ပြည်တွင်းကုန်သွယ်မှုသတင်း

          ပုသိမ်မြို့နယ်အတွင်းရှိ ဈေးများတွင် ပန်းဂေါ်ဖီစိမ်းများ ဈေးကွက်ဝင်ရောက်လျက်ရှိပြီး ဒေသခံများကြားတွင် ဝယ်လိုအားကောင်းမွန်လျက်ရှိကြောင်း သိရှိရပါသည်။ ပန်းဂေါ်ဖီစိမ်းသည် ပန်းဂေါ်ဖီဖြူထက် နူးညံ့ပြီး အာဟာရတန်ဖိုးပိုမိုကြွယ်ဝသည်ဟု ယူဆကြသဖြင့် ဈေးနှုန်းအားဖြင့် သာမန်ပန်းဂေါ်ဖီဖြူထက် မြင့်မားလျက်ရှိသည်။ ၂၀၂၅ ခုနှစ်၊ စက်တင်ဘာလ တတိယပတ်အတွင်း ပုသိမ်မြို့နယ်အတွင်း ရောင်းချလျက်ရှိသော ပန်းဂေါ်ဖီစိမ်း၏ ဈေးနှုန်းမှာ တစ်ပိဿာလျှင် ကျပ် ၁,၅၀၀ မှ ၁,၈၀၀ အကြား (လက်ကား) နှင့် ကျပ် ၂,၀၀၀ မှ ၂,၅၀၀ အကြား (လက်လီ) ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း သိရပါသည်။

          ပန်းဂေါ်ဖီစိမ်းကို ဟင်းချိုချက်ခြင်း၊ ကြော်ခြင်း၊ ပြုတ်စားခြင်း စသည့်နည်းလမ်းမျိုးစုံဖြင့် ချက်ပြုတ်စားသုံးလေ့ရှိပြီး ကျန်းမာရေးနှင့် ညီညွတ်သည့် ဟင်းလျာအဖြစ် နှစ်သက်စွာ စားသုံးကြသည်ကို တွေ့ရပါသည်။ ရာသီဥတုကောင်းမွန်ပြီး ကုန်စည်ရရှိမှု ပုံမှန်ရှိပါက ယခုလို ဈေးနှုန်းအတိုင်း ဆက်လက်ရှိနိုင်မည်ဟု ခန့်မှန်းရကြောင်း သိရှိရပါသည်။

DOCA (ဧရာဝတီ)

           ပုသိမ်မြို့နယ်အတွင်းရှိ ကျေးရွာဒေသများမှ ဒေသထွက် ပေါ်ဦးပေါ်ဖျားမျှစ်များ ဈေးကွက်သို့ စီးဝင်လာမှုနှုန်း မြင့်တက်နေပြီး မျှစ်များလှိုင်လှိုင်ပေါသည့် ရာသီဖြစ်သဖြင့် ဈေးနှုန်းများ သိသိသာသာကျဆင်းကာ အရောင်းအဝယ်  စည်ကားလျက်ရှိနေကြောင်း သိရသည်။

          ၂၀၂၅ ခုနှစ်၊ စက်တင်ဘာလ ပထမပတ်အတွင်း ပုသိမ်မြို့၏ ဗဟိုဈေးနှင့် ရပ်ကွက်ဈေးများတွင် ရောင်းချလျက်ရှိသော မျှစ်၏ဈေးနှုန်းမှာ တစ်ပိဿာလျှင် ကျပ် ၂,၀၀၀ မှ ၂,၅၀၀ အထိရှိပြီး၊ ၅၀ ကျပ်သားအတွက် ကျပ် ၁,၀၀၀ မှ ၁,၂၀၀ ခန့် ဖြစ်သည်။ မျှစ်ပြုတ်အတွက်မူ တစ်ပိဿာလျှင် ကျပ် ၂,၅၀၀ မှ ၃,၀၀၀ ကြား၊ ၅၀ ကျပ်သားအတွက် ကျပ် ၁,၃၀၀ မှ ၁,၆၀၀ ကြား ဈေးနှုန်းများဖြင့် အရောင်းအဝယ် ဖြစ်လျက်ရှိကြောင်း ဒေသခံ ဟင်းသီးဟင်းရွက်ကုန်သည်များထံမှ သိရှိရသည်။

          ပုသိမ်မြို့သည် ကျေးလက်ဒေသများမှ ထွက်ရှိသော ကုန်ပစ္စည်းများ စုဝေးရာ ဗဟိုအချက်အချာနေရာဖြစ်သဖြင့် အနီးဝန်းကျင်ကျေးရွာများမှ လယ်သမား၊ ကျေးရွာသားများက နံနက်ခင်းတိုင်း ခူးဆွတ်ရရှိသော လတ်ဆတ်သည့် မျှစ်စိမ်းများကို ပုသိမ်မြို့ဈေးများသို့ တင်ပို့ရောင်းချကြသည်။ မျှစ်ပြုတ်ကို အိမ်တွင်းမှာပြုတ်၍ ရောင်းချသူများလည်းရှိပြီး၊ မျှစ်ပြုတ်သည် ချက်ပြုတ်ရန် အဆင်သင့်ဖြစ်သည့်အတွက် မြို့သူမြို့သားများကြား ဝယ်ယူမှုများပြားသည်။

          ယခုလို မျှစ်ပေါသည့် ရာသီတွင် ဈေးနှုန်းသက်သာပြီး လတ်ဆတ်သောမျှစ်များကို ဟင်းချိုချက်၍ဖြစ်စေ၊ ပဲပြုတ်နှင့်ကြော်၍ဖြစ်စေ၊ အသားနှင့် ရောချက်၍ဖြစ်စေ စားသုံးလေ့ရှိသည့် ပုသိမ်မြို့သူမြို့သားများအတွက် ချက်ပြုတ်ရာတွင် မျှစ်သည် ဈေးနှုန်းချိုသာသော ရွေးချယ်မှုကောင်းတစ်ခု ဖြစ်နေသည်။ ရာသီစာမျှစ်များ ပေါများချိန်ဖြစ်သဖြင့် ယခုလက်ရှိဈေးနှုန်းအတိုင်း ရက်သတ္တပတ်အနည်းငယ်ကြာ ဆက်လက်ရှိနိုင်မည်ဟု ခန့်မှန်းရကြောင်း သိရှိရပါသည်။

DOCA (ဧရာဝတီ)

           ပုသိမ်မြို့သည် ဧရာဝတီတိုင်းဒေသကြီး၏ အဓိက ဆန်စပါးစီးပွားရေး ဗဟိုချက်တစ်ခုအဖြစ် တည်ရှိပြီး ပတ်ဝန်းကျင်မြို့နယ်များဖြစ်သည့် ကျောင်းကုန်း၊ ငပုတော၊ မြန်အောင်စသည့်ဒေသများမှ ထွက်ရှိသော ပေါ်ဆန်းစပါးများ စုဝေးရာနေရာလည်းဖြစ်ပါသည်။ ပေါ်ဆန်းစပါးသည် ဆန်ဖြူဆွတ်ပြီး အနည်းငယ်ကြောင်ခြယ်ရှိခြင်း၊ စေ့ကြီးလုံးဝန်းခြင်း၊ ချက်ပြုတ်လျင် ဆန်ကြည်ဖြစ်ကာ ပွပြီး အနံ့အရသာကောင်းမွားခြင်းစသော ဝိသေသလက္ခဏာများကြောင့် ဈေးကွက်တွင် အရည်အသွေး ကောင်းစပါးအဖြစ် နာမည်ကျော်ကြားသည်။

          ပုသိမ်မြို့ရှိ ပေါ်ဆန်းစပါးဈေးကွက်သည် ပြည်တွင်းဆန်စပါးကဏ္ဍ၏ အရေးပါသောဈေးနှုန်း ညွှန်းကိန်းတစ်ခုအဖြစ် ရပ်တည်နေသည်။ ဤဈေးကွက်ရှိ စပါးဈေးနှုန်းသည် တစ်နိုင်ငံလုံးအတွက် စံသတ်မှတ်ချက်တစ်ခုအဖြစ် သက်ရောက်မှုရှိပြီး ပုသိမ်ဈေးတက်လျှင် တစ်နိုင်ငံလုံး ဈေးတက်လေ့ရှိသည်။ ဈေးကွက်အတွင်း ပေါ်ဆန်းစပါးကို အရည်အသွေးအလိုက် ပေါ်ဆန်းထိပ်၊ ပေါ်ဆန်းလတ်၊ ပေါ်ဆန်းအောက်စသဖြင့် ခွဲခြားသတ်မှတ်ကာ ဈေးကွားခြားရောင်းချကြောင်း သိရသည်။

            လက်ရှိအချိန်တွင် လက်ရှိအချိန်တွင် ပုသိမ်ပေါ်ဆန်းစပါး ၁၀၀ ပြည် ဈေးနှုန်းသည် ကျပ် ၁,၅၀၀,၀၀၀ မှ ၁,၈၀၀,၀၀၀ ဖြစ်ပြီး  ၎င်းဈေးကွက်သည့် ရာသီဥတုဖောက်ပြန်မှုများ၊ စိုက်ပျိုးရေး ကုန်ကျစရိတ်မြင့်တက်မှုများ၊ နိုင်ငံရေး-စီးပွားရေး အခြေအနေများနှင့် နိုင်ငံတကာဝယ်လိုအား အတက်အကျတို့၏ သက်ရောက်မှုကို ခံစားနေရသည်။ သို့သော်လည်း နိုင်ငံတကာဈေးကွက်တွင် မြန်မာ့ပေါ်ဆန်းဆန်၏ ဝယ်လိုအားမှာ ဆက်လက်ကောင်းမွန်နေသေးသဖြင့် ပုသိမ်မြို့သည် မြန်မာနိုင်ငံ၏ "ဆန်အိုးကြီး"၏  စပါးဈေးကွက်အဖြစ် ၎င်း၏အရေးပါမှုကို ဆက်လက်ထိန်းသိမ်းထားနိုင်မည်ဖြစ်ကြောင်း သိရှိရပါသည်။

DOCA (ဧရာဝတီ)

          ဆူးပုတ်ရွက်သည် ဆူးပုတ်ပင်ရဲ့ အရွက်ဖြစ်ပြီး အနုအညွှန့်ကိုသာ စားသုံးကြပါသည်။ ရိုးတံမှာ အဆူးလေးများပါတတ်ပြီး အရွက်မှာ နူးညံ့ပြီး အရသာရှိသော ဟင်းသီးဟင်းရွက် တစ်မျိုးဖြစ်သည်။ ပုသိမ်မြို့နယ်အတွင်းတွင် ဆူးပုတ်ပင်ကို အိမ်ခြံဝင်းအတွင်းများနှင့် ကျေးရွာများတွင် တစ်နိုင်တစ်ပိုင် စိုက်ပျိုးမှုများ ရှိကြပြီး စီးပွားဖြစ် စိုက်ပျိုးသူများလည်း ရှိကြောင်း တွေ့ရှိရပါသည်။ ယခုလို မိုးရာသီကာလသည် ဆူးပုတ်ရွက်ထွက်ရှိမှု ပိုမိုကောင်းမွန်သည့် အချိန်ဖြစ်ပြီး ဈေးကွက်အတွင်းသို့ ဝင်ရောက်လျက်ရှိကြောင်း သိရှိရပါသည်။

          ယခု စက်တင်ဘာလ တတိယပတ်အတွင်း ပုသိမ်မြို့နယ်ရှိ ဈေးကြီးများနှင့် ကျေးရွာဈေးများတွင် ရောင်းချနေသော ဆူးပုတ်ရွက်သည် တစ်စည်း (သို့) တစ်အိတ်လျှင် ကျပ်သား (၂၀) ခန့် ပါဝင် ပြီး ဈေးနှုန်း (၁,၅၀၀) ကျပ် မှ (၂,၀၀၀) ကျပ် အထိရှိကြောင်း ဈေးသည်တစ်ဦးထံမှ သိရှိရပါသည်။ ဆူးပုတ်ရွက်ကို ငါးပိရည်ဖျော့ဖျော့နှင့် ချက်စားခြင်း၊ ပဲကြီးနှင့်ရောချက်ခြင်း၊ ကြက်ဥ၊ ဘဲဥများနှင့် ကြော်စားခြင်းများ ပြုလုပ်လေ့ရှိပြီး ဒေသခံများ၏ နှစ်သက်မှုကို ရရှိထားသည့် ဟင်းလျာတစ်မျိုးဖြစ်သည်။ ဈေးကွက်အတွင်းသို့ ဝင်ရောက်လာမှုနှင့်အတူ စိုက်ပျိုးသူများအတွက် အရောင်းအဝယ် သွက်လက်နေကြောင်း သိရှိရပါသည်။

DOCA (ဧရာဝတီ)

      မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံကို တစ်နှစ်ပတ်လုံး စိုက်ပျိုးကြပါသည် ။ စိုက်ပျိုးသောသီးနှံများအနက်မှ ဝယ်လိုအားရှိပြီး မိသားစုတစ်နိုင်တစ်ပိုင်မှသည် စီးပွားဖြစ်ဝင်ငွေတိုးသော ပဲမြစ်သီးနှံကိုလည်း တောင်သူဦးကြီးများ ကတိုးချဲ့စိုက်ပျိုးလာကြပါသည်။

        ပဲမြစ်စိုက်ပျိုးမှုအနေဖြင့် (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၁,၂၀၀,၀၀၀)ကျပ်ခန့် ကုန်ကျကြောင်း၊ ယခုအချိန်တွင် ပဲမြစ်ခင်း အောင်မြင်ဖြစ်ထွန်းလျက်ရှိပြီး ပဲမြစ်ညွန်များလည်းထွက်‌ပေါ်လျက်ရှိပါသည် ။ စျေးထဲ၌ ပဲမြစ်ညွှန့် တစ်ဆယ်သားလျှင်(၅၀၀/-)ကျပ်နှုန်းဖြင့်အရောင်းအဝယ်ဖြစ်လျက်ရှိကြောင်း၊ ပဲမြစ်စိုက် ပျိုးသော တောင်သူများသည် ပဲမြစ်ညွှန့်ကို ခူးရောင်း၍ရသလို၊ ပဲမြစ်သားသီးပေါ်လျှင်လည်း ခူးရောင်း၍ရသဖြင့်  အပိုဝင်ငွေရရှိစေသည့်အပြင် ပဲမြစ်ထွက်ပေါ်လျှင်လည်း စျေးကောင်းရရှိပါက တောင်သူများအနေဖြင့် တွက်ချေကိုက်သောကြောင့် ပဲမြစ်သီးနှံကိုလည်း တိုးချဲ့စိုက်ပျိုးသင့်ပါကြောင်း ရေးသားတင်ပြလိုက်ရပါသည်။

DOCA(မန္တလေး)