ကယားပြည်နယ်၊ စားသုံးသူရေးရာကော်မတီ၏ လုပ်ငန်းညှိနှိုင်းအစည်းအဝေး (၁/၂၀၂၁) ကို ၂၀၂၁ခုနှစ်၊ ဒီဇင်ဘာလ (၂၈)ရက်နေ့၊ နေ့လည် (၁၄း၃၀) နာရီအချိန်တွင် ပြည်နယ်အစိုးရအဖွဲ့ရုံး၊ စီးပွားရေးရာဝန်ကြီးရုံးခန်း၌ ကျင်းပပြုလုပ်ဆောင်ရွက်ခဲ့ရာ အစည်းအဝေးတွင် ပြည်နယ်စားသုံးသူရေးရာကော်မတီဥက္ကဌ၊ အတွင်းရေးမှူးနှင့် အဖွဲ့ဝင်များတက်ရောက်ခဲ့ကြပါသည်။
အဆိုပါအစည်းအဝေးတွင် ပြည်နယ်စားသုံးသူရေးရာကော်မတီ ဥက္ကဌ စီးပွားရေးရာဝန်ကြီး ဌာန ဝန်ကြီးဦးစိန်ဦးက အဖွင့်အမှာစကားပြောကြားခဲ့ပြီး စားသုံးသူရေးရာ ကော်မတီအတွင်း ရေးမှူး စားသုံးသူရေးရာဦးစီးဌာန ပြည်နယ်ဦးစီးမှူးဦးကျော်ဝင်းက ဌာန၏ ရည်မှန်းချက်၊ မျှော်မှန်းချက်များ၊ ဌာနမှဆောင်ရွက်နေသောလုပ်ငန်းစဉ်များအား ရှင်းလင်းတင်ပြခဲ့ပြီး ဟင်းသီးဟင်းရွက်ဆီနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေး လုပ်ငန်းရှင်များ လိုက်နာဆောင်ရွက်ရန် ညွှန်ကြားချက်အမှတ် (၁/၂၀၂၁)နှင့် ဈေးကွက်စောင့်ကြည့် စစ်ဆေးရာတွင် စစ်ဆေးတွေ့ရှိချက်များကို အမှာစာများဖြင့် အသေးစိတ်ဆွေးနွေးတင်ပြခဲ့ပါသည်။
ဆက်လက်၍ တက်ရောက်လာသောကော်မတီအဖွဲ့ဝင်များက ဈေးကွက်အတွင်းရှိ စားသုံးဆီများတွင် တံဆိပ်အမျိုးမျိုးတပ်ပြီးရောင်းချနေသည်ကိုတွေ့ရပါကြောင်း၊ ထုတ်လုပ်ခွင့်ပေးသည့် ဌာနမှ အရည်အသွေးကိုက်ညီမှု ရှိ/မရှိ ရေရှည်စောင့်ကြည့်ရန်လိုကြောင်း၊ ဥပဒေပါအချက်အလက် များကို လုပ်ငန်းရှင်များက သိရှိလိုက်နာရန်လိုကြောင်း၊ ပြည်သူများက နစ်နာဆုံးရှုံးမှုရှိလာလျှင် တိုင်ကြားမှုများရှိလာသည်ကိုတွေ့ရပါကြောင်း၊ စားသုံးသူကာကွယ်ရေးလုပ်ငန်းများပူးပေါင်းဆောင်ရွက် သွားမည်ဖြစ်ကြောင်း၊ အသီးသီးဆွေးနွေးခဲ့ပြီးနောက် အမှာစာဖြင့် တင်ပြချက်များကိုအတည်ပြု မှတ်တမ်းတင်ဆုံးဖြတ်ခဲ့ကြပြီး အစည်းအဝေးကို (၁၅၃၀) နာရီအချိန်တွင် ရုပ်သိမ်းခဲ့ကြောင်းသတင်းရရှိပါသည်။
စားသုံးသူရေးရာဦးစီးဌာန(ကယားပြည်နယ်)