မကွေးတိုင်းဒေသကြီး၊ ပခုက္ကူခရိုင်သည် စိုက်ပျိုးရေးနှင့်မွေးမြူရေးလုပ်ငန်းများကို အဓိကလုပ်ကိုင်ကြပြီး နှစ်ရှည်ပင်ဖြစ်သော သရက်သီးနှံကိုလည်း ဥယျာဉ်ခြံမြေများ၊ အိမ်ဝန်းအတွင်းရှိ စည်းရိုးတန်းများ၊ လယ်ယာမြေကွက်များတွင် အများဆုံးစိုက်ပျိုးကြသည်။ စိုက်ပျိုးရာတွင် အစေ့မှတစ်ဆင့် ရရှိသောပျိုးပင်နှင့် ခေတ်မီနည်းစနစ်ဖြင့် ကိုင်းကူး၍ရရှိသောပျိုးပင်ကို စိုက်ပျိုးကြသည်။ တောင်သူများအနေဖြင့် ရှေးယခင်က မျိုးစေ့ပျိုး၍ရသောအပင်ကို စိုက်ပျိုးမှုများခဲ့သော်လည်း သရက်ပင်မှာ အသီးရရှိရန် (၈)နှစ်ခန့်ကြာမြင့်ခြင်းကြောင့် ယခုအခါတွင် စိုက်ပင်သက်တမ်း (၃)နှစ်အကြာ၌ အသီးရရှိသော ကိုင်းကူးပျိုးပင်များကိုသာအများဆုံးစိုက်ပျိုးကြကြောင်း၊ ယခုသရက်သီးမှာ အထွက်နှုန်းကောင်း၍ အလုံးလှသည့်အပြင် စိုက်ပျိုးပြုပြင်ကုန်ကျစရိတ်လည်းသက်သာသောကြောင့် ကိုင်းကူးသရက်ပင်ကို ယခုအချိန်တွင် တောင်သူအများ ဒေသစီးပွားဖြစ်စိုက်ပျိုးမှုများကြောင်း၊ ဒေသတွင်းဝယ်ယူစားသုံးမှုများသော စိန်တလုံးနှင့် မီးချိတ်သရက်သီးမျိုးကို အများဆုံးစိုက်ပျိုးကြောင်း၊ သရက်တစ်ပင်လျှင် စိုက်ပင်သက်တမ်းနှင့် သရက်ပင်ကြီးထွားမှုအပေါ်မူတည်ပြီး သရက်သီးအလုံးရေ (၅၀၀မှ၃၀၀)ထွက်ရှိကြောင်း ဒေသခံတောင်သူထံမှသိရှိရသည်။
ဒေသတွင်းဈေးကွက်အနေဖြင့် ယခုသရက်သီးများ လှိုင်လှိုင်ပေါ်လျက်ရှိပြီး ဒေသတွင်းဈေးကွက်၌ စိန်တလုံးသရက်သီးပေါ်စတွင် အလုံးအကြီးအသေးလိုက်၍ တစ်လုံးလျှင် ကျပ်(၅၀၀-၃၀၀)၊ ယခုလှိုင်လှိုင်ပေါ်ချိန်တွင် ကျပ်(၃၀၀)ဈေးနှုန်းဖြင့်အရောင်းအဝယ်ဖြစ်နေပြီး၊ မီးချိတ်သရက်သီးတစ်လုံးလျှင် ကျပ်(၃၀၀-၂၀၀-၁၀၀)ဈေးနှုန်းဖြင့် အရောင်းအဝယ်ဖြစ်ကြောင်း၊ ယခုနှစ်တွင် ရာသီဥတုဖောက်ပြန်ခြင်းကြောင့် အသီးတင်မှုနည်းပြီး အလုံးအရွယ်အစားသေးငယ်သော်လည်း ယခင်နှစ်ထက် ဈေးကောင်းရရှိ၍ သရက်ပင်စိုက်တောင်သူများ မိသားစုစီးပွားရေးအဆင်ပြေလျက်ရှိကြောင်းသိရှိရပါသည်။
DOCA(မကွေး)