ပြည်ပကုန်သွယ်မှုသတင်းများ
အိန္ဒိယနိုင်ငံမြောက်ပိုင်းတွင် ၂ဝ၂၃-၂၄ ခုနှစ် (အောက်တိုဘာ-စက်တင်ဘာ) သီးနှံရာသီ၌ ဩဂုတ် - စက်တင်ဘာလများအတွင်း ကာလကြာရှည်စွာ ရာသီဥတုခြောက်သွေ့မှု ဖြစ်ပေါ်ခြင်းနှင့်အတူ ပန်းရောင်ဝါသီးထိုးပိုး အန္တရာယ်ကြောင့် ဝါသီးနှံပင်များ ထိခိုက်ပျက်စီးခဲ့ရာ ဝါဂွမ်းအထွက်ပမာဏနှင့် အရည်အသွေးတို့ကို ထိခိုက်နိုင်ကြောင်း သိရှိရပါသည်။ မုတ်သုံဝင်ရောက်မှု နှောင့်နှေးခြင်းက ဝါသီးနှံစိုက်ပျိုးမှုကို ၁၅ ရက်မှ ၂ဝ ရက်အထိ နောက်ကျစေခဲ့ပြီး စိုက်ပျိုးဧရိယာသည်လည်း ၅ ရာခိုင်နှုန်း ကျဆင်းခဲ့ပါသည်။
အိန္ဒိယနိုင်ငံ၌ လက်ရှိဘဏ္ဍာနှစ်၏ ပထမနှစ်ဝက်ကာလအတွင်း ကော်ဖီစေ့များ အရောင်း အဝယ်နည်းပါးသဖြင့် ကော်ဖီတင်ပို့မှုပမာဏ အနည်းငယ်ကျဆင်းခဲ့သော်လည်း သင်္ဘောတင်ပို့မှု တန်ဖိုးများမှာ မြင့်တက်လာခဲ့ပါသည်။ ပို့ကုန်လုပ်ငန်းရှင်များက ယခုနှစ် ကျန်ရှိသောကာလများ အတွက် ကော်ဖီသီးနှံ၏ အလားအလာမှာ အပြောင်းအလဲ မြန်ဆန်သော ရာသီဥတုကြောင့် သီးနှံ ထွက်ရှိမှုပမာဏအပေါ် မူတည်လျက်ရှိကြောင်း ပြောကြားခဲ့ကြပါသည်။
ကမ္ဘာ့ထိပ်တန်း နေကြာဆီထုတ်လုပ်သည့် ရုရှားနိုင်ငံနှင့် ယူကရိန်းနိုင်ငံတို့သည် ၎င်းတို့၏ ငွေကြေးတန်ဖိုးများ ကျဆင်းသည့်အခြေအနေကို အသုံးချလျက် ဈေးကွက်ဝေစု ပိုမိုရရှိရန် ဆောင်ရွက်မှုကြောင့် စားသုံးဆီဈေးကွက်အတွင်း ဈေးသက်သာသော နေကြာဆီများ အလျှံအပယ် ဝင်ရောက်မှုဖြစ်ပေါ်လျက် စားအုန်းဆီဈေးနှုန်းများ ကျဆင်းခဲ့ကြောင်း ရိုက်တာသတင်းဌာနက ဖော်ပြပါသည်။
ထိုင်းနိုင်ငံ၌ ယခုနှစ် မိုးရွာသွန်းမှုမှာ မျှော်မှန်းထားသည်ထက် ပိုမိုရရှိခဲ့ရာ လယ်သမားများ ၏ စပါးသီးထပ်စိုက်ပျိုးမှုကို အထောက်အကူဖြစ်စေရေး သိုလှောင်ထားရှိသည့် ဆည်ရေများအား ပေးဝေရန် အစိုးရက စီစဉ်ဆောင်ရွက်လျက်ရှိကြောင်း သိရှိရပါသည်။
အိန္ဒိယနိုင်ငံ၌ တောင်သူလယ်သမားများ၏ စိုက်ပျိုးဧရိယာတိုးချဲ့မှုနှင့် သီးနှံများ တိုးမြှင့် ထုတ်လုပ်မှုကို တွန်းအားပေးရန် ရည်ရွယ်လျက် အတွင်းဝန်များကော်မတီ၏ အတည်ပြုချက်အရ ၂၀၂၃-၂၄ ခုနှစ် သီးနှံစိုက်ပျိုးရာသီအတွက် ဈေးနှုန်းထောက်ပံ့မှုအစီအစဉ်အောက်တွင် ပဲစင်းငုံ၊ မတ်ပဲနှင့် ပဲနီလေးတို့အား အရေအတွက် ကန့်သတ်ချက်ဖြင့် ဝယ်ယူခြင်းကို ဖယ်ရှားလိုက်ကြောင်း အိန္ဒိယ စားသုံးသူရေးရာဝန်ကြီးဌာနက ၆-၆-၂၀၂၃ နေ့၌ ကြေညာချက် ထုတ်ပြန်ထားခဲ့ပါသည်။
အင်ဒိုနီးရှားနိုင်ငံတွင် အယ်လ်နီညို ရာသီဥတုဖြစ်စဉ်ကြောင့် စပါးများရိတ်သိမ်းထွက်ရှိမှု လျော့နည်းမည့် အခြေအနေအရ နောက်ထပ် ဆန်တန်ချိန် ၁.၅ သန်းကို ထပ်မံတင်သွင်းရန် လိုအပ်လျက်ရှိကြောင်း သမ္မတဂျိုကိုဝီဒိုဒိုက ၈-၁၀-၂၀၂၃ ရက်၊ တနင်္ဂနွေနေ့၌ သတင်းထုတ်ပြန်ရာတွင် ပြောကြားခဲ့ပါသည်။
ဖိလစ်ပိုင်ပြည်တွင်း၌ စိုက်ပျိုးရေးဆိုင်ရာ စိန်ခေါ်မှုများအကြား စပါးစိုက်ပျိုးထုတ်လုပ် လျက်ရှိသော လုပ်ကွက်ငယ်တောင်သူပေါင်း ၂.၃ သန်းခန့်ကို ပံ့ပိုးမည့် စပါးစိုက်တောင်သူများ ငွေကြေးထောက်ပံ့မှု အစီအစဉ် (RFFA) အတွက် ပီဆိုငွေ ၁၂.၇ ဘီလီယံကို ကျခံသုံးစွဲရန် သမ္မတဖာဒီနန်မားကို့စ်က အတည်ပြုလိုက်ကြောင်း Malacañang သမ္မတအိမ်တော်က ၃၀-၉-၂၀၂၃ ရက် စနေနေ့တွင် ကြေညာခဲ့သည်။
ဖိလစ်ပိုင်နိုင်ငံ၏ စိုက်ပျိုးရေးအရာရှိချုပ်အဖြစ် တာဝန်ယူဆောင်ရွက်နေသည့် သမ္မတ ဖာဒီနန်မားကို့စ်သည် ဆန်ရည်ညွှန်းဈေးနှုန်း အမြင့်ဆုံးပမာဏသတ်မှတ်ချက်ကို ရုတ်သိမ်းလိုက် ကြောင်း Taguig မြို့တွင် ၄-၁၀-၂၀၂၃ ရက်၊ ဗုဒ္ဓဟူးနေ့၌ ပြုလုပ်ခဲ့သည့် အင်တာဗျူးတစ်ခုတွင် ကြေညာချက်ထုတ်ပြန် ပြောကြားခဲ့ပါသည်။ စက်တင်ဘာလ ၅ ရက်နေ့တွင် ၎င်းကိုယ်တိုင် လက် မှတ်ရေးထိုးခဲ့သော ဥပဒေကဲ့သို့ အာဏာတည်သော အမိန့်အမှတ် (၃၉) ကို ထုတ်ပြန်ပြီး တစ်လ ခန့်အကြာတွင် ဆုံးဖြတ်ခဲ့ခြင်းဖြစ်သည်။
ဆီအုန်းစိုက်ခင်းများ ရိတ်သိမ်းခြင်းအတွက် အစေ့အဆန်များရင့်မှည့်လာခြင်းနှင့် လုပ်သား အင်အားလုံလောက်ခြင်းတို့ကြောင့် အယ်နီညိုရာသီဥတု၏သက်ရောက်မှုဒဏ်များကို လျော့ပါးစေ မည်ဖြစ်သဖြင့် မလေးရှားစားအုန်းဆီထုတ်လုပ်မှုသည် လာမည့် ၂၀၂၄ ခုနှစ်တွင် ထုတ်လုပ်မှု တိုးတက်လာနိုင်ဖွယ်ရှိကြောင်း မလေးရှားစားအုန်းဆီဘုတ်အဖွဲ့ (MPOB) က စက်တင်ဘာလ ၂၈ ရက်၊ ကြာသပတေးနေ့တွင် ပြောကြားခဲ့သည်။
အယ်လ်နီညိုရာသီဥတု ဖြစ်စဉ်များကြောင့် အင်ဒိုနီးရှားနိုင်ငံတွင် ဆီအုန်းအထွက်နှုန်း လျော့နည်းနိုင်ကြောင်း ခန့်မှန်းချက်အရ ၂၀၂၄ ခုနှစ်တွင် စားအုန်းဆီကြမ်း (CPO) ၏ စျေးနှုန်းများ သည် ပျမ်းမျှအားဖြင့် ယခုနှစ်ထက် အနည်းဆုံး ၁၁ ရာခိုင်နှုန်း ပိုများနိုင်ချေရှိကြောင်း အင်ဒိုနီးရှား စားအုန်းဆီအသင်း (GAPKI) က စက်တင်ဘာလ ၂၈ ရက်နေ့၊ ကြာသပတေးနေ့တွင် ပြောကြား ခဲ့သည်။
ထိုင်းအစိုးရသည် အယ်လ်နီညိုရာသီဖြစ်စဉ်၏ သက်ရောက်မှုများကို ဖြေရှင်းနိုင်ရန် နေ့စဉ် စောင့်ကြည့်ရေးစင်တာတစ်ခုကို တည်ထောင်ရန် စီစဉ်ဆောင်ရွက်လျက်ရှိကြောင်း Bangkok Post တွင် ဖော်ပြထားပါသည်။
အိန္ဒိယဘဏ္ဍာရေးဝန်ကြီးဌာနသည် ပြည်ပသို့ ကြက်သွန်နီ တင်ပို့မှုနှင့်စပ်လျဉ်း၍ ပို့ကုန်လုပ်ငန်းရှင်အနေဖြင့် ဘန်ဂလိုဒေသမှထွက်ရှိသော ကြက်သွန်နီအား တင်ပို့ခြင်းဖြစ်ပါက အဆိုပါ ဒေသထွက် ကြက်သွန်နီအမျိုးအစားနှင့် အရည်အသွေးတို့ကို စစ်ဆေးအတည်ပြုသည့် ပြည်နယ်ဥယျာဉ်ခြံမြေကော်မရှင်နာ၏ အသိအမှတ်ပြုလက်မှတ်ကို ပြသနိုင်လျှင် ပို့ကုန်အခွန် ကင်းလွတ်ခွင့် ရရှိမည်ဖြစ်ကြောင်း ၂၉-၉-၂၀၂၃ ရက်နေ့တွင် အမိန့်ကြော်ငြာစာ ထုတ်ပြန်ခဲ့ပါသည်။
