သာစေရန် မကွေးမြို့နယ် ဆန်ကုန်သည်များအသင်းမှ အခြေခံလူတန်းစားများ အများဆုံး ဝယ်ယူစားသုံးသော ဆန်(၂၄)ပြည် တစ်အိတ်လျှင် (၇၂၀၀၀)ကျပ်အား လူတစ်ဦးလျှင် ဆန်တစ်ပြည် (၂၅၀၀)ကျပ်ဖြင့် ဆန်တစ်အိတ် (၁၂၀၀၀)ကျပ် အရှုံးခံပြီး တစ်ပတ်လျှင် ဆန်(၁၅)အိတ်အား ရောင်းချပေးသွားမည်ဖြစ်ကြောင်း သိရှိရပါသည်။

DOCA(မကွေး)

        မြန်မာနိုင်ငံစက်သုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ တိုင်းဒေသကြီး/ပြည်နယ်အလိုက် မြို့ကြီးများ၏ စက်သုံးဆီရည်ညွှန်းလက်ကားစျေးနှုန်းများအား နေ့စဉ်ထုတ်ပြန်ပေးလျှက်ရှိပါသည်။

       မကွေးမြို့နယ်တွင် စက်သုံးဆီဆိုင်(၂၃)ဆိုင်ရှိရာ ဆိုင်များအားလုံး ပုံမှန်ဖွင့်လှစ်ရောင်းချလျှက်ရှိပြီး ၂၀၂၃-ခုနှစ်၊ ဇူလိုင်လ (စတုတ္ထအပတ်)တွင်ဖြစ်ပေါ်ခဲ့သော စက်သုံးဆီစျေးနှုန်းများမှာ ဓါတ်ဆီ (92) (၁)လီတာလျှင် (၂၂၈၀) ကျပ်၊ ဓါတ်ဆီ (95)(၁)လီတာလျှင် (၂၃၉၀)ကျပ်၊ ဒီဇယ်(ရိုးရိုး) (၁)လီတာလျှင် (၂၃၆၀)ကျပ်နှင့် ပရီမီယံ (ဒီဇယ်) (၁)လီတာလျှင် (၂၄၃၅)ကျပ်နှုန်းဖြင့် ရောင်းချခဲ့ပါသည်။

       ၂၀၂၃-ခုနှစ်၊ ဩဂုတ်လ(ပထမအပတ်)တွင်ဖြစ်ပေါ်လျှက်ရှိသော စက်သုံးဆီစျေးနှုန်းများမှာ ဓါတ်ဆီ (92) (၁)လီတာလျှင် (၂၃၀၅)ကျပ်၊ ဓါတ်ဆီ (95)(၁)လီတာလျှင် (၂၄၁၅)ကျပ်၊ ဒီဇယ်(ရိုးရိုး) (၁)လီတာလျှင် (၂၄၅၅)ကျပ်နှင့် ပရီမီယံ (ဒီဇယ်) (၁)လီတာလျှင် (၂၅၃၀)ကျပ်ဖြစ်၍ ယခင်အပတ်နှင့် နှိုင်းယှဉ်ပါက ဓါတ်ဆီ (92) (၁)လီတာလျှင် (၂၅)ကျပ်၊ ဓါတ်ဆီ (95)(၁)လီတာလျှင် (၂၅)ကျပ်၊ ဒီဇယ်(ရိုးရိုး) (၁)လီတာလျှင် (၉၅)ကျပ်နှင့် ပရီမီယံ (ဒီဇယ်) (၁)လီတာလျှင် (၉၅)ကျပ်ဖြင့် စျေးနှုန်း အသီးသီးမြင့်တက်လျှက်ရှိပြီး စက်သုံးဆီလက်ကျန်အနေဖြင့် နေ့စဉ်လည်ပတ်ရောင်းချအောင် ကျန်ရှိနေကြောင်းနှင့် စက်သုံးဆီစျေးနှုန်းအနည်းငယ်မြင့်တက်လာသဖြင့် ဆိုင်များအနေဖြင့် နေ့စဉ်ရောင်းချရသည့် အရေအတွက်ထက် အနည်းငယ်ရောင်းအားကျလာကြောင်း လေ့လာသိရှိရပါသည်။

DOCA (မကွေး)

         မကွေးတိုင်းတောင်သူဖွံ့ဖြိုးတိုးတက်ရေးအဖွဲ့မှ ဦးဆောင်ကျင်းပသည့် သီးနှံစုပေါင်းရောင်းချပွဲသို့ ဈေးနှုန်းဈေးကွက်အခြေအနေသိရှိရန် (၂၇.၇.၂၀၂၃)ရက်နေ့ နံနက်(၁၀း၀၀)နာရီအချိန်တွင် စလင်းမြို့၊ ရွှေမန်းကဇာတ်ရုံရှိ ရောင်းဝယ်ရေးစင်တာသို့ မြို့နယ်တာဝန်ခံဦးစီးမှူး ဦးဆန်းလင်းမောင်နှင့်ဝန်ထမ်းများ သွားရောက်လေ့လာခဲ့ပါသည်။

     မကွေးတိုင်းတောင်သူဖွံ့ဖြိုးတိုးတက်ရေးအဖွဲ့မှ စလင်းမြို့ရှိ ဝယ်ယူရေးစင်တာကို (၁.၇. ၂၀၂၃)နေ့မှ စတင်ဖွင့်လှစ်ဝယ်ယူပြီး (၃၁.၇.၂၀၂၃)ရက်နေ့ထိ ဝယ်ယူသွားမည်ဖြစ်ပါကြောင်း၊ ဝယ်ယူရေးစင်တာသို့ စလင်းမြို့ တောင်ဘက်တောစိမ့်၊ကူတို၊မကျီးပင်ပု၊ ကြူစန်းကျေးရွာရှိ တောင်သူများနှင့် စလင်းမြို့အနောက်ဘက် ပေါင်းတူး၊ မြေနီကုန်း၊ ဆင်ကျုံးကျေးရွာရှိ တောင်သူများစသည့် ကျေးရွာ(၁၅)ရွာမှ တောင်သူများ လာရောက်ရောင်းချကြောင်း သိရှိရပါသည်။

        အဖွဲ့အနေဖြင့် တောင်သူများထံမှ ဝယ်ယူရာတွင် နှမ်းနက်(စမုံ)၊ သိပ္ပံနှမ်းနက်နှင့် နှမ်းဖြူ (ဂျပန်)ဖြစ်ကာ နှမ်းတစ်မျိုးခြင်းအလိုက် Grade A၊ B၊ C ခွဲခြားသတ်မှတ်၍ ဝယ်ယူကြောင်း၊ Grade Aနှင့် Bတွင် နှမ်း(၁)တင်းလျှင် (၂၀၀၀)ကျပ်ခန့်နှင့် GradeC တွင် (၄၀၀၀)ကျပ်ခန့် ဈေးနှုန်းကွာခြားမှုရှိကြောင်းနှင့် နှမ်း(အခြား)သတ်မှတ်ရာတွင် (၁)တင်းလျှင်(၁၀၀၀၀)ကျပ်ကွာခြားလျက်ရှိကြောင်း သိရှိရပါသည်။

          နှမ်းအမျိုးအစားနှင့် အရည်အသွေးပေါ်မူတည်၍ ဈေးနှုန်းများ အသီးသီးကွာခြားမှုရှိကြောင်းတွေ့ရှိရပြီး စင်တာအနေဖြင့် (၁)ရက်လျှင် တင်း(၁၀၀)မှ (၁၂၀)ခန့် ဝယ်ယူရပြီး ယနေ့ထိ (၃၂၀၀) တင်းခန့် ဝယ်ယူပြီးဖြစ်ကြောင်း၊ ဝယ်ယူပြီးနှမ်းများကို မန္တလေးရှိ Exporter ထံသို့ တင်ပို့ရကြောင်း၊ စလင်းမြို့မှ မန္တလေးမြို့သို့တင်ပို့ရာတွင် ကားသယ်ယူခ နှမ်း(၁)ပိဿာလျှင် (၅၈)ကျပ်နှုန်းဖြင့် (၆)ဘီးကား(၁)စီးလျှင် နှမ်းအိတ်ရေ(၂၂၀)အိတ်ထိ တင်ပို့နိုင်ပြီး ယနေ့နှမ်း(၁)တင်း ဝယ်ဈေးအနေဖြင့် Aထိပ်စ (၁)တင်းလျှင်(၁၂၂၀၀၀)ကျပ်နှင့် နှမ်းနက်(စမုံ) (၁၁၆၀၀၀)ဖြစ်ကြောင်း အဝယ်တာဝန်ခံဦးမြင့်ဆွေထံမှသိရှိရပါသည်။

DOCA (မကွေး)

    ၂၀၂၃ခုနှစ်ဇူလိုင်လ(စတုတ္တပတ်)တွင် မင်းဘူးမြို့မဈေးအတွင်းရောင်းချလျှက်ရှိသော အခြေခံစားကုန်ဖြစ်သည့် ဧရာပဒေသာဆန်(၁)အိတ်လျှင်ကျပ်(၉၀၀၀၀-၁၀၀၀၀၀)၊ မနောသုခဆန်(၁)အိတ်လျှင်ကျပ် (၇၅၀၀၀ -၈၀၀၀၀)ဖြစ်ပြီး ဩဂုတ်လ(ပထမပတ်)တွင် ဧရာပဒေသာဆန်(၁)အိတ်လျှင် ကျပ်(၁၀၀၀၀၀-၁၂၀၀၀၀)ဖြစ်၍ ဧရာပဒေသာဆန်မှာယခုအပတ်တွင် ဈေးအနည်းငယ်တက်နေကြောင်း၊ မနောသုခဆန်(၁)အိတ်လျှင်ကျပ် (၇၅၀၀၀-၈၀၀၀၀)ဖြစ်၍ ယခုအပတ်တွင် ဈေးငြိမ်နေကြောင်း ရောင်းချနေသော ဆန်ဈေးသည်ထံမှသိရှိရပါသည်။

        ကြက်သွန်နီ (၁)ပိဿာလျှင်ကျပ် (၂၂၀၀)ဖြစ်ပြီး ရေနံချောင်းမြို့နယ်၊ ပင်းချောင်းတစ်လျှောက်ရှိ ကျေးရွာများနှင့် ပွင့်ဖြူ(မဲဇလီ)၊ စလင်း၊ ဆင်ဖြူကျွန်းမြို့များမှထွက်ရှိသော ကြက်သွန်နီများကို ဝယ်ယူရောင်းချကြောင်း စားဖို ဆောင်သီးနှံ ကြက်သွန်ဖြူ (ကြူကုတ်) (၁)ပိဿာလျှင် ကျပ်(၇၈၀၀)၊ ကြက်သွန်ဖြူ(ဗမာ) (၁)ပိဿာလျှင် ကျပ်(၈၀၀၀)၊ ငရုတ်ခြောက်ရှည် (၁)ပိဿာလျှင် ကျပ် (၁၅၀၀၀)၊ အာလူး(၁)ပိဿာလျှင် ကျပ်(၃၀၀၀)၊ သကြား (၁)ပိဿာလျှင် ကျပ်(၃၄၀၀)၊ နနွင်းတက် (၁)ပိဿာလျှင်ကျပ် (၅၀၀၀)ဖြစ်ပြီး  ယခင်ပတ်ထက် ဈေးအနည်းငယ်ငြိမ်နေကြောင်း  တွေ့ရှိရပါသည်။

   စားသုံးဆီဈေးနှုန်းမှာ နှမ်းဆီ(၁)ပိဿာလျှင်ကျပ် (၁၃၀၀၀)၊ ပဲဆီ (၁)ပိဿာလျှင် ကျပ် (၁၃၀၀၀)၊ စားအုန်းဆီ (၁)ပိဿာလျှင်ကျပ် (၈၅၀၀)ဖြစ်ပြီး နှမ်းဆီနှင့်ပဲဆီ ဈေးငြိမ်နေကြောင်း စားအုန်းဆီ ဈေးအနည်းငယ်တက်နေကြောင်း  ရောင်းချနေသောဈေးသည်တစ်ဦးထံမှ သိရှိရပါသည်။

DOCA (မကွေး)